رواية خلخال مشوه الفصل السابع والثلاثون 37 بقلم زمرده

 

 

 

 

رواية خلخال مشوه الفصل السابع والثلاثون بقلم زمرده




باچࢪ يطيح الدࢪب مثل البواچي
باچࢪ نصوغ العشگ
حجل وتراچي باچࢪ تغني المنايࢪ باچࢪ!

°بركة°

طاح گلبي من سمعت صوت الباب انفتح ،درت عليه موسعة عيوني وصوت خطوات بنفس الوكت تتقرب منة ..!!

ادفع بيه واهمس بحس يرچف من الخوف
_ اطلع اطلع رهيب اطلع

وهو فلا چنه ،يا چبل ما يهزك ريح ،من شفته هيج ما مهتم وبسببه انا الراح اطيحهن بيها ،تشاهدت على
روحي ..!!

حطيت ايدي على گلبي وانداريت من سمعت الصوت وراي وحمدت الله الف مرة من شفتها وما شفت واحد من الولد ،فاكه عيونها وتباوعلي مصدومة فصوص عيونها جامده ما بدرت منها أي ردة فعل الا بعد ما هو حجة
رهيب : يشهد الله انا كل نية مو زينة ماعدي .

تقربت تنتر بصوت ما تريد احد يسمعه ،وانا اعارفها كلش زين ما راح تعديها الي
ميمنة : يانية ،شجابك علينة أنت ،تحجي صدگ لو شني ؟

رهيب : لا تسأليني هل سؤال لان حتى انا ما اعارف ليش جايكم

ميمنة : هو شني الما تعارفة ،ناسي الثار والطلايب تريد تزيد النار حطب أنت ؟

تنتر نتر وياه وهو بس يريد يسيطر على الوضع ،
اباوعلها بخوف واطگطگ اصابعي چن صخر گدامي صايرة مثله حتى تهدد تهديد مبطن بحجيها

رهيب : ما ازيدها انا الرايد اطفيها

ميمنة : راح احجي وياك هل مرة بالطيب وما اخلي احد يعارف بدوستك للبيت ،بس اگلك نوبة الجاية لو عارفت بيك دايس بيتنة ما يصير زين وراح اوصل الحجي الهم وتعارفهم شني أنت ما داعي احجيلك بيهم

باوعتلي
ميمنة : وأنت حسابج يمي

رهيب : الذني ذنبي انا الدست بيتكم هي شدخلها ؟

ميمنة : هاي وگفتها وياك ذنب بحد ذاتها ،وأنت بكل مطرود رد الاهلك لا اعيط واللم الوادم عليك اخليك تطلع منا مچفن

خزرها وهي ردت خزرته خلته ينزل عينه
ميمنة : تطلع لو شلون

رهيب : ماشي عمي شبيييج

ميمنة : شبيه يعني بس شفت حظرتك واگف وي اختي ببيتنا ،يعني شبيه

بلايه ما يحجي خله ومشى لنهاية البيت صعد على السياج وبس اختفى ما حسيت غير براچدي خله خدي تشب بيه نار من قوته ،كضيت خدي مصدومة ما توقعت تطگني

رفعت ايدها تأشر علي
ميمنة : بصلاااافتج ما شايفة ابددد ،لج شلوون توگفين وياااه ،ولج شلون لو شايفج واحد من
اخوانج شتگليلهم

بس اريد ابرر الها وهي صايرة مثل البركان وتفتر بمكانها ساعة الساعة تحرگني من عصبيتها القلة اشوفنها

_ والله بس ردته يطلع ،ما ادري چنت اكنس شوفي حتى الحوش بعده منگع ،ما ادري شجابه والله ما ادري

ميمنة : انا ما گايلتلج تدرين ،بس ولج لو شافج واحد منهم ولج لو تبررين للصبح ما يصدگوج

_ ما مسوية غلط انا والله ما سويت شي ضايجة وطلعت اكنس وما اعارف شجابه

ميمنة : ليش وگبل مو لگفتلج تمشيله

_ من چان يمنة ،بعد من طلع والله خفت حتى من شوفته

ميمنة : بعديشش ،بعد ما حطيتي روحج براسه

_ ميمنة صدگيني

ميمنة : امشي طبي جوه لا اطيح حظج ،وصلت حدها وياج

اباوعلها مدمعة ما اريدن هيج تعاملني والله انقهر
بس بنفس الوكت اگولن حگها

بس شافتني تحركت اريد اطبن گالت
ميمنة : لوما جاية انا وجاي غيري ساعتها چان شصار

_ لا تخوفيني فدوة ترا مو صوجي والله

ميمنة : الصوج منج منين يعارفج لوما دروبج ومشيتج اله ؟

_ كله علمود لا يضل جوعان و الله شاهد علي ما چانت عدي نية ثانية لو شي

ميمنة : ماعدج بس ماتدرين هو شني ،ما خفتي منه ؟

_ ما اعارف ليش ما خفت ابد .

ميمنة : لان صلفة ،التتعده كل هل درب بلايه مخافتها من اهلها ما تخاف من غيرهم ،انا هم
ما اعارف شجاني اسأل والجواب موجود .

_ ليش اجيتي ؟

ميمنة : الله دزني

_ دحجي الصدگ

ميمنة : مو جاي اگلج الله دزني ،هيج گاعده وفجأه گمت لبست عباتي وصخر وصلني وبيج بخت مستعجل وما طب

_ كافي تخوفيني شبيج

كضتني من معصم ايدي بقوة
ميمنة : لو اكسر ايدج الودتله اكل هم ما يرتاح گلبي والله

_ جا عود هاي أنت ام الانسانية الحنينة

ميمنة : لا تخليني اكتلج كتله تطلع الانسانية من عيونج

_ بس هدي ايدي وميخالف العظم راح يطگ والله

نترت ايدي وطبت گبلي تدردم ،لحگتها احلف بيها ما تحجي وانا اعارفها ما تحجي بس لو تكضني هسة تگضي بي التوبة

ميمنة : كافي لحيتي ترا

_ ما تحجين مو ؟

ميمنة : ما احجي بس لو تنعاد والله احجيلهم كلشي وساعتها ابسط شي يسوه حتى المدرسة يحرموج منها

_ شني السالفة

ميمنة :ولج هذا أبن چسار ،تعارفين شني معنى حفيد غازي هذا ؟

_ اليسمعج يگول اريدن اتزوجه

خزرتني وما ردت ،طبت للصالة وانا وراها افتر بس طبت للغرفة شمرت عباتها من ايدها وگعدت ،گعدت يمها

_ شبيج ؟

ميمنة : شبيه ؟

_ احسج ضايجة

ميمنة : لا ماكو هيج شي

_ والله ؟

تنهدت
ميمنة : هيج شوي اكو سالفة متعبتني وجاي افكر بيها

_ احجيلي

ميمنة : شأحجي ،حتى ما تستاهل احجي بيها ،سالفة تافهة

_ اممم

ميمنة : لا تصدگين بكيفج .

_ هسة انا حاجية ؟

ميمنة : لا بس عيونج يحچن

_ مگرودات

ميمنة : أي كلش

_ اگلج

ميمنة : گولي ؟

_ شعجب لهسة ما حبتلي لا أنت ولا هيفاء ؟

رفعت حاجبها
ميمنة : شلج بهل سؤال هذا ؟

بلعت ريگي
_ مو اريد اصير خالة

ميمنة : اهاا

_ أي والله

ميمنة : ما اريدن اسمعج بعد هيج تحجين ،هواي طالعة عينج

_ هاي لان سألت سويتيني طالعة عيني.

ميمنة : جا وينج وين هل حجي

_ بعد ما احجي عمي

ميمنة : لا هم عوزج تحجين

گلت بگلبي
_ شگد حقنة

ميمنة : سكتي وجاي تحجين علي بگلبج مو ؟

مو جديدة هاي ميمنة حتى من اصفن تعارف شني جاي افكر
_ لا ما حاجية عليج

ميمنة : الچذب حرام

_ گلت عليج حقنة

ميمنة : حقنة لان مو خفيفة مثلج مو ؟

صحت
_ اناا خفيفة

ميمنة : أي ،ام الخواشيگ لو غيرج .

_ اهوو تورطت حجيتلج لو شني

ميمنة : ما حجيتيلي ،بگت لسانج اذا تذكرين

_ عليج الله كافي ،والله ندمتيني

ميمنة : شفيد الندم

_ لا ياااربي، راح تخبليني ميمنة لا تحجين وياي هيج بداعة صخر

ميمنة : أي خوش ،گومي جيبلي ماي

_ لا والله

ميمنة : مو اگوم اكتلج الكتلة ما كتلتجياها

_ ساعة السودة ،گومي ولا هل ذلة عليج الله

ميمنة : تجيبلي ماي لو شلون ؟

_ أي اجيبلج وغصبا على راسي

ميمنة : طبعا

گمت اتحسب وگبل لا اطلع گتلها
_ حكم القوي على الضعيف

ميمنة : تمشين لا اهفج بهاي شحاطتج

بلايه ما ارد عليها طلعت بساع لان اعارف تسويها جتلها ماي ورديت وگبل لا اطلب سمعت صوتها عالي تصيح محترگ گلبها

حواري : كااافي ،مليت انا مليييت ،لو توديني الاهلي لو تحجيلي شبييك

طبيت اركض للغرفة شفتها تريد تطلع
ميمنة : شكوو شصايرر ؟

_ ما اعارف حواري تصيح چن متعاركة هي وحق

ميمنة : اسم الله ،شجاهم ذولي

_ والله ما اعارف ،تمشين تشوفيهم ؟

ميمنة : ما اريدن اتدخل بس اخاف عليها لا يصيرلها شي

_ والله هل أيام اباوعلها كلش ،حتى واهسها طاير من برود اخوج

ميمنة : ماشية اشوفنهم

طلعت هي وانا وراها ،چان صوتهم ماكو ،صعدت هي وانا ما گدرت اضلن وما الحگها اريد اعارف شني الخله صوتها يطلع هيج، وبس دگت الباب ميمنة فتحه حق

ميمنة : شكو خوية شبيكم ؟

عبد الحق : مابينة شي بس طگت فيوزاتها

وهي من وراه صاحت
حواري : طگت فيوزاااتي لان حجيت الحگ ،تعاي احجيلج وشوفي منو الغلطان

اندار خازرها وصاح
عبد الحق : اسكتي لا اجيييج

حواري : تعاال ،تطگ ،طگني عادي بس فهمني شني الفلم ،نا تريدني اللم غراضي و اولي الاهلي

عبد الحق : بكيفج
وهي تخبلت موسعة عيونها تباوعله وتباوعلنه تريد تستوعب الگاله

ميمنة : شني السالفة خووية ؟

عبد الحق : تريد تمشي الاهلها ،بكيفها انا ما امنعها

حواري : تحجي صدگ ؟

ما رد عليها وخله وطلع من الغرفة وهي تخبلت فتحت الكتنور تريد تطلع عباتها وتصيح
حواري : ما أضل يمه والله ما أضل لو تنطبگ السما على الگاع

جرت العباة ميمنة من ايدها و وگفت بوجها وحواري عقل ما ضال براسها
حواري : اطيني العبااااة ،اطينياها لا والله اسوي بروحي شي وابليكم

ميمنة : شبيج مخبلة ،لا تكبريها حواري وتالي تخرب صحبة الولد

حواري : اخووج يريد يخررب كلشي ،ولج راح اتسودن والله راح اتسوودن ،ولج ما يشوفني ما يباوووعلي حق موش حق الاووولي

تدگ على روحها وانا وميمنة بس نريد نكضها وهي چن بشر ضام بگلبه وگالولة احجي ،وهي تحجي كضت بطنها ودنگت

ميمنة : اسم الله شبييج ولج ؟

حواري : بطني ،ولج احس شي طگ ببطني وشي ضرب ضهري

نشغت
ميمنة : صخام الصخمج ولج يامفلوكة كله من لمطج

حواري : لا تخليني ارررد اتخبل ،اخووج ما خله عقل براسي

ميمنة : هو أنت من يوم يومج عقل ما عدج ليش تبلين اخوي

حواري : اخخخ بطنييي يمة

من صاحت خلت مراكضنة بفلس ،انا نزلت اركض الأمي گعدتها وبس گتلها حواري هيج وهيجي بيها گامت مشدوها وطلعت من الغرفة تريد تصعد وانا وراها
اندارتلي
شيماء : صيحي واحدد من الولد ولج يمة بساعج

_ وين تمشووون ؟

شيماء : امشي ولج مو وكت اسألتج

ما حجيت بعد وهي صعدت وانا بساع لبست عباتها وطلعت ،بش فتحت الباب شفت جعفر طالع من بيت جدي وبس شافني صاح

جعفر : وين ماشية ولج ؟

اجاني بساع يمشي وبس وصل يمي گلتله مستعجلة
_ خايب حورية ما اعارف شبيها

جعفر : شبيها ؟

_ اندري بطنها توجعها

جعفر : ليش توجعها

_ تعاركت هي وحق

جعفر : على شني

_ اخوك صاير كلش بارد چن حاطيه بمجمده

جعفر : صح حتى انا منتبه

_ شلون نضل نسولف لو شني ؟

جعفر : ردي للبيت وانا راح اجيبن سيارة واحد من الولد واجي

_ خوش

بس رديت للبيت ضليت اباوع للدرج ميمنة نزلتها ساندتها وامي طلعت من الغرفة لابسه عباتها ،وبس اجة جعفر لبستها عباتها تحجي

ميمنة : امشي وياچن

شيماء : ورچلج غير تگليله

ميمنة : خلي جعفر يخابره

شيماء : جا خوش

گبل لا يمشون ودوني لبيت جدي ومشوا ،بس طبيت تلگتني عمة
زهرة : شكو ولج شبيها حورية ؟

_ بطنها توجعها ،وسمعت امي گبل لا تطلع گالتها ما خف الدم

زهرة : يمة اسم الله ،دم شني ولج ؟

_ شمعرفني عمة ،ما حبلانة گبل

زهرة : دطبي طبي لسانج صاير شطوله

جاي احجي وأجت غاية سلمت علي ومن طبيت للصالة جدة طببتني تحقيق شكو وشني صاير خلتني اكتهن كلهن وبالاخير گتلها

_ مو تحجين جدة ،حق ما يحب شي يخصه يطلع من البيت

غاية : لا والله ،زين وتذكرتي

غضة : جا عبالج انا يعبرن علي ،انا منتبهه عليهم بس مغلسة

گمت احوسن بالي عدها ،من مشت حالها ابد موزين ضهرها ما گدرت ترفعه ومن الخوف دموعها يطيحن عشرة عشرة

°حواري°

الدرب كلة انا اتلوه من الوجع وگلت هاي هي طرحت بس من وصلت للمستشفى وشافتني الدكتورة

گالت
الدكتورة : الاطفال حالتهم خطرة ومهددين بالاسقاط تحتاج عناية وتنام على ضهرها حتى نحافظ عليهم .

شيماء : يعني ما بيهم شي دكتورة ؟

الدكتورة : ما اگلج مابيهم شي ولا اگدر احكم لان بعد مابيهم نبض

شيماء : زين دكتورة شلوون ؟

الدكتورة : راح انطيها أبر مثبت ومقويات ولازم هل ليلة تبقى تحت العناية بين ما يقل النزيف

ضلت تحجي الدكتورة وتعلم بي وانا حاطة ايدي على بطني اللوبن من الوجع حتى حق نسيته وما ببالي غيرهم هسة ما اريدن يصير بيهم شي بعدني بثاني شهر وتعلقت بيهم

كتبت الوصفة وگالت جيبوها من برا ،عمة طلعت تطيها لجعفر يجيبهن ،وميمنة اجت گعدت يمي حطت ايدها على ايدي باوعتلها وچن تذكرت الصار كله
ميمنة : عليج الله لا تقهرين بروحج لخاطرهم لا يصير بيج شي

_ ما اگدر شلون ما اقهر روحي وانا اشوفنه صاير انسان ثاني

ميمنة : شغله متعبه

_ لا تبررين ميمنة شغله مو جديد من يوم يومه سنين صارله

جرت نفس حايرة ،طبت عمتي و وراها الممرضة ضربتني أبرة وحطتلي كانونة حطت بيهن
إبر گالت مقويات هذن ،ولليل ضليت كلساع اباوع للباب واگولن راح يجي

باوعت على الساعة صارت ب 12 ،عمة نامت على الكرسي وميمنة گد ما شافتني احوس عارفت شني البي
ميمنة : كافي حواري نامي

بلعت ريگي مستهضمة
_ ما اجاني اخوج

ميمنة : عوفي أخوي ديصيري زينة هسة

غمضت عيوني من حسيت دموعي راح يطيحن ،بس من سمعت صوته بره فتحت عيوني وانداريت عليها تباوعلي مبتسمة كل ضنها فرحت بجيته بس بعديش

بعد ما گضه اليوم هسة تذكر ،رديت غمضت عيوني ما اريد اشوفه من انفتح الباب ،سلم على ميمنة و شوي وحسيت بيه وگف يمي وايده صارت
على راسي يمسح على شعري بأيده ويحجي وياها

عبد الحق : شني شبيها ؟

ميمنة : نزفت هواي ،وزين من تلاحگنالها چان طرحت

ما سمعتله صوت بعد بس ايده بعدها على راسي فتحت عيوني بنضرات العتب باوعتله ،تحسر بلايه ما يحجي جر كرسي وگعد گبالي ،درت وجهي منه
حتى بهذا الوضع بروده بعده

شوي وأجت ممرضة اطتني أبرة مسكن حتى انام لان الوجع موتني ،وفترة قليلة ونمت ما ادري بروحي من گعدت چانت امي گاعدة عد راسي اسمعها تعاتب بعمة
نجوى : ليش هيج شيماء من امس هنا وانا ما اعارف

شيماء : جا عايزة ضيم أنت ،والله فلا ردت اگلج بيا حال أنت

نجوى : حتى لو خية والله فرفحت روحي من عارفت

فتحت عيوني بس شافتني اباوعلهن أجت گعدت يمي ،مرة تعاتب ومرة توصي ،وشوي وطب ضيرم

حركت روحي اريد اگعد وصاح بي يأشرلي
ضيرم : ضلي نايمة

رديت راسي على السدية ،وهو اجة وگف گبالي
ضيرم : خليتيني ما اندل دربي ،الحمدلله على السلامة

_ الله يسلمك

اندار على عمة
ضيرم : شلون صارت ؟

شيماء : احسن

ضيرم : تطلع اليوم ؟

شيماء : ما اعارف بس گالت الدكتورة حسب وضعها

ضيرم : أن شاء الله خير

_ ضيرم حق وين ؟

سألته متأملة الجواب ما يكسرني اكثر
ضيرم : برا يم الولد

شيماء : ليش منو هنا ؟

ضيرم : فقار وجعفر وبرهان

شيماء : ياا برهان هنا ؟

ضيرم : أي

ضل شوي وطلع يمهم ،ومن اجت الدكتور گالت
_ تگدرون تطلعوها وراح اكتبلكم دوة من برا ،واهم شي الراحة

اطتنة كل التعليمات ومشت ،وانا ما صدگت اطلع
ميمنة : تگدرين تمشين لو اجيبلج كرسي ؟

_ لا اگدر

نجوى : شتگدرين يمة ،امشي جيبي كرسي عمة

ميمنة : صار

بس جابت الكرسي گعدت عليه تدفعني ميمنة وامي وعمة ورانا ،بس شافونة اجاني يمشي مستعجل اخذ الكرسي منها وهو صار يدفعني ،يحجي وياي بس ما اگدر اتجاوب وياه..

كلش چانت حرگة گلبي منه ما تنسي ابد واتمنى بس اعارف شني السبب الخلاه هيج ينفر مني وصدمته من وصلنه گبال للقرية وبصوت مسموع گلت
_ اريد امشي الاهلي

اندار علي ورد يسوق وببرود يخفي عصبيته گال
عبد الحق : بغرفتج تضلين احسن

_ لا اريد يم اهلي ارتاح بعيد عن الضغوطات

شيماء : خيلها تمشي يمة من حگها امها واختها يمها

بأيده ضرب السترين يريد يهدي روحه ،امي بس تباوع بعيونها ابد ما تدخلت ،وعاند واخذني لبيتهم دگيت عناد اكثر منه ما انزل وصوت سيارات الولد ورانا طبگت واجه ضيرم على صوتي

_ ما انزل والله ،جاي اگول اريد امشي لبيييت اهلي

ضيرم : شكوو ،شبيكم ؟

عبد الحق : حاجي اختك العنودية

باوعلي
ضيرم : شبيج ؟

_ اريد اجي يمكم وما يرضى

اندارله
ضيرم : واذا اجت يمنة ؟

عبد الحق : وشني الفرق ؟

ضيرم : خليها بكيفها ،مريضة ومن حگها تريد المكان الترتاح بيه

عبد الحق : وشني صرنة ما نعجب احنا ؟

ضيرم : شسالفتك ،شبيك حق ؟

استغفر وخله وطب للبيت ،هز ايده ضيرم ومدلي ايده
ضيرم : انزلي

كضيت ايده ونزلت ،بس طبيت لبيت اهلي تلگني هيوفة وبصائر وريحانة التعب بعده بعيونها بس من بعد فترة مو قليلة طلعت من الغرفة من خوفها علي
طبيت للغرفة بساع تمددت ميمنة وعمة مشن حگهن تعبن ...

صفنت حاطة ايدي على بطني احجي وي روحي واگولن معقولة على هل وجع معقولة يضلون ..! !

اليوم خلص كلساع احد جاي الا هو ما شفته ،حاولت ما احط بالي يمه بس مو
بيدي
هيوفة : ما تاكلين شي ؟

_ لا ما عدي نفس للأكل

نجوى : جا شلون يمة تضلين بلايه اكل ؟

_ ما اگدر يمة والله

هيوفة : عود ضيرم جايبلج معلاگ گال اشوي الج

_ معلاگ على بختج ويني وينه

نجوى : شلون غير لازم تعوضين

_ خليه على باجر يمة ،هسة دنيا ليل وين اگدر اكله

نجوى : خوش

يوم يجر يوم وضعي بده يتحسن ،سبعت أيام ومشيت للدكتورة ومن اخذتلي سونار چنت مأيسه وبگلبي اگولن
_ هسة تگلي ميتين ،وذبيهم
بس صدمتني من گالت
الدكتورة : صحتهم جيدة وما شاء الله حتى نبض صاير بيهم

نشغت ما مصدگة وانداريت الامي فرحة حاوطتني وبالي كله يم صوت دگات گلبهم
نجوى : اللهم صل على محمد وآل محمد ،فدوة لرحمتك ياربي

وخرت السونار من بطني توصي وهم كتبتلي دوة و وصوت هواي على الاكل ولازم اتغذه زين ومن
رديت تلگتني هيوفة وبصائر ويا فرحتهن من عارفن بيه نبض

وبالليل أجني عمتي وبركة ،وما استغربت من ما اجاني ،وتقريبا بديت اتعلم على بعده العلمني عليه
هو...

ما عدة اسبوع ثاني وبدت وياي ضيم النساوة
شأكل ما يضل بمعدتي عشت بالظيم خوت روحي بالشهر الثالث من طبيت بيه زدت ما نقصت

طلعت من الحمام خاوية روحي ،اسحل بروحي سحل ،گعدت بالصالة اهفي على وجهي ،الجو يكتل حر ومعدتي تفور وياه
هيوفة : هاا هم زوعتي ؟

_ أي

هيوفة : الله يساعدج ،اشغلج المبرده على السرعتين ؟

_ ياريت لان كلش جاي اختنگ

هيوفة : تدللين

علت المبردة ومشت للمطبخ شوي وردت بيدها گلاص عصير برتقال
هيوفة : اشربي بلكت ترد روحج

_ أخاف اشربه وما يضل بمعدتي ،وما عدي حيل بعد والله

هيوفة : خايبة بارد ،يبرد عليج

اخذته من ايدها شربت نصه وحسيت معدتي
گلبت ما
لحيت على روحي عاد بي النص يضل بمعدتي

حطيت الگلاص بصفي وتمددت گبال المبردة اباوعلها ايدها على بطنها وگفت گبالي

بصائر : هااا مرة اخوي شلونج ؟

_ لا تخليني اسب حتى اخوج

بصائر : ياااا مو عيب وين اكو مرة تسب رجلها

_ اكو ،انا

ضحكت وأجت گعدت يمي
بصائر : الحمل مأثر عليج كلش

_ لا حامل ولا شي بس اخوج طلع روحي ،ولج صار اكثر من شهر ما شايفته

بصائر : حق زعله ثگيييل ،وكلنه نعارفه

گعدت على حيلي
_ بس انا ما مسوية شي حتى يزعل مني ،ولج راح يخبلني والله

بصائر : سالفتكم تحير والله ،وتدرين حتى أمي تگول شگد احجي وياه ما يطيني نشده

_ اتمنى اعرف شني السويته حتى يعوفني بهذا الوضع وانا جاهله ببطني

بصائر : ما تحجين وياه ؟

انتفضت
_ لا ما افرض روحي عليه ،يريدني هو يحاجيني

بصائر : جا سالفتكم مطولة لو ضلت على أخوي

_ خلها تطول

حطيت ايدي على حلگي لعبانة روحي وركضت للحمام ،هاي انا كل ما انقهرت هيج يصير وياي
مثل ما صار هسة ،خوت روحي چنت خايفة لا
يصير بي مثل بصائر وصار

گمت للغرفة بلكت انام شوي الليل كلة ما عارفت النوم وبس حطيت راسي على المخدة التفكير اكل
عقلي اكل ،غفيت بعد تعب وما اعارف شگد
نمت وگعدتني امي علمود موعد دواي ،شربته على معدة فارغة ورديت نمت وگعدت
على صوت صياح ضيرم رج البيت رج ،نسيت روحي
وطلعت اركض صار گدامي بالصالة كاضه برهان وهو
يصيح
ضيرم : كتلوهااا العارات ،كتلوهاااا ،ربيتها سنين وحرگوا گلبييي بيهااا ،لك هدنيي عليهم هدنييي

يصيح محترگ گلبه ما عارفت اليقصده شني الا
بعد ما گال
ضيرم : الكحيلة هاي ولك برهان هاي الربيتها
عمر وتگلييي اسكت

برهان : جا تريد اگلك امشي خلي الدم للراچب

ضيرم : والزرع بي الروح ما اذا ما اكتل واحد
منهم ما ارتاح

برهان : دگول ياا الله ولا تحلف ما عدنة خلگ للطلايب والحسين الشهيد

ضيرم : دهدني لا ادفنك وياها

هده برهان وانا من القهر احس گلبي تفطر عليها ابد ما حطيت ببالي توصل بيهم ياذون حيوان ،غطيت وجهي من دمعت عيوني وانا اتذكر من رباها شگد چانت زغيرة

شگد حاول وياه برهان بس ما گدر يسيطر عليه يضل بالبيت وطلع وراه يركض يصيح بأسمه ما
راضي على عصبيته
برهان : اشتعلت لشتك ولشة عصبيتك يا أبو گمزة

هاي اخر شي سمعته وبعد اختفوا ،وصوت صياحهم
برا صار ،حطيت ايدي على گلبي وگعدت مبين راح تفتح طلابة جديد

°ليث°

اباوع عليها مقهور ،ضيرم تخبل علينه سب وغلط نزل بيهم وما ارتاح گلبه
ضيرم : اشتعلت الامهات الجااابت العاراات حيوانات گدرتهم على حيوااان مو ذنبة

برهان : كافي ضيرم راح تمووت

رگع باب المربط برجله وطلع ما متحمل يضل هنا طلعت وراه اركض بس ما لحگت بس طلعت شفته طار بالسيارة ،رديتلهم وانا اعارف نواياه

_ ضيررم مشالهم ولكم

طلعوا يتراكضون وانا وراهم ،باوعت لمكان تفگتي چانت معلگة ماكو مكانها فارغ برهان وراي صفگ ايد بأيد
برهان : خرررب بيييك ضيرم

ركض گبلي وانا وراه ،صعدت بسيارته لان الباقين سبقونه ،الترابة ورانة عجت من قوة مشي السيارات لحگنه بالولد والدرب الگاصدية...

"درب قرية غازي"

وبس وصلنه صارت العركة گدامنة ،نزلنه نتراكض واگف وكلهم گباله ،التفگه على چتافه
ضيرم : العاراااات موش زلم گدرتكم على حيوااان لانكم حيوانااات

اجه يمشي بكل رهاوه وگف گباله
غريب : شتحجي أنت ؟

ضيرم : كلش زين تعارف شجاي احجي ،لا تغشم روحك

غريب : على شني اغشم روحي ،ليش تشوفني خايف منك ؟

وگفنة بضهر ضيرم
صخر : الفرس المكتولة ،أنتم كاتليها وماكو غيركم .

غريب : واذا كاتليها اخاف منك وانكر ،راح اسوي روحي ما شفتكم ،اخذهم يالچبير واطلع من القرية

صخر : احجي عدل

غريب : بالعكس جاي احجي عدل ولهسه كاض روحي عنكم

ضيرم : وحگ التحلف بطارتهم يبن جسار أول واحد اطلع حگي منه أنت

غريب : خوش عود ،الله وياكم .

دار وجهه يريد يمشي وبرمشة عين ما لحگنه حتى نجر التفگه من ايده وثارت چيلة نابته بچتف أبن جسار ،طاح على الگاع كاض
چتفه والتموا علينه اولاد عمه واخوه التخبل بس يريد يكض ضيرم ،تلازمنه وياهم ناس تطگ ناس بشكو شي گدامنة...

تدخلت الكبار والتموا عمامهم وما فضها غير صيحته بيهم
غازي : كااافي

نترت قميص واحد من ولدهم ،احس ما ارتاح گلبي عوزه بعد چم بوكسي على چم راچدي يگعد وزن ..

تلفتت على الولد اباوع عليهم متضررين بس مو قوي
غازي : شمطببكم قريتنة يا احفاد الطاغي ؟

ضيرم : احفادك كاتلين فرس عدنه ،حرامات الزلم الما تگدر للبشر تأذي حيوان

غازي : صدگ هل حجي

مسح الدم النازل من طرف شفته وگال
رهيب : لا والله ،ما نعارف بالاصل على يا فرس يحجون

ضيرم : لا تنكرون

رهيب : وشني خايفين منك ما نحجي مثلا ؟

عزيز : ومنو غيرركم ؟

رهيب : شوفوا روحكم وي منو بعد عدكم عداوه

فر سبحته يأشر للباب
غازي : ردوا منين ما اجيتوا .

ما توقعت الگاله ابد ،توقعت راح ننعلس بالقرية وبعد ما نرد بس صار العكس جبرنة برهان نرد وايده
صخر هم ،طلعنه من القرية صاعدين بالسيارات ،وضيرم بس حرك ما شفنه سيارته بعد ..

بس ردينة القريتنة لگينة جدي وعمامي وابوي واگفين برا وبس نزلنه صيح أبوي يخزر بينة واحد
واحد عيونه تفتر علينه

محمد : وين جنتواااا

ضيرم : بقرية غازي

محمد : وشودااكم ؟

صخر : يابة

محمد : شعدكم بقررية غااازي

باقر : شعدهم يعني ،يحبون المشاكل وتنعولهن عنوه

صاح بيهم
رأجس : كاافي هواي سكتت الكم صار ساعة اكلتوا راسي

محمد : احفادك بوية ماشين عايلين بالوادم

رأجس : جا غير كاتلين فرس ضيرم تريدهم يستكون

محمد : هم داافع الهم ،هم دااافع

رأجس : جا شتررريد

محمد : ما صار اسبوع من حلينه الطلابة الفاتت وگعدنه وفصلنه وهسة فتحولنه طلابة جديدة .

جدي ما يطي بينة وابوي وعمامي ما راضين وماكو لليل واحنة گاعدين بالديوان طلعنة نتراكض على صوت الچيلات برا

اول واحد بيهم انا طلعت وبس فتحت الباب شفتهم صعدوا سيارتهم وطلعوا شاخطيهن

أجوا وراي يتراكضون ،انداريت عليهم
_ شردوا

صخر : شفتهم ؟

_ أي

صفگ أيد بأيد
محمد : دگونه ومن حگهم هم دايسين قريتهم وهم مصوبين واحد منهم

رأجس : خلهم يدگون ،فصل نفصل شني الجديد .

محمد : ما ملييت بوووية ،ما ملييت

أبوي يصيح محترگ گلبه وجدي صاح بيه ينتر
رأجس : صووتك محمد ،صووتك صاير تعلي بوجهي

مسح وجهه بچف ايده ،يحاول يكض روحه
محمد : يابة كافي والله ملت اروحنة ،كافي كضهم لان ماكو غيرك يگدرلهم

رأجس : أي ميخالف

درت وجهي بالكوات گاض ضحكتي لان لو شافني أبوي يطيح حضي وضوجته كلها يحطها بي ...

طبطب على ظهري
جعفر : راح تغص سودة علي

ضحكت بعالي صوتي كلهم سكتوا يباوعولي بعد ما چانوا مخبوصين بس شفت عيونهم يمي سكتت بساع وابوي طاحلي رزايل اجته من الله ،غسلني غسل
جعفر : كافي عمي طلعله لون جديد من الرزاله .

محمد : اسكت أنت

جعفر : مو اطنگر عليكم

محمد : واذا ما طنگرت

وجعفر سواها صدگ وخله ومشى ،نصيح وراه وهو ما دار ضهره النه ابد ،صحت وراه
_ ابوو الطناگيررر جيررة بگصتك .

ما رد علي وانا رديت طبيت للبيت ،وبالليل مشالهم شيخ واحد ومن رد گال
شيخ واحد : يابة ابنهم موزين ،صوابه بچتفه غميج وجده متخبل عليه

رأجس : جده هسه حباه ،شني نسه من خلاه هو واخوه ساكنين الشوارع لو الرتب العلى چتافه حببن الناس بيه

شيخ واحد : هذا ماضي مشى بوكته شعدنة حاجين بيه

رأجس : ماكو شي اسمه ماضي، كلشي يتسوه محسوب والوادم ما تنساه .

عدل البشت على چتافه
شيخ واحد : جدهم رايد فصل دوسة القرية وفصل ضربت غريب

رأجس : أي سهلة

ضيرم : وفرسي شيخ ،طيحتوا كتلته لو شني ؟

شيخ واحد : يگولون ما كاتليها

ضيرم : شلون ما كاتليها ،ماكو غيرهم

شيخ واحد : انا اعارفهم من يسون السواية يعترفون بيها ما يخافون

ضيرم صاير بركان ،قافل عليهم كلش مبين حتى ما ضل بالديوان وطلع وحگه ما يلام
هاي الفرس مو بس عده عزيزة ربت ويانة من زغار احنة حتى گبل الهيلانة
شيخ واحد : باجر لازم تاخذون عطوة وفضوها شيخ واليرحم اهلك كون هاي اخر طلابة

رأجس : الله كريم

°هيوفة°

اباوعله طب يرعد رعد ،حجاية ما حجيت وياه اعارف بيه من يصير عصبي بعد ما يشوف بعيونه وخلص اليوم كله روحه بخشمه وكل الحگ اله انا شايفتها چم مرة ولان صارلها سنين عدنة محترگ گلبي عليها هو الرباها ما يلام

بالليل ضليت گاعدة يم البنات ،ريحانة صح صارت احسن بس مخلصتها ساكتة ومرات هواي اشوفنها
تبجي وحدها ،وحواري نهارها كله گاضي بالويل وي النساوة
حواري : ما تمشين يم رچلج ،شني گاعدة عدنة ؟

_ تحشتيني ؟

حواري : لا بس علمودج

_ اخوج روحه صايرة بخشمة ما يتحاجة واخاف لا اطيحن بيها

چانت صافنة من حجيت هيج باوعتلي ،تنهدت تحجي
ريحانة : لا تخليه وحده هوني عليه ،انا حمزة من چان يصير عصبي اضل يمه لحد ما تروح عصبيته

تحجي بغصة ،حطيت ايدي على ايدها ما اگدر اگلها الله يرحمه واجرحها بكلمتين
ريحانة : دگومي اصعدي يلا وبعد ما اريدن اشوفنج جوة بهيج وكت

_ صار

گمت
_ تصبحن على خير

ريحانة : تلاگي الخير

حواري : تلاگين وجه أخوي

ابتسمت وهستوني طلعت ولاگاني نازل بس ضل واگف بمكانه ،وبس شافني صعدت رد للغرفة وانا وراه بس طبيت گال

ضيرم : شعدج جوة ؟

_ يم البنات اخذني الوكت

ضيرم : شاردة مني لا تچذبين .

_ لا بس لان شفتك عصبي گلت اعوفنك وحدك بين ما تروح عصبيتك

باوعلي بلاية ما يرد على الگلته گال
ضيرم : طفي الضوة وتعاي

بلايه ما احجي طفيت الضوه ومشيت للچرباية ضلمة ما اشوفن شي حسيت بايده جرتني ،لمني بحضنه ساكن
_ ضيرمي .

جر نفس وهمس
ضيرم : روحه .

رفعت روحي ضوه خفيف كلش جاي من برا ،بايدي مسحت على لحيته
_ كافي تحرگ بروحك لا يصير بيك شي وانا اموتن والله

كض ايدي يبوسها وهمس
ضيرم : تخافين علي

_ شلون ما أخاف عليك وانا من ساعة الحبيتك أول شخص ادعيله بصلاتي

ضيرم : اروحلج فدوة .

_ اسم الله

جريت ايده ونمت عليها وهو الليل كله ما نام كل ما افز الگاه گاعد وبس صبح الصبح طلع ما اعارف وين وعود اليوم عطلة
وراحته وانا بس نزلت صارن گدامي عمة وبصائر لابسات عبيهن يردن يطلعن

_ شني وين ماشيات ؟

نجوى : نجيب هدوم الجاهل

بصائر : تجين ويانة

_ أي عادي بس ضيرم شلون ما گايلتله

نجوى : دلبسي عباتج وتعاي واذا حجة اگله انا اخذتها

_ خوش

صعدت حضرت روحي وبس نزلت لاگاني هستوه طاب للبيت ،عگد حاجبه من شافني لابسة عباتي
ضيرم : شني وين ؟

نجوى : ماشين نجيب جهاز ابن اخوك وگلت اخذها وياي

ضيرم : هاا ،خوش الله وياكم ،عينج على مرتي يمة

نجوى : راح اتيهة بالسوگ

اندار علي انا واگفة بصف بصائر
ضيرم : عينج على روحج

_ صار

ضيرم : اوصلكم ؟

نجوى : گلت لصخر يوصلنه

ضيرم : جا خوش

اخذنة صخر وضل متانينة ،ما خلينه شي ما اشتريناه شنو اليعجبها ناخذه
بصائر : عمة اريدله بطانية ثانية ولحاف زغير للطلعة

نجوى : اخذي عمة

حاجت ابو المحل
بصائر : اريد اللحاف ابيض وبطانية زرگة بعد

بس خلصنه طلعنه من السوگ تلگانه صخر صافن على العلاليگ
صخر : شني هاي ماكو هدوم بعد لو شني ،راح يعزل السوگ ؟

بصائر : غير جهاز كامل

صخر : عمي انهبنة اذا هيج

بصائر : بفلووسي

صخر : منيلج هل كلاوات

بصائر : والله عيديتي ضامتها صار شگد وجبت بيها

تلفت چن هستوه فطن احنا واگفين بالشارع
صخر : اصعدن بالسيارة وانا اصعد العلاليگ يالصندوگ

حطيناهن بالگاع وصعدنة ،وشوي وصعد هو حرك السيارة حاط الموبايل على اذنه ويحجي بصوت عالي منفعل
صخر : لا تتصرف بكيفك ،تانيني راح اجي ،لا تعااند شجاي احجي وياك أبن الك..

جاي يغلط واستغفر ورد يحجي وياه بصياح
صخر : اذا أجيت وما لگيتك بالقرية حظ حظك اطيحه

سده وشمر الموبايل على الدشبول ،فتح دگمة من دگم الدشداشة واندار على عمة من سألته

نجوى : شكوو عمة ؟

صخر : ماكو شي .

نجوى : شلون ماكو شي وأنت عيونك صايرة بگصتك

ما رد عليها وداس بانزين ،ومن شفت ضيرم واگف برا يحوم عارفت اكو شي والسالفة ابد مو
خالية طبن گبلي وانا وراهن وگبل لا اطب سمعت چم حجاية خلن الخوف يتربع بگلبي

صخر : وين تمشيلهم ،مخبل أنت تمشي وحدك ؟

ضيرم : ما اگدر اسكت عن حگي ،والله عسى ما يوصل الدم للرچاب

ضلن ببالي اريده بس يطب حتى احاجيه بس ما شفته بعد ،البنات ملتمات يشوفن بهدوم الجاهل
وانا بالي مو يمهم ،بس سمعت صوت من المطبخ
تعلگت عيوني على الباب بس ما چان هو واملي
راح ...

أشر علي الگاع
فقار : هاااي هدوم ابن الكلب مو ؟

نجوى : حشاك يمة

فقار : لا يمة مو حشاي ،راح ياخذها مني

نجوى : يااايمة شلون بغيرتك احنة ،ما صايرة هاي أبو يغار من ابنه

فقار : مو بيدي يمة

اجة گعد يم بصائر جر دشداشة زغيرة بيضة جابتها حتى يلبسها اول ما يجي للدنيا
فقار : شني هاي شگد زغيررة ؟

نجوى : ولك نعمة اذا ما طلعت چبيرة عليه

فقار : صدگ عود

نجوى : أي والله .

حواري : يمة مشتهية لبن حامض

نجوى : لبن حامض ومعدتج فارغة ولج يزرفها .

حواري : روحي فرفحت عليه شو

نجوى : گوم فقار جيب الاختگ لبن

فقار : گايم ولو ما تستاهل

حواري : احسبني بصائر مو چنت تنگل الها بطالة

بصائر : هم حطتني بالنص

حواري : اسكتي كارهتج كلش

بصائر : ترا انا مو عبد الحق خاف متيهة

حواري : اخته نفس الدم ،لا اطيقه ولا اطيقج

ضحكت بصائر عاذرتها ،هرموناتها صايرة فرد نوب وبالاخص وي بصائر چن تشوف حق گدامها ومن يطشن منها تراضيها وضالين هيج

گلبي ضل يحوس غدا ما گدرت اتغدا وما خاب إحساسي ابد ثاني يوم الصبح من سمعت صوت المصايح عارفت سولهم مصيبة لان الليل
كله من اجه ابد ما هاد شگد حجيت وياه بس ما أطاني نشده

نشفت ايدي من الماي وطلعت اركض وعمة والبنات وراي
محمد : انعل تربيتكممم الما جابتلنه غير بس المشاااكل ،ولكم هاي سواية تسوهااا ،تصلحون
الغلط بالغلط وين صااايررة

بكل هدوء يرد عليه عكس عصبية البارحة
ضيرم : تعارف ما متعلم اسكت عن حگي ،مو خنيث واخليهم ياخذون خاوة علي

محمد : لك يااا خاوووة هاي ،شنفصل ابن الكلب شنفصل،صارن شگددد ،وحدة ثنين ،تبيعنا بيوتنة
تررريد ؟

ضيرم : ما تبيعوهن عمي عدكم هواي فلوس المن تردهن

محمد :شوفوا تربية ابوووي وين وصلتنة شوفوا

عبد الحق : كل هذا وبعدنة ما مفتهمين شكووو .

محمد : اسأله شمسوووي ،اسأله الدكتور المثقف

عبد الحق : شمسوي حضرة الدكتور

ضيرم : ما دخلك أنت

صخر : السم الجبته قوي لا ؟

فتحت شوي من الباب اباوع ،ابوي هجم على صخر والولد وگفوا بوجهه ،وگف يتهادد ويصيح عليه ما راضي
محمد : ساس البله كله منك أنت مأيده

صخر : تريد ننسى حگنة ،زلم زحمة تخلي حگها ضايع ياية ،نرد الصاع صاعين وهذا تعلوم يمشي
بدمنة

انداريت عليهن ارچف
_ والله عارفت وراهم شي من خبصتهم امس ،راح يموتوني عمة أخوي ورچلي واحد اضرب من الثاني

نجوى : أبني واعارفه ما يسكت ،وطيحنة بمصيبة أكبر

بصائر : هم شمسوين ؟

حواري : من انفعال عمي مبينة سالفة ما تتسولف

_ بس الله اليستر

°غاية°

طلعت بالحوش اباوع عليهم كلهم طبوا وبس صخر وضيرم ضلوا برا ،ضهرهم علي ما يشوفوني اسمعهم يحجون بصوت عالي ابد ما مهتمين
ضيرم : خسارتهم اذا ما خليتها اكبر من خسارتي ما
ارتاح

صخر : جا شني السويته قليل ؟

ضيرم : ما متشفي گلبي بيهم بعد

شغل چگارة واندار عليه
صخر : اممم ،وياك انا .

ضيرم : طبعا وياي وغصبا عليك

صخر : بطل هذا حجيك لا اخليك وحدك والله

ضيرم : ما يطيك گلبك

صخر : لا يطيني اذا ما تجر عدل

وكبرت السالفة اكثر واكثر طلعوا مسممين چم حوض بحوض مليان سمج وخسارة بالملايين ،يومين
احنا لا ليلنه ليل ولا نهارنه نهار مسلوبة راحتنة بيت غازي تخبلوا علينه حتى الناس الوسيطة
التمشيلهم ما يستقبلوهم والا مشالهم شيخ واحد من رد گال على لسانهم

شيخ واحد : يردون فلوس حگ خسارتهم

رأجس : شنيي خاااوة جا مو كتلوا فرس ضيرم وحدة بوحدة

شيخ واحد : مو حجينة بيها وگلنه ما كاتليها

رأجس : شيخ اعقلها منو غيرهم ؟

شيخ واحد : اذا تضلون أنتم معاندين وهم معاندين شلون تفض ؟

رأجس : ولا تفض فلس أحمر ما ادفع

شيخ واحد :تتكتل الزلم چا ؟

رأجس : ما عليهم شي لا تخاف

شيخ واحد : لا اله الا الله

وجهي صار اصفر من انفتح الباب وشافني صخر خزرني وأشرلي اطب وانا ركضت جوة اعض اصبعي واللوم بأمي
_ شافني صخر يمة ،هسة يلعب لعب ،شورطتيني

زهرة : اگله انا وديتها ،بس احجيلي ما فضت ؟

_ وين تفض ،يردون فلوس وجدي ما يرضى يطيهم

زهرة : اخخخ من جدج ،المفروض يدفع بلايه حس لان هو وصلهم لهل حال

_ ما تعارفينه عناد ،يگول وحدة بوحدة الاحواض و الفرس

زهرة : بس خسارتهم اكثر حگ الله الاحواض بذيج الحسبة

طبت للمطبخ
ميمنة : عمة ابنج لو راد اخوي چان ما سوا هل سواية لان ما يرده غيره

زهرة : جا مبين هو مأيده

ميمنة : حاجيته بس ما سمع مني وسوه البراسه

يوم يجر يوم وماصفوا على حل ،وكل ما بيها المشكلة تكبر وكل ما طلعوا ولدنه
يتعرضلوهم
من صاروا يطلعون يكتلنه الخوف الا يردون
يلا نتنفس ...

°كوكبة°

دنگت شلت بت حمزة من الگاع ،امها ما الها خلگها دوم لو بجي لو مرض وهل بنية ضاله حال الظيم حالها
استبرق : شني ما تگومين وياي ؟

_ والبنية ما تشوفيها تبچي خطية .

استبرق : وديها الأمها

_ شفتها گبل شوي نايمة

استبرق : جا شلون منو ينضف وياي والوادم راح تلمتم

_ بلكت تنام واجي وياج

استبرق : اذا ما نامت وديها لرفيف

_ خوش

مشت هي تكمل شغل باجر الاربعين وراح نمشي للنچف وخبصتنة خبصة ،من ما نامت گمت حطيتها عد رفيف وطلعت للحوش اشوفهن...

أمي وخالاتي يطبخن لان عازمين على العشا ،وخاله بشرى بالگوات طلعت يمهن ،اربعين يوم اخذت من حيلها ،نهارها وليلها يخلص بالبچي بس بعد عگبيش
وبشني اليفيد البچي ..! !

نرجس بس شافتنة بدينة بشغل البيت انا واستبرق اجت ويانة وركض ركض گبل لا تجي الوادم كفيناه

صعدت اركض ابدل ،هستوني طبيت للغرفة اريد بس ابدل لان بالاكيد راح اتدمر من المواعين بس نزعت ثوبي انفتح الباب بساع لفيت روحي
بالثوب النضيف وانداريت اباوعله ،سد الباب واجه بأتجاهي ،نشف الدم بعروگي من صار كلش قريب مني

فتح باب الكنتور يطلعله هدوم وانا ضليت جامده بمكاني لا الگدرت اللبس ثوبي وحتى النفس گطعته من وخر الا رديت تنفست عدل ،لبست ثوبي شلوند ما چان ونزلت وانا اللبس بالحجاب واسمع الصوت جوة ،سلمت على النسوان الجايات ومشيت للمطبخ
بس شافتني گالت

استبرق : شبيج وجهج أصفر ؟

_ مابي شي

استبرق : تچذبين علي ،اعارفج كلش زين

تقربت يمها احجي بهمس من طبت وحدة من بنات عمهم
_ صاير يخوف كلش ،مرات احسه مو بعقله يتعمد يأذيني

استبرق : جا مو نگول مخبل

تحسرت مقهورة على روحي وضلينه نفتر ما هدنه ولا گعدنة حتى بالگوات حضرنة روحنة وخبصوصنة خبص ،نزلت اركض بأيدي مفاتيح غرفتي وصونه نقفل الغرف ،اطيت المفاتيح الامي خاف انا اضيعه ومشيت ورا استبرق شايلة ابنها
صعدت وانا صعدت بصفها بالكوستار والدرب كله خلص بواجي ،اول ما وصلنه گالوا نزور الامام علي
(ع)

زرنة وطلعنة للمچنة ،وبس وصلناله خالتي واخوانه من كل كتر واحد حاضن گبره وصوت عياطهم يفطر الگلب ،رفيف وضعها تعبان طاحت علينه ،گام وخرها مرتضى وانا سندتها من الجهه الثانية صعدناها بالكوستر ،ضليت گاعدة يمها وهي بس الدموع تصب تباوع عليهم ملتمين عليه...

_ رفيف عليج الله كافي ،ولج موزين عليج هيج والله

مسحت عيونها واندارتلي
رفيف : هذا حمزة عيوني لو انعمت عليه هم قليل ،الحنين هذا الما عله صوته علي بيوم الخلص عمره يگلي صار وتدللين

بلعت ريگي مقهورة ،ومسدت على ايدها
_ هذا ل الله كاتبه ،ترحميله

رفيف : وين اگدر الفضها ،انا ما جاي اصدگ مات وبعد ما اشوفه ،لفاه التراب وانا ما شايفته ولا ودعته

غطت وجها بالعباة تبجي بصوت ،رفعت راسي من صعد حسن أخوي ،اجه فتح الكرسي القلاب گعد و اندار علينه
حسن : شلون صرتي ؟

رفعت عيونه تباوعله
رفيف : زينة

حسن : كافي بجي المات مات ما يرد بعد

رفعتله حاجبي ،شوف هذا منو اليحجي وينصح
حسن : شبيج ؟

درت وجهي منه
_ كلشي ما بي .

حسن : عيونج عدليهن لا افگسهن

ما رديت عليه لان اعارف ما عده مانع هنا يسحلني گدام الوادم ،بالساعتين عدت الا طلعنة
من المگبرة ونص الدرب والوادم كلها نامت وانا ما غفت عيني اتخيل انام وتنگلب بينا الكسوتر...

بس وصلنه صعدت وبعد ما نزلت عيوني طافية سبحت ركض ركض من التراب وطلعت حتى ما مشطت وبساع بس حطيت راسي على المخده
غفيت

بس گعدت روحي شايطة اعيط بعالي صوتي شعري بايده ،سحلني سحل يوگفني وانا اتوسل بس يهدني احس شعري اجه بأيده
_ مرتضى عليك الله ،مرتضى هد شعرري ولك شعري

شمرني على الچرباية من قوة شمرته ارگع راسي ب تاج الچرباية
_ اخخخ راسي

صيحت راسي بعد ما احس بيه من گد الوجع والاذية الاذانياها
مرتضى : بت الكلب ،نااايمة هيج فايخين احنة وتنامين

صيحت محترگ گلبي
_ النوم صار حرااام لو شنييي ؟

نشغت شايطة روحي من دنگ عاصر ايدي برچلة بالي مو يم حجية بس اريده يوخر
_ ايدي ايييدي ،ولك حرااام عليك ما بگلبك رحمة

بجيت ميته اندب بالساعة السودة الصرت بيها وگمت من وخر اباوعله وابجي بصوت
مرتضى : صااار ساعة بالحمام اصييج عليييج اريد
هدوووم ،وحضرة جنابج ناااايمة

_ نمت مااا كفرررت ،تعبااانة مو حيوانة انا مو حيوااانة وما اتعب

خزرني عيونه تريد تطلع ،ومشى فتح الكنتور طلعله هدوم نزع هدومة الوصخة مبين راد عليهن لأن شعره ينگط ماي ،درت وجهي منه ولا چني واگفه بدل گدامي وطلع...

گعدت بالگاع حايرة على شني ابجي ايدي لو راسي المشگوك لو شعري الگطعه تگطع ،رفعت راسي وبس شفتها صيحت

_ مووتني ولج مووووتني

سدت الباب تأشرلي اسكت
استبرق : الوادم بعدهم هنا ولج

_ ولج ساعة الساعة اموت بأيييده والله

باوعتلي بقهر
استبرق : خلي امج تاخذج وياها بعدها جوة

أبتسمت من بين دموعي مستهزئه
_ امي ،ولج امي لو تشوفه يموتني تگلي رچلج وتحملي

ما حجت شي حايرة ،وبلعتها وسكتت مثل غيرها المنو احجي ،وياهو بحالي كلمن حاير بضيمه استحي حتى احجي واشكي

تمددت اون
_ اخخخ راسسي

غفيت بنص الوجع ،گعدت من صبح لان نمت من وكت ،غسلت وجهي بالحمام الفوگ ونزلت
اسحل بروحي سحل من البچي البچيته احس جسمي مكسر تكسر

طبيت للمطبخ لگيتها تشرب دواها ،نزلت گلاص الماي من ايدها
رفيف : هاا گاعدة ؟

_ أي

رفيف : شبيج امس أنت ومرتضى ؟

_ مابينة شي

رفيف : لا تچذبين ترا اعارفه انا كلش
زين

_ اخوج مريض وراح يمرضني وياه والله

رفيف : جا من زمان هو مريض

_ شوفي

نزعت حجابي اشوفها راسي احس بالدم يابس على الجرح ،ورفعتلها چف ايدي صاير ازرگ
_ شوفي ،على ابسط شي هيج يأذيني بدون إنسانية اخوج

تحسبت عليه محترگ گلبها
رفيف : حسبي الله ونعم الوكيل بيه من بشر

درت وجهي من حسيت أحد اجه ،باوعتلنه بايدها بتها ،رفيف دارت وجهة منها تظم بدواها وهي نترت ضايجة من تصرفها
عذراء : شبيج رفيف كل ما تشوفيني تديرين وجهج مني ؟

رفيف : تعارفين السبب كلش زين

عذراء : بعدج زعلانة علمود ريحانة ،شوفي حتى اخوج ما ضل ،انا ما تهنيت والله

رفيف : ما تهنيتي من ايدج ،لو ميته أنت ولا حمزة

عذراء : حراام عليج

رفيف : گلت لو ،شوفي روحج چنج صل كلشي ما بيج

عذراء : من غيرتج هيج تحجين ،لان مريضة وساعة الساعة تلحگين اخوج

خزرتها رفيف عيونها ناطة ،ما توقعت توصل بيها المواصيل هيج تحجي
رفيف : خافي الله لا يبليج بمرض اقوى من مرضي

ما سمعت حتى ردها وخلت وطلعت ،هزيت ايدي اباوعلها
_ شلون هيج تحجين ؟

عذراء : لا تصيرين خيرة براااسي

نترت بي خلتني افك عيوني مصدومة وخلت وطلعت ،طبت شادة الشال على رأسها مثل المصريات
استبرق : من اسحلها هسة احد يلومنيي ،والله
لوما امها واختها هنا الا اموتها

_ دسكتي غير هي تموتج لا تحمين يمعودة .

استبرق : بعدج ما شايفة وجهي الثاني

_ منيلج وجه ثاني أنت ؟

استبرق : عدي بس ضامته للحياية

ضحكت وغطيت حلگي بأيدي ،دنگت أبوس عبوسي واحجي وياه وهو حجاية والثانية وكافخني أخير شي جابني براچدي فر وجهي ولا چن ايده هلگدوتها

_ خرررب امك

استبرق : شگد صلفة تسبيني بوجهي

_ جا ابنج يطگني ،كافي علي تكفخ عمه مو نوبه هو

سكتت مقتنعة ودنگت تحجي وياه
استبرق : لا تضريها ماما ،عمك مكفي وموفي

كاتلنه الجوع التمينة ناكل ،وخالتي وداد ما لگت وكت غير هسة تحجي
وداد : خية أم منتظر اريد اخذ عذراء وياي بعد
شني ضلتها هنا

نزلت گلاص الجاي من ايدها فازة
بشرى : وين ماخذتها ،جا و نجمة شلون افارگها ؟

وداد : جا حلال حرام تضل هنا وحتى عده بعدها ما كاضه

بشرى : خلوا نجمة عدي ومن تگضي عدتها ترد هنا

وداد : شلون ترد خية ،امس ابوها خبصني خبص گال ما تردين اذا مو هي وياج

سكتت خالة حايرة ،تلفتت بيناتة چن تعارف بروحها راح تفچر قمبلة تخلينة نحير نهضم اللگمة لو نهضم حجايتها
بشرى : بس تگضي العده اخلي واحد من الولد يعقد عليها اريدن نجمة تضل گدام عيني

°جفون°

سمر : شني شعدج هنااا ؟

حطيت گذلتي ورا أذني
_ اريد اطلع بس مستحية

سمر : دتعاي يمعودة ريام خبصتني عليج

طلعت وراها اعدل بفستاني ،أبتسمت من شافتني طبيت واشرتلي تعاي ،كملت دربي اباوعلها طالعة
تخبل
_ شنوو هل جماااال

ريام : حلوة مووو ؟

_ تخبلين والله

گعدت بصفها وشوي وبدة الرگص ،جرتني سمر تريد ارگص وانا ما گدرت اتحرك مستحية كلش عيوان النسوان علي يجوز لان غريبة بيناتهن

صاحتني خالة أم جواد ،گمت اجرر بفستاني ضيگ لان حنة لبست براحتي ،بس وصلت يمهن گالت تأشر علي
أم جواد : هاي التقصديها خية ؟

_ أي ،اول مرة اشوفنها بت منو ؟

أم جواد : هاي امانة عدنة بت صاحب أبو جواد

_ الله يحفضها ،ما تطونياها ؟

ضحكت
أم جواد : لا خية ابن عمها يريدها

_ جا شعجب ضاله يمكم

أم جواد : بغير محافظة عمامها وعلمود مدرستها ضلت هنا

ضليت ساكتة ما حجيت شي بس بگلبي ما راضية على حجاية خالة مال ابن عمها اريدها

گضت الحنة وثاني يوم بالزفة بچيت عليها بچي الاخت على اختها من تطلع من بيت اهلها ،ريام اكثر انسانة تعلقت بيها هنا

عدلت حجابي ونزلت اركض من گبل لا تجي الزفة عود مسحت عيوني و شگد وصيت روحي ما ابجي بس ما گدرت ما تنزل دموعي وانا اودعها

حضنتني
ريام : عينج على روحج ،وشتردين انا موجودة حتى لو عرست أضل قريبة منج شوكت ما تحتاجيني خابريني خوش ؟

وخرت اشاقيها حتى لا تبچي
_ راح ترحين يم الحب بحالنه بعد أنت

أبتسمت عيونها تلمع بيهن الدموع
ريام : حلم وراح يتحقق ،ما مصدگة والله

_ تحقق مو راح يتحقق

مسحت دمعتها الطاحت بطرف اصبعها تضحك وكلساع وحده جاية تتبارك الها ،وبالاخير
من اجوي ياخذوها طبوا ابوها واخوانها يسلموها
للعريس ابن عمهم وصاحب الولد بنفس الوكت ..

شيخ خزعل : امانة الله ورسوله بت عمك ،حطها بعيونك واذكرني كل ما شفتها مطيك شمعة بيتنة

عزام : بعيوني احطها والله ،ما يحتاج توصيني عمي

شيخ خزعل : توكلوا ب الله

بصوت الهلاهل طلعت گبل لا تغيم الگلوب من بعد الفرح ،ايدها بأيده صعدوا بالسيارة ،وما مشت وياهم غير سيارة وحدة للفندق مثل ما رادوا هم ...

رشت امها وراها الماي وطبت ،وهوسة الوادم الفرحانة بعرسهم بعدهم حتى ما ماشين
واجانة الخبر الچان مثل الضربة القاضية ل
اهلها واهله ..! !

من بين ضجيج المهنئين
اعتلت صرخة لتجعلهم
"معزين"

تراكضنا على صوت عيطة خالة أم جواد ،تلطم على روحها واختها كاضتها بس تريدها تسكت
ما جاي نفتهم شي ،وساعة الگشرة البيها افتهمنا ..

هواي سامعة بالفرح من يتبدل حزن واليوم شفته

طلعوا يتراكضون اخوانها وابوها وخالة ملخت روحها والگالته خلت الزغير گبل الچبير يوگف بيه الوكت ..

أم جواد : ولكم بتيييي ،ماتتت بتي ،ماااتت بيوم عرسهااا ،انااا سمعت باذني يگلوله انگلبت بيهم السيااارة

°حواري°

حاطة ايدي على بطني واباوع عليها تسفط بهدومه
وكل قطعة تبوسها
_ اليشوفج يگول چنتي بحسرة الجاهل وهسة راح يصير عدج

بصائر : ولج والله بس النساوة اخذت حيلي كله ما صدگت اوصل لشهري

_ وصلتي وراح تجيبين ما ضل شي وتصير سوالف

بصائر : يوم الالج

_ يمعودة بعدني هستوني بالرابع شيگضي الباقيات

بصائر : يگضن والله

_ تعبت احس بروحي جاي اثگل

بصائر : انا واحد ومختنگة الله يساعدج

جاي ارد عليها بس من سمعت ضيرم يصيح بأسمي گمت ايدي على بطني ،طلعت من الغرفة وحاجيته من المحجر
_ هااا خوية ؟

ضيرم : رجلج هنا

_ وشوسيله ؟

ضيرم : ما تردين تشوفيه ؟

_ لا هسة تذكر عده مرة حامل مشمورة يم اهلها

بلايه ما يرد علي خله ومشى وانا رديت يم بصائر بس طبيت گالت
بصائر : شبيج وي أخوي مو اجاج ؟

_ بعديش ،ولج راح يصير ثلاث اشهر وما فد يوم دگ الباب وگال مرتي شلونها

بصائر : دوم يسألني عليج

_ ما يفيد ،اخوج زيد تعبي تعب والله

دنگت تسفط بالهدوم ساكتة وانا بس صعدت هيوفة گالت ضيرم يريد يحجي وياج خليت ونزلت ،لاگاني يريد يصعد
فقار : مرتي فوگ ؟

_ أي فوگ اركضلها لا تشرد

غماني وصعد يركض يعارف بي ما اگدر اركض وراه صيحت وراه
_ خل اجيب انا الك فقار اذا ما اخلي جهالي يشبعون ابنك دمغ شووف

مد رأسه من المحجر
فقار : اكتلج أنت وياهم والله

_ يااا شحدك

فقار : مووو اجيج

_ تعال

فقار : دنزلي البزونة

نزلت اصيح
_ يمة حاجي ابنج لا يگلييي البزونة

نجوى : يشاقيج ولج

_ يمة قصده لا حامل بتووم ،يعني انا بزوونه

نجوى : خايبة هاي عطية الله شلج بحجيه

دگيت رچلي بالگاع مغثوثة ومشيت للديوانية دگيت الباب وطبيت
_ مودي علي خوية ؟

أشرلي بصفه
ضيرم : تعاي اگعدي اريد افتهم سالفتكم .

مشيت يمه
_ سالفتيش خوية ؟

ضيرم : أنت حق على شني متعاركين ؟

گعدت بحيرة جاوبته
_ ياريت اكو شي ،صبح الصبح ما يحجي وياي ويوم عن يوم احسن بيه ما طايقني ما گدرت افرض روحي اكثر عليه وأجيت هنا

ضيرم : انا اول ما اجيتي كل ضني بس تصيرين زينة تردين بس من شفته گاطع حتى الجايات عليج بديت أشك حاجيته وكل ما احاجيه ما
يجاوبني ويگلي بيناتنة واليوم من اجه طلعتله وانا شهرين صار ما احجي وياه بس كل ضني راح يحجي ويگلي بالصاير بس هم ما حجة

_ ولا راح يحجي ،گطع گلبي والله ،شگد ضليت احاول وياه وهم ما حجة

حط ايده على ايدي
ضيرم : لا تضوجين جيبي ونشوف تاليها وين وبكلشي تردينه وياج

أبتسمت
_الله يخليكم الي

ضيرم : ويخليج أنت والبطنج

كبرت ابتسامتي دوم احب حجاياته حتى لو چنت ضايجة من يحجي وياي تقل ضوجتي ،گمت طلعت
من الديوانية وهزيت ايدي اباوعلهم

بصائر گاعدة وعلى رجليها متمدد فقار يحجي وياها
_ ويبين احنة بتركيااا

فقار : اهووو اجت

مشيت گعدت يم امي
_ يمة ما تجين وياهم ؟

نجوى : خليهم يمة اخوانج اذا يطبون يدگون الباب

طلعت من الغرفة تسحل بروحها
ريحانة : يمة

نجوى : هاا عيوني

ريحانة : جوعانة

وامي وريحانة گالتلها جوعانة فزت ما مصدگة تسألها
نجوى : شني تردين اسويلج گليلي ؟

ريحانة : أي شي

نجوى : احميلج من الغده ؟

ريحانة : أي

گامت امي تسويلها اكل وهي أجت گعدت يمي حجاية ما تطلع منها الا احنة نحاجيها گمت انا للغرفة تمددت ضهري يوجعني ،حتى دوام ما ردت
ادوام لان اعارف بروحي انا فارغة اقره على اعصابي مو انوبه حامل ...

°غاية°

نزلت من الخط فحطانة كاتلني الحر عباتي ما جارعتها ،هستوني طبيت للبيت وصار گدامي
عزيز ،سلمت عليه وعبرته اريد اكمل دربي بس
وگفني من

گال
عزيز : غاية ...

​⊱━━━━⊰✾⊱━━━━⊰

شيريد المحااامي ؟

هاي بشرى تحجي من كل عقلها لو السحورة ضربت عقلها ؟

تعجبني شخصية استبرق

هم زين طلعت ميمنة ولا واحد من الولد چان بركة من صدگ طارت بركتها

ضيرم ابو گمزة اخذ حقه مرربع...

بس صدگ اذا مو بيت غازي منو غيرهم ؟

وبالاخير توقعولي صدگ راح نفقد العرسان بيوم عرسهم ويضهر الجانب الحزين من الرواية ؟


شكرا لزيارتكم عالم روايات سكيرهوم

تعليقات