رواية رحيلها مميت الفصل الرابع 4 بقلم روزان مصطفي


 رواية رحيلها مميت الفصل الرابع 


عرفت ميرنا إن محمد وصل لأقصى درجات غضبه وحاولت تمنعه من النزول ولكنه سحبها على جنب بعنف غير مقصود وقال لها: اقفلي على نفسك باب الشقة ومترُديش عليها مهما قالِت. 
ونزِل، سمعت ميرنا صوت رزع باب العُمارة، حطت إيديها على صدرها ودعت ربنا إن يعدي اليوم دا على خير وحمدتُه إن هو مشدش مع والدته وخرج على طول.
 بـِ مُجرد ما والدته سمعت صوت قفل البوابة فضلت تحسبن على ميرنا بصوت عالي وهي بتقول: حسبي الله ونعم الوكيل فيكِ ياللي مخفوسة فوق، وقعدتِ تملي في ودان ابني وتقوليله أمك وأمك مكرهاه فيا، دخلتك كانت دخلة الشوم علينا، مش كفاية الجهاز المهبب اللي أهلك داخلين بيه حاجة تعِر، مِش عارفين الأصول؟ بت جاية من بيت جعان.
 ولكِن ميرنا سمعت كلام محمد ومردتش عليها علشان ما تأزمش الموقف أكتر مِن كدا، دا ميمنعش إنها فضلت متضايقة، حبت تتكلم مع مامتها لكن خايفة تزعل محمد منها إنها بتشتكي اللي بيحصل. 
فتحت التلفزيون وعلت الصوت شوية علشان تلغوش على صوت حماتها اللي بينهال عليها بالدعاوي الوحشة جدًا. 
شوية ولقت الباب بيخبط بتاع الشقة بطريقة وحشة، إتخضت ووقفت ورا الباب وقالت: مين؟ 
 بهدوء، لأن هي عارفة إن محمد معاه مفتاحه فـ هيدخُل على طول.
 حماتها راحت قالت بـِ زعيق من ورا الباب: افتحي يا اللي ما تتسمي، افتحي الباب.
اتجمدت ميرنا مكانها، وبصت للباب وهي حاسة إن قلبها طالع من مكانه. للحظة افتكرت كلام محمد وهو بيشدها بعيد عنُه قبل ما ينزل: «اقفلي على نفسك باب الشقة وما ترديش عليها مهما قالت.». 
فضلت ساكتة.
خبطت حماتها على الباب تاني، المرة دي بعُنف أكبر، لدرجة إن صوت الخبط دوّى في العمارة كُلها: افتحي يا ميرنا! أنا عارفة إنك جوا.
ميرنا قربت من الباب خطوتين، لكن ممدتش إيدها للمقبض.
قالت بصوت حاولت تخليه ثابت: محمد مش هنا. 
جالها صوت حماتها من ورا الباب مليان غيظ: وأنا جاية لمحمد ولا جاية لك؟ ما انا شيفاه وهو نازل، افتحي يا خبيثة. 
بلعت ميرنا ريقها، وحست بإيديها ساقعين رغم إن جسمها كله كان مولع من التوتر.
قالِت بجمود مش لايق على خوفها: مش هفتح.
سكتت حماتها ثانيتين، وكأنها مصدقتش اللي سمعته.
وبعدين قالت بصوت أعلى: إيه؟ بتقولي إيه يا قليلة الأدب؟ بتقفلي الباب في وشي أنا؟ أنا أم جوزك!
ميرنا سندت ضهرها على الحيطة جنب الباب، وحاولت تاخد نفسها بهدوء وقالت: محمد قالي مفتحش الباب.
صرخت حماتها: محمد هيقولك تسيبي أمه على الباب متفتحيش، ياللي نص بطنك كذب،والله ما هسيبك يا ميرنا، والله ما هسيبك!
ميرنا غمضت عينيها، وحست بدموعها بتتجمع فيها.
قالت لنفسها بصوت خافت: يا رب استرها.
لكن حماتها فضلت واقفة ورا الباب، ترمي كلامها من غير ما تهدى: اصبري عليا، ان ما رجعتك بالهدوم اللي عليكِ لابوكِ وامك مبقاش أنا. 
ميرنا مردتش.
كل اللي كانت بتفكر فيه إن محمد لما يرجع ميلاقيش الدنيا اتحولت لمعركة أكبر من اللي سابها.
سمعت صوت خطوات حماتها وهي بتتحرك بعيد عن الباب، فتنفست الصعداء للحظة، لكن صوتها رجع من آخر الطُرقة وهي بتقول بصوت مسموع: ربنا ينتقم منك يا بنت الناس اللي معرفوش يربوكي!
نزلت دمعة على خدها وإيديها بقت ترتجِف من العصبية. 
مسحتها بسرعة، وبصت ناحية التلفزيون اللي لسه صوته عالي، ثم رجعت بصت للباب.
كانت عايزة تكلم أمها.
عايزة تسمع صوت حد يقول لها إن اللي بيحصل دا مش طبيعي، وإنها مش غلطانة لمجرد إنها حاولت تعيش في بيتها من غير خناق.
لكن خوفها من إن الكلام يوصل لمحمد كان أكبر.
فـ ضلت مكانها، ساكتة، مستنية صوت مفتاحه في الباب.
ومستنية اليوم ده يعدي.. 
روحها رطعتلها لما لقت محمد اخيرًا بيفتح باب الشقة وشايل أكياس الأكل، جريت عليه وحضنتُه جامد وهي بتشهق.. كإنها خارجة من سباق ماراثون. 
إتصدم إنها بتترعِش فـ ساب الأكياس على الأرض وهو بيضُمها ليه وبيطبطب على ظهرها وقال بقلق: مالِك يا حبيبتي، حصل حاجة وأنا بجيب الطلب. 
مسكت ياقة قميصُه بإيديها ودموعها بتنزل ورا بعض لدون توقُف وهو بيمسحهُم، وقالِت برجاء: أرجوك يا محمد نأجر شقة ونعيش بعيد عن هنا، أنا تعبت أوي طول الوقت خايفة أخد ذنب تتخانق مع والدتك بس مبقتش قادرة، دي بتهين فيا وفـ اهلي طول الوقت. 
حاوط وشها بين إيديه وقال بحُب وهو باصص لعينيها: حبيبي اهدي، وفهميني هي عملت حاجة لما أنا مشيت؟ 
بلت شفايفها اللي جفوا من كُتر العياط، كان بقالُه كتير مقربلهاش من بداية جوازهم بسبب ان والدتُه ليل ونهار متفرغة ليهم، تخبيط على باب، رن على الفون.. تعمل أي صوت أو تعمل نفسها تعبانة عشان تبعدُه عن حُضن مراتُه. 
حركة شفايفها اغرتُه فـ مال عليها بـِ هدوء كـ رجُل، بيقتنص حقُه. 
حست ميرنا إن غضبها بيتلاشى بس دموعها مبتوقفش. 
ومحمد إندمج معاها تمامًا.. 
لغاية ما بعدت ميرنا وهي بتقول بغثيان: مش قادرة، وسع. 
جريت على الحمام ومالت على التواليت وهي بترجع جامد. 


Ghazal
Ghazal
تعليقات