رواية حين تتغير الاقدار الفصل الواحد والاربعون بقلم سناء الهموندي
وتبقئ لبعض الاماكن من الماضي الجميل ذكرئ تهمس لنا بهدوء قائله لقد كنتم هنا يوما💔
أنا تلك الصغيره التي تتمنى حُضنگ لتدفن رأسها في صَـدرگ لتضمگ ، لتقبلگ
لتخبرگ أنت القوة ، الأمان والسنـد لها ... أنا تلگ الوديعة الصغيره التي تريد أن ترتمي بين يديگ لتشكي وجعها منگ اليگ
لتخبرگ كم عانت ، تعبت ، تعثرت ، وبكت 🥺💙
نور : مرت الايام والأشهر على الخبر السمعنا بالراديوا واحنه رجعتلنه الحياة وتمسكت بلامل أكثر وأكثر سلطان تزوج وزوجته كلش خوش انسانه اني و خالتي اعتبرنه كصتهه كصه خير علينه وهيه كلش تحب جهالي وحتى داريهم وياي وتهتم بيهم وسلطان ممقصر ابد اليوم عرفه ملبستهم ملابس جديده جابتهن خالتي من بغداد سبحتهم ولبستهم فرحانين سلطان اخذلهم صور اندك الباب صاح سلطان تفضل ابو اصيل تفضل خويه كامت مرت سلطان لبست حجاب طب تمار كمت عليه بالهفه اشم بي ريحه غلام جايب ويا التؤم ختام وتكتم فدوه العينهن يخبلن كتله خويه صدك جذب ليش طلعهن سوه فوكاهه ملبسيهن ابيض وهنه يشعن شع ختام السان تكلي هاي ماما لبستنه أما تكتم أصيح عليهه تختل وره ابوهه وتبتسم ولج تعالي نطيني بوسه بعد عمتج .
تكتم : باوعت على أبويه ابتسم وكالي روحي مشيت بخطواتي البطيئه وبست عمه .
تمار : سلمت على خالتي وحجينه شويه عن وضع الحرب وسالتني على الاسره وكتلهه والله خاله مكلف هواي معارف يدورولي بلاسماء الاسره صحت على جهال غلام وانطيتهم كل واحد علاكته من مره اجيبلهم ملابس عيد وهمه فدوه العينهم يصيحولي يأبه ويكسرون كلبي من يذكروني بابوهم .
نور : ليش يا خوي تكلف روحك والله عدهم خير من الله .
تمار : بستهم وكتلهه لتحجين هيج وضوجيني ذول جهالي حالهم من حال جهالي ياله خويه أنا اروح محتاجه شي .
نور : عساك سالم خويه عوف البنات يمي يلعبون .
تمار : لا راح اخذهن وياي رجعت للبيت خذت اولادي الأربعه زينتهم واشتريت الهم ومن رجعت لكيت البنات زعلانات عليه الجبيره صف رابع ابتدائي سمره والعيون صفر هادئه وام بيت مبينه شمس دير بالج عليه هاي ام بيتج وداري كبرتج شيليهه بعيونج هاي عزيزه ابوهه اي عيني طبعا لان توئمك بزر ممه مااترجه منهم شي والعب وياهن ويرجني من شعري حتى اطلعهن واني منصي الهم وتطلع وحده منهم أذب نعالي بتنور بابا ذبيت نعالك بنار حتى متطلع وتخلينه وتأخذ اخواني يشبكني شبكه لسه احس ب اظلاعي شلون التمن بين ادي والله ال هاي للحظه احس الموقف وعايشته واتخيله والمكان ماانساه ذاكرة طفله
تمار شمس اكويلي دشداشتي البيضه ولبسي التوم بدلاتهن نطلع ناخذ صوره اني وياهن فصل .
شمس : كويتله الدشداشه وهوه سبح وبدل وانا بدلت البنات بدلاتهن اخذهن و طلع تمار هو والبنات واجتي بت عم ابويه علينه خطار جايه تواجب عمتي جي راحت عمره وستلمتني حجي على بختج شمس مارايده عيالج عيون الناس تكتل الابو والتوم حاطهن منا ومنا غزلان موش بنات وهو شلونه الدشداشه ترفرف رف على جتفه ولج يتباه بيهن من يمشي والله سمعته بذني الوحجايه سطرتله ولد ورجع راد البنيه جابتله توم الله يستر من عيون العالم بنتي ديربالج تره شايلاتج وداكاتج ويصيحن شتريد بيت وسوالهه و كله ولد تخلف بناتهه يخبلن ورجلهه على طابعه بعد شتريد . شمس : انا بصراحه اخذت حجيهه بضحك و الكلام مافرزنته اله بعد مامشت بيه سكت قطار المتاهه هنا عرفت فعلا اكو عيون تكتل وتحول حياتك الى جحيم وجع فقدان غلام لسه جرحه مانشف ومعتز اخ مو ابن خاله وهنا المصيبه اكبر ومكتوبلي المشقه والتعب بعد فتره تمار جان مبلش بترميم بيت شترا قريب على أهله الجهال ماشاء الله كبروا وكثرو كال اشتريلكم وطن وامنكم بي وفعلا مثل أي امرءه كلش فرحت وأخيرا راح يكون إليه وطن خاص باب ينسد عليه أنا واولادي لسه أنا بشهر السابع بطني جبيره ومدعبله تمار كال وره العيد نشيل وفعلا وره العيد بسبوع لمينه غراضنه وجتي وياي نور واحلام ساعدني بشيله البيت اسبوع وحنه نرتب ونعدل من الفرح ماحسيت بتعب وتمار فرحان الفرحتي التحق للدوام وأول سبوع كان صعب عليه انام بس اني وجهالي وحدنه رغم بيت اعيالي فرق بيتين اول يومين جتي امي باتت ويايه بعدين راحت وكل ما تمشي الايام اتعلم على الوضع أكثر واصيل ماشاء الله رغم عمره 13سنه اله كلما شافه يكول هذا ابن ال 19سنه طويل وضخم على ابو وعمامه وحنين بحنيه ابو تمار قرر الطفل البطني اذا ولد غلام واذا بنيه هبه اجه تمار من الدوام وجان قلق من شغله بس مكلي لحد ما فد يوم رحنه يم اهله متحضرين للزياره وبالصدفة سمعته يسولف الابو وخوته جايته عقوبه بسببين الاول ابن عمه سياسي ومن المعارضين الحكم صدام حسين ومسوي حركه بغداد طالع مضاهرات ولازمي وميعرفون عليه اي شي والثاني معتز الي ماله اي اثر بس همه مسجلي بسجل تمار من أقاربه وطالع ابن عمه ومعتز من المعارضين اجته عقوبه يردون يحولوا الجبهات القتال أنا تخبلت وكعدت ابجي وطبيت بغرفه خالتي جتي حواء تسكت بيه ونوره كلنه ملتمين نحضر حتى كلنه سوه باجر نطلع للزياره تالي سمع تمار واجه .
تستمر القصة أدناه
تمار : شبيج يا عيني ليش تكسرين كلبي .
شمس : تمار انت تعرف أنا مالي احد غيرك لا تروح فدوه كافي عليه حامله غياب غلام .
تمار : صدكي أنا جاي احاول اقلل من العقوبه بالكي انطي فلوس لو اشوفلي واحد عرف ويساعدني .
نور : بدموع خويه اغديلك سبع فدوات لا تروح انت الشي الوحيد من بعد غلام يحسسني بالأمان .
تمار : يمعودين شبيكم تره محد يموت قبل يومه والمكتوب على الاجبين تشوفه العين وياله عوفجن من البواجي وكومن شوفن دولمتجن شو جنهه طلعت ريحه شياط باوعت الشمس وغمزتلهه لو هذا شياط كلبج باوعتلي بدموع وابتسمت طلعوا كلهم وانا حضنتهه وبستهه من راسهه .
شمس : الفجر طلعنه للزياره زرنه وجانت زياره تخبل تمار بطريق الرجعه كال الامه يمه خطيه بركبتكم إذا شمس جابت وصارلي شي وتكولون الطفل منحوس يمه تره ازعل عليج انتي اول وحده اذا متسكتين اليحجي بيومهه خالتي تخبلت من كلامه وكامت تبجي وره مرجعنه باسبوع جبت ولد وتمار طار بيه وسمينا غلام كال حتى من يرجع غلام يعرف معزته يمي شنو ضل تمار قلق بسالفه العقوبه ويوميه تأجيل اخر شي الولد الي كلفه تمار بقضيه التحاقه للجبهه اعتذر من تمار وكاله هذا الشي مو بيدنه وإذا سويتلكياهه اني هم اروح بيهه وحتى كله التمار حسب حسابك كله سبوعين ويطلع كتاب التحاقك وفعلا بعد مطلع الأربعين اجتي عقوبه ال تمار نزلوه من نائب ظابط إلى شرطي وبصفوف الاماميه للحرب مع إيران بحلبجه تهمته ابن عمه معارض وضد الحكم وأقاربه الي يقصدون بي معتز هنا صار عزه الكل يبجي يدرون الحرب جر شهيد وره شهيد بس من عشيرتنه نطينه لحد الان تسعه بين شهيد ومفقود فا جان الي يروح تودعه خاف ميرجع وإذا رجع هاي قدره قادر شمس دخلنه انذار وحاله رعب بده تمار بدوامه يروح ويرجع بدوامه وهو يامن بيهم انو مكانه زين وماكو شئ لايضل بالهم أكثر من أربع اشهر مر ع دوامه يروح ويرجع بأمان الله شبه تعودنه على الوضع بس شنو أنا ايدي على كلبي ومثل كل مره قبل لا يلتحق بيومين يبدي بجوالته على أهله وعمامه و امي وخواني ايسلم على الكل ويامنه يمهم وانا احترك من اسمعه يوصي أحد بينه واضل ابجي .
تمار: ودعت امي وابويه واخواني كلهم وصيتهم ع اولادي وكعدت ويه ابويه وحدنه وكلت اخلي أمام المر الواقع واحجي ويا كلشي يصير شو أنا اسولف ويه جماعتي وره ساعه يستشهدون ايجوز ألدور الي كتله يأبه اني رايح لدوام وتعرف الوضع حيل متازم ومااكدر مااروح عبن أنا ماخون تراب الوطن ولا افر والناس تكول عني جبان .
ابو علي: بويه تمار جنسيتك العدم مالتك ضايع واخاف عليك يتهمونك بالتماهل وياذونك بويه خلك لا اروح يبعد ابوك .
تمار : لاتخاف بويه اني راح اروح قبل يوم من دوامي ابو امير صاحبي اجاني اول البارحه وكال ناقلينه الحلبجه واكو مناورات بينه وبين الأكراد وايران وحسب الاخبار الي جاي تداور بينه انو صدام احتمال يضرب الأكراد .
تستمر القصة أدناه
ابو علي : يابويه صدك تحجي يضرب الأكراد شنو غير عراقيين ومنه وبينه شنو هل ضلم .
تمار : بويه صدام ميعرف لا عراقيين ولا أحد مدام عارضوه ماراح يرحمهم والايام تثبتلك وحتى يبوي الحجي بيناتنه اكو أنباء يضربهم سم .
ابو علي : بويه تمار لاتروح خليك وعلي شعره ميلمس منك اضمك بروحي بويه لوصار بيك شي ماعيش وراك وداعت عيناك هاي أنا اكلك .
تمار : بسته من رأسه وكتله لاتخاف حجي المقدر ومكتوب مامنه مهروب بويه أوصيك بعويلي لا تنساهم.
شمس : رجع تمار وكانت ليله كله تحذير تمار خلص لليل كله يوصي بيه على اهله امه اخوانه ابوه أولاده كل كلمه جانت وصيه بس اني مدري شبيه حتى كلمت اسم الله نبلعت وكانوا ملك يسد حلكي عن الرد اخته الزغيره جانت بايته يمنه شبكه ودعه قبل مينام راح ال أمه وأبوه وإخوانه ودعهم نوبت لأخ وانا بس عيون تتحرك وكلب محصور بس مادري شبيه وشجاني لليل متحملت بجيت بقوه خلصت طاقه التحمل احس بديت اخسر تمار من ايدي اريد احافض عليه اريد أضمه وين يا ربي وين أضمه والله لو الكلب بي باب جان ضميته وقفلت عليه شافني ابجي عرف على شنو اجه كعد بصفي يحاول يقويني عاد أنا حجيت متحملت عفيه تمار لاتروح لدوام مو جنسيتك ضايعه والوضع حيل متخربط منو يعرف بيك ملتحق أو لا فدوه لا اختل بالنفق السويتو المعتز اشرد الغير دوله سوي اي شي بس لتروح .
تمار : هاي شبيج شمس كل عقلج مااروح انتي تعرفين شنو الحكومه العراقيه واستخباراته تريدين اعرض اخوتي واهلي لتفتيش ويوميه مجرجرين واحد منكم وداعتج شمكتوب على جبين تشوفه العين وهاي الكلمه مقتنع بيهه اذا مو يومي لو يفجروني ما اموت واذا يومي لو اختل بقوطيه هم اموت .
شمس : بجي كافي لتحجي هيج عفيه أنا منو الي والله اموت .
تمار : لتحجين هيج لازم تتقوين وتدعيلي ارجع لكم بسلامه شنو أول مره اروح مو صار خمس اشهر اداوم .
شمس : لنص اليل يقنع بيه وسوالف وغزل وختمهه ودعني ونمنه ثاني يوم التحق وانا دموعي تصب على خدي شمس تمار اخر وداع حسيته كلبي طك من طلع خوف ع قلق توسلت بي ميروح ومفاد لان فعلا إذا مراح راح يسبونه وماله خيار غير يلتحق هنا القلق الي عشته الله لايراوي الكم
سنه 1988بالتحديد
تمار : التحقت بعد ماودعت اهلي و كلهم وشمس والجهال واكو غصه بلعومي ونار بصدري وصلت ساعه عشره الصبح المقر بسرعه كالو نتحرك هجوم ع أكراد هنا اغلب الجنود رفضوا يضربون اولاد وطنهم واني من ضمنهم عارضت وبشده ابو امير جيرانه ويه وجبتي توسل بيه حتى امشي ويا عبن يعرف صدام الميمشي بأمره ينهي حياته كتله روح انت ابو امير مو تمار اليضرب ولد وطنه لذالك صدام حسين حس بينه مقابلين نصفيهم كام وضرب حلبجة كمياوي هيه والمعترضين البيهه ومن ضمنهم كان تمار والألف المساكين الي مالهم كل ذنب وهنا جانت فاجعه حلبجه الاليمه الي تركت أثر قوي على هواي عوائل ودمرت بسبب هل شي .
شمس : مرت الايام والأشهر وتمار ماكو بيتنه عباره عن دك ولطم ممتاكدين اذا تمار اسير أو ويه فاجعه كيمياوي حلبجه من حر كلبي اكول كون اسير ولا ويه حلبجه عبن ماطلع واحد سالم من الكيمياوي وره فتره كالو نقلوهم لغير منطقه على ألاكراد مااعرف نغزه بكلبي صارت حسيت تمار يستنجد بيه احس بي شي دعيت وتوسلت بربي ....يرجعلي سالم راح عمي الصديقه ابو امير كاله عمي تمار صار بارض الحرام ومسولفله شون تمار معترض على الحرب ويه الأكراد وكايله انو تمار يأما اسروهم يأما بالشمال لان منعرف الفوج اول يوم نتقل ظربوه الإيرانيين والشهداء جاباوهم وقائمه الأسماء مابيه اسم تمار أنا بيدي قريتهه عبن ضل بالي يمه وياه 8من جماعتنا عمي انصحك روح للمقر وبلغ عن أخباره احتمال تمار طلع لشمال لان اكو مجموعه نهزموا أن شاء الله يوصلكم خبر عنه مفرح وفعلا عمي ابو علي مبلغنه انو تمار صاير بي شي وبلااخص أنا خالتي ام علي وكال تمار منهزم لشمال وانشاء الله يرجع بأقرب وقت ممكن ضلينه الاشهر كله بالنه مشغول كلبي يكلي تمار مينهزم لو رايد ينهزم مراح اصلا جا رجع أدري بي ميجازف باخوته وباهله ويخليهم فريسه سهله للحزب والحزب ساكت لان يعرفون اكو جثث لجنود بارض الحرام صدام ضربهم كمياوي لهذا ساكتين منه .
تكتم : صغيره بس واعيه وفاهمه صح هادئة بس ذكيه وششوف ينطبع بذاكرتي اباوع امي شون حزينه من يوم راح أبويه مرات افز على صوت شهكاتهه من اشوفهه فارشه سجادتهه وتسجد الرب العالمين وتبجي أنا ابجي وياهه من جوه البطانيه بدون متحس عليه خالاتي وعماتي على طول يمنه عمتي نور كل يوم تجي وتكعد تبجي ويه امي وتكلهه توحد حزنه يا شمس عمامي وجدي وبيبيتي معافونه جدي اتمرض وحيله نهد على فراك ابوي مبقوا مكان مدروا بي بس ماكو اي خبر عنه مرت ثمن اشهر بحالهه وحنه بيتنه عام بالحزن .
وبيوم من الايام كالو جايبين شهيد من المنطقه راحن ام علي وام فالح وبناتهن عادات قبل المنطقه تحزن على حزن جارهم لو بينهم عشر بيوت مو سبعه وهنا امي خلتنه يم جدو وراحت وياهم لان كل النسوان راحت للفاتحه عماتي وبيبياتي خيوط الذاكرتي تذكر ذاك اليوم المشؤم الوحيد الي مااكدر امحي من مخيلتي واذكره بكل تفاصيله عمري هنا خمس سنوات و جدو واهلي مشغولين على والدي الي صارله أكثر من ثمن اشهر مختفي .
شكرا لزيارتكم عالم روايات سكيرهوم
