رواية خلخال مشوه الفصل التاسع والثلاثون بقلم زمرده
تعال أرجع
مد چفك عليه بساع
والزم روحي لا تطلع
انا بوجهك اصيرن زين
دوة الدكتور ما ينفع
°حواري°
مصيبة الخلتني من صدگ ما اعارف اوگف على حيلي ،گعدت هبد على الگاع ،اعيط بعالي
صوتي وما گدامي غير حال اخوي هسة ،شصار بيه
صيحت اللطم على وجهي من طبت عمة زهرة تركض تسأل عليها واخترعت من حالنه
زهرة : خايبات شكووو ،ولچن شبيچن احچن ؟
كضتني من ايدي تريد ما اللطم وانا مو بس خسرت بت عمي ،خسرت نضر عينه ،خسرنه عيون فقار الما يگدر بلاياها
_ ماتتت بصائررر ،ماتتت حق يگول ماتتت ،ولچ عمة ماتتت عيون أخوووي
بهتت ما مصدگة ،واندارت لبركة الابد ما بدرت منها حركة ،عكسنة ابد چانت هادئة ومن شافت عمة تباوع الها همست بصوت يرچف تأمل بروحها وخلتنه نتأمل وياها
بركة : لا عمة أختي ما تموت ،حق مفتهم غلط ،أي مفتهم غلط
مسحت عيوني
_ نخابرهم ؟
بركة : أي ،أي خابريهم
دنگت للگاع شلت الموبايل ،دگيت على حق ارچف ما رد ،ومرة الثانية من فتح خط وسمعت صوت
أخوي
صوته وصل الگلبي گبل اذني ،نبرة صوته المكسورة چانت جواب ،صوته اليرچف رچف طولنه
فقار : ماتت شني ،ولكم شنييي ماتت ،هدونيي ولكم اموتن وراها والله
ماگدرت حتى اگولن الو وطاح من ايدي الموبايل وانداريت على صوت عيطتها وكل كلمة تحجيها
تخلي صوتنة يعله وي صوتها
بركة : يمة أختييي ،ما تمووت ،اختييي ماتمووت وتعوفنه ،شلووون تموت عمة بعدها زغيرة شلووون تمووت
تملخ بروحها وعمة كاضتها تريد تسيطر عليها وهي تخبلت ،تلطم وترد تصيح "بعدها زغيرة"
طش اصعب خبر مر علينه ،مشينا لبيت چدي مكسورات مهومات الحزن مغيم علينه ،تلگتنه غاية تبچي وتناشغ وي كل كلمة تحجيها
غاية : صدگ ماتت ،گلولي لا عليكم الله
مابينة الوحده گدرت تگول "أي" ،اصعب كلمة حسيتها بكل حياتي ،انعگد لساني لو گدر ينطقها ..
يا ذيج الشوفه التمنيت روحي عمية ولا شايفتها
طبوا ،بس شايليها ٫"بتابوت" طلعنه نتراكض ،لا البينه همت لستر ولا الهمت لصوتها الطلع
العياط العيطناه ما چان يشفي غليلنه ولا يشرح كبر خسارتنه.
ما گدروا حتى يطببوها جوه والتمينه عليها بالحوش
من كل كتر حاضنه تابوتها وحده ومن بيناتنة طب
محني الظهر چن كبر دهر بساعات قليلة عساهن
لا انحسبن علينه ،مد طوله وي طول تابوته بالگوات سحبوه حتى يگدرون يطببونه جوه
دنگوا شالوها وهو مثل الطير المفرفح وراهم مشى ولهناك بنص الهوسة انتبهت على ميمنة طبت العيون ما تنشاف من كثر البچي الباچيته ،بأيدها الطفل شايلته حطته بأيد عمة خالدة وركضت طايحة منها عباتها شمرت روحها ويانة تلطم مگابله اخوانها
ميمنة : هااا يا تربات ايدييي ،ولج يا بتي گبل أختيي شلون تمشين للموت ،چا واحنة ،چا وشبابج بصائررر
وي كل كلمة تحجيها بعتاب الها صوت عياطنة يعله اكثر ،حاضن تابوتها بأثنين ايده ،حضن أخير يعارف بروحه راح يصير وحيد من بعدها ،يحجي وياها چنها عايشة يسولف وي خشب التابوت چن تسمعه من الفراغات البيه ..! ! !
مابيهم أحد گدر هل مرة يدنگ يعين الثاني يشيلون خشبات محتضنه چسد أنسانة بعمرها ما
أذت أحد راح تصير ذكرى صعب تتسولف من ألالم العشناه بفقدانها
فقار : خلوهااا ،بس اشبع منها ولكم بعدني ما مفتهم شي من ايامي وياهاا ،وين تردون تمشون بيهااا ،لااا صخر هدنييي
يريد يصيح بس ما يگدر ،چن اغلال محاوطات رگبته مثگلات حتى النفس عليه هداه صخر وباوع للولد بمعنى هدوه ،وهو احس بيه من تمدد بصفها چن بشر يگول للزمن، اوگف عدك لا تمشي ساعاتك حيل ما ضل بعد ...
هو بصفها واحنة محاوطاتها وعمامي والولد واگفين حتى جدي بچه عليها ،شالوها گدامنه ،مشوا ببصائر للنچف ،طلعوها بكلمة "لا اله الا الله" وگبل ساعات هم طلعت بس بكلمة "تردين بالسلامة" بس ما ردت
گعدت بالحوش اباوع لخبصتهم برة ،اشهگ بالبجي والبنات مو اقل من حالي ،ميمنة عقل ما ضل براسها طلعت تركض وراهم كضاها صخر ودنگ شال الحجاب من الگاع حطاه، على راسها وهي مفرفحة بأيده تخاف لا يمشون ويخلوها و وراها طلعت بركة تتوسل بيهم ياخذوها ،طب حق على صوتها ،جرها من بين الهوسة واخذها وياه
°ليث°
تگابلنه عليه انا وعزيز نريده بس يگوم ،طلعت علينه الشمس وبعدنه ما دافينها وهو مثل الفاقد عقله ماد روحه باللحد
فقار : دفنوني وياهااا ،ادفنوني وياها ولكم انا بلايها ما اعيشش
عزيز : كااافي فقار گوم
جراه حيل وهو گد ما خاوية روحه بساع اجه بأيده وانا ما استحملت ذيج اللحظة ودرت وجهي من نزلوها ،باوعتله مشتعلة روحي بنار بس مو مثل النار الشابة بروحه هسة ،يشيل من التراب ويحيط على رأسه
فقار : لا تدفنوهااا ،بعدني ما شبعااان منهاا ،ولكم هاي عيوني ،دفنتوا عيونييي
°حواري°
گمت امسح دموعي بردان ثوبي اباع لجدة طبت تباوع بالوجوه ونسوان أل خبير وراها ،صاحت ما
مصدگة
غضة : خايبات صدگ ،ولچن ماتت اخيتچن ،ماتت بصائررر ،حاجنييي ولچن
بأيدها الجاهل رفعته تشوفه لجدة تبچي وبعالي صوتها تحجي
هيوفة : يتمت ابنهااا جدة وهو ما شام ريحتها حتى ماتت عيون فقار وخلته وحده
گب المصايح مفجوعة الگلوب ،طر الصبح علينه وما غفت كل العيون وكل المصايب العشناهن ما يجن ولا ذرة الهاي ...
رفعت راسي بالگوات اشوفنها جاي احس بغواشة بعيوني مو طبيعية
رقية : بس حاجيني وين الدولاك مال ماي النسوان كتلهن العطش
گامت بصوت مبحوح تحاجيها
غاية : انا ماشية اطلعهن
مشت ولحگتها رقية وانا رديت دنگت ،اسكت وترد تبچيني نعاوي جدة
غضة : هاا يالندفن ربيع صباااج ،هااا يا بصائر يا ام الوليد ياحبوبه ،هااا يا روح وليدنه يالفقيرة ،دفنووج وما شفتج يابعد حيلي
ماده رچليها وتبچي والنسوان داير ما دايرها البيت يروچ كل الجايتنة لابسات
اسود الا احنة أهل العزاء ما بينة وحدة حاطة ثوب اسود عليها ولوما عمة خالدة مذكرتنة هم فلا چان فطنه
گمت سانده روحي على نسمات ومشيت انا وياها للبيت اجيبلي هدوم ،وبس طبيت
حسيت بگلبي انعصر عصر وانا اباوع لمكان وگفتهم ووداعهم الچانوا ما يعارفون بيه هذا الأخير
نسمات : شني حواري شبيچ ؟
حطيت ايدي على گلبي وگعدت ابچي چن جاي تنعاد ذيج اللحظة گدام عيني
نسمات : اسم الله الرحمن ،ولج حاجيني شبيج ؟
أشرت بأيدي
_ هنااا حضنها وگالها رديلي ،بس مااا ردت ،ما ردت
نشغت اكمل
_ شلون راح يعيش أخوي ،شلون تخلص حياته وهي مو بيهاا ؟
نسمات : گومي فدوة العيونج موزين عليج هيج والله لا يصير بيج شي وما عايزين احنة
گمت رچليه يرچفن ،طبيت للغرفة فتحت الكنتور ادور بهدومي السود الضلن يم اهلي ودموعي ابد ما وگفن كضيت الثوب الاسود بأيدي
طبت تباوعلي
نسمات : عبالي بدلتي
_ شلون اللبس الاسود عليها ،ما يطيني گلبي والله
باوعتلي حايرة
نسمات : جا شلون ؟
حضنت الثوب الصدري ابچي وبالگوات على روحي نزعت ثوبي الالوان ولبست الأسود طلعت
شال حطيته على راسي وهستونه طلعنه من الغرفة وسمعنا صوت الهوسة المله القرية طلعت
اركض ناسية عباتي ،فتحت الباب اباوعلهم نزلوا من السيارات ،ردوا للقرية بس بصائر مو وياهم
شهگت وانا اشوفن أخوي نزل ،جثة بلايه روح سانديه ليث وعزيز ،منا واسمع صوت العياط ببيت چدي وي صوت بچيهن منا ابجي واللطم ،گلوبنة مفجوعة بمصيبتنة ،أم خلت مو بس ضناها ومشت للموت ،خلت بشر يموت على هواها
،وادم وراها ما تذكر بس الطيب منها مصيبة اقوى من مصيبة ،احير انقهر عليها لو على اخوي لو على الطفل الما تهنى من اول ساعات حياته ...
جابتلي عباتي نسمات لبستها وطلعنه انا وياها بنص الهوسة طبينا ،انداريت غاصه اباوعله طببوه تلگته جدة
غضة : تعال ولك حبوبة فقااار ،تعال ليه اواسيك بمصيبتك يابعد حيلي حيلك
تقدم يمشيلها دموعة يطيحن من عيونه للگاع ،دنگ حاضن جدة يشهگ يشكيلها وكلنه وياه نبچي زلم ونسوان
فقار : جانت تگلي ما اعوفنك للموت ،خذاها المووت مني جدة ،خذاها وما رحم بعشگي الهااا ،شلوون بي جدة شلووون
گعدت ما اگدر اضلن واگفه بعد ،اباوعلهم واحد واحد اخوانها چانت كسرتهم مو اقل من كسرة أخوي عليها
نجوى : حواري يمة .
رفعت رأسي
_ هاا يمة ؟
نجوى : گومي موزين عليج هل گعدة هاي
بلايه ما احجي كضيت ايدها المدتها الي وگمت وصلتني لغرفة البنات ،حطتلي مخده والا من شافتني تمددت ردت طلعت ،هستوني
غمضت عيوني وحسيت بأحد گعد گبالي،فتحت اباوعلها
ريحانة : صيري بسد الحايط لا أحد يچفص ببطنج ونتصخم
اندارت ترد على مرة سألتها
_ شبيها ؟
ريحانة : حامل
باوعتلي المرة
_ تگومين بالسلامة
همست ارد عليها بالگوات ماعدي قابلية حتى احجي
_ الله يسلمج
ريحانة : عدلي نومتج حتى اغطيج
جريت مخدتي وصرت بالزاوية وهي حطت علي عباة وطلعت ،غفيت غفوة قليلة وفزيت على صوت بچي طفل فوگ رأسي من فتحت عيوني وشفته
أبن فقار حسيت بگلبي انمرد مرد گعدت على حيلي
باوعت لعمة خالدة شايلته
_ اطينياه عمة
حطته بأيدي ،مگمط وزغير ،قطعة بيضة عيونه مغموضات نشغت متذكره تعبها بيه ،صاحت بي
وحده من نسوان أخو جدة
_ لا تبچين وهو بحضنج ما يصلح عليه خايبة .
ما رديت عليها وانا بحسرة الدنيا كلها اگولن بگلبي
_ يا ما يصلح وهو بهل عمر وحضر فاتحت امه
للضهر وطلعوا عمة شيماء من المستشفى لان بساعة العارفت بالصار لبصائر ضاربتها جلطة
تلگيناها نحاول ما نبجي ونزيد حالها سوء اكثر ،نهون عليها واحنة الما مقتنعين ،نگلها البقية بحياتج وگلب ولادة تزيد وجعها هل حجاية ...
°نسمات°
من حجي النسوان غصب گمنا بلاية قابلية كضينة البيت انا وبنات خالة زهرة وريحانة وبعد چم
وحدة هم ،بلاية روح يتحركن اباوع عليهن وگلبي متملخ انا الشايفتها چم مرة دموعي ما نشفن
ابد عليها وما الومنهن من حتى صوتهن راح، يفترن وبس دموعهن تچري
رفعت البرده وسويتلهم درب يطببون الغدا ،ما خلوا غريب يطب بيناتنة بعز تعبهم اجوي شايلين المواعين كل ماعون شكبره
صخر : بعد الخبز واللبن ،الخضره مكملاتها ؟
ريحانة : أي حتى منضفيها
صخر : خوش
مد رأسه من الباب يصيح
صخر : نووح بساااعكم
اجوا شايلين الباقيات وهو واگف بالباب ياخذ منهم ويطينا ،ركض ركضنا حتى نلحگ نوكل الوادم كلهم بنفس الوكت ،اخير شي اخذت الماي اعوزعنه على السفرة البلصاله وبس خلصت ضليت واگفه بمكاني اباوع لخالاتها ملتمات عليها يقنعن بيها تاكل ،شهگت تتوسل بيهن يخلنها
ميمنة : ما اگدر والله ،شلون تردني اكل وانا اندفنت اختي گبال عيني
غورگت عيوني بسبب نبرة صوتها ،رديت للمطبخ ما اريدن ابجي احس بروحي ما اشوف بعد
غاية : نسمات ما تاكلين ؟
_ وأنت
رچفت شفتها وهي تگول
غاية : اكل فاتحتها هذا
_ جا تضلين صايمة
غاية : ما اگدر والله
ما حاجيتها بعد لان حاسة بيها ،رابيات سوه كسرتهن وحدة هن واخواتها ،مشيت ورا غاية ضهري يون علي حتى العشا كفيناه ونص الوادم مشت لبيوتها ،طبينا للغرفة انا وياها وصارت گدامنا هيفاء شايلة الجاهل وتفتر بيه طول اليوم ما سكت وضل
من حضن لحضن ،وعلى جهة گاعدات ميمنة وبركة ثيناتهن صافنات وامهن گبالهن متمدده
من شفتها تعبانة گتلها تطيني الولد ،حطته بحضني توصيني عليه
_ لا تخافين اعارف للجهال
بلايه ما ترد مشت گعدت يم ميمنة تحجي وياها وانا من سكت گابلتهن وگعدت
هيوفة : لو شما احجي ما راح اگدر اخفف عليج واعارف بالصار صعب بس لخاطر امج واختج عيني روحج ،لا انا ولا أنت ولا كل واحد بهل قرية مصدگين هل مصيبة هاي ، ولا متوقعيها بس هذا ل الله كاتبه ،ماتت شهيدة بس خلتلنه امانه لازم نحافظ عليها
دارت عيونها تباوعله
ميمنة : شلون يربة بلياها ،شاگله لو كبر ،ماتت امك وأنت عمرك دقايق وما شفت منها شي وراح تضل بحسرتها طول عمرج
_ نگدر نسد مكانها احنة ونعوضه عنها
دنگت دموعها يطيحن بلايه صوت چن بشر ما ضال بيه ذرة حيل
ميمنة : گدامي نزلوها ،گدامي دفنوا أختي ،كل ما اصفن اتذكر ،شلون اعيش وانا مدفونة قطعة من روحي گلولي شلووون
تحجي هي وامها تبچي ،توسلنه بيها تسكت لان امها وضعها بعده تعبان ،رديت الطفل عد هيوفة وگمت اجيبله هدوم انا وغاية وبس طلعنه لاگانه واحد من الولد يسأل وين ماشيات
غاية : بس نجيب هدوم للجاهل من بيت عمي باقر
مدنگة اعدل العباة على راسي حايرة بيها فلا اعارف امشي وانا لابستها بس هنا ما يرضون ،انداريت عليها توصي بيه
غاية : خوية جعفر اذا شفت ليث گله غاية تريدك .
جعفر : صار
وخر من دربنا بس ضل واگف منا لمن طبينا للبيت
صحتها
_ اگلج
غاية : گولي
_ هذا نفسه المسجون ؟
غاية : أي ،شني مو شايفته
_ ما عارفته متغير
غاية : لحيته صايرة عالية هل ما عارفتيه
_ هو اخو بصائر مو ؟
غاية : أي بصائر جاية وراه
_ مبين مكسور عليها
دنگت متحسرة وصعدت فوگ وانا وراها ،بس فتحت باب غرفتها بچت بصوت عالي ما تگدر تطب ،ضليت حايرة اباوعلها
_ بس دليني وين هدومه وانا اجيبله
عينها على ثوابها على الچرباية
غاية : ما اعارف بس هي مفرغة واحد من الكناتير اله
طبيت للغرفة ادور كنتوره ،انعصر گلبي من شفت هدومه شلون مرتبات ،طلعتله هدوم بساع ورديت
سديته منداره عليها
_ كافي هذن ؟
غاية : جيبيله بعد لان شيطلعنه مرة الثانية .
اخذتله بعد لبسة كاملة من هدوم وحضينة وبس نزلنه لاگانه عزيز اخو حواري ،طب من برة مبين منعس لان حتى ما انتبه علينه
°غاية°
گاعدة يم ميمنة تبدل للجاهل ودموعها يصبن وبس گمطته حطته على گلبها مغمضة عيونها
وتجر النفس بحسرة ،حجي هواي تريد تحجي بس ما تگدر ..! !
گمت طفيت الضوه وطلعت سادة الباب وراي اباوعلهن يفترن كل وحدة تنضفلها شغلة لان بالنهار ما نگدر ،حطيت روحي وياهن حتى نكف بساع
اجت وگفت يمي
هيوفة : نوح گالي عمي كاظم وعياله جاين ورادهم أبوي
_ يااا ليش ؟
هيوفة : مبينة حتى لا نتخزه گدام الوادم
بس خلينه ماكو كل وحدة بينة نامتلها اقل الساعتين
والوادم بدت تجي ،وتعب هذا اليوم مضاعف
وگبل وكت الغدا چنت ملتهيه وفززني صوتها كل ضني يتراولي
بس من رفعت راسي شفتها گبال عيني تدور بالوجه
و وراها طبن ام جواد وثنين بنات وراها ،شهگت من شافتني
جفون : غاية
ركضتلها ما مصدگة هاي هي گبال عيني ،حضنتني ودموعها بللن ثوبي
جفون : ماتت بصائر غاية ،شلون ماتت بصائر ،وفقار شلون عافته
وخرتها امسح دموعها
_ مو بس فقار ،خلت حتى ابنها
بچت بصوت أعلى تباوع وراي ،انداريت واشوفنها أمي واگفة ،ركضتلها وامي ابد ما حركت حتى ايدها ولا لمتها بحضنها من تعلگت برگبتها ،ضليت اباوع مصدومة ما مصدگة امي شافت جفون من بعد اشهر وما اهتمت هيج ..! ! !
وخرت منها تمسح عيونها تباوع الأمي مستهضمة دارت وجهه علي
جفون : وين هيوفة مشتاگتلها
_ جوة
مشيت وراها اباوع طبت تدور بالوجوه ومن شافتها گاعدة يم عماتي صاحت اسمها بحس ناصي يرچف خلاها تچمد حتى ما تگدر تدير رأسها ،ومن ردت گالت اسمها ،گامت هيوفة ما صدگة موسعة عيونها تباوعلي وتباوعلها
جفون : مشتاگتلج والله
فتحتلها ايدها
هيوفة : تعاي
ركضتلها تتعثر بالگاعدات شمرت روحها بحضنها وهيوفة تبچي وجفون تبجي وانا وياهن
وكل الموجودين مستغربين من الجاي يصير لان احنة گايلين يم خوالها الا نسوان بيت الرباح چانن يعارفن بالصار وما گدرن يسكتن ،عيوني صارت بگصتي من سمعت وحدة منهن تحجي
_ شلون خليتوها تطب وهي شردت بليلة ظلمة من عدكم
وعمة عطاء محملة عليهم ،ما اعارف شلون الله جابها وخلاها تسمع الحجي ،كفت ردانتها ومشتلها
ما ناوية على خير مبين ،وهذيج بس شافتها گامت وگفت بعالي صوتها تحجي
_ هااا بت رأجس بيها مشكلة اجيتيي ،مو چنتي ضامه راسج
عطاء : شو تعاي اشوفج ياهي الراح تضم رأسها انا لو أنت
جرتها من عباتها والنسوان يصيحن بس يردنها تفك المرة وعمة ابد فلا چنها تسمع ،اندارت وحدة منهم تباوع لجدة موجتلها الكلام
_ حاجيها يا ام محمد راح تخلص عليها
وجدة ابد ما متهمة ،بأيدها السبحة تسبح
غضة : نسوان حمة ما نتدخل بيناتهن .
بالگوات جرن المرة من عمة مخلصه عليها ،ضليت بس حاطة ايدي على حلگي واباوع
بعيوني شگد اعارف بيها وكحة بس ما تخيلتها هيج! !
وهي ميته من الضرب ما گدرت تسكت
_ العااايبة موزين سترنة عليج تالي تطگينيي ،انا الج اذا ما ندمتج شوفي
تعت بروحها من ايد عمة خالدة وهيوفة تريدهن بس يهدنها
عطاء : هدنييي اشوفها العااايبة على اصولها ،هدنيي لا اطبگچن وياهاا والله
هيوفة : كافي عمة خزيتينة
انا قريبة منهن واسمع بهيوفة تتوسل بيها ،بالگوات سكتت وطببنها للغرفة ونسوان بيت الرباح كبرنها و وصلت حتى لچدي من مشن منا زعلانات بالليل واسمع صوت جدي يرعد بالحوش
اباوعلهم من الشباك أبوي وعمامي يستكون بيه لان مو وكتها وهو يحلف لو كض عمة عطاء يگضي بيها التوبة
محمد : كافي بوية فدوة اروحلك ما عايزين الوادم تضحك علينه ،بيا حال احنة
رأجس : سواية اختك اليوم ما انساها والله واذا ما تطلع بت البدوية من بيتي اذبحها واغسل عارهاا گبال عينك وروح أبوووي
باوع لجدي مصدوم
صخر : جفون هنااا ؟
رأجس : أي يالچبير وابوك يعارف وضام علينه
سديت باب المطبخ ارچف خايفة عليها من ركض يريد يجي وكاضه برهان ،سندت ضهري على الباب احجي وي هيوفة الطبت تسأل شكو
_ صخر عارف بجفون هنا ولوما كاضيه الولد چان الله سترنة
لطمت على صدرها
هيوفة : يمة ،منين عااارف
_ چدي گاله
هيوفة : شگد گتلها روحي لان اعارفهم شني لومو فاتحة هم ما ينسون سوايتها
_ حتى الشيخ خزعل خايف عليها منهم هل خله مرته وياها
هيوفة : جا يعارف دوستها القرية وبعد الصار صعبة
ضلينه الخوف تارس گلبنه منا لمن شفناهم طلعوا الا جرينة نفس ،مديت راسي من باب الغرفة اباوعلهن جفون وحواري متگابلات ومن ساعة التلاگن وهن ما تفارگن
نسمات : غاية ليث برا يصحيج .
درت عليها
_ ماشيتله
فتحت باب المطبخ ومديت راسي بس شافني نتر
ليث : حجاابج وين
_ هستوني نزعته
ليث : ليش ما ضليتي لابسته ؟
_ رگبتي من شعري والحر حتى طگگت
ليث : هاا
_ والله ،شتريد ؟
ليث : اريدن هدوم ابدل
_ امس وديت عليك حتى تبدل وما اجيت
ليث : لبست من عزيز ،بساعج بعد اخوج اريد اسبح ما عدنه وكت
_ صار
باوع بعيوني
ليث : عيونج من البجي زغرانات
اختنگت وانا ارد عليه
_ شلون ما ابچي خوية ؟
تنهد وجر الچرواية من راسه حطها على رأسي يوصي بي
ليث : ديري بالج على گلبج ،اتعب من اشوفنج تتعبين ،رويحتي أنت
بست باطن ايده الجان بيها الحاطها على خدي جراني الصدره يحجي
ليث : اروحلج فدوة ،ديري بالج على روحج گلبي يمج والله
_ سلامة گلبك يابعد گلبي
وخرني يعدل باطراف الجراوية
ليث : عزيز راداها مني وما اطيتها اله ،بس تفداج احسن چراوية عندي
_ انا غاية عزيزة الگلب عزيز شني
ليث : أي وعلي شني فد نمونه عزيز
_ هذا لو جعفر ما چان گلت نمونه
تنهد مقهور
ليث : جعفر كاسر گلبي ،يومين صار اتوسل بيه على الماي الا يشربه
_ حگه ،يعني لو انا ميته يطيگ گلبك تاكل وتشرب ؟
خزرني ومشى مبين زعل من حجاياتي ،ركضت وراه كضيته من ايده اندار علي مخنزر
ليث : ادبسزز شلون تطلعين ،شعرج انفتح ،لمي عدل لا اشنقج بيه
_ دعوف شعري هسة ،شبيج تزعل ما تخلي الواحد يحجي
ليث : ليش هذا حجي مال بشر
_ خاب هيج طلعن وياي والله
ليث : لا تعيديهن بعد لا ازعل عليج والله
_ صار تدلل
ليث : جيبيلي الهدوم ،نستيناهن الله يغضب عليج
_ جا مو هستوك خايف علي هسة تريد الله يغضب علي
ليث : غاااية
غطيت حلگي
_ ماحجي بعد ،شبيك هستوك چنت شحلاتك
ليث : خايبة گلبي وجعني والله
_ اسفة
ليث : گولي اسفة مرتين
_ اسفة مرتين
ليث : لا اسفة مرتين
_ لا اسفة مرتين
ليث : راح اطيح حضج
_ ازعل والله
ليث : زعلتهم
دار وجهه ومشى وانا طبيت مطنگرة جبتله هدوم ورديت ادورلي واحد يوديهن اله ،من شفت نوح طب دگيت باب المطبخ تلفت من شافني اجه بساع
نوح : شتردين ؟
_ هذني الهدوم وديهن ل ليث
نوح : اهووو ،اريد امشي يم فقار
_ جا وينه هو ؟
نوح : ببيتهم
_ شلون تخلوه يمشي لبيتهم ؟
نوح : راد يبدل لهسه بعده بهدوم النچف
من وراي أچت تحاجيه
حواري : عليك الله عينك عليه ،ابد لا تخليه وحده
نوح : ما يحتاج توصين
اخذ الهدوم مني وانا طبيت حايرة بهوسة المطبخ شيكفها كلهن اختفن ،مبين سنحن من التعب ،حيل ما ضل ب ولا وحدة بينا دست على روحي وشي ورا شي كفيت كلشي حواري ضلت گاعدة يمي تحوس من بطنها
_ شبيج ؟
حواري : ضهري موتني والله
_ اسم الله ،جا ما تحجين ولج ؟
مدت رجليها
حواري : بيا حال احنة ،اعارف جاي يصير وياي هيج لان گعدتي تطول
_ جا ما تمددين فدوة لعيونج ،لا يصير بيج شي
حواري : ما اگدر والله ،اتمنى فارغة واگدر انوحن عليها وياچن ،من اشوفچن تلطمن اموتن من القهر والله
_ جا خوما تأذين روحج ؟
حواري : لا بس اگولن لو
كفيت كلشي وگمنا انا وياها ،هستوني طبيت للغرفة حتى أنامن وانتبهت الامي گاعدة عد راس جفون ،من شافتني وخرت ايدها الچانت تمسح على شعرها
_ يمة
گعدت گبالها
_ اعارف بيج شگد تحبيها ،وهي ما عدها غيرج لا تقسين عليها
زهرة : حارگة گلبي بسوايتها والله
_ بعدها زغيرة ما تعارف سوايتها هيج چبيرة ،وأنت گلبج حنين ما يقسى على أحد
تمددت اباوع ل أمي عيونها على جفون ما اعارف بشني جاي تفكر ،غفيت ايدي جوا راسي ،و وكت قليل وگعدتني هيوفة ،بالگوات فتحت عيوني
وگمت اسحل بروحي سحل غسلت وجهي واكلتلي لگمة و ورا الغدا أجت الملاية علمود الختمة
نسمات : غاية فدوة تعاي وياي نحضر الصنينة ما وحدة ترضى تجي وياي
نشفت ايدي من الماي
_ ماگدر
نسمات : جا گليلي شلون
_ اخذي رقية وياج
نسمات : وين الگاها ؟
_ جوة يم البنات
گضة ثالث يوم واصعب يوم ،طشت بيه الوادم وحتى مرة الشيخ مشت ماخذة جفون وياها بلاية ما احد يحس ، وضلينه بس احنة وعماتي هم ،طبوا جدي وعمامي
و ولدنه ،من بيناتهم مدنگ حاني ظهره ما چنه فقار النعارفه ابد گعد يم جدة وهي حضنته
غضة : شد حيلك ياحبوبة لخاطر ابنكم ،امانتها هذا
فقار : وينة الحيل جدة دلوني عليه
غضة : اعارف مصيبتك موش هينة والفراگ صعب بس هذا الكاتبه الله
فقار : شيقنع الروح جدة وانا صارلي ثلاثت أيام ما شايفها وچنت ما اخليها تبابت يم بيت عمي لخاطر ما افارگها
هو يحجي وانا والبنات نتباچة ،چانت اصعب ليلة من بعد ليلة مماتها ،درت اباوع للجاهل بحضن ميمنة يبچي بصوته الناصي وهي تسكت بيه وتبچي وبصفها واگف صخر يحجي وياها
يريدها تسكت وهي تزيد ما تنقص ،طر الصبح علينه احنة بذكرها ونويحنة چن هسة عشنا الحزن عليها بعد ما فرغ البيت اجه دور گلوبنه تحزن من صدگ عليها وعلى وحشتها بيناتة ...
گمت خاوية روحي احس الگاع تفتر بي ،من بيناتهم انتبهلي ليث وطفر يسندني ،كضيت ايده حيل وغمضت عيوني وهو يحجي
ليث : جا مو گلت عينج على روحج ،ولج غاية خوية حاجيني
ما اگدر ارد عليه ،قلة النوم موتتني ،اجت من الجهة الثانية هيوفة سندتني ،طببوني للغرفة ضل كاضني هو وهيوفة مدتلي فراش تمددت عليه احجي وياهم بعد ما حسيت بالدوخة خفت
_ لا تخافون ترا صرت زينة .
ليث : وجهج بعدة مخطوف لونه
_ جا شتريد يرد بيه اللون بساع
ليث : شگد اگلج لا تتعبين وأنت اذا ما تشتغلين تگعدين تبچين
_ جا شلون ليث أنت شايف شجاي يصير بگلبي عليها
جاي يرد علي بس طلع من صاحه عزيز ،ما گدرت اضلن هنا وحدي وكلهم برا ،گمت طلعت بس شافني صاح
ليث : جا هستوني شحجيييت ؟
_ ما اتعب والله بس اضوچن جوه
هز رأسه مأيس مني وطلع برا مشيت وراه اباوعلهم يلمون بالقزنات وهيوفة تفتر تعزل وياهم ،كفوا كل الهوسة وهسة من صدگ خلصت الفاتحة بس انصبت چوادرها بگلوبنه...
"انتهت ثلاث ايام لم تكن بالحسبان ،واستوطنت ما بعدها القلوب الفاقده ،والعون لقلب عاشق مات على قيد الحياة"
ليث : وينك نوووح ،المصفي الچبيرر بساع
نوح : وانا شمدريني بيه وين
هيوفة : هسة انا اجيبه جوه
ليث : بساعج
ركضت جابته وردت ،اخذه وطلع وراهم ،وما ضل شي بعد صفى البيت ولا چن چانت اكو بيه فاتحة
گمت طبيت جوة اسمع صوت بجيته مثل الصدى بهدوء البيت
"بعد مراسيم العزاء هدوء ممتزج ببكاء طفل لم يحظى بكنف من انچبته"
اخذتني رچلي فوگ على اثر صوته ،دگيت باب غرفة صخر فتحتلياه ميمنة
_ يمج الجاهل موو ؟
ميمنة : عون ؟
_ أي
اندارت تأشرلي چانت محللته على الچرباية
ميمنة : هذا جاي يلعب
_ سمعت صوته يبچي
ميمنة : أي سكت
_ هواي يبچي
بلعت ريگها
ميمنة : شمتاني ما يبجي وهو تبهذل هيج بأول ايام عمره
گعدت على الجرباية يمه من طبت وخلت الباب مفتوح گعدت تباوعله
ميمنة : اتعب واصبر روحي لخاطره ،اشوفها بيه كلش يشبها حتى نفس الوجه
باوعتله
_ صدگ يشبها وعود بعده زغير
ميمنة : شلون لو اخذوه مني ،بيمن اصبر روحي ؟
_ حتى لو اخذوه لا تعوفيه منا لهنا كلساع روحيله
باوعتله عيونها دم صايرات ،دنگت تبوسه ورفعت رأسها من طب صخر ،سلم ومشى يم
الميز نزع محابسة واندار يباوع على عون ،بنفس ذيج النضره الاشوفنها بعيون كل واحد يباوعله ..
°حواري°
تنهدت حايرة اباوعله من الشباك ،مدنگ يدخن ومنا اشوفنه شلون يجر النفس من الچگارة ،اريد امشي يمه واتردد واخافن عگب ذيج النوبة الدست وياه بالحجي بيها راح يفشلني ..! !
هيوفة : حواري
انداريت
_ هااا
هيوفة : امشي يم زلمتج ،لازم توگفين وياه هسة وتاخذين من خاطره
رديت اباوعله حايرة
هيوفة : ما يردج والله ،امشيله لا تخافين
شجعتني وطلعت اقدم خطوة وارد خطوة منا لمن وصلتله ،حس بي من وگفت گباله ورفع رأسه يباوعلي اول شي ركزت على السواد الجوه عيونه الي بالگوه فاتحهن
همست بصوت ناصي
_ البقية بحياتك
شمر گطف الچگارة ورد
عبد الحق : حياتج الباقية
گعدت يمه حايرة شأحجي وياه ،حطيت ايدي على ايده اندار باوعلي وغمض متنهد
_ ما اعارف شني الاگوله بس لخطار امك وخواتك اسند روحك واقوى حتى يقون بيك لان ماكو واحد يأثر عليهن بگدك
فتح عيونه بصوت محتقن يحجي يجر النفس ورا كل حجاية يحجيها
عبد الحق : ما توقعت اخسر وحدة من خواتي بيوم الأيام ،گضيت عمري خايف عليها بس ما حطيت ببالي راح تموت ،ماتت وخلت عون الچانت بس تريد تشوفه ،لهسه اتذكر گالتلي ،اريدن اشوفه شلون شكله بعد هذا التعب ،گتلها راح يطلع يشبهج وصدگ نسخة منها بس ما شافته يتمته من وكت
مسحت عيوني ورديت احجي وياه انا وهو مختنگين ما معروف منو يواسي منو
_ الله كاتبله هيج ،كلنه موجودين يمه بس الويل على اخوي الراح يموت على فراگها
شعل چگارة جديدة
عبد الحق : شگد ما نحبها احنة بس ما نوصل ذرة لشوغة من شواغته الشفتهن عليها ،اهون على روحي ومن اشوفه اردن لنقطة الصفر
_ ما چان يگدر يطب للبيت اذا هي مو بيه ،والله خايفة عليه لا يصير بيه شي وما يحمل فراگها .
مسحت عيوني اشهگ احس الخوف من صدگ بهاي اللحظة چاس گلبي
عبد الحق : الفراگ يرادله حيل واحنة ناس ماعدنه حيله
كضيت فالينته بقوة من لماني لصدرة ،احس بدگات گلبه القوية ورچفة ايده من يمسح على راسي ،حسيت بهل وكت الكلام چان قاصد بيه روحه اكثر من فقار ..! !
وخرت من حسيت بصوت بالحوش ،عدل حجابي يباوع بعيوني
عبد الحق : تعبتيني
همسها بصوت من صدگ تعبان
_ شسويتلك أنا ؟
عبد الحق : عشت وياج بشعور بعمري ما عشته ،چنت اذا اريد شي واسوي بعد ما اتراجع بيه لو أل غضب كلهم يوگفون بوجهي ،بس وياج ابد ما عارفت اقرر قرار اگدر عليه وكل ما اباوعلج ما اتذكر غير أنت أول انسانة هواها گلبي ورادها
_ مجاي افتهم شي من التحجي لان ما اعارف شني الخلاك هيج تحجي من الاصل
عبد الحق : اريد اضل بنضرج انا كلشي ما اعارف وهذا السبب الما يخليني احجي ،صعب اواجهج بشي يقلل مني
_ بالعكس تضل تارس عيوني ،لازم نوصل لحل لخاطر جهالنه
دنگ يباوع لبطني
عبد الحق : جاي تكبر
اخذت ايده حطيتها عليها
_ ما شفت حتى نساوتهم شلون هدت حيلي واخذت من عافيتي
باوع بعيوني ساكت وانا كملت
_ ما گلت الأحد نساوتي صارت على عطرك ،وصيت بصائر جابتلي العطر بلايه ما تحس أنت ،بس ما چن نفسه ابد
عصر ايدي بين ايده وسحبني مقربني اله
عبد الحق : شميه من نحري
سحبت روحي ليوره
_ گضت ،بعديش .
عبد الحق : حورية
دنگت گلبي يدگ بقوة ،رفع راسي بأيده
عبد الحق : تحبيني ؟
_ أنت كلشي حلو بعيون حوريتك
ضمني لصدره يهمس
عبد الحق : احجيها حتى تطفى نار گلبي
رفعت رأسي عيوني بعيونه
_ أحبك والله
شهگت ابچي بحضنه مستهضمة منه ،كضيت ايده حيل من حط رأسه بين رگبتي وراسي يجر بالنفس چن واحد غرگان وطلعوه من الماي ،وخرني صافن بعيوني
عبد الحق : أحبج وداعة كل شامة برگبتج ومعزتها بگلبي
حطيت رأسي على چتافه ما مصدگته حجه وياي وطاح الزعل ،صح چنت اريد اعرف السبب الخلاه ينفر مني بس من عارفت بيه هلگد رافض يحجيلي ما اجه ببالي غير هو عارف بمشاعري ل ليث
وتعمدت اعترفله من كل گلبي حتى انهي كل الشك الموجود برأسه ...
من گام وگف ،وگفت انا هم گبال طوله المشتاگه يغطي طولي
عبد الحق : تمشين وياي ؟
_ وين ؟
عبد الحق : للبيت
بلايه ما اتردد گلتله
_ بس اللبس عباتي
عبد الحق : ماكو احد الوادم كلها نايمة ،امشي هيج
حطيت ايدي بايده وفزيت من نهدتني غاية تريد اتدنه ،گعدت على حيلي ما صدگة كل هذا حلم والشعور العشته چن حقيقة ..! !
مسحت وجهي وهي گعدت گبالي تسأل شبيج مبين اخترعت من الفزة الفزيتها
_ تحملت بحق
غاية : شتحلمتي ؟
_ تصالحنة انا وياه
غاية : يا الله ،اشارة خير أن شاء الله
جريت شالي الحاطته فوگ المخدة وگمت اللبسه واحجي وياها
_ اروحن اشوفه
غاية : خاف نايم
_ اذا نايم اردن
ما لحگت ترد علي وانا طلعت بساع ادوره ،حطيت ايدي على گلبي من شفته گاعد بنفس المكان وبس شافني واگفه وأجت عيونه علي گام وگف على حيله داير وجهه مني يمشي للديوان ،من شفت الرفض بعيونه ما تحركت من مكاني وگعدت عاجزة افكرلي بحل ينهي هاي المهزلة الصايرة الما معروف نهايتها شني ..! ! !
ريحانة : حواري
طبت مستغربة گعدتي هنا
ريحانة : شني شبيج ؟
_ مابي شي ،ما شفتي عون ؟
ريحانة : لا والله يم ميمنة
گعدت يمي
ريحانة : شني مضوجج ؟
_ چان گاعد بالحوش وبس شافني واگفه اباوعله حتى ما ضل بمكانه
ريحانة : حق ؟
_ جا منو غيره ؟
ريحانة : بالي عد فقار والله
تحسرت
_ بالديوان برا سألت نوح عليه گبل لا انامن
ريحانة : اعارف مشيت يمه توسلت بيه شلع گلبي وما حط لگمه بحلگه
_ جا شلون ؟
ريحانة : اندري ،جاي اموت من القهر عليه
ضلينه گاعدات انا وياها شوي وگمنة للغرفة حتى انام ، ما اجاني نوم وضليت احوسن بفراشي وكلساع والحلم ينعاد ببالي ابد ما گدرت اغمض عيوني حتى
ومن ردنه نمشي للبيت نزلت حاطته على گلبها ما تگدر تفارگه
ميمنة : عمة خلوه يمي فدوة ،بس هل چم يوم وارده
باوعتلها أمي حايرة
نجوى : شلون عمة غير يم ابوه
اندارت لفقار
ميمنة : خوية انا عيني عليه والله
فقار : امسحي دموعج ومثل ما هو ابني أبن اختج هم والج حگ بيه
ميمنة : يعني تقبل ؟
هز رأسه ب أي وطلع گبلنه ،لبست عباتي وعبرت من حق الواگف بصفه برهان ،ابد فلا چن يعارفني
داير وجهه ،وانا مشيت ورا أمي للبيت بس طبينا سألت امي من ما شفته
_ جا وين فقار مو طلع گبلنه ؟
نجوى : اضن بالديوانية
وصدگ بس فتحت باب الديوانية شفته چان نايم على وجهه حتى بدون مخده ،مشيت على كيفي كل ضني نايم ما اريدنه يحس بي ،بس تقربت يمه رفع رأسه يباوعلي بعيون ذبلانة التعب وثگل هاي الايام مبين بيهن
_ حط هاي المخدة جوا رأسك
بلاية ما يرد اخذها مني ،حطاها جوا رأسه عينه للسگف صافن وهاي الصفنه وجرته للنفس
اعارف شكبر الحسرة البيهن ،خليته وطلعت سادة الباب وراي ،الحزن تارس گلبي عيوني بس يردن يبچن احس حتى حياطين البيت وياي ،على أيام شهدن بيهن على حب ومشاعر اكثر ثنين ما توقعنة يفترگون بيوم من الايام بس
طب الموت بينتاتهم وخلاني اشوفن أخوي بهاي الكسرة ..! !
°غاية°
گاعدة اعچن وطب ليث ،گعد يمي
ليث : شو مغلسة كلش على الدوام ؟
حطيت ملح للعجين وباوعتله
ليث : كثري كثري اهم شي الملح
_ جا والضغط يهل الضغك
ليث : والمدرسة يهل المدرسة ؟
_ ما اگدر اداوم منو للبيت
ليث : جا تروح عليج السنة ؟
_ اجازتي شوكت تگضي ؟
ليث : اليوم گضت متشوفين جاي احاجيج ،هسة تلگين كومة دروس عليج
_ عادي كلهن قاريتهن بالعطلة
ليث : والامتحانات ؟
_ احاجيهن يمتحنني
ليث : اخذج باجر نرتب الوضع ونرد
_ خوش
ليث : تخبزين أنت ؟
_ جا خوما اخلي ميمنة
ليث : وين تعارفين
_ الله يحلها
ليث : خايبة لا تحترگين
_ ما احترگ لا تخاف ترا اعارف بس اغشم بروحي
ليث : جذابة غير هذيج النوبة شفتج شلون تلوصين بالشنگة غسلت ايدي منج
_ جا خوما اخليكم كاتلكم الجوع
ليث : عادي فدوة الج
أبتسمت احس بعيوني صايرات نار ،كل ما اگابل ميمنة تخوى روحي وروحها
ليث : من تخبزين صيحيني يمج
_ شعليه
ليث : اذا ما تصحيني ازعل عليج والله
_ ضل ضل هدد ازعل وازعل
ليث : اهدد لان اعارف ما يهون عليج ليوثي
_ توو توو ،شلون بالاستغلال
باسني من راسي
ليث : أحبج وداعة عشگي الما تهنيت بيه
_ سودة علي
ليث : نبچي
اشرتله على عيوني
_ دمسحهن ما اگدر انا
ليث : أم دميعة
_ مو بيدي والله
ليث : حنينة
مسح عيوني بالشال الشادته على راسي ومشى يطب جوا وانا بس خلصت العچين دثرته وگمت اغسل واحجي وياها من طبت تشكي
نسمات : مليت يعني ماكو غيري يخابروني والله شني دورة السنة وتعاي ،جا انا مو هم بفاتحة ؟
_ لو اعارفهم يحبوج ما انقهر بس المصيبة كله علمود الشغل
نسمات : جا شني ميتين علي ،مليت والله شني هل عيشة السودة هاي
_ حاجي جدة تحجي وي ابوج منا للبسعة واحد من الولد يردج
نسمات : باجر هو يجي
_ جا زين
نسمات : شني عجنتي ؟
_ أي ،صار چم يوم يجيبون من المعمل واعرف ما يحبون خبزه
نسمات : جا مو ما تعارفين للخبز ؟
_ اجرب
نسمات : انا اخبزلج اعارف
_ لا يمعودة
نسمات : دسكتي انا متعلمة
ما حجيت لان صدگ أخاف لا اخبز واخربه ،وبس شفت العجين شايل روحه
طلعت علگت التنور ورديت يمها لگيتها تريد تشنگ
_ بس اوگفي بين ما يهفت التنور .
نسمات : انا متعلمة اخبز ومو كلش هافت عادي
_ مو ايدج تشلهب
نسمات : مو هي باجة ،خاب دسكتي اسكتي
هستوها بدت تخبز وسمعت صوته من فوگ
ليث : جااا انا شگلت ؟
باوعتلها حاطة ايدي على گصتي من الشمس
_ هاي نسمات جاي تخبز وانا يمها
ليث : يعني ما راح ناكل خبز مال بشر اليوم ؟
_ بعد بيد الله
گرصتني
نسمات : احسن من خبزج المعوق
_ شايفتني خابزة ؟
نسمات : هو صوجي ما خليتج تخبزين
_ ديلا راح تمنين علي
نسمات : امداج أي والله شحاجية هسة انا
صيح من فوگ
ليث : مو وحدة بيچن تتهور وتحط الثانية بالتنور
نسمات : خوية حاجي اختك
_ والله انا فقيرة وأنت تعارف ما احجي اذا ما احد يعيل بي
ليث : أي والله صدگ
نسمات : أشك مسويتلك سحر
ليث : محبة مو ؟
نسمات : خررب احترگن الخبزااات
ركضت تمد ايدها بالتنور تطلعهن وتحجي علي وهو من فوگ يگلها
ليث : هاي حوبة غاية ،تراها تشور ديري بالج .
جرت اللثام من وجهة
نسمات : سلام الله عليها
ضحك وطب ساد شباك غرفته شوي ونزل گعد يمنا اعارفه ما مرتاح من النعاس مطفي كلش لان هاي جيته من اليگعان ،والا شافنه خلصنه خبز يلا گدر يطب
_ ضلت بس المعجنة چيبيها وراي
نسمات : خوش
شلت الخبز وطبيت ،تلگتني امي تحجي
زهرة : شمسوية ولج غاية ،ليش كل ما انام الضهرية اگعد الگاج مسويتلج مصيبة
_ يايمة هو خبز ،وترا انا ونسمات خبزنة مو وحدي
عضت اصبعها
زهرة : اخخخ منچن ،لو مگعدات عطاء وياچن
_ خطية نايمة
زهرة : چذب تخافين منها
_ أي والله تخوف
زهرة : شلون صايرلچن شي ؟
طبت حطت المعجانة على السنك وفتحت البوري تنگعها
نسمات : دگولي يا الله خالة خلصنه بعد عليش الملامه
زهرة : أخاف عليچن
نسمات : جا خالة انا عايشة يم أل خبير شتعارفينهم هيج بگلبهم رحمة وما يخلوني اخبز
زهرة : خايبة والله اتمنى ابوج يرضى تضلين يمي هنا
نسمات : وين اگدر خالة
زهرة : خايبة ليش چا شعدج
نسمات : ما اگدر
زهرة : شني الما تگدرين فهميني ؟
نسمات : حتى لو هو رضى عمامي ما راح يخلوني
زهرة : جا هو ابوج و ولي امرج شدخلهم هم
نسمات : ما تعرفيهم خالة ،بلاء اسود وطايحين على راسي وما اگول غير الله يخلصنه منهم
اجت امي لمتها بحضنها
زهرة : شتحتاجين بس خابريني كل ما تضوجين حاجي عمتج غضة تخلي ابوج يجيبج واذا هو مو هنا انا اجيبن واحد من الولد واچيج
وخرت تعدل بحجابها
نسمات : الله كريم خالة
زهرة : ماكو اكرم منه يابعد خالتج
رسمت أبتسامة على وجها ،حسيت هواي اكو شي تحاول تخفيه وراها ،طبت شايلة عون
ميمنة : عمة شوفي عون شو ما اعارف شلونه .
مشتلها بساع ناسية حتى وجع مفاصلها
زهرة : اسم الله شبيه
ميمنة : ما جاي يرضع خبلني من الصبح لهسة وهم احسن بيه مصخن
تحسيته امي
زهرة : عده صخونه خفيفة
ميمنة : خل ناخذه للدكتور
زهرة : ناخذه العصر انا وياج ونشوف منو من الولد ياخذنه
ميمنة : أي فدوة عمة والله اخافن عليه
زهرة : لا تخافين يطوه دوه ويصير زين
و صدگ للعصر مشت هي وامي اخذهن صخر بعد ما اطه خبر لفقار ،من تأخروا ضليت احوسن
_ وين صاروا شني السالفة ؟
نسمات : يجوز الدكتور عليه هواي لا تضلين تحوسين
_ اخافن بيه شي
نسمات : سمي بسم الله ولا تفاولين
وي الغروب الا ردوا ،تلگيتهم من الباب وگبل لا اسأل شبيه بهتت من شفت ميمنة تبچي ،انداريت الامي اسألها بعيوني ومن گالت
زهرة : طلع عده فتحة بالگلب
حسيت صوت صار بأذني من السمعته ،عيوني تعلگت عليه ،بللت طرف شفتي شبساع يبس ريگي
_ لا يمة گولي غيرها
زهرة : هذا المكتوب يمة شبيدنة احنة
اخذته من ايد ميمنة ،بعده هل گدوته وينه وين هذا الظيم كله ،طبينا جوة وهي فد بچية ابد ما سكتت چن أم تبچي على حال ضناها
زهرة : خايبة كافي عيونج انتهن
غضة : ما تسكت الا من ينعمن عيونها
ميمنة : ريتهن بالعمة الشافنها تندفن ،ولچ جدة اريدن اموت واصبر بروحي لخاطر ابنها وانا ما اگدر حتى احطن راسي على المخدة من اتذكر صارت مخدتها التراب
درت منها الغصة تصعد وتنزل ببلعومي ،وما سكتت الا من طلع صوته يبچي ،شالته بايد وبالايد الثانية تمسح عيونها ،طب صخر وهي دايره وجها ،مشالها وگف گبالها
صخر : ما كفاج البچي البچيتيه بالدرب ؟
ميمنة : لو ابجي صبح وليل هم ما يرتاح گلبي ،انا فاگده أول أخت الي
شهگت بأخر حجايات
صخر : ساعتها محتومة لا من اليوم ولا امس وهذا الحجي من يغير شي ،صليلها وادعيلها بالرحمة مو أنت مؤمنة ؟
ميمنة : أختي هاي صخر
صخر : جا اذا أختج حتى ما تترحميلها لو شني ؟
سكتت تعارف حجيه صحيح بس ما تگدر تسوي شي من الجاي يگوله ،اخذت الجاهل وصعدت وصخر شوي ولحگها ،وبنفس الوكت طبت عمة نجوى وياها ريحانة بعد السلام سألت
نجوى : بشروني شلونه الولد ؟
زهرة : اگعدي واحجيلج
نجوى : اسم الله خوفتيني
غضة : خايبة دگعدي شگد تلحين
نجوى : يا عمة
غضة : والله تعلن الگلب
ما ردت عليها عمة وگعدت تحجي وي أمي
نجوى : احجي خية راح اموتن
زهرة : اخذناه الدكتور علمود الصخونة وهم ما يرضع بس شك عده فتحه بالگلب ومن چيكناه طلع صدگ عده فتحه ولاديه
لطمت على رأسها
نجوى : يمة فقار ،التمت الچانت ما عايزة ،التمت علينه من كل كتر
غضة : اللطمي زين هسة ما اگلج اسكتي ،فالچن وفال بس اللطم
نجوى : خايبة عمة انا بيا حال وتحجين علي ،ما تشوفين المصايب من كل كتر طاحت علي
غضة : خايبة صدگ ماكو خبر على ضيرم ،ما فتح عيونه
نجوى : هنيالي لو فتحهن ،طولت نومته ياعمة واخذ ثلثين حيلي چبير وليداتي
غضة : والزغير شلونه ؟
نجوى : فقار وشسولفلج على حاله ،ما يطيب للبيت ساكن الديوانية نتوسل بيه تواسيل وهو عازل روحه حتى صاير من نطبله يسوي روحه نايم
غضة : لا تلحون عليه وخلوه براحته يعيش حزنه مثل ما يريد
نجوى : متگطع گلبي عليه ياعمة ما اگدر اخليه وانا اشوفنه هيج يذبل گدام عيوني عگب ما چان تارس البيت بضحكته
غضة : جا ما تعارفيه مسودن بيها ،زين ومن ضال يشم الهوه
نجوى : يااا عمة على بختج
غضة : جاي احجي الصدگ ،خلوه براحته ولا تضلين تفترين على راسه
مرة تسولف ومرة ترزل وانا صعدت صحت ميمنة نزلت الولد حتى تشوفه عمة نجوى ،وبالليل اجت عمة شيماء بالگوات تمشي من أثر الجلطة وحدة
من رجليها تسحل بيها سحل ،فرفحت روحها من گالتلها امي هيج گال الدكتور ...
وثاني يوم شافوله دكتور زين اختصاص قلب أكد عده فتحة ولادية ولازم العناية بيه مضاعفة ولازم ما يبچي ،امي تحجي لميمنة
لان هل مرة ما مشت وياها اخذوا ريحانة وهي وي كل حجاية تبچي بصوت اعلى وتردد
ميمنة : سودة علي ياخالة ،ريت المرض بگلبي ولا گلبك
عطاء : خايبة اذا تضلين على هل نويح تموتين ومنو لهذا ؟
تأشرلها على عون تريد بس تقنعها وجدة تباوعلها مقهورة ونسمات شايلته وعيونها مدمعة وانا عيوني عليه ،افكر شلون راح يعيش وهو بگلب متعوب ،ومن هل ساعة ميمنة ضاعفت اهتامها بيه ما تخليه يبچي ابد تركضله قبل لا يجوع صار هو كل اهتامها لو گامت بشغل البيت وياي تركض ركض حتى بس ترد تگعد وتحطه بحضنها ،اللتهت بيه كلش بس ما نستها ابد ...
صعدت حتى اگلها تنزل تتغدا ،بس وگفت بالباب من سمعتها تلوليه بغصة وتشهگ بكل كلمة تحجيها
ميمنة : دلول الولد يا تعب أختي ،دلول يالضال تذكر منها ،دلول يا ابن بنيتي وامانتها ،رويحت خالته ونفسها ،عون الزغيرون الما شم ريحتها ،دلول يبن النامت بالگبور وما شافت من عمرها
فتحت الباب وهي ما حست علي ،حاطته بحضنها شالته تحطه على الجرباية ،دنگت شمته تحجي
وياه
ميمنة : مشتعله بگلبي نار وبس شوفتك تهيد روحي
_ ميمنة
رفعت راسها مندارتلي ،وجها صاير ضعيف وعيونها دومهن مورمات
_ تعاي تغدي .
ميمنة : ماعدي نفس للأكل
_ جا تضلين هيج ،اذا ما تاكلين ويصير بيج حيل منو ل عون ؟
بلعت ريگها واندارت تباوعله
_ عليج الله گومي
بلايه ما تحجي گامت نزلت وياي ،بس شافتها امي طارت بيها تحير شنو تخلي گدامها وصخر
اباوعله من جوه ليجوه ،يسويلها لفات زغار ويخليهن گدامها ويحجي وي أبوي ،اكلت شي قليل
وخلت وصعدت فوگ ما لحينه عليها لان صعب ترچع طبيعية بهل سرعة ..! ! !
°حواري°
طبيت للديوان عيوني بالگوات فاتحتهن بس بالي يمه شفته من اچه مو طبيعي ،باوعتله متمدد وصافن مبين سمع صوت الباب من انفتح بس ما اهتم ولا حتى دار وجهه
_ فقار
من گلت اسمه التفتلي
_ ما تاكل شي
هز رأسه ب لا
_ جا شلون ،تضل عايش على الماي ؟
همس
فقار : حتى بالماي اغص
_ تريد تموت روحك أنت لو شني ؟
فقار : هنيالي وامشي وراها
نترت
_ اسم الله ،شبيك هيج تحجي عوزنة مصايب احنة
فقار : انا ميت بس بعدني أشم الهوه
غورگت عيوني من شفته غمض ونزلت دمعة من عينه ،بحياتي ما شايفته بهل حزن بنص المصايب فقار چان يضحك
_ ماكو شي يهون على گلبك واعارف كبر مصيبتك بس لا تنسى مصيبتنة وحدة هي اختنة وبت عمنة
فقار : ما طايق روحي بلياها ،لو ماخذني الموت گبل لا ياخذها
_ عليك الله كافي تحجي بالموت فكر بأبنك منو اله
فقار : يعيش كلكم اله ،انا الماعدي احد ،طفت الدنيا بعيوني الما تشوفها بعد
گعدت يمه عاجزة شأحجي وياه ،حط رأسه على رچلي ،حركت ايدي على شعره ادلك برأسه وشوي وحسيت بيه غفه ،ضليت گاعدة ما تحركت علمود لا يفز ...
رفعت رأسي من انفتح باب الديوانية من برا ،سويتله اششش ماريده يفز ،اجه گعد عد رچله بصوت ناصي يحجي
نوح : ما اكل شي ؟
همست
_ لا
نوح : جا راح ينتهي اذا يضل هيج
_ حاجي أنت بلكت يسمع حجيك
نوح : شني كل ضنج ما حاجيته ؟
_ جا منو يأثر عليه ؟
نوح : انا ضال يمه ،حضريله الاكل واحاول وياه بلكت الله يهديه
_ أن شاء الله
سحبت رچلي على كيف وحطيت مخده جوا رأسه
_ راح اسويله اكل وانا وياك نحاول وياه
هز رأسه بخوش ،وبس طلعت صارت گدامي مدنگة حاطة رأسها على رجليها ولامه روحها على الدرج گاعد ،صحتها مخترعة من گعدتها
_ هيوفة
رفعت رأسها باوعتلي بعيون مورمة
هيوفة : ها ؟
_ شبيج ؟
مشيت على كيفي صعدت باية باية ،گعدت بصفها منداره عليها
_ شني شبيج ؟
لمعت عيونها واختنگ صوتها من گالت أسمه
هيوفة : ضيرم ،طگ گلبي على شوفته والله
_ ما گلتي العزيز ياخذج وياه من مشى
هيوفة : بيا حال وانا احطن روحي وياه وزايد همهم هم واخليهم حايرين بي وهم اعارفهم ما راح يرضون هل ما حجيت
_ جا شلون بيج تضلين هيج متلوعة ؟
هيوفة : الوكت ما جاي يمشي بي كارهة الغرفة وكارهة الأيام بلياه والله
_ هسة يصحى وتتكحل عيونج بشوفته
هيوفة : شوكت ،مو ما ضل بي حيل والله
_ ادعيله
هيوفة : يوميا ادعيله بكل فرض والله ومنتظره الاستچابة
_ يستچاب ربج ساعة الساعة
هيوفة : شوكت تجي هل ساعة
_ ما تدرين شوكت ،گومي نامي مو ما نايمة ؟
هزت رأسها وگامت ومن شفتها صعدت انا نزلت سويت اكل لفقار وبس خلصت مشيت للديوانية گلت لنوح يگعده ورديت جبتها طبيت شايلتها حطيتها گدامه
_ شني بكيفك ما تاكل والله اليوم لا أنا ولا نوح نهدك بكيفك
فقار : لا تلحون
نوح : دنچب شني لا تلحون ،تاكل ورچليك فوگ رأسك
فقار : احط راسك بالطاوة والله هذا ضيم گلبي افرغة بيك
نوح : چيرة بفرگك فوگ ما خايف عليك
ما حاجاه ورد تمدد ونوح يتلاوه وياه يريده يگوم وانا اجرجر بيه
_ اذا ما تاكل ازعل وحرام عليك تزعل مرة حامل
فز من گلت هيج
فقار : چانت تگول رفقا بالحوامل
نوح : لخاطرها گوم اكل
فتحت عيوني اخزره شلون هيج يحلفه
نوح : جا شسوي يضل ما ماكل
اندار عليه ما مصدگ ،طفر يحط مخده وراه من گعد
نوح : اطيني الصينية
دنيتها اخذها حطها گباله ودنگ يوكله لگمة والثانية وطفر فقار غاص ،ركضت وراه ابچي وهو فرغت معدته نوح يدگ على ضهره وهو خوت روحه وطاح من طوله
لطمت على خدي وصحت
_ يمة فقاااار
حار بيه يريد بس يسيطر عليه وانا احسن بروحي تربطت
_ نوح ،ولك اخوووي
لا حرك ايد ولا رچل وجهه انگلب گلب بيه وما جاي يشحب
نوح : كااافي ولج بس اسكتي سطرتيني
طبت امي تركض من شافت نوح فاتح بوري الماي ويذب بأيده على فقار الضال مثل الخشبة الممدوده صيحت ترچف
نجوى : ولك يمة وليييدي
گعدت گباله تدگ على خده وتبچي بصوت عالي
نجوى : ولك فقااار يايمة ،ولك اصحى هديت حيلي ولك يمة افتح عيووونك
من أيس وياه نوح خله وطلع يركض ،وما طول ورد وراه حق ،تگابلوا عليه شالوه وطلعوا بيه للمستشفى
وأمي لبست عباتها ولحگتهم ،گعدت خلصانة
روحي فلا چنهن دقايق چنهن دهر على گد ما عشنه بيه الخوف ...
ضلينه انا وريحانة وهيوفة گاعدات ،طر الصبح علينه الا ردوا جايبينه ،الكانونة بأيده و وجهة
بعده مبين بيه التعب، گعدوه بالصاله وهو عيونه تفتر بيناتنة كلمة ما حجة ،احس بيه يدورها ،غمض وتمدد من شكل المغذي حق يحجي وي ريحانة وانا فلا چني موجودة
عبد الحق : ساعتين ويگضي المغذي ،صاير عده هبوط بالضغط قوي لان ما ماكل حتى السكر هابط
ريحانة : زين اسويله شي ياكله ؟
عبد الحق : لا خلي هسة وضعه يستقر على المغذي احسن
ريحانة : خوش
عبد الحق : عينكم عليه وابد لا تخلوه وحده
نوح : انا راح أضل يمه
عبد الحق : لا تخلي يتحرك اذا مو أنت وياه
مشى حق وبالساعة هيج وتحولوا فقار ونوح للديوانية ،طبيت انامن عيوني منتهيات
من النعاس مأمنة عليه لان نوح يمه ،من گعدت گالت امي نتريگ ونمشي نشوف عون
نجوى : ما تمشي ويانة تشوف وليدك ؟
متمدد بالصالة وباله مو يمنا ،ردت سألته امي الا اندار عليها
فقار : شني يمة ؟
نجوى : ابد ما شفت وليدك
فقار : أي
نجوى : امشي ويانة نشوفه
فقار : ماريد اشوفه
نجوى : يااا ،شني ما تريد تشوفه ؟
فقار : عوفيني يمة فدوة اروحلج
نجوى : خايب وليدك لهسه ما شايفه
گام يستغفر وخله وطلع برة
ريحانة : لا تلحين عليه يمه هو ضيمه كافيه
نجوى : جا مو زحمة لهسه ابد ما سأل على وليده
ريحانة : بعدة صوابه جديد يا وليد يمة
خليتهن يسولفن وطبيت للغرفة حضرت روحي وطلعت يمهن بس شافتني امي گالت
نجوى : گومي ريحانة حضري روحج أنت هم .
ريحانة : منعسة يمة واريدن انام
نجوى : ما نتأخر ،تلحگين تنامين
ريحانة : شگد ونرد ؟
نجوى : ساعة بالزايد
ريحانة : خوش
بنفس الوكت المشت بيه ريحانة نزلت هيوفة عباتها بأيدها ،ضلينه متانيها منا لمن حضرت روحها وطلعنه سوا ،وما توقعت من راح نمشي لبيت جدي امي راح تفتح موضوع عون وتگول ناخذه يمنا
ميمنة گاعدة وحاطته بحضنها ،موسعة عيونها تباوع ل أمي احس بروحها رادت تطلع من امي گالت
نجوى : خية زهرة اريدن اخذ عون ،انا وعماته موجودات ومن الاصول يضل عد ابوه
زهرة : شلون تاخذية وهو تعلم على ميمنة ؟
نجوى : بعدة طفل نفاس وما فاطن لو اخذناه من يكبر هو راح يتعب واحنة هم
باوعت لميمنة حايرة
زهرة : والله ما اعارف شني اگلج
ميمنة : اموتن اذا اخذتوه ،تعلمت عليه ،انا اول وحدة شالته عمة
نجوى : جا شلون ياعمة ؟
ميمنة : خلوه يمي بس يكبر شوي وإأمن عليه اطيكمياه
نجوى : منا لهنا تگدرين ب أي وكت تچين تشوفيه
صخر : السلام عليكم
سلم يريد يصعد بس من سمع بصوتها المختنگ صاحت اسمه وگف مندار عليها
ميمنة : صخر يردون ياخذون عون مني ،حاجي عمة مو تعارف ما مصبرني غيره
تحجي ودموعها يطيحن ،اجه وگف گبالنه
صخر : انا اول مرة اطلب منج شي واذا تعزيني لا تكسرين بخاطرها ،خلي عون عدها
نجوى : لازم يعيش عد ابوه ياعمة
صخر : انا عمه وماكو فرق وين ما يعيش كل البيوت اله
سكتت امي حايرة وهو خله وصعد ،باوعت لميمنة تمسح بعيونها
نجوى : لا تبچين بعد ،هاي هي خلي عدج بس من يكبر شوي ناخذه
هزت رأسها وشالته تسكت بيه من بچة ،ما ضلينه هواي بعد وردينا للبيت ،طبيت للبيت گبلهم ،وطاح گلبي من منظر طول عمري ما راح انساه ...
شكرا لزيارتكم عالم روايات سكيرهوم
