رواية ديون النبض الفصل التاسع والثلاثون 39 بقلم مروه صياح


 رواية ديون النبض الفصل التاسع والثلاثون 

بعد ما مجد مشي، وسمعت كلام رغد اللي جرحني، فضلنا كلنا قاعدين في مكاننا. ماما وبابا وياسين وحازم، وكل واحد فيهم كان باصص للتاني بذهول، وكأن محدش فيهم كان متوقع إن الأمور توصل لكده.

حازم بص لي وقال بهدوء، لكنه كان مستني مني إجابة واضحة:

حازم: أنا عايز أسمع ردك على الكلام اللي إنتِ سمعتيه.

بصيت له، وحاولت أبان ثابتة قد ما أقدر، وقلت:

وعد: أنا زي ما قلت لك، شايفة إن دكتور سمير إنسان مناسب، وده آخر قرار عندي. وعلى العموم، هما جايين النهارده علشان يتقدموا رسمي.

بصيت لياسين، وكان أكتر شخص محتاجة أسمع منه كلمة تطمني، فسألته:

وعد: ياسين، إنت هتكون موجود معايا، ولا هتسيبني؟

بص لي، والحزن كان واضح في عينيه، لكنه حاول يتكلم بهدوء.

ياسين: وعد، أنا من ساعة ما شوفتك وأنا قلت لك إن إنتِ زي رغد بالظبط. وحتى لو قرارك ده ضد اللي جوايا، مش هينفع أسيبك في يوم زي ده. أنا هكون موجود معاكي.

سكت لحظة، وبعدين كمل كلامه:

ياسين: مش معنى إني زعلان من قرارك إني أبعد عنك. إنتِ بنتي، وهفضل جنبك. لو إنتِ سعيدة، أنا كمان هكون سعيد. وبالنسبة لمجد، فأكيد ربنا هييسر له كل خير.

بص لي بحنان، وكمل:

ياسين: زي ما هو ابني، إنتِ كمان بنتي. والجواز لازم يكون بالتراضي بين الطرفين، مش بالضغط على حد. أنا أكيد ما كنتش هكون مبسوط لو حسيت إن إحنا كلنا ضغطنا عليكي، وإنك وافقتِ على مجد علشان ترضينا، مش علشان إنتِ عايزاه.

ياسين: دي حياتك يا وعد، وإنتِ اللي هتختاري تعيشيها إزاي. وطالما إنتِ شايفة إن قرارك صح، وإن دي مشاعرك الحقيقية، أنا مش هفرض عليكي حاجة.

فضلت باصة له، وحسيت إن كلامه بيوجعني أكتر من أي لوم ممكن أسمعه.

كان المفروض ياخد مني موقف، يزعل مني، أو حتى يبعد عني بعد كل اللي حصل. لكن رغم وجعه، ورغم إنه عارف إن قراري هيكسر قلب ابنه، فضل متمسك بيا، ورافض يسيبني أواجه اليوم ده لوحدي.

وده كان أصعب شيء بالنسبة لي؛ إن الناس اللي بحبهم كانوا بيحاولوا يحموني من وجعي، وأنا بنفسي كنت باخد القرار اللي هيخليني أعيش معاه.

وفي نفس اليوم، دكتور سمير جه بيتنا فعلًا، واتقدم لي رسمي.

كان عايز يعمل خطوبة كبيرة، لكني رفضت، ووضحت له إني لسه في فترة الدراسة، ومش عايزة أي حاجة تشغل بالي عن مستقبلي دلوقتي.

وعد: أنا شايفة إن كفاية نلبس الدبل وسط الأسرتين، وتكون علاقتنا رسمية. خصوصًا إننا بنتقابل كتير في الجامعة، ومش محتاجين نعمل احتفال كبير دلوقتي.

دكتور سمير احترم وجهة نظري، واتفقنا إن الخطوبة تكون بعد تلات أيام، في آخر الأسبوع.

كنت بحاول أقنع نفسي إن اللي بعمله هو القرار الصح، وإن كل حاجة هتستقر بعد ما مجد يبعد عني ويبدأ حياته من جديد.

لكن الحقيقة اللي كنت بهرب منها، إن مجرد التفكير في إني هلبس دبلة شخص غيره كان كفيل يخلي قلبي يتقبض من الوجع.

ومع ذلك، كملت في قراري.

لأن كل اللي كان شاغل تفكيري وقتها، إن مجد يتجوز سارة، ويرجع يكمل مستقبله وأحلامه اللي وقفها عشاني، من غير ما أكون أنا السبب في ضياع أي حاجة من إيده.

بعدها ب3 ايام...

كنت بدأت أتجهز لخطوبتي علي سمير...

لبست فستان هادي واتزينت بطريقه هاديه...
شعري مفرود علي ظهري....
في اللحظة دي، كانت ماما ماسكة إيدي وهي خارجة معايا من الأوضة، وحازم قرب مني، وبص لي بابتسامة هادية، كأنه شايف بنته الكبيرة وهي بتبدأ حياة جديدة.

لكن رغم ابتسامته، ما كانش سعيد بالشكل اللي المفروض يكون عليه. كان حاسس إن في حاجة غلط، وإن قراري مش طالع من قلبي زي ما بحاول أقنعهم، لكنه ما كانش عارف إيه السبب الحقيقي اللي وصلني لكده.

مسك إيدي، وأنا كنت نفسي أرفع عيني وأبص ناحية مجد، لكني كنت خايفة نظراتي تفضحني، وتكشف لكل الموجودين إن قلبي لسه متعلق بيه، وإن كل اللي بيحصل ده أبعد ما يكون عن اللي كنت بتمناه.

وفي نفس الوقت، كانت أسرة سمير موجودة، وإخواته البنات اتلموا حواليا، وكل واحدة فيهم قربت مني وهي بتبارك لي.

الزغاريد كانت مالية المكان، والأغاني شغالة، والكل بيتحرك في فرحة واستعدادات الخطوبة، بينما مجد كان قاعد بعيد شوية، ساكت، وكأنه اختار يفضل في مكانه علشان ما يضطرش يواجه اللي بيحصل قدام عينيه.

لكن مهما حاول يبعد، ما قدرش يمنع عينيه من إنها تدور عليا.

وأول ما سمير شافني، قام وقرب مني، ومسك إيدي، وشبك دراعي في دراعه، وبعدها قعد جنبي وهو في قمة سعادته.

أما أنا، فكنت موطيه راسي، مش قادرة أرفعها، ولا حتى أبص في وش حد.

فضلنا قاعدين مع بعض فترة، لحد ما بدأوا يجهزوا الدبل والشبكة.

كل حاجة كانت ماشية زي ما المفروض تكون في أي خطوبة، والناس حواليّ بتضحك وتهزر وتبارك، لكن جوايا كان في صراع محدش حاسس بيه غيري.

ولما جه وقت إن سمير يلبسني الدبلة، حسيت إن إيدي بتترعش.

بصيت للدبلة، وفضلت للحظات مش قادرة أمد صباعي ليه.

بيني وبين نفسي: إزاي هلبس دبلة شخص غير مجد؟ إزاي هقبل إن حد تاني يربطني بيه رسمي، وأنا لسه قلبي ما عرفش يخرج من حياة مجد؟

كنت حاسة إني مش قادرة أستحمل، وإن كل ثانية بتمر بتسحب مني جزء من قوتي، لكن ما كانش قدامي طريق أرجع فيه.

وفي النهاية، مدت إيدي، وسمحت لسمير إنه يلبسني الدبلة.

وبمجرد ما استقرت في صباعي، علت الزغاريد من جديد، وظهرت الفرحة على وشوش كل الموجودين.

كلهم كانوا فرحانين...

إلا أنا ومجد.

رفعت عيني من غير ما أقصد، وبصيت ناحيته.

لقيته باصص لي.

كانت عينيه ثابتة عليا، وفي نظرته وجع ما كنتش محتاجة حد يشرحهولي. أنا الوحيدة اللي عارفة هو بيحس بإيه، والوحيدة اللي عارفة قد إيه هو بيعاني وهو قاعد مكانه، بيتفرج على اللحظة اللي كان نفسه يعيشها معايا، لكن مع شخص تاني.

اتقابلت عيوننا للحظات.

وللحظة دي، حسيت كأني برتمي في حضنه، وبودعه للمرة الأخيرة، من غير ما حد في المكان يعرف إن بين النظرة دي والنظرة اللي قبلها حكاية كاملة، وحب لسه ما انتهيش.

كنت شايفة وجعه، وهو أكيد كان شايف وجعي، لكن لا أنا قدرت أتكلم، ولا هو قدر يعمل حاجة.

وبعد دقائق، سمير قرب مني أكتر، ومال ناحيتي وطبع قبلة على رأسي.

اتجمدت مكاني.

حسيت بحرارة شديدة، وافتكرت كل مرة مجد كان بيقرب مني فيها، وكل إحساس كنت بحسه وأنا جنبه، وكل لحظة كنت فيها مطمنة لمجرد إنه موجود.

لكن المرة دي، كنت قاعدة جنب شخص تاني، وفي وسط فرحة المفروض إنها تخصني، كنت حاسة إني بفقد أغلى حاجة عندي.

وفجأة، عيني راحت ناحية مجد.

كانت نظرته مختلفة. نظره غيره واضحه...

نظرة عمري ما شفتها في عينيه قبل كده.

غمض عينيه للحظة، وقبض إيده بقوة، وبعدها قام وقرب مننا بسرعة.

كان واضح إنه بيحاول يسيطر على نفسه، وإن في كلام كتير جواه نفسه يقوله، لكنه مش قادر ينطق بيه.

وقف قدام سمير، وبص له.

مجد: دكتور سمير...

سمير انتبه له، وبعد عني، وبص له باستغراب بسيط.

مد مجد إيده وسلم عليه.

مجد: مبروك يا دكتور سمير.

سمير: الله يبارك فيك يا مجد.

بعدها مجد رجع بص لي، ومد إيده ناحيتي.

مديت إيدي وأنا بحاول أتماسك، لكن أول ما إيده لمست إيدي، حسيت برجفة غريبة في قلبي.

كان إحساس مختلف، كأني بلمس إيده لأول مرة، وكأن جسمي كله بيحاول يفتكر إن اللمسة دي كانت يومًا من حقي، وإن الشخص اللي واقف قدامي ده كان أقرب لي من أي حد.

رفعت عيني وبصيت له.

مجد: مبروك يا دكتورة وعد. مبروك، ربنا يتمم على خير.

كان بيتكلم بهدوء، لكن إيده كانت ضاغطة على إيدي بقوة.

ضغطه دي وجعتني، مش من قوتها، لكن من المعنى اللي حسيت إنه وراها.

كأنه بيقول لي إن دي آخر مرة هيمسك إيدي فيها، وإنه رغم كل اللي بينا، لازم يسيبني أكمّل الطريق اللي أنا اخترته.

في اللحظة دي، كل اللي كنت عايزاه إني أرمي نفسي في حضنه، وأدفن وشي في صدره، وأفضل هناك من غير ما أتكلم.

كان نفسي أصرخ وأقوله:

بيني وبين نفسي: لأ يا مجد، ما تسبنيش! أنا ليك إنت، مش لحد تاني. أنا مهما حاولت أبعد، قلبي عمره ما عرف يختار غيرك!

لكن صوتي ما خرجش.

كل اللي قدرت أعمله إني فضلت باصة له، بحاول أحفظ ملامحه ونظرته، وأداري الوجع اللي كان بيزيد جوايا مع كل ثانية.

أما هو، فبص لي نظرة طويلة، نظرة حسيت فيها إنه رغم كل اللي عملته فيه، ورغم إني اخترت أبعد عنه بإرادتي، لسه مش قادر ينساني.

وكأنه بيقول لي من غير كلام إنه مش هيقدر يمسحني من قلبه بسهولة، وإن اللي بينا أكبر من إنه ينتهي لمجرد إني لبست دبلة شخص تاني.

وبين إيده اللي لسه ماسكة إيدي، وعينيه اللي كانت بتحاول تخبي كل اللي جواها، كنت حاسة إن في كلام كتير لسه ما اتقالش...

وإن الوداع اللي بيحصل بينا دلوقتي، يمكن يكون أصعب من أي فراق عشناه قبل كده.

لأن المرة دي، إحنا مش بنبعد عن بعض وبس...

إحنا بنحاول نتصرف كأننا ما بقيناش لبعض، رغم إن قلوبنا لسه ما قدرتش تصدق ده.

ديون النبض 🫀

بقلم الكاتبة مروة صياح ✍️🎯

اليوم ده، بالنسبة لأي بنت، بيكون يوم فرحة وسعادة، يوم بتبدأ فيه تحلم بحياتها الجديدة، وتفكر في المستقبل اللي مستنيها مع الشخص اللي اختارته.

لكن بالنسبة لي، اليوم ده ما كانش بداية حياة جديدة، كان أول يوم في الحداد على حب لسه عايش جوايا.

أنا دفنت حبي وهو لسه عايش.

دفنته جوا قلبي، ووقفت أتفرج على مجد وهو بيسيبني ويمشي، من غير ما أقدر أمد إيدي وأمسكه، أو حتى أقوله إنه ما يسبنيش.

كان نفسي أجري وراه، وأقوله إني مش عايزة غيره، وإن كل اللي حصل مش معناه إني بطلت أحبه.

لكن مجد مشي، وأنا فضلت مكاني.

والليلة دي كانت تقيلة على قلبي بشكل ما كنتش قادرة أتحمله.

ما كنتش شايفة دكتور سمير إنسان وحش، بالعكس، كان فيه صفات كتير أي بنت تتمناها في شريك حياتها. كان مهتم بيا، وبيحاول يقرب مني، وبيعمل كل اللي يقدر عليه علشان يسعدني.

لكن المشكلة ما كانتش فيه.

المشكلة إن قلبي ما كانش معاه.

قلبي كان اختار مجد، ولسه متمسك بيه، مهما حاولت أقنع نفسي بعكس كده.

عدت الأيام، وبدأنا كلنا نحاول نتعامل مع الوضع الجديد كأنه شيء طبيعي، وكأن الخطوبة دي كانت الخطوة اللي كان المفروض تحصل من البداية.

لكن الحقيقة إن مفيش حاجة جوايا كانت طبيعية.

وبعد فترة، عرفت إن مجد رجع الفيلا تاني، ورجع لحياته اللي كان عايشها قبل ما يعرفني.

كان بييجي يطمن على ياسين كل يومين تقريبًا، لكن زياراته كانت بالليل، بعد ما يخلص شغله.

أما باقي يومه، فكان بيرجع فيه لمجد اللي أنا عرفته في البداية؛ الدكتور اللي حياته مليانة مسؤوليات، واللي ما بيسيبش حاجة من غير ما يتابعها بنفسه.

رجع لعيادته، وشغله، والجامعة، والمستشفى، ورجع يتابع كل تفاصيل إدارته ومشروعاته بنفسه.

كان واضح إنه استعاد تركيزه وحماسه، وإنه بدأ يتحرك من جديد في الطريق اللي كان رسمه لنفسه.

وساعتها بدأت أفهم إن يمكن ابتعادي عنه فعلًا كان الدفعة اللي محتاجها علشان يرجع يكمل حياته.

وإن خطوبتي من دكتور سمير كانت بالنسبة له النهاية اللي خلت عنده سبب يبعد، ويوقف انتظار حاجة مش هتحصل.

الفكرة دي كانت بتوجعني، لكنها في نفس الوقت كانت بتخليني أتمسك بقراري أكتر.

كنت بقول لنفسي إن المهم إنه رجع لمستقبله، وإنه بدأ يحقق اللي كان بيحلم بيه، حتى لو أنا مش هكون جزء من الحلم ده.

لكن هل كنت فعلًا قادرة أتقبل إني أبقى بره حياته؟

ما كنتش عارفة.

كل اللي كنت متأكدة منه إن الأيام بدأت تمشي، وإن كل واحد فينا بيحاول يكمل طريقه، حتى لو الطريق ده مش هو اللي كان بيتمناه.

كنت بشوف دكتور سمير كل يوم تقريبًا في الجامعة والمستشفى، وكان بطبيعته بيحاول يقرب مني أكتر.

كان دايمًا يحب يمسك إيدي، وبعد ما أخلص محاضرة أو سيشن عملي، ما كانش بيفوّت الفرصة إنه يمشي معايا شوية.

وأنا كنت بحاول، على قد ما أقدر، أحافظ على المسافة اللي محتاجاها بيني وبينه، لكنه ما كانش بيديني فرصة أكون لوحدي كتير.

وفي مرة، وإحنا ماشيين سوا علشان يوصلني لآخر محاضرة في يومي، حط إيده على كتفي.

حاولت أبعدها بهدوء، من غير ما أجرحه أو أخليه يحس إني برفضه، لكن الحقيقة إن لمسته فكرتني بمجد.

كل حاجة كانت بتفكرني بيه.

طريقة قربه مني، واحتواءه ليا، والإحساس اللي كان بيملاني وأنا في حضنه.

كنت بحس إن مجرد لمسة من مجد كانت كفاية تخلي قلبي يدق بطريقة مختلفة، وإن وجودي جنبه كان بيخليني مطمنة حتى لو الدنيا كلها حواليا مش مستقرة.

لكن دلوقتي، بقيت بحاول أتجنب أي حاجة ممكن تفكرني بيه، مع إن كل حاجة تقريبًا كانت بتفكرني بيه.

كنت واضحة مع نفسي من البداية، وما كنتش عايزة أسمح لسمير إنه يقرب مني أكتر من الحدود اللي أنا قادرة أتحملها. ما كنتش عايزة أظلمه معايا، ولا أديه إحساس إن قلبي بدأ يتغير ناحيته، وأنا عارفة إن ده مش حقيقي.

ولما كنت برجع البيت، كنت بستنى الليل.

أيوه، كنت بستنى الليل بفارغ الصبر، مش علشان أنام وأرتاح من تعب اليوم، لكن علشان أقعد مع نفسي، بعيد عن عيون الناس وأسئلتهم، وأسمح لقلبي إنه يفتكر مجد براحتُه.

كنت بفتكر الشقة، وأول اللحظات اللي جمعتني بيه، وكل مرة قرب مني فيها، وكل مرة حسيت فيها إني في أمان لمجرد إنه موجود جنبي.

كنت بفتكر حضنه، وإحساسي وأنا بين إيديه، وارتجاف جسمي من شدة مشاعري ناحيته، ودقات قلبي اللي كانت بتزيد كل ما المسافة بينا تقل.

كانت ذكريات بتوجعني، لكني ما كنتش قادرة أستغنى عنها.

كنت برجع أعيشها في خيالي، وكأنها الطريقة الوحيدة اللي لسه بتخليني قريبة منه، حتى بعد ما قررت أبعد.

وكنت كل مرة أرجع أقول لنفسي إن الوجع ده لازم أستحمله، على الأقل لحد ما أتأكد إن مجد رجع فعلًا لطريقه، وإن مستقبله بقى أهم من أي حاجة تانية.

لكن مع مرور الوقت، بدأت ألاحظ حاجة تانية.

مجد كان بيتغير فعلًا، لكن مش بالطريقة اللي كنت متخيلاها.

بقى أكثر نشاطًا، وأكثر انشغالًا بشغله، وبقى واضح عليه إنه رجع يركز في كل مسؤولياته.

ولما كان بيشوفني أنا وسمير، كان بيتعامل معانا بكل طبيعية.

يسلم علينا، ويتكلم مع سمير، ويسألني عن دراستي، وأحيانًا يبتسم لي بنفس الطريقة اللي كان بيبتسم بيها زمان.

ما كانش بيحرجني، ولا بيحاول يبين إنه متضايق، ولا حتى كان بيخليني أحس إن وجودي بقى عبء عليه.

وده، بدل ما يريحني، كان بيوجعني أكتر.

لأني كنت كل مرة بشوفه فيها، بتمنى ألاقي في عينيه أي علامة تدل على إنه لسه بيفكر فيا.

كنت بتمنى يطوّل نظرته شوية، أو يسألني سؤال زيادة، أو حتى يبان عليه إنه متضايق من وجود سمير جنبي.

لكن مجد كان بيتعامل معايا بهدوء، وكأنه اتعلم إزاي يفصل بين اللي جواه وبين اللي بيظهره قدام الناس.

وبقيت أوقات كتير أشك إنه بدأ ينساني فعلًا.

كنت بحاول أكون طبيعية أنا كمان، وأرد عليه بابتسامة، وأتكلم معاه من غير ما أظهر أي حاجة من اللي جوايا.

لكن الحقيقة إن مجرد رؤيته مبتسمًا، ونشيطًا، وبيتحرك بين العيادة والمستشفى والجامعة، كان كفاية يخليني أحس براحة غريبة.

كنت سعيدة إنه رجع لحياته، وفي نفس الوقت موجوعة لأنه بقى قادر يعيشها من غيري.

ويمكن دي كانت أصعب حاجة بدأت أتعلمها في الفترة دي؛ إنك أحيانًا تتمنى لحد بتحبه كل الخير، حتى لو الخير ده هيخليه يبعد عنك أكتر.

ومع مرور الأيام، قربت امتحاناتي، وكانت سنة خمسة بتوصل لنهايتها.

لكن بالنسبة لي، ما كانش الموضوع مجرد نهاية سنة دراسية وبداية مرحلة جديدة.

كنت حاسة إن في حاجة تانية بتنتهي جوايا، وإن مجد فعلًا بدأ يبعد عني، وإن المسافة اللي كنت فاكرة إنها مؤقتة، بقت تكبر يوم بعد يوم.

ومع اقتراب الامتحانات، كنت بقعد مع نفسي كتير، وأفتكر دعمه ليا في دراستي، واهتمامه بمستقبلي، وإصراره الدائم إني أنجح وأوصل لكل حاجة بحلم بيها.

كان بيتعامل مع مستقبلي كأنه جزء من مستقبله، وكان حريص إني ما أضيّعش أي فرصة ممكن تساعدني أكون أفضل.

كنت بفتكر كلامه وتشجيعه ليا، وأتمنى لو كان موجود جنبي في الفترة دي، حتى لو مجرد وجوده كان هيديني إحساس إني مش لوحدي.

لكن الأيام ما بتقفش علشان حد، والامتحانات بدأت، وبدأت معاها أسابيع طويلة من المذاكرة والتوتر والتركيز.

وفي أوقات كتير، كنت بشوف مجد موجود في الجامعة، وأحيانًا بيكون ضمن المشرفين على الامتحانات.

كنت أول ما أدخل المكان، عيني تدور عليه من غير ما أحس.

كنت بدور عليه وسط الموجودين، ولما ألاقيه، أفضل أراقبه من بعيد.

وأقول لنفسي:

يمكن يبص لي دلوقتي.

يمكن عيوننا تتقابل.

يمكن يلاحظ إني واقفة هنا، ويفهم من نظرتي إني لسه بحبه، وإن كل اللي عملته ما قدرش يغيّر حاجة جوايا.

لكن في كل مرة، كنت بلاقيه مشغولًا بحاجة تانية.

مرة ماسك تليفونه وبيتابع شغله، ومرة فاتح اللابتوب وبيراجع حاجة تخص المستشفى أو الشركة، ومرة بيتكلم مع حد من المسؤولين عن الشغل اللي تحت إيده.

كان دايمًا معاه اللابتوب، وتليفونه ما بيفارقش إيده، وكأنه قرر يملأ كل دقيقة في يومه بحاجة تشغله عن أي حاجة تانية.

وكل ما كنت أشوفه بالشكل ده، كنت بحس إنه بيبعد أكتر.

لحد ما جه آخر يوم في الامتحانات.

كنت ماشية في الجامعة، وعارفة إن السنة دي قربت تخلص، وإن المرحلة اللي كنت بشوف فيها مجد بشكل شبه يومي ممكن تتغير بعد كده.

وفجأة، لقيت نفسي مشتاقة أشوفه أكتر من أي وقت فات.

ما كنتش عايزة أمشي من الجامعة من غير ما أشوفه، حتى لو لدقايق، وحتى لو مجرد نظرة من بعيد.

فضلت ماشية لحد ما قربت من حجرة الكشف.

وقفت للحظة، وبصيت للمكان اللي ارتبط عندي بذكريات كتير.

رجعت بذاكرتي لأول مرة دخلت فيها المكان ده، وأول مرة جمعتني بمجد لحظة ما كنتش أعرف إنها هتفضل محفورة جوايا بالشكل ده.

افتكرت كل حاجة حصلت بينا، وكل موقف قربنا من بعض، وكل لحظة حسيت فيها إن وجوده في حياتي غيّر حاجات كتير جوايا.

وقفت مكاني، وعيني على باب الحجرة، وقلبي بيدق بسرعة.

كنت مشتاقة له.

مشتاقة أشوفه، وأسمع صوته، وأحس للحظة واحدة إن المسافة اللي بينا مش كبيرة بالشكل ده.

لكن السؤال اللي كان بيلف في دماغي وأنا واقفة قدام الباب:

يا ترى، لو شافني دلوقتي، هبقى لسه نفس وعد اللي كانت في عينيه زمان؟ ولا خلاص، بقيت مجرد واحدة من الماضي بالنسبة له؟

فضلت واقفة شوية، مترددة بين إني أدخل، وإني أرجع وأمشي قبل ما أضعف قدامه من جديد.

لكن شوقي ليه كان أقوى من قدرتي على الابتعاد.


تعليقات