رواية ديون النبض الفصل السادس والثلاثون
استعدنا لمّتنا من جديد، بعد ما قلت القرار الجريء اللي كان جوايا، وهو إني شايفة ياسين شخص مناسب لماما.
ما اترددتش إني أقول كده؛ لأني فعلًا حاسة بحبه واحتوائه لينا، وحاسة إنه شخص يستاهل ماما، وإن ماما كمان تستاهله.
لكن بمجرد ما عيني اتقابلت مع عين مجد، اتمنيت نظرته ليا تطول شوية، يمكن ألاقي فيها حاجة تطمني، أو أحس إنه لسه شايفني بنفس النظرة اللي كنت بشوفها في عينيه زمان.
لكن مجد صرف عينه عني بسرعة، وفي اللحظة دي حسيت بوجع جوا قلبي، وجع حاولت أتجاهله وأكمل كلامي عادي، وكأن مفيش حاجة حصلت.
بصيت لهم وقلت:
وعد: أنتوا شايفين إن اللي أنا بتكلم فيه مشكلة؟ شايفين إني سببت حرج لحد؟ أنا بصراحة مش شايفة كده خالص.
رغد بصتلي وقالت:
رغد: وعد، أنا عمري ما أنسى أول مرة شفتيني فيها، لما خطبتيني على طول لحازم أخوكي. ومع الوقت، إحنا الاتنين حبينا بعض وقربنا من بعض فعلًا.
حطت إيدها على بطنها، وابتسمت وهي بتكمل:
رغد: ومستنيين أول حلم لينا.
بصيت لها وابتسمت، وقلبي اتمنى أكون أنا كمان قادرة أعيش فرحتها من غير ما يكون جوايا كل الوجع ده.
وعد: وأنا من ساعة ما شفتكم، وأنا حاسة إن أنتم أهلي.
رجعت بصيت لمجد مرة تانية، على أمل يبصلي أو يشاركني الحديث، لكن عينيه فضلت بعيدة عني، وكأن المسافة اللي بينا بقت أكبر من إني أقدر أوصل له.
قطع ياسين الصمت، وبصلي بابتسامة وقال:
ياسين: وعد، أنتِ قلتي اللي أنا نفسي أقوله من زمان. أنا فعلًا كنت بفكر في كده، بس ما كانش عندي الشجاعة إني أطلب.
بصيت له وابتسمت، وسألته بلهفة:
وعد: يعني فعلًا أنت عايز تتجوز ماما؟
وبسرعة بصيت لماما، وكأني مستنية منها إجابة هتفرحني، وقلت:
وعد: ماما، وإنتِ موافقة؟
ماما بصتلي وسكتت لحظة، وبعدها قالت:
ماما: وعد، .....قبل ما ترد عليا...
قاطعتها بسرعة، وأنا بقول بلهفة:
وعد: ماما، إنتِ موافقة، صح؟
سكتت شوية، وبعدها هزت راسها.
ابتسمت بفرحة، ولفيت ناحية حازم أسأله:
وعد: حازم، أنت عندك مشكلة في كده؟
رد عليا من غير تردد:
حازم: أنا طول عمري، من ساعة ما عرفت عمو ياسين، وأنا بحبه زي بابا بالضبط.
حبه لينا واهتمامه بينا عمرهم ما يتنسوا. أول ما دخل علينا أول يوم وإحنا كأننا في غربة، حسيت قد إيه إن ليا أهل، وإن ليا ضهر وسند في العمارة دي. لو ماما ما عندهاش مانع، فأنا مرحب بالموضوع ده جدًا.
بصيت لماما تاني، وقلت لها بابتسامة واسعة:
وعد: يلا يا ماما، وافقي بقى!
ماما ابتسمت وقالت:
ماما: ياسين إنسان عزيز جدًا علينا كلنا.
لكنها بعد كده بصتلي، وكأن فيه حاجة تانية شاغلة بالها، وقالت:
ماما: لكن يا وعد، أنا عايزة أطمن عليكي الأول.
في اللحظة دي، قلبي اتقبض.
حسيت إنها ممكن ترجع تفتح موضوع جوازي أنا ومجد مرة تانية، لكن كنت عارفة ومتأكدة إن ياسين خلاص صرف نظر عن الموضوع ده.
ومع ذلك، كنت مستنية منه يتكلم، يرد عليهم، يقول إنه متمسك بيا، وإنه لسه عنده أمل في اللي بينا.
كنت مستنية منه أي كلمة، أي تصرف يخليني أحس إن كل اللي بيشوفه وبيسمعه مش قادر يغير مشاعره ناحيتي.
كنت عايزة أحس إن قلبه مش مصدق إني اتخليت عنه، وإنه لسه حاسس بقلبي، حتى لو أنا اللي بحاول أقنعه بعكس الحقيقة.
لكن صوت جوايا قال بحدة إننا قفلنا الموضوع ده، وإننا مش هنتكلم فيه دلوقتي خالص.
وفجأة، مجد اتكلم وقال كلمة وقفت قلبي.
مجد: كل شيء قسمة ونصيب.
الكلمة كانت بسيطة، لكنه قالها بطريقة حسستني إن حتى هو بدأ يتخلى عن حبه ليا، زي ما أنا بحاول أظهر قدامه إني تخليت عن حبي ليه.
حسيت إننا الاتنين واقفين في نفس المكان، لكن كل واحد فينا بيحاول يثبت للتاني إنه قدر يستغنى عنه.
وفجأة، حازم بص لنا وقال:
حازم: بما إن إحنا بنلعب لعبة صراحة وجرأة، عايزين نعرف منكم بالضبط إيه اللي وصلكم للحالة اللي أنتوا فيها؟ إيه اللي حصل خلاكم تتغيروا بالشكل ده؟
مجد بصلي.
لكن المرة دي، ما كانتش نظرة حب ولا شوق، كانت نظرة كلها لوم وعتاب، نظرة فيها ألم ووجع من اللي أنا عملته فيه.
ومع كل الوجع اللي شوفته في عينيه، بصيت له بعين كلها حب وشوق، وكأني بقول له من غير كلام:
ما تصدقش... اصبر عليا. اصبر لحد ما أشوفك واقف على رجليك من تاني.
كنت عايزة أوصله الحقيقة اللي مش قادرة أقولها، لكن قبل ما أقدر أعمل أي حاجة، مجد اتحرك من مكانه، وكأنه هيستأذن ويمشي.
في اللحظة دي، ياسين ناداله:
ياسين: مجد، اقعد. ما تتحركش.
مجد بص لياسين وقال بتعب:
مجد: بابا، بعد إذنك، أنا تعبان. حاسس إني عايز أرتاح.
لكن ياسين أصر على موقفه وقال:
ياسين: وأنا بقولك اقعد.
مجد سمع كلامه، ورجع قعد مكانه.
ياسين بصله بجدية، وقال:
ياسين: بصلنا يا مجد. أنا عايز أسمع منك. أنت مالك بالضبط؟ ليه مش على طبيعتك؟ ليه مش بطبيعتك مع وعد؟ وزي ما أنا بسألك، أنا كمان بوجه نفس السؤال لوعد. ليه أنتوا الاتنين اتغيرتوا بالشكل ده؟
في اللحظة دي، ما كنتش عارفة أرد أقول إيه.
كل العيون كانت متوجهة لينا، وكلهم مستنيين يسمعوا إجابة تفسر اللي بيحصل بينا.
سكت شوية، وبعدها أخدت نفس وقلت:
وعد: أنتوا عايزين تعرفوا إيه بالضبط؟ أنا حاسة إني مضغوطة. أنا عمري ما قربت من حد، ولا عمري حبيت.
يمكن في البداية كنت مبهورة بشخصية دكتور مجد، ويمكن القدر هو اللي حطه في طريقي، وطلع ابن صديقي، وبعد كده بقى جاري. يمكن اتعودت عليه... ويمكن اللي أنا كنت حاساه ده ما كانش حب.
بمجرد ما خلصت كلامي، مجد غمض عينيه.
حسيت وكأن كل كلمة خرجت من لساني كانت بتوجعه، وكأني بدل ما بحاول أحميه، بأكد له بنفسِي كل الكلام اللي سمعه مني قبل كده.
فتح عينيه وبصلي، وقال بهدوء:
مجد: أي كلمة أنتِ بتقوليها، أنا مش هقدر أكذبك فيها. المهم إنك تكوني صادقة مع نفسك، وتكوني عارفة إنتِ فعلًا حاسة بإيه.
سكت لحظة، وبعدها رجع بصلي وقال:
مجد: بس تعرفي يا وعد...
اتنهد تنهيدة طويلة، وكأنه بيحاول ياخد نفس يساعده يخرج كل اللي جواه، وبعدها كمل:
مجد: أنا أول مرة شفتك فيها، ما كنتش أعرف إنك هتبقي قريبة مني بالشكل ده، ولا إنك هتكوني جارتي في العمارة، ولا إنك هتقربي من أبويا وأختي. لكن وقتها، من أول مرة، حسيت إنك قريبة قوي مني... قريبة قوي من قلبي، بالرغم إني ما شفتكيش غير مرة واحدة.
صوته بدأ يتغير وهو بيكمل، وعينيه كانت ثابتة عليا.
مجد: كلامك وقتها لمس قلبي. حسيت إنك الوحيدة اللي معاها مفتاحه، وإنك الوحيدة اللي قدرت تدخلي قلبي من غير ما تحاولي.
فضل باصص في عيني، وبعدها قال بصوت مرتجف:
مجد: تعرفي يا وعد، أنا من وأنا صغير كنت حاسس إني عامل زي اليتيم بالضبط.
الكلمة خلتني أسكت تمامًا.
مجد: أبويا كان بعيد عني. ما كنتش بشوفه غير كل فين وفين. كنت محروم من حبه ورعايته وتوجيهه ليا.
كان نفسي أغلط، فيوجّهني، ويمكن يضربني زي بقية الأولاد. كنت نفسي أحس إن ليا أب موجود في حياتي، مش مجرد شخص بشوفه على فترات.
بلع ريقه، وكمل كلامه:
مجد: اتربيت في فيلا، وكل طلباتي كانت مجابة، لكن وجود كل حاجة حواليا ما كانش معناه إني كنت مبسوط.
أمي كانت معايا، لكن كنت بحس إني زي اليتيم اللي فقد أمه، محتاج حبها وحنانها ورعايتها، لكنها ما كانتش فاضية ليا.
سكت لحظة، وكأن الكلام اللي بيقوله دلوقتي كان محبوس جواه من سنين.
مجد: وبالرغم من كل ده، كانت دايمًا عايزاني أكون الأول في كل حاجة.
ومع الوقت، بقيت بهرب من كل حاجة بالمذاكرة والقراءة، وبإني أقعد مع نفسي. ما أنكرش إنها ساعدتني كتير في اللي وصلت له، لكن كنت إنسان مجوف من جوا... فاضي.
صوته هدي شوية، لكنه كان لسه بيحكي وكأنه لأول مرة بيسمح لحد يشوف الجزء ده منه.
مجد: كنت نفسي أكون إنسان عادي، أحس بحب واحتواء أمي وأبويا، وأحس إن حواليا أسرة بجد، أسرة أكون جزء منها، مش مجرد واحد بيحاول يحقق كل حاجة مطلوبة منه.
مجد: كنت محتاج أحس باحتواء وجو الأسرة حواليا...
ديون النبض 🫀
بقلم الكاتبة مروة صياح 🎯✍️
كنت حاسه اني مش قادره اسمع المه ووجعه، وكأن كل كلمة بيقولها كانت بتوجعني أكتر من اللي قبلها.
مجد: كان نفسي أغلط، وكان نفسي ما أجيبش درجات عالية. كان نفسي أمي توبخني، لكن هي كانت دايمًا بتوفرلي كل حاجة، إلا حاجة واحدة... وجودها معايا.
سكت لحظة، وبعدها كمل كلامه:
مجد: بدل المدرس، كان بيجيلي اتنين وتلاتة، لدرجة إني بقيت عارف المناهج بتتكلم عن إيه قبل ما السنة تبدأ. وفي عز الإجازة، كنت بدور على منهج السنة اللي جاية. أمي كانت مبسوطة بيا، شايفة إن دماغي كلها في التعليم، فرسمتلي طريقي، واختارتلي أكون إيه، وعودتني ما أضيعش وقت، وأستغل كل لحظة وكل دقيقة.
اتنهد، وكأنه بيحاول يبرر لنفسه قبل ما يبرر لأي حد تاني.
مجد: ما أنكرش إن تربيتها ليا كانت صح، وإن هي ساعدتني أوصل للي أنا فيه، لكن بالرغم من كل ده، كانت شديدة وقاسية جدًا عليا.
بص قدامه شوية، وبعدها رجع كمل:
مجد: كبرت على كده، وبقيت دكتور مجد اللي الناس تعرفه، لكن مجد الإنسان... أنا نفسي ما كنتش أعرفه.
في اللحظة دي، حسيت إن قلبي بيتقبض وأنا بسمعه، لكنه كمل كلامه، وكأن الكلام اللي جواه بقاله سنين مستني اللحظة دي علشان يخرج.
مجد: اللي عرّفني على مجد الإنسان هو إنتِ يا وعد. إنتِ اللي قربتيني منه وخلتيني أكتشفه. إنتِ اللي حسستيني بحب أمي لقيته معاكي، وفي نفس الوقت حسستيني إني مش لوحدي، وإن ممكن أحس بالحب والاحتواء مرة تانية.
بصلي، وصوته بدأ يهدى شوية، لكنه كان لسه شايل جواه وجع كبير.
مجد: لدرجة إني كنت نسيت يعني إيه جنس آخر، ونسيت يعني إيه بنت. كنت بفتكر الموضوع ده بس لما أشوف أختي رغد.
كنت خايف مع الوقت ما أعرفش أتعامل معاها، وكنت خايف أقسى عليها من غير ما أقصد، بسبب اللي أنا شفته وعشته.
سكت لحظة، وبعدها كمل:
مجد: لكن بالرغم من كل ده، حمدت ربنا إن أبويا شخصيته طيبة، وإنه كان دايمًا بيحتويني، فكان بيعوضني عن الجانب ده. لكن خانة الأم عندي كانت فاضية... وإنتِ اللي مليتيها.
كنت بسمعه، وكل كلمة منه كانت بتقطع في قلبي.
اتكلمت متأخر أوي يا مجد... ليه ما قلتليش الكلام ده من زمان؟ ليه خلتني أوصل للمرحلة دي وأنا مش عارفة إيه اللي جواك؟
كنت مستنية يكمل كلامه ويقول مين أمه، أو يحكي أكتر عن علاقته بيها، لكنه ما عملش كده.
اتعدل في قعدته، وكأنه قرر ينهي الكلام ده كله، وقال:
مجد: في النهاية، أنا كنت متعود على الوحدة والغربة، وما عنديش مشكلة إني أكمل حياتي وحيد وغريب.
بصلي بنظرة كان فيها تحدي، وكأنه بيتحدى نفسه قبل ما يتحداني، وبيحاول يقنع نفسه إنه يقدر يرجع زي ما كان، للدكتور مجد اللي الناس تعرفه، واللي ما بيظهرش منه غير الجزء اللي هو عايزهم يشوفوه.
مجد: مجد كان موجود، ولسه موجود، سواء وعد معايا أو لأ.
في اللحظة دي، حسيت إن ضربات قلبي زادت جدًا، لكن مجد ما وقفش عند كده، كأنه كان مصمم يقول كل الكلام اللي ممكن يقفل بيه أي باب بينا.
مجد: على العموم، أنا كنت سعيد جدًا معاكم. حسيت وسطكم بجو الأسرة اللي عمري ما حسيته بالشكل ده قبل كده.
وبعدها بصلي وقال:
مجد: فعلًا، إنتِ عندك حق يا دكتورة وعد. أوقات كتير جدًا الإنسان بيحس إنه بيحب حد أوي، لكن مع الوقت بيكتشف إن الحب ده كان تعود، مش أكتر من كده.
قلبي كان بيدق بعنف، وأنا مستنية أعرف هيكمل إيه، لكنه قال الكلام اللي كنت خايفة أسمعه.
مجد: وأنا كمان بقولك إني فعلًا كنت متعود عليكي. إنتِ كنتِ شخصية مختلفة بالنسبة لي، ويمكن علشان كده افتكرت إني بحبك.
في اللحظة دي، ما قدرتش أتحمل أكتر من كده.
غمضت عيني، وقمت من مكاني، وأنا حاسة إن كل كلمة قالها بتاخد معاها جزء مني.
لكن مجد كمل كلامه، وكأنه ما شافش الوجع اللي أنا فيه، أو يمكن شافه وقرر يتجاهله.
مجد: وإحنا لسه زي ما إحنا، أسرة واحدة، ومفيش أي مشكلة إن بابا يتجوز مامتك.
والحمد لله، رغد أختي اطمنت عليها مع إنسان بيحبها. أما بالنسبة ليا، فأنا شايفك أخت حازم وبس.
اتنهد، وبعدها قال:
مجد: وإن شاء الله، ربنا هيرزقك بالإنسان اللي يحبك واللي يستاهلك.
حاولت أستجمع شجاعتي، وأداري كل اللي جوايا، وقلتله بصوت حاولت أخليه ثابت:
وعد: معاك حق. وإنت كمان ربنا يرزقك بالإنسانة اللي تستاهلك.
بصيت لهم كلهم، وقلت:
وعد: بعد إذنكم، أنا حاسة إني تعبانة وعايزة أنام.
تحركت ناحية أوضتي، لكن قبل ما أدخل، كنت حاسة إن عيون مجد لسه متعلقة بيا.
ومع ذلك، كنت بحاول أقنع نفسي إن كل اللي قاله حقيقي، وإنه فعلًا شايفني مجرد شخص اتعود على وجوده، وإنه اكتشف إن اللي كان حاسه ناحيتي ما كانش حب.
لكن الحقيقة اللي جوايا كانت بتقول حاجة تانية.
أنت كمان بيكذب يا مجد... زي ما أنا بكذب.
دخلت أوضتي، وبمجرد ما قفلت الباب، انفجرت في البكاء.
ما قدرتش أتماسك أكتر من كده، ولا قدرت أتحمل الكلام اللي سمعته منه.
وعد: معقولة يا مجد؟ إنت فعلًا ما حبيتنيش؟ معقولة مش حاسس باللي في قلبي؟ مش حاسس بوجعي؟ ولا حاسس بنزيف قلبي؟
كنت بعيط ومش قادرة أوقف دموعي، وكل كلمة قالها كانت بتتردد في ودني، كأنها بتتقال من جديد.
إزاي قدرت تقول إنك شايفني أخت حازم وبس؟ إزاي قدرت تتكلم عن الحب اللي بينا وكأنه مجرد تعود؟
في الليلة دي، ما كنتش قادرة أقاوم البكاء، ولا أهرب من الوجع اللي حسيته وأنا بسمع منه كل الكلام ده.
أما مجد، فسابهم هو كمان، واتجه لأوضته.
وفضلوا ماما وياسين ورغد وحازم قاعدين مع بعض، مصدومين من اللي سمعوه، ومن التغير الكبير اللي حصل بيني وبين مجد، من غير ما يكون عندهم تفسير حقيقي للي وصلنا للحالة دي.
كانت لعبه الجرأة حلوة، لكن الصراحة كانت بتوجع.
والحقيقة كانت مُرّة، أو على الأقل ده اللي كان ظاهر قدامهم.
لكن الحقيقة اللي محدش فيهم يعرفها، إن كل واحد فينا كان بيعشق التاني، وإن كل واحد فينا كان بيكذب علشان يحميه، حتى لو كان الثمن إنه يوجعه.
كل واحد فينا كان بيحاول يخلي التاني يصدق إنه قدر يستغنى عنه، وكأننا بنحاول نسيب للتاني دين في قلبه، دين من النبض اللي أخدناه من بعض.
لكن الحقيقة إن نبض قلبي ما كانش ليا... كان ليه هو.
ونبض قلبه ما كانش ليه... كان ليا أنا.
ديون النبض... إمتى هتتسدد؟
مش عارفة...
