رواية ديون النبض الفصل الثامن والثلاثون 38 بقلم مروه صياح


 رواية ديون النبض الفصل الثامن والثلاثون 

بعد ما مجد دخل وشافني أنا وياسين، وأنا حاضناه وهو حاطط راسه على صدري، فضل واقف مكانه مستغرب، وكأنه مش فاهم إيه اللي بيحصل قدامه.

مجد: هو بابا تعبان؟ إيه اللي حصل؟

افتكر إنه من ساعة ما ساب باباه إمبارح بالليل ما شافوش، فقرّب منه بسرعة، ومسك إيده يتحسس حرارته، وبعدها حط إيده على راسه بهدوء، ولما لقى جسمه طبيعي، بدأ يفكر.

معقولة بابا يكون زعلان؟ ولا يكونوا اتخانقوا سوا؟

هز راسه كأنه بيحاول يطرد الأفكار دي من دماغه، وبعدها افتكر إنه لما قابلني الصبح، كنت لوحدي، وإن باباه ما نزلش معايا

أكيد عدّى عليه اللي حصل... أكيد كان متضايق.

هو عارف أبوه كويس، وعارف قد إيه بيخاف عليه، خصوصًا إنه طول الليل ما نامش من كتر التفكير في نفسه، وفي اللي حصل، وفي القرار اللي أخده.

بس ما كانش فيه وقت يسمح له يقف كتير عند أفكاره، فتحرك هو وحازم وراحوا يصلّوا.

وبعد ما رجعوا، حازم بص لمجد وقال له:

حازم: مجد، أنت ما فطرتش، وإحنا كمان ما كملناش قعدتنا بتاعة إمبارح. أنا عايز أقعد معاك، مش كصهر أختك، لكن كأخوك. عايزك تحكيلي وتكلمني وتقولي مالك.
زي ما أنا كمان هقعد مع وعد، وعايز أسمع منها هي كمان إيه القرار اللي أنتوا أخدتوه مرة واحدة إنكم تبعدوا عن بعض، وكأن كل اللي كان بينكم ده ما كانش حب!

مجد بص له بملامح جامدة، ورد بحسم:

مجد: حازم، بعد إذنك، الموضوع ده خلاص اتقفل. لا أنا ولا غيري هيتكلم فيه تاني. وبعد إذنك، ده موضوع شخصي، وأنا مش هسمح لأي حد يفتحه معايا.

حازم بص له وسكت لحظات، وبعدها قال بهدوء:

حازم: براحتك يا مجد، بس على الأقل من حقنا إننا نفهم.

وسابه ودخل شقتنا، بينما مجد رجع شقة ياسين.

في اللحظة دي، كانت رغد موجودة جوه، قاعدة لوحدها وسرحانة في اللي حصل.

أول ما شافت مجد، قامت بسرعة وقربت منه.

رغد: مجد، جيتوا من الصلاة؟

هز راسه من غير ما يتكلم، فقربت منه أكتر، وبصت له بحنان أخت بتحاول تفهم وجع أخوها.

رغد: مجد، أخويا حبيبي، أنا عايزة أعرف مالك.

مجد بص لها بضيق وقال:

مجد: رغد، لو هتفتحيني في موضوع إمبارح، أنا هسيب البيت وأخرج.

رغد: يا مجد، إحنا عايزين نعرف أنت مالك، وكمان وعد مالها إيه؟

مجد: يوووووه! هو أنا مش قلت محدش يفاتحني في الموضوع ده؟ يعني أرجع الفيلا تاني علشان ترتاحوا؟

رغد: خلاص يا مجد، خلاص... كفاية إنك جنب بابا.

سكتت لحظة، وبعدها قالت بقلق:

رغد: على فكرة، بابا تعبان.

مجد بص لها بسرعة، واتغيرت ملامحه.

مجد: تعبان؟ تعبان إيه؟

رغد: بابا كانت حرارته عالية جدًا، ولما دخلت عليه لقيت جسمه بيرتعش. أنت عايز تقول لي إن اللي حصل ده مش هيأثر عليه؟ أنت عارف بابا عقله وقلبه معاك، وهيفضل طول عمره يتعب بسبب خوفه عليك.

ما استناش يسمع منها أكتر من كده، وسابها ودخل بسرعة.

دخل مجد الأوضة، ولما شاف المنظر قدامه، وقف مكانه.

أنا وياسين كنا لسه نايمين زي ما إحنا، وهو بين إيديا، وأنا حاضناه بحنية، كأنه طفل صغير محتاج الأمان.

فضل مجد واقف يبص لنا، لكن المرة دي ما قدرش يمنع دموعه.

نزلت دموعه من غير ما يحس، وهو مش قادر يستوعب اللي شايفه.

يا ترى يصدق إيه؟

يصدق الحنية اللي شايفها مني تجاه أبوه، والاهتمام اللي لسه موجود جوايا رغم كل اللي حصل؟

ولا يصدق إن حبي ليه من البداية كان مجرد خدعة وكذبة؟

فضل واقف، والدموع بتنزل من عينيه، وهو بيقول لنفسه:

أنا حبيتك بجد... مش قادر، مش قادر أفكر في أي حاجة غير فيك.

لكن أفكاره اتقطعت لما حس بإيد حازم على كتفه.

لف وبص له، فلقى ماما وحازم ورغد واقفين حواليه.

في ثواني، مسح دموعه وحاول يرجع لملامحه الطبيعية، لكن حازم كان واخد باله من كل حاجة.

حازم: أنا مش عارف أصدقك يا مجد. الحالة اللي أنت فيها دي بتقول عكس كل الكلام اللي قلته إمبارح. أنا لا مصدقك، ولا فاهم إيه اللي حصل بينكم.

مجد بص له، فكمّل حازم كلامه:

حازم: أنا عارف أختي كويس، يا مجد. أختي بتحبك.

مجد رد بحدة:

مجد: أختك ما بتحبش غير نفسها، وأنا كنت غبي إني صدقتها.

حازم بص له بذهول، وكأنه مش مصدق إن الكلام ده طالع منه.

حازم: إيه اللي أنت بتقوله ده؟ أنت بتتكلم عن وعد كده؟ وعد اللي طول عمرها عايشة علشان غيرها؟ وأنت بنفسك شفت ده بعينك!

مجد: بكرة الزمن هيثبت لك كلامي.

وفي اللحظة دي، بدأ ياسين يفوق.

أول ما فتح عينيه، مجد جري عليه، ومسك إيده بحنان.

مجد: بابا، قولي أنت عامل إيه دلوقتي؟

وطّى راسه وطبع قبلة على إيده، فبص له ياسين بابتسامة هادية وقال:

ياسين: أنا كويس يا مجد.

لكن عينيه كانت بتقول كلام كتير، كلام ما قدرش يطلعه بصوته.

على صوتهم حواليا، بدأت أفوق أنا كمان.

فتحت عيني، وأول ما شفت مجد قاعد جنب ياسين، قلبي دق بسرعة، وحسيت إن كل حاجة جوايا اتلخبطت من مجرد وجوده قدامي.

عدّلت قعدتي بهدوء، وبعدها بصيت لياسين وسألته:

وعد: عامل إيه دلوقتي يا ياسين؟

ياسين: الحمد لله، أحسن.

ابتسمت له ابتسامة هادية، وقلت بعتاب خفيف:

وعد: ينفع كده؟ تخضّنا عليك! أنت عارف أنت عندي غالي قد إيه؟

بص لي بحنان ورد:

ياسين: وأنتِ كمان يا وعد. تعرفي إنك عندي زي رغد بالضبط، ويمكن أكتر.

الكلام ده لمس قلبي، لكني ما حبيتش أطوّل في اللحظة دي، فقمت من مكاني وقلت له:

وعد: أنا كده اتطمنت عليك. رغد، بعد إذنك، حضّري له فطار كويس، وأنا هبقى أعدّي عليك تاني علشان أطمن عليك.

كنت لسه هتحرك، لكن حازم وقفني.

حازم: استني يا وعد.

مسكني من إيدي، فوقفت جنبه وبصيت له باستفهام.

وعد: نعم يا حازم؟

بص لمجد وقال له:

حازم: مجد، بعد إذنك، إحنا عايزين نعرف في إيه بالضبط؟

رفعت عيني لمجد، وفضلت مستنية رده.

كنت مستعدة أقول كل حاجة، كل اللي حصل، وكل اللي وجعني، لكن رد فعله صدمني.

بص لي مجد، وبعدها رجّع عينيه لحازم وقال ببرود:

مجد: في إيه يا حازم؟ هو الحب بالعافية؟ أنا كنت غلطان وصححت غلطي.

وبعدها ضحك ضحكة قصيرة، وكمل:

مجد: آه، بالمناسبة، كلها أيام بسيطة، وهعزمكم على فرحي.

في اللحظة دي، حسيت إن الأرض بتتهز من تحتي.

ما قدرتش أستحمل أكتر من كده، اتحركت بسرعة وجريت على أوضتي، وقفلت الباب ورايا، وبعدها انهرت في العياط.

كنت بحاول أكتم صوتي، لكن الوجع كان أكبر مني.

هتتجوز يا مجد؟ بالسهولة دي؟

طب وأنا؟ أنا أعمل إيه بكل الحب اللي جوايا ده؟

بره الأوضة، كانوا كلهم واقفين مصدومين من كلامه، ورغد قربت منه وهي مش مستوعبة اللي سمعته.

رغد: مجد، أنت بتقول إيه؟

مجد: اللي سمعتيه يا رغد. أنا هتجوز سارة. على الأقل أنا عارفها كويس من زمان، وعارف مميزاتها وعيوبها. إحنا اتربينا مع بعض، ومع الوقت أكيد هحبها. وإن شاء الله خلال فترة بسيطة هسافر أنا وهي.

ياسين اتنرفز من كلامه، وبص له بعتاب واضح.

ياسين: بعد كل ده يا مجد؟

مجد قرب منه ومسك إيده، وقال بنبرة حاول يخليها مطمّنة:

مجد: ما تقلقش عليّا يا بابا. أنا خلاص عرفت طريقي كويس قوي. صدقني، أنا عارف أنا عايز إيه.

لكن هل كان فعلًا عارف هو عايز إيه؟

ولا كان بيحاول يقنع نفسه قبل ما يقنع اللي حواليه؟

عدّت الأيام، وكل واحد فينا حاول يرجع لحياته من جديد.

من برّه، كنا بنتعامل بشكل طبيعي، وكل واحد مشغول في حياته، لكن الحقيقة إن كل واحد فينا كان بيخوض حربه لوحده.

كنت بشوف مجد، وأحاول أتصرف عادي، وهو كمان كان بيتعامل طبيعي وكأن مفيش حاجة حصلت بيننا.

لكن أول ما كل واحد فينا بيخلو بنفسه، كان كل شيء بيرجع من تاني.

الذكريات، والوجع، والأسئلة اللي مفيش إجابة عليها.

يوم ورا يوم، بدأت أقول لنفسي إن لازم أشوف مجد بالصورة اللي أنا عايزاها، وإن ما ينفعش أسيب نفسي أضعف كل مرة أشوفه فيها.

لكن في يوم، وأنا ماشية في طرقة المستشفى، قابلت د. جيهان.

وقفت قدامي وبصت لي وقالت:

د. جيهان: عايزاك يا وعد.

وقفت قصادها، وبصيت لها بتعب وقلت:

وعد: حضرتك عايزة إيه تاني؟ مش ده كان هدفك؟ هو خلاص كرهني، وهيتجوز بنت أخوكي.

د. جيهان بصت لي بهدوء، وبعدها سألتني:

د. جيهان: وأنتِ متأكدة إن مجد هيعمل كده؟

بصيت لها باستغراب.

وعد: يعني إيه؟

د. جيهان: يعني هو قال كده، لكن لحد دلوقتي هو لسه بيعارضني ومش موافق على الجواز.

اتسعت عينيّ من الصدمة، وبصيت لها وأنا مش قادرة أستوعب كلامها.

وعد: إزاي؟

د. جيهان: أنا بقولك الحقيقة يا وعد. هو عايز يبيّن لك إنه طبيعي، وإنه اختار طريقه ومكمّل في حياته، لكن لحد دلوقتي هو زي ما هو.

فضلت باصة لها، وكأنها فتحت قدامي باب كنت فاكرة إنه اتقفل خلاص.

مجد لسه رافض؟

يعني كل الكلام اللي قاله، وكل محاولاته إنه يثبت إنه نسيني، كانت مجرد محاولة علشان يبان إنه قدر يكمل من غيري؟

بس لو كان لسه بيحبني فعلًا...

يا ترى إيه اللي يمنعه إنه يرجع لي؟

ديون النبض 🫀

بقلم الكاتبة مروة صياح ✍️🎯

د. جيهان بصتلي وقالت بهدوء:

د. جيهان: وعد، إحنا مش هنقف هنا. اللي حوالينا مش عايزين حد يلاحظ أي حاجة. تعالي مكتبي ونتكلم.

هزيت راسي ومشيت معاها، وفي اللحظة دي كان دكتور سمير لمحني وأنا ماشية مع د. جيهان.

دخلت المكتب، وبمجرد ما قعدنا، بصيت لها باستغراب وسألتها:

وعد: يعني إيه مجد لسه رافض؟

د. جيهان: يعني اللي أنا بقولهولك. أنا كل شوية أفتح معاه الموضوع من جديد، وهو لسه رافض. 
صدقيني يا وعد، هو لسه بيحبك، وكل اللي بيعمله ده محاولة منه إنه يثبتلك إنه يقدر يكمل من غيرك.

وطت راسها لحظة، وبعدها كملت:

د. جيهان: مجد دلوقتي في أضعف حالاته. صدقيني، هو ما سابنيش أنا بس، ده ساب كل حاجة، حتى شغله في الجامعة وإشرافه. قوليلي، إنتِ دلوقتي بتشوفيه زي الأول؟

سكتُّ، وبدأت أفتكر فعلًا إني ما بقيتش بشوفه في الإشراف زي زمان، ولا وجوده في الجامعة بقى زي ما كان.

وعد: طيب ليه؟ هو إيه اللي حصل؟

د. جيهان: روحي اسألي عن حجرة الكشف بتاعته، وشوفي إذا كان لسه مستمر فيها ولا لأ.

بصيت لها باستغراب أكبر.

وعد: طب وكل ده؟ هو بيتواجد فين؟

هزت راسها بأسى وقالت:

د. جيهان: بيهرب يا وعد.

الكلمة نزلت على قلبي تقيلة، ودموعي بدأت تتجمع في عيني، قبل ما تنزل من غير ما أقدر أمنعها.

وعد: أنا ما عملتش كل ده علشان يبقى بالحالة دي!

صوتي بدأ يهتز، وكملت وأنا بحاول أتماسك:

وعد: أنا مستحملة إنه يتجاهلني، وما يبصش في عيني، ولما يشوفني يتعامل كأني مش موجودة. مستحملة كل ده علشان كنت فاكرة إنه في الآخر هيقدر يقف على رجليه ويكمل حياته، حتى لو من غيري.
مش علشان أشوفه بالشكل ده! أنا ما عملتش كل ده علشان ألاقيه ضعيف ومش قادر يكمل حياته. أعمل إيه دلوقتي؟

د. جيهان بصتلي، وكان واضح إنها مش عارفة تقول إيه يخفف عني.

د. جيهان: أنا كمان مش عارفة أقولك إيه يا وعد، بس إحنا محتاجين دفعة قوية، تجبره فعلًا إنه يوافق على الجواز من سارة.

بصيت لها وسكتُّ.

في اللحظة دي، بدأت أفكر في الحل الوحيد اللي ممكن يخليه يتحرك فعلًا، حتى لو كان الحل ده هيوجعني أنا قبله.

رفعت عيني لها وقلت بحسم:

وعد: أوعدك إنه هيوافق، وكمان هيرجع يعيش معاكي.

د. جيهان بصتلي باستغراب.

د. جيهان: هتعملي إيه؟

وعد: مش أنا اللي هعمل.

وطيت راسي، وبعدها رفعتها تاني وقلت:

وعد: خلال أيام هكون مخطوبة لشخص بيحاول يقرب مني من فترة. بس الحقيقة إن مفيش حد دخل قلبي غير مجد، ولا فكرت إني أرتبط بحد غيره، حتى بعد ما بعدت عنه.

سكتُّ لحظة، وحاولت أسيطر على دموعي، وبعدين كملت:

وعد: كنت عايشة على أمل إنه لسه بيحبني، وإنه حتى بعد ما بعدت عنه، ممكن في يوم نقرب من بعض تاني.
كنت مستنية أي إشارة تطمني إن كل اللي بينا ما انتهاش. لكن بعد ما اتأكدت من مستقبله، وإنه ممكن يضيع كل حاجة بسبب اللي حصل، ما بقاش قدامي غير إني أساعده بالطريقة الوحيدة اللي أقدر عليها.

بصيت لها وكأني بترجاها تساعدني، وقلت:

وعد: وإنتِ كنتِ هتساعديني في ده.

د. جيهان هزت راسها وقالت بثقة:

د. جيهان: طبعًا يا وعد. صدقيني، أنا مش عايزة أحرمكم من بعض.

قمت من مكاني، واتجهت للحمام.

وقفت قدام المراية، وغسلت وشي، وبعدها فتحت شنطتي وبدأت أهتم بملامحي. حطيت روج وماسكارا علشان أخفي آثار العياط اللي كانت لسه ظاهرة على وشي، وفكيت شعري بهدوء.

ما كانش هدفي ألفت انتباه حد، ولا كنت بحاول أظهر بأحسن صورة علشان حد يعجب بيا.

أنا كنت عايزة حاجة واحدة بس...

لما مجد يشوفني، يعرف إني فعلًا اتغيرت وبعدت عنه.

خرجت من الحمام وكأني لبست ثوب جديد، ثوب وعد الجريئة اللي كانت بتفكر في نفسها، وبتحاول تواجه الدنيا بطريقتها، قبل ما الحب يغيّر فيها حاجات كتير.

---

خرجت من مكتب د. جيهان، واتجهت ناحية المحاضرات.

وفي الطريق، قابلني دكتور سمير، فوقفني وبدأ يتكلم معايا.

كنت برد عليه، لكن من بعيد لمحت مجد.

تقريبًا كان بقاله يومين ما شفتوش، أو بمعنى أصح، ما جاش الجامعة خالص.

هو راح فين؟ وليه غايب بالشكل ده؟

قبل ما أقدر أكمّل أفكاري، لاحظه دكتور سمير وناداه.

د. سمير: دكتور مجد!

مجد انتبه لصوته، وبص ناحيتنا، ود سمير قال:

مجد. سمير: ثواني يا وعد وراجعلك.

لكن قبل ما أقدر أرد، كان مجد اتحرك ناحيتنا، وخطواته أسرع ما تكون ناحية دكتور سمير.

وقف قدامنا، ورفع عينه ليا للحظة، وبعدها بص لدكتور سمير.

د. سمير: إيه يا دكتور مجد؟ مالك بقالك فترة غايب؟ إنت مالك؟

مجد: أبدًا، إنت عارف، ضغط الشغل.

كان بيتكلم بطريقة خلتني أحس إنه عايزني أسمع كل كلمة بيقولها، لكني فضلت ساكتة، وبراقب الموقف من غير ما أظهر أي اهتمام.

د. سمير: بس إحنا مش متعودين على غيابك بالشكل ده يا دكتور مجد. طمّنا عليك، أنا كمان كنت عايز أتكلم معاك في كذا حاجة.

مجد: وأنا تحت أمرك يا دكتور سمير. مستني حضرتك في عيادتي.

وبعدها بصلي وابتسم ابتسامة هادية.

د سمير: خلاص، عشر دقايق وأكون عندك.

قربت من دكتور سمير، وقلت له بابتسامة:

وعد: يا دكتور، حضرتك كنت عايز حاجة؟ علشان عندي محاضرة.

وبعدها التفتُّ ناحية مجد، وكأني واخدة بالي من وجوده للتو.

وعد: إزي حضرتك يا دكتور مجد؟ أخبارك إيه؟

مجد بصلي، ورد ببرود:

مجد: الحمد لله يا دكتورة وعد. أخبارك إنتِ إيه؟

وعد: كويسة الحمد لله. أتمنى إن حضرتك دايمًا تكون بخير. أنا متعودة أشوف حضرتك إنسان مجتهد ونشيط، وعمرك ما كنت بتغيب عن جامعتك ولا شغلك.

سكت مجد، وبصلي من غير ما يرد.

وفي اللحظة دي، دكتور سمير بصلي وقال:

د. سمير: وعد، ممكن لما تخلصي محاضرتك أوصلك؟

ابتسمت له وقلت:

وعد: طبعًا يا دكتور، هنتظر حضرتك.

ابتسمت له ابتسامة عريضة، وبعدها استأذنت ومشيت.

كنت حاسة بالنار اللي بتغلي جوا قلبي وقلبه، لكني ما كانش قدامي حل غير إني أكمّل في الطريق اللي اخترته.

أما مجد...

فكنت عارفة إن اللي شافه قدامه مش هيكون سهل عليه، خصوصًا بعد ما كان متخيل إني لسه واقفة مكاني، مستنياه يرجع.

وفعلًا، خلصت محاضرتي، ودكتور سمير وصلني.

---

بعدها بثلاث أيام، قررت أجمع العيلة كلها.

قعدنا أنا وماما وحازم ورغد وياسين، وبصيت لهم وقلت:

وعد: أنا جمعتكم النهارده علشان عايزاكم في موضوع مهم جدًا.

بصيت لياسين وسألته:

وعد: هو مجد فين يا ياسين؟

ياسين: في شغله.

وعد: متأكد إنه في شغله؟

بصلي باستغراب وقال:

ياسين: لما بسأله، بيقول إنه في شغله.

وعد: طيب، فاضل له كتير؟

ياسين: مش عارف، ممكن يكون قدامه ساعة ولا حاجة.

هزيت راسي وقلت:

وعد: تمام.

ياسين: إنتِ عايزاني في إيه يا وعد؟

وعد: لأ، ما أنا مش هقدر أتكلم في الموضوع اللي عايزاه ومجد مش موجود معانا. مش إحنا كلنا مع بعض؟ مش إحنا أسرة واحدة؟ ولا هو خلاص افترق عن أسرتنا؟

ياسين سكت، وبصلي بحزن، وكأنه فهم إن الموضوع أكبر من مجرد قعدة عائلية عادية.

وبعد حوالي ساعة، اتجمعنا مرة تانية.

حازم بصلي وقال:

حازم: إنتِ عايزة إيه يا وعد بالضبط؟ إيه الموضوع اللي عايزة تتكلمي فيه؟

بصيت لكل اللي قاعدين، وبعدها أخدت نفس وقلت بصراحة:

وعد: أنا ما بعرفش ألف وأدور في الكلام، فهقول لكم اللي عندي على طول.
فيه شخص من فترة بيحاول يقرب مني، وأنا كنت واخدة بالي من ده، بس كنت مترددة. 
ومع الوقت، هو فتحني في موضوع الجواز وعايز يتقدم لي رسمي، وأنا بصراحة موافقة.

أول ما خلصت كلامي، ساد الصمت.

كلهم فضلوا باصين لي، وكأنهم مش قادرين يستوعبوا اللي سمعوه.

أما مجد، فكان قاعد موطي راسه، ساكت، بيسمع كل كلمة بقولها.

رغد كانت أول واحدة تتكلم.

رغد: وعد، إحنا كنا فاكرين إن إنتوا الاتنين بتعاندوا بعض، لكن طلع الموضوع بجد؟
يعني إنتِ فعلًا هتبعدي عن مجد، وبتفكري في حياتك، وترتبطي بشخص غيره؟ أنا مش مصدقة!

بصيت لها باستغراب متعمد، وقلت:

وعد: هو في إيه يا رغد؟ هو أنا مش من حقي أبدأ حياتي؟ مجد بنفسه قال إني ما كانش بيحبني، وإنه كان مجرد تعود، وأنا كمان كنت فاكرة إن اللي بينا تعود مش أكتر من كده.

في اللحظة دي، مجد رفع راسه فجأة، وبدأ يضحك.

ضحكة غريبة، متقطعة، وكأن الكلام اللي سمعه مش قادر يستوعبه.

وبعدها ضحك بهستيريا، وبص لحازم وقال:

مجد: مش أنا قلت لك يا حازم؟ مسير الأيام تثبت لك كلامي!

وبعدين وجّه كلامه ليا، وصوته بدأ يتغير:

مجد: هو أنت مش كنت معترضه علي فكره الجواز عشان دراستك ومذاكرتك ايه اللي اتغير...
وبص لحازم وقال:
أختك لما عرفت إني سبت كل حاجة، وبقيت زي أي شخص عادي، مش دكتور مجد اللي كانت قربت منه، اكتشفت إن مصلحتها ما بقتش معايا. بدأت تبعد وترفضني بالتدريج.

سكت لحظة، وبعدها كمل بسخرية:

مجد: لكن لما لقت إن فيه مصلحة تانية، وإن فيه حد ممكن يوفر لها اللي هي عايزاه، قررت تبدأ حياتها من جديد.

رفع عينه ليا، وبصلي نظرة وجعتني أكتر من كلامه.

مجد: يا ترى بقى العريس ده دكتور سمير؟

ما رديتش، وفضلت باصة له في صمت، فكمّل كلامه:

مجد: بس تعرفي؟ معاكي حق. الفرق في المستوى فعلًا واضح، وأي حد بيبصلي وبيبص له هيعرف إن مستواه أعلى مني بكتير. عربية وفيلا، غير مكانة أبوه الاجتماعية.

اتغيرت ملامحه، وبصلي بوجع وغضب، وبعدها قال:

مجد: إنتِ فعلًا لعبتيها صح يا وعد... لكن اللي إنتِ ما تعرفيهوش، واللي كنت مخبيه عنك طول الفترة اللي فاتت دي كلها، إني أنا اللي ضحكت على نفسي قبل ما أضحك عليكم كلكم.

سكت لحظة، وكأنه بيحاول يلمّ شتات نفسه، وبعدها كمل بصوت اتغير تمامًا:

مجد: كنت بحاول أنساكي، وكنت بحاول أقنع نفسي إني ما حبيتكش، وإن كل اللي كان بينا مجرد وهم، لكن الحقيقة...

رفع عينه ليا، وكان الشوق اللي فيها أوضح من أي كلام ممكن يقوله، وصوته بدأ يرتجف وهو بيكمل:

مجد: الحقيقة إنك ما كنتيش بالنسبة لي مجرد حب يا وعد. إنتِ كنتِ عشقي، ونبض قلبي، وروحي اللي كنت حاسس إني بعيش بيها. كنت بحاول أبان قدامك قوي، وأثبتلك إنك ما بقيتيش فارقة معايا، لكن أنا كنت أضعف بكتير مما تتخيلي.

اتنفس بعمق، وكأنه بيحاول يمنع نفسه من الانهيار قدامنا، وبعدها قال:

مجد: لكن خلاص... إنتِ شايفة إنك وصلتي لهدفك، وإنك قدرتي تبعدي عني وتكملي حياتك. بس صدقيني، فيه حاجة كنت مخبيها عنك، وكنت مستني الوقت المناسب علشان أقولها لك.

بصلي بعتاب، وكمل:

مجد: كنت خايف أحكيلك، خايف تعرفي وتبعدي عني. كنت عايزك تحبيني لشخصي، مش لأي حاجة تانية. كنت عايز أتأكد إنك اخترتيني أنا، مجد، من غير ما يكون فيه أي اعتبار تاني.

سكت لحظة، وبعدها قال بمرارة:

مجد: لكن اللي اكتشفته إنك قربتي مني علشان دكتور مجد، مش علشان أنا. ولما حسيتِ إني بقيت شخص عادي في نظرك، وإن كل حاجة كنتِ شايفاها فيا اختفت، قررتي تبعدي.

فضلت واقفة مكاني، مش قادرة أنطق بحرف، وهو لسه عنده كلام كتير عايز يقوله.

مجد: اللي إنتِ ما تعرفيهوش إن مستوايا المادي أعلى بكتير من مستوى دكتور سمير، وإن فيه حاجات كتير كنت مخبيها عنك، ومستني الوقت اللي أقدر أحكيلك فيها كل حاجة بنفسي.

بصلي مباشرة، وبعدها قال:

مجد: تعرفي دكتورة جيهان اللي إنتِ ما بتطيقيهاش؟ دي أمي، ورئيسة قسم جراحة القلب. ومش بس كده، بإشارة مني ممكن حاجات كتير تبقى تحت إيدي، من فلوس وشركات ومستشفى...

اتجمدت ملامحي، وأنا بحاول أستوعب اللي بسمعه.

مجد: لكن أنا سبت كل ده على جنب، وضحيت بحاجات كتير علشان أبقى قريب منك. كنت عايزك تحبيني أنا، من غير أي حاجة تانية. وفي الآخر، اكتشفت إني كنت غلطان.

بصلي للمرة الأخيرة، والوجع اللي في عينيه كان أكبر من قدرته على إنه يخبيه، وبعدها قال بصوت هادي، لكنه كان موجع:

مجد: مبروك يا دكتورة وعد... مبروك.

وسابنا، وقام ومشي.

فضلت واقفة مكاني، ساكتة تمامًا، وكأن الكلام اللي سمعته خلاني أفقد القدرة على التفكير.

لكن الحقيقة إن اللي قاله مجد ما كانش جديد عليّا بالكامل.

أنا كنت سمعت الكلام ده قبل كده من دكتورة جيهان، وعرفت منها إن مجد لسه رافض الجواز من سارة، وإنه بيحاول يثبت للكل إنه قادر يكمل حياته من غيري.

وكل مرة كنت بتأكد فيها من الحقيقة دي، كنت بفهم أكتر إنها أم خايفة على مصلحة ابنها، وعارفة كويس إن حالته بقت صعبة، وإنه بيخسر نفسه وهو بيحاول يبعد عني.

لكن خلاص...

أنا اخترت الطريق ده، وما بقاش عندي استعداد أرجع عنه، حتى لو كان التمن إني أشوفه بيتوجع قدامي.

بصيت لكل اللي قاعدين، وقلت بصوت حاولت أخليه ثابت:

وعد: هو إنتوا كلكم كنتوا عارفين إن دكتورة جيهان تبقى والدة مجد؟ ليه خبيتوا عني الحقيقة دي؟

رغد بصتلي باستغراب، وردت بحدة:

رغد: وده يهمك في حاجة؟

بصيت لها، وحاولت أتماسك وأنا بقول:

وعد: أيوه، يهمني. على الأقل لو كنت عرفت من البداية، كان ممكن أفكر وأغيّر رأيي.

رغد بصتلي بذهول، وكأنها مش مصدقة اللي بتسمعه.

وكأني بأكد لهم كل الكلام اللي قاله مجد والصورة اللي راسمها عني...

رغد: أنا مش قادرة أصدق! الحمد لله إن أخويا بعد عنك.

قالت كده، وبعدها قامت وسابتني ومشيت.

فضلت باصة وراها وأنا حاسة إن كل كلمة قالتها زوّدت الحمل اللي على قلبي.

أما ياسين، فكان قاعد ساكت، بيبصلي بنظرات مختلفة تمامًا عن نظرات الباقيين.

هو ما كانش مصدق كلمة من اللي أنا قلته.

كان عارف إن فيه حاجة مش مظبوطة، وإن كلامي مش شبه وعد اللي يعرفها، وإن اللي بقوله مش هو الحقيقة اللي جوايا.

لكنه ما كانش عارف إيه الدافع اللي مخليني أعمل كده.

ليه بقول كلام عارفة إنه مش حقيقي؟

وليه بحاول أقنعهم إني قدرت أنسى مجد، وأنا مش قادرة حتى أواجه نفسي بالحقيقة؟

أما ماما وحازم، فكانوا لسه قاعدين في مكانهم، ملامحهم مليانة ذهول، ومش قادرين يستوعبوا اللي حصل قدامهم.

وأنا...

كنت عارفة إن مجد مشي وهو فاكر إني اخترت غيره علشان الفلوس والمكانة، وإنه دلوقتي شايفني بصورة يمكن تكون أبعد ما تكون عن حقيقتي.

لكن هل كنت أقدر أشرح له السبب؟

هل كان ممكن يسمعني لو قلت له إن كل اللي بعمله ده مش علشان أبعد عنه، لكن علشان أنقذه من نفسه؟ وعشان مستقبله...

ما كنتش عارفة.

كل اللي كنت متأكدة منه إن الطريق اللي اخترته بقى أصعب من الأول، وإن كل خطوة باخدها بعيد عنه، بتوجعني أكتر مما كنت متخيلة.


تعليقات