رواية خلخال مشوه الفصل السادس والثلاثون 36 بقلم زمرده

 

 

 

رواية خلخال مشوه الفصل السادس والثلاثون بقلم زمرده



چف رماد
وچف حلم متروس شيب
وچف تحنه اعله السواد وحلم برعم مات هرفي ومالحگ ياخذ امراد

كاظم العطشان

°كوكبة°

منتظر : ولك خووووية لا مااااتموت حمززززة لااااا

رچليه صارن خيوط احس ماعدي حيل امشي لغرفة حمزة صوت منتظر جاي منها ،بالكوات حركت رچلي وبس وصلت للباب وشفت حاله طاح گلبي
،ماگدرت اضلن واگفه وطحت بالگاع اشهك مأيسة منه لان ما معقولة هيج يحركة منتظر وهو ما جاي يصحى

منتظر : ولك خووووية حمزة ،ولك حاجيني خووية

يصيح صوته رايح وصوت عياط عذراء واستبرق مله البيت خاله تسودنت تتوسل بيه يگعد وهو
بس
جثه يتحرك بأيدها ،بجيت بصوت عالي من شاله منتظر وطاح ما يگدرله وحده ،وبنفس الوكت
طب مرتضى يركض يصيح شكو وبس باوع لحمزة بهت
منتظر : ولك تعال وياي مرتضى تعااال ،مررتضى

صاح بيه يريده يوعى على روحه ،نفض رأسه ودنگ شاله وي منتظر ،نزلنه وراهم نتراكض خالة حطت بس العباة على رأسها وطلعت وياهم حافية ،وجها من اللطم ما ينشاف ...

عذراء تخبلت تريد تمشي وياهم وكاضتها استبرق صوت الجهال فوگ يتباچون صعدت اركض اتعثر بخطواتي امسح بعيوني ما اريدن
يشوفوني هيج شلتهم ونزلت اطيت لعذراء بتها واستبرق اخذت ابنها مني وكل وحده دموعها على خدها يسكتن بيهم ...

ساعة عدت وكل خبر ماكو ،استبرق
تخابر عليهم وما منهم احد يرد
_ خابريهم استبرق بلكت يردون هسة

خابرت مرة ومرة الثانية رد عليها منتظر ،بس گالتله بشر صيحته اجت ترس أذني
منتظر : مااات اخوي ولج استبرق مات ،مااات سكتة قلبية ،راح اخوووي

هو يعيط ما مصدگ واحنا نعيط ،انگلبت گلب أجواء البيت من هل ساعة بسبب قرار غلط والسبب خالتي

عذراء : يمة ،ولج يمة ترملت يمة ،عافني وعااف بنته يمة

امسح بعيوني الغواش ما يهدهن ،اخذت بتها من ايدها وهي لا خلت وجه ولا شعر
ما گطعته فاقدة كلش عقلها مو يمها وكل الحگ
الها

اخذت الجهال ابجي شلتهم اسكت بيهم متخبلين من عياط امهاتهم ،وچان اصعب وكت اعجز شلون اسولف صعوبته من طببوا تابوته بالبيت ،بلمح البصر البيت صار يروش ،حطيت الجهال عد وحده من الگرايب ومشيت امسح دموعي بالحجاب اباوع عليه بنص الاستقبال حاطيه وملتمين عليه اخوانه واخواته وامه حالها حال الضيم ثوبها مشگوگ وتلطم على روحها...

طبت عذراء شمرت روحها عليه تعاتب بيه بصوت عالي چن ماكو غيره هنا
عذراء : ليش هيييج حمزة ليش ،چان لخاطر بتك ضليييت ،مو لخاطري لخاطرها راح تربة يتيمة
بدون أب

منتظر : ولك خووووية ياكسرة ضهررري ياخوية ،ريت انا بمكانك ،ريت ميت گبلك
ياحزام ضهر اخووك

يدگ على صدره ويصيح صوته رايح ومرتضى بس حاط راسه على التبابوت ساكن ،سكوته بنص الظيم خوفني وحسيت وراه شي

بشرى : لفاني الموت ساعة الما صدگت من گال اموتن لو عافتني

تدگ على روحها وجها الدم ينزل منه ،شگد ما هي صلبه بس والده وفگدت ضناها اليوم ومن شالوه گدامها طاحت لا من ايد ولا من رجل ،بنفس الوكت الطلعوا شالوها للمستشفى

صعدت للغرفة ادورلي شي اسود اللبسة ،وبنفس الوكت طب يركض فتح الكنتور يطلع فلوس ،ما باوعتله وبدلت بس ثوبي بساع ونزلت
اللبس بحجابي من سمعت صوت اللطم جوة ...

كزبر جسمي وانا اسمع صوت تشيعيه ،استبرق مفرفحة تبجي عليه چن اخوها ،عذراء فتحت الباب تريد تمشي وياهم وصاح بيها مرتضى عاندت ما ترضى تطب

مرتضى : تعاااي اخذيهااا لا ادفنها وياااه والله

من صياحه گبل لا امشيلها انا طبت ،طلع مستعجل من اجه احد صاحه ،كضيتها اسندها من رادت تطيح

اندارت علي ما تنشاف عيونها من گد ما لطمت عليهن
عذراء : ليش ما حط بته بين عيونه ،شلون تربه شاگلها لو سألتني ليش مات أبوي شني الاگووولة

بالگوة قنعتها تطب جوة ،وزاد نوحها من اجت امها وشافتها گامت على حيلها تلطم

عذراء : ترمت يمة ،عااافني حمزة انا وبته ،عااافنه

حضنتها وهي كاضه عباة امها تشهگ ،النسوان يباوعن عليهن متعاطفات وياها

وداد : سوده علي يايمة ،سوده علي ما تهنيتي

بنفس الوكت طبت تركض طاحت عباتها من راسها من دگت على وجها
رفيف : ولكمم ،مااات حمزززة مووو ،مااات أخوي

ركضتلها استبرق تكض ايدها وهي تخبلت وصوت عمو ابو منتظر برة يصيح ما مصدگ الصار
رفيف : ولچن اخوووي ،حمزة الحنين مااات ،امس يحجي وياي ويگلي مشتاقلج خوية شوكت تردين للبيت ،ولكم يگلي مشتاااقلج

تصيح وتدگ على روحها ،رفيف ازغر وحدة من بنات خالتي ومن يوم العرست لليوم اشوفنها قليل علمود جرع الكيماوي
رفيف : ولكم ما شفته ،اخذوووه وما شفته ،ليش ما تانيتوني ليششش

رفعت راسي على صوت امي من طبت تلطم ،اندارت عليها
رفيف : ما ودعت اخوووي خالة ،ما شفته وهو مشتاقلي

ساعات يعدن بين الركض وبين الوادم التجي ،امسح دموعي واصب جاي كلساع جاية كومة نسوان اللطم زاد من طبت خالتي من النجف حالها حال ،عياط بكل مكان صار جوة وبرة

بشرى : ولك حمزززة يمة ،ولك هااا ياثاني وليداااتي ليش ولك هيج يمة

تبجي وتعاتب بيه صوتها رايح ،ابد ما رف گلبي عليها لان هي السبب هواي توسل بيها واتذكر مرة حتى باس ايدها بس حتى تردها

"فلاش باك"

طلعت من المطبخ ،انشف ايدي بهدومي واباوع عليه طب يسحل بروحه مبين عليه من نايم عيونه فصوص حمر

خالة حاطة بته بحضنها ،گعد گبالها ثاني ركباته ونبرة صوته كسرت خاطري بس ما هزتها
حمزة : يمة احلفج بروح ابوج امشي وياي نردها وشني تريده ارضي لخاطري

بشرى : ياااع تريد تاخذني اتوسل بيها

حمزة : لا يمة ما تتوسلين ،بس امشي وياي نقنعها

بشرى : لا والف لا

حمزة : لخاطري مو أنا ابنج ماعدي معزة بگلبج

بشرى : انا ادره بمصلحتك

حمزة : يا مصلحة يمة وانا النوم مجافي عيوني عگبها

بشرى : مو عدك مرة غيرها

حمزة : هي وأنت تعارفن كل هوة ماعدي الها ،انا گلبي عد ريحانة يمة وگايل البت أختج

بشرى : انساها يمة وعيش حياتك ،عدك مرة وعدك بت ينسنكياها

گام وگف ينتر
حمزة : نسوان الدنيا كلها ما ينسنياها ،هاي ريحانة يمة

"الحاظر"

فزيت على صوت استبرق تصيح علي الجاي فاير ومدمر الطباخ وانا صافنة ،طفيته بساع وصبيت بالاستكاين ،باوعت عليها غسلت وجهه وأجت شالت الصينينة

استبرق : صبي بعد ما يكفي هذا

_ خوش

بساع حضرت صنينة ثانية ابجي واشتغل ،اسمع صوت خبصة الطبخ برة للعشا وما مصدگة الصار صدگ واتمنى كلشي حلم
بس اتامل
وعلى هل حال گضة أول يوم فاتحته الوادم كلها نامت وانا صعدت فوگ اسحل بروحي سحل اريد اطبن للغرفة وسمعت صوت ونين جاي من غرفة حمزة الچان نايم بيها اليوم

من تقدمت وركزت چان صوت منتظر ،دگيت الباب خايفة من عله صوت بجيه ،فتحت الباب استبرق عيونها مغورگة وردت يمه

حاضن مخدته ويحجي
منتظر : امس بهذا الوكت چنت تشتم الهوه ،والليلة جوة التراب ،ولك تمنيت دافني بيدك ولا انا انزلك للگبر ،ريت عمري گضه گبل عمرك وطاحت ورقتي گبل ورقتك ياخوية

شهگ مگطوع نفسه
منتظر : خلصت عمرك تگول انا من اموت ما اتحاسب تصلي وتصوم ،ولك ملتزم اكثر مني تالي متت وأنت غاضب ربك بأخر ايامك ،عمت عيني عليك ياخوية لو ادري انا ابوسن رجل كل زغير وچبير بيهم ولا لافيك التراب بحسرتها

عمت عيوني من البجي وي كل كلمة يحجيها انا دموعي تطيح درت وجهي امسح عيوني اباوع على مرتضى طب هدومه لهسه مدمرات تراب النجف

مرتضى : منتظر

رفع رأسه على صوته بصوت مهدود بنبرة صوت مكسورة يحجي
منتظر : راح حمزة ،اخونة صفينا بس انا وياك .

بلع ريگة مرتضى عاجز شني اليحجي ،اجه گعد بصف منتظر على الگاع يم الجرباية
مرتضى : مات والسبب كله من أل غضب ،لا أول
ولا أخر بينادم ياخذ الثانية

منتظر : امك چانت تعارفهم شنو ،الكره عمة عيونها وما خلاها تشوف ابنها شگد يحبها وبالنهاية خسر روحه وخسرها وتيتمت بته

شعل چگارة يجر منها النفس بكل شراهة ،يصب قهره كله بيها ،درت وجهي اطلع من
الغرفة اذا اضل اكثر بعد يمهم تنعمي عيوني ومنو يكض البيت..

هستوني غمضت عيوني وسمعت صوت حركة بالغرفة ،شوي وصار هدوء عارفت بيه طلع ،نمت اقل الساعة وگعدوني علمود الريوگ ،وهستوني نزلت
وسمعت صوت الصياح برة ...

مديت راسي من باب المطبخ ،مخلين بردة حتى لا ننكشف ،بالگوات اشوف ،ما افتهمت شي من صياحهم بس منتظر كاض مرتضى يطگ بيه ويصيح

منتظر : شودااااك الهم ،شوداااك لك راح تخبلوووني بيا حال احنة

°هيوفة°

نزلت اركض على صوت الصياح بالقرية ،تلفتت بيناتهن اسأل
_ شكوو شصايرر ؟

نجوى : اندري

_ ضيرم وعزيز وين مو چانوا بالديوانية ؟

ريحانة : وديتلهم چاي انا وشو خابر ليث على ضيرم وطلعوا يتراكضون

حطيت ايدي على گلبي
_ الله اليستر ،شوف شصاير .

نجوى : ما ضلت مشكلة ما لفتنة ،شيصير بعد ياعمة

تحوس عمة ما مرتاحة وانا طلعت للحوش اصواتهم عالية واصلتني لهنا ،ومن بيناتهم چان اكو صوت غريب ،بتهديد يصيح
_ انااا من اليوم عدوووكم احسبوني ،بأيدي هااااي نزلت أخوي للتراب ،دفنته ودفنت شبابه والسبب أنتم ،ثااار عدي وياكم من هل ساعة ،وبغير لوعة گلبكم ما ارتاااح

بلعت ريگي وانداريت على صوت عيطتها
ريحانة : يمة حمززززة

ما جنت مفتهمة شي من كلشي گاله ،بس من عيطتها عارفت منو المقصود ب "أخوي"
ريحانة : حمزززة ،لاااا مرتضى لا چذب تچذب لااا

فتحت الباب تريد تطلع وبنفس الوكت كضها ضيرم وصوته يصيح
مرتضى : مااات بسببج ،حمزززة مات ،دفنااااه امس دفنت اخوووي

هو يحجي وهي تلطم مفرفحة بأيد ضيرم تريد بس تطلع والولد مصايحهم عله على مرتضى
يردونه يسكت وهو يزيد لطمها بكل حجاية يحجيها

ريحانة : هددني ضيرم هدددني ،بس احاجيه جاي يچذب مووو ،جاي يچذذذب

تعيد بكلمة"يچذب" وفجأه سكتت ،حركها ضيرم وطگ على وجها بأيده من ما گعدت شالها وطلع يركض

ضيرم : عزيززز بساع السيارة ،لك صار عدها انهيااار

ركضت اريد اللبس عباتي وأمشي وياهم وعمة طلعت مخبوصة تصيح على ضيرم تريده يتانيها بس لا أنا ولا هي لحگنه عليهم ،ورديت من اشرلي صخر اطب واندار
لمرتضى ضليت واگفه اشوفه شيسويله ،وشهگت من طگاه كله من قوتها طاح بالگاع ...

صيحت خايفة من دنگ كاضه من فالينته ،گومه ودفعة يحذر
صخر : رجلك الداست القرية هل مرة ما راح
تنكسر ،بس مرة الثانية اكسر حتى ضهرك لو
لمحتك مار منها مو دايسها

مرتضى : ادوسها وادوس راسك يا خنيييث .

حطيت ايدي على حلگي ارجف من ركضله ،صرت ورا الباب مادة بس راسي خايفة لا يموت الولد بأيدهم تگابلوا عليه حق وصخر وشوي
وسمعت صوت برهان يصيح عليهم ما راضي ولوما هو جاي چان من صدگ طلع هل ولد منا جثه بلايه روح

مشيت لعمة من شفتها گاعدة تنوح بنص الحوش وبصائر تهدي بيها
نجوى : عمت عيني عليج يااايمة ،عمت عين الما خلتكم تتهنوون ،اندفن شبااابه ،ببخت منوو راح جوه الترااب

مسحت عيوني اشهگ وبالي عدها ،شلون بيها ،يوميا كسرة ،ياهي منهن الينگال عليها تهون ،شني اليچبر خاطرها ..! !

دنگت شلت العباة من الگاع وطبيت جوه احوس بالي عدها
وعمة عاندت ما تطب ،طبت بصائر تاخذلها ماي

_ مشى حماها موو ؟

بصائر : أي ،بينه بخت چان تصخمنا

_ أي والله

تنهدت حايرة
بصائر : شلون نهون عليها ،احس كسراتها وحدة اقوى من الگبلها

_ انا هم حايرة والله ،ما جاي تروح من بالي شلون فرفحت روحها ماتريد تصدگ

بصائر : ماتوقعت هيج صدگ يموت ،ولج ما عده يوم واحد ورا طلاگهم

_ محترگ گلبي عليه وعلى شبابه ،بحضها وبختها امه كون تطين روحها

بصائر : أي والله

اخذت دولكة الماي وطلعت ،طلع الصبح واحنا على نفس الخبصة ،ومن ردت بس جثه وتمشي
بشر روحها مو عدها ،احاجيها ما ترد وبس الدموع تجري ...

للضهرية وصل الخبر حتى لجدة كل بيت عارف حمزة هاي هي مات وانتهوا بطلاگ وموت ،فراگهم صار فراگين وما منه رده بعد

تمسح على شعرها جدة وتحاجيها وهي متمدده على رجليها بس دموعها تنزل
غضة : الله كاتبله يموت بهل يوم گبل حتى لا يعارفج لا تضلين تلومين بروحج

ريحانة : گالي لا تعوفيني اموت ،مات صدگ جدة چنت اضنه بس حجي ،مات وما تحمل فراگي حمزة

انفجرت تشهگ ،غطت وجها ما گدرت اسكت عيوني بحالها اليكسر باب الگلب ،دموعي انهدن وانا اشوفن كبر مصيبتها بعيوني..

طلعت من الغرفة اجرن بالنفس بالگوات ،مشيت على السنك غسلت وجهي وردت اردن بس انداريت
على صوتها من صاحت بأسمي ،التفتت عليها تحجي ما مصدگة

حواري : صدگ حمززة ماات ؟

هزيت رأسي ب أي
_ جا وين چنتي أنت هستوج دريتي ؟

حواري :نايمة والله ،امس تناگرت انا وحق وما نمت

_ شعدكم ؟

حواري : بعدين اسولفلج ،هسة وينها ريحانة ؟

_ جوة يمها جدة وأمي

بلايه ما تحجي طبت مستعجلة تهف صحت عليها
_امشي على كييفج

ما چنها سمعتني ،لحگتها وبس شافتها ريحانة بچت بصوت عالي وگعدت ،دنگت گبالها حضنتها تبجي على بجيها ومن رزلتها جدة الا سكت و وخرت تمسح عيونها وتحجي

حواري : ديلا هسة واذا مات مو تطلگتي منه ،حتى زحمة تبچين عليه

غضة : يااا ،فلك الصابج

حواري : اسم الله جدة بيش مفاولتني مرة حبلة ،تفلكين بي ليش

غضة : عمن حجاياتج ما محسوبة ،تحجيهن تشمر چن حجار عدج

حواري : احجي الحگ جدة وهم علمودها ما اريدنها تضوج

غضة : شلون ما تضوج خايبة وهي وياه عشرة عمر دگوا الست سنين

باوعت لريحانة
حواري : عاشت ايدج جدة ردت تنوح ،ذكريها خاف تسكت

رفعت عوجيتها
غضة : شووو تعاي اطيح حضج

حواري : مايحتاج جدة حفيدج مكفي وموفي

غضة : ياااع ،قصدج حق

حواري : اكو غيره ؟

غضة : شبيه وياج ولج ؟

گعدت على جهه تدردم
حواري : مابيه شي

غضة : أحلف عليكم متناگرين

حواري : عادي جدة نرد نتراضه بعدين

زهرة : لا تعلمي على زعلج عمة

حواري : ياريت متزاعلين عمة وحده مطنگر وكل ما احاجيه يگول شغل

زهرة : جا يجوز صدگ

تنهدت ساكتة تباوع لريحانة الحالها اشبه بحال طير مذبوح ،گعدت يمها امسد على ايدها مكسور گلبي على كلشي صار وياها ما اعترف ياكلمة تخفف من كبر مصيبتها

رفعت راسي اباوع لميمنة طبت سلمت وضلت واگفه بمكانها تباوع لريحانة

غضة : تعاي جدة لا تضلين واگفة

بلايه ما ترد مشت دنگت حضنتها
ميمنة : البقية بحياتج ،اذا تضلين هيج تموتين والله

غضة : حاجيها بلكت تقتنع

ريحانة : شلون اقتنع جدة وانا لوما عايفتة ما چان مات

نجوى : مكتوبلة يموت بهذا اليوم ،ليش ما تقتنعين مو السبب أنت

لطمت على وجها تصيح
ريحانة : شلون مو انااا السبب ،شلون يمة ،ولكم طاحت دموعه من طلگني وانا ما هتميتله ،انا ما فكرت بيه

كضتها جدة من ايدها
غضة : كافي راح تموتين ولج

هي تبچي وكلنه على بجيها فرد بجية ،بنفس الوكت سمعت صوته يصيح يرد يطب مبين لان سمعها هيج تعيط! !

طب گعد گبالها ثاني ركبته ،يحجي وياها بكل هدوء
ضيرم : يعني البجي والصوت العالي احد گالج يرد الميت ؟

ريحانة : نار بگلبي مابيكم احد اليحس بيها

ضيرم : شلون ما حاسين بيج وانا مخليج تنوحين عليه براحتج وأنتم مطلگين

شهگت تبجي بصوت يگطع الگلب ،حضنها يمسح على رأسها
ضيرم : ما تعبتي من البجي ،مو عيونج عمن والله

كضت فالينته تحجي بس ما نفتهم منها شي
غاصه ببجيها ،ما
چان يوم عادي ،گضه بس وياه گضت روحها

گمت نزلتلها غطا من النضده ،غطيتها وهي نايمة على رچلين عمة
نجوى : طفي الضوة بعد عمتج

_ شلون بيج تضلين گاعدة ؟

نجوى : جا شلون ما تشوفيها كلساع فازة

تنهدت حايرة وطفيت الضوة وهستوني طلعت ولاگتني تريد تطب
بصائر : هااا نامت ؟

_ أي

بصائر : الحمدلله ،اصعدي أنت هم نامي ابد ما نمتي اليوم

_ عيوني تلزگ من النعاس بس ما جاي اگدر انام گلبي محترگ عليها

بصائر : الله يصبرها والله مو هينه ،بس شنسوي كلمن يموت بساعة التنزل ورقته

_ أي والله ،فقار اجه بعده ؟

بصائر : لا والله هل متانيتنه

_ اصعدي وهو من يجي يصعد

بصائر : اخاف عليه من الدراجة كل ما يطلع يضل گلبي يحوس وانا اعارفه ما يمشي مثل البشر يطير طير

_ وتضلين هيج كل ما طلع تضلين بس تحوسين

بصائر : جا شسوي مو بيدي والله

_ دصعدي وهسة يجي موزين عليج هل فرة هاي

بصائر : فلا اگدر والله

_ مو اريد اصعد وگلبي ما يطيني عليج

بصائر : يااا دصعي يمعوده شعدي انا

_ اذا تأخر اصعدي

بصائر : ميخالف

خليتها جوة وصعدت مهدود حيلي بس فتحت الباب عيني صارت عليها متمدد ايده على عيونه بس سمع صوت الباب وخر ايده وباوعلي

سديت الباب احجي وياه
_ شني ما نايم ؟

ضيرم : لا متانيج

أبتسمت ونزعت شالي
_ جا مو وراك دوام ؟

ضيرم : دتعاي يمي عاد اناملي چم ساعة عيوني انتهن

_ اروحلهن فدوة

أبتسم متنهد مبين عليه مقهور من الصار بس ما يبين بس تمددت يمه جرني على ايده ينومني
عدت بالساعة وهو ما نايم ،رفعت روحي اباوعله مبين جاي يفكر بشي

_ شبيك ضيرمي ؟

ضيرم : حالها كاسر گلبي

_ ريحانة

ضيرم : جا منو غيرها ،طار نص حيلي بطيحتها ما ردتها هيج تنكسر الصار وياها كلش كافي

_ تدري احس لو شما سوت حگها ،ريحانة تحبه كلش

ضيرم : انا ليش عاذرها

حطيت راسي على صدرة وهو يحجي وياي غفيت وفززني صوت حركته بالغرفة يريد يمشي لدوامه

من شافني گعدت اجه باسني من راسي
ضيرم : ردي نامي مو تضلين گاعدة

_ جا غير اسويلك ريوگ

ضيرم : ما اريدن نامي

لبس مناظره الطبية وشال مبايله يريد يطلع بس رد اندارلي
ضيرم : نامي حبيبتي
غمضت عيوني وهو طلع صدگ رديت غفيت

°كوكبة°

صوت صياحه خبص الدنيا يطگ بيه متخبل والوادم يردون بس يفكوه من ايده

منتظر : لك ليش تتصرف من رااااسك ،افلشه الما تفكرر بيييه ،لك اموووتك وراه ليش تزيد ضيميي ليش

جر مرتضى واحد ما اعارفه من ايد منتظر يصيح عليه
_ كاااافي راح يموت بأيدك ،تخبلت لو شني ،حگه
لا تلووومه

منتظر : الصوج كله بينا ،الصوج بينا مو بالدوادم

مرتضى : لااا بيهم ،لوما عنادهم وياااه چان ما مااااات لك مااااات حمزة تعرف شني حمزززة يموووت ،انا وياااك نزلنه اخونا للتراب بسببهم

منتظر : بسبب امك وخالاتك لا تضل تلوووم بالناس والغلط من عدنة

وخالتي وداد سمعت هيج لو تخبلت الا تطلع تهد عليه والنسوان كاضاتها ،عذراء تتوسل بيها ما تطلع وخالتي معنادة شني يحجي علينة

عذراء : عليج الله يمة كااافي ،مو وكت طلايب حطيني بين عيووونج

وداد : لج يگول مااات بسببنه

استبرق : ما مچذب جاي يحجي الصدگ ،لوما بتج طابة بحياتهم چان هسة عايشين وحتى ابنهم چان ضل

شهگت من ركضتلها تريد تطگها و وگفن بوجها النسوان
وداد : انجبيييي لج ،حلگج اشگة ،هم غريبة وهم حاطة روحها بكلشي عشتوااا لان مرة الچبيررر

تصيح عليها وتهادد واستبرق محملة عليهن ابد ما سكتت لسان بلسان
استبرق : السحارات بواگات الزلم ،مات بعز شبابه كله منج ،ذبيتي دود الا تزوجيه بتج ارتاحي ترملت هسة وراح تردلج

كضنها النسوان وصياحها هرج الدنيا
وداد : خااايبين هدونيي عليها اشگ حلگهااا الخايسة

طب يركض ،نتر بصياح
منتظر : شكوو شصااااير ؟

وداد : مرتك يالچبييير ،مرتك تغلط علي وتگلي بواگة الزلم السحارة

منتظر : حجيها مثاقيل

لطمت على صدرها فاكة عيونها
وداد : شنييي

منتظر : هيج عدج خلگ تدورين مشاكل ،اسندي بتج شوفي حالها الطلايب ما تفيدج واذا تضلين هيج بيتنا يتعذرج

وداد : ولج خية بشرى ولج الحگي ابنج يطررردني

تصيح وتدگ على روحها تريد تفر السالفة ،هز ايده فلا مهتم روحه صايرة بخشمة وخالتي عدها خلگ حية

وگف گبالها
منتظر : شيسولج خابريني

وداد : يااا ياااا ،ولك شنسويلها

تحاجيه وهو ما چن يسمعها وخله وطلع ،وبس طلع استبرق ابتسم تحركلها بحاجبها تغيض
خالتي وداد الي لوما مخافتها من منتظر چان حرگتها هسة

اجت يمي تحجي بصوت عالي
استبرق : هم يلا نسوي الريوگ ضيعن وكتنا الما يخافن الله

_ اسوي جاي ؟

استبرق : أي بين ما اخابر يجيبولي الريوگ

ترست قواري الجاي الكبار وحطيتهن على النار وبين ما خدر الچاي جابوا طبقات
البيض والاجبان بساع حطيت البيض بجدر يسلگ وانا واستبرق نركض ما بيهن غير بس وحدة ساعدتنة وما چانت ل الله اثاري النواية المسمومة تمشي بدمها مثل امها ..! !

شلت الصنينة وانداريت عليها
_ راح اودي للخالات والعمات بالصالة بس جيبي الصمون وراي

نرجس : صار

بس حطيت الصينينة بالصالة صحتهن التمن يتوسلن بخالة تجي تاكل وهي تحلف ما تحط اللگمة بحلگها..

صوتها اشبه بالمختفي من الصياح ،بس يردنها تاكل وهي ترد عليهن بتعب
بشرى : ما اگدر ،شلون اكل وهو جوة التراب ويني وين الاكل ،بيا حال انا

رديت اركض للمطبخ من سمعت صوت استبرق بس شافتني گالت
استبرق : وين صرتي ولج ،تعاي اخذي هاي الصينية للغرفة

شلتها ارد
_ ناس صاحبين مصاب ونسوي اكل ،مايصير تلغي هل عادات هاي ؟

نرجس : شيلغيهن يمعودة

_ دصبي جاي ،شني ناساياته ؟

نرجس : يااا أي

استبرق : امشي وهسة تجيبه وراج

بلايه ما ارد مشيت للغرفة وديت الريوگ وكتلهن تفضلن ورديت مسكور ضهري كل صينينة شكبرها

استبرق : تعاي اكلي بساع يرادلنه حيل ورانة كومة ركض

اخذت اللفة من ايدها وگعدت اكل يساع ،بس خلصت تگابلنه على مواعين الريوگ والغدة هم زين
طبخوه بره هو والعشا ،صعدت بالليل بس اريد احط ضهري على الفراش باجر الختمة ولازم نگعد من وكت ...

هستوني طبيت وطب وراي ،فتح الكنتور يرگع بالبيبان طلعله هدوم سبح ورد للغرفة وانا متمدده على الفراش بالگاع اون من ضهري ومن شافني
عيونه صارت بگصته

دفر المخدة برچله فززني بصياحه
مرتضى : گومييي على الچرباية بت الكلب تريدد تشهرنة

وگفت على حيلي حاطة ايدي على حلگي اريد اصيح بس يسكت هو الراح يشهرنة
_ صوتك يمعود صوووتك .

مرتضى : نامي على الچرباااية

_ ليش ما تنام يم الزلم

مرتضى : لا تدخلييين

_ أي أي

اخذت غطاي من الگاع وصعدت على الجرباية من شافني تمددت طفى الضوه واجه تمدد ،لا انا الگدرت انام لان هو بصفي ولا هو الخلصها بس چگاير بذيج الظلمة ما تنشاف ...

هستوني غمضت وحسيت بلسعة بأيدي ،فزيت كاضه ايدي فوک المعصم اباوعله ،ضلمة ما اشوف منه شي گمت شغله الضوة وفكيت عيوني مصدومة من شفت ايدي ،أثر چمرة الچگارة نابت بيها

رفعتها اشوفه الاثر
_ شنيي هااااي ؟

مرتضى : ما ادري

_ شلون ماتدرري ،حسيت بيك متقصددد .

مرتضى : متقصد شنييي ،شو ما تعرفين تحجين بت الكلب

عيونه صارت بگصته حسيت بيه يريد يضيع على روحه ،خليت وسكتت الحرگ ياكل بروحي
بس اعارف بيه ما يستحي هسة يلم الوادم كلها علينه..

درت وجهي منه احس بالحرگ
يدگ بروحي صح زغير بس قوي من التعب غفيت وانا اتلوه من الوجع

ومثل امس خلص الركض طول الوكت ما نشفت دموعي كل ما تطب ملاية صوت العياط واللطم يخلني وانا اشتغل ابجي

مسحت عيوني اشهگ وانا اتذكره ،ما عشت هواي هنا بس اجيت بوكت لوعاته عليها ،شهدت عليهن كلهن كل مرة چان يگول
"اموتن لو ضلت بعيدة علي"

"ردولياها حتى ما اعصي الله اكثر"

"ردوها حتى اتوب"

"انا فراگها طلعني من ديني"

أخير حجاية أتذكر بيومها طلعت حتى اطفي الماطور وسمعته يحجي وي منتظر ،چان يگله
_ شسويت بروحك ،هذا أنت اكثر واحد يخاف الله بينا

چان رده
حمزة : لوما فراگها چان مو هذا حالي ،انا احبنها حب حد الموت منتظر ،تعارف شني حد الموت ،اموت كل
ما اتذكر وگفتها گبالي ،لك احس عمري جاي يگضي والله

منتظر : مو چنت تنصح مرتضى ،صرت اسوء منه ،لك شوف روحك ،بس ليلة وحدة غمض عيونك ونام راح يصير بيك شي

حمزة : اتمنى والله ،العمر بلايها ما محسوب

منتظر : راح اطگك والله شيبت گلبي چن احجيلي وي مراهق

حمزة : لك منتظر مو تحب استبرق أنت ،حط روحك بدالي بداعة ابنك ،ولك انا خسرتها وخسرت ابني حلمي انا وياها

منتظر : حمزة خوية ،كافي ،رد لدينك وكلشي يرد مثل ما چان

حمزة : "انا فراگها طلعني من ديني"

كل ما اتذكر موقف دموعي تزيد ،وگلبي حسيت بيه يريد يوگف وانا احظر صينية الختمة بأيدي ،استبرق انعمن عيونها ،رفيف وخواته الباقيات حتى لطم لطمن النسوان التمن صعدن النه فوگ عبالهن وحده صار بيها شي ...

فتحت الباب وچم وحدة صاعدات طب يمنا ،وانا شلت الصينية ونزلت بساع من صاحن راح تبدي الملة ،حطن طبله وحطيتها عليها اشهگ ،مسحت عيوني بشالي وطلعت ما اتحمل أضل هنا اريد ما اسمع شي حتى

بس بدت شردت بالمطبخ بس الصوت عالي وكل النعاوي واللطم وصلني ،اجواء أحير شأحجي وشواصف حزنها ..! !

غطيت وجهي بأيدي اشهك من سمعت صياح خواته وعتباهن اله وما اعارف ليش صاروا اخواني بين عيوني ،وبهل وكت فكرت لو واحد بيهم صارله شي انا هم راح ابجي هيج عليه ؟؟

درت وجهي على صوت دگت الباب ،جريت البرده وفتحته صار گبالي سعد بس شفته بجيت ،كض ايدي وجرني لحضنه

سعد : شبيج خوية ،ولج كوكبة

وخرني يمسح دموعي
_ مااات وهو يتمناها تردله خوية ،مات وهو محروم منها

سعد : الله يرحمه ،كافي شمسوية بعيونج

_ شلون ما ابجي وهو راح للتراب مظلوم ؟

سعد : يومه هذا ،امي جوة مو ؟

_ أي جوة

سعد : ردت اجيبلج سكينة بس ما گدرت تعبانة

_ اسم الله شبيها ؟

أبتسم
سعد : شاكين حامل بس ما نحجي الا نتأكد

نشغت
_ عليك الله

سعد : أي والله بس اريد تگضي الفاتحة واخذها لدكتورة

_ يابعد روحي بالعااافية

سعد : الله يعافيج ،يوم الالج

_ ماريد خوية خلي الك

كل ضنه اتشاقة بس انا چنت احجي من كل گلبي ما اتمنى لا اليوم ولا باجر ولا بعد سنين يصير عدي جاهل من انسان مثل مرتضى ،شيجي على
شنو يشوف ابوه يشرب گدام عينه ،شيطلع الجاهل ينتهي غير ..! !

سعد : طبي خوية ،انا راح امشي للچادر

بس طبيت صارت گدامي نرجس ،باوعلتها مستغربة وگفتها ورا الباب بس ما حجيت شي ومشيت اوزع ماي من خلصت الملاية قراية...

طشت الوادم ،وچان اصعب وكت من طبوا ،ابوه ومنتظر ومرتضى متنگبين حانين الظهر ،گعدوا بالصالة ،هدوئهم چان بداية لنوبة بچي وعياط

التموا اخوانه وخواته وامه ويا وحشة البيت من تمشي الوادم كلها وتضل بس اهل الميت ،بجي البجوه جبروني وياهم ابجي

عذراء بحضنها بتها وتبجي وجها ازرگ صاير بس امها ضلت يمها ،اخذت بتها من حضنها وانا
گمت سويتلها ممة بلكت تسكت البنية راح تموت من البجي ...

اخذتها من ايد خالة وداد ومشيت اگعد بيها بالغرفة سديت الباب اسكت بيها وبالگوات سكتت
نومتها وطلعت ،گعدت يم الباب خاف لا تگعد عاد بساع اسمعها

منتظر : ولج يمة مات ابنج ،شوفي ماكو مرتضى ماكو ،مات والحارگ گلبي غاضب ربه وهو الچان يعلم بينة نلتزم

يحجي مستهضم مقهور ،حاله يفطر باب الگلب چن كبر دهر بثلاث ايام
منتظر : شلون بيج يمة ،شلون يگضي الباقي من عمرج وأنت السبب بموته

نتر
مرتضى : لا مو امييي ،أل غضب السبب ،ولك لا أول ولا أخر وحدة رجلها ياخذ الثانية چنهم متعجبين .

منتظر : انچب ،لا تضل تتهم الوادم ،انا وأنت نعارف بيهم شني المفروض من الاول امك ما تخطي هيج خطوة

وداد : كافي عاد ،حسوا ببتي ،ماعدكم احساس تحجون هيج گدامها

گام وگف يريد يصعد بس اندار عليها
منتظر : ضلميتها أنت ،وخطيتها برگبتج

بس صعد گبت أمها على خالة بشرى ،بس شفتهن راح يتعاركن خليت وصعدت فوگ ،سبحت واسمع صياحهن جوة طلعت من الحمام ولاگاني
مرتضى بأيده هدومه يريد يطلب يسبح ،وخرت من طريقه ومشيت للغرفة

مشطت شعري الياخذله ساعتين الا يتنعم ،لفيته ونمت ماعدي قابلية بكلشي حيل ما ضل عدي موش فاتحة شثگلها

بساع غفيت بس شاغت روحي وگمت اگمز من حسيت بأيدي انمردت

واگف گبالي يباوعلي شايغة روحي ما رفعله چف وخاف سكتتله على ذيج ابد ما اگدر اسكتله هسة

صيحت
_ ليششش ،لك مو حرااام عليك ،بشر نااايم ،ليش هيج تسوووي

كض فچي ،وعصر حلگي بايده
مرتضى : صووووتج بت النعااال

جريت روحي منه
_ ليش تأذينيي ،ليششش شمسويتلك انااا

مرتضى : اكررررهج ،عمن كل ليلة اسمعن اسمه بلسانج وأنت نااايمة

بهتت ما مصدگة
_ لا تچذذب

مرتضى : ما مچذب .

_ لااا جاي تتبله علي

خزرني يتحلف بنبرة خلتني ارچف ،چن صار انسان ثاني
مرتضى : اذا ما خليتج تنسين اسمه بالغصب شوفي

_ مرتضى

مرتضى : اششش ،انخمدي

ضليت واگفه مقهورة اريد اتعارك وياه بس اعارف بيه ما يسكت ويموتوني ،تعوذت الشيطان ورديت لفراشي مختنگة ...

°هيوفة°

گمت اركض للغرفة من سمعت صوت بجيها و وراي اجوي كلهم ،كضيت ايدها احاجيها تبچي فاصلة عن الدنيا
_ شبيج ولج ريحانة شكووو ؟

طگيت على خدها خفيف وهي وجها مغرگته الدموع
_ شو ريحانة باوعي بوجهي

احاجيها وهي ماكو بس تلهج بأسمه ،جراها مني عزيز هزها بقوة الا صحت وعاطت چن ما چانت صاحية
عزيز : شبييج ،لج شبييج راح تموتين ،حاجيني

ريحانة : يمة تعاليلي

وخر عزيز وعمتي گعدت يمها ،حطت راسها على صدر امها
تون وعمة دموعها ابد ما سكتن على حال بتها .

نجوى : شكوو يمة شبيج ،مو چنتي نايمة ،شجاج ؟

شهگت
ريحانة : يمة يعاتبني ،اجاني بالحلم يعابتني ،ولج يمة يگلي مو گلتلج لا تعوفيني

بجت بصوت عالي والولد واگفين يباوعلها عاجزين ريحانة صارت انسانة ثانية ،من الغرفة ما تطلع الاكل گطعته چن جاي تعاقب روحها على شي مو ذنبها ..!

ريحانة : يمة اريدن اموت يمة

نجوى : اسم الله عليج يابعد امج

اشرت للولد يطلعون ،وما بيهم واحد اعترض خلوا وطلعوا ،گعدت گبالها
_ جاي تعترضين على الكاتبه الله ،شتسوين شبيدج ؟

ريحانة : چنت اگدر اردله ،بس انا الصوج مني

_ مو صوجج ،صوج امه ،كافي فدوة لعيونج شوفي حالج وحالنه ،لخاطر اخوانج اوگفي على حيلج

ريحانة : ماگدر والله ،مو بيدي ولكم ست سنين انا وياه ،٫هذا حمزة فكت عيون گلبي" ،غطاه التراب شلون تردوني اسكت

نجوى : ابجي يمة ونوحي عليه من حگج بس مو هيج ولج لگمة صارلج چم يوم ما ماكلة ،راح تموتين

ريحانة : ريتني ميتة ولا خبر موته يايمة ،هذا حمزة الخلص عمره يگلي لو عفتيني اموت وما چنت اصدگه ما چنت اصددگه

تصيح "ما چنت اصدگه"

وتلطم على روحها ،وبالگوات هدأت لوما طب ضيرم صايح بيها چان ما سكتت ..! !

طلعت من الغرفة خلصانة روحي من القهر ومن كل ساعة عدت بهاي الثلاث أيام ،خلص حيلي وي كل شوغة من شوغاتها...

لميت السفرة وتشلحت اغسل المواعين ما بيهم احد راد متغدي ،انداريت على صوته

ضيرم : هيوفة جاي راسي راح يطگ

_ اسم الله ،اطيك حبابة مسكن ؟

ضيرم : أي

مسحت ايدي بهدومي ومشيت للثلاچة طلعت الشريط وترستله گلاص ماي واطيتهن اله وبنفس الوكت بعدني واگفه يمه وطب فقار

بس شافني هز ايده
فقار : تخاف على الدكتور ،راسك يوجعك موو ؟

ضيرم : فقار كلش ماعدي خلگ الك

فقار : عدك خلگ بس لست هيفاء مووو ؟

ضيرم : شريچتك لو شني ؟

فقار : لا عيني بت عمي ومرة الدكتور الغالي أبو جيب المتروس

ضيرم : من الجيب المتروس مبين عدك مصلحه

فقار : ابد وداعتك

ضيرم : صدگت

فقار : اريد فد خمس مية الف ابدل الدرجة هذا الكلب نوح اشتره دراجة احسن من دراجتي وذلني

ضيرم : جا أنت ماعدك ؟

فقار : لا والله الشغل واگف كلش ضال بس اصلح بسياراتكم

ضيرم : سهلة ،شوكت تريدهن ؟

فقار : اذا اليوم تسوي فضل

ضيرم : خوش

ضحك وكض وجهه يبوسه
ضيرم : لك لااا ،طايح الحظ شبيك

ابتسمت اباوعله حاط ايده على خده
ضيرم : شفطتني شفط طايح الحظ .

فقار : نروح فدوة انا وعشيرتي لجيبك المليان فلوس

أبتسمت
_ لا تحسده

فقار : عيوني مو كلش صفر لا تخافين

طلع بساع من سمع صوت نوح برا وضيرم گد ما رأسه يوجعه خله وصعد فوگ وانا بس كفيت المطبخ لحگته ،بس فتحت باب الغرفة چان حتى الضوه مطفي

بصوت ناصي گلت أخاف لا يطلع نايم وافززه
_ ضيرم گاعد ؟

ضيرم : أي

سديت الباب ومشيت گعدت يمه على طرف الچرباية
_ شجاك ياعيوني ؟

حط ايده جوه رأسه
ضيرم : ما اعارف بس لا تخافين ساعة ساعتين واصير زين

°حواري°

نزلت رچلي من الجرباية احركها بنفاذ صبر ،اباوعله فلا چن معتبرني بالوجود

كوم اوراق گدامه ،كلساع يعقچ وحدة ويشمرها صارن كوم اوراق تارسات الگاع وهو مبين بس
جاي يضيع وكت

گمت على حيلي امشي وگفت گباله ،تخصرت اريد اتعارك وياه ،عركت هذاك اليوم ما جابت فايده اضن

رفع رأسه باوعلي
عبد الحق : شبيج ؟

_ شتگول شبيه ؟

عبد الحق : ترديلج طلابة مو ؟

_ طلابة ،اناا اريد طلابة ،قصدك انا ام الطلايب موو ؟

عبد الحق : لا وينج وين الطلايب اعذريني غلطت بحقج

_ حققق

عبد الحق : خير

_ خيررر ؟

عبد الحق : لا اله الا الله ،شكو حواري

گعدت يمة على الكرويتة الحاطها بالغرفة
_ احجيلي شبيك ،شنو الغلطت بيه وخلاك هيج تتغير

عبد الحق : لشوكت اضل اعيد ،اما ما متغير

_ شلون ما متغير ،حق صاير ما تطخني تعارف شني شكتتني بروحي

عبد الحق : علمود بطنج

_ لا تچذب علي ،اكو شي ؟

تنهد
عبد الحق : كافي سدي الموضوع

_ يعني اكو شي

عبد الحق : لا تلحييين

فزيت مصدمة من صحيته وما اطاني مجال حتى احجي وخله ونزل جوة ،طاحن
دموعي ما مصدگة هذا نفس الانسان العاشرته گبل چم شهر ،معقولة چنت مغوشة بيه ..! !

نزلت جوة اشهگ ادوره ماكو طالع وبس شافتني عمة فكت عيونها مستغربة من حالي وأجت بساع تسألني

شيماء : ولج حواري شكوو ؟

شهگت
_ حق عمة ،حق متبدل علي

شيماء : شني متعاركين ؟

_ لا والله ابد ،هيج فجأه بين ليلة ويوم انگلب گلب صار ما يشوفني بعيونه

شيماء : اسم الله الرحمن ،ما حاجيته ؟

_ كل ما احاجيه يگلي شغل وگتيلي اعذريه بس مو هيج عمة

شيماء : احاجية انا ؟

_ لا لا ،ما يرضى سالفتنة تطلع من الغرفة

شيماء : جا شلون ؟

_ ما اعارف عمة ،تعبت والله

شيماء : حگج بس كافي تبجين والله موزين عليج

جريت نفس القهر ياكل بي اكل
شيماء : تعاي اگعدي يمي اريدن اطبخ

بلايه ما احجي هزيت راسي ومشيت وراها گعدت وعمة بدت بالغدا تطبخ وانا كل بالي يمه ،شني السويته وهيج نفر مني ،مرات احسه حتى ما طايق وجودي يمه ..؟! !

رفعت راسي على صوتها من طبت تدردم
بركة : مو صيف يكتل كتل الشمس نازلة هي وجهالها مايصير هيج انسلگنه

بس شافتني گالت
بركة : هاا الحامل

_ ولي بركة مالي خلگج

بركة : جيرة بگصتج غير اشاقيج

_ وكتج غلط

بركة : هاا متزاعلين ؟

ما رديت عليها عليها ،اجت گعدت يمي
بركة : شبيكم صايبكم الحمزة ؟

_ اهووو

بركة : مو صوجج صوجي انا احاجيج

گامت طبت جوة وانا ضليت احوسن كل فكري يمه لا أنا العارفت البيه ولا انا التعاركت وضليت لا هيج ولا هيج ..! !

گطعت صفنتي
شيماء : گومي عمة تمددي لا تضلين گاعدة صارلج هواي

هزيت رأسي وصعدت فوگ ،بدلت هدومي بشي خفيف هواي صايرة اختنگ من الحر عود بطني بعدها ما كبرانة ،لو كبرت شلون بي ..! !

غمضت عيوني اريد انام وما افكر ،وبين النايمة والگاعده انفتح الباب ،ضليت ساكنة ابد ما تحركت وشوي وحسيت بشفايفه انطبعت على رگبتي...

نغزات شاربه جبرني اتحرك وحس بي گاعدة بساع وخر ،فتحت عيوني اباوعله مرتبك يدير
وجهه مني رديت غمضت ميته من القهر ما حاجيته لان مليت وانا اسأل شكو وشني السويته وما الگه كل جواب ..! !

گعدت وي وكت الغروب بس شفته گاعد گلتله
_ وديني الاهلي

باوعلي مستغرب
عبد الحق : شعدج ؟

_ اريد امشي اشوفن ريحانة

عبد الحق : خوش

گمت حضرت روحي بساع وبس وصلني وشافني طبيت رد للبيت ،بس طبيت للمطبخ صار گدامي گاعد على المجمده بأيده تفاحة ياكل بيها ويسولف
وي بصائر بس شافني گال

فقار : اهوو ،لا هلا

_ لا هلا بيك ،ما جاية لبيتك ترا بيت ابووي

نزل من المجمده
فقار : اعوذ بالله من لسانج

_ طالعة عليك

فقار : شعدج جايتنة ؟

بصائر : ياا فقار

_ أجيت اشوف اختي

ما حاجاني وبس شفته ساكت مشيت جوة ،بوجهي للغرفة اعارف بيها وما تطلع منها ،بس طبيت شفتها گاعدة وحدها وصافنة

اندارت علي ،غمضت عيونها وردت فتحتهن السواد محاوطهن وجهة صاير هيكل ،التعب ينشاف بحالها شوف گبل لا يتسولف...

سديت الباب ومشيت گعدت گبالها ،كضيت ايدها ثنينهن
_ ريحانة ما كافي ؟

ريحانة : لا

_ جا شلون تضلين هيج ؟

ريحانة : اريد اموت

_ اسم الله عليج ،شني تموتين ؟

ريحانة : كل ما جاي اصفن اتذكره ،انام اتحلم بيه

_ ترحميله ،صليله ،وتهون عليج

ريحانة : ما جاي اصدگ هو مات

_ لازم تصدگين

طاحت دموعها تهز رأسها ب لا ،ضليت گاعدة يمها وامي هم اجت چانت
يم بيت جدي ضليت بالساعة ومشيت وداني عزيز من اجه ،هستوني طبين وطبوا وراي عمي سمير وبرهان

وگفت بمكاني منداره عليهم من صاح عمي علي
وگف گبالي مبتسم
سمير : شلونها أم التوم

_ الحمدلله عمو

سمير : خوما تعبانة ؟

_ بعدني بالبداية مادري شني المتانيني

سمير : أن شاء الله كل خير ،زلمتج وين ؟

_ اضن جوة

سمير : اذا جوة صيحي ،گليلة يجي للديوانية

سمير : عفية ،و وياج جاي من ايدج

_ لا هاي صعبة

سمير : اطيج عشرة

_ صارت سهلة هسة

ضحك بصوت عالي ،وانا أبتسمت وصعدت فوگ صحته وبس نزلت انهدت علي عمة
شيماء : ضلي يا صاعدة يا نازلة ،ما يصير تهيدين

_ على كيفج عمة عمي سيمر گالي اصيح حق وصحته

شيماء : بعد ممنوع تصعدين الا بوكت ما تنامين

أبتسمت
_ خوش

مشيت للمطبخ سويت جاي وطلعت كعك عدنة ابو الدهن عدنة ومن شفته تذكرت ريحانة چانت تگول اطيب اكله عد حمزة ،ترحمتله وحطيت منه بماعونين وبس خدر الجاي صبيتلهم ومشيت اوديه

بأيدي الصينية بس وگفت وانا اسمع حجيهم المألوف

برهان : ما ضلت محافضة تعبت علي ما دورتها تعبت والله ياعمي

سمير : گلتلك من گبل احسنهم حتى ما ضالين بالعراق

برهان : گلت شيطلعهم ،بس اضن طلع هل طلعة هاي حتى يكطعها كلش

سمير : انا وياك شتحتاج ،معارفي هواي وي معارفك نلگاهم

عبد الحق : واذا لگيتوهم شلون ؟

برهان : الله يلحها

سمير : شو گوم شوفلي الچاي وين

بساع دگيت الباب وفتحته ،طبيت طبيعي گام حق اخذ الصينية مني وخليت وطلعت ومن حجيهم حتى العشرة نسيتها

معقولة يلگوهم وبعد كل هاي السنين يردون! !

زين اذا ردوا شلون ؟

راح تزيد ما تنقص طلايبنا ...

°غاية°

_ لك نوووح والله اگول لصخر عليك ،سمعتك تريد تعلگ بالدراچة

نوح : لا تصيرين فتااانة

_ جا اگعد راحة عليك الله

نوح : بطلت والله بس لا تصيرين حاروگة

_ احلف

نوح : والله ،جيبلي فالينة هاي تنگعت

_ ماتبطل كلساع غاسل راسك هسة يصير بيك تيفو

نوح : ماعلي شي

صعدت ادردم عليه جبتله فالينة اطيتها اله
لبسها
وطلع ،وانا مشيت للغرفة جبت عباتي ورديت
_ ميمنة يلا وينج

نزلت تركض
ميمنة : اي اجيتج

لبست عباتها
ميمنة : تعارفيني من اخبز ما ارتاح اذا ما اسبح ،يلا امشينا

لبست عباتي وطلعت وراها ،امي وجدة وعمة مشن گبلنة لان انا چنت انضف وميمنة تخبز ،من طبينا لاگتنا حواري هم جاية هستوها
طبيت وراهن سلمت وضليت واگفه بس اباوع ما اعارف شأحجي واگدر اواسيها وبالاصل
حجي الكل ما جاي يفيد وهي يوم عن يوم جاي تذبل اكثر

درت وجهي اعدل بشالي من طب عزيز طالعة گذلتي ،شلعت گلبي الا انضمت ،دنگت راسي من اجت عيني بعينه عبرني ومشى يسلم على جدة

سلم عليها وطلع ،ما تأخرنة هواي وردينا لان اليوم جمعة وراح يمشون الولد للگيعان يردون نحضرلهم اليحتاجوه...

أول ماطبيت تشلحگت اغسل الدجاج حتى اسلگه نص سلگه ياخذوه وياهم يشوه على الفحم ،ابتسمت من اجه وگف يلم بشعري

ليث : شعرج هواي يطاير

_ من البنكة

ليث : أي ،سلگتيهن كلهن مو ؟

_ أي كلهن

ليث : عاشت ايدج

_ وايدك

ضل يسولف وياي بين ما سلگتهن وحضرتهن الهم وبس اجوه الولد اخذهن واخذ باقي الغراض وطلع

ميمنة : هاا خلصتي ؟

انداريت عليها
_ أي

ميمنة : تدرين نسيت اخذني الوكت اعزل بغراض اخوج

_ ماعدي شي بساع خلصت

ميمنة : جا غير نادرة

أبتسمت
_ طالعة عليج

ميمنة : اشوف روحي بيج دوم

_ كلهم يگلولي اشبهج

ميمنة : حتى اكثر من خواتي

_ جا هنيالي

غضة : خايبات وينچن

_ هااا جدة

غضة : تعاي ولچ شوفي

مشيتلها للصاله بساع مگعدتها اتابع مسلسلتي انا وياها حتى تحجيلي
_ هاا جدة شصااار ؟

غضة : ولج طلع مو ميت مصخم الگصة

_ يااا جا مو طگوه طلقة ؟

غضة : انداري ولج افتر راسي فر

ميمنة : غير هنود جدة شتماني راسج ما يفتر

غضة : ولچ تعبوني هلگد ما يركضون

_ أي والله حگج هواي يركضون ،جدة ليش ما نتابع غيرها ؟

غضة : لا خل تخلص هاي يلا

_ بكيفج

گعدت اگلب بالتلفزيون مليت من القراية ،ساعة ضليت گاعدة وحسيت لا هواي
ضيعت وكت گمت للغرفة وحطيت كتبي وگعدت اقرأ وخليت العربي من يجي ليث على باجر...

°بركة°

دگيت عناد الا امشي للسوگ وي امي اشتري هدوم للصيف لان ضامة العيدية لهسة ما صارفتها وبالف يا علي الا رضت

من شافتني اريد امشي دگت رجل الا هي هم تمشي
حواري : جا انا هم اريد امشي

شيماء : وين ماخذتج ،مرة حبلة اگعدي واسكتي

حواري : جا عمة اضلن وحدي ؟

شيماء : مو رچلج فوگ ؟

حواري : لا طلع اجاه عزيز وما اعارف وين مشوا

شيماء : جا اللبسي عباتج اوديج على اهلج

حواري : منو يوديكم للسوگ ؟

شيماء : اشوف واحد من الولد

حواري : عمة جيبلي وياج تمر هند مشتهيته

شيماء : وبعد ؟

حواري : بس هذا

شيماء : چنج على تمر هند

حواري : اگلج بركة ،شو عمتي حبابة

شيماء : ياا

بركة : الله يرزقني بعمة مثلها

حواري : أي والله

شيماء : تحضرين روحج لو امشي وحدي ؟

ركضت للغرفة
بركة : دقيقة بس دقيقة

والدقيقة صارت ما اعارف شگد امي خبصتني خبص بس شافتني طلعت من الغرفة عاطت ماله ،وصلنه حواري الاهلها وچان ضيرم هستوه جاي
گال يوصلنه وعلى الأساس يتانينة بس خابروا عليه ريحانة متخربطة ومشى گال ردوا أنتم

بس طبينا للسوگ گبل لا تتسوگ امي گتلها الا اشتري هدوم اول شي ومن محل لمحل صارت الدنيا ضهر
وبدت تعزل المحلات

شيماء : انا مو گلتلج ما نلحگ ،عاندتي لا نلحگ شوفي هسة كلشي ما جبت

_ باجر يمة ردي باجر واتسوگي

شيماء : اوووف منج ،بس اجيبن تمر هند لحورية

جابت تمر هند وطلعنا بأيدي علاليگ الهدوم
،وگفنة نأجر تكسي وماكو مابيهم احد يرضى يطب للقرية ،گعدت بالگاع الدنيا تسمط

ورفعت رأسي على صوت هورن ،وسعت عيوني من شفته ،فركت عيوني خاف يتراولي وگمت على حيلي احس بادن رچلية من گال

رهيب : وين توصلين خالة ؟

شيماء : غاد للقريات ،قرية خنسة اذا تعارفها

رهيب : أي ،اصعدوا

جريت عباة امي من ورا اندارت علي ،هزيتلها رأسي ب لا
_ شوفي غيره يمة

شيماء : وين اكو غير ماتشوفين صار ساعة واگفين هنا

_ ميخالف

شيماء : شبيج ولج ؟

ضليت حايرة لو حجيتلها راح تگول منين تعارفيه وراح نطب بسين وجيم وتحقيق ما يخلص واكيد ما تضم على اخواني وتحجيلهم وساعتها اطيح بيها

ومن صعدت گدامي حسيت هاي هي بعد اجباري اسكت وانا هم صعدت مدنگة راسي بس شني احس الدرب صار شطوله ،يحجي وي امي عايش دور ابو
التكسي...

ماعولت نوصل ،فتحت الباب بس اريد انزل بس ما انفتح ،وي ما درت وجهي اجت عيوني بعيونه مد روحه يفتح الباب ،رديت ضهري ارجف من طخت ايده ايدي

فتحه و وخر
رهيب : الباب يشكل سيارة تعبانة ،اريد ابدلها بس حالتي على گدي ما اگدر

رفعتله حاجبي ب "لا والله"

أبتسم وانا نزلت ،حتى العلاليگ نسيتهن وامي جابتهن وراي تدردم
شيماء : شبيج ناسية روحج

_ ماكو شي يمة ،اطيتي كروة ؟

شيماء : لا ما قبل

_ يااا جا مو على باب الله

شيماء : حلف ما ياخذ ،مبين ابن حلال

تنهدت احجي بگلبي
_ هل ابن حلال عدوة من اعدائكم

بصائر : جا وين المسواگ

شيماء : وين گدرت اتسوگ انا التهيت بهدوم هاي چن ما مشتريه هدوم بحياتها

بصائر : ششتريتي ولج ؟

شيماء : السوگ كله اشترته

_ وين يمة كلهم چم دشداشة

شيماء : والفساتين والشالات ،تعاااي صدک انا مو گتلج لا تاخذين كحلة شلون تعانديني ؟

صحت من كضتني من اذاني منورة الحجاب
شيماء : شعدج بالكحلة يالمصخكة ؟

_ عاجبتني والله يمة ،اذني بروح مدري ياهو هديها راح تنشلع من مكانها

هدتني وانا گمزت شايغة روحي
_ شبيج يمة احجي حجي

شيماء : وين احنا وتردين تتكحلين ،معرسة شعدج ؟

_ الله اكبررر ،جبتها يمة ترا ما حطيت منها

شيماء : شني جبتيها للكنتور ،تضحكين علي بركة تردين ؟

_ لا حشاج ،بس والله هيج لان عجبتني جبتها

شيماء : ممنوع تحطين منها ،ممنوع غير بس بالمناسبات

هزيت رأسي ودنگت شلت علاليگي شمرتهن بالغرفة ونزعت عباتي وهي طبت ايدها على بطنها چنها بطريق ،گعدت تبحوش بعلاليگي اعارفها اريد تاخذلها شي

_ شعجب اجيتي ؟

بصائر : مختنگة من أجواء البيت گلت اجي يمكم ارتاح

_ شوكت تجيبين ؟

بصائر : ما ضل شي ثلاث اشهر

_ يا الله ،بطنج كبرانة صايرة تضحك

بصائر : دولي والله صايرة تخبل

_ والله چنج بطريق ويمشي

بصائر : انا راضية ،عادي من اجيب ترد مثل ما چانت

_ ياهو ضحك عليج وگالج ترد

بصائر : خاب شبيج أنت اگوم اكتلچ ؟

_ شبيج اتشاقة وياج

بصائر : ماحب هيج شقة

_ اممم

گعدت گبالها
_ شني تردين تخمطيني ؟

رفعت وحدة من الگلبيات الكشمير المشتريتهن
بصائر : هاي عجبتني اخذها اتبرد بيها

_ تدفعين فلوسها

بصائر : انجبي

_ جا ما اطيها

شمرتها علي
بصائر : الله لا يعوزني عليج عدي كومة هدوم

ضحكت وحطيتها بحضنها
_ اخذيها والله اشاقيج

بصائر : گولي والله تشاقين

_ والله اتشاقة شني ما تعارفيني احب اداهرج

بصائر : انا ويني وين المداهر من اجيب داهريني حتى اگوم اكتلج

ضحكت
_ جا اداهرج هسة براحتي

بصائر : لا تستغليها بيج غير تانيني من اجيب

ضلينة نداهر انا وياها ونسيت سالفته ،بس مشت هي اما عزلت هدومي وفتحت علاگة الغراض من بينهن
چانت الكحلة

شلتها بأيدي وفتحتها اباوع بيها سودة بس مو مثل كحلة جدة ،هذيج الاثمد الأصلية ردت احط منها بس خفت من امي خليت وضميتها

وبس طلعت من الغرفة شفتها طبت
حواري : هاا المسربتة أم السواگة

_ طبح الله حظج على هل حجي

حواري : مچذبة ،تموتين على الخورة

_ شوف منو تحجي

حواري : انا وين طالعة ،مرة گاعدة وساكتة

_ لوما حامل چان مشيتي وياي

حواري : أي والله

عبد الحق : وين تمشين ؟

اندارت عليه
حواري : للگبور

عبد الحق : تزورين منو!

حواري : ازور ضميرك

رفعلها حاجبه وهي سوتله نفس الحركة ،خزرها بساع خلاها تعدل حتى وگفتها ،اباوع عليهم مستغربة چنهم ديچ ودجاجة صايرين ،واحد يخوزر بالثاني ما اعارف شلون تعوذ الشيطان وصعد فوگ

جريتها
_ هاي شبيج ولج ؟

حواري : اخوج صاير فرد نوب ،حجاية براسها خير ما يحجي وياي

_ ولج ترديله الخزرة ما تخافين يطگج ؟

حواري : يطگني وانا حامل وين صايرة هاي

_ مترهيه

حواري : جا شلون

صعدت وراه وانا مشيت للمطبخ سويتلي لفة مال كبود ضالات من الغدا ،گعدت اكل وطب
جعفر بس شافني جر اللفة من ايدي گمت اگمز وهو سواها لگمتين خلاني اتخبل

ضحك يلوچ وانا وگفت أصيح
_ مايصيرر هيج ،ترا مايصير گلي اسويلك

جعفر : عجبتني هاي اللفة تخبل

_ اريد اگلك سم بس ما يطيني گلبي

جعفر : جيرة بفرگج ما تصيرين مثل صاحبتج شلون حنينة على ليث

_ بكلشي حنينة بس بأكلي لا

جعفر : امداج أي والله ،امس گاعد يمهم بنص الليل گامت سوتله اكل

_ لو گايلي اسويلك ولا ماخذ لفتي

جعفر : نحيسة

_ لا مو نحيسة بس لفتي خط احمر

جعفر : انعديتي من حواري مو ؟

ضحكت
_ حواري أم لفة

حواري : سمعت تحجون علي

جعفر : مو أنا هاي بركة تگول عليج أن لفة

_ يااا ،جا منو يگلي انعديتي من حواري ؟

جعفر : أي بس ما گلت عليها أم لفة

_ جعفر اريد تحرگ مووو ؟

ضحك وهز رأسه ب لا ومشى يطب جوة ،وهي ترست دولكة ماي وردت صعدت وانا ضليت افتر
كلهم ينامون الظهرية بس انا مو دائما انام ومرات هواي أضل افتر وحدي مثل هسة

كفيت ردانتي اريد انضف الحوش ،الجو زين وكاسر الحر ،دنگت اكنس وادندن رافعة
گلبيتي بهدومي وبس خلصت ترست نجانة ماي وابأيدي أطشر الماي حتى ارشه بلكت يبرد صايرة الصبة حارة

نزلت ثوبي اريدن اطب وفزيت من سمعت صوت دبچة صارت بالحوش ،تلفتت خايفة ادور بعيوني

ونشغت من شفته
_ رهييب

نزل اللثام من وجهه
رهيب : بركته

_ شعدك هنااا ،شعدك

مشيتله متخبله ادفع بيه اريدنه يطلع ،وهو ما يتحرك
_ اطلع رهيب اطلع لا يجي أحد

رهيب : كافي

نتر ونزل ايدي ،رفعت راسي اباوع بعيونه وارجف من الخوف

همس بصوت خشن
رهيب : مشتاگلج

جرها وقبض على ايدي اكثر ،احس على دقيقة اموت
_ عليك الله اطلع لا يجي أحد ،رهيب اخواني هنا والله يموتوك

رهيب : بس اشوفج

_ شتشوف مني ،شعدك شايفني ،تجيب المشاكل الروحك أنت لو شني ؟

رهيب : اذا كل المشاكل مثلج يا محلاهن

_ عليك الله ،بروح ابوك

رهيب : وروح أبوي جاي اشوف حگي ما مسوي كل غلط

_ شلون ما مسوي غلط ،أنت ما دايس بس القرية دايس بيت ،تعارف شني دايس بيت

رهيب : دقيقة واروح

طاح گلبي من سمعت صوت الباب انفتح ،درت عليه موسعة عيوني وصوت خطوات بنفس الوكت تتقرب منة ... !!


تعليقات