رواية لا أمان لك الفصل الخامس بقلم ورود الخالدي
يعمر::::
طبعا ويه العبارات الاخيرة الي كلتهن الها صارت وكفتي يم باب بيتهم....من كتلها انتي تعرفين شبيج وما احب انزل لمستوى اوضحلج بيه ليش وشلون وشبيج توقعت راح ترد عليه لان هي من النوع الوكحة وردودها جاهزة على طرف لسانها..بس انصدمت من بقت تباوع بعيوني ساكته ومردت تمنيت ترد عليه بحرف حتى لو تشتمني بس سكتت..خرررب عمي بسرعة دمعن عيونها..خرب يومك يعمر بجيتها يله ارتاحيت..المفروض ارتاح لان رديت الها اهاناتها..واذيتها لدرجة سكتتها وبجيتها بس بصراحة ابد مرتاحيت لان هي بسرعة دمعت ومحجت وفتحت الباب وحتى ملتفتت عليه بسرعة سحبت خيط الباب وفاتت ركض عبالك تريد تنهزم مني..حيل تاذيت من دخلت هالشكل..لك يعمر انت شكد غبي ..ومتعرف تسولف ..مو هالشكل مو هالثخن شلون كلبك انطاك تعيرها بنقص بجسمها وهي بنيه والبنيه اصعب شي عليها..هالشي متحملت ابقه بالسيارة بسرعة نزلت اعرف بابهم بسرعة تنفتح بسرعة فتحته بعدها تمشي بالممر حست بالباب انفتحت التفتت اني قبل متحجي ركضت يمها..وحتى بدون ما افكر كتلها:
امنية..لتبجين بروح ابوج لتبجين..!!
وارتاحيت من خنزت بكل فتحة عيونها الكبار وزمخت بيه!!
لك..لك انت وين فايت..وين..اطلع من بيتنا..شنو بيت الخلفوك وكلما يعجبك تسحب الخيط وتفوت ..متعرف بيوت الناس الها حرمة..
طبعا تحجي وصوتها..كله عبره دمرتني عبرتها خو دموعها مردته الكلبي مرد..مهتميت لحجيها كتلها:
اي بيت الخلفوني ..لخاطر الله لتبجين اعرف دست بالحجي..وياج مو قصدي..هالكد أأذيج لتبجين!!
ادنت يمي ودفعتني ..
لك اطلع من بيتنا شعليك بيه ابجي ما ابجي شعليك انت؟؟
مهتميت اصلا دفعتها خفيفة
شلون شعليه غير حجيي المخربط بجاج!!
وخرت اديها وادنت ليوره خطوه وكالت:
لك منو انت حتى اهتم لحجيك..لو تحجي للصبح متبجيني!!
هههه تحجي ودموعها يجرن وتكولي متبجيني فكلت:
وهاي العيون الحلوة اليجرن مثل المطر شنو بيهن..دموع لو مي مقطر!!!!..امنية صار شهر ونص متأذي من كلامج وحجاياتج هيج حافراته الكلبي حفر..يعني اذيتني واني وحق ربج محد يكدر ياذيني اصلا لابس العالم كولها وما اهتم لحجي اي بشر..بس انتي من حجيتي اعترف حيل تاذيت ومن حجيت وياج قبل شويه ردت ابرد كلبي بيج واضوجج..مثل مضوجتيني..
مسحت..خدها حيل وكالت:
انسه..يعمر انسه متكدر تضوجني شخص مثلك ميكدر يضوجني!!
لا..هاي سولفيها ع الدبة..حيل ضوجتج وبجيتج اني حاس بهالشي..اعرف صعب الي كلته وعيب عليه اكول هالكلام لبنيه ..بس قسما بالله تره مرتاحيت من شفتج بجيتي اصلا تاذيت اكثر منج!!
رجعت دمعت مره لخ بس هالمرة دمعت بعصبيه ورجعت دفعتني وصرخت بوجهي:
لك انت شنو من بشر..بس فهمني منين الله خالقك..يعني عبالك من تكولي ..تأذيت اكثر منج..راح تأذيني اكثر!!
شلون يعني والله مدا افهم عليج!!
اي هذا قصدك انت خبيث وشيطان تكولي متاذي لان بجيتج حتى اني اكعد اكابل حظي واكوله خرة بيك من حظ وج امنيه حتى اليكرهج ..يشفق عليج ومتاذي بسبب حالج مو!!
خررب..لج..لا..لا..ابد مو هذا قصدي !!
ادنت ليوره عبالك حتلقي محاضرة عليه وكالت بحركة:
اسمع لك..تره حجيك لا يقدم ولا ياخر ولا يبجيني او يخليني اشعر بالنقص ؟؟
من كالت نقص حيل خجلت كلت خليها تحجي حتى لوتغلط ..تشتم خليها خطية خلي تبرد كلبها..وترتاح فكتلها:
اني مكلت بيج نقص!!
لا..هو هذا جان قصدك ..بس حجيته بشكل مغلف حضرتك متحب تنزل لمستوى توضحلي بيه قصدك وهو بالمختصر انتي عرجة وبيج نقص..ومحد مكلبج ولا راح يكلبج..مو!!
امنية!
اسكت خلي اكمل كلامي.. اي هو هذا جان قصدك ..بس شوف ما احتاج تذكرني بالنقص البيه لان اني اصلا ممهتمتله ولا مخليته فد حاجز كدامي ..لان هذه خلقه رب العالمين ..وما اكدر اعترض واكوله ليش خلقتني هالشكل لو رجعني للعطار حتى رجلي تصير مثل الناس..بالعكس اكول احمدك واشكرك ربي على كل نعمه انطيتناها..خلقتني حلوة ومعدله وشريفة وعقلي..يوزن الدنيا..وخليت بيدي صنعه معيشه عائلة كاملة ومتكفله بمصاريفهم من توفه بابا لليوم..يعني اني انسانه عندي انجاز بحياتي ونجاح زلم مشوربه متكدر توصله...تره الزواج ما اعتبرة انجاز ولا الارتباط برجال هو اول لو اخر احلامي..لا والله بعمري..ممخليه فكرة الزواج هدف كدامي...ولا ضايجة لان محد دك بابي الى ان صار عمري ٢٨سنه ابد..ومكتفيه بهالقناعة لان مجر الاكتفاء بهالقناعة اعتبرة كنز..اما بالنسبه الك الي دتحجي ترس حلكك ومكيف بنفسك وتكول حتى اذا اني مو خوش ادمي.. اكدر بفلوسي اجيب احسن عروس احب اكولك انت متوهم ..تكدر بفلوسك تجيب عروس بس لتسميها احسن عروس لان البنيه الي تاخذ واحد مو خوش ادمي ع مود فلوسه رخيصة..وبايعة نفسها مثل السلعة الي بالسوك والي يشتريها اي واحد يدفع اكثر..
من سكتت بقيت صافن بعيونها المدمعات شنو من بنيه هاي شالثقه الشايلتها بعدين حجيها عن نفسها وقناعتها صفني ..كل حرف طلع من شفتها الحلوة..خلاني ابتسم بداخلي..وين اكو هيج بنيه ..وين اكو هيج عقليه ..رغم دموعها يجرن تكدر تعبر عن الي بداخلها هيج بكلام متسلسل خرررب فشلتني تكولي تكدر تشتري مره بفلوسك بس مو احسن مره والله حجيها معدل.. من شافتني صفنت عليها كالت:
شبيك انسطرت يله ..اخذت الحجي الزين..روح منا..بسرعة..!!
ههههه..هاي هيه خلصتي..!!
اي خلصت..
خاف عندج بعد حجايه منا..منا كوليها وبردي كلبج!!
مسحت خدها وكالت:
لا حاليا معندي ان شاء الله ارتبلك حجي جديد ع الجايات!!
اباوع بعيونها مبتسم افكر هسه شسويلها يعني الزمها اعضعضها..واريح كلبي بيها اي والله مال تعضعض هالخدود وهالشفايف الوكحات ...هاي منين طلعتلي بالله لاع بالي ولا ع خاطري اصادف هيج بنيه مختلفه عن كل بنات هالدنيا..تكدر تعصبني وتكدر تثيرني لا وفوكاها ما اتحمل دموعها ومطول خلك وياها وواكف اسمع حجاياتها الي تسطرهن عبالك محفوظة حافظتها ع الغيب..وجاي ع نفسي ومتحمل تكولي انت موخوش ادمي هاي لو واحد كايلها جان عدمته من الدنيا بس هي ..مكابلها وواكف اسمع لا وفوكاها اكولها احجي بعد..ههه متونس على حجيها وع صوتها المليان عبرات..
انتبهت اني ساكت وافكر من كالت:
يا الله شبيك صافن بوجهي متروح منا!!
ههه هو الي يشوفج ويسمع صوتج وحجاياتج شلون ميصفن
ابتسمت وغمزتلها احاول الطف الجو بيناتنا بس هي بسرعة ردت
لك انت شكد مستهتر..شنو هالحركات شنو تغمزلي..شهالحركات مال السافلين..؟؟
اي صح اني مستهتر ..غير معلوماتج عني مو خوش ادمي؟؟
واني ما ابقي ولا استقبل احد مستهتر ابيتي!!
ههههه..بس انتي مستقبلتيني اني دخلت وحدي يعني باللغة العربيه (دخلت..بيتكم عنوة واكراها)
مدت ايدها لزمت قميصي عبالك جاهل وتريد تشحتني:
ديله حباب..روح منا لتضل تتفلسف!!
متحملت حركتها...اصلا كوه لازم نفسي منها..موتتني الف خيال صار براسي من وراها..بس ما اكدر ابادر لو اخذ منها لاحق ولاباطل..اصلا ما اكدر اسولف الاحساس الناري الي حاسه واني مكابل عيونها باي لحظة ممكن اجفتها...بس من لزمت قميصى وكالت روح منا متحملت بسرعة جريتها وحضنتها شسوي ع الاقل خلي احضنها..وابرد كلبي..من حضنتها بسرعة زمخت بيه:
لك هدني شبيك تخبلت.!
مو كتلج دخلت لبيتكم عنوة واكراها وبصراحة ابالي هواي شغلات ممكن اسويها هم عنوة واكراها!!
لك هدني هدني..!
اهدج بس سمعي هالكم كلمة مني وافهميهن:
لزمت ركبتها وخليت..خدها ع خدي وكلت قريب من اذنها!
شوفي لحد اليوم الصبح اني ..ممحسب اخليج ابالي بس من هاللحظة اعتبري نفسج صرتي ابالي وخلص!!
دفعتي وتراجعت :
لك شنو ابالك ..سد حلكك شلون تحضني هالشكل ..و..و
كملت ..عنها:
هههه شلون احضنج واخلي خدي على خدج مو..شوفي..اخليج ابالي يعني هاي هيه قررت اجيبج للدرب...برضاج لو بغيره!
تجيبني للدرب شنو..اي درب هذا!!
دربي...درب يعمر الموخوش ادمي..😱😱
بقت صافنه بوجهي يمكن مفهمت شنو معنى عبارة اجيبج للدرب اي بنيه مثلها وين تعرف حجي السرسرية..الي نكوله احنا الشباب عموما خليها لتفهم. احسن.بس بيني وبين نفسي اكول خلص ..صارت ابالي وهيه الجابته النفسها والله اله اجيبها للدرب وهذا الكره وشيله الخشم والحجي الي ..اطشره بوجهي اله اخليها تبدله منها ومن كيفها..صح هي مو سهله ..بس كل بنيه الها طريقة معينه افوتلها منها..لو اعرف اسوي..الميصير هاي هي دخلت براسي وقفلت عليها....
عفتها مشيت كم خطوة رجعت سالتني:
تعال جاوب...شتقصد ..شنو اجيبج للدرب؟؟
التفتت عليها:
تره حيرتيني مره روح منا ومره تعال جاوب!!
اي جاوب ..شنو قصدك مفهمت؟؟
احسن!!
طلعت من بيتهم صعدت سيارتي وحركت ..صح الموقف الي صار قبل شويه محلو يعني خطية بجيتها ....وحاولت ابقى هاديء واسمعها تحجي للنهاية بس من طلعت اكو فد ابتسامه واحساس ارتياح مو طبيعي..بداخلي. بس لا لاما اعتقد اني مرتاح لان اذيتها لاوالله اصلا ضجت من بجيتها بس يمكن احساسي هذا ناتج لان بالاخير حضنتها وحجيت هالحجايتين باذنها..او يمكن لان ..كدرت اسيطر وما اجفتها...ههههه همزين طلعت من يمها اعرف نفسي دنيه خصوصا هي حيل عاجبتني ليش اجذب اخرب ع البنيه الوكحة الي متسكت على حقها بعدين شهالرقه تحجي وتبجي..والجفون صارن حمر والخدود قصه ثانيه وتكولي متبجيني واحد مثلك ميبجيني..ههههه...والله لو باقي بعد خمس دقايق جان جفتتها... والي يصير يصير😳😳😳
وهسه يعمر..خطط وتكتك وشغل الجمجمة..وشوفلك طريقه تفوتلها منها..بس شنو الطريقة الفلوس متفيد لان هاي شريفة مو مال فلوس الحجي الحلو ميفيد لان هاي تعرفني ابو نسوان..وموخوش ادمي اي كلمة حلوة راح تعرفها ..وتفهمها وتكشفها....اتقرب منها واسوي نفسي ..متأثر بكلامها وراح اغير نفسي ع مودها لان كلامها غيرني هم متفيد هاي ذكيه مستحيل تصدك واحد مثلي يتغيير بين يوم وليله ..كولهن ذني ميفيدن لعد شلون شسوي لازم اكو فد ثغرة افوتلها منها..
امنية:::::
طلع من يمي خلاني اتصفن هذا شبي شيقصد شنو اجيبج للدرب شنو هالعبارة الي تشبه الوعد مدري التهديد مدري التحذير اشو ممفهومة يعني شنو واحد يكول اجيبج للدرب ..عابت ..خربطة لعقلي فتت جوه كلت لنفسي خلي يولي...شكو شادتله راس ..خلي اتجاهل كلامة اصلا غلط ابجي كدامة بس شسوي اول مره احس انه موضوع رجلي ممكن يأذيني هالشكل ويبجيني شكد ناس تسالني لو تتعاطف وياي صح حجيهم وتعاطفهم يضوجني بس ابد مخليته فد يوم ياثر عليه لدرجة ابجي هالكد..ورغم اسولف هالشكل ويه نفسي هم رجعت دمعت وبجيت وخليت اديه ع عيوني وفرفحت وحدي ..بعدين كلت استغفر الله..استففر الله لا اعتراض على حكمك وقدرك وخلقتك الي استغفر الله وكمت غسلت وجهي وطلعت قماش حتى افصل نفنوف لبنيه ..موصيتي بس لزمت المكص وردت اكص اتذكرت وجهه من كلي محد مكلبج ولا احد راح يكلبج مستقبلا..هم بجيت..حيل جرحني حيل ..بس مو صوجه وحده اني هم ادب سز شكو احجي ويا..شكو اتبادل ويا كلام خشن..واحد معرفتي بيه مجرد اخو زوج اختي واعرف اخلاقه شكو افتح حلكي واحجي ويا..اكيد اليدوك الباب ياخذ الجواب واني مو بس دكيت بابه لاوالله فلشته شكو كايلته واحد بعمرك عنده دسته جهال ..لو عشتو انت منو تاخذك بله هو هذا حجي مال بنيه مؤدبة ومربايه طبني مرض وسم استاهل والله..المفروض وحدة مثلي تخلي بينها وبين شخص مثل يعمر الحقير الف ..خط احمر متتجاوزه هي ومتسمحله هو هم يتجاوزه ..بعدين شنو ميانتي ويا ..واحجي ويا ترس حلكي..والله عيب عليه وهذه مو اخلاقي..ابد ....عزززة..عزززة بعيني شلون حضني قبل ميطلع وخله خده ع خدي ويحجي باذني ذاك الحجي..شهالميانه...بس هم موصوجه اني الي سمحت للامور بيني وبينه توصل لهل مواصيل..صفنت ..ع الي صار واخير شي قررت فعلا اخلي بيني وبينه الف خط اي هو هذا الصحيح ولد غريب ..لا ارد عليه ولا اتلاسن ويا ..ولا اصلا اسمح لاي موقف يجمعني بيه وحتى لو صار موقف عابر وانجمعنا بحكم علاقة النسابة البيناتنه اتصرف عادي حاله حال اهله كولهم يعني بالضبط مثل ما اعامل صفوان لو اخو منقذ لو عمو هم اعامله نفس المعامله....ما اخلي الي صار بيناتنا فد موضوع يجمعنا ويوصلنا لموقف سخيف مثل الموقف الي صار قبل شويه اي هاي هيه هذا احسن واعقل تصرف..
مرن اكثر من شهرين الحمد لله مشفته ومجمعني بيه اي موقف ..اني هم بعد قراري الاخير كلت عادي حتى لو شفته ما اهتم واتصرف طبيعي الى وفعلا كولشي طبيعي والايام تمر اني ملتهيه بشغلي وماما مرات تروح ع نازك وترجع لو تاخذ رفوله كل اسبوعين تجيك وضعها يم الدكتور يعني ماكو شي جديد الى ان بيوم من الايام جتي ماما من يم نازك حيل فرحانه..وكالت:
وج امنية راح تصيرين خاله واني راح اصير بيبي!!
شنو يعني!!
ياااا...وج غير نازك حامل!!
صدوك..الله شلون خبر يجنن
اي والله هي هم طايرة من الفرح خو عمتها والشايب فرحانين اكثر منها؟؟
هههه نازك تصير ام ههههه..راح تلوصها لوص علينا!
اي والله هي..عقلها مثل عقل الجهال شلون ادبرها وتخلف!!
هههه
يربي كون تجيب ولد!!
يوم شهالحجي ولد بنيه كوله رزق!!
لا والله اتمنى ولد ..حتى متضل محرومه من خلفة الولد مثلي!!
ليش اني شبيه مو تكوليلي انتي بالف رجال!!
اي بعد امج بس مهما يكون الولد من يجي يفرح الام والاب وحتى العيال..واختج عيالها خوش اوادم ويحبوها!
الله كريم يوم شقاسملها ولد بنيه خير من الله نعمه تستحق الشكر!
اووف يمه..امنية اتمنى افرح بعرسج وبحملج مثلها!
اهووو..هم رجعنه؟؟!! دخلينا فرحانين بنازك هسه
باجر اروح شتكولين لو ترحين وياي!!
ليش غير هي خابرت كالت الخميس تجينا !
لا متجي الدكتورة تكولها حملج شوية ضعيف لتتحركين هوايه!!
هااا يعني متجينا هالفتره!!
اي متجي منا لما تخلص الرابع اني اكول اني وياج نروح!
اي ليش لا نروح..
وثاني يوم الظهر وره الغدةرحنا لنازك هم كعدنا بغرفتها وسولفنا وفرحنا وسناري حيل فرحت من عرفت راح نبقى للعصر سوت النا كيك وعصير وكعدنا كعدة حلوة ..بعدنا دناكل كيك وعصير شفته دخل..من باب المطبخ من فات وشافني مثل الي تفاجأ وابتسم ابتسامه خفيفة..وفات:
السلام عليكم
ماما كالت:
هله وليدي يعمر..
خوش جمعه متجمعين..اويلي مسوين كيك جيت بوقتي..
امه كالت:
شو اليوم تأخرت ..بعدين شنو راح تاكل كيك وانت ممتغدي مو يحرمك الغده..
لا اكلت لفات بالمعرض اليوم ما اريد غدة راح اكل كيك وعصير. وهاي هيه
كعد ع القنفه الصايرة كبالي كلت عادي اني مقررة اتصرف عادي بينما دياكل كيك شال راسه باوعلي
اي شلونج امنية عاش من شافج!!
كلت من دخل مسلمت عليه يعني المفروض من زمان ممتشاوفين واني جايتهم..وهو بده بالسلام فابتسمت وكتله:
الحمد لله بخير..انت شلونك!!
ابتسم بس احسه مثل الي تغيرت ملامحة من رديت سلامه بشكل عادي وكال:
اني بنص الخير..
سناري راحت جابت نفنوف وكعدت بصفي:
عفيه امنيه شوفي هذا النفنوف قماشه يجنن صار اسبوع من اشتريته بس طلع عريض ومقبل ابو المجمع ارجعه..يصير اخصره..شويه
باوعت ع النفنوف
اي يصير اني اخصره الج
هااا..لعد اخذي وياج..ومن تخلصيه دزيه بيد خاله
اي ادللي
تعالي خلي نكعد بغرفتي خلي نسولف هناك..كمت وياها ملتفتت عليه كلت هسه ياكل ويصعد فوك بس من طلعت من غرفة سناري لكيته بعده كاعد وبيده الريمونت كلت اذا عفته ورحت هسه يكول شافتني وتعمدت تروح فكعدت عادي ع التخم واسمع خاله وماما يسولفن بالمطبخ..يمكن دقيقتين والتفت عليه وبشكل مباشر كلي:
امنية اريد احجي وياج!!
اي احجي اسمعك!!
لا هنا مترهم اريد احجي وياج على انفراد
تره محد يمنا بس اني وانت بالصالة!!
لا..ميفيد الحجي هنا..
لعد وين نحجي!!
بغرفتي فوك!!
ليش يعني شنو هالموضوع المنكدر نحجي بيه هنا!
وشبيها غرفتي ومنحجي بيها ..كولي انتي متردين تنفردين بيه!!
لا مو هالشكل بس ليش انفرد بيك شنو صاير شي!!
واذا صاير شي ..وشي مهم تقلبين تحجين وياي ع انفراد لو اكو اشكال!!
اي اقبل..شنو الاشكال يعني احجي وياك عادي حالك حال اي احد من اهلك..
تمام..لعد خلي نصعد فوك نحجي!!
لا نحجي هنا....اشوفها صعبه كدام اهلك اصعد فوك معندي ميانه عدكم افتر ابيتكم..
انسي..انسي...غيرت رأيي ما اريد احجي
اجي اكعد يمك حتى تحجي؟؟ شكو يعمر شنو اريد احجي وياج شنو غيرت رايك..اكو شي:؟؟
تعالي كعدي يمي..
رحت كعدت يمه ع القنفة اول مكعدت باوع بعيوني وكلي:
شبيج!!
ههه..شبيه يعني..مبيه شي!!
اشو ..تتصرفين عادي ...كانما..واحد ميعرف اللاخ!!
يااا..شنو واحد ميعرف اللاخ ..انت..يعمر اخو صفوان واني امنيه اخت نازك ووتجمعنا صله نسب شلون واحد ميعرف اللاخ!!
هاي هيه!!
اي هاي هيه!!؟؟
هاي طريقة جديدة حتى تضوجيني بيها!!مو!
مفهمت !!
يعني طريقة جديدة..اسمها عامل الجاهل بالتجاهل..لو اذا ردت ترد ع احد. مأذيك رجعه لوضعه الاصلي وكانما متعرفه!!
ابد والله ماكو عندي اي نيه او اي طريقه اضوجك بيها.. من طلعت من بيتنا اخر مرة قررت انسى كل عبارة او جملة او اهانه تبادلناها اني وياك اي والله قررت اشمر كل موقف سخيف صار بيني وبينك وره ضهري وانساه اول وتالي انت اكبر مني وعيب توصل بيني وبينك الامور لدرجة تنبادل تجريح بيناتنا..وهاي هيه اعاملك مثل اهلك يعني مثل عمو وصفوان ومنقذ..حالك حالهم؟؟
عبالي كلامي راح يخلي عنده فد انطباع زين اشو هذا وجهه انكلب وكلي بصوت ناصي بس مليان نبرة تحذير:
اسمعي ولج..اني مو حالي حال ..صفوان ومنقذ وعمج..واذا تردين تكتليني..باللاابالي..هاي متفيدج..البيني وبينج بده من اول يوم شفتج بيه..ونهايته اني احددها مو انتي من راسج تقررين..افتهمتي؟؟؟
شكرا لزيارتكم عالم روايات سكيرهوم
