رواية ديون النبض الفصل الخامس والثلاثون
كان مجد متضايق جدًا لما شافني أنا ودكتور سمير ماشيين مع بعض ومتجهين للسيشن العملي، وأنا عاملة نفسي مش واخدة بالي منه.
دخلنا العنبر، وكلنا لبسنا البالطوهات، ووقفنا مستنيين شرح العملي ودكتورة المادة تدخل لنا.
كنت واقفة وسط زمايلي، لكن عقلي كان في مكان تاني خالص. كل شوية عيني تروح ناحية باب العنبر، مستنية أشوف مجد وهو داخل.
دخل مجد، وبدأ يشرف على بعض المجموعات زي ما بيعمل كل مرة، لكن أنا ما كانش في دماغي غيره. كنت واقفة وسط زمايلي، وبحاول أبان طبيعية، رغم إن كل تركيزي كان معاه.
بدأنا نتوزع على المجموعات، وفي اللحظة دي قرب مني دكتور سمير ووقف جنبي، وبدأ يتكلم معايا. كنت برد عليه بشكل عادي، لكن أول ما لمحت مجد عينه معانا، بصيت لسمير وابتسمت، وبدأت أتكلم معاه باهتمام وكأن مفيش حاجة شاغلة بالي.
وأول ما اتأكدت إن مجد شافنا، بعدت بسرعة عن سمير، وكأني كنت بتكلم مع دكتورة زميلتي.
فضلنا حوالي تلات ساعات بنستمع للشرح، وبنكشف على بعض المرضى، ودكتور سمير كان بيتناوب على الإشراف على المجموعات، ومجد كمان كان بيعمل نفس الاشراف.
لكن مجد ما كانش على طبيعته خالص.
كان واضح عليه الحزن والزعل، والأغرب إنه ما كانش بيبص ناحيتي حتى.
في اللحظة دي، أميرة صاحبتي لاحظت اللي بيحصل. قربت مني، ومسكت إيدي، وقالتلي:
أميرة: وعد، هو دكتور مجد ماله؟ أنتوا زعلانين؟
وعد: زعلانين إيه يا أميرة؟ بعد إذنك، أنا عايزة أركز في دراستي.
بصتلي باستغراب، وقالتلي:
أميرة: إيه اللي إنتِ بتقوليه ده؟
وعد: بعد إذنك، أنا مش عايزة أتكلم في الموضوع ده. كل شيء قسمة ونصيب، وأنا بصراحة مش مرتاحة.
بصتلي أميرة وسكتت شوية، وبعدها قالتلي بصراحة:
أميرة: بصراحة يا وعد، دكتور مجد ما يتعوضش. إنتِ اللي خسرتيه على فكرة، مش هو.
بصتلها بصدمة، وما عرفتش أرد عليها.
هقولها إيه؟ أحكيلها إيه؟
أفهمها إزاي إن كل اللي أنا بعمله ده مش معناه إني مش بحبه؟ وإن أكتر شخص نفسي أقرب منه هو نفسه اللي أنا مضطرة أبعد عنه؟
لكن مهما كان اللي جوايا، كنت مصممة أكمل في اللي بدأته، وأحاول أبان طبيعية قدام الكل.
لكن أميره لاحظت كمان وجود د سمير بيقرب مني ومهتم بيا علي غير العاده...
وده خلاها تندهش من الامر ده.... فقررت تسألني...
أميرة رجعت تتكلم معايا تاني، وقالتلي:
أميرة: وبالنسبة لدكتور سمير بقى؟
بصتلها بحدة، وقلت:
وعد: وبعدين معاكي يا أميرة؟ أنا قلتلك ما تكلمنيش في أي حاجة تخص الأمور دي. أنا هنا علشان دراستي وبس.
سكتت أميرة وما ردتش عليا.
وانتهى يومي في الجامعة، وكنت لسه هتحرك علشان أرجع البيت، لكن لقيت دكتور سمير واقف جنب عربيته.
بصلي وقال:
د. سمير: وعد، تعالي أوصلك.
حسيت بإحراج شديد، وقلتله:
وعد: شكرًا يا دكتور، معلش. أنا مش هرجع البيت دلوقتي، لسه قدامي وقت.
د. سمير: أيا كان، تعالي أوصلك....
ابتسمت وقلت له ما تقلقش يا دكتور.... أنا مش تعبانه... ولا مصدعه...
ابتسم وقال مش مطمن لك بصراحه....
وعد: لا، الحمد لله، أنا كويسة. ما تقلقش عليا.
د. سمير: يلا يا وعد، ما تكسفيش.
في اللحظة دي، لمحت مجد وهو خارج من باب الجامعة.
بصيت لدكتور سمير، وابتسمت، وقلتله:
وعد: شكرًا يا دكتور.
فتحت باب العربية وركبت جنبه.
وفي اللحظة دي، مجد شافني.
حسيت بنار جوايا، وكأن كل حاجة بتوجعني أكتر مع كل خطوة باخدها بعيد عنه.
لكن في نفس الوقت، كنت عارفة إن اللي شافه بعينه بيأكد له الكلام اللي سمعه في المكالمة المزيفة.
مكالمه ندي صاحبتي....
لما قلت وكأني بكلمها إن فيه شخص بيقرب مني بس متردده... لما مجد يبعد عني....
هو شايفني مع دكتور سمير طول اليوم، وكل ما سمير يقرب مني، الصورة اللي بتتكون في دماغ مجد بتبقى أسوأ.
كنت قاعدة ساكتة جوه العربية، وحاسة بإحراج شديد، لكن ما كانش في إيدي غير إني أكمل في اللعبة دي، مهما كان تمنها.
في الطريق، قلت لدكتور سمير إني رايحة أشتري شوية أدوات وخامات لشغل الريزن بتاعي.
بصلي وقال:
د. سمير: لو هتتأخري، ممكن أعدي عليكي وأوصلك بدل ما ترجعي لوحدك.
كنت عايزة أهرب من الموقف كله، فقلتله:
وعد: لا، شكرًا يا دكتور. حضرتك ممكن تتفضل أنت.
وبعدين كملت كلامي بتردد:
وعد: أنا بصراحة مش عارفة...
بصلي وقال:
د. سمير: وعد، كنت عايز أكلمك في حاجة.
حسيت إنه عايز يفتح معايا موضوع أنا مش مستعدة أتكلم فيه، فقلت بسرعة:
وعد: معلش يا دكتور، أنا مستعجلة قوي دلوقتي، وبعد كده محتاجة أرجع البيت علشان أراجع المحاضرات والسيشنز اللي أخدناها النهارده.
هز راسه، وقال:
د. سمير: لو احتجتيني في أي حاجة، رني عليا.
وعد: شكرًا يا دكتور.
نزلت ودخلت المكان اللي بشتري منه خامات الريزن، مع إن كان عندي بالفعل أدوات وخامات في البيت، لكن كنت محتاجة أهرب من انه يوصلني للبيت...
اشتريت حاجات بسيطة، وما أخدتش أكتر من عشر دقايق، وخرجت على طول.
لكن أول ما خرجت، اتفاجئت إن دكتور سمير لسه مستنيني.
عملت نفسي مش واخدة بالي منه، وأتحركت، لكنه وقف بعربيته قدامي.
بصيتله باستغراب مصطنع، وقلت:
وعد: دكتور، حضرتك ما رجعتش ليه؟
د. سمير: بصراحة، قلت أستناكي. بس إنتِ ما أخرتيش.
اترددت في الكلام، وبعدين قلت:
وعد: ما لقيتش كل اللي أنا عايزاه، وحسيت إني مش قادرة أكمل، فقلت أرجع.
د. سمير: طب يلا اركبي علشان أوصلك.
هزيت راسي، وقلتله:
وعد: دكتور، أنا بتعب حضرتك معايا.
د. سمير: اركبي يا وعد.
وفي الآخر ركبت.
وصلني لحد باب العمارة، ونزلت من العربية بعد ما شكرته.
كان باصصلي من العربية وهو مبتسم، وأنا كمان كنت ببتسم ابتسامة عادية وبشكره.
لكن اللي ما كنتش أعرفه إن مجد كان واقف في البلكونة، وشاف الموقف كله.
واللي جه في باله وقتها إني كنت مع سمير طول الفترة دي، من بعد ما خرجت من الجامعة لحد اللحظة اللي وصلت فيها البيت.
وأنا متجهة لباب العمارة، رفعت عيني بالصدفة ناحية البلكونة، وشوفته واقف.
اتحرقت من جوايا أول ما عيني جت في عينه، لكن بدل ما أبين أي حاجة، أظهرت إني مبسوطة وسعيدة، وكأن اللي حصل كله عادي جدًا بالنسبة لي.
طلعت الشقة، ولقيت ماما ورغد وياسمين قاعدين مع بعض.
أول ما دخلت، سلمت عليهم بابتسامة، وكأني راجعة من يوم عادي مفيهوش أي حاجة.
لكن ماما بصتلي وقالت:
ماما: وعد، ينفع اللي حصل ده الصبح؟
بصيتلها وقلت:
وعد: ماما، بعد إذنك، أنا مش عايزة حد يعكر مزاجي. أنا ما عملتش حاجة. فيها إيه لما أخد بالي من نفسي شوية؟ إنتوا طول عمركم بتشتكوا مني علشان ما باخدش بالي من نفسي، ولما بدأت أعمل كده دلوقتي، بتلوموني؟
بصتلي ماما وقالت بهدوء:
ماما: إنتِ عارفة إني ما بلومكيش على كده، لكن أنا بلوم عليكي حدتك في الكلام مع أخوكي. بقى حازم، اللي طول عمره مش مقصر معاكي في حاجة وشايفك بنته، تزعليه بالشكل ده يا وعد؟
حسيت إني اتضايقت من نفسي، لكن حاولت أبان عادية، وقلت:
وعد: خلاص يا ماما، لما ييجي أنا هصالحه. أنا برضه ما أقدرش أخليه زعلان مني.
رغد بصتلي وقالت:
رغد: وبالنسبة لمجد؟
لفيت وشي الناحية التانية، وأتنهدت، وقلت:
وعد: ماله مجد؟ على فكرة، أنا مش هضغط على نفسي أكتر من كده.
أخويا ليه حق عليا، وحتى لو أنا غلطانة، هروح أكلمه وأصالحه. لكن بالنسبة لمجد، أنا ما دستلوش على طرف ولا زعلته في حاجة. وبعدين هو الجواز بالعافية يعني؟ كل شيء قسمة ونصيب.
بصوا لبعض بصدمة من ردي، وكأنهم ما كانوش متوقعين إني أتكلم بالطريقة دي.
ياسين تدخل في الكلام، وقال:
ياسين: وعد، إحنا اتفقنا إننا مش هنتكلم في الموضوع ده. وخدي راحتك.
بصيتله وقلت:
وعد: يعني إنت يا ياسين مش سامع رغد بتتكلم إزاي؟
رغد ردت بسرعة:
رغد: يا وعد، أنا ما قصدش حاجة، بس كل اللي بتكلم فيه إن إنتِ ومجد بقالكم كام يوم مش على طبيعتكم. وهو دايمًا زعلان، وإنتِ ولا كأن مجد وزعله على بالك.
بصيتلها وقلت بجدية:
وعد: اسمعيني يا رغد كويس. يعني أنا إما أوافق على الجواز علشان مجد يكون مبسوط، وبعد كده أفضل شايلة مسؤولية في دماغي، وخايفة أكون قصرت في حقه أو في بيتي أو في مذاكرتي؟ أكيد وقتها محدش فيكم هينفعني.
وأتا دلوقتي واخده قراري وما بفكرش في الجواز دلوقتي...
أنا بعمل اللي شايفاه صح واللي في مصلحتي دلوقتي.
وسبتهم ودخلت الأوضة.
سمعت ماما بتنادي عليا:
ماما: يا وعد، إنتِ مش هتتغدي؟
وعد: أه يا ماما، جهزوا، ولما تجهزي نبقى نتغدى سوا زي ما متعودين. على الأقل نتجمع وقت الأكل.
وبعد وقت، حازم جه، وأنا ما كنتش شوفته.
خرجت من الأوضة، ولقيتهم كلهم متجمعين على السفرة.
بصيت لحازم، وقربت منه، وكنت فعلًا متضايقة علشان عارفة إنه زعلان مني. وناديت عليه...
وعد : حازم...
رفع راسه وبصلي، وقال:
حازم: نعم يا وعد؟
قعدت جنبه، وقلتله:
وعد: أنا مش عايزاك تزعل مني، بس أنا فعلًا حاسة إني كنت مضغوطة جدًا، ومحتاجة أغير.
حاسة إني عايزة أحس بنفسي. هو ده يمنع إني أشوف نفسي كبنت؟
هز راسه وقال:
حازم: أنا مش بتكلم على كده يا وعد، وإنتِ فاهمة. بس إحنا لينا حدود.
قربت منه، ولفيت دراعي حوالين جسمه، وقلتله برجاء:
وعد: حازم، ما تزعلش مني علشان خاطري. أنا ما أقدرش أتحمل إني أتخيل حياتي وإنت زعلان مني. إنت بالنسبة لي مش حازم أخويا وبس. أنا شايفاك بابا وأخويا وصاحبي وصديقي وكل حاجة.
بصلي وابتسم، وطبع قبلة على راسي، وقال:
حازم: إنتِ عارفة إني عمري ما هزعل منك. وأنا عارف إن طريقة كلامك دي غصب عنك.
بس إنتِ عارفة إنك بالنسبة لي بنتي الكبيرة، حتى لو بيننا تلات سنين بس. أنا طول عمري شايفك بنتي اللي لسه ربنا ما رزقنيش بيها.
قرب من خدي، وكمل بابتسامة:
حازم: لو ربنا رزقني ببنوتة، نفسي تكون زيك، نفس دماغك وشقاوتك.
بصيتله وابتسمت، وحسيت براحة كبيرة بعد ما اتصالحنا.
لكن وسط اللحظة دي، كان مجد قاعد معانا.
كان موطي راسه، وبيسمع كلامنا، من غير ما يرفع عينه ويبصلي.
والحقيقة إن ده وجعني أكتر مما كنت متخيلة.
كنت نفسي يرفع عينه، ويبصلي ولو للحظة واحدة. كنت مشتاقة أشوف عينيه وأتأمل ملامحه، حتى لو كان حزين، وحتى لو مش قادر يكلمني.
كل اللي كنت عايزاه إني ما اتحرمش من وجوده وهو معايا.
لكن كان واضح إن اللي جواه أقوى منه. الصراع والحرب اللي عايشها كانوا كفيلين إنهم يهدوه من جوه، رغم إنه كان قاعد قدامنا ساكت، وبيحاول يبان قوي وصامد.
بدأنا نتغدى كلنا، من غير ما أتكلم مع مجد كلمة واحدة، وهو كمان ما كلمنيش.
أكل حاجة بسيطة، وبعدها قام بسرعة.
فضلت باصة له، وأنا مش مستحملة أشوفه بالشكل ده. مجد ما كانش بياكل بطبيعته، وده كان واضح قدامي، لكني ما كنتش عارفة أعمل إيه.
عدى يوم، واتنين، وتلاتة.
وعلاقتنا ببعض بقت شبه منعدمة.
مجد تقريبًا ما بقاش يكلمني، وأنا كمان ما حاولتش أقرب منه وأفتح معاه كلام...
من بعد ما رفضت كلامه معايا وأعتراضه علي شكلي وأهتمامي بنفسي وقتها...
ومع الوقت، بدأ يضغط على نفسه أكتر في الجامعة والشغل، وأكله قل بشكل واضح.
وكان بيشوفني دايمًا مع دكتور سمير؛ بيشوفني وأنا بتكلم معاه، وبضحك وبهزر معاه، وبيشوف قربه مني.
وكل مرة كان بيشوفنا فيها، كان الوجع بيزيد جواه، حتى لو ما كانش بيظهره لحد.
الأسبوع خلص، وكان المفروض إننا كلنا نتجمع مع بعض في الويك إند، زي عادتنا.
اتجمعنا وقعدنا مع بعض، وكل حاجة كانت ماشية بشكل عادي او بنتظاهر أن الحياه عاديه، لحد ما تليفوني رن.
كنت بعيدة عن التليفون شوية، وفي اللحظة دي مجد قام، وكان متجه ناحية أوضته، لكنه لمح اسم المتصل على شاشة موبايلي.
كان اسم دكتور سمير.
مسكت التليفون بسرعة، وأول ما رديت، قلت:
وعد: إزيك يا ندى؟
مجد وقف مكانه.
بصلي، وفهم إني بكذب.
كانت نظراته مختلفة المرة دي، مفيهاش مجرد زعل أو غيرة، كان فيها خيبة أمل أكبر من أي كلام ممكن يتقال.
وأنا، رغم محاولتي إني أبان ثابتة، حسيت إن قلبي وقع من مكانه.
لأن نظرة مجد دي كانت كفيلة تخليني أحس إني سقطت من نظره نهائي... بلا رجعه...
أخدت تليفوني ودخلت البلكونة، لكن الحقيقة إن اللي كان بيرن بالفعل هي ندى صاحبتي، واللي كنت مسجلاها عندي باسم دكتور سمير.
كنت عارفة إنها هترن عليا في التوقيت ده، أو بمعنى أصح، هي كانت رنت عليا بالنهار، لكن كنت مشغولة جدًا، فاتفقت معاها إنها ترن عليا بالليل، لما أكون رجعت البيت وفضيت. وحددت معاها الوقت، وغيرت اسمها على تليفوني.
كنت قاصدة أسيب تليفوني بعيد عني وقت ما ترن، لكن ما كنتش أعرف إن مجد هيشوف اسم المتصل.
كان كل اللي في بالي إني أخلي التليفون جنب أي حد، ولما أسأله مين المتصل، يجاوبني: دكتور سمير.
لكن اللي حصل إن مجد شاف الاسم بنفسه!
في اللحظة دي، أخدت تليفوني ودخلت البلكونة، وكأني فعلًا بكلم دكتور سمير، وده اللي كان في بال مجد.
اتكلمت مع ندى، وكانت عايزة تقولي على خطوبتها.
فرحت جدًا، وقلت لها بحماس:
وعد: إمتى الخطوبة؟!
قصدت أعلي صوتي شوية، وندى ردت عليا:
ندى: أكيد هبلغك قبلها وأعزمك.
وعد: أنا مبسوطة قوي بالقرار ده، طبعًا كنت مستنياه من زمان... ده جه متأخر كمان!
ندى: كنت محتاجة وقت عشان أتأكد من مشاعري تجاهه.
وعد: طبعًا، لازم نتأكد من إحساسنا كويس جدًا قبل خطوة زي دي. على العموم، أنا فرحت جدًا بالقرار ده.
ندى: هعزمك، وهتيجي، مش هتقولي مشغولة!
وعد: طبعًا، ما أقدرش، ده أكيد ...
كانت كل كلمه مني بتخرج ومش واضح فيها اذا كنت بكلم ندى ولا دكتور سمير الكلام كان عام بحيث ان انا ده لما يسمع ياكد من سماعه لكلامي اني بتكلم مع دكتور سمير مش مع ندى صاحبتي...
قفلت معاها، ورجعت قعدت وسطهم.
كان مجد قاعد بذهول، ومن كلامي فهم إني أنا ودكتور سمير بنتفق على خطوبتنا، وإننا محتاجين وقت عشان نتأكد من مشاعرنا.
الغريب إني كنت مستغربة هدوءه وردود أفعاله على تصرفاتي، وإنه يشوفني وأنا مع دكتور سمير، من غير ما يظهر عليه أي انفعال.
هو أنا فعلًا ما بقيتش أهمه زي الأول؟
ما بقيتش أفرق معاه؟
بدأ ينساني؟
كان سكوته بيدبحني، وكل لحظة بيعديها من غير ما يتكلم كانت بتكتم جوايا كلام كتير نفسي أقوله.
قعدت معاهم، وأنا نفسي بجد أعيش لمتنا من جديد.
كنت مشتاقة لضحكنا وهزارنا ولعبنا، لسعادتنا البسيطة اللي كانت بتظهر على وشوشنا، ولابتسامتنا اللي كانت بترسم نفسها على شفايفنا من غير ما نحس.
لكن مجد كان قاعد بعيد.
عيني جت عليه، وعلى ملامحه، وإحنا كلنا مندمجين في مشاهدة فيلم أكشن.
أو على الأقل، ده اللي كان باين.
كان مجد ظاهر عليه إنه مندمج في الفيلم، حاطط إيده وقابض عليها عند خده، بينما حازم كان متفاعل جدًا مع الأحداث.
وماما ورغد، من وقت للتاني، كانوا بيتهامسوا عن حمل رغد.
أما ياسين، فكان مركز معايا، وعينيه بتتنقل بيني وبين مجد.
كان أكتر واحد فاهمني، وعارف إني بعشق مجد، لكن أكيد كان مستغرب إيه اللي غيرني ناحيته، وليه بقيت بظهر عكس اللي مخبياه جوايا.
في اللحظة دي، حسيت إني عايزة أعيش لحظاتنا القديمة من جديد.
بصيت لهم كلهم، وبعدها قلت:
وعد: بقولكوا إيه؟ انتبهوا ليا!
لكن عيني كانت على مجد، اللي فضل قاعد زي ما هو، حتى إنه ما اتجهش بنظره ناحيتي.
اتكلمت مرة تانية:
وعد: تعالوا نلعب زي زمان!
بصوا لي، وحازم مسك الريموت وقفل التلفزيون.
حازم: هنلعب إيه يا وعد؟ اختاري لنا يلا لعبة.
في اللحظة دي، بصيت لمجد، وكنت بتمنى يتجاوب معايا، يكلمني، أو حتى يبتسم لي.
كنت محتاجة منه أي رد فعل يطمني إن لسه ليا مكان عنده.
حرفيًا، كنت حاسة إني بموت من جوايا.
كان واحشني، بالرغم من وجوده معايا في نفس المكان.
كنت نفسي أمسك وشه بين كفوفي، وأفضل أتأمل ملامحه لحد ما أشبع منها، كأني بقالي سنين ما شفتوش.
حاولت أكسر الصمت اللي هو فيه، واتكلمت وأنا ببص له:
وعد: يا دكتور مجد، بص ناحيتي!
لكنه كان بيتجنب إنه يبص في عيني.
وعد: هو حضرتك مش هتشاركنا في لعبتنا ولا إيه؟
مجد: أنا مع الجماعة، اللي إنتوا عايزينه نعمله.
قمت من مكاني، واتحركت ناحيته.
ومجرد ما وقفت قدامه، حسيت كأن جوايا زلزال، مش قادرة أسيطر عليه.
بصيت في وشه، وغمضت عيني للحظة.
كل اللي كنت عايزة أعمله إني أحضنه، وأستخبى جواه، وأنسى كل اللي بينا.
لكن اكتفيت إني أحفظ صورته جوا عيني، وأتخيل إني بحضنه.
بلعت ريقي، واتنهدت بسرعة، وبعدها مسكته من إيده وشديته بخفة.
وعد: حضرتك قاعد بعيد ليه؟ قرب مننا عشان نلعب كلنا مع بعض.
قام، لكنه قعد على كرسي لوحده، وأنا رجعت قعدت جنب ياسين.
كانت ماما جنبي الناحيه الثانيه، ورغد قاعدة جنبها، وحازم على كرسي لوحده جنب رغد.
بصيت لهم كلهم، وأنا حاسة إني عايزة أتنعم بوجودهم، وأشبع من لمتنا اللي كنت مفتقداها.
أخدت نفس، وقلت:
وعد: إيه رأيكوا نلعب لعبة اسمها صراحة وجرأة؟
رغد: إيه معنى اللعبة دي؟
بصيت لها، وبعدها اتكلمت وأنا ببص لحازم:
وعد: كنت أنا وحازم وماما بنلعبها زمان. فاكرة يا ماما؟ فاكر يا حازم؟
ابتسموا، وقالوا:
ماما وحازم: ياااه، إحنا بقى بقالنا كتير ما لعبناهاش! إيه اللي فكرك بيها؟
بصيت لهم وسكت، لكن ماما ردت عليا:
ماما: لما كنت أحب أطلع اللي جواكي يا وعد، كنت أقولك تعالي نلعب مع بعض. وكنت أقعد أسألك، فاكرة؟ ما كنتيش بتقدري تخبي علينا حاجه.
بصيت لها وابتسمت، وسرحت في الذكريات.
وعد: أيوه يا ماما، فاكرة.
حازم اتحمس جدًا، وقال:
حازم: يلا نبدأ!
وبالفعل، بدأنا نلعب.
لكن من البداية، كان واضح إن الأسئلة بتدور حواليا، وكأن كل واحد فيهم مستني يعرف أنا مخبية إيه جوايا.
وكان المفروض إن حازم هو اللي يسألني.
بص لي وقال:
حازم: نبدأ يا وعد؟
ابتسمت وقلت:
وعد: نبدأ.
حازم: صراحة ولا جرأة؟
وعد: اللي إنت شايفه.
حازم: جراءة.
وبعدها سألني:
حازم: نفسك تعملي إيه؟ قرار يكون جريء.
في اللحظة دي، مسكت إيد ياسين وإيد ماما، ورفعت راسي وأنا ببص لهم.
وعد: نفسي في القرار ده من زمان.
بصيت لياسين، وكملت:
وعد: فاكر لما قلت لك إننا هنتكلم في موضوع؟ وكل ما أجي أكلمك فيه أتردد وما أقولكش؟
بص لي، وكانت نظرة عينيه بتقول إنه مهتم جدًا بالكلام اللي هقوله.
أخدت نفس، وقررت أقول اللي في قلبي من غير لف ولا دوران.
وعد: أنا عارفة إن إنت بتحب ماما... إمتى هتتجوزوا بقى؟
في اللحظة دي، ياسين بص لي وعينيه وسعت من المفاجأة.
كان باصص لي بذهول، وكلهم كمان بصوا لي، حتى ماما اللي لقيتها وطت راسها وحست بالحرج.
قربت منها شوية، وقلت:
وعد: ما تستغربيش يا ماما. الوحيده اللي عارفه اللي في قلب ياسين كويس هو أنا. هو فاكر إنه بيخبي وبيداري، لكن أنا عارفة كويس.
وبعدين بصيت لها، وكملت:
وعد: وإنتِ كمان يا ماما، أنا عارفة إنك بتحترميه وبتقدريه، ولو عرض عليكِ الأمر ده، مش هترفضي.
حازم كان باصص لي باستغراب، وكأنه مش مصدق إني بتكلم في الموضوع ده بالشكل المباشر ده.
بصيت لهم كلهم، وقلت:
وعد: إيه المشكلة؟ بصوا، إنتوا مع الوقت هتنشغلوا بحياتكم.
بصيت لحازم ورغد، وبعدها كملت:
وعد: إنتوا الاتنين بكرة هتكونوا مشغولين ببيتكم وحياتكم، وبصيت ناحيه مجد وقلت وحتى مجد، بكرة هو كمان هينشغل بحياته. كل واحد فينا هينشغل بحياته، وهما هيفضلوا كل واحد فيهم لوحده.
سكت لحظة، وبعدين كملت وأنا ببص لياسين وماما:
وعد: إيه المشكلة إنهم يتجمعوا مع بعض قبل ما نبعد عنهم، وكل واحد فينا ينشغل بحياته؟
ياسين بص لي وسكت.
أما مجد، فلقيت عينيه اتجهت ناحيتي.
ولأول مرة من أيام طويله... كنت حساها سنين، عينيه اتقابلت مع عيني.
لحظة واحدة بس.
لكن بالنسبة لي، كانت كفاية إنها ترجع لي إحساس افتقدته لدرجة إني بقيت مش عارفة أتحمل غيابه.
كنت مشتاقة لنظرته، ومشتاقة إنه يبص لي بالشكل ده، كأني كنت مستنية اللحظة دي من عمر.
حسيت إني عايزة أفضل باصة له، وأشبع من عينيه، وأحفظ تفاصيل اللحظة دي جوايا، يمكن أقدر أعيش عليها لو رجع يتجاهلني تاني.
لكن قبل ما ألحق أشبع من نظرته ليا...
مجد بَعَد عينيه عني.....
