رواية حين تتغير الاقدار الفصل الثالث والثلاثون بقلم سناء الهموندي
يسألونني
... من هو ؟
فأجيب ... هو حلمٌ بعيداً جداً
ًو نجمة عالية في السماء يصعب امتلاكها
يَسألونني ... ماذا يعني لك ؟اجيب ... هو وجعي ، و المي ، وفرحي ، وأبتسامتي يسألونني ... اين هو الان ؟
أجيب ... كائن بداخلي منذ زمن...والى يوم يبعثون .؟؟
ابو علي : ام علي اليوم ترحين تبلغين خيتي ام فالح وتكليلهه شوكت ما تحب تأخذ نوره بعباتهه .
ام علي : ابفرح صدك ابو علي جا وحكمت شون .
ابو علي : حكت عوفي عليه شنهي يريدني أتنازل بكلمتي وصير عيبه بحقي ويكولون ابو علي ما وفه بكلمته .
نوره : واكفه اسمع وأحس راح يغمه عليه من الفرح شمس اجتي لزمت ايدي قوي وضحكنه العصر امي راحت لبيت خالتي جوري وبلغتهه .
جوريه : كاعده احوك بالخوص كمت ابيع بلبيت عبن تعبت مو مثل قبل تهاني تكوم تعيني بشغل البيت الله يرضه عليهه احوك واسولفلهه ايام قبل وجهال فالح تارسين عليه البيت بلعبهم وضحكهم اندك الباب طلعت تهاني تفتحه طبت ام علي ملهوفه وكالت .
ام علي : يااااا بعدج كاعده .
جوري : خايبه شمالج جفلتيني دسلمي كولي بعدين شتردين اكوم ادبج .
إم علي : اي داده كومي دبجي وحضري لعرس ابنج .
جوريه : مبين اليوم مضروبه براسج خيه شمالج عرس ايش .
ام علي : عرس غلام ام فالح عرس غلام .
جوريه : بتفاجا كصدج حكمت وافق .
ام علي : وحتى وإن ما وافق ابو علي يكول البت من صغرهه منطيهه الغلام وانا ما أتراجع بكلامي ويكول على أساس جايي دمام وكايله عمي زوج نور عبن أنا حاسبهه بحسبه اخيتي انت معليك بابوي خله عليه .
جوري : ماصدكت السمعته كعدنه أنا وام علي نسولف ونخطط شنسوي وحلفت اله اسوي عرسهم تسولف بي كل السلف راحت ام علي وانا لبست عباتي ورحت لفضه عبن البارحه جتني وكالت تريد تروح لبغداد تشوف امهه مريضه وتهاني تروح وياهه رحت عليهه وتفقت اروح وياهه وكتلهه استغلهه فرصه غلام ماكو احضرله جهاز عرسه وفعلا رجعت للبيت كبل طلعت القاصه الي اجمع بيهه فلوس غلام حسبتهن خير من الله يسون نيشان زين وزايد حضرت غريضاتي وكلت الاحلام تحضر نفسهه وتحضر لعمران سلطان ملتهي متحانات عنده مكضيهه شغل وقرايه سوده عليه هالك نفسه كعدت الفجر حضرت ريوك وصليت وكعدنه تريكنه كلنه وطلعنه وصلنه بغداد ساعه 12ونص .
بغداد 1975
هناء : اندك الباب تفاجات بجيه امي وكلش فرحت خالتي ضويه طارت من الفرح وحارت شتسوي كعدنه سوالف وضحك و الكعده متخله من تصنيف خالتي فضه جتي شوف عمه ام صادق حالتهه كلش تعبانه حجت امي بموفقه بيت ام علي وطرت من الفرح وأخيرا غلام راح يشوف فرح بحياته ثاني يوم بلغت انور اروح ويه امي للسوك نجهز لغلام وفعلا ثاني رحنه أنا وأمي وخالتي ضويه وتهاني هم اجتي تهاني هواي متغيره للأحسن يمكن شافت طيبه امي وخواتي و تغيرت امي اختارت ذهب لنوره كله ثكيل وراقي والملابس كذالك اختارت اغله وارقه شي عرفت امي تريد تثبت للكل انو احنه الحمد الله الله موفقنه ومو مثل مكال عمهم احنه ميتين من الجوع خالتي ضويه حاولت ساعد امي بالفلوس بس امي ما قبلت ورفضت هل شي عاد خالتي اشترت كم حاجه حلوه وغاليه وكالت الأمي هاي هديه لغلام رجعنه للبيت بعد هلاك وتعب وأمي مكملت كلشي ثاني يوم راحت امي وخالتي وراح وياهم انور يختارون غرفه اخشاب رجعوا من السوك وسألت ها بشرو شتريتوا .
جوريه : ماعجبني الموجودات وصيت على خشب تزكام وكال 10ايام وتكمل .
انور : انشالله بس تكمل بيدي اجيبهه بنفسي لبيتكم .
جوريه : الله يرضه عليك يمه .
هناء : بتسمت كعدو يسولون وتهاني حجت .
تهاني : صدك يمه ما كتلج سلطانه حامل و فرح بت عمه فضه حامل وحته جنتهه لعمه هم حامل .
ضويه : الله يتمملهن على خير يارب .
هناء : أنا أعرف بحمل سلطانه امي كالتي بس تفاجات بطريقه كلام تهاني دخلت بموضوع بعيد نهائي عن الموضوع النحجي بي كملت كلامهه والتفتت عليه وكالت .
تهاني : يوم الالج حبي هناوي .
هناء : ابتسمت مجامله وكلت الهه الله كاتبه يصير .
انور : حياتي أنا وهناء اجمل حياة هناء كلشي بالنسبه اليه متفاهمين ومدللتني احس بنفسي طفل بايديهه اذا يوم واحد افاركهه احس بضياع وهيه كذالك متكدر تخطي خطوه بدون متكلي وتناقشني ملينه من الدكاتره هاي السنه الرابعه النه متزوجين وبديت اخاف عليهه بكثره العلاج الحد ما هيه ملت وعافت كلشي وكلت امرهه الله سبحانه كل شي ماشي تمام اله الخلفه اذا نجاب طاري طفل كبالهه تتغير عليه من حجت تهاني هيأت نفسي لحديث هناء الي ميتغير من كم سنه كمت رحت لغرفتي اجتي هيه ورايه طبت للغرفه وسدت الباب نزعت فانيلتي وعدلت المخده لزمت ايدي وكالت .
هناء : انور اريد احجي وياك بموضوع لازم تأخذه بجديه .
انور : اعرف شراح تحجين ميعتاز تكولين .
هناء : لا هل مره يختلف الموضوع صار جدي عبن كافي 4سنوات ممجبور تتحملني .
انور: بعدهي تحجي وانا حجيت اقلد صوتهه انور كافي 4سنوات ممجبور تتحملني أنا ما اخلف روح شوفلك بنت الحلال الي تخلفلك يادوب تلحك تخلفلك جم واحد العمر يركض بينه بس ها أنا اكلك طلكني وروح تزوج لان أنا ما اتحمل وحده شاركك بيه كملت كلامي وكتلهه مو هذا الي تكولي كل مره لو هل مره اكو اضافات سحبت البطانيه تغطيت هيه على كعدتهه وصافنه لحد ما طكتهه ضحكه فززتني ولج شبيج يمعوده صوتج ام الغيره امروتج ولج هناء شجاج سكتي عاد خزيتينه أول تالي تضحكين هيج ماكو قافله مستمره تضحك وصارت حمره من الضحك جريتهه بصفي وغطيت راسهه وحضنتهه قوي وانا اضحك الضحكهه الي ماعرف شنو سببه سكتت وكالت .
هناء : يمه فحطت من الضحك معقوله هاي أنا هيج مبزعتك بحيث حافض كل كلمه اكولهه .
انور : شسوي غير أنا فقير وما احجي .
هناء : بعصبيه مصطنعه شقصدك عيني أنا وكحه وما انجرع .
انور : حضنتهه قوي وعصرتهه بحضني وانا شورطني بحبج غير وكاحتج وخبالج .
هناء : من يومهه بطلت سالفه طلكني وتزوج وكلت امري الربي وكتمت حسرتي بكلبي امي وره يومين ردت للسلف وصلهه انور للكراج وراحت هيه وعمتي فضه تهاني بقت يمنه دزيت بيد امي شغلات شتريتهن لشمس الهه وللطفل بعد مراحت امي بسبوعين راح انور للنجار وكاله يومين وتكمل وفعلا بعد يومين كملت الغرفه ورحنه أنا وأنور وتهاني هم اجتي الاهلي واخذنه الغرفه وصلنه امي من شافتنه طارت من الفرح انور وسلطان وماجد ابن عمي رتبوا الغرفه ودكدكوهه وساعتين لما كملو تغدينه سوه انور من التعب ذب روحه على المخده هوه وسلطان وانا وأمي كالت .
جوريه : كومي نرتب الغريضات مادام اخوج بعده مجاي ودزيت على شمس تجي تساعدنه .
هناء : يا يايمه جا أنا مو جاي اساعدج لو ميعجبج بس شغل حبيبتج شموسه .
جوريه : عاب هل حلك تدرين كلكم نفس المعزه عندي بس انا دزيت عليهه عبن الحركه زينه الهه هسه .
هناء : ضحكت وحضنتهه وبستهه وكتلهه يااااا شبيج حجيه كايمه ما تتحملين شقاي .
جوريه : دكملي شغلج مبين بغداد موعتج زايد مدري رجلج موعج زايد بدلاله الج كون هيج بعصا يكتلج ويخليج تبطلين هاي طولت السان .
هناء : هيه تحجي وانا ميته من الضحك مشتاقه السوالفهه الماتخلص طبت شمس من الباب صيح ياهل الداررر وينكممم ميتين عايشين .
هناء : يا هلا بالركيه التدعبل بيتنه حضنتهه وسلمت عليهه وكتلهه خيه صايره جنج ركيه .
شمس : بضحك اي والله كوه اتحرك وامج وخالتي ام علي ما يعوفني شويه اكعد كومي وكومي حتى بلكي اجيب يمعودات هوه يجي بيومه ابد هنه قافلات على القضيه عبالهن التمر والركض يجيبني ما احس اله وجتني كوشه خفيفه طايره من امي وكالت .
جوريه : خايبه أنا جايبتج تشتغلين يو سولفين .
شمس : يمه والله هذا عذاب انتو جاي تعذبوني هيج هناء احجيلج كلمه .
هناء : والله يا خيه شبيدي حكم القوي بعد .
شمس : عاطت بينه امي وبدينه نرتب ونعدل ماشاء الله امي ممخليه شي يعتب عليههه جايبه نيشان ينرفع بي الرأس كملنه وبقيت يم اهلي بتت عبن تمار ملتحق بالدوام ثاني يوم كعدتنه امي للصلاة كمت كوه صليت احسن ضهري مكسور بالنص تريك انور ورد البغداد هناء ضلت عدنه عبن امي مقرره بس يجي غلام تسوي خطوبه وغلام هل يومين ينزل خلصنه ريوك وكلمن لزمتلهه شغله وانا الوجع يروح ويجي وشويه شويه يزيد سكتت عبن كل مره هيج يصير وتمار ينخبص بيه تالي يطلع وجع طبيعي صار الضهر وانا اتلوه بسكوت استحي احجي لحد ما لزمتني هناء كاعده بالترك وعاصره بطني بقوه متحملت بعد بجيت بصوت مسموع جتي هناء مخروعه تكوم بيه .
هناء : بخوف وارتباك ششش شبيج شمس حبيبتي شجاج .
شمس : كومتني هناء وانا كوه كمت حسيت شي حار نزل عليه وكفت باوعت لهناء وفتحت عيني وعطت هناء من خوفهه عافتني وراحت تركض الأمي مدري اضحك على موقف هناء مدري ابجي من وجعي هناء راحت على عيطه وحده الأمي بصوت تصيح .
هناء : يمممممممههههه يمه يمه يممممممه .
جوريه : بخوف ورهبه جنت اصلي وسمعت هناء تصيح مادري شون خلصت الايه والاخيره وسلمت وركضت اريد افتهم شني السالفة طفر حرامي طلعلهن حيه عكرب شمالهن طلعت من الهول ولزمتني هناء بخوف وعياط .
هناء : يمههه يممممه لحكي لحكي يمه .
جورية : ولج شمالج احجي شصار .
هناء : يمه يممه شمس مدري شبيهه ومدري شصار .
جوريه : رحت للترك ويه هناء وأشوف شمس تبجي بصوت شبه مسموع ولازمه بطنهه وتمشي على كيفهه اول ما شفتهه صليت على محمد وال محمد وهناء تباوعلي متفاجاءه ومتقربت تخاف تقربت على شمس ولزمتهه وكتلهه كولي يا الله يمه لا تخافين انشالله الله يسهلج يبعد امج وصدك اخذتهه وغسلت الهه بماي حار ودزيت على ام علي جتي وفرحت من شافت شمس تطلك راحت تجيب الجده وانا فورت هيل ودارسين وكعدت اشربهه اتاخرت ام علي بالساعه وشمس الوجع زاد وهناء كاعده بصفهه لازمه ايدهه وتقره ايات وتباوعلهه بخوف كلت الشمس ادعي الاخيتج يمه تنام مثل نومتج .
هناء : شنهي يمه بيش طالبتني لا سامح الله .
جورية : عاب هل حلك قصدي تدعيلج بالذريه الصالحه .
هناء : لا يمه بعد الجاي أشوفه بشمس بطلت ماريدن هيج ابقى ولا اتحمل وجع .
شمس : اجتي خالتي ام علي والجده جانت عدهه ولاده مكمله وجتني فحصتني كالت عدهه ولاده بس بعد والبعد جرت ساعتين وانا متت من الوجع وتعبت تمنيت تمار يمي الجده تصيح دفعي وأمي لازمه بطني وتقره عليهه وخالتي وهناء منا ومنا كاعدات لأزمات ايدي هناء ماتت من الخوف أكثر مني اول مره اشوفهه تبجي هناء مكابره ودمعتهه عزيزه متحملت حالتي وكالت الأمي .
هناء : يمه فدوه شوكت جيب .
جوري : مبقى شي باذن الله .
هناء : يمه شوفيهه صارت صفره راح تموت .
ام علي : يا خاله شجاج كولي يا الله بيش طالبتهه .
شمس : وبعد تعب وصراع ويه الوجع جبت فرحتي الاولى ولد مثل الكمر خالتي ام علي من الفرح هيه وأمي بجن وهناء وياهن أنا بعد ما حسيت بنفسي اله وانا رايحه بسابع نومه كعدتني امي كالت .
جوريه : كومي يمه إذن الغروب كومي اغسلج حتى ترتاحين وترضعين ابنج .
شمس : شعور غريب ابنج كلمه جديده وحساس جديد سمعت صوته ناعم يبجي ابتسمت من شفته بيد هناء تنطي قنداخ بخاشوكه الجاي وحايره بي كومتني امي وخطيه سلطانه هم جايه بيتهه بعرب عبود كمت غسلت وجيت بفراشي هناء جابت لي ابني لزمته اوي فدوه صغير كلش اخاف هذا شون راح اشيله باوعت الأمي كالت .
جوريه : شيلي يمه لا تخافين ماكو احن من حضن الام على ضناهه .
شمس : شلته بسته اجتي خالتي ام علي هيه ومرت علي سلمن وكعدن كام يبجي الولد أخذته خالتي سكتته وباسته من رأسه ونطتنيا كالت رضعي حرت شون ارضعه استحي ياربي عاد سلطانه فتهمتني جابتلي شيله تغطيت ورضعته رضع ملهوف وانا اخاف لا يختنك مرت يومين واجه غلام وتفاجاء بيه وكلش فرح وكلساع شايل الولد وبايسه لحد الان مسميته متانين تمار يجي .
غلام : رجعت من الدوام كلش فرحت بولاده شموس رحت الحجرتي الي هيه حجره جديتي سابقا فتت بيهه واتفاجا بالي بيهه هاي شنو صحت على امي اجتي والإبتسامة على وجهه كتلهه هاي شنو يمه وانا ااشر على الغرفه امي كالت .
جوري : ابو علي رد خبر وكال جيبو عمامكم وكبعو البت بعباتهه واخذوهه .
غلام : تفاجات ونفس الوقت كلش فرحت من سمعت امي كالت ابو علي قابل الدنيه ماسايعتني من الفرح بس امي منين جابت كل هذا وشون وشوكت سوته سالتهه وسولفتلي الي صار وكالت اول ما كايللهه ابو علي على الموافقه ثاني يوم رايحه مجهزه ومن راجعه مخليه سلطان ولد عمامي ولد خالي حسين وخالي مهدي متعاونين على الغرفه مرمميهه ولابخيهه وصابغيهه طالعه غير شي وفعلا تحدد يوم الخطبه سبوع الجاي وبلغت عمامي .
شمس : ضليت عد اهلي 5ايام ورديت للبيت قبل جيه تمار بيوم بهل وقت أنا كمت على حيلي رتبت الغرفه ونفسي ثاني يوم نايمه الفجر وأحس واحد نام بصفي وحضني أنا دايره وجهي الصفحه الاخ عرفته من ريحته تمار يجي الفجر كبل ينام ويحضني ميحب يكعدني يعوفني براحتي بس انا حسيت بي هوه ذب هدومه ونام ورايه على دفو أيده وعطره غفيت وانا مخليه بصفي ابني وره تقريبا نص ساعه عاط الولد وتمار كعد مفزوع وانا على كعدته كعدت كتله شبيك تمار اسم الله اسم الله .
تمار : شمس صوت طفل .
شمس : كل عتقادي من الفجر دك الباب وفتحوله كلوله بس الضاهر ميعرف انا هم ابتسمت وكمت شغلت الضوه وهوه عيونه عليه لحد ما شلت الطفل وخليته بحضنه وكتله اجه بغيابك متحمل يجي من انت تجي هوه عيونه توسعت فرح وتلمع لمع شال الطفل بأسه برأسه وكال .
تمار : يعنييي هذا ابنه .
شمس : هزيتله راسي هوه سحبني بحضنه قوي وباسني وكال .
تمار : الف مبروك يا روح ونفس تمار متتخيلين الفرح الي انا بي حاليا اتمنا انطي من فرحي الكل العالم حتى يفرحون بكدي .
شمس : دمعت عيني وكتله سمي خطيه صار سبوع بدون اسم ضحك وكال نسمي اصيل كلش عجبني الاسم وقررنه نسمي اصيل مرت الايام واجه يوم خطوبه غلام ونور .
نوره : اسعد يوم بحياتي واكفه بنفنوفي الكريمي وشعري مفتوح على طوله كدام المرايه واحاجي نفسي معقوله راح اصير من نصيبه معقوله أنا وغلام راح نكون واحد حلم أصبح حقيقه حمدت الله وشكرته صاحت امي عليه طلعت وكعدت بنص النسوان سوينه هوه نيشان وهوه كطعان مهر اجه السيد بغرفه تمار وأبوي وعلي وتمار وغلام وفالح صاحني كميل ورحت ويا بعد ما لبست عبايه وكعد السيد يردد وانا ورا بعدهه وكلت ابوي بحكم بعدني باكر وغلام كذالك ردد وره السيد وتم العقد والابتسامه نرسمت على وجع غلام كمت رحت للغرفه وبدت صوت الهلاهل والدبج مالت النسوان اجتي خالتي لبستني الذهب وخلت الكل فاتح حلكه على نيشاني وره نص ساعه غلام طلب يشوفني اجتي امي كومتني وطبيت بغرفه شمس الي جان واكف بيهه غلام وتمار وكميل بس فاجانه تمار بكلامه وخله غلام يجن جنونه ..............
