رواية ديون النبض الفصل الواحد والاربعون
في اللحظة دي، كنت حاسة إني محتاجة أي حد يضمني لحضنه، أي حد أحس معاه إني مش لوحدي في الوجع ده.
رغد قربت مني، وأخدتني في حضنها، وفضلت أبكي بشدة، كأني كنت مستنية اللحظة دي من زمان، اللحظة اللي أقدر فيها أسيب نفسي وأعترف إني تعبت، وإن كل اللي حاولت أستحمله لوحدي كان أكبر من قدرتي.
رغد: ليه ما قلتيش يا وعد؟ ليه ما قلتيش إن دكتورة جيهان أجبرتك على كده؟ أجبرتك إنك تبعدي عنه، وإنك تضحي بحبك عشانه؟
رفعت عيني وبصيت لها، وحاولت أتكلم وسط شهقاتي.
وعد: ما قدرتش يا رغد... ما قدرتش، صدقيني.
وبدأت أحكيلها كل حاجة، من أول كلام دكتورة جيهان معايا، ومحاولاتي إني أقاوم وأرفض اللي كانت بتطلبه مني، لحد ما لقيت نفسي في النهاية بوافق.
حكيت لها إزاي ضعفت قدام حالة مجد، وإزاي كنت شايفة مستقبله بيضيع قدام عيني، وإزاي اقتنعت إن بُعدي عنه يمكن يكون الطريق الوحيد علشان يقدر يكمل حياته ويحقق أحلامه.
وفي الوقت ده، كان ياسين لاحظ غيابي أنا ورغد، فبدأ يدور علينا، ولما شافنا قرب مننا، لكنه وقف مكانه لما سمع كلامي.
كان هو كمان بيسمع كل حاجة، وواقف مصدوم من اللي عرفه، مش مستوعب إن كل اللي حصل بيني وبين مجد كان وراه الوجع ده كله، وإن أنا كنت بحاول أحمي مستقبله بالطريقة اللي اخترتها.
بصيت لرغد، ومسحت دموعي بإيدي، وقلت لها بصوت مبحوح:
وعد: خلاص يا رغد... خلاص، ما بقاش في فايدة من الكلام دلوقتي.
ياسين بص لي وسكت لحظات، وبعدها اتكلم بصوت كان واضح فيه العتاب والوجع.
ياسين: أنا كنت عارف إن في حاجة، كنت حاسس إن في حاجة مش طبيعية بتحصل... بس ليه ما قلتليش يا وعد؟ إنتِ خنتي صداقتك ليا. ليه ما حكيتيليش كل حاجة؟ ليه شيلتي كل ده لوحدك؟
كلامه وجعني أكتر، لأني كنت عارفة إنه عنده حق، وإنه كان يستحق يعرف، لكني في الوقت نفسه ما كنتش عارفة أبرر له إزاي إني فضلت ساكتة طول الفترة دي.
فضلت باصة له من غير ما أقدر أرد، وكأن الكلام كله اتسحب من لساني.
رغد وياسين حاولوا يهدوني، وبعد شوية ياسين مسك إيدي، وتحركنا كلنا ورجعنا نقعد على الترابيزة وسط الموجودين.
لكن فجأة، بدأت أحس بتعب غريب... تعب عمري ما حسيته قبل كده.
قلبي بدأ يوجعني، وحسيت إني مش قادرة أستحمل وجودي في المكان أكتر من كده. حاولت أتماسك، لكن جسمي ما بقاش قادر يساعدني.
بصيت لماما وقلت لها بصوت ضعيف:
وعد: ماما... أنا مش قادرة أقعد.
سمير، اللي كان قريب مني، لاحظ إن حالتي مش طبيعية، وإن تعبي أكبر من مجرد إرهاق أو زعل. قرب مني بقلق، وبعدها راح سلّم على مجد للمرة التانية، واستأذن من الموجودين، وعرض عليَّ إنه يوصلني البيت.
ما صدقت إني هقدر أغادر الفرح وأبعد عن المكان اللي كل ركن فيه كان بيفكرني بمجد، وافقت من غير ما أتردد.
طول الطريق، كان سمير قلقان عليَّ جدًا. كان حاسس إن في حاجة غريبة بيني وبين مجد، وإن في كلام كتير مش مفهوم، لكنه ما قدرش يسألني عن أي حاجة، خصوصًا إنه كان شايف حالتي قدامه، وعارف إني مش قادرة أتكلم.
وصلني البيت، ودخلت أوضتي، وغيرت هدومي، وبعدها ارتميت على السرير.
وساعتها، رجع كل الوجع يهاجمني من جديد.
فضلت أبكي بشدة، وأنا حاسة إن كل حاجة انتهت، وإن الإنسان اللي حبيته وضحيت عشانه بكل حاجة بقى بعيد عني، وإن مفيش أي حاجة أقدر أعملها علشان أغير اللي حصل.
كنت مرهقة... موجوعة... ومش قادرة حتى أفكر.
وفي اللحظة دي، غمضت عيني.
لكن اللي ما كنتش أعرفه وقتها، إن اللحظة دي مش هتكون مجرد نهاية ليوم صعب، ولا حتى ليلة ههرب فيها من وجعي بالنوم...
لأن عيني اللي غمضتها الليلة دي، ما فتحتهاش تاني إلا بعد تلات أسابيع!
ديون النبض 🫀
بقلم الكاتبة مروة صياح ✍️🎯
بعدها ب 3 أسابيع، فتحت عيني أخيرًا.
كنت راقدة على سرير، لكن المكان اللي أنا فيه ما كانش أوضتي، ولا حتى سريري.
بصيت حواليَّ باستغراب، وحاولت أستوعب أنا فين، لحد ما بدأت ألاحظ تفاصيل المكان.
أنا في المستشفى!
بصيت جنبي، لقيت دكتور سمير قاعد قريب مني. أول ما لاحظ إني فتحت عيني، بص لي وابتسم، لكن عينيه كانت مليانة دموع.
سمير: الحمد لله يا وعد... الحمد لله إنك فتحتي عينك.
فضلت باصة له وأنا مش فاهمة أي حاجة، وسألته بقلق:
وعد: أنا فين يا سمير؟ وإيه اللي جابني هنا؟ إيه اللي حصل إمبارح؟
بص لي، ونزلت دمعة من عينه، وبعدها رد بصوت متأثر:
سمير: إمبارح وقبله وقبله يا وعد... إنتِ ما كنتيش فايقة لحاجة.
وعد: مش فاهمة يا سمير... إنت بتقول إيه؟
حاولت أقوم من مكاني، لكن ما قدرتش. قدرت أحرك إيدي بس، وده زوّد خوفي أكتر.
وعد: سمير، قولي إيه اللي حصل؟ أنا مش فاهمة حاجة!
دموعي بدأت تنزل، وهو بص لي بحزن وقال:
سمير: يا وعد، إنتِ في المستشفى، ومحجوزة هنا من تلات أسابيع. الفترة اللي فاتت دي كلها كنتِ بين الحياة والموت... وإنتِ دكتورة وعارفة إن حالتك كانت خطيرة.
بصيت له بذهول، وحاولت أستوعب كلامه، لكن عقلي كان رافض يصدق.
وعد: أنا عايزة أقوم يا سمير... أنا عايزة أقوم!
حاولت أرفع جسمي من على السرير، وحرّكت إيدي، وقدرت أرفع الجزء العلوي من جسمي بصعوبة، لكن لما حاولت أحرك رجلي، ما قدرتش.
بصيت له بخوف، وقلت وأنا بحاول أحركها مرة تانية:
وعد: سمير... أنا مش قادرة أحرك رجلي ليه؟
وشه اتغير، وبص لي من غير ما يرد.
وعد: إنت ساكت ليه؟ رجلي فيها إيه؟
سمير كان صوته بيرتجف وهو بيتكلم.
سمير: يا وعد... إنتِ دكتورة وعارفة.
وعد: يعني إيه؟ إيه اللي حصل في رجلي؟
ما ردش، وفضل باصص لي بعجز، وأنا حاولت أحرك رجلي مرة ورا التانية، لكن من غير أي استجابة.
وفي اللحظة دي، بدأت الحقيقة تتكشف قدامي بشكل مرعب.
أنا مش قادرة أحرك رجلي!
بصيت لسمير، ودموعي نزلت أكتر، وبدأت أتكلم بصوت مرتجف:
وعد: لا... إزاي؟ إزاي ده حصل؟ مش أنا كنت معاك إنت وماما وحازم وكلنا في فرح مجد؟ إيه اللي حصل بعد كده؟ أنا مالي؟ رجلي مالها يا سمير؟
سمير قرب مني، وعينيه مليانة حزن، وقال:
سمير: ياريتك قلتيلي يا وعد... ياريتك قلتيلي إنك بتحبي مجد.
بصيت له بذهول، وهو كمل كلامه:
سمير: كنتِ قلتيلي الحقيقة يا وعد. صدقيني، كنت هجيبهولك لحد عندك، وكنت هحاول أساعدكوا بدل ما تفضلي شايلة كل ده لوحدك.
وعد: أنا...
سمير: ما تقوليش حاجة دلوقتي. أنا عايزك تهدي، وما تفكريش في أي حاجة غير صحتك. إنتِ محتاجة ترتاحي، وكل حاجة تانية ليها وقت.
سكتُّ، وحسيت إن الكلام اختفى من لساني. كل اللي كنت بحاول أهرب منه رجع يواجهني مرة واحدة؛ مجد، والفرح، والوجع اللي عشته، وفوق كل ده، رجلي اللي ما بقيتش قادرة أحركها.
بدأت أبكي بشدة، وفجأة افتكرت أهلي.
وعد: فين حازم؟ فين ماما؟ فين ياسين ورغد؟
وكأنهم كانوا مستنيين يسمعوا صوتي، لقيتهم كلهم بيدخلوا عليَّ بسرعة.
أول ما شفتهم، حاولت أتكلم، لكن الخوف كان أكبر مني.
وعد: إيه اللي حصل لي؟ حد يفهمني! أنا مالي؟!
حازم قرب مني بسرعة، وأخدني في حضنه، وفضل يطبطب عليَّ ويحاول يهديني، بينما الباقيين كانوا واقفين حواليا، والدموع في عينيهم.
لكن أنا ما كنتش قادرة أهدى.
وعد: هو أنا اتشليت؟! إيه اللي حصل؟! يعني إيه مش قادرة أحرك رجلي؟! مش هقدر أدوس على رجلي تاني؟!
بدأت أصرخ بهستيريا، وأحاول أحرك رجلي، وكأني لو حاولت كفاية، هتستجيب ليا وأكتشف إن كل ده مجرد كابوس.
لكنها ما اتحركتش.
في اللحظة دي، سمير اتحرك بسرعة وجهز لي حقنة مهدئة، واداها لي علشان يقدر يسيطر على حالتي لحد ما هديت تدريجيًا، وغبت عن الوعي من جديد.
ولما فتحت عيني بعدها، كنت لسه على سرير المستشفى، وكلهم قاعدين جنبي في صمت.
عدت ست ساعات من وقت ما غبت عن الوعي، ولما صحيت المرة دي، كنت هادية على غير العادة، لكن الهدوء ده ما كانش معناه إني بقيت أحسن... أنا بس كنت لسه تحت تأثير الحقنة المهدئة.
بصيت لهم كلهم، وبعدها عيني راحت لرغد، اللي كانت باصة لي بقلق شديد.
رغد: إيه اللي حصل؟
رغد بصت لدكتور سمير، وكأنها بتسأله إذا كان هدوئي طبيعي، وبعدها رجعت بصت لي.
وعد: إنتِ بتبصي لي كده ليه؟ علشان أنا هادية؟ إنتِ ناسية إني دكتورة وعارفة؟ عارفة إن الحقنة المهدئة اللي أخدتها هي اللي مهدّياني بالشكل ده. أنا عايزة أعرف إيه اللي حصل لي!
ياسين قرب مني، وقعد جنبي على السرير، وبعدها أخدني في حضنه وقال بصوت مليان عتاب ووجع:
ياسين: ليه يا وعد؟ خبيتي علينا ليه؟ ليه ما حكيتيليش كل حاجة؟
ما رديتش عليه، وفضلت ساكتة وأنا بسمعه، لكن كان في سؤال واحد شاغل كل تفكيري.
وعد: إيه اللي حصل يا ياسين؟
سمير اتكلم، وبدأ يحكي لي اللي حصل من وجهة نظره.
سمير: أنا آخر حاجة أعرفها إني وصلتك البيت بعد الفرح. تاني يوم، لقيت حازم بيتصل بيا وبيقولي: إلحق أختي!
بص لي بحزن، وكمل:
سمير: لما وصلت، عرفت إن الحزن والضغط النفسي اللي مريتي بيهم اتسببوا في جلطة أثرت على رجليك. إنتِ كنتِ في عالم تاني يا وعد... وكل الفترة دي ما كنتيش واعية باللي حواليكِ. لكن الحاجة الوحيدة اللي كانت على لسانك طول الوقت كانت اسم مجد.
أول ما سمعت اسمه، دموعي بدأت تنزل من غير ما أحس.
وعد: فين مجد؟ هو عارف حالتي؟ عارف إن أنا بقيت كده؟
رغد بصت لي بتردد، وبعدها قالت:
رغد: مجد مش هنا أصلًا يا وعد... مجد مش موجود في مصر.
بصيت لها بذهول، وحاولت أستوعب كلامها.
وعد: مش في مصر؟ يعني إيه؟
رغد: مجد سافر الساعة اتنين بعد الفرح مباشرة. ما استناش لحد معاد سفره، مع إن كان لسه فاضل شهور. قال إنه مش هيقعد في مصر ولا ثانية واحدة زيادة.
فضلت باصة لها، وحسيت إن قلبي اتقبض أكتر.
وعد: طب... هو عرف حاجة؟
ياسين هز راسه بالنفي.
ياسين: لا يا وعد. إحنا كنا ملخومين فيكي، وكل تفكيرنا كان في حالتك، وما قدرناش نفكر في أي حاجة تانية.
حاولت أبتسم وسط دموعي، وقلت لهم:
وعد: علشان خاطري، محدش يقول له حاجة. إنتوا أكيد عايزيني أبقى كويسة، وأنا هبقى كويسة... وهعيش حياتي طبيعي. هو مش هيعرف إني بقيت كده. هو هيكون فاكر إن صحتي كويسة، وإن حياتي ماشية زي ما هي.
لكن أول ما قلت الكلام ده، دموعي نزلت أكتر.
إزاي أقدر أقول إني هبقى كويسة، وأنا لسه مش عارفة إذا كنت هقدر أقف على رجلي تاني ولا لأ؟
وإزاي أقدر أخبي عنه اللي حصل لي، وأنا كل اللي نفسي فيه إنه يكون جنبي؟
سمير قرب مني، ومسك إيدي برفق.
سمير: وعد، ممكن تهدي؟ أهم حاجة دلوقتي صحتك، وبعدها نفكر في أي حاجة تانية.
بصيت له بإحراج، وحسيت إني ظلمته من غير ما يكون له ذنب في كل اللي حصل.
وعد: سامحني يا سمير.
ابتسم لي بهدوء، وقال:
سمير: ما تتكلميش في أي حاجة دلوقتي. لما تبقي كويسة، هنتكلم براحتنا مع بعض. أنا مش مستعجل منك على حاجة. القلب هو الحاجة الوحيدة اللي الإنسان ما بيقدرش يتحكم فيها، وإنتِ دكتورة وعارفة ده كويس.
سكتُّ، وما قدرتش أرد عليه.
مرت الأيام، وبدأت أحس إني بقيت أهدى شوية، وإن قدرتي على استيعاب اللي حصل لي بتزيد يوم بعد يوم.
حازم وياسين ورغد وماما ما كانوش بيسيبوني لحظة واحدة، وكل واحد فيهم كان بيحاول يساعدني بطريقته.
حتى سمير، رغم شغله ودراسته في الجامعة، كان بيخلص اللي وراه وييجي يقعد معايا في المستشفى.
وأوقات، كنا بننزل نقعد في جنينة المستشفى، وأنا على كرسي متحرك، أبص للناس اللي ماشية حواليا، وأحاول أتقبل فكرة إن حياتي اتغيرت بالشكل ده.
لكن الحقيقة إني كنت بتوجع كل ما أبص لنفسي.
كنت بحس إني مش عايزة حد يشوفني كده، ولا يشوفني وأنا عاجزة عن الحركة . كنت بتضايق من نظرات القلق في عيونهم، حتى لو كانت نابعة من حبهم ليا.
وفي يوم، بصيت لسمير وقلت له:
وعد: كلم الدكتور يا سمير. أنا عايزة أرجع البيت. مش هقدر أكمل في المستشفى أكتر من كده، أنا كويسة.
سمير: لازم نطمن عليكي الأول يا وعد.
وعد: أنا كويسة، والله. ما تقلقوش عليَّ.
وبعد ما اتأكدوا إن رجوعي للبيت ممكن، رجعت فعلًا.
ولما وصلت، سمير قعد معايا، وبدأت أحكيله كل حاجة بالتفصيل.
حكيت له عن كلام دكتورة جيهان، وعن خوفي على مستقبل مجد، وعن قراري إني أبعد عنه رغم إني كنت بحبه، وعن كل مرة حاولت فيها أقنع نفسي إن تضحيتي دي هي الصح.
سمير فضل ساكت لحد ما خلصت كلامي، وبعدها بصيت له وقلت بصوت هادي:
وعد: أنا عارفة إنك مش هتسامحني يا سمير.
ابتسم لي، وكأنه كان مستني مني الجملة دي،
سمير بص لي وقال بهدوء:
سمير: مين قالك كده يا وعد؟ عايز أقولك على حاجة... اللي بيحب بجد، دايمًا بيسامح.
سكت شوية، وبعدها كمل كلامه، وكانت نبرته فيها عتاب واضح.
سمير: بس أنا زعلان منك في حاجة يا وعد. مش زعلان علشان خبيتي عني الحقيقة، ولا علشان قلبك كان مع حد تاني...
أنا زعلان علشانك ما دافعتيش عن حبك بكل قوتك. اللي بيحب، ما يستسلمش بسهولة، وما يسيبش اللي بيحبه مهما كانت الظروف صعبة.
فضلت ساكتة، وبسمعه من غير ما أقاطعه.
سمير: أنا مقدّر التضحية اللي إنتِ عملتيها علشان مجد، وعارف إنك كنتِ فاكرة إنك بتحميه وبتحمي مستقبله.
بس عايزك تفهمي حاجة يا وعد... مجد كان يقدر يبني نفسه من أول وجديد.
أخدت نفسًا عميقًا، وكمل كلامه:
سمير: أنا عارف إن كل اللي سابه وراه، وكل حاجة قرر يتنازل عنها، ما كانش قليل.
وعارف إنه كان قدامه مستقبل كبير، وإنه اختار يبعد عن كل ده علشان يبقى معاكي.
بس كان يقدر يبدأ من جديد، حتى لو الطريق كان صعب، وحتى لو كان محتاج وقت طويل علشان يرجع يقف على رجليه ويبني نفسه تاني.
سكت سمير، وبص لي نظرة فيها شفقة وعتاب في نفس الوقت.
سمير: علشان كده أنا زعلان منك يا وعد... مش علشان اخترتي تبعدي عنه، لكن علشان ما اديتوش الفرصة إنه يختار بنفسه. إنتِ قررتي عنه، وشيلتي نفسك الوجع كله، وشيلتيه هو كمان خسارة ما كانش لازم تحصل بالطريقة دي.
كلامه وجعني، لأني كنت عارفة إن في جزء كبير منه صح، لكن وقتها كنت شايفة إن مفيش قدامي حل تاني.
كنت فاكرة إن بُعدي عنه هو التضحية الوحيدة اللي ممكن تنقذه، وما فكرتش إن يمكن أنا كمان كنت بحرمه من حقه في الاختيار.
ديون النبض 🫀
بقلم الكاتبة مروة صياح ✍️🎯
فضلت ساكتة وبسمعه، وهو كمل كلامه:
سمير: أنا مقدّر التضحية اللي إنتِ عملتيها علشان مجد، بس برضه عايزك تفهمي إن مجد كان قادر يبني نفسه من أول وجديد. أنا عارف إن كل اللي سابه علشان يبقى معاكي مش قليل، وعارف إنه هياخد وقت طويل لحد ما يقدر يبدأ من جديد، لكن صدقيني، مجد شاطر ومجتهد ومتميز من زمان، وهيقدر يعمل ده.
بص لي بجدية، وكمل:
سمير: بس المشكلة إن الإنسان لما بيلاقي نفسه في مكان، ويبدأ يبني حلمه وحياته، وبعدين يضطر يسيب كل ده ويرجع يبدأ من الصفر، بيبقى صعب عليه يوصل لنفس المكان تاني. وده مش معناه إنه مش هيقدر، لكن معناه إن الطريق هيكون أصعب، وهيحتاج وقت ومجهود.
بصيت له وسكت، وبعدها قلت له وأنا بحاول أوضح وجهة نظري:
وعد: دكتورة جيهان كانت بتضغط عليَّ بطريقة صعبة يا سمير. هي ورتني كل حاجة، وخلتني أشوف قد إيه مستقبل مجد ممكن يضيع لو اختارني. حسيت إن كل حاجة تعب علشان يوصل لها ممكن يخسرها قدامي، وما قدرتش أستحمل فكرة إني أكون السبب في ده.
سمير: طب ليه ما فكرتيش تحكي له؟ ليه ما قلتيش له الحقيقة وسيبتيه هو يقرر؟
بصيت له بابتسامة حزينة، وقلت:
وعد: إزاي يا دكتور سمير؟ أروح أقوله إن مامته بتطلب مني أبعد عنه؟ إن مامته مش عايزاني في حياته؟ إنت متخيل كان هيحصل إيه؟ كان هيكرهها ، وكان هيبعد عنها أكتر، وساعتها هكون أنا السبب في إن علاقتهم تسوء المرة دي كمان.
سكت لحظة، وبعدها كملت:
وعد: أنا في الآخر حسيت بكلامها. حسيت قد إيه هي خايفة عليه، وقد إيه عايزة تشوفه ناجح ومستقبله مضمون. هي في الأول والآخر أم، وبتدور على مصلحة ابنها، حتى لو طريقتها كانت صعبة عليَّ.
سمير بص لي وقال:
سمير: بس إنتِ كمان روح يا وعد، وليكي حق في الاختيار. مش معنى إنها أمه إنها تقرر عنكوا إنتوا الاتنين.
سكتُّ، وبعدها افتكرت حاجة كانت لسه جوايا.
وعد: وهو كمان خبَّى عليَّ حاجة مهمة... ما قاليش إن دكتورة جيهان تبقى أمه.
سمير سكت لحظة، وبعدها رد:
سمير: هو مش مخبي عليكي إنتِ بس. يمكن أنا عرفت بحكم علاقتي بدكتورة جيهان، لكن مجد كان مخبي الموضوع عن ناس كتير. هو كان عايز يبني نفسه بنفسه.
وما يحبش حد يتعامل معاه على إنه ابن دكتورة جيهان، أو إن كل اللي وصل له كان بسبب اسمها.
بصيت له وقلت:
وعد: بس ده ما كانش يمنعه إنه يقولي الحقيقة. هو فعلًا ابنها، وكان المفروض أعرف منه، على الأقل.
سمير ضحك بخفة وقال:
سمير: طب هو لو كان قالك، كنتِ هتفكري تبعدي عنه؟
سكتُّ، لأني عارفة إن إجابتي مش بالبساطة دي.
وعد: مش ده قصدي يا سمير. مشكلتي إن أنا ودكتورة جيهان من بداية معرفتنا ببعض، اتعرفنا على بعض بطريقة مش لطيفة.
أنا كنت شايفاها دكتورة بتتعامل مع الدكاترة اللي حواليها بأسوأ طريقة. لو حد غلط، ما بتقبلش إنه يناقشها، ومش بتحب حد يقول لها إنها غلطت.
أخدت نفسًا، وكملت:
وعد: يمكن علشان كده ما كنتش متقبلاها من البداية. كنت فاكرة إن الدكتور لازم يكون عنده صفات معينة، وإن اللي بيتعامل مع المرضى لازم يكون أهدى وأرحم من كده.
سمير ضحك وقال:
سمير: عايز أقولك على حاجة يا وعد. الجراحين مع الوقت، ومع عدد العمليات اللي بيعملوها، بيتعرضوا لضغط كبير، وبيشوفوا مناظر صعبة بشكل متكرر. بعضهم بيبقى أكثر حدة في التعامل، وبعضهم بيحاول يفصل بين مشاعره وشغله علشان يقدر يكمل.
لكن ده مش معناه إن كلهم بقوا قاسيين، ولا إن كل دكتور لازم يظهر رحمته بنفس الطريقة اللي إنتِ متخيلاها.
سكت شوية، وبعدها كمل:
سمير: ودكتورة جيهان، مهما كان عندي عليها ملاحظات، ومهما كنت مختلف معاها في حاجات، ما أقدرش أنكر إنها دكتورة شاطرة ومتمكنة من شغلها. رحمتها ممكن تظهر في مهارتها، وفي العمليات اللي بتقوم بيها، وفي قدرتها على إنقاذ حياة المرضى. وده ما يمنعش إن أسلوبها في التعامل ممكن يكون محتاج يتغير.
بص لي بجدية وقال:
سمير: أنا معاها في حاجات، وضدها في حاجات، لكن كل اللي أقدر أقولهولك إن مفيش حد ما بيغلطش.
كلنا بنغلط، والمهم إننا نتعلم من غلطنا، وما نخليش أخطاءنا تضيّع مننا حاجات ما نقدرش نعوضها.
ابتسمت ابتسامة باهتة وقلت:
وعد: خلاص يا سمير... ما بقاش في موضوع يربطني بمجد علشان أتعلم حاجة. هو اختار طريقه، وأنا اخترت طريقي.
سمير بص لي وقال بحزم:
سمير: لا يا وعد، مجد لازم يعرف الحقيقة.
بصيت له بذهول، وحسيت بقلبي بينقبض من مجرد الفكرة.
وعد: لو إنت فعلًا شايفني غالية عندك، وعايز تقف جنبي، بلاش يا سمير. أرجوك، ما تعملش كده.
سمير: إنتِ كده بتضري نفسك أكتر يا وعد.
سكتُّ لحظة، وبعدها سألته بصوت مليان خوف:
وعد: وتفتكر لو عرف، هيعمل إيه؟ هيتصرف إزاي؟ هيسيب كل حاجة ورا ضهره ويرجع؟ هيرجع علشان خاطري، وبعدها يلاقي نفسه قدام نفس الاختيار من جديد؟
دموعي بدأت تتجمع في عيني، وكملت:
وعد: هو دلوقتي بقى مسؤول عن زوجة هيكسر قلبها لو رجع لي. وأنا هبني سعادتي على كسر قلب واحدة تانية دخلت حياته.
يمكن الكلام ده كان ينفع قبل ما يبدأ حياته معاها، لكن دلوقتي صعب يا سمير... صعب قوي كمان.
مسحت دموعي، وحاولت أتماسك.
وعد: أنا مش هينفع بعد كل اللي حصل ده أبقى أنانية أكتر، وأفكر في نفسي وبس. أنا كان هدفي مجد ومستقبله، حتى لو ده جه على حسابي أنا.
سمير بص لي بحزن، وقال:
سمير: بس ده ما جاش على حسابك بس يا وعد... ده جه على حساب كل حاجة فيكي.
سكت لحظة، وبعدها سألني:
سمير: تقدري تقوليلي هتفضلي كده لحد إمتى؟
بصيت له وأنا مش فاهمة قصده.
وعد: يعني إيه؟
سمير: يعني إنتِ كان المفروض تبدأي سنة جديدة في الكلية وتتخصصي، وتكملي طريقك وتحققي أحلامك. لكن إنتِ وقفتي حياتك كلها علشان مجد.
حاولت أقاطعه، لكنه كمل:
سمير: إنتِ مش بس بعدتي عنه، إنتِ كمان بعدتي عن نفسك. بقيتي مش شايفة أي حاجة مهمة غير إنه ينجح ويوصل لكل اللي كان بيحلم بيه، حتى لو إنتِ ما فضلش ليكي أي حلم تحققيه.
بصيت له وقلت بهدوء:
وعد: المهم مجد يا سمير. المهم هو اللي يوصل. أنا هبقى كويسة، وهبقى أسعد إنسانة في الدنيا كلها لما أشوف نجاحه وأهدافه وطموحاته بتتحقق قدام عيني. مش عايزة أكتر من كده.
سمير هز راسه بأسف، وقال:
سمير: لا يا وعد. جميل إنك تحبي وتضحي، لكن مش جميل إنك تدمري نفسك علشان اللي بتحبيه. لو كنتِ بعدتي عن مجد، وكملتي حياتك، وحافظتي على قوتك، وفضلتي تسعي ورا أهدافك وطموحاتك، كنت هقدر أفهم قرارك، حتى لو كنت مختلف معاكي فيه.
كنت هقول إن كل واحد فيكوا اختار طريقه، وإنكوا هتكملوا حياتكوا بالشكل اللي شايفينه صح.
سكت شوية، وبعدين كمل بنبرة أكثر حزنًا:
سمير: لكن إنتِ ما عملتيش كده. إنتِ وقفتي حياتك عشانه، وسمحتي للحزن إنه ياخد منك كل حاجة. وياريتك حتى حافظتي على صورتك قدامه... إنتِ كمان خليتيه يشوفك بالشكل اللي إنتِ مش عايزة حد يشوفك بيه. أنا مش قادر أستوعب إزاي عملتي في نفسك كل ده يا وعد.
حسيت إن كلامه بقى تقيل عليَّ، وإن كل كلمة بيقولها بتكشف لي جزءًا كنت بحاول أتجاهله.
وعد: ما تزعلنيش يا سمير، كفاية اللي أنا فيه.
سكت شوية، وبعدها بص لي وقال:
سمير: وعد، أنا عايز أقول لمجد كل حاجة.
في اللحظة دي، ومن غير ما أفكر، مسكت إيده بقوة وقلت له برجاء:
وعد: بالله عليك يا سمير، لو فعلًا بتعزني، بلاش. إنت كده بتضرني أكتر، ومش هتساعدني.
بص لي وسكت، فحاولت أوضح له خوفي.
وعد: مجد مش هيكون مرتاح لو عرف، ولا هيكون سعيد. ممكن يعند ويسيب كل حاجة ويرجع، وساعتها أنا مش هقدر أقرب منه.
ولا هقدر أقبل إنه يضحي بمستقبله من جديد علشاني. بدل ما أكون بهد حياتي بس، إنت كده ممكن تهد حياته هو كمان.
فضلت ماسكة إيده، وقلت له وأنا بحاول أبتسم:
وعد: ما تخافش عليَّ يا سمير. أنا هبقى قوية، وهبقى كويسة. هلهي نفسي في حاجات كتير، وهحاول أكمل حياتي على قد ما أقدر. بس أرجوك، سيب الموضوع ده بيني وبينك.
سمير فضل ساكت شوية، وبعدها قال:
سمير: وعد، أنا كنت محرج أكلمك في حاجة.
بصيت له، وفهمت من نبرة صوته إن فيه كلام تاني عايز يقوله، وإنه كان متردد يفتحه معايا من البداية.
رفعت عيني له، واستنيت يكمل...
