رواية فراشة في جحر الافاعي الفصل الثالث بقلم تراتيل
چنك حظي
ساعة وياي ما كاعد
وأجيك بضحكة مواعد
بس الگاك حيطان الضريح
بكل وقت بارد
____
______
تركيه: شاذية هاي افكارج شيليها من
راسج بنتي صغيره ماازوجها
شاذية: دخيلج سكتي سكتي ترديها تعنس
اني ازوجها وعن قريب
اني جيهان:: وعيت على حياة مليانة مشاكل عرك
تشتت قيل وقال وابد ما تخلو من مشاكل امي
وابوي الي حتى على الاشيء يتكافشون
معاملة امي وياي مثل معاملة الحمامة ويا اطفالها
تشيل اللگمة من حلگها تحطها بلحگنة تسوي اي
شي حتى انعيش وما انحس بعازة شي لو بنقص
لحد ما دخلت على حياتنة شاذية
الي جنت اشوفها الساحرة الشمطاء او اسوء
انسانة على وجه الكرة الأرضية هذا الي جنت
اتوقعة الحد ما شفت الاسوء منها
المهم بقت تنگ على زواجي وأي مرة تجي تلح على
ابوي حتى ينطيني بس جان اكو شي براسه
لو الي يجون ما يعجبو لحد ما حبلت شاذية
مرة ثانية وحظها هم گعد جابت ولد ثاني بيومها ابوي انخبص خبص وما قبلت تولد طبيعي
سوينالها عملية بذاك الوكت وبمستشفى اهلي
من طلعت من العملية ابوي جاب حولي ذبحة
تجرات دم السلامتها وعزم گرايبنة سوة سفرة
شگدها شكبرها الها هيه مو يگلك شاذية
عبالك صارت السلطانة هُيام تباوع علينه بطرف
عينها وشايلة خشمها علينه اني وامي نركض
للخطار وبين الطفل وبين شجن وهوسة الناس
اجو اهلها طلعنه لحم من الذبيحة وطبخنة
ذاك الغدة سوينة سفرة شگدها شكبرها
خلصت العالم اكل كعدت اني رجلية
تون عليه من الوجع والوگفة من الصبح لليل
ثلاث ايام احنه مخبوصين هيج
تركية: گعدي يمة اني اسوي چاي تعبتي
جيهان: اي والله ماما تعبت بعد ولا بية اوگف
تقربت عليه مسحت وجهي وعيوني باستني
بين عيوني شمت شعري باوعنه للصاله لگينه
شاذية جاية من بعيد لازمة عمليتها كمت مفرغتلها
الكرسي حتى تگعد بي وگفت بباب المطبخ
كشت وجها ومدت لسانها صارت تصيح وتهز براسها
شاذية: انتن ما تستحن والله ما شايفة مثلجن
شبيجن ما تعرفن اطبخن مثل العالم فشلتنة
شطول الوحدة شگدچن شكبرجن غده ما دبرتنه
عابت هلشكول اي والله
تركية: خياطج لا يطگ شبيج
شاذية: ههو كلششش حنيصة
بقينه مفهين بوجها وما حجينه حجاية زايدة
امي صبتلها صينيه وديتلهيا گبت بوجهي
شاذية: ماااريد شيليهاااا لا خلفتله عليچن
هو هم تكل هذا يلعب النفس گبر طكچ
وطم امچ
_اسكتي يمة هاي بيهم دود منچ شلون
جبتي ولد كامن يتناكثن
جيهان: خالة شنو هل حچي فوگ ما خادميها
وجاي انساعدها
شاذية: هم عوزچن
تركية: جيهان تعالي يمة كافي شوفي شجن
وين شنو دا تسوي
رحت اخذت شجن گعدتها بلغرفة وكلتها
وطلعتلها ملابس اريد اسبحها وعاطت شاذية
شاذية: انيييي اريد اسبحححح وين ماخذتها
لو هيه وزة تردين توازيني خست صار كم يوم
ماسابحة ماتعرفن ما تگولن مره والدة توهة
مداراتچن هاي مااشتريها بفلس ونص
تركية: ماله داعي هذا الكلام تردين هسه
اغسلج لا تضلين تسوين سوالف
حضرنالها الحمام وسبحناها وهم تعيط ومانه
علينه يگلك الخدم مالتها للعصر وطلبت اسويلها
تكه لحم شويتلهيا وطلعت سله ملابس مركومة
ركم ملابس وصخة حطيتهن بطشت غسلتهن الها
بقينه هيج على هل وضع فترة والله شنو مابيها
نفسيتها تعبانه مسوية عملية
عده كم شهر على ولادتها گال ابوي انسوي حفلة طهور الولدها انطانة فلوس نشتري فساتين
بسيطة نكشخ بيها بيومها عبالك عدنا عيد
اني وامي وشجن اخذناها ورحنه للسوگ
نشتري فرفرتنه السوگ فرارة شتشوف ماريد
ما عجبني ايع مو حلو رجلينه صارت خيوط وهيه
ما عاجبها شي
اخذنه اني وامي فساتين عجبتنه وطلعت حيل
حلوة علينه امي گالتلها راح اخذ چراچف
هيه هم اخذت بس مااشترت فستان
رجعنه للبيت هيه گالبة وجها طبينه
محمود: ها ششتريتن
گعدت فرحانه طلعت الغراض كدامه اريد
اطلع فستاني وهيه گبت علينه
شاذية: اييي قشمرتن عليه اشتريتن
لرواحتچن ومااشتريتلي
تركية: لعد مو اخذناج ويانه وشنو تشوفين
ما يعجيج وطلعين فرفرناج السوگ
شاذية: والله ضحكتن عليه حتى تشترن
التردنه وبقيت اني بدون ملابس حتى العالم
تضحك عليه حقيرات ماتستحن والله
هم سوت جنبش شكبره خلتنه مفهين على
الغلط والحجي مالتها ماانعرف لا نگابح مثلها
ولا نغلط ونصيح ثاني يوم الصبح اخذتها امي وراحت هيه ماعدها ذوق وماتعرف تختار وكاتلها القهر وتستنكف اذا كنالها هيج اخذي لحد ما اختارت نفسنه ورجعت
صار الطهور اني وامي نركض مراكض
وماملحكين وهيه كاعدة بحجة يم ولدها
لا سوتلها شغله لا غسلتلها ماعون وباقية بس تتآمر
هيه وحبايبها خلصت الحفلة وكلشي خلص
جرينه نفس فترة ورجعت توز وتزن براس ابوي
حتى تزوجني والخطاطيب تجي واني
ارفض تالي ابوي قفل على ابن عمته ايريد
ينطيني اله وهيه تنگ براسه
شاذية: اي انطيها اخلص من همها وانت منطيهم
اختك يعني تعرفهم هما شنو
محمود: اي هو اني هم كلت الشين النعرفه
احسن من الزين المانعرفه
جيهان: بس بوية اني ماشايفته ولا اعرفه
شلون راح اخذه
شاذية: ليش بت تركية تريد تاخذين
على حُب وعشق ومعشقة؟
تركية: كافي شاذية احترمي نفسج
شنو تحجين هيج على بنتي مثلا شنو قصدج؟
شاذية: والله قصدي واضح من كتلتي روحج
من خطبها ابن اخوج وهيه عجبها الوضع
وخلقجن تگلبت من رفضهم محمود شنو معناها؟
تركيه: شاااذية صوني لساانج ترا كلشي
اعبرلج بس هينا توكفين وتلزمين حدودج
محمود: بعدد كومنن تمالخن بلسجاجين
يلا شمنتظرات ولا عبالك رجلجن كاعد ماتستحن
جنجن بيوت البتاوين لا سداد ولا رداد
اكعدن وتنلصمن كلجن لا اركع راس براس
تركية: جيهان كومي اخذي اختج وطبي
للغرفة وانت وياها سالفة العرس هاي شيلوها
محمود: لا والله؟ وطالعلج لسان ست تركية
اسمعي انتِ وبنتج الها مهلة اسبوع تفكر
رضت خير واهله ما رضت طبها مرض غصبا عليها
اسمعهم يتصايحون وگلبي مخموش اني
ما اريد اروح المكان ولا اريد اتزوج اريد اكمل دراستي ماعندي هيج فكرة ابد دخلت امي
نزعت شالها وبجت اني وشجن واكفات نباوع عليها
كاتلنه القهر بس مابيدنا شي انسوي لا الها ولا ألنه
اجو بعد كم يوم حتى ايشوفوني هو وامه
واني هم شفته جان ابد مو يم الانسان الي اني
اريده ولا يم ستايل ذاك الوقت ما يشبه احلامي
ولا يوصل الذوقي بس طلعو بچيت وبقيت
اصيح مااريده ماريد اتزوج ابوي معمي على عيونه
من ورى شخصيته وكلامه بس ما ايحس بيه
يومين يرحون ويرجعون يردون ياخذون
الموافقة واني معانده
محمود: هو رضيتي ولا مارضيتي انطيج
اله فا اقبلي وانت مقتنعه احسن الج
جيهان: بابا والله بعدني صغيرة فدوة
خلي اكمل دراستي مااريد اتزوج
شاذية: شخبصتينه يكلك جاي درسين
ماحستير هو كله ثالث متوسط اذا متقبلين
ايبطلج اخذي وكملي دراستج يمه احسلج
جيهان: ما ما مااريدد
تركية: حرام عليك يا بشر اتقي الله
البنية ما تريدة هيه گوة؟؟؟
محمود: انتِ اسكتيييي
المن ضاميها انسويها طرشي خوش ولد وخريج
وعاقل بعد شنو شكو هل تأخير وهيه جاي تكبر
رحت للغرفة گعدت حاضنه رجليه ابچي اريد
حجة اريد شي ايخلي يستوعب اني مااريد
هل شخص ولا متقبلته اجتي شجن يمي تمسح
على راسي وتبوسني حضنتها الي
تذكرت عمتي اخذت تليفون امي جان توه نازل
ابو الدگم الطابوگة اتصلت على عمتي اول ما فتحت خط حجيت وياها واني مختنكة وافرفح
جيهان: عمة فدوة حاجي ابوي
زهرة: عمة شكو شبيج شصاير؟؟؟
جيهان: ايريد ينطيني الـ سالم واني
مااريد اتزوج حبابة قنعي كوليله مااريد
اني بعدني صغيرة والزواج مسؤلية
چبيرة والله مااگدر عفية كليله
زهرة: والله يا عمة تدرين بأبوج ما ينحجي
ويا وحچايته ما تتبدل شبيدي عليج مااكدر
بس كولي الامي تحاجي بلكي يقنع
سديت الاتصال منها ومسحت دموعي
انتظرت بيبي تجي للعصر واني لگمة ما حاطه
بحلگي وجهي اصفر وروحي رايحه من البواچي
بس دخلت لزمتها ابوس بأيدها اتوسل الها
احجي بهمس حتى شاذية لا تسمع وتذب سمها
جيهان: بيبي عفية فدوة اروحلج حاجي
ابوي لا ينطيني مااريد اعرس حبابة
والله بعدني صغيرة
صگبة: هاي امج مدرستج؟ منيلج هل حجي
كونج تغسلين بعد وينج صغيرة؟؟
جيهان: لا لا لا والله اني اني مااكدر
اتحمل فدوة لا تخلي ينطيني
صگبة: كومي ولج بت تركية انستري بيت
رجلج احسن الج ما تضلين مدكة ومدمغة بيد شاذية
رجعت للغرفة اسحل بروحي مأيسة من كلشي
بليل اجه عليه حتى ياخذ مني الحجي
محمود: ها هسه شگلتي؟
جيهان: ما موافقة
كام قفل باب الغرفة ورجع كعد گدامي عيوني
بعيونة زكلبي يدگ براسي من الخوف
محمود: شوفي اگلج شي تردين ترضين
تردين ما ترضين اني انطيتهم كلمة وهما
باجر يجون وغصبا عليج ترضين
جيهان: اني ماراضية ومو بكيفك هاي
حياتي اني اوافق لو ارضى
فر راسي براشدي وحجة ببروود
محمود: خاف نسيتي ويامن تحچين
اني انطيتهم كلمة وهما باجر جاين
جيهان: باجر عندي دوام مااكدر
وعندي امتحان
محمود: مو مشكله من ترجعين يجون
وشايفة والله يا جيهان اذا ما لبستي وما كشختي وما تلكيتيهم لو گلبتي خلقتج شايفة شسوي بيج
ما تتخيلين الي راح اسوي
رجف جسمي من الخوف وگلبي ع گد ما يدك
احس تعب بگد ما اني تعبت ما شفت شي من
النوم للصبح دموعي ما وكفت بدلت وطلعت
للدوام الامتحان ماادري شلون امتحنته
حالتي تبچي كاضيتها تصفن بحد ما رجعت
واني بس اريد افكر شلون اخلي ايبطل
صارت بـ 2 الظهر واني ما مبدلة شوي ودخل عليه
محمود: شو لسه ما مبدله؟؟
جيهان: ما ابدل
محمود: گومي بدلي لا اجي اطيح حظج
والله اطلعج زرگة الهم امشي بكرامتج
احسن الج
عافني وطلع سحلت دشداشه حمرة عندي
احبها لبستها وعدلت شعري شلون ما چان
ولفيت شالي وطلعت
لكيتهم جاين كبل صاحني ابوي ودخلت
سلمت عليهم وكعدت اباوع عليه ابد مو نفس
الشخص الي اني راسمته بمخيلتي
اكرع واسمر جان لابس تيشيرت جوزي وبنطرون
جوزي ووجهة جوزي صاير تطقيم كامل غميت
روحي على هل حظ انتبهت امه تباوعلي ورافعه
حاجبها ابتسمت الها مجامله فرت وجها مني
حجيت بكلبي
جيهان: عشتووو فوگاهاا
ام سالم: دام جينه بعد خنقرا الفاتحة
ما دام وليدي اقتنع ونمشي انجيب النيشان
ونجيكم حتى انسوي حفلة خطوبة بيناتنه
اباوع بلوجوه مصدومة لساني مشدود
مااگدر ارفض يا نيشان يا خطوبة اني ما اريد
المن احجي الخنكة صعدت من بلعومي لعيوني
فاضن بعد مااكدر اتحمل واضمهن اكثر
محمود: ليش شوكت تردوها انتوا؟
ام سالم: مستعجلين والله
محمود: خير ان شاءالله يعني شوكت تعقدون سيد
ام سالم: هو بعد نفضها اليوم
جيهان: شنووو؟؟؟؟!!!
شكرا لزيارتكم عالم روايات سكيرهوم
