رواية ديون النبض الفصل الاربعون
فضلت واقفة قدام حجرة الكشف، وعقلي رجع بيا لذكريات كتير عشتها مع مجد في المكان ده.
افتكرت الأيام اللي كنا بنقعد فيها نتكلم، ونتابع الحالات، ونكشف على المرضى، وهو يفضل باصص لي وأنا بكشف، يراقب طريقتي واهتمامي بكل التفاصيل.
كنت وقتها بحس إنه مش مجرد دكتور بيشرف على شغلي، لكنه شخص مهتم بيا، بمستقبلي، وبكل خطوة باخدها في طريقي.
وقفت شوية، وبصيت ناحية العيادة. كان فيه زحمة قدام الباب، لكن كل اللي كنت عايزاه إني أشوفه، حتى لو من بعيد، وهو بيتابع شغله.
لقيت الممرضة واقفة عند الباب، والباب نفسه كان موارب.
قربت منها وسألتها:
وعد: هو في حد مع دكتور مجد جوه؟
الممرضة: أيوه.
وعد: حالة مرضية؟
بصت لي، وردت وهي مش متأكدة:
الممرضة: بصراحة، مش عارفة.
سكتُّ لحظة، وأنا بسأل نفسي: أنا هدخل بناءً على إيه؟
هدخل وأتحجج بأي حاجة؟ طب أقول إيه؟ وإيه اللي جابني أصلًا عنده؟
وخصوصاً ما بقاش فيه اي حاجه تربطني بيه...
لكن حاولت أقنع نفسي إن ده مكان شغلي ودراستي، وإن تخصص القلب هو المجال اللي ناوية أكمل فيه، وطبيعي إن مجد يفضل موجود في حياتي المهنية، حتى لو علاقتنا الشخصية انتهت.
وبعدين افتكرت احتمال إنه أصلًا ما يكونش موجود، وإن كل اللي بعمله ده مش هيكون له أي نتيجة.
مديت إيدي ناحية الباب، وبدأت أفتحه بهدوء.
لكن أول ما بصيت لجوه، اتصدمت.
مجد كان واقف قدامي.
ولكن ما كانش وحده كانت فيه بنت واقفة معاه، مدياني ضهرها، لكن كان واضح من وقفتها إنها متوترة جدًا.
فضلت باصة لهم، مش قادرة أتحرك، وفجأة لقيتها قربت من مجد، وحضنته.
في اللحظة دي، مجد غمض عينيه.
وأنا حسيت كأن حد سحب الأرض من تحت رجلي.
ما كنتش مستعدة أشوف المنظر ده، ولا كنت متخيلة إن مجرد حضن من بنت تانية ممكن يوجعني بالشكل ده.
فضلت واقفة مكاني، مش قادرة أستوعب اللي شايفاه، ولا قادرة أبعد عيني عنهم.
وفجأة، صوت الممرضة قطع اللحظة دي.
الممرضة: يا دكتور مجد!
فتح مجد عينيه، وانتبه لصوتها، وفي اللحظة دي لمحني وأنا واقفة عند الباب.
عيونه اتقابلت بعيوني.
ما عرفتش أقرأ نظرته، ولا قدرت أفهم هو حاسس بإيه، لكني كنت متأكدة إن وجودي في اللحظة دي مش عادي بالنسبة ليه.
أما أنا، فكنت واقفة قدامه، حاسة إن كل اللي حاولت أخبيه طول الفترة اللي فاتت ظهر في عيني.
البنت بعدت عنه، ووقفت جنبه، وكأنها ما لاحظتش أي حاجة، وبعدها بصت له الممرضه وقالت:
الممرضه: يا دكتور، أأجل المرضى لبكرة، ولا حضرتك هتكمل النهارده؟
في اللحظة دي، مجد بص ناحيتي مرة تانية، لكنه تجاهل وجودي، ورجع يتكلم معاها بكل هدوء.
مجد: لا يا سناء أجلي كل المرضى لبكرة. أنا خارج مع خطيبتي دلوقتي.
خطيبته!
الكلمة دي لوحدها كانت كفاية تخليني أحس إن نفسي اتسحب مني.
ما استنيتش أشوف أي حاجة تانية، اتحركت بسرعة وبعدت عن الباب، وكأني بهرب من منظر ما كنتش قادرة أستحمله.
لكن وأنا ببعد، شفتهم وهما خارجين.
سارة كانت ماسكة إيده، وبتضحك بسعادة واضحة على وشها، ومجد كان متجاوب معاها، وماشي جنبها بكل طبيعية.
عرفت إنها سارة، بنت خاله، وكنت عارفة من قبل كده إنها موجودة في حياته.
لكن إنك تعرف حاجة، غير إنك تشوفها بعينيك.
كنت عارفة إن ممكن ييجي اليوم اللي مجد يرتبط فيه بحد غيري، وكنت أنا اللي اخترت أبعد عنه علشان أسيبه يكمل حياته.
لكن لما شفته مع سارة، حسيت إن كل الكلام اللي كنت بقوله لنفسي ما كانش كفاية يجهزني للحظة دي.
أنا اللي شفته وهو بيتألم يوم خطوبتي، وأنا اللي كنت عارفة قد إيه صعب عليه يشوفني قاعدة جنب سمير، وهو بيلبسني الدبلة وبيقرب مني.
وساعتها حسيت إني قتلته بإيدي، حتى لو كنت بحاول أقنع نفسي إني بعمل ده علشان مصلحته.
والنهارده، وأنا شايفة سارة قريبة منه، وحاضناه، وماسكة إيده وهما خارجين سوا، حسيت إنه هو كمان قتلني.
مش لأنه عمل حاجة غلط، ولا لأنه ما كانش من حقه يبدأ حياته من جديد، لكن لأن المنظر أكد لي إن اللحظة اللي كنت بخاف منها طول الوقت بقت حقيقة قدامي.
مجد ممكن يكون لحد تاني.
رجعت البيت وأنا في قمة حزني.
المرة دي ما قدرتش أخبي زعلي، ولا قدرت أتصرف كأن مفيش حاجة حصلت. فضلت ساكتة، بعيدة عن الكل، وكل ما حد يحاول يكلمني، ما كنتش بلاقي كلام أقوله.
رغد كانت من ساعة خطوبتي متجنبة الكلام معايا، ولو اتكلمت، كان كلامها قليل جدًا.
ويمكن ده كان أريح ليا، لأني ما كنتش قادرة أشرح لحد أنا حاسة بإيه، ولا حتى كنت عارفة أشرح لنفسي.
الحياة ما بتقفش على حد، والأيام بتكمل مهما كان وجعنا كبير.
لكن أنا في الفترة دي كنت حاسة إن حياتي واقفة عند لحظة واحدة، لحظة شفت فيها مجد مع سارة.
عدى أسبوع، وأنا تقريبًا طول الوقت قاعدة ساكتة، والحزن باين على وشي. حتى لما سمير كان بيتصل بيا، كنت بقفل المكالمة بسرعة، ورفضت إني أخرج معاه.
ما كنتش عايزة أتكلم مع حد، ولا أقابل حد، ولا حتى أسمع أسئلة عن سبب تغيّري.
كل اللي كنت محتاجاه إني أرتاح، وأبعد شوية عن الضغط اللي حطيته على نفسي، وعن كل حاجة بتفكرني باللي حصل.
لحد ما في يوم، لاحظت إن اللي حواليا بيتصرفوا بطريقة غريبة.
ياسين ورغد كانوا بيتكلموا مع بعض، وفيه حاجة باينة على وشوشهم، كأنهم مخبيين عني خبر، ومش عارفين يقولوهولي إزاي.
بصيت لهم باستغراب، وبعدها سألت:
وعد: في إيه؟ إنتوا مالكم؟ فيه حاجة أنا مش عارفاها؟
محدش رد في البداية.
لحد ما ماما بصت لي وقالت بهدوء:
ماما: النهارده فرح مجد.
فضلت باصة لها، مش مستوعبة الكلام اللي سمعته.
وعد: إيه؟!
صوتي خرج مني متقطع، وكأني محتاجة أسمع الجملة مرة تانية علشان أصدقها.
وعد: مجد هيتجوز النهارده؟ ليه ما حدش قال لي؟
وأنا بتكلم، حسيت بالدموع بتنزل من عيني من غير ما أقدر أوقفها.
ماما بصت لي باستغراب، وبعدها قالت:
ماما: في إيه يا وعد؟ بقالك أسبوع حزينة وساكتة، ومش عايزة تكلمي حد. مش ده اللي إنتِ كنتِ عايزاه؟ جاية تبكي دلوقتي على مجد ليه؟
ما رديتش.
فضلت باصة لها، ومش قادرة أنطق بكلمة واحدة.
لأنها كانت بتسألني سؤال أنا نفسي ما كنتش عارفة أجاوب عليه.
أيوه، أنا اللي اخترت أبعد.
وأنا اللي وافقت على سمير.
وأنا اللي كنت كل يوم بحاول أقنع نفسي إن مجد لما يرجع لحياته ويكمل مستقبله، هكون عملت الحاجة الصح.
لكن ما كنتش متخيلة إن مجرد سماع خبر جوازه هيكسرني بالشكل ده.
ماما بصت لي، وبعدها ابتسمت ابتسامة خفيفة وقالت:
ماما: خلاص يا وعد، هو شاف طريقه، زي ما إنتِ شفتي طريقك.
سكتُّ.
ما كانش عندي رد، ولا كنت قادرة أجادلها، لأن كلامها كان حقيقي، حتى لو كان بيوجعني.
وفي اللحظة دي، حسيت إني أخيرًا فهمت طبيعة الوجع اللي كنت بحاول أهرب منه طول الفترة اللي فاتت.
كنت حاسة كأني عندي حالة وفاة، ولكن أنا مطمنة لمجرد إن الجثة لسه جنبي.
عارفة إن الشخص اللي فقدته مش قادر يتكلم معايا، ولا يبص لي، ولا يرجع لحياتي زي الأول، لكن مجرد وجوده قدامي كان بيخليني أحس إنه لسه موجود.
كنت بشوف مجد في الجامعة، وفي المستشفى، وفي العيادة.
كنت بعرف إنه لسه في نفس المكان، وإنه لسه ما خدش الخطوة الأخيرة اللي هتخليني أواجه حقيقة فقدانه بشكل كامل.
لكن أول ما شفته مع سارة، حسيت إن حاجة جوايا اتكسرت.
ولما ماما قالت لي إن النهارده فرحه، حسيت كأن اللحظة اللي كنت بأجل مواجهتها وصلت أخيرًا.
زي أهل الميت لما يكونوا قاعدين جنبه، عارفين إنه فارق الحياة، لكنهم لسه حاسين بوجوده، ولسه مش مستوعبين إنهم فقدوه.
وبمجرد ما ييجي وقت أخده ودفنه، بيبدأوا يواجهوا معنى الفقد الحقيقي. يبدأ النواح الحقيقي...
ساعتها بس بيدركوا إن الشخص اللي كان لسه قدام عينيهم، مش هيكون موجود معاهم تاني.
وده كان إحساسي مع مجد.
طول ما كنت بشوفه قدامي، كنت لسه متمسكة بجزء صغير من الأمل، حتى لو ما كنتش بعترف بده لنفسي.
كنت بقول يمكن لسه بيفكر فيا، يمكن لسه بيحبني، يمكن لسه فيه فرصة نرجع لبعض.
لكن دلوقتي، بعد ما عرفت إنه هيتجوز، حسيت إن كل الأبواب اتقفلت.
ما بقاش فيه حاجة أتمسك بيها، ولا حجة أهرب وراها من الحقيقة.
مجد اختار يكمل حياته.
وأنا اللي اخترت أبعد عنه.
لكن رغم إني كنت عارفة كل ده، ما كنتش قادرة أمنع قلبي من إنه يوجعني على حاجة أنا بنفسي اللي ضيعتها من إيدي.
كنت فاكرة إن ابتعادي عن مجد هينقذه، لكن ما كنتش أعرف إن اليوم اللي هيبدأ فيه حياة جديدة من غيري، هيكون بالنسبة لي اليوم اللي هواجه فيه فقدانه بجد.
اليوم اللي هضطر فيه أعترف لنفسي إن مجد، اللي كنت شايفاه لسه موجود في حياتي من بعيد، ممكن فعلًا يبقى جزء من ماضيّ.
وإن أصعب أنواع الفراق، مش إنك تبعد عن حد بتحبه...
أصعبها إنك تفضل تحبه، لحد ما ييجي اليوم اللي تعرف فيه إنه بقى لحد غيرك.
ديون النبض 🫀
بقلم الكاتبة مروة صياح ✍️🎯
بعدها بساعات، بدأ الكل يستعد علشان يحضر فرح مجد.
أما أنا، فكنت آخر واحدة ممكن تفكر إنها تروح المكان ده بإرادتها.
كنت لسه مش مستوعبة الخبر، ولسه بحاول أستوعب إن مجد هيتجوز النهارده، وإن الشخص اللي قضيت أسابيع بحاول أقنع نفسي إني بعدت عنه لمصلحته، خلاص هيبدأ حياة جديدة مع واحدة غيري.
ولما طلبوا مني أجهز معاهم، رفضت بشدة.
وعد: روحوا إنتوا، أنا مش هقدر أروح. أنا هقعد هنا لوحدي.
ياسين بص لي وسكت، وكان واضح إنه فاهم إن رفضي مش مجرد تعب أو عدم رغبة في حضور الفرح.
كان عارف إن اليوم ده بالنسبة لي أصعب من إني أقدر أواجهه، وإن مجرد تخيل مجد وهو جنب سارة كفاية يخليني أنهار.
حتى رغد كانت مستغرباني، وكلهم فضلوا باصين لي، مش فاهمين ليه رافضة بالشكل ده.
وفجأة، جرس الباب رن.
كان سمير.
دخل وسأل عني، ولما خرجت له، بص لي باستغراب وقال:
سمير: إنتِ لسه ما جهزتيش يا وعد؟
كنت نفسي أسأله: إنت عارف إن النهارده فرح مجد، ليه ما قلتليش؟ وليه كلكم خبيتوا عني الخبر؟
لكن الأسئلة فضلت جوايا، ما قدرتش أطلع منها ولا كلمة.
بصيت له وقلت:
وعد: أنا مرهقة جدًا يا سمير، وتعبانة، ومش قادرة أروح في حتة.
بص لي باستغراب أكبر، وقال:
سمير: ما ينفعش يا وعد، إزاي؟ طب علشان خاطري، وعلشان خاطر عمو ياسين كمان. لازم نروح نبارك لمجد.
حاولت أرفض تاني، لكن إصراره وإلحاح الباقيين خلاني في النهاية أوافق.
دخلت أوضتي وجهزت نفسي، وأنا حاسة إن كل خطوة باخدها بتقربني من اللحظة اللي كنت بحاول أهرب منها.
نزلت معاهم، ووصلنا الفيلا.
لكن بمجرد ما دخلت وشفت مجد قاعد جنب سارة، حسيت إن رجلي مش قادرة تشيلني.
كان المشهد قدامي، بكل تفاصيله.
مجد جنبها، وهي قريبة منه، وهو في المكان اللي المفروض يكون فيه أسعد إنسان في الدنيا.
لكن رغم كل اللي كنت شايفاه، لاحظت إن مجد مش بطبيعته.
ما كانش فرحان بالشكل اللي كنت متخيلاه، ولا السعادة باينة عليه زي ما كنت متوقعة.
ومع ذلك، وجوده جنبها كان كفاية يوجعني.
أنا ما كنتش قادرة أستحمل إني أشوفه مع واحدة غيري، ولا أشوف إيده قريبة من إيد مش إيدي، ولا أصدق إن اللحظات اللي كانت بتجمعنا بقت دلوقتي مجرد ذكريات.
دموع عيني بدأت تنزل من غير ما آخد بالي.
كانت ماما كل شوية تبص لي، وتطلع منديل وتمسح دموعي بهدوء، وهي حزينة على حالتي، لكن من غير ما تتكلم.
كل اللي حواليا كانوا في فرحة، والكل بيبارك لمجد وسارة، والضحك والكلام ماليين المكان.
أما أنا، فكنت عايشة وجع ما عرفتش أحسه بالشكل ده قبل كده.
كنت موجودة وسط الناس، لكن جوايا كنت لوحدي تمامًا.
وفجأة، سمير قرب مني ومسك إيدي.
سمير: تعالي، نروح نبارك لدكتور مجد.
بص لي وهو مبتسم، وكمل كلامه بحماس:
سمير: هانت يا وعد، إن شاء الله إحنا كمان خلال شهور هنتجوز، وبعدها هنسافر ونبدأ حياتنا الجديدة.
ما كنتش قادرة أرد عليه.
ما كنتش عارفة أقوله إيه، ولا إزاي أشرح له إن الكلام اللي المفروض يفرحني، كان بيزود إحساسي إني بفقد مجد نهائيًا.
حاولت أسحب إيدي بهدوء، وقلت له:
وعد: روح سلّم إنت على مجد يا سمير، أنا مش قادرة. حاسة إني مرهقة ودايخة، ومش هقدر أقف كتير.
بص لي بقلق، وحط إيده على كتفي يسندني.
سمير: أنا معاكي يا وعد. وبكرة إن شاء الله نروح المستشفى، وتكشفي، وأشوف إيه سبب التعب اللي إنتِ فيه ده.
ما كانش قدامي غير إني أمشي معاه.
اتحركنا ناحية مجد وسارة، وكل خطوة كنت باخدها كنت بتمنى لو أقدر أرجع لورا، أو أختفي من المكان كله.
أول ما سارة شافتني، بصت لي نظرة طويلة، وبعدها ابتسمت.
كانت ابتسامة خلتني أحس وكأنها عرفت أنا مين، وعرفت كمان إن وجودي قدامها مش سهل عليا.
وفي اللحظة دي، حسيت كأنها شايفة نفسها انتصرت، وإنها أخيرًا بقت في المكان اللي كنت أنا فيه يومًا ما.
سمير قرب من مجد، وحضنه وهو بيبارك له.
سمير: ألف مبروك يا مجد، ربنا يتمم لكم على خير.
مجد: الله يبارك فيك يا سمير، عقبالك.
كنت واقفة جنب سمير، موطيه راسي، ومش قادرة أرفع عيني.
لكن سمير بص لي، وكأنه بيفكرني إن دوري جه علشان أبارك له أنا كمان.
رفعت عيني ببطء.
وبصيت لمجد.
وفي اللحظة دي، اتلاقت عيوننا.
ما بقيتش شايفة حد في المكان غيره.
ولا صوت الناس كان واصل لي، ولا كنت حاسة بأي حاجة حواليا.
كنت شايفة مجد وبس.
وهو كمان فضل باصص لي فترة، من غير ما يتكلم.
كانت نظرة مختلفة عن كل النظرات اللي اتبادلت بينا من يوم خطوبتي.
نظرة اتنين واقفين قدام بعض، وكل واحد فيهم عارف إنه بيفقد التاني، لكن محدش فيهم قادر يقول الحقيقة.
نظرة اتنين كان بينهم حب، وأحلام، وحياة كاملة كانوا بيتمنوا يعيشوها سوا، لكنهم دلوقتي واقفين في فرح واحد منهم، وبيحاولوا يداروا وجعهم عن الناس.
سمير لاحظ النظرة اللي بينا.
لاحظ أنا ببص لمجد إزاي، ومجد كمان مش قادر يبعد عيني عني.
وللحظات، حسيت إن كل اللي حاولت أخبيه اتكشف قدامه.
حاولت أتماسك، وجمعت كل قوتي علشان أتصرف بشكل طبيعي.
قربت من مجد، ومديت إيدي ناحيته.
لكن دموعي سبقتني.
حاولت أبتسم، وقلت بصوت بالكاد قدرت أطلعه:
وعد: مبروك يا دكتور مجد.
مجد بص لي وسكت.
ما ردش عليا.
فضل باصص لي للحظات، وبعدها أبعد نظره عني.
كانت اللحظة دي أقسى من أي كلمة كان ممكن يقولها.
لأن سكوته خلاني أحس إن مفيش حاجة أقدر أقولها هتغير اللي حصل، وإن المسافة اللي بينا بقت أكبر من إني أقدر أرجعها بكلمتين.
سحبت إيدي، وبعدت عنه بسرعة.
سمير كان متابع كل حاجة، وسارة كمان كانت واخدة بالها من النظرات اللي اتبادلت بينا.
ما قدرتش أستحمل أكتر من كده.
سيبت سمير، وسيبت الفرح، ومشيت بعيد عنهم، لحد ما وصلت لمكان أقدر أقف فيه لوحدي من غير ما حد يشوفني.
وهناك، انهرت.
فضلت أبكي بشدة، من غير ما أقدر أوقف دموعي، وكأن كل الوجع اللي حاولت أخبيه طول الفترة اللي فاتت قرر يخرج مرة واحدة.
بيني وبين نفسي: مش قادرة يا مجد... مش قادرة أشوف فرحك النهارده، وأنا حاسة إن دي جنازتي أنا. إزاي قدرت أوصل نفسي للحالة دي؟ إزاي اخترت أبعد عنك، وأنا عارفة إن قلبي مش هيقدر يعيش من غيرك؟
كنت غرقانة في بكائي، لحد ما حسيت بإيد بتطبطب على كتفي من ورا.
رفعت عيني، ولقيت دكتورة جيهان واقفة قدامي.
بصت لي، وبعدها سألتني:
د. جيهان: إيه اللي جابك يا وعد؟
بصيت لها وأنا منهارة، وقلت لها من بين دموعي:
وعد: عايزة إيه تاني مني؟ كل اللي إنتِ عايزاه نفذتهولك.
شاورْت بإيدي ناحية مكان الفرح، وقلت:
وعد: أهو مجد خلاص بيتجوز، وأنا اخترت إنسان غيره. إنتِ كده مبسوطة؟ وصلتي للي إنتِ عايزاه؟
دكتورة جيهان سكتت للحظة، وبعدها قالت:
د. جيهان: وعد، إحنا اتفقنا إن ده علشان مستقبله. كان لازم يرجع لطريقه ويكمل اللي بدأه. صدقيني، إنتِ ما تصرفتيش تصرف غلط، إنتِ عملتي عين العقل.
بصيت لها، وأنا مش قادرة أصدق إنها لسه شايفة اللي حصل بالشكل ده.
وعد: عين العقل؟!
صوتي خرج مني موجوع، وكملت:
وعد: أنا دفنت نفسي يا دكتورة جيهان. أنا شفته النهارده، وشفت نظرته ليا، وحسيت إنه عمره ما هينساني، وإنه بيتعذب زي ما أنا بتعذب. إنتِ شايفة إن ده كان سهل عليا؟
بصت لي بحزن، وبعدها قالت:
د. جيهان: علشان كده أنا ما كنتش عايزاكي تيجي. على الأقل كان هيقدر يبان قدام الناس إنه طبيعي، وإنه بدأ حياته من جديد. لكن وجودك النهارده وجّعه أكتر. ياريتك ما جيتي يا وعد.
الكلام نزل عليا كأنه حكم جديد بالعذاب.
حتى وهي شايفاني منهارة قدامها، كانت بتفكر في وجع مجد، ونسيت إن أنا كمان كنت واقفة في المكان ده بقلبي المكسور.
بصيت لها، وفضلت أبكي، وبعدها قلت:
وعد: سيبيني، بعد إذنك. سيبيني لوحدي.
سكتُّ لحظة، ثم بصيت لها تاني وقلت بصوت مخنوق:
وعد: أنا عمري ما اتعودت أكره حد، لكن لو كنت بعرف أكره، كنت قلت لك إني بكرهك. إنتِ جبتي القسوة دي منين؟ إنتِ شايفة ابنك بيتعذب بالشكل ده، ولسه شايفة إن كل ده كان لازم يحصل؟
ما ردتش في البداية.
فضلت باصة لي، وبعدها قربت مني وطبطبت على كتفي.
د. جيهان: صدقيني يا وعد، التضحيات اللي إنتِ عملتيها دي مجد نفسه مش هينساها. بس إنتِ مش هتعرفي ده دلوقتي.
قالت كلامها، وبعدها سابتني ومشيت.
فضلت واقفة مكاني للحظات، مش قادرة أستوعب أي حاجة، وبعدها رجلي ما شالتنيش.
قعدت على الأرض، وفضلت أبكي بشدة، لحد ما بكائي اتحول لصراخ مكتوم، وكأن قلبي أخيرًا ما بقاش قادر يشيل كل الوجع اللي جواه.
كنت فاكرة إني لوحدي، وإن محدش سمعني أو شافني في الحالة دي.
لكن بعد ما دكتورة جيهان مشيت بحوالي خمس دقايق، حسيت بإيد تانية بتطبطب على كتفي.
رفعت عيني وأنا بمسح دموعي، ولقيت رغد واقفة قدامي.
كانت باصة لي بصدمة، وكأنها مش قادرة تصدق إن البنت اللي قاعدة قدامها، واللي كانت فاكرة إنها اختارت حياتها بإرادتها، هي نفسها وعد اللي بتحاول تخبي كل الوجع ده عنهم.
قربت مني، وقالت بصوت متأثر:
رغد: إنتِ يا وعد؟!
فضلت باصة لي، وبعدها سألتني:
رغد: طب ليه ما قلتيش؟ ليه تعملي كده في نفسك؟ ليه يا وعد؟
ما قدرتش أرد عليها.
كنت لسه بعيط، ومش عارفة أبدأ منين، ولا إزاي أحكيلها عن كل اللي حاولت أدفنه جوايا.
كل اللي قدرت أعمله إني بصيت لها، وأنا حاسة إن حتى الكلام بقى عاجز عن وصف اللي أنا فيه.
لأن الحقيقة اللي فضلت أخبيها عن الكل، واللي حاولت أقنع نفسي إني قدرت أتجاوزها، كانت واقفة قدامي دلوقتي بكل وضوح:
أنا ما بعدتش عن مجد علشان بطلت أحبه... أنا بعدت عنه وأنا بحبه، وكنت فاكرة إن الحب لوحده كفاية علشان أستحمل خسارته.
لكن ما كنتش أعرف إن أصعب حاجة ممكن أعيشها، هي إني أشوفه بيكمل حياته بعيد عني، وأنا لسه واقفة عند آخر لحظة جمعتني بيه.
