رواية فصلية بديلة ( شموخ ) الجزء الثاني الفصل السادس والاربعون 46 بقلم ام ملكوت

:-درت انظاري على ابو عيون خضرا وهوه داير عينه عني يلعب بجداحته اجيت تقربت منه لزمت الجداحه اخذتهه وهوه عيونه تراقبني شعلتهه وكتله بتساؤل..

_ هل تحبني 

_جؤ

_هل تعشقني

_جؤ

_هل لا زلت تحب شفتاي

_جؤ

_اذا ما الفائده منها..

عكد حواجبه باستغراب وقربت الجداحه على شفايفي وهيه مشتعله ضربني بايدي شامرهه عني

وتقرب علي لزم شعري بعصبيه رافع راسي اله وكال من بين سنونه وانفاسه الحاره ومليانه جكاير تضرب بوجهي..

_تخبلتي شبيج ليش سويتي هيج..

بلعت غصتي وخنكه حاوطت صدري وكوه طلع الكلام مني بصوت مبحوح..

_مو ما تحبني بعد مو ماتحب شفايفي شلك علاقه ان اذيتهن او حركتهن او حتى جرحتهن

_اي ماحبج صرت ماحب شفايفج ماحب اي شي بيج جنه انه صرت اتنفسج صرت متخبل عليج صرت هايم بعشكج وماتحمل فكره شخص يباوعلج

لو يتقربلج وياذيج هاي العيون وهاذ الرمش اريده بس الي اريد املي بشوفتي وحبي ماريد يمر بيهن شخص ولا دمع

premium

_ليش جا سويت هيج محمد ليش خليت ابوي يدري بالصار وياي ليش عفتني هنا روحي تلوب عليك ورحت تتعارك ليش ماحاولت تفهمني وتمشي السالفه

_شلون امشيهه شلون وانه شياطين طفرت كبالي وانه اتخيله يتقرب منج وينظرلج بنظرات زفره شلون وبالي انشغل بيج اذا قرب وجهه على وجهج

وحس بانفاسج شلون وانه تخبلت لان لامست ايده القذره جلدج كله هذا بكفه ودموعج وغصتج

وحجيت بدون مايحس علي ويدره بالسالفه بس لا يضل بالج الاخوه علاقتهم قويه انشاءالله وماراح

تنكسر بسهوله واصلا طلعنه من بيتهم وهمه يسولفون ويتحاضنون كان ماصاير شي 

_والله تحجي محمد يعني متصالحين مابيناتهم شي

_اي والله واذا ماتصدكيني فوتي حاجي 

_لا مصدكتك بس سالتك حتى يطمن كلبي اكثر 

_تطمني وهل كلب مسحي عنه كل هم وكسر حقج راجعلج ومن هل عين تاخذينه 

_لا محمد فدوا لا تسوي شي لا تنفذ كلامك الكلته لابوي مساع عوفه هوه اصلا اعتذر مني وابتعد وشاف دربه لا تسوي شي يدمر حياتك ومستقبلك

_ههه اتشاقه وياج جنتي يولي ماريد اوصخ ايدي بي 

_تحجي صدك

_اي شبيج اليوم صايره ماتصدكين بكلامي 

_ لا اصدك بس اريد اتاكد حباب كول تحجي صدك يعني راح تعوفه يولي 

_اي مريتي تطمني ماراح اسويله شي 

_تمام ماشي 

_يله خلي اروح تاخر الوقت وانتي فوتي نامي ارتاحي شوفي عيونج شلون ورمن من البجي وانه موصيج ماتبجين 

_غير خفت عليكم كلت هسه يكتلونه ويدخلون سجن من وراي

_لااا شنو هل عار حتى نوصخ ادينه بي رغم حصله شجم بوكس مني ومن الوالد الله يحفضه بس جانت تصبيره ومستاهلهه 

_ههه ويكول ماوصخنه ادينه بي

_عادي حبيبتي من ارجع للبيت اغسلهه لايدي بتيزاب عود

_هههه والله عليك سوالف انته وعمك 

_اروح فدوا لعمي وبنته انه التكطع المطي 

_هههه 

_اخرب على هل ضحكه 

_وانه اخرب عل غيره وعكده الحواجب هاي ..

خليت اصابيعي بين حواجبه وفكيت عقدتهن ابتسم ونزل علي حضني حييل وباس كتفي ورقبتي وابتعد بقه يتلمس بيهه وهوه يتاملهه

وشارد بافكاره لحدما شفته بده يرجع يعصب تحمحمت وباوعلي مزيف الابتسامه ادري بي ماراح يسكت ورح يحاسبه لمرتضى على سوايته وياي

بس مابيدي احجي وياه لان ادري ماراح يسمعلي اكتفيت ان ادعي ربي مايصيرله شي ومايجور عليه مرتضى ويحاول يلعب بحياته .. تقرب باسني من

رقبتي وشمهه حيل وابتعد باسني بجبيني لزم ايدي وتوجه لسيارته وهوه يكول..

_ديري بالج على نفسج واي شي يصير وياج احجيلي 

_مثل شنو اليصير وياي

_مكالمه من مجهول رساله تحذير عتاب غيره وغيره من هل سوالف كبل كليلي حتى اعرف اتصرف بوقتهه

_متوازيه اكلك على سوايتك مالت مساع

_شحدج غير اموتج اذا ماتحجيلي خاف هل مره وكفت وياج ودافعت عنج لان ضميتي هل سالفه بس المره الثانيه لا 

_شتسوي

_تتحديني ولج

_لا بس صار عندي فضول اعرف شتسوي

_ماسوي شي هنه راجدي وجلاق ومسحه ارض وزعله ٦ اشهر 

_والله تحجي 

_ههه لا يبعد روحي اتشاقه وروح اخوي الماحلف بيهه جذب انه اشري دمعتج بالغالي وماتحمل لو نزلتيهه كبالي مو نوب بسببي تنزل غير اموت روحي

_ههه اسم الله عليك 

_بس لا صدك جنه جدياات منا ورايح ماريد شي ينضم عني ولا حتى اي سالفه بسيطه وتافهه مفهوم 

_انشاءالله من عيني 

_تسلم عينج يبعد عيني

_صاير تحجي مثلنا

_جا من عاش بقلوب القوم صار مثلهم

_يبعد كل الكلب انته 

_يبعد كل الحروف انتي 

_هههه 

_هسه راضيه 

_شلون مارضى وانه محاوطتني هل عيون خضرا

_تفداج هل عيون انتي

_اسم الله عليك وعليهن

_يبعد كلهن خل اروح باجر يكعدوني رفس جماعتي على هل تعب 

_ههه الله يساعدك 

_ويساعدج مريتي يله ديري بالج على نفسج 

_انشاءالله وانت هم ديربالك من تسوق

_انشاءالله يله مع السلامه 

_ربي وكلبي وياك ..

ابتسم وباسني بجبيتي وصعد سيارته رحت فتحتله الباب وطلع لوحلي بيده بالسلامه وان ادخل بسرعه .. ضحكت على حركاته وسديت الباب

قفلته زين ودخلت للبيت بعدما قفلت بيبانه شفت اهلي بغرفتهم ونوره كاعده تدرس بفرفتهه عاد انه كذلك رحت لغرفتي ذبيت الجبه وتمددت عل

جربايه وانه افكر بالصار ومره اضوج واختنك ومره ابتسم وافرح بسوالف ابوي ومحمد لحدما غفيت..

رجعتلي عافيتي من هل روتين .. كمت غسلت وجهي وسناني وطلعت نشفت وجهي وندك الباب ودخلت نوره باوعتلي وهيه وجهه احمر تحمحمت وكالت بصوت يرجف ..

_احم تعالي طلعي بيت عمو شهم اجو سلمي عليهم ولبسي شال تره الولد وياهم

_اهاا تمام جايه..

هزت راسهه بايجابيه وطلعت مدري شبيهه هاي البنيه بس لا صارت تحبه لسلام نوب المصكوعه وينهه وين الحب هسه تلتهي بالتفكير وتعوف

دراستهه وبدل ماتجيب طبيه تصير فراشه بالمستشفيات.. تنهدت بحيره وصفنت للحظه وترددت اطلع اسلم عليهم مالي عين اكابلهم وانه البارحه

مسببه مشكله وياهم خاصه عمي استحي اطلع واخلي عيني بعينه خرب عيشتي شلون بيه هسه شلون اطلع .. احسن شي ابقى نايمه اسوي روحي

_اي والله ماعرف شلون احط عيني بعينه وكلش فشلانه من الصار امس بسببي

_اووف منج ماتكعدين راحه شكو انغم على كلبج وحجيتي نوب المن عفتي الدنيا كلهه ورحتي حجيتي لخطيبج وانتي تدرين بي وباعصابه 

_اي بس سالفه راحت ومشت كلت مستحيل يرجع يفتحه ويروح يسوي مشاكل علمودهه

_يمعوده الزلم بهيج سوالف عسى ما يدرون بعد عشرين سنه هم يروح يهد ويكلهم ليش اذيتو مرتي بشبابهه وبجيتوهه 

_هههه اتخيل صدك وهيج يسوي ويكول يمه اروح فدوا لتراب رجلي 

_امداني 

_هههه لا حشاج 

_دكومي كومي سبحي عطري بدلي راح يجي اخوج ومرته وانتي مسويه روحج مريضه هنا 

_يله كومي بعدج نايمه شو 

_اي كمت ولج كمت ..

ضحكت خفيف وكمت اخذت ملابس ودخلت للحمام سبحت ونشفت وبدلت وطلعت كعدت على

ميز المرايه وانتبهت عليهه صافنه بالفراغ والف هم بكلبهه تحمحمت ولزمت الكحله اخط بعيوني واحجي..

_شبيهه شموختنه تصفن والف حسبه براسهه

_لا مابيه افكر بالقضيه اليوم رحت سلمتهن لجهاز البحث الجنائي ورجعت بعدما اخذت اجازه علمود اجيلج وهسه الله اعلم شكد صار كود علي بهل كم ساعه الغبت بيهه

_يبوو جا ماعدكم استراحه شكم قضيه تستلمون باليوم 

_هنه قضيتين كلاثه وتشوفين الملف مالتهن يحتوي على كم سطر من معلومات وتستغرق ويانه

كم يوم ياله تنحل وهاي بشكل يومي نستلم يعني لو اشتغلنه مثل بيم الساعه هم راح يضل كود علينه 

_هاي شنو الله يساعدكم يمعوده طلعت الشغله صعبه ومادري

_جا شني عبالج سهله هيه وهذا كله لازم من تدخلين للمكتب وتلزمين بيدج الملف تصفين بالج

عن كل الدنيا يعني بحيث من اقره القضيه انسى حتى اهلي وبنتي واصير عبالك عايشه وياهم واحلل تفاصيلهم

_هل شغل صعب ومفصل وانخلق بس للكلبه قوي وباله خالي الا صدك على الكلب والبال شنو اخبارهن 

_يعني ماحنيتي عليه ماتذكرينه من تصفنين ماحاولتي مره تسالين عليه لو تسمعين صوته وتنهداته هم طلعتي صورته وصرتي تتاملينه من تخلين راسج عل مخده 

_لا ابد على شنو اسوي هيج بشنو راح تفيدني هل سوالف مالت المراهقه لا حنيت ولا حاولت اتصل

واشوفه لو اسمع صوته واصلا مايهمني انام من وكت واكعد من وكت وكل يومي اكضي ويه شغلي وبنتي 

_يمه من سوالف حواء يمه 

_شبيهه حواء

_دارت الدنيا ليل نهار تدور على آدم ومن لكاهه وسالهه كلتله كضيت الليل والنهار نايمه وماجيت اعله بالي ..

صفنت بوجهي وبلعت ريجهه بصعوبه اخيتي هاي عشت عمري وياهه واعرف البيهه من عيونهه وعلى كوله محمد الشخص يغوص بافكاره وينسه يغطي

على عيونه الفاضحاته وهيه تحجي وتصرف لا مباليه ومتنصعه السعاده وانه ادري بكلبهه نار ضامر .. تنهدت وهزيت راسي باسف ورجعت اخلي

مكياجي كملت وكمت مشطت شعري رشيت عطر والتفتت عليهه وهيه بعدهه بصفنتهه كتلهه نطلع وطلعنه سويه سلمت على بيت عمي ولمن وصلت

يمه همست باذنه متاسفه على سالفه للبارحه وهوه مسح على راسي وابتسم برضى بادلته الابتسامه وكعدت يمهم كلهه نص ساعه تقريبا بعدما اتصل

احسان وانطانه خبر برجعتهم اندك الباب وراح بابا وعمي فتحوا الهم ودخل بسيارته وهيه بصفه نزلوا واخذ سلام الدجاجه ذبحهه يم رجل العروس تالي

جاب الطلي ذبحه على رجليهم ثنينهم ياله دخلوا للبيت سلمنه عليهه وكعدوا يمنه شويه تالي كومتهم امي لغرفتهم وهوه اشوفه مارفع عينه ولا حطهه

بعين شموخ ابد رغم نظراته ماتركزت على مرته الا انها بقت متشرده كذلك من شموخ .. جريت حسره ودخلوا لغرفتهم سدينه الباب وطلعنه نجهز الماعين

وبابا وعمي والولد بره يكصكصون بالطلي ويقسمونه كل كيلو يخلونه بجيس ويضمونه بحافظه لحدما كملوا كتروا النه للغده واخذوا

الجهزوهن بسياره ابوي وطلع هوه وعمي يوزعونهن على البيوت الحالتهم تعبانه القريبه من

عدنه .. وبقيه الشباب بعد وكفوا بالحديقه دخل سلام للمطبخ باوعلي وباوع لنوره وحجه وياهه ..

_نورسين اريد المنقله والشوايه يكول احسان مخليهن جوه الدرج 

_هاا اي هنا تعال ادليك عليهن

_تمام فوتي كبالي..

هزت راسهه بايجابيه وهيه متوتره ودخلت للصاله الجبيره راحت للدرج وكلتله عليهن وهوه نزل طلعهم وابتسم بوجهه تشكرهه وهيه دفنت روحهه

بملابسهه وانه باقيه اباوعلهم وفاكه حلكي عليهم اشو هذا طلع جريء كلش ويمشي بدفع صدره وهيه ماجنهه ام لسان طلعت تستحي وتحمر

_ هذول خيرهم شنو الصاير بيناتهم اشو مادري انه

_ههه وين ادري خيه البارحه دخلت ترجف علي قبل الزفه ومن طلعنه للزفه وهوه يغنيلهه متكبره وتسوي حركات مغروره كباله 

_يعني معترفلهه 

_اي اعتقد هيج 

_ايا نذل يا سلوم ولا كلي وانه موصيته شكو شي يصير وياهم يسولفلي انه اله خلي ارجع للبيت والزمه اخذ افادته

_اويلي عليك سلوم طحت بيد اختك المحققه بعد شيفكك 

_ههه بشرفج مو جنهم طيور حب 

_العفو انتي مو نفسج الجنتي كلما تشوفين كبل تكولين ايع لو غيرج

_ههههه

_هههه سبحان مغير الاحوال

_سبحانه ههه..

ضحكت اخيرا وطلع سلام من يمنه وهوه توتر من شافنه واكفين يم الباب عباله نتسمع عليهم .. ضحكنه عليه ورجعنه ننوشهم الماعين ونسوي

زلاطه وليمون وهمه بره يشوون تكه وكباب .. لحدما مر وقت كملنه كلشي فرشنه السفره بالصاله وكعدنه كلنه سويه بس احسان وزهره صبتلهم اني

بصينيه وخلتهم ياكلون بالغرفه لان البنيه تستحي بعدهه من اولاد عمو شهم وماتاخذ راحتهه اذا كعدت وياهم .. المهم صرنه ناكل ونسولف ونضحك

حسيت البيت صارت بي روح والضحكه رنانه بي تمنيت لو نعيش كلنه سويه بيت واحد وهيج نلتم كل وجبه وكل يوم نسولف ونضحك بس بعد شاءت

الظروف نبتعد كلمن بمنطقه وكلمن ببيت وهوه اصلا لو باقين بنفس البيت بالعماره جان مالتقيت بحبيب روحي محمدي ولا صرت نصيبه وصار

حلالي وعلى ذكر الحلو يبان ..رن نقالي شفته هوه المتصل ترخصت وكمت للمطبخ رديت عليه واجالي صوته تعبان وكال بتنهيده..

_جنتييي

_يبعد كل الحيل انتي طالب حنيه ولج تعبان

_بيه ولا بيك التعب انطيك من حيلي انه

_ماريد حيلج اريد انام بحضنج واستمد حيلي 

_يبعد السعاده انته 

_اريد اجيلج بيهه مجال لو مشغولين بالعرسان

_ماعرف العرسان قبل شوي اجو وبيت عمي شهم همين اجولنه وكاعد نتغده كلنه سويه هسه 

_بس لا العار جاي وياهم 

_لا مايجي هوه النه ابد

_متاكده جنان 

_لا بعد خليهه بليل من يرحون اجي 

_واذا ماراحوا لباجر

_اجي باجر 

_زين ليش ماتجي وهمه موجودين ضايج منهم شنو

_لا بس زحمه ادخل بيناتهم وهم انه جاي اشوفج اذا كعدت يمهم وين الكاج بعد يهون عليج اجي واروح وانه مامحصلي حتى حضنه

_لا مايهون علي

_لعد هاي هيه على مايرحون انتي انطيني خبر اتفرغلج واجي عسى ما ب٢ بليل

_تمام انشاءالله 

_يله روحي كملي اكلج جنتي خلي الخصر ينملي

ابتسمت وسديت الاتصال رجعت للصاله وكعدت اكمل اكلي لحدما شبعنه كلنه الحمدلله وكمنه غسلنه وشلنه الماعين ووكفت غسلتهن بسرعه لان

شويه بس صحونه وكاسات كملتهن وهنه البنات يمي يسولفن وينظفن بالكاونتر ويمسحن الارضيه .. سويت صحون فواكه وكرزات وعصاير واخذتهن

للصاله وسويت صحن جبير للعرسان واخذته لغرفتهم دكيت الباب وفتحه الي احسان وهوه وجهه كله حمره ولابس الكلبيه بالمكلوب ضحكت

بكلبي على شكله وفشلت من يمي المن اجيت قاطعتهم هسه انه والله لو هسه محمد يدري بفوتي عليهم هاي جان دكالي تحيه اخذت حق مداهماته النه سويه ..

انطيته الصينيه ولا اراديا راحت عيني عل كنتور الصاير مقابيل الجربايه وشفت زهره متمدده ولافه عليهه الغطوه تحمحمت وتقربت عليه وكتله بهمس..

_خلتك للجربايه كبال الكنتور جانت غلط تره مريتك مبينه من المرايه ولمن ينفتح الباب تنشاف..

عكد حواجبه ودار وجهه باوع للمرايه يتاكد وهز راسه بايجابيه فشلان ودخل رجعت للمطبخ اخذت نقالي ورحت يم اهلي بالصاله كعدنه ناكل ونسولف

لحدما اذن كمنه توضينه وصلينه وجهزوا نفسهم بيت عمي بعدما شربوا الجاي وطلعوا احسان وزهره ودعنه بيت عمي وراحوا لبيتهم واحنه

رجعنه دخلنه كلمن لغرفته ياخذ قيلوله الضهر .. رحت ردت ادخل لغرفتي ولفت انتباهي صوت

احسان وهوه يحجي ويه امي بصوت ناصي وتساله اذا تمم شغلتهم لو لا وهوه صار يتشرد بنظراته وجاوبهه..

_اي الحمدلله ومن البارحه والبنيه عفيفه يا امي 

_الله يسعدك وياهه يمه والف مبروك يوم الاشوف ابنك بحضنك 

_يبعد روحي بس عندي مشكله هسه

_خير يمه 

_عندي الجربايه لازم اغير مكانهه صايره كبال الكنتور وهوه بي مرايه وصاير مقابيل الباب يعني لمن ينفتح الباب تنشاف وانه اريد اغير مكانهه ومحتار وين اوديهه 

_ياا صدك اشو مانتبهنه على هاي الشغله من خليناهه

_جان المفروض انه انتبه بس من الاستعجال ماصرت اشوف الكبالي من وراي 

_ميخالف يمه هسه احجي ويه ابوك يجيبلك عمال باجر يطلعلك الاخشاب وترجعون تصممونهه من

خليت مكياج من جديد ولبست ترواكه نص ردن لان صيف مو مال صوف بعد وريش واصير دبدوب .. المهم كملت ورشيت عطري المعتاد

وشعري سويته كبايه عاليه وطلعت للصاله وصاني بابا اوصل سلامي لمحمد وفات لغرفته نام بقيت وحدي الكاعده واكلب بنقالي انتظره لحدما اندك

الباب ورمش علي عرفته اجه كمت لبست على راسي وطلعت فتحته اله ودخل وهوه محمل

علاليك حلويات فتحت عيوني بتفاجئ وكتله بعدما سديت الباب وتمشينه للديوان..

_ليش هيج مسوي ولك جايب المحل كله

_ادريج تحبين الحلويات وهليام ماعندج شغل عاد تسلين بيهن انتي واخيتج

_ههه يعني اذا ضعفت ماتضل تاكلني 

_اكلج بكل تفاصيلج حتى لو صرتي جمجمايه

_ههههه يمه من سوالفك يمه

_يمه من عيونك ياحلو يمه 

_هههه 

_ماتدرين شكد مشتاق لهاي الضحكه 

_يخايب امس انته يمي شبسرعه اشتاقيت

_شنو بله عيدي اول كلمه 

_خايب

_احجيهه مثل توه

_يخايب 

_يخايب يمصكوع يبو عيون حلوه لك دوهنتني ..

_احتركوا عمامج

_يااا ولك 

_ولك هاا

_ههههه

صفن بعيوني مبتسم خله العلاليك بالكاع وتقرب علي يمشي ببطئ باوعتله باستغراب ونزل بكل

هدوء ماعبالك هذا الضامر نيه سيئه بداخله تقرب على شفتي عبالي راح يبوسني اشو هذا لزم وجهي

عصره واخذ شفايفي عض دمعت عيوني وتاذيت وهوه يستطعم بالعضه دفعته عني وانه مخليه ايدي عليهه تاذيني وكتله..

_اذيتني محمد ليش تعضني هيج

_هسه كاعد تاذيني شلون 

_تعاي ابوسهه وهيه تطيب

_ما ماريد تبوس استاذ بندوله 

_هههه ولج تعاي بربوكتي روحي متلهفه عليج وانتي تتعيقلين علي اليوم اخرب كل ملامحج مو بس شفتج 

_ماا جا روح ماريدك بعد

_افاا تطرديني

_اي 

_ميخالف ماراح اهتم اليوم اكلج اكلج

_مااا ..

صرخت خفيف ورحت اركض للديوان وسديت الباب اجه وراي يحجي من وره الباب بصوت ناصي حتى لا يسمعون اهلي ضحكت عليه وفتحته اله

دخل خله العلاليك ويا طلابه العلاليك يابويه .. عافهم بالكاع وقفل الباب واجه علي يمشي مثل الوحش المفترس وعيونه تتجول بانحاء جسمي

ركضت لنهايه الديوان واجه علي لزمني من خصري وحصرني بالزاويه وهوه يباوعلي بهيام نزلت راسي مستحيه من نظراته ورجع رفعه واخذ

يتفنن بالبوس والاحضان وماطلع مني الا صار المغرب كعد ابوي يمه شويه وطلعت انه سبحت وبدلت ورحت سويتلهم عشه ويه امي صبيتلهم

هوه وابوي واحسان سويه وطلعت صليت و كعدت بالصاله ويه امي ونوره وزهره نتعشه سويه وامي تجيب وتحط كبال زهره و توكلهه حتى تسمن لان ناعمه خطيه

عبالك لعابه باربي على كوله نوره .. كملنه وشبعنه ورحت اخذت الصينيه منهم خليتهه بالمطبخ ورجعت يمهم وكفت وهمه واكفين

بالساحه يسولفون تالي تسالموا ودخلوا ابوي واحسان للبيت واحنه بقينه بره سحبني لحضنه

يمسد على راسي ويشم بشعري ويكول افيشش ابتسمت وابتعد اكول بتساؤل..

_راح تروح هسه للشركه لو للبيت

_لا بعد رايح للبيت لان باجر عندي دوام بالمعهد للصبح

_هاا تمام ديربالك بالطريق من تسوق وانتبه

_والله اجذب عليج اذا كتلج راح اكدر انتبه لان نعسان وطفيت كلش 

_لا محمد فدوا ديربالك واذا نعسان ابقى الليله هنا ناملك شكم ساعه وطلع الفجر لبيتك

_ماكدر بعد سلمت على اهلج وزحمه ابقى

_شكو بيهه تره عادي

_لا شلون عادي مايصير حبيبتي وهم مرت اخوج بالبيت زحمه ابات بنفس البيت وياهه

_خو ماكو شي غير يم مرتك وبالديوان انته على شنو زحمه 

_عوفج من هاي السالفه حبيبتي خليني احضنج واتوكل

_لا ماكو والله اموت قلق عليك اذا خليتك تروح وحدك عل اقل خلي اكول لابوي يوصلك

_لا يمعوده شسالفه كعدي راحه نوب عمي يوصلني 

_جا شلون لا تقبل بهاي ولا بهاي شسوي

_انطيني حضنه وخليني اروح 

_لا ماتروح وصارت عرضه هاي يعني بس تطلع يصير بيك شي ورايحه ادخل احاجي ابوي انه

_لا جنه عوف....

قبلما يكمل كلامه عفته ودخلت اركض لكيت ابوي واحسان بالصاله كاعدين باوعت لابوي وكتله ..

_بابا حبيبي محمد تعبان ونعسان وخايفه عليه يطلع ويغفه بالطريق ويصير بي شي عادي اخلي يبات الليله هنا والفجر يطلع

_افاا بويه ليش جيتي تسالين حتى خلي يفوت وينام لباجر الضهر اذا حب البيت بيته 

_لا عنده دوام بالمعهد هوه باجر راح يضل للفجر ويروح

_ميخالف اشو تعاي انه راح اطلع احجي وياه موكفه الزلمه بره مثل الغريب صدك جذب يابويه..

خله وكام طلعله صاح لمحمد وهوه جان يم سيارته واجه عليه لزمه من كتفه وكاله..

_وين بعد عمك رايح وانته نعسان وبيتك ومكانك موجود هنا 

_لا عمي رايح للبيت زحمه ابقى واليوم اول يوم لابنك ومرته بالبيت

_وشعليهم ابني ومرته هذا البيت بيتك مثلما هوه بيتهم ومريتك يمك بعد شلك غرض بيهم فوت ياعمي فوت ناملك جم ساعه ارتاح وبعدهه توكل لدوامك 

_بس مايصير ياعمي زحمه

_لا ماكو زحمه فوت ولا تكسر حجايتي يله كدامي 

_ههه تامر انته ابو جنه 

_مايامر عليك ظالم وليدي..

ابتسم وخله ايده على كتفه طبطب عليه ودخله للديوان والتفت علي كالي ..

_بويه جنان روحي جيبي لرجلج فراشه وغطاه فرشيله خلي يمدد ضهره يرتاح انه رايح لغرفتي اخذوا راحتكم بعد

_انشاءالله بابا تصبح على خير

_اجمعين بويه ..

راح بابا دخل جوه ردت اروح انه هم وسحبني محمد من كصيبتي عليه لازك ضهري بصدره التفتت بوجهي عليه وكتله بفشله..

_ها محمدي محتاج شي 

_اي محتاج احاسبج على سوايتج هاي شلون تخليني احجي وتدخلين تصيحين لابوج علي

_اي جا غير اخاف عليك مافكرت اذا صار بيك شي وين اروح انه ووين انطي وجهي

_يمعوده تنسيني

_انسى روحي ومانساك وبعدين يهون عليك غيرك يشتم عطرهه لوردتك ويحضن دبدوبتك

_اشك حلكج وحلكه اليتقربلج

_جا دير بالك على نفسك وحافظ عليهه لان من دون روح اسدي روحي تضيع وتنهشهه الضباع

_من عيني تامر انت دبدوب

_ههه يله عوف هسه كصيبتي حتى اروح اجيبلك فراشك وليدي

_اويلي 

_هههه..

باس كصيبتي وابتسم عفته يدخل للديوان ودخلت انه لغرفتي اخذت مندره وبطانيته يلي اخليهه اله من يبات عدنه وطلعت لكيتهم كلمن داخل لغرفته

يباوع تلفزيون ويكرز .. رجعت للديوان فرشتهن اله تمدد ورحت طفيت الضوه بقيت بس الخافت والتفتت عليه رفع الغطه وفتحلي اديناته ابتسمت

ورحت تمددت بصفه مندمجه بتفاصيله وهوه عصرني جواه ورجله على خصري ضحكت عليه بكلبي وغمضت عيوني متامله بريحه انفاسه

وعطره للفجر .. كعدنه ب٥ على صوت المنبه صبحنه على بعضنه واخذ حصه الصبح من الرومانسيه وكام للحمام غسلنه وتريكنه سويه

ودعته وصعد سيارته بعد حضن طويل وطلع من البيت وهيه الدنيا قليل بيهه ضوه .. تثاوبت ورجعت دخلت للديوان اخذت الصينيه وديتهه

للمطبخ ولكيت زهره واحسان هوه واكف يكصكص بالطماطه يسويلهه ريوك رومانسي ههه وهيه حاضنه ضهره ويسولفون ابتسمت على شكلهم وزفرت براحه اخيرا اكدر اشوف

السعاده بعيون اخوي واطمن على كليبه .. تحمحمت وانتبهوا علي ابتعدت عنه ودخلت خليت الصينيه عل مغسله وماردت اقطع رومانسيتهم عاد

عفت الماعين عل مغسله ورحت لغرفتي دخلت تمددت عل جربايه واتصلت على محمدي بقينه نسولف بالمكالمه لحدما وصل للبيت يبدل سدينه الاتصال

وغمضت عيوني نايمه كلهه فتره قصيره و كعدتني نوره وهيه تدور بمكياجي باوعتلهه فاكه نص عين وكتلهه بنعاس..

_هاي شتدورين انتي بشغلاتي

_اريد اسيتون ماعندج

_شنو اسيتون 

_شبيج هذا اليزيل صبغ الاضافر شلون اسمج بنيه انتي وماتعرفينه

_اعرفه بس نسيت اسمه المهم جان عندي واحد قبل شهرين وخلص سدي الباب وراج من تطلعين

_هفف عابت هسه هوه بالف ونص جيبيلج ثنين خليهن للاحتياط قحط هسه شلون اروح للمدرسه وعندي امتحان نوب وخاف اتعاقب

_منو كلج تصبغين صايرتلي بدكيرا تستاهلين الصار وياج

_هفف خل اروح اشيله بالمبرد بله راح اتاخر صخام بوجهك يلي بالي

_ياهو هذا البالج ولج

_هيج انسي مو يمج سوالف كبار

_عود تريد ترجع فشلاتهه علي ام حلك روحي طلعي روحي وبعدين الزمج اريد اشوف هذا البالج منو 

_محد بالي محد شبيج لزكتي ياا

_لسانج يرادله كص هليام تسكينه سم شنو

_لا اسكي بو*

_عابتلج اي والله امشي ولي منا خلي اتهنه بنومتي لا اكوم اهلس حواجبج الجنهن مال زلمه

_ترحيلهن فدوا 

_نورسييين

_وجعه وجعت كلبي طالعه هيه تسولف وتاخر بيه ومن اضل اجفص تصيحلي نوسين نوسين ..

بقت تدردم وتقلد على صوتي وتفتر فوك راسي جنهه عجوز دلاله غطيت اذاناتي بالمخده ياله طلعت ساده الباب وراهه حيل الهبشه تافافت

ورجعت اريد انام ماكدرت وكوه لمن ردت اغفى فززني صوت زهره فتحت عيوني بصدمه وانه اسمع اصواتهم الحميمه باختصار هيه واحسان..

غميت كصتي شلون علي حظ انه خرب شكلي نوب طلعتلي سالفه الغرفه راح يخلوني اشيل لغرفه نوره على هل سالفه هاي .. رجعت غطيت

اذاني بس الصوت يرن باذني حتى جمر وجهي وحترت الغرفه من الخجل والتوتر ..تافافت وكمت اهفي على وجهي دخلت للحمام غسلت وجهي

وطلعت للمطبخ يا نعسه ردي لمجانج صبيتلي ريوك وكعدت ويه نوره اكل وهيه تباوعلي ماعاجبهه هزيت بايدي وغميتهه لو ما مكعدتني هيه جان نمت وماسمعت شي

ام كصه ماتخلي واحد يتهنى بنومته .. كملنه ريوك وكمنه كلمن لشغله كمت لكيتهه غاسله ماعين ريوكنه انه ومحمد خطيه عاد سويتلهم ريوك

وخليته على جهه من يطلعون اصبلهم شويه على كملت غسل ماعين اجت زهره صبحت علينه انه

وامي ورادت تروح للثلاجه وصحتلهه التفتت علي وكتلهه وانه ااشر عل طباخ..

_تعالي حبي مسويتلكم ريوك بس حمي وصبي

_اهاا هاي ليش متعبه نفسج عمري 

_ماكو تعب حياتي هنه ريوكات 

_ههه فديت المدللني والله

_يفداج الكون حبيبتي ..

ابتسمت وراحت عل طاولات شعلت النار جواهن وحمت الجاي حضرت كلشي بسرعه بسرعه ماشاءالله عليهه حركه وتكضي شغلهه بسرعه كملت

صب ريوك وصاحت لاحسان كعدوا يم امي يتريكون وانه كملت وكعدت يمهم شويه وراحت

_اي حبي كولي 

_من تنامون انتي ورجلج حاولي تنصين صوتج لان البيت صغير والصوت مسموع حتى لو مقفول الباب

عليكم وماريد واحد من اهلي يسمعج وتتفشلين وياه انتي اختي والماقبله على نفسي ماقبله عليج 

_يعني صوتي طالع ولا ادري والله

_عادي تصير وهوه احنه بيتنه ينسمع بي الصوت لان هدوء وخاصه اليعبر للمطبخ يكدر يسمع بوضوح لان قريبين عليه 

_لا يا الله والله عيب هسه بس لا امج وابوج سامعيني 

_لا ماعتقد لان انه الصبح ياله سمعت صوتج يعني من قبل مايطلع 

_اي هوه انه اليوم ماسيطرت عل وضعيه 

_ههه شبيج احمر وجهج ومنزله راسج ولج لا تستحي اختج انه وهذا كلامي علمودج حبيبتي 

_بعد عمري والله متفشله منكم 

_لا حبيبتي اصلا كتلج بس اليوم طلع صوتج ومعذوره بعدج عروس وماتعرفين طبيعه بيتنه واذا ينسمع بي الصوت لو لا

_اي والله بس انشاءلله منا ورايح انتبه على صوتي 

_تمام عمري ..

ابتسمت ورادت تكوم ورجعت كعدت وكالت بتردد..

_لا شوي بس اليمر من غرفتكم واليوكف قريب منهه ينسمع وشي طبيعي هذا لان كتلج بيتنه هادئ وحتى صوت الابره ينسمع بي 

_اوك عمري شكرا الج لان نبهتيني 

_العفو حياتي روحي الكم اني ..

رجعت ابتسمت بامتنان وكمنه غسلنه وانه بداخلي متفشله منهه رغم ترددت وكلت مايجوز احجيلهه وهيه بعدهه عروس لان ينكسر واهسهه بس جان

لازم انبهه لان فعلا الصوت طالع واليجي للمطبخ يسمعه بطريقه .. المهم لملمت شجاعتي كوه وحجيتلهه وهيه مازعلت ولا كرهت هل شي بالعكس قابلته بتفهم وامتنان وهذا المريح

حسيته اتجاهه ان ماتخلي شخص يتقيد وياهه بالكلام تاخذ كل كلامنه بنيه صافيه وطيبه ولهل سبب خلال فتره قصيره كدرت تتعود علينه ونتعود

يتعاملون كأنهم متزوجين من الف سنه وعدهم الف ولد ..رغم اشوف زهره شايلته على كفوف الراحه ومامقصره وياه بشي بس هوه دوم رسمي

ووجهه جدي وياهه حتى من يحجي انه من يمي تبرد مشاعري اتجاهه شلون هيه .. استمرت الايام والاسابيع على نفس الموال هيه تكضي شغل البيت

وتكعد يمنه منا ليجي ومن يجي من دوامه تسويله غده وتنومه وترجع تكعد يمنه ومن تكلهه امي روحي يم رجلج خاف يريدج تتنهد بحيره وتكلهه

نايم تعبان مو مال اروح يمه هسه .. عرفت ان علاقتهم مو قويه وفقط الاحترام والوديه بيناتهم حاولت اكعد وياهه ابوك لسانهه واخليهه تفضفضلي

بس ابد جانت متكتمه على كل اسرارهم واليصير وياهم لحدما بيوم فزيت بليل على صوتهم وهمه يتناقشون ماكدرت افهم شيسولفون بالضبط

_احسان باوعلي كلي ليمتى راح تبقى هيج ليمتى راح تضل متعلك بشي خلص وراح وشي ماصار ابد 

_زهره فوتي نامي 

_لا مافوت لا تباوعلي هيج ماراح افوت ولا راح يهدالي بال الا اعرف التريده بالضبط ولو يصبح علينه صبح واحنه صافي كلبنه لو نصبح كلمن يمشي بطريقه 

_زهرره تره جزعت روحي هاي كل ليله من حجيتلج لهسه تفتحين هل موضوع وتلحين بي

_لاني شايفتك احسان لاني صرت اشك بكل صفناتك تريد تبقى هيج انته تريد تضل بقوقعه مشاعرك القديمه مالك نيه تنسه وتطلعهه من حياتك

_مالهه اثر بحياتي مجرد بس اشوفهه كل يوم وكصديقه عادي 

طليت عليهم وشفته صفن بوجهه ساكت وحيران سحب نفس من الجكاره وراد يدخل ولزمت ايده خلت جبينهه على كتفه وكالت بتعب..

_لا تسوي بينه هيج احسان لا تخرب زواجنه وبيتنه بسبب مشاعر مالهه مقابل لا تخرب شي حقيقي لخاطر شي خيالي وماموجود

_بس حبي لشموخ بعده موجود وكتلج ماضيي ماراح اسمحله ان يخرب زواجنه او يعرقل حياتنه ..

شفتهه فتحت عيونهه بصدمه ورفعت راسهه باوعتله بتساؤل بعد ايدهه عن ايده وصل للباب وانه ردت اروح ووقفنه ثنينه كلامهه وهيه تكول..

_اذا عفتي ودخلت صدك اني مالي فوته على بيتك الليله 

_استغفرالله زهره انتي وين تردين توصلين فهميني وين ..

حجه كلامه وهوه يتوجهلهه لزمهه من زندهه وصار يحجي من بين سنونه ويكلهه..

_بتصرفاتج هاي انتي يلي راح تدمرين هل زواج وانتي يلي راح تعرقلين عيشتنه 

_يا انه يا حبك لشموخ 

_زهره امشي فوتي لفي راسج ونامي لا تخليني اتخبل عليج بنص الليل هسه

_لا على شنو تتخبل انته حجيت العندك وانه حجيت العندي وماريد بعد اعيش ويه شخص احبه وهوه يحب غيري ..

رخت عكده حواجبه من كالتله انهه تحبه وباوعلهه بنظرات ماعرف شنو بعد ايده عنهه وكالتله وهيه دموعهه تنزل سكته على خدهه..

_حبيتك انه يا احسان ومن صرت حلالك وبديت احبك جان بودي تحبني انته همين ونعيش باقي عمرنه متحابين مو كشخصين يتصرفون مثل

الاخوه وبرسميات ومن سولفتلي عن حبك لبنت خالتك قبل اسبوعين وكتلي انك تشتغل وياهه حاليا ماعرف شصار بيه صرت اخاف صرت

اوهوس صرت اتخيل مرات تدخل علينه بيوم وانته لازم ايدهه وتكلي اريد اتزوجهه عليج رغم اني بكل مره اباوع للمرايه واحاول اتصرف بغرور

وثقه واكول لا مايسويهه احسان وين يلكه مثلي وين يلكه بجمالي وطيبه كلبي بس بكل مره اتذكر بيهه لطافه شموخ ونظراتك البارده اتجاهي حتى

واحنه عل فراش تهتز ثقتي بانوثتي وطبعي واصير اخاف يجي يوم وتبدلني وتعوفني بالساهل 

_لو اريد شموخ جان ماتقدمتلج ولا طلبت تصيرين حلالي 

_بس جان السبب حبهه لغير شخص وبسبب بنتهه رافضتك شلون اذا اجه يوم ونست ذاك الشخص شلون لمن تكبر بتهه وتصير ماتحتاجهه بهذاك

الوكت رح تكون وحيده ورح يكون حبهه بكلبك بعده عامر وانه متاكده انك فكرت بهاذ اليوم وخططت اله وكلت لمن توافق اروح اتقدملهه 

_لا مافكرت بهذا الشي اصلا

_لا فكرت 

كل هل سنين جان بسببه وهيه فقط جانت معجبه بي وماجان عدهه امل بلقاءه وهسه تكليلي فكرت تاخذهه بعد مرور السنين 

_وشنو اليمنعك

_ اليمنعني هواي اسباب وكتلج انه اعرف شموخ زين لو حبت شخص مستحيل تكدر تنساه او تتقبل غيره 

_بس هيه تزوجت من قبل

_جانت ظروف زواجهه منه غامضه وانجبرت عليه وتدرين شكلتلي لمن اخر مره حجيت وياهه بيوم خطوبتنه

_شكالت

_كالت ان قراري بالزواج ماراح يسوي شي ماراح يخليهه تتخلى عن قرارهه بالانفصال عن التحبه ولا راح يجمعهه بي ولو انه مثلما تكولين اخطط

اخذهه بالمستقبل جان استغليت هل فرصه وعلى اثر كلامهه يرجع الامل بكلبي وابطل اخطب واتاني

كم سنه ثانيه بعد شعدي بس ماسويت هيج لاني اعرف وشفت البعيونهه عكس اليحجي لسانهه تماما 

_بس هذا ماراح يغير حقيقه انك بعدك تحبهه

_احبهه كصديقه ومكانتهه غاليه عندي وعزيزه لا اكثر ولا اقل

_واذا بيوم من الايام بسنه من سنين اجتلك وكلتلك انه محتاجتك واريد اصير حلالك ونتزوج ماراح توافق ماراح تروحلهه تتمسك بيهه باديك ورجليك

ماتخربطلك كيانك وتروح تطلب ايدهه وتهدم بيتنه لوراح تكلهه اريد مرتي واحبهه احجي كول

لا تضل ساكت لمن تكلك انه احبك واريدك راح تكلهه انه احب مرتي واريدهه ..

تهسترت البنيه صارت تبجي وتحجي وايدهه تضرب على صدره بكل ماباقيه من قوه بيهه لزم اديهه ورفعت راسهه باوعتله وكالتله بتعب..

_طلكني احسان ماريد ابقى عندك بعد خلاص صار شهور متزوجين طلعت الدنيا من عيني شلون تريد اعيش باقي عمري بداخل هل خوف والحب

يلي ماله مقابل شلون تريدني ابقى ويه شخص روحه وكلبه وباله يم وحده غيري طلكني ماريد اعيش وياك بعد طلكنييي...