رواية ديون النبض الفصل الرابع والثلاثون
في اللحظة اللي سابني فيها مجد وقام، حسيت قد إيه إن أنا بطعن قلبي بإيدي. ومش بس كده، أنا كمان بخلي الإنسان اللي وثق فيا، واديته الأمل، يبدأ يفقده.
وخصوصًا إنه كان شايفني إني عوضته عن فقدانه لحب أمه ، واهتمامها بيا. لكن للأسف، أنا كمان خذلته.
حسيت وقتها إن أنا دمرت في باله صورة الجنس الآخر. هو ما كانش شايف إن الجنس الآخر ينفع يقرب منه بسبب أمه. كان شايف كل ثقته في أخته وبس، لكن أنا كنت عوضته عن فقدان كبير جدًا كان حاسس بيه، ووصلته للمرحلة دي مرة تانية، بس المرة دي بإيدي أنا رجعته تاني ليأسه وكأني بقول له
لا تثق في اي شخص غير نفسك...
في اللحظة دي، فضلت قاعدة مع حازم ورغد وياسين وماما، وكلهم كانوا حاسين إن في حاجة غريبة جدًا بيني وبين مجد.
ياسين بصلي وقال:
ياسين: وعد، مالك إنتِ ومجد؟
سكتُّ شوية، وبعد كده رديت عليهم بطريقة تبين إن الموضوع مش فارق معايا.
وعد: مش عارفة ماله.
بصيت لياسين وقلت له:
وعد: شوف إنت ابنك ماله، أنا بصراحة زهقت.
سيبتهم ودخلت الأوضة، وكلهم بصوا لبعض باستغراب.
بمجرد ما دخلت الأوضة، انفجرت في البكاء، وغطيت نفسي بالبطانية وكأني نايمة. لكن كل تفكيري كان في مجد.
كنت بفكر فيه، في حالته دلوقتي، يا ترى عامل إيه؟ أكيد كلمة حزين مش كفاية توصف الحالة اللي هو فيها. أكيد إحساسه بالوحدة دلوقتي أكبر بكتير من أي وقت فات.
لقيت نفسي مش قادرة أتحمل. دقات قلبي زادت من كتر البكاء، وحسيت إن نفسي بيتقطع.
دخل حازم عليا، ولما حسيت بيه، مسحت دموعي بسرعة وقفلت عيني كأني نايمة.
حازم قعد على طرف السرير وقال:
حازم: وعد... وعد.
لكن أنا ما رديتش.
قرب مني وطبع قبلة على راسي، وبعدها خرج.
لكن أنا فضلت طول الليل حاسة بذنب كبير تجاه مجد، وبكل اللي أنا عملته فيه، ومع ذلك مش قادرة أتراجع.
افتكرت الورق اللي دكتورة جيهان ادتهولي. قمت بهدوء عشان ما أعملش صوت، وفتحت شنطتي وطلعت الورق وبصيت فيه، وكنت مذهولة.
فاضل أقل من شهرين على ميعاد انتهاء الوصية.
سكتُّ شوية، وبعد كده قلت لنفسي:
وعد: أنا خلاص كتبت بإيدي نهايتي مع مجد، لكن هو لحد إمتى هيفضل يتعذب كده؟ لحد إمتى هيستحمل ده؟
عدّى الليل طويل ومظلم، ومش بس الليل اللي كان مظلم، لكن قلبي كمان كان غرقان في الوجع والألم. حتى النبض اللي جوايا، اللي كان بيديني إحساس بالحياة، بقيت حاسة إنه تقيل عليا من كتر الوجع.
حسيت من اللحظة دي إن النبض اللي قلبي بينبضه بقى دَين عليا، لحد ما أشوف نتيجة اللي أنا عملته.
أنا عايزة أشوف مستقبل مجد قدامي زي ما أنا متخيلاه، عايزاه أحسن وأفضل. عايزة أشوفه مرتاح، ومش بس عشانه هو، لكن كمان عشان أحلامه وطموحاته وأهدافه، عشان الخير اللي جواه، وعشان الأمل اللي جواه يقدر يخرج للنور، ويوصل لناس كتير محتاجاه.
تاني يوم...
لقيت ماما بتخبط على باب أوضتي بدري الصبح، وبتقول لي:
ماما: وعد، ياسين مستنيكي عشان تتمشوا سوا.
ما كنتش عايزة أخرج، لكن حاولت أكون طبيعية. وخرجت أتمشى مع ياسين، لكن عقلي كان مشوش ومشغول، وياسين كان بيتكلم معايا وأنا سرحانة، ومعظم كلامه ما كنتش بسمعه.
وقفني وبصلي وقال:
ياسين: مالك يا وعد؟ مش عايزة تحكي لصديقك ياسين؟
بصيت له وقلت:
وعد: أنا متضايقة جدًا، ومش عارفة أعمل إيه.
بصلي وقال:
ياسين: علشان إيه بالضبط؟ علشان الموضوع اللي بينك وبين مجد؟
هزيت راسي وقلت له:
وعد: أيوه.
ياسين: طب إيه اللي مضايقك للدرجة دي؟
وعد: أنا مش قادرة آخد قرار زي ده دلوقتي، لأن أنا وهو صعب نتجوز دلوقتي...
أنا مش هقدر علي المسئولية دي حالياً...
بصلي ياسين وقال:
ياسين: في الأول والآخر، إحنا مش هينفع نضغط عليكِ ونجبرك على حاجة.
سكتُّ، وكملنا المشي، وبعدها رجعنا البيت.
كانت ماما حضرت الفطار، وقالت:
ماما: يلا نفطر بدري، عايزين نقعد مع بعض. بقالنا فترة ما بنقعدش زي ما إحنا متعودين.
قعدنا كلنا على السفرة، وكان مجد موطي راسه وساكت، لدرجة إنه ما بصش حتى في وشي، ولما شافني حتي ما سلّمش عليا.
كنت عارفة ليه، وعارفة هو حاسس بإيه بالضبط.
ياسين أول ما شافه، بصله وقال:
ياسين: عامل إيه دلوقتي يا مجد؟ أنا حاسس بيك، طول الليل ما نمتش.
مجد رفع راسه وقال:
مجد: أنا مش قادر أفطر، بعد إذنكم.
قام من على السفرة، وسابنا واتحرك ناحية أوضته.
لكن أنا كنت حاسة بيه، وعارفة هو بيمر بإيه، وعارفة إن الوجع اللي جواه أكبر بكتير من الكلام اللي ممكن يقوله.
فضلت قاعدة مكاني، ببص قدامي، وكل اللي في دماغي سؤال واحد:
هو أنا هقدر أستحمل أشوف مجد بيتوجع بسببي لحد إمتى؟
ديون النبض 🫀
بقلم الكاتبة مروة صياح ✍️🎯
في اللحظة دي، ماما بصتلي وكأنها بتقول لي أقوم أشوف مجد، لكن أنا ما كانش ينفع أتجاهل الأمر تمامًا، وفي نفس الوقت ما كانش ينفع أهتم بيه زي الأول.
اتحرقت من جوايا، وقمت من مكاني واتجهت لشقة ياسين.
دخلت وخبطت على أوضة مجد، لكن لما فتحت الباب ما كانش موجود. خرجت وناديت عليه، محدش رد. قلت يمكن واقف في البلكونة، ودخلت فعلًا لقيته واقف هناك، ساند إيده على السور وسرحان.
بصيت له وناديت عليه، لكنه ما ردش، لحد ما انتبه لوجودي.
وعد: أنت مالك؟ في إيه؟
كنت بحاول أتكلم بطريقة طبيعية، من غير ما أظهر له اهتمامي القديم، وفي نفس الوقت يحس مني أني أعمل اللي عليا وأسأل عليه.
حطيت إيدي على دراعه وقلت له:
وعد: على فكرة، أنا بكلمك! هو أنت مش سامعني؟
بصلي وقال ببرود:
مجد: أنتِ عايزة إيه؟
وعد: إحنا كلنا قاعدين بنفطر، وحضرتك تسيبنا وتقوم كده؟
مجد: ماليش نفس.
بصيت له، وعيني جت في عينه، وحسيت إني هضعف. ما كنتش قادرة أستحمل أشوفه بالحالة دي، ولا أشوف الوجع اللي أنا كنت السبب فيه.
وعد: على العموم، براحتك. بس لو ما فطرتش هتتعب، خد بالك من نفسك شوية.
سيبته وخرجت، لكن الحقيقة إني كنت بتقطع من جوايا. كنت عايزة أرجع له وأحضنه وأقوله إن كل اللي بيحصل ده مش بإيدي، وإن آخر حاجة كنت أتمنى أوصل لها هي إني أشوفه موجوع بسببي...
لكن عين مجد كانت عليا لحد ما غبت عن عينه...
الحزن والآسي اللي كان جواه لو اتوزع علي قلوب لكفاهم الم ووجع...
وأنا رجعت تاني وكملت فطاري، وحاولت أبان طبيعية قدامهم.
وعد: هو مالوش نفس دلوقتي، هيفطر بعدين.
بصيت لحازم وقلت له:
وعد: صحيح يا حازم، أنا محتمل أخرج على الساعة واحدة، ومش عارفة هرجع إمتى.
رفع راسه وبصلي باستغراب.
حازم: يعني إيه؟
وعد: أنا وزمايلي عايزين نتجمع مع بعض.
حازم: ما أنتِ مع زمايلك على طول!
وعد: لأ، مش زمايلي في الجامعة. أنا اتفقت أنا وندى صاحبتي، وزمايل تانيين ليا من كليات مختلفة، إننا نقضي اليوم النهارده مع بعض، واحتمال كمان نتغدى سوا. ممكن أرجع بالليل على الساعة تمانية أو تسعة، مش عارفة.
حازم: الموضوع ده جديد يا وعد. أنتِ ناسية إن النهارده الجمعة؟ إحنا بقالنا كتير تقريبًا ما قعدناش مع بعض زي زمان.
بصيت له وقلت:
وعد: بس أنا حاسة إني عايزة أخرج مع صحابي. بقالي كتير ما شفتهمش، وأنا كمان مضغوطة جدًا في المذاكرة وفي جامعتي، وأنت عارف قد إيه كليتي صعبة. أنا عايزة أفك عن نفسي شوية.
بصلي وسكت، وبعدها قال:
حازم: طيب، حاولي تخرجي معاهم شوية، وتكوني موجودة وقت الغدا.معادك الغدا تكوني هنا....
وعد: هكون متابعه معاك على التليفون.
قمت واتحركت ناحية أوضتي.
والحقيقة إني ما كنتش متفقة مع زمايلي ولا صحابي على أي خروجة. أنا كنت عايزة أهرب من اليوم كله، من وجودي وسطهم وأنا بتظاهر إني مش مهتمة بمجد، ومن إحساسي إني بتجاهله، مش بس في قعدتنا، لكن كمان في حياتي كلها.
استعجلت وخرجت من البيت، وما كنتش عارفة أنا رايحة فين.
لكن لقيت نفسي بفكر في الأماكن اللي أنا ومجد رحناها سوا. كنت عايزة أروح كل مكان جمعنا، وأحس إني موجودة في الأماكن اللي كان فيها معايا، بس المرة دي لوحدي.
من غير ما حد يشوف دموعي، ومن غير ما حد يسمع صوتي وأنا بصرخ من الوجع.
كنت عايزة أصرخ وأنا لوحدي، وأتوجع وأنا لوحدي، وأحس بألمي وعذابي بعيد عن عيون الكل.
كنت عايزة أحس إني فعلًا بعدت عنه، حتى لو كل مكان هروحه هيفكرني بيه.
فضلت لوحدي فعلًا، ورحت كل مكان كنا فيه مع بعض، وقفلت تليفوني على الصامت علشان محدش يقدر يوصل لي.
أما مجد...
فكان طول اليوم قاعد في أوضته ساكت، وتفكيره كله معايا.
ما كانش مصدق إني خدعته بالطريقة دي، وإن أنا قربت منه علشان مصلحتي. ما كانش مصدق إن كل ده يطلع مني، وإن أنا أكون نفس الإنسانة اللي قربت منه وقالت له إنها بتحبه.
حتى اللحظات الجميلة اللي كانت بينا، والضحك والهزار والقعدات اللي جمعتنا، بقى بيشك فيها. هل كل ده كان كذب وخداع؟
كان بيحاول يقوي نفسه ويقنعها إنه خلاص لازم يبعد عني، لكنه ما كانش قادر.
كل ما يفتكر حاجة حلوة جمعتنا، يحس بوجع أكبر. الذكريات اللي كانت مصدر سعادته بقت بتعذبه، وكأن كل لحظة عاشها معايا بقت دليل جديد على الوجع اللي هو فيه.
عدّى اليوم، وجه وقت الغدا.
حازم رن عليا كتير، لكن أنا ما رديتش. كنت بشوف التليفون بينور قدامي، وبسيبه من غير ما أرد، وكأني فعلًا مشغولة مع أصحابي وزمايلي.
لحد ما حازم يئس، واتغدوا هما مع بعض.
لكن اليوم ما كانش بطبيعته. صحيح كلهم كانوا موجودين، واتجمعوا على السفرة، لكن ما كانش فيه نفس القعدة اللي اتعودوا عليها.
استنوا لما أرجع، على أمل إننا نقعد حتى ساعة أو ساعتين مع بعض، ويمكن الوضع اللي إحنا فيه من فترة يتغير.
لكن أنا اتأخرت عن المعاد اللي كنت قايلة عليه.
رجعت الساعة تسعة ونص، وكنت حاسة إني من كتر المشي والصراع اللي جوايا مش قادرة أتحرك.
أول ما دخلت البيت، حازم لأول مرة علا صوته بالطريقة دي.
حازم: أنتِ كنتِ فين يا وعد؟!
بصيت له وقلت:
وعد: أنا ما عملتش حاجة غلط! فيها إيه لما أقضي يومي مع صحابي؟
حازم: وتليفونك فين؟ رنيت عليكِ كتير!
وعد: من إمتى هو أنا مش من حقي أخرج وأقابل صحابي؟!
بصيت له وقلت بانفعال:
وعد: من هنا ورايح أنا مش هقفل على نفسي. أنا من حقي أصاحب وأشوف أصحابي، وأنا عايزة أعيش لنفسي شوية!
كانوا كلهم موجودين، وكلهم سمعوا كلامي.
بصيت لحازم وكملت:
وعد: أنا فعلًا تعبت يا حازم، وزي ما قلت لك، أنا ما بعملش حاجة غلط. أنت مش وصي عليا!
حازم بصلي باستغراب، واتصدم من كلمتي.
حازم: الكلمة دي ليا أنا يا وعد؟ لحازم أخوكي؟!
في اللحظة دي حسيت إني بحط نفسي في دايرة لوحدي، وإن حتى حازم، أخويا، بقيت بوجعه بكلامي.
ما قدرتش أبص في عينه، وجريت على أوضتي وقفلت الباب عليا.
فضلت منهارة من البكاء.
ماما خبطت على الباب، لكن ما فتحتلهاش. كنت سامعة صوتها وهي بتنادي عليا.
ماما: وعد... وعد، افتحي يا حبيبتي. علشان خاطري افتحي.
لكن أنا ما رديتش.
حسيت كأني قفلت على نفسي باب سجني بالحديد، ومش عايزة أخرج منه تاني.
في اللحظة دي، فهمت إني ما بعدتش عن مجد وبس، أنا كمان حطيت حدود حواليا علشان محدش يعرف اللي حصل، ومحدش يعرف اتفاقي مع دكتورة جيهان.
وفعلًا، من اللحظة دي بدأت أظهر لهم إني اتغيرت تمامًا في كل حاجة.
تاني يوم...
صحيت الصبح بدري، زي ما اتعودت، وخبطت على ياسين بنفس النشاط والحيوية اللي هو متعود يشوفني بيهم.
لكنه كان مستغربني.
بص في وشي وقال:
ياسين: إيه ده يا وعد؟!
وعد: مالي يا ياسين؟ إيه؟ شكلي مش عاجباك؟
بصلي وابتسم وقال:
ياسين: لأ، بالعكس، أنتِ جميلة قوي. بس أنا مش متعود إنك تهتمي بنفسك بالطريقة دي. ليه اهتمامك بقى زايد قوي كده؟ ومبالغ فيه عن اللزوم؟ جمالك الطبيعي أحسن من اللي أنتِ عملاه في وشك ده.
بصيت له وقلت:
وعد: أنا مش عاملة حاجة يا ياسين! فيها إيه لما أهتم بنفسي زي البنات؟ أنا كل اللي حطاه روج هادي، وماسكرة في عيني، وسايبة شعري زي ما هو.
بصلي وقال:
ياسين: ولبس الترنج اللي أنتِ لابساه، ليه لافة الجاكت حوالين وسطك كده؟
وعد: وفيها إيه؟
ياسين: أنا مش متعود أشوف دراعك باين كده. أنتِ دايمًا بتداري جسمك.
بصيت له وقلت ببساطة:
وعد: أبدًا، تغيير.
ياسين: الجو برد، البسي الجاكت علشان ما تعييش.
بصيت له وسمعت كلامه، ولبست الجاكت فعلًا.
وبعدها قلت له:
وعد: طب ممكن بقى نمشي؟ ننزل نتمشى ونجري زي ما متعودين. أنا حاسة إن جوايا طاقة رهيبة!
بصلي وسكت، وبعدها نزلنا سوا.
كنت متعمدة أجري كأني بحاول أهدم وأكسر كل الصراع اللي جوايا، لدرجة إني ما كنتش بدي لنفسي فرصة أرتاح.
كنت بشوف ياسين يقعد ويرتاح شوية، فأفضل أجري حواليه وأرجع له تاني.
لحد ما تعبت فعلًا، وقعدت جنبه.
وعد: يلا نرجع، علشان عندي جامعة.
وفعلًا رجعنا البيت، وأنا بحاول أبان طبيعية، وكأن مفيش أي حاجة بتحصل جوايا.
لكن الحقيقة إن كل خطوة كنت باخدها، وكل محاولة مني إني أظهر قوية، كانت بتخبي وراها وجع أكبر من اللي قبله.
ديون النبض 🫀
بقلم الكاتبة مروة صياح ✍️🎯
لما رجعت الشقة أنا وياسين، دخل هو شقته، وكان مجد صحي وبدأ يجهز نفسه علشان ينزل. اليوم ده كان رايح المستشفى الجامعي، وأنا كمان كان عندي سيشنز عملي في المستشفى.
دخلت شقتي وغيّرت هدومي، وبعدها وقفت قدام المراية وبدأت أجهز نفسي.
المرة دي قررت أعمل حاجة مختلفة.
كنت طول الفترة اللي فاتت حابسة نفسي في دايرة المذاكرة والجامعة، ونسيت نفسي تمامًا. أغلب هدومي بقت كاجوال، تونيكات طويلة وفستات على بناطيل جينز، لدرجة إن فيه فساتين في الدولاب بقالها فترة طويلة ما لبستهاش.
فتحت الدولاب وفضلت أبص للهدوم شوية، لحد ما عيني وقعت على فستان، طلعته ولبسته، وحطيت فوقه جاكيت جينز. سرّحت شعري وسيبته منسدل، وحطيت مكياج هادي، وبعدها بصيت لنفسي في المراية.
ابتسمت ابتسامة صغيرة.
ما عملتش كده عشاني ولا أني أظهر جمالي ليا كإهتمامي بنفسي... لاء....
كنت عاوزه اوصل للمل إني بفمر في نفسي ومصلحتي وبس...
مش عارفة كنت بحاول أقنع نفسي بإيه، ولا إذا كان التغيير ده علشاني فعلًا، ولا علشان أثبت لنفسي قبل أي حد تاني إني لسه قادرة أعيش.
خرجت من أوضتي، وأول ما أمي شافتني، ابتسمت بإعجاب وقالت:
أمي: بسم الله ما شاء الله! أيه وعد الجمال ده؟ يا بنتي، ده إنتِ نسيتي إنك بنت!
ضحكت وأنا بقرب منها.
وعد: خلاص يا ماما، من هنا ورايح هاخد بالي من نفسي، وهركز مع نفسي كويس قوي. إنتِ عايزة حاجة يا ماما؟ أنا ماشية علشان ما أتأخرش.
أمي: لا يا حبيبتي، ربنا يوفقك ويحفظك.
ابتسمت لها، وخدت حاجتي وفتحت باب الشقة.
لكن أول ما خرجت، لقيت مجد خارج من شقته هو كمان.
بص لي، وفجأة وقف مكانه.
كانت نظراته مليانة دهشة، كأنه مش مستوعب التغيير اللي شافه قدامه. وأنا، رغم كل اللي جوايا، قابلت نظراته بابتسامة هادية، وكأني طبيعية جدًا معاه، وكأن مفيش أي حاجة اتغيرت بينا.
قربت منه واتكلمت بخفة:
وعد: صباح الخير يا دكتور. كل ده نوم؟ يا ترى هتاخدني في طريقك وتوصلني، ولا أشوف تاكسي؟
فضل باصص لي من غير ما يرد، وبعد لحظات قال بنبرة مستنكرة:
مجد: إيه اللي إنتِ عاملاه في نفسك ده؟
بصيت له باستغراب مصطنع.
وعد: إيه؟ مش عاجبك؟
مجد، بحدة: أنا بقولك إيه اللي إنتِ عاملاه في نفسك ده؟
وعد: في إيه يا مجد؟ أنا مش عاملة حاجة! إنت شايفني في حاجة غريبة؟ كل الحكاية إني بدأت أخد بالي من نفسي ومن شكلي شوية.
كنت ضاغطة على نفسي جدًا ما بين المذاكرة والجامعة، وفيها إيه لما أخد بالي من حالي كبنت؟
مد إيده ومسك دراعي، وقال بصرامة:
مجد: ادخلي امسحي اللي في وشك ده!
بصيت له، وابتسامتي اختفت، لكن نبرة صوتي فضلت ثابتة.
وعد: مش همسح حاجة، وإنت مالكش حكم عليا. إنت لا خطيبي ولا زوجي علشان تتحكم فيا بالطريقة دي!
لسه مخلصة كلامي، لقيت حازم نازل، وأول ما شافني، وقف وبص لي بنفس نظرة الاعتراض.
حازم: إيه اللي إنتِ عاملاه ده؟! ادخلي غيري! ادخلي امسحي اللي في وشك ده ولمي شعرك!
بصيت لهم هما الاتنين، وحسيت إنهم متفقين عليَّ من غير حتى ما يتكلموا مع بعض.
وعد: مش هغير حاجة، ولا همسح حاجة من وشي. أنا ما بعملش حاجة غلط، وطالما ده شكلي، فأنا حرة أعمل فيه اللي أنا عايزاه.
حازم قرب مني ومسك دراعي، وقال بغضب:
حازم: أنا عديتلك اللي حصل امبارح بمزاجي، لكن والله العظيم يا وعد، لو ما دخلتي ومسحتي اللي في وشك ده ولميتي شعرك، ليكون ليا تصرف تاني خالص!
بصيت له بتحدٍّ، وسألته:
وعد: يعني هتعمل إيه يعني؟
من غير ما يستنى رد تاني، شدني ناحية الشقة، وأنا بحاول أخلّص دراعي من إيده.
مجد كان لسه واقف بره، بيتابع اللي بيحصل، وعينيه عليَّ كأنه مش مصدق التغييرات اللي حصلت في شخصيتي، مش بس في شكلي.
أما حازم، فدخلني الشقة وقال بتهديد واضح:
حازم: اعملي حسابك، لو ما رجعتيش لحالك، أنا همنعك إنك تروحي الجامعة!
بصيت له، والغضب اللي جوايا المرة دي كان أكبر من إني أسكت عليه.
وعد: وإنت كمان مالكش حكم عليا! أنا مش صغيرة ولا قاصر يا حازم.
إنت بدأت حياتك زي ما إنت عايز، وأنا كمان ليا حياتي، وهبدأها زي ما أنا عايزة.
لا إنت ولا مجد....
ورجعت بصيت لمجد.....
وكملت كلامي ولا غيركم هتتحكموا فيا! أنا ما عملتش حاجة زيادة عن اللي بنات كتير بيعملوه.
سحبت دراعي من إيده، وكملت وأنا بحاول أسيطر على انفعالي:
وعد: بعد إذنك، سيبني بقى علشان عندي جامعة ومش عايزة أتأخر عليها.
ما استنتش رده، وخرجت من الشقة.
بصيت لمجد للحظة، لكن ما وقفتش، ولا حاولت أشرح له حاجة. سيبته مكانه، ودخلت الأسانسير ونزلت.
وأول ما الأسانسير اتحرك، اختفت الابتسامة اللي كنت مرسماها على وشي.
كنت مش قادرة.
كل يوم كنت بتعود على وجع جديد، على الوحدة، وعلى إني أبعد عن الناس اللي قلبي متعلق بيهم. واتعودت كمان إني أظهر قدامهم بصورة مش شبهي، وأخليهم يشوفوا مني حاجات عمرهم ما اتعودوا يشوفوها.
مش علشان أنا عايزة أكون كده، لكن علشان كنت برسم صورة لوعد قدام مجد، صورة تخليه يكرهني ويبعد عني بإرادته.
كنت عايزاه يكرهني، بدل ما يفضل يحبني ويتعذب بسببي.
يمكن كنت بوجع نفسي أكتر ما بوجعه، لكن بالنسبالي كان ده أهون من إني أشوفه بيتألم عشاني.
وصلت الجامعة، وأول ما دخلت، كان التغيير واضح جدًا لزمايلي. فضلوا يبصوا لي باستغراب في البداية، وبعدها التفوا حواليا، وكل واحد فيهم بيعلق على شكلي الجديد وهو بيضحك ومبسوط.
حاولت أندمج معاهم وأبادلهم الضحك، وكأني فعلًا بدأت صفحة جديدة من حياتي.
وبعد شوية، لمحت مجد داخل الجامعة.
قلبي اتقبض أول ما شوفته، لكني بسرعة رجعت أتصرف بطبيعية، وكأني ماخدتش بالي منه.
في اللحظة دي، كان دكتور سمير معدي من قدامي. أول ما شافني، ابتسم وقرب مننا، وبعد ما سلم علينا كلنا، بص لي بنظرة كان واضح فيها إعجابه الشديد.
دكتور سمير: إزيك يا دكتورة وعد؟
وعد: الحمد لله يا دكتور، حضرتك عامل إيه؟
دكتور سمير: الحمد لله، كويس.
ابتسمت له، وفي نفس اللحظة كنت واخدة بالي إن مجد بدأ يركز معايا، وإن عينيه بتتنقل بيني وبين دكتور سمير.
حسيت إن الفرصة جت لحد عندي.
قربت من دكتور سمير، وسألته بابتسامة:
وعد: دكتور، حضرتك رايح السيشنز دلوقتي؟ ممكن نمشي سوا؟
بص لي وبعدها ابتسم وقال:
دكتور سمير: تمام يا وعد، يلا.
اتحركت معاه، لكن قبل ما أمشي، بصيت ناحية مجد للمرة الأخيرة.
كان واقف مكانه، باصص لي بنظرة مش مصدقة، وكأنه مش قادر يستوعب اللي بيحصل قدامه.
كملت طريقي مع دكتور سمير، لكن جوايا كان فيه صوت تاني، صوت بيحاول يقنعني إن اللي بعمله صح، وإن دي الطريقة الوحيدة اللي هتخلّي مجد يفهم إني خلاص بقيت بعيدة عنه.
أنا ما كنتش بقرب من دكتور سمير علشان حبيته، ولا علشان أنسى مجد، ولا حتى علشان أبدأ معاه حكاية جديدة.
أنا كنت بعمل كل ده علشان أوصل رسالة واحدة لمجد.
رسالة يمكن ما كنتش هقدر أقولها له بصوتي، فقررت أخليه يشوفها بعينيه.
إنه ما بقاش فارق معايا.
حتى لو الحقيقة كانت عكس كل ده تمامًا.
حتى لو قلبي، اللي كنت بحاول أقنعه إنه ينسى، لسه متعلق بيه أكتر من أي وقت فات.🫀❤️🩹💔
