رواية ديون النبض الفصل السابع والثلاثون 37 بقلم مروه صياح


 رواية ديون النبض الفصل السابع والثلاثون 

بعد ما سبتهم ودخلت أوضتي، ما قدرتش أتماسك أكتر من كده. أول ما قفلت الباب ورايا، انفجرت في العياط.

كنت سامعة كل كلمة قالها مجد، وكل كلمة كانت بتقطع في قلبي.

حسيت قد إيه الحياة ظلمته، وحرمت منه أبسط حقوقه. اتحرم من أمه، ومن احتوائها، ومن إنه يعيش وسط أسرته حياة طبيعية، زي أي إنسان نفسه يلاقي مكان آمن يرجع له لما الدنيا تتعبه.

كان نفسي آخده في حضني وأطبطب عليه، أقول له إن كل حاجة هتبقى بخير، وإنه مش لوحده، وإن فيه حد شايف وجعه وحاسس بيه.

لكن بدل ما أكون القلب اللي يحتويه، لقيت نفسي بزود عليه وجعه.

أنا اللي قلت له يكمل حياته بدوني.

يكمل حياته بالوجع اللي عاشه، وباليأس اللي وصل له، وكأن كل اللي كان ناقصه في الدنيا إني أنا كمان أسيبه.

كنت بتمنى أواسيه، أمسح دموع قلبه الحزين، وأسيبه يغرق في حضني من غير ما يضطر يخبّي ضعفه أو يداري وجعه. كنت نفسي أمسك إيده ونمشي سوا في طريق ينوره ضوء القمر، نوصل لآخر الدنيا، وننسى كل حاجة تعبتنا.

لكن الظاهر إن الحياة ما كانش ليها رأي زي رأينا.

الطريق اللي رسمناه سوا، واللي مشينا فيه خطوة بخطوة، بدل ما يوصلنا لبعض، لقيته بيبعدنا عن بعض.

كنت نفسي أغرق في عينيه، وأخليه يشوف دموع قلبي والعذاب اللي أنا حاساه. كنت نفسي أرجع له البسمة اللي كانت بترسم الحياة فوق شفايفه، وأرجع له الصبح اللي غاب عن عينيه من كتر ما الليل طال جواه.

كنت حتى مستعدة أكون المنديل اللي يمسح دموعه، والراحة اللي بيدور عليها من سنين.

اتمنيت حاجات كتير، لكن كل ما كنت بتمنى أقرب منه، كنت بلاقي نفسي مضطرة أبعد.

حبيته أكتر ما قدرت أتحمل، لكن الحياة كان ليها رأي تاني.

قلبي مش قادر يتعلم إزاي يعيش من غيره، مهما حاولت أقنع نفسي إن البعد هو الحل. كنت بتوه وأنا بدور عليه، وبحاول أنسى وأبعد، لكن في كل مرة كنت بفشل.

كل مرة كنت باخد فيها خطوة بعيد عنه، كنت بحس إني بنتزع روحي من مكانها.

ليلي كان طويل، ودموعي ما نشفتش. كنت ببكي بحرقة، مش على حالي أنا وبس، لكن على مجد كمان.

على كل الوجع اللي عاشه، وعلى كل مرة احتاج فيها حد يحتويه وما لقاش، وعلى اللحظة اللي أخيرًا حس فيها إنه لقى اللي كان بيدور عليه، وبعدين حس إن كل ده ما كانش غير كذبة.

وكنت لسه مش قادرة أصدق إن مجد فعلًا ما حبنيش، وإن كل اللي بينا ممكن ينتهي بالشكل ده.

لكن الحقيقة إن مجد، بعد ما سبتهم ومشيت، فضل واقف مكانه شوية.

كان لسانه قال كلام كتير، لكن الحقيقة كانت واضحة في كل كلمة خرجت منه؛ في بداية كلامه كان صادق، لكن في آخره كان بيكذب على نفسه قبل ما يحاول يصدق إنه قادر يعيش من غيري.

رجع أوضته، واليأس مالي قلبه.

ما كانش مصدق نفسه، ولا قادر يستوعب الحال اللي وصل له. طول عمره عاش محروم من الاحتواء اللي كان نفسه فيه، ولما افتكر إنه أخيرًا لقاه، حس إنه خسر كل حاجة مرة واحدة.

قعد لوحده، وساب أفكاره تاخده بعيد، وفضل يسأل نفسه:

إمتى هلاقي راحتي؟

وإمتى هبطل أعيش طول عمري بعيد عن الحاجة الوحيدة اللي قلبي محتاجها؟

كان جواه شوق بيحرقه، لكن الحياة وقفته في طريق ما كانش عارف يخرج منه.

حس إنه رجع تاني لليله المظلم، اللي هجرته فيه كل الحاجات الجميلة، وبقى مستني فجر يمكن يشرق في حياته يوم من الأيام.

لكن قلبه ما كانش موجوع وبس؛ كان مشتت وتايه وسط كل الحرائق اللي جواه.

كل حاجة جميلة حس إنه امتلكها يومًا، رجعت تسيبه من جديد. ما بقاش جواه غير الجفا والحزن، لحد ما حس إن الحزن دخل لكل ركن في حياته، وقفل كل الأبواب في وشه.

بقى مش عارف هو تايه من الدنيا، ولا تايه من نفسه، ولا حتى قادر يفهم إيه اللي بيحصل جواه.

قعد يسترجع ذكرياته معايا، كل كلمة، وكل ضحكة، وكل لحظة كان فاكر إنها هتفضل معاه.

افتكر الكلام اللي اتقال، والوعود اللي اتبنت عليها أحلامه، والخيال اللي عاش فيه وهو متأكد إن المرة دي مختلفة.

لكنه دلوقتي كان شايف إنه يمكن يكون جرح قلبه بإيده، وإنه صدّق حلم كان نهايته الوجع.

ولأول مرة، سأل نفسه بمرارة:

هو أنا هفضل لحد إمتى محروم؟

لحد إمتى هفضل عايش بالحزن ده، وحاسس إني إنسان مش من حقه يعيش لنفسه، ولا من حقه يفرح بالحياة اللي طول عمره بيحاول يبنيها؟

كان نفسه يعيش لنفسه، ولو مرة واحدة، لكن حتى الأمنية دي حس إنه محروم منها.

وفي اللحظة دي، بدأ يتكلم مع نفسه، وكأنه بيحاول يقنع قلبه إن مفيش حاجة تستاهل الوجع ده تاني.

مجد: هي دي حياتي؟ هي دي الدنيا؟ خدت مني كل حاجة جميلة، ولما بدأت أحس إنها فتحتلي دراعها، وإن يمكن أخيرًا لقيت حاجة تعوضني عن اللي فات، رجعت خدت مني كل حاجة تاني.

مجد: إديتني شوية ذكريات، وكلام ووعود كنت بسمعها منك وبصدقها، كنت ببني عليها أحلامي، لكن كل ده تاه... بقى بالنسبالي دليل على الكذب والخيانة.

مجد: خلاص، هبطل أبكي. أنا اتعودت على الأحزان، واتعودت إن كل حاجة حلوة في حياتي لازم تنتهي. بقيت حاسس إن الزمن اللي أنا عايش فيه ما بقاش فيه أمان.

مجد: هو بعد ما اتحرمت من أمي، هتحرم كمان من الحب؟ أنا ضيعت وقتي في إيه؟ في كلامنا وضحكتنا وأحلامنا والحنين اللي كان بينا؟

سكت شوية، وفضل باصص قدامه، كأنه بيحاول يشوف صورتي ادامه...

مجد: حتى قعدتنا سوا، كنا بنقعد ونرسم الود والحب بينا، ونتخيل الأيام اللي جاية، وكأننا بنبني حكاية هنعيشها سوا. لكن في الآخر، قصتنا ماتت قبل ما تبتدي.

مجد: بقينا عايشين في ضجيج الصمت. جوايا كلام كتير، لكن مش لاقي حد أقوله له.

فضل يتأمل الفراغ قدامه، وملامحه كانت بتتغير مع كل ذكرى بترجع له.

مجد: عينيكي يا وعد... عينيكي اللي كنت بشوف فيها كل حاجة. كنت بحس إني ببص من خلالها على بوابة أمل اتفتحتلي بعد سنين طويلة من الحرمان.

مجد: كلامك وروحك هما اللي خلوني أهواكي. خليتيني أحس إن لسه فيه حاجة حلوة ممكن تحصل ليا، وإن ممكن في يوم ألاقي حد يفهمني ويحس بيا من غير ما أضطر أشرح له أنا موجوع قد إيه.

مجد: لكن النهارده، كل ده بقى غريب عني، وكأن كل حاجة عشتها معاكي ما كانتش تخصني، وكأنك عمرك ما كنتي جزء من حياتي.

ضحك ضحكة سخرية بينه وبين نفسه، وهز راسه بيأس.

مجد: غريبة يا دنيا! أخدتي مني كل حاجة، أي حاجة جميلة في حياتي خدتيها مني.

سكت لحظة، وبعدين كمل وهو بيحاول يستوعب اللي حصل.

مجد: حتى عينيكي، ما بقيتش بحس فيها بالسحر اللي كنت بحس بيه زمان. عينيكي اللي كنت بحس إنها شايفة حاجات جوايا، وكأنها بتدور على حاجة، ولما ما لقيتهاش عندي، بدأتي تبصي في حتة تانية.

مجد: حتى إيدك اللي سحبتيها من إيدي، وقلبك اللي قفلتيه في وشي... هي دي حياتي؟ ما بقيتيش سايبة ليا حتى ذكرى أقدر أعيش عليها من غير ما توجعني.

مجد: لكن خلاص، كله اتساوى. الحب زي الكره، والفراق بالنسبالي زي اللقا، والعذاب بقى زي الراحة.

أخد نفس طويل، وكأنه بيحاول يدفن كل إحساس جواه قبل ما يكمل.

مجد: هدور على مجد الإنسان ليه؟ خلينا في مجد الطبيب، خلينا في دكتور مجد وبس.

مجد: الحاجة الوحيدة اللي اتعلمتها منك، واللي هفضل متمسك بيها، إني أعيش لغيري، مش لنفسي. خلاص، طالما دكتورة جيهان عايزاني أتجوز بنت خالي، يبقى على الأقل أقدر أساعدهم وأفرّح قلبهم هما.

قعد على السرير، وغمض عينيه، وكأنه بيحاول يمنع الذكريات من إنها ترجع تهاجمه من جديد.

مجد: يا خسارة يا وعد... يا خسارة.

فتح عينيه، وبص قدامه، وصوته خرج مكسور وهو بيقول آخر كلام كان قادر ينطقه.

مجد: أنا حبيتك بجد يا وعد... والله حبيتك بجد.

لكن مهما حاول يقنع نفسه إنه انتهى، وإنه خلاص مش هيستنى حاجة من الدنيا، قلبه ما قدرش يصدقه.

انهار في البكاء زي الطفل الصغير، بكل الوجع اللي حاول يخبيه ورا كلامه، وبكل الحرمان اللي عاشه طول عمره.

كان طفل جواه لسه مستني حضن يحتويه، وإيد تطبطب عليه، وصوت يطمنه إن المرة دي مش هيتساب لوحده.

لكن المرة دي، ما كانش فيه أي إيد بتطبطب عليه، ولا أي حضن يحتويه.

ضم جسمه لرجليه، ولف دراعاته حواليها، وكأنه بيحاول يحتوي نفسه بنفسه، وفضل يهمس وسط شهقاته:

مجد: عليا نفسي... عليا نفسي.

لكن حتى هو، ما كانش قادر يكون لنفسه الأمان اللي اتحرم منه طول عمره.

وفي اللحظة دي، كنت انا في اوضتي ببكي بحرقه عليه وعلى الامه ووجعه وهو كمان كان في اوضته بيبكي بحرقه عليا ...
كل واحد فينا كان عايش الوجع بطريقته هو ما يعرفش ان انا بتالم زيه بالظبط...

ديون النبض 🫀

بقلم الكاتبة مروة صياح 🎯✍️

في اللحظات دي، كان كل واحد فينا قاعد لوحده في أوضته، بيبكي بعيد عن التاني، وبيعيش وجعه كأنه مفيش حد في الدنيا غيره بيتألم.

لكن الحقيقة إننا كنا الاتنين بنتعذب، وكل واحد فينا كان شايل جواه وجع التاني، من غير ما يعرف عنه حاجة.

أنا كنت فاكرة إني مش لوحدي في العذاب، كنت حاسة إن مجد بيتألم زيي، وإنه موجوع علشان حبنا وصل للنهاية اللي إحنا فيها. لكن بعد ما سمعت كلامه، اتصدمت، وبقيت مش عارفة أصدق إيه ولا أكذّب إيه.

هل فعلًا مجد ما حبنيش؟ ولا هو بيحاول يقنع نفسه بكده علشان يقدر يكمل من غيري؟

الأسئلة كانت كتير، والإجابات كلها كانت بتوجعني.

الليلة عدّت عليَّ طويلة بشكل ما كنتش أتخيله، وكل ما أحاول أغمض عيني، ألاقي صورته قدامي، وأسمع كلماته من جديد.

أما في الصالة، فماما وحازم ورغد وياسين فضلوا قاعدين فترة طويلة في صمت. محدش فيهم كان قادر يستوعب اللي حصل، ولا يصدق إن اللي كانوا مستنيين فرحتهم، وصلوا فجأة للبعد ده كله.

رغد: لأ، هما بيكدبوا! أنا عارفة أخويا كويس، أخويا عمره ما قرب من حد بالشكل ده، ومجد بيحب وعد. أنا متأكدة من ده.

سكتت لحظة، وبعدين كملت وهي بتحاول تفهم اللي حصل.

رغد: لكن اللي أنا مش فاهماه، ليه يقول كده؟ وإيه اللي حصل بينهم علشان يتخلى عن حبه، ويبقى قاسي بالشكل ده؟

حازم بص لها وسكت، كأنه هو كمان بيدور على إجابة لنفس السؤال.

ياسين: وأنا كمان مش قادر أفهم. أنا شوفت نظرات وعد لمجد، وشوفت نظرات مجد ليها قبل كده. دي مش نظرات إعجاب ولا حتى حب عادي، دي نظرات ناس بيعشقوا بعض بجد.

اتنهد ياسين، وبص لهم بحيرة.

ياسين: لكن ليه الاتنين بيبعدوا عن بعض بالطريقة دي؟ إحنا كنا المفروض بنستنى فرحتهم، وكنا فاكرين إننا قربنا نشوفهم مع بعض. أنا مش عارف أصدق اللي حصل، أنا مصدوم.

سكت شوية، وبعدين كمل كلامه:

ياسين: أنا قلت يمكن إحنا فعلًا ضغطنا على وعد بموضوع الجواز، وكلمناها كتير، ويمكن تكون اتضايقت وحست إننا مش سايبين لها فرصة تفكر براحتها. لكن حتى لو ده اللي حصل، كانوا استنوا لآخر الإجازة واتكلموا بهدوء، مش يوصلوا نفسهم للنهاية دي.

ماما فضلت ساكتة، والحزن كان واضح على ملامحها. أما حازم، فكان واضح إنه مش مقتنع إن الموضوع مجرد خلاف عادي.

حازم: الموضوع ده مش طبيعي. فيه حاجة حصلت بينهم، حاجة إحنا ما نعرفهاش، ومش منطقي إن كل اللي كان بينهم ينتهي بالشكل ده من غير سبب.

بص لرغد وكمل:

حازم: رغد، حاولي تعرفي من مجد. إنتِ أخته، يمكن يتكلم معاكي ونفهم منه إيه اللي حصل.

رغد هزت راسها بيأس.

رغد: وإنت فاكر أخويا هيتكلم؟ ده أنا أعرفه أكتر من أي حد. مجد لما بيقرر يخبي وجعه، محدش بيقدر يوصله.

سكتت لحظة، وبعدين قالت بصوت كله قلق:

رغد: أخويا عامل زي البركان الخامد، اللي شكله هادي من بره، لكن جواه نار بتغلي. وأنا خايفة عليه، خايفة من سكوته أكتر من أي حاجة تانية.

بصت قدامها، وكأنها بتتمنى إن مجد يسمعها وهو قاعد لوحده.

رغد: ياريته يتكلم... ياريته يطلع كل اللي جواه بدل ما يفضل شايل كل ده لوحده.

فضلوا قاعدين فترة طويلة، وكل واحد فيهم غرقان في أفكاره، لحد ما الوقت اتأخر، وبدأوا يرجعوا لشققهم.

حازم ورغد طلعوا شقتهم، وماما وياسين كل واحد فيهم رجع وهو شايل جواه أسئلة كتير من غير إجابات.

الليلة اللي كانوا فاكرين إنها هترجع لمّتنا وقعدتنا من جديد، انتهت بفرقة وبُعد، وكل واحد بقى غرقان في تفكير مختلف عن التاني.

أما أنا، ففضلت طول الليل صاحية، ما قدرتش أنام، وصورة مجد ما فارقتش خيالي لحظة.

كنت بتخيل إنه قاعد لوحده، زيي بالظبط، وإنه يمكن بيفكر فيَّ، زي ما أنا مش قادرة أبطل تفكير فيه.

لكن الفرق إن مجد، وسط كل الوجع اللي جواه، كان بدأ يرسم لنفسه طريق تاني. قرر يرجع للطريق اللي كان ماشي فيه قبل ما يعرفني، طريق دكتور مجد اللي بيعيش علشان شغله والناس اللي محتاجاه.

وبقى موضوع جوازه من بنت خاله مش فارق معاه، سواء كان بيحبها أو ما بيحبهاش، المهم عنده إنه يقدر يعيش بعيد عن وجعه.

أما أنا، فكنت حاسة إني دفنت حبه جوا قلبي وهو لسه حي، وإن كل اللي بعمله مش هيخليني أقدر أتخلص من إحساسي بيه.

تاني يوم، صحيت من غير ما أكون نمت أصلًا.

كنت مرهقة، وعيني تقيلة من كتر العياط، لكن ما قدرتش أفضل قاعدة في الأوضة أكتر من كده. خرجت أتمشى لوحدي، لأني ما كنتش قادرة أواجه ياسين، ولا أخرج معاه زي ما كنا متعودين.

كنت محتاجة أبعد عن كل حاجة، حتى لو شوية.

فضلت أمشي وأنا شاردة، مش حاسة بالطريق ولا بالوقت، وكل اللي في دماغي كان مجد وكلامه وملامحه وهو بيقول إنه ما حبنيش.

ومع قلة النوم والإرهاق، جسمي بدأ يخذلني، وحسيت إني مش قادرة أكمل.

رجعت العمارة، ودخلت الأسانسير علشان أطلع لشقتي.

لكن أول ما الباب اتفتح، اتفاجئت بمجد واقف قدامي.

عيني جت في عينه، وفي اللحظة دي نسيت كل حاجة. نسيت الكلام اللي سمعته منه، ونسيت إني المفروض أبعد، وكل اللي قدرت أعمله إني أفضل واقفة مكاني، ماسكة باب الأسانسير، ومستنية منه كلمة واحدة.

أي كلمة.

حتى لو كانت عتاب، حتى لو كانت قسوة، كنت مستعدة أسمع منه أي حاجة، بس ما كانش نفسي يعدّي من جنبي كأني ما كنتش يومًا جزءًا من حياته.

لكن مجد مد إيده، وشد باب الأسانسير من إيدي، ودخل من غير ما ينطق بحرف.

لفيت وشي ناحيته، وأنا لسه مش مصدقة إنه بيعمل كده معايا.

ضغط على زر الدور الأرضي، وطلع تليفونه، وبدأ يبص فيه وكأن مفيش حد واقف معاه.

وكأن وجودي من عدمه بقى واحد.

فضلت باصة له، مستنية حتى يرفع عينه ويبص لي، لكنه ما عملش كده.

خرجت من الأسانسير، وسيبت الباب يقفل بينا، وفضلت واقفة مكاني لحد ما اختفى عن عيني.

وقتها بس، حسيت إن كل الكلام اللي قاله مبارح بدأ يتحول لحقيقة قدامي.

أنا بالنسبة لمجد بقيت هوا.

وياريتني حتى كنت الهوا اللي يقدر يتنفسه، لأ... أنا بقيت الحاجة اللي بيحس إنها بتخنقه.

رجعت أوضتي وقفلت الباب على نفسي، وما قدرتش أمنع دموعي من النزول.

كنت تعبانة، وقلبي موجوع، وجسمي خلاص ما بقاش قادر يتحمل السهر والتفكير.

فضلت أبكي فترة طويلة، لحد ما غلبني النوم من غير ما أحس.

ما عرفتش نمت قد إيه، لكن صحيت على صوت ماما وهي بتحاول تصحيني.

فتحت عيني بصعوبة، وبصيت لها باستغراب، ولما شفت ملامحها القلقة، اعتدلت في مكاني بسرعة.

وعد: في إيه يا ماما؟

ماما: ياسين تعبان يا وعد.

ما استنتش أسمع تفاصيل أكتر. قمت من مكاني وجريت على شقة ياسين.

أول ما دخلت، لقيت رغد قاعدة جنبه، وبتبكي بحرقة.

قربت منه بسرعة، وأول ما مسكت إيده، حسيت إن جسمه سخن جدًا، وكان بيرتعش.

حطيت إيدي على راسه، وبصيت لرغد بقلق.

وعد: ياسين تعبان من إمتى يا رغد؟

رغد: والله ما أعرف. أنا نزلت أشوفه، ولما دخلت ما لقيتش مجد، ولقيته على سريره بالحالة دي. حاولت أصحيه كتير، لكنه مش بيصحى، وأنا مش عارفة أعمل إيه.

قلبي اتقبض من كلامها، وحاولت أتماسك علشان أقدر أتصرف.
مسكت ايده كانت سخنه... وقربت علي راسه درجة حرارته عاليه جدا ...

جريت جبت الترمومتر، وقست له درجة حرارته، ولما ظهرت النتيجة، اتصدمت.

كانت حرارته أعلى من أربعين درجة.

وعد: يا نهار أبيض! فين حازم؟

رغد: فوق.

مسكت تليفوني بسرعة، وكلمت حازم، وفي نفس الوقت بدأت أجهز له اللي محتاجه علشان نتصرف بسرعة وننزل درجة حرارته.

كنت خايفة عليه، لكن حاولت أركز في كل خطوة بعملها، وبعد ما جهزنا العلاج اللازم، علقت له المحلول، واديته الحقنة المخصصة لخفض الحرارة وفقًا للتعليمات الطبية.

فضلت قاعدة جنبه، أتابع حالته وأطمن على حرارته.

ومع الوقت، بدأت أحس إن جسمه هدي شوية، وإن ارتعاشه قل.

قعدت على السرير جنبه، وسندت راسه على كتفي، من غير ما أفكر في أي حاجة تانية.

في اللحظة دي، ما كانش فيه مجد اللي قرر يبعد عني، ولا وعد اللي بتحاول تقنع نفسها إنها تقدر تعيش من غيره.

كان فيه ياسين، الإنسان اللي كان دايمًا قريب مننا، واللي وجوده في حياتنا كان عامل زي الأمان اللي بنرجع له وقت ما الدنيا تضيق بينا.

بصيت لملامحه وهو مغمض عينيه، وحسيت إنه بقى زي طفلي الصغير اللي محتاج حد يفضل جنبه لحد ما يطمن.

وبعد فترة، بدأ يفتح عينيه ببطء.

بص لي، ولما شافني، ابتسم ابتسامة بسيطة، كأنه بيطمني إنه بدأ يحس بتحسن.

ابتسمت له وأنا بحاول أخفي قلقي، لكنه ما قدرش يفضل صاحي من التعب، فغمض عينيه تاني وراح في النوم.

أما أنا، فكنت استنفدت كل طاقتي.

قلة النوم، والتفكير، والخوف عليه، كل ده كان تقيل على قلبي وجسمي، ولما لقيته ارتاح، سندت راسي جنبه، ومن غير ما أحس، غلبني النوم وأنا لسه قاعدة مكانى.

رغد وماما وحازم كانوا واقفين بيتابعونا في صمت.

ولما شافوني نمت جنب ياسين، قرروا يسيبونا نرتاح، فقفلوا الباب بهدوء وخرجوا، واتجهوا لشقة ماما، وقعدوا التلاتة مع بعض.

وسابوني أنا وياسين لوحدنا في الأوضة، وكل واحد فينا غرقان في نومه من التعب، من غير ما حد فيهم يعرف إن الهدوء اللي مالي المكان ده وراه حكايات كتير لسه ما خلصتش.

أما التلاتة، ففضلت حالة التوهان والتشتت مسيطرة عليهم زي ما كانت من إمبارح. محدش فيهم قدر يستوعب اللي حصل، ولا عرف يتعامل معاه كأنه أمر عادي ممكن يعدّي وخلاص.

ماما دخلت المطبخ وحضّرت الفطار، وأصرت إن رغد تفطر علشان تحافظ على صحتها وصحة البيبي، لكن محدش كان عنده نفس ياكل. الأكل فضل مكانه، وكل واحد فيهم غرقان في أفكاره، لحد ما الوقت عدى، وقرب ميعاد صلاة الجمعة.

وفي اللحظة دي، باب الشقة اتفتح مرة تانية، ودخل مجد.

مجد: يا بابا... يا ياسين!

محدش رد.

استغرب، وبدأ يدور عليه، لحد ما وصل للأوضة وفتح بابها.

لكن أول ما عينه وقعت عليّا، وقف مكانه فجأة.

كنت نايمة جنب ياسين، وحاضناه من غير ما أحس، وهو نايم في هدوء، مسنّد راسه عليّا كأنه لقى في حضني راحة كان محتاجها.

مجد فضل واقف عند الباب، عينه بتتنقل بيني وبين أبوه، وكأنه مش قادر يستوعب المنظر اللي قدامه.

كان لسه شايل جواه وجع إمبارح، ولسه فاكر كل كلمة قالها، وكل قرار أخده وهو بيحاول يقنع نفسه إنه يقدر يعيش من غيري.

لكن دلوقتي، وهو شايفني نايمة جنب أبوه بالشكل ده، كل أفكاره اتلخبطت من جديد.

فضل واقف مكانه، ساكت، وعينه علينا...

مش عارف يصحّي أبوه، ولا يخرج من الأوضة، ولا حتى يواجه الإحساس اللي رجع يضغط على قلبه من أول ما شافني


تعليقات