رواية خلخال مشوه الفصل الثامن والثلاثون بقلم زمرده
الموت يهل الموت خاتمت الدروب
والعمر مثل الملح فص ويذوب..
°جفون°
أم جواد : ولكم بتيييي ،ماتتت بتي ،ماااتت بيوم عرسهااا ،انااا سمعت باذني يگلوله انگلبت بيهم السيااارة
صوفرت أذني وحسيت الگاع افترت بي ،كضيت ايد وحدة بصفي ما مصدگة السمعته ،انداريت على صوت عياط سمر طبت تركض تصيح شكو مبين گايليها وهل نزلت عود صعدت تبدل
سمر : شكووو ،عمة شكووو ،احجوو شبيكم تبچون
درت وجهي منها ما اگدر احجي دموعي يطيحن بلايه صوت عكس كل الموجودين ،الجوارين التموا علينه على صوت العياط ،الوادم كلها مستغربة
شني صوت طرب گبل ساعات وشني الحال هسة مثل ما نگول
"انگلب كلشي برمشة عين"
اغمض عيوني وارد افتحن على أمل الصار حلم موش حقيقة
وردة : يمة أختييي .
صيحتها خلتنة كلنه نطلع نركض ،بأيدها موبايل خالة ترچف رچف ،طاح من ايدها تدگ على روحها وخالة أم جواد من شافتها هيج طاحت علينة
لا من ايد ولا من رچل بساع خلتنة نعيش رعب..
سمر : عمة ،ولج عمة حاجيني عمة
تدگ على خدها تريدها تصحى وكل
الموجودين انخبصوا خبص بيها
وردة : اركضي جفووون شوفيلنه احد
طلعت اركض دموعي على خدي اضم شعري جوه الحجاب ،مديت رأسي من الباب اتلفت اريدلي احد ياخذها للمستشفى ،وبس شافني واحد من الواگفين اجاني يركض يسأل
_ هااا خوية شرايدده ؟
اشرت على البيت
_ خالتي أم جواد جوة طاحت علينة
اندار على الولد ورد يحجي وياي
_ امشي خوية وخلي النسوان تتستر حتى نگدر نطب
بلاية ما ارد عليه درت وجهي وطبيت گتلهن وطبوا شالوها وطلعوا ،ساعتين العدن والثواني البيهن مشن وحده اصعب من الثانية ،البيت صار يروش بالوادم وذيج اللحظة ما محسوبة من العمر
أنا العشت يمهم أشهر شوفتها گبالي طلعت بالبدلة وردت شايليها بتابوت مشهد ما ردت لا أشهده ولا اصدگه وتمنيت روحي ما شايفة هل شوفه الابد ما
تروح من بالي
دموعي تچري أريد اگوم ما اگدر گاعدة بنص الصالة رچليه ما يعنيني امشي ،اسمع العياط
كل زاوية من زوايا البيت تسولف حزن على الصار بهل يوم ...
گمت بالگوة على روحي وگفت يم الباب اباوع على تابوتها ،غطيت وجهي وبچيت بصوت ما مسموع وسط هذا الضجيج والنحيب على شابه بعمر الورد من المفروض تنزفله هل ليلة بس راح تنزف للگبرر! !
خالة حاضنه بدلتها وگاعدة گبال التابوت تصيح
بحس رايح كل حيل ما بيها
أم جواد : ولج يمة ريااااام ،يمة بنيتي يمة ،ولج يابعد حيييل امج حاجيني ولج هديتي حيلييي .
جواد : ريااام ،أخيتي ولج عروستنا ،مو گتيلي خوية لا تضوج خوية ما اعوفنكم ،ولج شلوون هسة
راح تعوفينا وتمشين للگبر ياحيل اخيج ليش هيج أستسملتي للموت بساااع
ابوها الما بيوم شفته غير ذاك الرجال الهيبته على لسان الچبير والزغير يشهد بيها ،بهل وكت چان اضعف بشر وهو مگابل تابوت ريام ينحب ما متهم لا لمكانته ولا هو شنو ومنو ...
اللطم اللطموه عليها تستاهله ،البچي عمة عيوني اباوع على وردة وجها صاير دم ،سمر تحير
تبچي على صاحبة عمرها لو تبچي من خوفها لا تفقد اخوها الضل بالعناية وبين الحياة والموت
أجوي حتى اهل عزام ومشوا اخذوا العروس التبدلت بدلتها بچفن يدفنوها وبعدهم بنص اللدرب
وانرچ البيت بخبر موته ،لحگ عروسته وما ضل ليلة وراها وچن روحه حست ماتت هاي ومصيبتنة صارت مصيبتين
گعدت على الدرج سادة أذني أحس الوجع چاس گلبي ،چابوا تابوته هنا وأمه تخبلت الا يطب تابوته لغرفته الما داسوها سوه
وسواا مثل ما رادت ،مشينا وياهم وصعدوه لغرفته واللطم عليه صار فوگ ،واگفه يم الدرج ودموعي تطيح عشرة عشرة ومنا طلعوا بيه للنچف وراها ،ورا ريام
حاروا بچادرهم وين ينصب وثبتوا يم بيت الشيخ ،رديت للبيت وي النسوان لا وردة ولا
سمر المشت وياهم لدفنة اخوها ...
نصبوا الچوادر برة وبأيدي شلت الزينة السويناها وراها ،طگطگت النفاخ ونزلت الورد العلى الحايط
وايدي ترچف ،اعتلن الحداد
وتغير مجرى الفرح وصبح الصبح وبدال ما چان هل يوم مصباح عرسهم صار أول يوم فاتحتهم
"غطاهم التراب الخسرناهم بعدها أثار حنتهم بديهم":-
طبوا من النچف بيهن ثنين امهات كل وحدة خاسرة ضناها ،كل وحدة مصيبتها مو هينة للثانية
تلگنهن النسوان وبصوت العياط والگولات يواسنهن متگابلات يلطمن وياهن
سمر : ولك خوووية ،ياعزااام ياخووية ،امس چنت عريس واليوووم مروحووم ،من ريت دفنوني گبلك ولا شايفتك ميت أنت وعروستك
تلطم وتصيح ومن جهة ثانية امها ،وصوت الزلم برة وصياح حزنهم يفطر باب الگلب
:-عرسان زفتهم للگبر صارت ،بدلة عرس بدم تلطخت ،وبحبر على گبورهم انكتب
تاريخ نهاية احلامهم "اللتي أعلنت مماتهم"
°كوكبة°
بشرى : بس تگضي العده اخلي واحد من الولد يعقد عليها اريدن نجمة تضل گدام عيني
ما لحگت اشرگ لان استبرق شرگت بالچاي گبلي دگيت على ضهرها وحجيت وي خالة
_ عود تحجين صدگ خالة ،وينها وين الزواج امس طلعت الاربعين مال حمزة
عذراء : چا أضل طول العمر أرمله
استبرق : انهجمت بيييت صلافتتتج
وخرت ايدي من ضهرها وگامت كفت رداناتها وخالة تباوعلها وانا اعضلها شفة ما اريدنها تتهور لان مبين راح تعاركهن
باوعت لعذراء تصيح
استبرق : المفلفه مثلج مااا شاااايفة ،يابوووية يا صلافتج
عذراء : ديلا لا تصيرين خيرة برأسي ،خليني ساكته عنج لا افضحج
وهي حجت هيج وخلت استبرق تتخبل ومنا تريدلها حجة ،ركضتلها تريد تكتلها وهذيج گامت بساع دفعتها خلتها تطيح على طرف الصنينة من الدوخة ما گدرت تگوم بساع...
وتگابلن عليها هي وامها وخالتي ابد ما تحركت وانا من حرگة گلبي عليها حطيت روح بروح وياهن
اجرها منهن ويطگنهت احميها ونص الضرب يطيح بي ولوما
نازل مرتضى من فوگ يرگض چان ماتت بأيدهن .
مرتضى : شكووو ،هاي شصاييير
من صاح بيهن هدنها ،گومتها انا احط الحجاب على رأسها وهي چانت خاوية روحها من
ضربهن بس ما نزلت عينها مننهن ،تتحلف بيهن بنضراتها وهن بساع لافنها عليها وكل ضنهن راح يعبرن سوالفهن على مرتضى وهو ماكو اللوت منه بعد يشبهن
وداد : ولك خالة هجمت علينه ،ولك مرة اخوك تريد تطگني
استبرق : لا تچذبيين ،ردت اطگ بتج العايبة ام الزلم
وداد : هاك شوف ،گدامك خوب تغلط وما تحترم .
مرتضى : الأحترام للمحترم خالتي چدة حفيدتنة
صاحت
بشرى : مرررتضى
مرتضى : يمة حاجي أختج مشاااكل مانريد البينة كافينة فوگاها طلايب النسووان خاف عايزين احنة
حجاهن كلمة كلمة يباوع بالوجوه يعارفنه خبل خلن وسكتن واستبرق صعدت شالت ابنها الفرفح تفرفح من البجي وخلت ومشت تحلف
استبرق : ما انزل وكلام الله اذا ما يولن منااا
بشرى : مو بيت الخلفج ،بيتي هذا ما عاجبج ولي الاهلج
اندارت عليها
استبرق : اولي ليش ما اولي ،اريحلي بال والله .
دنگت شالت ابنها وصعدت ولا چن تسمع خالة وراها تصيح ،خلتها تشب نار
بشرى : مو صوجج صوج ابني الكبرر راااسج ،بت الفگررر
صيحت لحد ما ملت وخلت وگعدت
وداد : يلا يمة عذراء نمشي احسن ،ما اگعد بمكان ما الي بيه تقدير
بشرى : وين ماشية خية ؟
وداد : للبيت وين ،لا انا ولا بتي النه ضله هنا ،ما اخليها مدمغة لچناينج
بشرى : يا چناين خية هي استبرق دواها عدي بس يجي رجلها اذا ما خليته يشفي بيها گلبج گدامج مو بت أبوي
وداد : وييين چا غير هي مدمغته بسحورتها ،شوفي اذا ما طلعها الصح واحنة العايلين بيها
بشرى : جا هاي اول شي الملامة تطيح علينة
_ خالة ترا الغلط من عذراء شني تگلها لا افضحج
خزرني ثنيناتهن لان حجيت حجاية الحگ ،خليت وسكتت دنگت شلت الصنينة وبس حطيتها بالمطبخ صعدت فوگ بس دگيت باب الغرفة سمعت صوتها
تنتر ...
استبرق : منووو
غيرت نبرة صوتها من گتلها انا ،فتحت الباب وطبيت مو گالتلي تعاي ،سديت الباب ومشيت گعدت على الچرباية اباوع عليها تفتر بالغرفة الموبايل بأيدها اعصاب صايرة
_ كافي شبيج راح تموتين
استبرق : العيشة هنا صايرة ما تنطاق الصغير گبل الچبير يتدخل بينة مو بيت تحسي وقف للرايح والراد
_ أي والله صدگ
استبرق : اشوف دمي ولا اشوف هل حياية ولو خالاتج بس ما اجرعهن من طبيت لهذا البيت لليوم
_ مو چنتي گبل تتحمليهن ؟
استبرق : من شفت الصار بريحانة حلفت بعد ما اسكت الهن
شوي ودگ الموبايل بأيدها ردت بساع
استبرق : منتظر اذا ما تجي وتشوف حل لخالاتك وامك ساعة ما اضلن هنا والله واخابر أخوي يجي
ياخذني الاهلي
عضت اصبعها
استبرق : فلا اصبر عليهن والله ،ابد لا تقتنعي ..أي تعال ليش اهچ منا
سدت الخط وگعدت يمي
استبرق : لج والله لوما منتظر ساعة وحدة ما اضلن هنا والله
_ وانا لو عدي أهل براسهم خير هم ما أضل لان خاف ضاله أنت علمود منتظر انا اليوم گبل باجر اتمنى اهچن من مرتضى وما اشوفه بعد لان مسمم عيشتي والله
استبرق : شوفي صح هو مثل طباگاتهن بس هو الوحيد يگدر الهن ،شفتي شلون سكتهن من نزل
_ وشيفيد وهو ما صايرلي الامان ،صايرلي أذية والله
استبرق : والله لو كسبتي حتى هاي عمتي ما تگدرلج بعد
_ اخر شي افكر بيه اكسب واحد مريض مثل مرتضى
استبرق : وتضلين هيج ؟
_ اضل لحد ما الله يفرچها
جاي تحجي وسكتت من انفتح الباب ،وگفنة على حيلنه من شفناه طب
منتظر : شكوو خبصتيني ،خليتني ما اندل دربي
استبرق : خالتك الحية تريد تزوج عذراء لواحد منكم ومن حاجيتهن تگابلت علي هي وبتها ،هاااك شوف راسي
رفعت شعرها من يم گصتها مشگوگ رأسها شگ خفيف بس لان طرف الصينية حاده متأذيه وهو
من شاف رأسها تخبل
منتظر : هاااي ياهي سوت بيج هيييج
استبرق : خالتك وبتها ،موتني حمزة موتني والله چن محملات بگلبهن علي گدام ابني كتلني ومن غير الغلط الما يلبس عليه ثوب
عيونه بساع انگلبن طلع يركض من الغرفة وهي گعدت متشمته بيهن من سمعت صوته جوه نزل
عليهن منفچر من سوايتهن ،خليت ونزلت اركض
ما متحملة ما اشوف الچاي يصير
وبس نزلت وشافتني صاحت تشهدني
وداد : وهاي كوكبة اسألها هي العالت لو احنة
اندار علي يريدني احجي احس بيه بالگوات متحمل يسايرهن على اعصابه
منتظر : احجي خوية .
باوعتلهن حايرة وگلت
_ يردن يزوچن عذراء لواحد منكم حتى تضل نجمة گدام عينه بس استبرق ما رضت وتعاركن
منتظر : وطگنهاا ليش ؟
_ مو عذراء گالتها لا افضحج واستبرق رادت تطگها لان حگها حجاية عذراء چبيرة
اندار على عذراء صاح بيها
منتظر : تفضحيها بشنييي ؟
من صوته العالي ضلت تمتمت ما تعارف شني التحجي وهو رد صاح بصوت اعله
منتظر : احجييي
وداد : يااا خايب ما تستحي تصيح عليها وتزيد كسرتهااا
أبتسم مستهزء
منتظر : انا وأنت نعارف مابيچن وحده تنكسر ودروب التمسكن علي ما يعبرن
وداد : يااا والله ما توقعت تحجي وياي هيج ولك هيج مغيررتك الغريبة
منتظر : يا طلابة الغريبة الما تگضي ،احجيلي أم بتنة ،بشني تفضحين مرتييي ؟
باوعت الامها تأشرلها أحجي
عذراء : مرتك هذاك اليوم سمعتها تحجي وي واحد بالموبايل وكله حبيبي وگلبي
وخالة بشرى وما صدگت تكض لزمه على استبرق
بشرى : ولك يمة منتظر ،ولك جاي تخونك والماي يمشي من جوواك
وداد : ساطرته بسحورتهااا خية ،شوفي ولا متهم لحجينه
منتظر : ماحجيتي غير الصدگ ،ما مهتم الحچيچن والشاهد الله
بشرى : يمة ولك خافنك مشررب
منتظر : چن هيج
بشرى : صخام الصخمج بشرى ،امشي اخذك افكنك
هز أيده ودار يريد يصعد ومن حجياتها الحجتها وراه بصوت عالي وتعارف بيه راح يسمعها ،خلتني افك حلگي متعجبه من صلافتها
عذراء : عمنك مو رچال ما اهتزن شواربك ،ولا اخذتك الغيرة على عرضك التلعب من ورا ضهرك
هي حجت هيج لو خلته يتخبل ،ركضلها ناسي روحه وذيج شخصيته العاقله وجابها براچدي فر وجهة بيه فر
منتظر : هاي الرچولة التردنها مووو ،اطگج أنت وما اطگها
عافانه وصعد وامها تخبلت خالتي تهدي بيها وهي تحلف بعد ما تضل هنا ،لمن غراضهن ومشن
وطول الوكت الصارت الصارت بيه الطلابة نرجس ابد ما تدخلت ما چنت اعارف بيها تريد تطلع روحها البت الماكو منها بعيون خالة بشرى ...
أچرن تكسي بنص الظهرية التكتل حر وعاندن ما يضلن وخالتي وطلعت أختها من بيتها زعلانة ،حال الظيم حالها وصعدت هدت على منتظر واستبرق وصارت للضالين بيناتهم ومن
عصبيته حلف ما يضل بالبيت
منتظر : نضل احنة هيييج عايشين بكيف خوااتج على مزاچهن نمشي ،نطلگ ونتزوج بكيفهههن مثل
ما هن يررردن
بشرى : لا تجيب طاري خواتي على لسااانك ،واذا ما تخاف عذراء كسران خشم لهاي بت الفگر ما اخليك بالبيت ساعة وحدة
رگع باب الكنتور چان فاتحه يدور بيه من اچينه
منتظر : ماكو داعي تشحتيني انا الما راح اضلن هناااا ،استبرق لمي هدومنة هذا البيت بعد ما ينعاااش بيه
بشرى : تحجي صدگ ،هيج تعوفني ولك ،وانا بعدني مكسورة على اخيك
منتظر : لا مكسورة ولا هم يحزنون ،الصار من ايدج وانا ما اعيدن غلط حمزة
واستبرق من الله على الله اجتها گبال خالة صارت تلم بالغراض وخلتها تحترگ حرگ
بشرى : والله اذا طلعت منا لا أنا امك ولا اعارفنك وتروح الله يغضب عليك
منتظر : من تصيرين تفكرين صح اردن ،وساعتها خواتج ما اخليهن يدوسن عتبة باب البيت وروح البعده ترابه اخضررر
بشرى : ولك تريد تگطعني وي اهلي ،حرام عليك والله
منتظر : حرام عليچ لو خليتهم متدخلات بكلشي بحياتنة
بشرى : وين متدخلات ولك
منتظر : لا ابد ما متدخلات ،استبررق بساااعج
بشرى : ولك يمة وين تمشي وتخليني ،ولك چبيري أنت
منتظر : اذا تطيني عهد ما يطبن النه بعد انا اضلن هنا واذا لا ما اضلن هنا دقيقة
چن گللها تشاهدي موش گولي خواتج ما يطبن هنا بعد ابد ولا حجت وهو من شافها هيج عيونه صارت بگصته ،صاح بأستبرق تلبس عباتها وشال الجنطة وهي بس لبست العباة نزلت وراه تركض
واحنة وراهم اخذت عبوسي من ايد رفيف الضاله بس تباوع بعيونها ولا تدخلت المرض مكفي وموفي وياها الا من رادوا يطلعون صاحت وراه
رفيف : مو هيج لا أنت تضل هنا ولا حمزة ،لخاطري ضل
نزل الچنطة من ايده وردلها ،باس رأسها يفهمها
منتظر : خاطرج بروحي أشتري ،بس من يصير بيت ينعاش بيه اردن
ما اعترضت بعد و ودعته بحجايتها
رفيف : الله وياكم خوية بس لا تگطع وياي
أبتسم بوجهة
منتظر : لا تخافين
دار وجهة ومشى وانا دموعي صارن يصبن عشرة عشرة ،صار چم شهر تعلمت عليها ،حسيتها چن أختي موش مرة حماي ...
مسحت عيوني اباوع لخالة ساكتة بس مشوا نزلت علي دوسة ونص بالحجي ،مبين كرهتني لان شهدت ضد بت اختها ،من شفتها سكتت خليت وصعدت فوگ مستهضمة على روحي ،كل الي بلبيت يباوعلي بأستصغار والسبب من اهلي ما بيهم احد بيوم من الايام دگ الباب علي وسأل شلونها بتنة ميتة لو عدلة
بس كله منهم
بس طبيت للغرفة شفته متمدد الموبايل على أذنه ارتبك وبساع نزله ،عاد انا شلون اهتم شغلت التلفزيون وضليت اباوع أي مسلسل تچي گدامي
وللعصر أرج البيت بصوت عياط خالة بأسم
رفيف
°غاية°
عزيز : غاية
باوعتله الشمس صايرة بعيني ،خليت ايدي على گصتي
_ هااا
عزيز : شبيج وجهج أصفر ؟
_ من الخفقان من الحر هاچ علي
صفن بوجهي وشوي وهمس
عزيز : عينج على روحج
أبتسمت وهزيت رأسي ب أي ومن شفته ما حجه بعد خليت وطبيت ،تلگتني ميمنة تحقق
ميمنة : شعدج واگفة وي عزيز ولج ؟
نزلت چنطتي
_ ماعدي شي بس گالي ليش وجهج أصفر .
ميمنة : هااا ،خايف عليج يعني ؟
_ جا غير بت عمه واذا خاف علي
ميمنة : لا شبيها ،عادي ماكو شي
_ خاب شبيج ميمنة
ميمنة : كلشي مابي ،اگلج شغلة
_ گولي
ميمنة : دوم اضفري شعرج لان مبينة الضفيرة تچيب نتيجة
عگدت حاجبي
_ نتيجة شنو ؟
ميمنة : امشي بدلي ضامتلج غدة
ضليت صافنة بوجهة وهي طلعتني من المطبخ دفع سبحت ورديت لگيتها محضرتلي الغدا ،اخذت الصينية من ايدها مبتسمة وگعدت اكل واشكيلها على الامتحانات
_ موتني ولج الطابة والطالعة تصيح وزاررري أنتم كرهني بالساعة الصرت بيها وزاري والله ماكو هيج خنگنه والله
ميمنة : ميخالف تحملي كلها اقل السنة وتخلصين
جريت نفس
_ شيخلصني
ميمنة : تگضي والله وتصير سوالف بس گولي يا الله
_ يا الله
بس كملت اكلي ما لحگت اخذ غفوة اكثر من ساعة لان مشيت ما نايمة وبس گعدت گابلت الكتب ولهناك وطبتلي
ميمنة : تگومين يمي راح اخبز والجو حلو ،افرشلج بالحوش وتقرين ؟
_ خوش اجي
ميمنة : رايحة اشنگ وأنت الحگيني
بس مشت بساع لحگتها لگيتها بعدها تنشگ گعدت يمها احجي
_ اخوج وحورية ما ناوين يصالحون مو چن طولوها ؟
ميمنة : كلش طولوها وهو مبين قافل كل ما احاجيه وگال سدي السالفة لو بس يگلي الله كريم .
_ انقهر على حوريته ،بس الحبالة كافي عليها وفوگ كل هذا ما گدرت حتى تداوم ومنا اخوج
ميمنة : بس امشيلهم احاجية ،هل مرة ما اهده اذا ما افتهم السالفة منه
_ أي احسن عاد بلكت تگدرين تأثرين عليه
هزت رأسها وگامت غسلت ايدها تحجي وياي
ميمنة : راح امشي اعلگ التنور ،جيبي الصنينة وراي اذا تگدرين وانا راح افرشلج بساط برا
_ صار
هي طلعت وانا شلت الصينية وديتها ورديت على كتبي بس بدت تخبز أجت جدة گعدت يمي هستوها گاعدة ،وشوي وطب ليث من برا
ميمنة : اجة راح يثلم الخبزااات
ضحك وجر خبزة من الصينية
ليث : بس هاي انگنش بيها
ميمنة : تنگنش بگرصة كاااملة
غضة : خايبة شبيج راح تزهفين بيه ،اكل حبوبة اكل ماعليك بيهن
ضحك واجه گعد يمها ياكل ويسولف
ليث : شلون نثرتلج الگيعان حنطة ،اذا الله راد وصدگ تطلع بيها كومت فلوس
غضة : دگول أن شاء الله
ليث : أن شاء الله ،صدگ امي ماكو ؟
غضة : يم بيت عمك باقر مشت تشوف البنات هي وعمتك
ليث : زين ،خوية ميمنة عدكم شي اكله جوعان
ميمنة : ضميتلك من الغدا ،غاية حميله بساع وردي أقري خطية يتانيني
_ بعيوني
ليث : سالمات
أبتسمت ومشيت حميتله الغدا وچبته هنا ياكل ويسولف وي جدة وميمنة وانا رديت اقره مندمجة وي الكتب ،وبس خلصت گمت طبيت للغرفة بديت بالامتحان وساعة تجر ساعة نمت على الكتب ما حاسة بروحي...
وفزيت من حسيت بطانية تخلت علي والمبردة عالية ،عارفتها هاي ميمنة من حوستها بالغرفة
تلملم هوستي
°هيوفة°
افتر بالحوش خايفة عليه ،الوكت تأخر وضيرم ماكو وانا منا عايشة بقلق من مصيبتهم وي بيت غازي الما نحلت بعدها
وانا احوسن طب عزيز استغرب من شافني والوكت متأخر
عزيز : شني خوية شبيج ؟
_ ضيرم ماكو
عزيز : بالگيعان وحتى صخر وياه
_ شعجب ؟
عزيز : ليث تعبان الليلة وما گدر يمشي
_ والله ضل بالي
عزيز : لا تخافين واصعدي هو وجه الصبح يريد
_ لو گايلي
عزيز : هو وصاني اگلج بس الصوج مني نسيت
_ هم زين من تذكرت
عزيز : بناتنة حنينات عمي
أبتسمت
_ غير نخاف عليكم
عزيز : الله يحفضچن
_ ويحفضكم
اشرلي طبي مشيت گبله ،صعدت وهو ضل يشرب ماي بس طبيت للغرفة بدلت هدومي وتمددت وحشه الغرفة عليه ما متعلمة انامن وحدي بيها وحتى من يمشي الجمعة ما يتأخر علمودي يعارف بي ما تغمض عيني وهو مو بصفي
وما اعارف شگد مر وكت وحسيت بيه طب للغرفة فتحت عيوني اباوعله بعيون ذبلانه أثر النوم ،سد الباب واچاني مبين سابح من حطني على صدره حسيت بقطرات ماي عليه
غمضت عيوني من حسيت بيه بأس رأسي يهمس
ضيرم : مشتاگ ل ريشتي ،ما تگعدين ؟
فتحت عيوني اباوعله
_ منعسة كلش ضيرم
ضيرم : جا خوش نامي
حسيت بيه بأس عيوني و لمني بحضنه وبساع غفيت عكس گبل شوي ضليت احوسن الا نمت ،وبس گعدت الصبح لاگتني مطنگرة تنزل من فوگ
_ شبيج ولج ؟
بصائر : بطني توجعني اضن راح اچيب
_ مو الدكتورة گالتلج مو هسة ؟
بصائر : گالت تاكلين نص من الشهر وانا بعدني بدايته
_ أي بعد وكت بس هاي تشاليع على گولة عمة
بصائر : اضن هيج
نزلنه سوه نسولف ،من شافتنة گامت وگفت گبال الدرج متخصره
حواري : هيوفة ما اطيج واحد تشيلي وياي ولج راح اموتن
بصائر : خايبة بعدج بالبداية ومليتي جا شاگولن على روحي
حواري : أنت واحد مو توم مثلي
بصائر : خايبة دتحمليهم شبيج .
حواري : احسن بروحي كلش ثگيلة ما جاي اگدر اتحرك والله
بصائر : بعد بأول أشهر الجاي اصعب
حواري : جاي تأيسيني من الحياة لو شني ؟
ضحكت بصائر تهز رأسها ب لا
بصائر : جاي اواسيج
حواري : أي لا مبين ،اگلج من تسون ريوگ صيحن فقار وياچن لان ما رضى ياكل ويانة متاني عيونه تگعد عشتواا
ضحكت اباوع لبصائر تهز بأيدها
حواري : وأنت ريشته اسكتي لا احطج بالقائمة
بصائر : خاب شبيج ويااانة ؟
نجوى : اعذرنها عمة طباگات صايرة مشتاگة الاخوج
بصائر : اذا تضل هيج اگله من باجر يردها
حواري : خليني محترمتج عيون فقار البطريق
بصائر : ما ضل شي وبطنج تكبر واضحك عليج
ضلن وحده تلاسن الثانية وانا مشيت سويت الريوگ وهم زين طب فقار گلتله ياكل ،وانا وگعدت وياهم خلوني استحي من روحي
_ خاااب شبيكم اثگلوا والله عيب عليكم
فقار : شحاجين هسة احنة بس گتلها صايرة حلوة
_ زحمة مو گبالي
فقار : چا شتعارفيني استحي انا ؟
حواري : لا وينك وين المستحى
فقار : اسكتي أنت وضلي حايرة بفروخج
حواري : هم گال فروخج ،ولك اسمهم زعاطيطج جهالج أي شي بس لا تگول فروخ احسن بروحي دجاجة من تحجي هيج
صاح متذكر
فقار : بزووونه
ومثل كل مرة تنفعل وهو يضحك عليها ،بس گضه الريوگ خله وطلع يفتح المحل ،وانا بس كفيت شغلي مشيت الاهلي مشتاقه لميمنة صار چم يوم ما شايفتها ...
بس طبت وسلمت ،تلفتت ادور عليها
_ جا ميمنة وين ؟
زهرة : فوگ ،اخوج صاحها .
_ مشتاگتلها صار چم يوم ما شايفتها
زهرة : حتى هي اليوم ذكرتج
_ اروحلها فدوة
گعدت وياهن اسولف بين ما نزلت ،فرحت من شافتني وما گدرت اسكت وهي تبوسني همست الها
_ مطورين أنت واخوي صايرين تخنسون
وخرت تضحك بصوت ناصي
ميمنة : لاتفكرين لبعيد ولچن
_ جا شعدكم ؟
ميمنة : ماعدنة شي ،بس ضام يمي فلوس ورادهن
_ هلا هلا وصاير يضم يمج فلوس
ميمنة : شلون بيج وبتفكيرج الاعوج
_ جا شتردين افكرر ،يعني تقنعيني ما بادر بولا شي ؟
بللت شفتها بطرف لسانها أول مرة اشوفنها مستحية
ميمنة : هو هذاك اليوم...
جاي تحجي وصاحت بينة جدة
غضة : خايبات شبيچن تبسبن ؟
ميمنة : ماكو شي جدة
غضة : چذابات امهات خنيس
ضحكت ومشيتلها
_ شو متغيرة علي جدة وصايرة ما اعارف شلونج وياي
غضة : يااا ولج انا اتغير عليج ،لا وروح أبوي ما متغيرة خايبة عزيزة گلبي أنت
أبتسمت وحضنتها
_ جدة شنو احساسج لو چبتلج نسخة مني ؟
غضة : ما ينوصف والله ،هيج واشيلن بزرج بأيدي
باوعت لميمنة
غضة : وبزر الچبيرة هم
أبتسمت وما ردت بشي ،ضليت گاعدة يمهم بالساعة هيج ورديت ،وهستوني طبيت وطب وراي التفتت عليه من صاح بأسمي
ضيرم : هيوفة
_ هاا عيوني
وصل يمي يرد
ضيرم : سالمات الاحبهن
_ حبيبي
ضيرم : احب اسمعها تعارفين
هزيت رأسي ب أي لا ارادي للابتسامة تحاوطني من اصير وياه
_ گول شرايد ؟
ضيرم : من الاحد تردين للجامعة
_ يااا صدگ تحجي ؟
ضيرم : أي صدگ ،ما ضلج غير سنتين تخلصين منهن
_ لا ضيرم بيا حال انا
ضيرم : ليش ؟
_ البنات منا كلهن وضعهن ما اعارف شلونه وانا اداوم واخلي عمتي وحدها خطية ،ومنا بعد اجه محرم
ضيرم : تگدرين ريشتي ،تگدرين بس توكلي على الله وكلهن چم يوم وتگوم على حيلها بصائر
_ حيرتني والله
كض ايدي
ضيرم : لا تحيرين الله يدبرها ،العمر يمشي حرامات تفوتج سنة ثانية
بحجية تقريبا بديت اقتنع ومن گال العمة خطية ما حجت شي وصدگ الأحد گعدت من الصبح حتى ابدي دوام ،شي غريب علي صارلي هواي ما طالعة خارج القرية .! !
ضيرم : بساعج هيفاء
ثبتت الحجاب بمدبوس وشلت عباتي اللبسها واحجي وياه
_ زين منو راح يردني ؟
ضيرم : اذا انا تأخرت ادزن واحد من الولد عليج وبس نرد اجيبلج مبايل حتى إأمن عليج
مشيتله مبتسمة يلبس بساعته ويحجي وياي ،من شافني وگفت گباله رفع راسه يباوعلي
_ ما توقعتك هيج ابد ،چنت ماخذة عليك نضره مو متفهم
قربني عليه
ضيرم : تغيرت النضره؟
_ أي ،الامان الاحسة يمك احلى شي صار وياي
ما عارف يريد علي و عبر بطريقته من دنگ لطولي محتضن شايفي بين شفايفه
ما وخر الا الحمرة الحاطتها خفيف كلها انمسحت
مسح طرف شفته
ضيرم : حاطة حمرة ؟
هزيت رأسي ب أي
_ بس خفيفة وهسة وخرتها كلش أنت
ضيرم : انا متفهم على گولتج بس اغارن وبالاخص على حلالي
_ اممم
ضيرم : ما نداوم ،شتگولين ؟
_ الا ما اريدن من اول يوم اگضيها غيابات
أبتسم وكض ايدي نزلنه سوا ،حواري چانت گاعدة حاطة ايدها على معدتها وتفتر بس شافتنة گالت
حواري : هااا المثقفين اهل الدوامات
ضيرم : تاليتج ما راح تصيرين مثقفة
حواري : لا والله اصير شني هي هيتة
ضيرم : عفية
_ شلونج ؟
حواري : شلوني ،حال الظيم حالي عوزي بس ملاية واگعد ابچي
_ حگج والله ،بس تحملي ما ضل شي وتگضي النساوه
حواري : شيگضيها مو راح اموتن والله
مشى ضيرم يشغل السيارة وانا ضليت اسولف وياها
ومن سمعت صوت الهورن طلعت ،صعدت بالصدر سديت الباب منداره عليه
_ تگدر تنزل وياي لو ما تلحگ
ضيرم : حتى لو ما الحگ انزل ،تدللين
أبتسمت احس بگلبي يطير بحجاياته الاحبهن ،وصدگ بس وصلنه نزل وياي
ضليت واگفه متانيته قفل السيارة واجه كض ايدي يعدل بعباتي وهمس بصوت ناصي
ضيرم : تاخذين گلبي بكل حالاتج .
أول ما طبينة للكلية مشينا للعميد چان هو مخلص كلشي بلايه ما اعارف وما ضل هواي ومشى بعد ما رحت لقاعتي ،مو هواي فايتني بس الدكتور
استقبلني وهو يطمني چان خوش دكتور واطاني احساس ايچابي بأول يوم دوام الي
وبس صارت ب 12 وطلعت برا ،لمحت سيارة صخر مشيتلها بس شافني قريبة نزل
صخر : هااا خلصتي ؟
_ أي ،من شوكت أنت هنا ؟
صخر : ما صار هواي أجيت ،يلا اصعدي
بس ردينا للبيت تلگتنة الهوسة بالباب ،نزلت مستغربة اباوع وكلشي توقعت الا الصاير .! !
نزلت من السيارة مستغربة وگفت ولدنة ،انداريت فاتحة عيوني مصدمة اباوع لصخر ،أشرلي امشي وهو وراي بس طبيت سمعت صياح چدي برا
رأجس : والله ما يدوووس بيتي ،اطلع لو كاظم الخالف كلامي يطب هنا
محمد : شني سالفتك بوية ،خلينة نطب ونحلها بالديوان
باقر : زحمة حفيداتك ضالات بالسيارة ،خلهن يطبن جوة وتفاهم أنت وأبنك
طبيت جوة اباوع ل أمي وميمنة وعمة مشدوهات
_ الشفتة برا صدگ لو يتراوالي ؟
ميمنة : لا صدگ "عمنة كاظم رد"
غضة : خايبات خلني اطلع اتعارك وي رأجس واريح گلبي ،گضه عمري ادعي بس يرد واشوفنه تالي يريد يحرمني شوفته
ميمنة : لا تكبر چدة ،وهسة جدي صاير نار كبره
غضة :على روحه
اريد بس استوعب الجاي يصير وما جاي اگدر وسواها صدگ چدي وما خله عمي الصارله سنين ما دايس القرية يدوس بيته
طبوا عمامي يتطلامون وچدي گبلهم يمشي فلا متهم وانا من سطرتي لهسة ضاله بالعباة
نزعتها وضليت بس اباوع بعيوني على حرگة گلب جدة ولعوة السنين البينت هسة كلها
غضة : خااايب حرمتني شوووفته ،ليش يابو محمد مو ضناك هذاا واجاك عگب كل ذيج السنين الگضت ردلنه كاظم رد وما خليتني اشمنه
رأجس : شلووون ترديني انسى السواااه ،شلون انسى مشى وهد ديرته لخاطر بت غااازي
غضة : ماضي ،انتهى بوكته ،كافي حقد ،اريدن اشوفن احفادي بروح ابوك خلني اشوفنهم
رأجس : لا تلحييين
غضة : اللحن والله وما اضلن هنا وروح أبوي وأمشي عد أل خبير اذا ما شفت طوله يفتر هنا حاله حال اخوته و ولده حالهم من حال زلامك
رأجس : نجوم السما اقربلج على الترديه يابت أل خبير
ومنا كلمة ومنا حجاية تغث جدة عاندت الا صدگ تمشي نتوسل نريد ماكو
غضة : امشي ولج صيحيلي صخر اريدنه ياخذني
جريت الجنطة منها اتوسل
_ وين ماشية جدة ،شلون تعوفينة
غضة : ما أضل والله ،بكلشي اسكت لجدج بس مال يحرمني من ضناي لا والف لا
_ هسة عصبي صاير بعدين يهده و والله يتصالحون
غضة : چدج گلبه قوي انا اعارفه يريد يحرگ افاده
وانا ما اخليه والله
_ جا مو تمشين
زهرة : استهدي بالرحمن عمة واگعدي فدوة لگلبج لا تكبر الطلابة ما تزعر
غضة : اذا ما تكبر ما تنحل ،خايبة صيحيلي رچلج
صاحت بميمنة خلتها تمشي تصيحه ركض وترد بس شاف چنطها عگدحاجبه باوعلها مستغرب
صخر : شني جدة ماشية زعلانة الاهلج ؟
غضة : أي ولو هم مطنگرين علي بس بيت أبوي واگعد بيه
طب نوح من شاف الوضع هز ايده
نوح : زحمة جدة وينج وين الزعل صرتي مرة شكبرج
غضة : خايب ما تنچب لا اگومن اطلع حرگة گلبي كلها بيك
نوح : الك الله يا نوح ،وديها صخر لا تحطنه وتكتلنه حتى تحرگ گلب جدي
صخر : شلون اذا ما رضى جدي ؟
غضة : رضى والما رضى انا هم بعد ما اعترف بيه مثل ما هو ما يعترف بحجاياتي
نوح : اسكتي جدة لا اليسمعج يصدگ
غضة : خايبين وخروه مني لا اگومن اچفص مصارينه
اندار عليه يخزره
صخر : اسكت نوح
نوح : سكتت
عطاء : عليج الله يمة ضلي هنا وازعلي عليه
غضة : جا ما ضليتي يم رچلج وزعلتي عليه ؟
عطاء : اهوو يمة انا شحطني بالنص
غضة : جا اسكتي احسلج
عطاء : عود اريدنج ماتمشين
غضة : امشي هسة عسى ما تحبون رچلي
نوح : ياهي ،المدگدگه؟
صخر : نوووح
نوح : سكتت ،نعتذر جدة
غضة : وغصبا عليك
وعاندت من صدگ وحجايتها المشت على الكل وصدگ مشت الاهلها جدي ابد ما حجة عود ما
ينزل روحه
ضيرم : بعدج هنا ؟
انداريت على صوته وراي
_ أي ،جابني صخر وهوسة چانت برة وطبيت هنا وتدري حتى انشدهت لهسة ناسية امشي للبيت .
ضيرم : تمشين ؟
_ أي بس تانيني .
مشيت جبت عباتي وجنطتي ورديت وياه بس طبينا تلگتنة
حواري : صدگ عمي كاظم راااد ؟
ضيرم : أي
حواري : شلون رد ؟
ضيرم : چا صار سنين ندور عليهم
حواري : برهان وعمي سمير ردوهم
مو ؟
ضيرم : أي ،شمدريج ؟
حواري : سمعتهم يحجون ،مو بالعراق لگوهم مو ؟
ضيرم : أي ،طلعتي كلشي تعارفين
حواري : الجاي قدمته الهم بارد بيومها
ضحك وانا أبتسمت على سوالفها الي حتى من عرست ما ضنيت تبطلهن وصدگ ما بطلتهن
بس صعدت وبدلت هدومي نسيت روحي حتى بلايه اكل وخليت ونمت ،وهستوني فتحت عيوني بعدني حتى ما مصحصحه ونزلت اركض على صوت صياح عمة جوة ،طاح گلبي من سمعتها تصيح بأسم ضيرم
بعد حتى ما گدرت انزل الدرج وگعدت بنصه اصيح
_ عمة شكووو ،شبيه ضيررم ،شكووو
صعدتلي ريحانة تركض من شافتني ما اگدر حتى انزل ،كضت ايدي تطمني وهي دموعها على خدها
_ حاجوني ،شبيه ضيرررم ،شبيه فدوه حاجونيي
ريحانة : ما نعارف والله ،بس صار چم ساعة يخابروه يطلع مغلق
حطيت ايدي على گلبي اريدن اتنفس
_ يمة گلبي ،ولج عمة ضيرررم
سندت روحي على ريحانة ونزلت ،اباوع بالوجوه واخافن اكثر ،والساعة عدت اخذت حيلي شلون لو عدت ثانية بعد
طلعت اركض على صوت الصياح برة ،فتحت الباب بلايه مخافه اشوفنهم يصعدون بالسيارات وكل واحد
بيده تفگه ،هاي الاجواء التخوفني اكثر وتخلي گلبي يرچف من خوفه
صحت بحس يرچف
_ ليث خوووية
اجاني ليث يركض من اندار وشافني واگفه ،خزرني ما راضي على وگفني وهيج مبينة وما صايرة بسد الباب بس انا بيا حال عقلي وگف وما يفكر بغيره..! !
بدموع سألته ،بگلب محب خايف من الفراگ
_ حاجيني ضيرم وين ؟
تنهد
ليث : ما نعارف ما چاي نندل مكانه
نشغت
_ گول غيرهاا فدوا اروحلك
ليث : نلگاه والله لاتخافين
_ شلون ما أخاف ليث ،شلون ما أخاف وانا حاطة روحي بشيشة من عداواتكم الكثرت ما نقصت
من صاحوه گبل لا يمشيلهم گالي
ليث : طبي جوه خوية
طبيت وسديت الباب وگعدت وراه ابجي بحس عالي الخوف يتسولف بيه ،اجتني بصائر تتوسل
اطبن جوة وانا روحي تعلگت برة
بصائر : فدوة لعيونج گومي جوة ،يرد والله لا تخافين
_ أول مرة احسن گلبي هيج يوجعني ،ولج بصائر لو يصيرله شي اموتن والله اموتن
بصائر : اسم الله لا تفاولين هيج
گومتني بعد اصرار منها ،وساعة التچر ساعة وحدة اصعب من الثانية صارن علي ،ما عارفت الگعده شني ولا هدت حتى دموع ما ضلن بعيني بعد ومن اصفن
وي روحي اگولن..
_هسة يرد وياهم ويطلع موبايله مخلص شحن .
بس چنت اتأمل على الخالي بلاش ،ردوا بس حبيب روحي مو وياهم ،ردوا وضيرم ماكو ،دورته بينهم
بس ماكو ..! !
من ما شفته انا وعمة بنفس الوكت سألناهم
_ وين ضيرم
وچوابهم چان
_ ما لگيناه
_ چا ويننه ؟
اجاني نوح وليث كل واحد حاوطني من جهة يحجون وياي وانا بهل لحظة حسيت اذاني ما تسمع غير بس اخبار عنه
_ ضيرم ،ولكم ضيرم .
اردد بيها وانا صرت احس الگاع تفتر بي ،اليوم كله گضيته بلايه اكل وهاي الهبطة اخذت ثلاث ارباع حيلي ،..
°غاية°
اقل شي اوصف بيه الحال بهل ساعات "عبارة عن توتر" ،الليل كله ما غمضت لا عيون جدي ولا عمامي ولا الولد وبس طلع خيط الصبح طلعوا يدوره ،يوم هم خلص وماكو كل خبر عليه
هيوفة صبرها خلص ،تنوح بأسمه وما شفتها غفت ابد ،وهسة من طبيتلها للغرفة وشفتها نايمة على رچلين عمة عطاء طرت ،لان لو ضلت ابد ما نايمة راح تطيح علينة
عطاء : طفي الضوه من تطلعين .
بلايه ما احجي طفيته وطلعت برا ،احوس القلق اكل راسنا اكل ،وكل ما يردون ما منهم خبر تخاف گلوبنة
اكثر ..! !
ومن عارف الرباح وأحفاده حطوا أيديهم بأيدنة وكل مجموعة يدورون بصوب إلى أن باليوم الثالث طبوا يتراكضون چم واحد من ولدنه يبشرونة
ليث : ليگيناااه چدي ،لگيناااه
مو حجايات ،ضحكن حتى الحيايطين الشهدن على كلشي عشناه بهاي الثلاث أيام ،طلع جدي من غرفته
چان يبدل
رأجس : وين لگيتووه ؟
ليث : بالمستشفى ناقليه ولد الحلال بس ما گادرين يوصلولنه لان حتى مبايله ما لاگيه
طلعت تتعثر بخطواتها تمسح دموعها بطرف شالها گبل لا توصلها وصلها هو وحضنها
ليث : كافي بچي زلمتج ولگيناه ،امسحي دموعج .
هيوفة : عليك الله شلونه ،زين ؟
ليث : لحد الان ما گاعد بعدة بالعناية ،بس اهم شي عارفنة مكانة
هيوفة : مابيه شي يعني ؟
ليث : ضربة برأسه قوية بسببها ما صاحي لهسه
نشغت
هيوفة : يمة
وخرها من حضنه
ليث : متحمل على اعصابي ترا
أبتسمت من عارفت قصده ،ومن خلصت تحقيق هيوفة استلمتهم امه ،بردت الگلوب وگدرنة نوگف ونسوي اكل نعوض تعب الأيام المضت
چنه حتى لو نسوي بس بالزايد كل وحدة تاكللها لگمتين لان ماكو نفس للأكل بيهج أجواء ،عكس
كل مرة ما نتأثر هيج لان متعلمين بس التهديدات
الضالات يوميا واصلاتنة بشكل جديد سببتلتنه
رعب ..! !
°ليث°
طبيت للمستشفى وراي يمشي جعفر ويحجي
جعفر : منو اليسوي هاي السواية تتوقع ؟
_ ماكو غيرهم بيت غازي ،حتى هذاك اليوم من طنگرت أنت ما تمشي وياي للگيعان ومشيت وحدي حسيت اكو احد يمشي وراي
جعفر : گوول والله
_ والله ،هم زين انا دوم شايل التفگة وياي
جعفر : أي احسن دوم شيلها
_ ماخذ حذري خوما مثلك
جعفر : ساعة السودة ،هي مرة نسيت وذليتني
_ جا لو طالعلك احد بدربك ،بشني تدافع على روحك ؟
جعفر : بالكرك
_ لا هاي هي
جعفر : جا حيرتنة
سكتت وكملت دربي ،من وصلت يم غرفته لگيتهم كلهم ملتمين
_ شلون طببوكم ؟
فقار : مثل ما طبيت أنت
_ دفعت فلوس
فقار : والله احنة ما دفعنة عدنه واسطة قوية طببونه وهم الممنونين
_ الرتب بعد
عمي سمير واگف يدخن على صفحة ويباوعلنه بطرف عينه
جعفر : عمي الثگيل شبيك ضايج ؟
سمير : كلشي مابي بس متاني هذا يگعد اريد اعارف منو السوه بيه هيج
صخر : انا متحمل هل چم ساعة على اعصابي
_ ما گالولكم شوكت يگعد ؟
برهان : لا ما حجة الدگتور
كلنه التمينة على الغرفة نباوع من الباب من طب الدكتور يشوفه ومن طلع گال
الدكتور : اكو احتمال راح يدخل غيبوبة ما معلومة مدتها
عزيز : غيوبة ،ليش دگتور ؟
الدكتور : الضربة كلش قوية على رأسه واثناء العملية هواي نزف ،لذلك انا جاي اطيكم احتمال مو اكيد لان
كلشي يم الله
صخر : ممنونين منك دكتور ،تعبناك هواي ويانة.
الدكتور : ماكو كل تعب اهم شي سلامة الدكتور ،مرخصتكم
مشيت وگفت يمه
_ برهان العاشگ شلونك
برهان : لو بس اعارف منو حطني بلسانك
_ جعفر گالي أخوي عاشگ وعلمود عشگه دور بيت عمي وردهم وجاي يعيش احلى ايام حياته
برهان : احلى ايام حياتي ،لا خوش عمي شو ما اعارف انا
_ انا ما علي جعفر گال
برهان : جعفر بعد
بس تحرك يريد يمشي كضيته
_ وين ماشي ؟
برهان : لبيت عمي اشوفنهم شمحتاچين ابد ما رحت الهم.
_ جا من اگولن جاي تعيش احلى ايام حياتك ما ترضى
برهان : لا اله الا الله ،اسكت مني ليث
_ خوش بس خل امشي وياك بداعة بت العم
برهان : دايس على روحي ومتحملك لحد الان
_ اورحلك فدوة
مشيت وراه بساع صعدت بصفه بالصدر وهو مطنگر يباوعلي
_ خاب لا تطنگر جعفر كافي علي
برهان : اللمن داحس روحك وياي ؟
_ اشوفن عمي
برهان : انچب اعارف بنيتك شني .
ما رديت عليه لان لو احجي حجاية اعارف ماعده مانعم يفتح باب السيارة ويشمرني ،حرك مخلص الدرب بس يتأفأف
_ خاب شبيك راح تطيرني
برهان : جدي راح يخبلني ،سنين انا ادورهم ومن لگيتهم هيج سوه
_ لو نچي للصدگ كل الحگ اله ،انا چنت زغير واتذكر عمي شلون دار وجهه ومشى
برهان : جا شيسوي يهجم بيته وهو عده بزر ،منو الهم لو رد امهم ل اهلها مثل ما يريد چدك ؟
_ السواه عين العقل بس يحتاجلها وكت الگلوب الا تتصافه
تنهد وسكت ،طبينا بمنطة قريبة على القرية ،ومن طبگ گبال باب زغير نزلت انا اباوع للبيت مبين ما تتعده مساحته المية متر
_ هذا بيتهم ؟
برهان : أي مأجريه امس
مشى يدگ الباب وانا واگف وراه ،وشوي وسمعت صوت واحد من الولد يصيح
_ جاي يابة جاي
أبتسم فرحان بشوفتنة من شافنه گدامه تسالمنه وهو وخر من الباب يسويلنه درب نطب ويحجي بصوت عالي يسمع الجوا
سياف : ياهلا بالجاين ،كل الهلا تفضلوا
برهان : زاد فضلك
هستونه طبينة وطلع عمي ،فتح ايده يرحب
كاظم : هلا بزلم أل غضب ،ياهلا بالدايس بيتي
مشى برهان يسالمه ويحجي
برهان : هلا بيك عمي ،شلونك ؟
كاظم : الحمدلله بخير ،أنتم شلونكم
برهان : والله ياعمي شأحجيلك
كاظم : خير أن شاء الله
سياف : طبوا جوة نحجي
فتح باب الاستقبال وطبينا ،گعدنه احنة وعمي وهو مشى چاب ماي ،قدملنه وگعد يم عمي
سياف : شني شبيه ضيرم ؟
برهان : متعرضليه بيت چدك ،وما نعارف شوكت يصحى الدكتور يگول غيبوبة راح يطب
سياف : صدگ تحجيي ؟
برهان : أي والله هاي جيتنه من المستشفى الكم
كاظم : وانا اگولن عمنكم مختفين
برهان : صار چم يوم بيوم مشدوهين ما نعارف الليل من النهار
كاظم : كله من أبوي ما خلانة نوگف على حل ،غازي بيه مجال يتنازل الا أبوي ،توقعت من راح
اردن يطيح الصار من سنين وانا صارلي كل هل مده بعيد ،بس صدمني الحقد عامي عيونه أكثر وفرض عزة نفسه حتى وياي
برهان : مو جديد علينه هذا چدي من يوم يومه ولا عبالك هل مرة احد راضي عليه كلنه واگفين ضده ونريدكم تتصالحون بس الصار بضيرم شهده بالنه .
كاظم : اعارف عمي وعاذركم ،أنتم هم شبيدكم عليه
_ مرة عمي موجودة اسلم عليها ؟
اندار علي برهان رافعلي حاجبه يعارف بقصدي شني
أبتسمت
_ صار سنين ما شايفها مشتاگلها
كاظم : گوم سياف صيح امك
گام سياف من رد هي وياه ،گمنه نسلم عليها وبعدها نفسها ذاك لسانها وهذيج حجاياها اتذكرهن كلش زين وما انسى حنيتها علينه وشلون تحتوينه بوكت التتعب امي ،ضلت تحجي ويانة وتسأل
على اوضاعنه واباوع عليه كلساع يرفع عيونه للباب متأمل شلوفتها
حسيت بگلبي طاح وي گلبه من طبت وحدة من البنات وعمي اندار عليها ،أبتسم وصاحلها وگفت
يمه
كاظم : هاي غمد الصارت گبل لا نطلع من القرية
أبتسمت
_ عدك بعد بت عمي أتذكر وينها ؟
كاظم : موجودة ،امشي بوية غمد صيحي اخيتج تسلم على اولاد عمها
وبس أجت انداريت اباوعله چمد ما يگدر حتى يرمش بعيونه
سيوف : السلام عليكم
رديت السلام انا وهو دنگ
برهان : عليكم السلام بت العم ،شلونج ؟
سيوف : الحمدلله بخير
تعجبت شلون عده قابلية يكض روحه هيج ،تنهدت اباوعله هاي لو انا چان مو بس عمي يعارف البي لا الديرة كلها
كاظم : اگعدوا عمي
گعدت انا طگيتلي چگارة وعمي صاح بي
كاظم : ولك ليييث
_ هااا عمي هااا
كاظم : شو تدخن گدامي ،ما تستحي أنت ؟
_ عمي انا ادخن گدام چدي تريد گدامك ما ادخن ،شتحجي أنت
كاظم : والله هل جد مطلع عيونكم كلش ،گبل خانگنة خنگ انا وابهاتكم
_ چا غير احنا عگابه
ضحك مأيس مني
كاظم : وين ينگدرلك أنت ،من يوم يومك على هل لسان هذا
_ وانا كل ضني من كبرت هيج صرت
كاظم : لا من گبل ،چنت زعطوط وتاكلنه بلسانك وتضحك علينه بسوالفك
سالفة تچر سوالفة ضلينه يمهم ،ومن خابر صخر على برهان ردينا للمستشفى وعمي ويانة ،وحظ عمي چان جدي جاي ،بس شاف عمي انگلب گلب يشحت بيه
رأجس : اذا ما طلع مناا انا امشي والله، لو انا لو هو .
محمد : شني السالفة بوية اچه يشوف أبن اخوه ويمشي
كاظم : خله محمد ،هذا أبوي يفكر بس بعداوته وما يهمه شيصير ما يصير
رأجس : شو ما تعااارف تحجي أنت
كاظم : ماشي انا بوية ما راح اضلن بمكان ما ترديني بيه
تحرك يريد يمشي وابوي كضاه
محمد : شجاك كاظم جا مو أجيت تشوف ضيرم ؟
كاظم : من يصحى اجي اشوفنه ،مرخصتكم
وصدگ ما ضل ،وبس مشى عمامي وابوي هدوا على چدي وهو محترگ گلبه يصيح
رأجس : ما انسى سواااايته وروح أبوووي ،ما أنسى شلون شمت الناس بي
محمد : عليش تصيح بوية ؟
رأجس : لا تلومونيي ،دگته نااااقصة والسواه ما ينسي
بصياحه خلانه نسكت بس هذا ما يبرر عمي ما يستاهل هيج معاملة صح السواه غلط بس كلنه نعارف چدي ما ينسى شخص اذاه حتى لو چان
ابنه ...
°حواري°
طلعت مختنگة اريدن اتنفس ،كلشي من الايام العدن خانگني ،گعدت على الدچة مال ديوان
وانا اتذكر هاي نفسها الگعدة الگعدتها وقنعني اقبل
بيه...
رفعت رأسي من حسيت بخطوات قريبة مني وأول مرة احسن بنفور هيج بأتجاهه ،گمت ما اريدن يجمعني بيه مكان واحد ولا هل گعدة من جديد ..!
عت ايدي يردني لمكاني وانا جريتها منه بقوة
_ لا تكضني بعددد ،لك ما اريدنك والله كرهتتك
عبد الحق : "ما حبيتيني حتى تكرهيني"
عگدت حاجبي مستغربة كلامه
_ ليش هيج جاي تحجي ؟
عبد الحق : ذبلانه حورية .
نترت
_ لا تفرر السالفة حق
عبد الحق : ما اريدن احجي بيها
دنگت احجي بنتر هامضني شلون خلاني كل هاي الاشهر
_ احجيي ،حتى نحط النقاط على الحروف واذا ما تريدني كل واحد بينة يشوف دربه
خزرني وگام وگف على حيله ،تنفس يريد بس يحجي بهدوء
عبد الحق : الصار ننساه ونبدي صفحة جديدة لخاطر البطنج
_ يا صفحة ويا خطار تحجي عنه ،تعارف بروحك من الاول دورت خاطرهم ،شمرتني وما سألت عن حالي
عبد الحق : ما شمرتج أنت الدگيتي عناد بيوم ردينة من المستشفى
_ ردت ارتاح يم اهلي واردن ،بس أنت من الله على الله لگيتها حجة حتى تواجهني بيها
عبد الحق : يعني شني ؟
_ ما اريدنك بعد ،وساعة الاچيبن تطلگني وما يضل يجمعني بيك غير أنت أبو جهالي
عبد الحق : تحجين صدگ ؟
_ ماعدي صدگ اكثر من هذا ،هنت عليك أشهر اهونن العمر كله وما اهمك ،هسة بينت انا شنو الك
عبد الحق : كافي لا تحجين زايد ،نرد وننسى كلشي
أبتسمت
_ ليش شنو الصور حتى ننساه ،اذا ما اعارف بروحي بشني غلطت وياك تحلم اردلك
عيونه رادن ينطن من طريقتي بالكلام ومدا قساوة حجاياتي بس يستاهل ،اذا ما هيج ماكو نتيجة وياه لان بديت اعارف شني شخصيته...! !
درت وجهي ومشيت اطبن ما احمل احجي وياه اكثر بعد لا نفسيتي ولا قابليتي تسمح لهيج نقاشات ما معروف اولها من تاليها
بركة : شبيج ولج حورية ؟
انداريت على صوتها وراي ،أجت تمشي وگفت گبالي
بركة : ليش هيج ضايجة ؟
_ مضوجني اخوج كلش .
بركة : حاجاج ؟
_ أي
بركة : شيريد ؟
_ يريدنه نتراضه وانا بالاصل ما اعارف على شنو صار هذا الزعل
بركة : تراضوا وفضوها
_ ابد والله اذا ما افتهم شني الصاير ،وليش هيج انگلب علي ،ما اباوع بوجهه موش اقبل بالصلح .
سكتت حايرة وانا خليت ومشيت مخليتها بصفنتها
گعدت بصف عمة عطاء اباوع بعيوني بدون ما اشارك بسوالفهم حيل ما عدي للحجي ،وبالساعة
هيج وطب جدي جاي من المستشفى روحه صايرة بخشمه ما يتحاجة خله ومشى لغرفته خلانه نصفن شني الصاير وهيج گالبه گلب ..! !
ومن اجه عمي محمد سألته عمة زهرة وگال
ضايج منهم لان شحت عمي كاظم وهم ما رضوا على سوايته
ساعة تچر ساعة ،وما وگفت الأيام عد حالنه ولا تغير الزمن من عده اسبوع ضيرم ما صاحي من الغيويبة
_ وينچ ولج اوگفيليي
طلعت امشي وراها
_ وين ماشية ولج تخبلتي
هيوفة : اريدن احد منهم ياخذني اشوفنه ما اصبر بعد والله
_ وين ياخذوج ما تعارفيهم أنت ؟
هيوفة : جا شلون ،اضلن هيييج طگ گلبي عليه الله
طاحت دمعتها ومسحتها تباوع لعمة الطلعت ورانة
نجوى : طبي عمة لخاطري
هيوفة : راح اموتن على شوفته ياعمة والله راح اموتن شلون بي!
نجوى : اسم الله عليج من الموت ،طبي وانا احاجيهم ياخذوج وانا امشي وياج
باوعت مقتنعة وخلت ومشت تطب وانا وراها بس طبينة شفتها نزلت من فوگ تحوس
_ هااا بصائر شبيج ؟
بصائر : اخابر على فقار ما جاي يرد علي
_ طلعوا هو ونوح
بصائر : اعارف بس ضل بالي يمه.
_ قابل شكو يمعودة ،اگعدي كافي تحوسين
بصائر : شيگعدنيي
_ اعلمج شلون اگعدين
بصائر : اهوو ،اسكتي مني ولج ،گلبي ناغزني
_ شلون بگلبج ،كل طلع وصحتي گلبي ناغزني
بصائر : خاب دوخرري مني
هزيت ايدي ومشيت للغرفة ،فتحت الباب اباوعلها صافنة حتى من طبيت ما حست بي ،گعدت يمها الا باوعتلي
_ ما مليتي ،كافي حزن فدوة اروحلج
ريحانة : مو بيدي والله ،ولج ما جاي اگدر اعيش واسامح نفسي
_ عليش ما تسامحين روحج ،ترا أنت الي انضلمتي
ريحانة : بس هو مات
_ الله كاتبله هيج ،لو تضلين هيج تكتلين بروحج من القهر تلحگيه
ريحانة : ياريت
_ خاب شبيج ؟
ريحانة : صعب تعارفون البي ،انا بالگومة والگعدة اللومن بروحي ،تأنيب الضمير موتني
گمت جزعانة روحي شگد احجي وياها ماكو فايدة
_ فدوة لعيونج ارحمي حالج
ما ردت علي ودنگت وانا خليت وطلعت ،طبيت للمطبخ احجي وي امي
_ ما تحاجين بتج علت گلبي والله ،احجي وياها وفلا چنها گضت روحها صايرة بس عظام
نجوى : مو تشوفيني احجي وما يفيد ،شسويلها راح تموتيني بحالها والله
تأفأفت حايرة وگعدت على الكرسي احوس ،حكيت خشمي
_ يمة اريدن ليمون
بس شافتني احك صاحت
نجوى : لا ولج
_ مو اول مرة احك ،راح يطلعون مشوهين
نجوى : خايبة خطية
_ شبيدي يمة كل ما اشتهي حموضه خشمي ياكلني اكل
وهي تحجي وياي شيفتلي ليمونه واطتنياها بماعون
_ اريدن ملح
اطتني المملحة ،وانا چن شوف شجاي اكل على گد ما مستلذة ،من طب فقار وشافني صاح
فقار : خاااب شبيج لعبتي روحي ،ما شايفة ليمون لو شني
حطيت ملح هواي على أخر شيف
_ اذا ما عاجبك طب جوة ،عيونك ضال بالها عليك امشي يمها
بأثنين ايده غمني ،ورد غمني بأيد وحدة
فقار : هاي الج والجاهلج
_ يمة حاااجي ،يغم جهااالي .
نجوى : ليش ولك فقار وياها عود أنت اكبر منها
فقار : چا ما ارتاح اذا ما اداهرها
بصائر : فقار
فقار : هاا عيوني
تمشي ايدها على بطنها ،وگفت گباله
بصائر : وين مشيت ضل بالي عليك .
فقار : انا ونوح عدنه شغلة
بصائر : الشغلة هاي تفحطون بالدراجة ماكو غيرها
نجوى : صدگ ولك فقااار
باوع لبصائر
فقار : خوب اتورط احجيلج
نجوى : اذا ما احجي ل أبوك شوف
فقار : بروح ابوج لا ،ياخذ الدراجة مني
نجوى : جا أحلف ما تفحط بيها بعد
فقار : اهووو
نجوى : ما تگدر موو ؟
فقار : أي والله
نجوى : جا اذا ما حطيتكم بحلگ ابوك وعمك شوف
فقار : شنييي يمة
نجوى : جا تريد تدولبنه ،كافي علي اخوك
سكت ما حجة شي يعارف بروحه غلطان وامي دارت وجهة زعلانة منه ،خله وطلع من المطبخ
ولحگته بصائر ،درت على صوتها من طبت ،تمشي بتعب
هيوفة : عمة محتاجة شي ؟
نجوى : لا عمة شعدي قابل هو بس الغدا
فزيت حاطة ايدي على گلبي وهيوفة طفرت تركض على صوت عياطها ،وبنفس الوكت طب فقار يركض مخطوف لونه
فقار : يمة اضن بصائر جاااي تجيب
طلعت ريحانة تركض من الغرفة ،تسأل شكو
_ بصائر يمكن راح تجيب
نجوى : ماشية أحظر روحي ،بساعك امشي گول الأمها
طلع يركض يتردم بالحياطين ،ما گدرت اصعد من الخوف اسمع صوتها شلون تتلاوه من الوجع واحس المغص ببطني كضني چن جاي اجيبن وياها
نزلنها ريحانة وهيوفة سانداتها ،گمت وگفت على حيلي اباوعلها واريدن ابچي وياها مبينة متأذيه
انداريت على صوت عمة شيماء طبت وياها بركة و وراهن فقار مشدوه
فقار : صخر برة ياخذنه
ريحانة : خاب فقار شبيك
فقار : خايف عليها
هيوفة : تجيب وترد عليش الخوف خوية
بلاية ما يحجي اجه وگف گبالها ،گدامنه حضنها يبوسها من رأسها
فقار : رديلي مو تعوفيني ،تنعمي عيوني بلايج ،عدي أنت اهم من جهال الدنيا كلها ،عيوني الاشوف بيهن أنت
بصوت هزيل من كمية التعب ردت عليه بأبتسامة
بصائر : اذا ما رديت امانة الله أبني ،كل ما تشوفه
چن تشوفني ،تعبت بيه هواي
فقار : ليش هيج تحجين وتخوفيني عليج ،بلايه شي انا راح يوگف گلبي
أبتسمت ولمت ملامحها بألم
بصائر : لا تنسى عيونك تحبك
ما گدر يحجي ويرد عليها ،وهي كضت ايده تتوسل
بصائر : جيبولي ميمنة اريدنها وياي
فقار : صار
دگ باب المطبخ يصيح
صخر : وينكممم
عصرها بحضنه وطلع لصخر وبس طلعت عمة من الغرفة مشن للمستشفى ،وساعة تجر ساعة والصار
ابد ما چنه متوقعيه ،مثل الضربه على الرأس أجت لكل چبير وزغير بالقرية ..! ! !
_ خايبات شني ما چابت مو طگت روحي
ريحانة : اصعدي جيبي مبايل بصائر فوگ نخابر عليهم بلكت الله وتسهلت ولادتها
_ انا اصعد وبطني ؟
ريحانة : اووف والله نسيت ،انا راح اصعد
صعدت چابت الموبايل وردت ،خابرت على فقار ما رد ومن خابرت على حق وفتحت سبيكر كل ضنه راح نسمع خبر حلو يفرحنة عكس الواقع
المر عكس نبرة صوته وذيج الچم كلمة الخلن صوتنة يطلع بلاية استيعاب ،بعدم تصديق لطمنه نحلف بيه الگاله صدگ ...
⊱━━━━⊰✾⊱━━━━⊰
عجبني تصرف استبرق ولو انكتلت بس ميخالف
حق اتوقع محاجيته ميمنة
ما اتخطى ريام وعزام
عيوني انتهن من البچي عليهم
اسفة اذا كنت سبب بنزول دمعة من عيونكم
الاحداث بدت تدگ بالگلب احس اختنگ كل ما جاي نتقدم بارت ..
