رواية فصلية بديلة ( شموخ ) الجزء الثاني الفصل السابع والاربعون 47 بقلم ام ملكوت

:- مثل اي يوم خبصه ومتعجل كعدت ابدل لريانه من الصبح حتى اخذهه للروضه بطريقي للدوام وانه مستعجله وافكر بالقضيه الشغلت بالي البارحه

وهوسه صايره بدماغي راجعت تفاصيل قضيه البنيه الحامل و للحظه تشتت انتباهي وبلعت ريجي بصعوبه وخنكه حاوطتني لمن سرحت

premium

وهوسه صايره بدماغي راجعت تفاصيل قضيه البنيه الحامل و للحظه تشتت انتباهي وبلعت ريجي بصعوبه وخنكه حاوطتني لمن سرحت

وتذكرت راهب يلي ولا لحظه غاب عن بالي من رجع لهسه وسرحت بالاحداث يلي صارت ويانه من شهرين لمن جان موجود واخر قضيه استلمناهه  وطلعنه بيهه سويه 

ويلي كدرنه بفضل رب العالمين نحلهه وجان بدايه القضيه هوه لمن  طلعنه مداهمه وياه عن قضيه خطف وسحلنه المشتبه بيهم بصندوق السياره ..

_قبل ٥ اشهر _

بطريق رجعتنه للدائره وكفنه بالسيطره ننتظر ينفتح السايد وانه عيوني كل شوي تباوع عل مرايه وين معلكه عيونه لراهب اصفن بي لحظات وهوه

كذلك وبعدها اتدارك الموقف والمكان وادير وجهي عنه ..كلهه دقايق واشوف سياره حمره صغيره عبرت بسرعه من جانبنه متخطيه الاشاره و طريق

المرور بسرعه جنونيه وجانت  تسوقهه مره ومبين الخوف بعيونهه وهيه تشوف السياره البيضه نوع سنتافيا وراهه لاحكتهه .. فبسرعه حرك راهب

السياره وطرنه وراهم كلهه ثواني مالحكنه حتى نوصللهم كدر يوصلهه ابو السياره البيضه وضربهه وشرد وهوه عايف وراه السياره الحمره تتكلب

وتتكسر بحيث صارت مثل القوطيه المخسفه وكل هذا كدام عيونه صار عبالك مثل فيلم الرعب .. لزم بريك راهب شاخط السياره ومترب الدنيا فتحنه

الباب ونزلنه نركض عليهه بعدما استقرت السياره على وجهه  .. اجه لزم يده الباب وبقه يحاول يفتحه درت عل جهه الثانيه احاول افتح الباب

اليمهه واشوفهه لا حس ولا نفس مغمى عليهه كدر اخيرا يفتح راهب الباب والناس كلهه التمت علينه والفريق يبعدون بيهم عنه مانعين التصوير عجيب

هل ناس بدل ماتتصل بالاسعاف وتساعد باقيه تصور وتلم مشاهدات .. المهم انه كمت بسرعه رحت يم راهب وهوه لازم ايدهه وايد الثانيه يفك

_خليهم يسكتون راهب خلي الناس تهده حتى نعرف مصدره منين ..

هز راسه بايجابيه وكام صفك باديه وهوه يسكت بالناس بقيت انه ادور بالسياره عن مصدر الصوت بس مالكيت شي ماكو اثر لطفل او شخص ثاني

بالسياره غير المره رجع راهب ولزمناهه احنه الثنين وصرنه نسحب بيهه طلعناهه واجو الاسعاف واصحاب الادله الجنائيه وصارت الهوسه هوستين

اخيرا كدرت اميز الصوت وجان كلش قريب رغم ناصي ومخنوك بس ماله اثر صاحب الصوت  طلعت تجر اخر انفاسهه وتاشر جواهه نزلت عيوني

على بطنهه منفوخه رفعت عبايتهه واشوفهه تنزف كلت لراهب يغطي علينه ورفعت العبايه عن رجليهه واشوف منظر بعمري ماشفته وابد ماراح انساه

راس الطفل وايده طالعه منهه بسبب مردت بطنهه بالسياره وهوه يبجي بصوت مخنوك  دليل على شربه

ماي البطن ومره يسكت مغمى عليه تهسترت وخفت يروح من ادينه لو يتاذه درت وجهي على راهب وكتله بجزع..

_راهب المره حامل وابنهه طالع راهب صيح للبنات يجن يعاونني خلي نطلع الطفل لا يختنك ويموت..

بقه يباوعلي ويباوع للمره دار وجهه عنهه من شافهه مكشفه وصاح للبنات اجن سون ستاره حوالينه وكعدت انه وبنيه من فريقي نسحب

بالطفل على كيفنه مانعرف شلون نطلعه ولوما هيه بقت تعصر جان اختنك .. اخيرا كدرنه نطلعه هوه والمشيمه وطوله كله بكد جف الايد توقعته بالسابع

لان بكبر ريانه من ولدتهه تقريبا .. بقه يرجف وهوه بحضني ومخنوك وجهه احمرر انطيته لزميلتي و نزعت سترتي لفيته بيهه واخذته ..

كمت واجو اهل الاسعاف خلو السديه جواهه بعدما سترنه جسمهه ورفعوهه خلوهه بالسياره وصعدت انه وبيدي الطفل ووياي راهب بقيت حاضنه الطفل

عبالك ابني وخوف فضيع بداخلي من ان يصيرله شي و اتخيل لوما لكيناه وطلعناه شنو راح يصير بي او لو طايح عليه شي وممرود جواهه لا

مستحيل روحي تنمرد بمجرد كلام شحالي لو شفته بهيج منظر كدامي الله لا يكولهه .. بقيت اهز

بروحي وجسمي ينتفض ويرجف لا اراديا خله راهب ايده على رجلي موقف اهتزازهه ولزم الطفل وكال وهوه يحاول ياخذه مني..

_انطيني الطفل شموخ واهدي لا يصير بيج شي يمعوده 

_لا راهب خلي عندي لا يموت لا يصير بي شي خليني مدفيته بحضني 

_انه راح ادفي انتي بس اهدي واخذي نفس شوفي كبالج هوه مابي شي هسه نوصل للمستشفى ويخلونه بالخدج لا تخافين 

_تمام بس دفي زين راهب لزمه عدل لا يطيح ولا تضمه بصدرك حيل لا يختنك

_اعرف شموخ اهدي شبيج اهدي هاي انتي القويه المولده نفسهه هيج شحالهه المالازمه طفل بحياتهه 

_وهوه لهذا السبب خايفه عليه لان ادري بي حساس بهيج عمر واقل شي ينشمر ويموت ورغم هاي ثاني مره تصير واولد طفل بيدي بس الحالتين

تختلف هذيج بنتي راهب وهذا ابن غيري ماريد يصير بي شي واكون المسؤؤله عنه ضميري ماراح يرتاح لو صارله شي 

_ماراح يصيرله شي تاكدي مدام طلع يتنفس ماراح يكون بي اي شي انشاءلله 

_انشاءلله راهب انشاءلله..

بقيت اباوع للطفل وهوه مضموم بصدر راهب متناسيه المسافه المعدومه بيناتنه ونظراته الاكلتني ..وصلنه اخيرا للمستشفى ونزلو المره

بالسديه يركضون بيهه لان انقطع نفسهه وبقوا يحاولون بيهه قبل ثواني معدوده ..واحنه وراهم ركض راهب بالطفل للدكتور اخذوه لصاله

الولادات يفحصونه وينظفون بطنه ويعلكوله اوكسجين ومن تالي يخلونه بالخدج وطبعا انه بقيت وياه خايفه ياخذونه لو يخربطون بي

ويضيعون امه لان مامسجل .. والحمدلله رجع تنفسه طبيعي بعد دقايق من المحاوله وياه رحت سويت كل الإجراءات مالت الفحص وغرفه الخدج

ورجعت ضليت بره اباوعله من بعيد من الجامه بتعب وهوه نايم بالصندوق الزجاجي مثل الملاك الصغيرون اجه راهب من بعيد ورحت عليه سالته بقلق..

_هاا راهب شلونهه الام كونهه بخير 

_الحمدلله كدرو ينقذونهه بعد معاناة بس بعدهه بالعنايه المشدده خاف يصير عدهه مضاعفات لان جسمهه وراسهه متضرر كلش

_استغفرالله ربي شنو من بشر شنو من كلب شايل السوه بيهه هيج 

_البشري مايسوي هيج هذا حيوان متوحش وبي داء وانشاءلله علاجه يمي بس خلي الزم مكانه 

_انه حفظت رقم السياره اذا تريده

_افا عليج سويلم لكفه قبلما يسوي سوايته بالمره وهسه كاعد بالسياره يتبع موقعه 

_اي هاذهو ديربالكم تضيعونه راهب هيج واحد لازم ينلزم ويتعاقب اشد العقاب

_وهوه هيج انشاءلله ماراح ارجع لمحافظتي الا وانه ساحله مؤبد لو اعدام ..

كال يرجع لمحافظته وصفت بعيونه باهته ملامحي يعني شنو فعلا هاي اخر مهمه النه سويه يعني بعدما يطلعن النتائج ويتحاكم النذل راح يروح

راهب يعني ماشوفه بعد ماتحضى روحي ب طلته علينه ماتشبع عيوني شوف من تفاصيله وهوه يدربنه يعني هاي هيه راح يروح ونفترق للابد ..

دمعت عيوني وانه صافنه بعيونه المجمره جر حسره شكت صدره واحس حراره انفاسه جوت كلبي نزلت عيوني عنه ورجعتهن عل طفل بقيت

صافنه بي متشرده من نظراته يلي طبعت بوجهي بس سرعان ماقاطعنه فوتت سالم علينه دك تحيه لراهب والتفتت بسرعه عليه لمن سمعته كال..

_سيدي التقى المجرم صاحب السياره سوفيتا

_وين موقعه الحالي

_سيدي موجود بيت من بيوت الحواسم بالجمهوريه وهذا عنوانه سيدي..

قدمله ورقه وراهب هز راسه وأمره يبلغ الفريق يتجهزون للمداهمه دكله تحيه وراح التفتت علي بحيره وكال بتساؤل..

_تجين ويانه لو 

_لا اجي وياكم اكيد اريد بيدي اسحله من كرونه لهل نذل 

_تمام يله وراي 

_حاضر سيدي..

وكفت بثبات وابتسم خفيف ماعرف ليش من بده يدربنه لهسه كلما يامرني واكله حاضر واوكف بثبات وقوه يبتسم هل شكل حتى لو جان ضايج مني

او زعلان او طالعه الدنيا من عينه بمجرد ماسوي هيج يبتسم لا اراديا ماعرف يبتسم فخر او لان مامتعود علي بهل جديه .. المهم نزلت عيني عنه

وراح كبالي يهف بمشيته الشامخه قلدته ومشيت وراه جمعنه الفريق وطلعنه كلنه سويه نمشي بقوه ورهبه وكل العيون توجهت علينه صعدنه بالسيارات

وانطلقنه لموقعه واحنه نخطط شنسوي ومن يا جهه نهاجمه وشلون اذا وياه ناس لو كاعد عند ناس ابرياء .. والى اخرى لحدما وصلنه لموقعه بعد

ساعه كامله انتشروا الفريق حوالين البيت حضرنه اسلحتنه واحنه البنات قسم بقينه بعاد نراقب وقسم ويه راهب واكفين.. رفع اللاسلكي يم حلكه

وعد لل٥ انطاهم اشاره ورفس الباب كاسره وداخل للساحه وانه وزميلتي وقسم من الفريق وياه والبقيه نزلو من الاسطوح وبقو يراقبون داهمنه

البيت باسلحتنه وجانوا عائله كامله فزوا من مكانهم رافعين اديهم والنسوان دخلن للغرف يتصارخن دخلنه وراهن انه والبنات الوياي رفعنه

السلاح بوجههم واسمع راهب يصيح عليهم ويسالهم منو صاحب السياره البيضه اخيرا طلع واحد منهم وكال فلان هوه صاحب السياره وواحد

يشمرهه عل ثاني اخر شي ضحك راهب خفيف والانظار مستغربه صارت عليه تحولت ملامحه

لجديه واشر باصابيعه على سالم وكله ببحه ونبره هادئه وقويه بنفس الوقت طيرت عقلي..

_يولو سالم دسحل بعد عمك العائله الكريمه وهناك نذبهم بالمصفي ونطلع النريده منهم لو شتكول

_اي ليش لا تامر سيدي..

ابتسمت واجت عينه علي تنهد وهز راسه بحيره وطلع دخلوا البقيه باسلحتهم كلبشوا الكل عدا النسوان وسحلوهم لقفص السياره .. رحنه صعدنه

احنه بالسيارات واحساس براحه حاوط كلبي بعد الضيقه يلي حسيت بيهه بسبب حاله المره وابنهه التفتت على راهب وصفنت بشكله وهوه عاكد

حواجبه وجكارته بين اصابع ايده اللازم بيهه السكان وكل شوي يعبي ريته بانفاسهه ويزفره براحه وهوه رافع راسه ومركز بالطريق كلهه ساعه

مرت مثل الثواني وانه مره اصفن بي ومره ادير عيوني عنه لمن ينتبهلي.. لحدما وصلنه للدائره نزلنه ونزلوا المجرمين باوعت وحسيت عبالك جنه

بالصيد نصيد طيور ..من جهه مجرمين القضيه الاولى يلي رحنه حتى نجيبهم ومن جهه العائله يلي جبناهه قبل شوي دخلوهم للحجز وصعدنه

احنه لمكتبنه ذبينه الدرع والعتاد خليناهن بجنطتهن وضميناهن بالكومدي لانهن خاصه بينه ومرخص النه وسعره بسعر سلاح الضابط اذا ضاع

يضيعون علوم وجهنه فلازم نحافظ عليهن بدمنه .. المهم بعدما كملنه تبديل ذبينه روحنه عل كراسي تعبانين ونتناقش بالقضيتين وندور على حلتهن ..

دقايق و اجه الضابط سالم انطانه كل المعلومات عن المره وعن حياتهه وحياة الشخص الدعسهه وجايب أفاده المره سالته شلون اخذهه وكلي انهه

صحت وشافت ابنهه همين زفرت براحه لان عايشه وماصار بيهه وبابنهه شي وكعدت اقره بملفهه وجان عباره عن :

•• شهد سالم امراة حامل بشهر الثامن عمرها ٢٥ عاما ام لطفلين بعمر ال٢ وال٤ سنوات تعرضت لحادث سياره متعمد من قبل شخص مجهول تحت

قبضه القياده وتشير افادت المغدوره الى انها تزوجت بشخص كان بمعتقدها انه مدير مدرسه وامام جامع لتكتشف بعد ٥ سنوات من الزواج به

بانه تاجر مخد*ات وقاتل وحينما حاولت مواجهته حاول اسكاتها بالتهديد وحبسها لايام عديده ولكنها وبمساعده قريبه زوجها استطاعت ان تاخذ اطفالها

وتهرب بسياره اخته وبعد اسبوع طال دون سماع اي خبر منه ظنت انه قد تركها او غض النظر عنها وهرب لكنها تنصدم بملاحقتها حين خروجها لجلب

احتياجات اطفالها من الماركت القريب على بيتها ليحاول قتلها ودعسها بسيارته الفارهه والرجوع لبيته كأن لم يحدث شيئا ولكن عندما تم فحصها

وجدنا انها قد تناولت الكثير من المواد المخدره قبل دقائق من الحادثه لذا نرى ان الحادث مشكوك بامره ان كان متعمد ام لا وان كانت المراه هي

السبب ام الرجل .. لذا يرجوا من المحققين الكرام ان يبحثوا في هذه القضيه ويعرضوا لنا حقيقه

الامر بمساعده فريق البحث الجنائي لروايه الحقيقه من طرف المشتبه به واحاله الجاني الى دار العدل••

لهنا وخلصت المعلومات يلي كدروا يوصلولهه منهه وفهمت كلشي الا تعاطيهه للمخدرات شلون يعني هيه يلي جانت تشرب لو احد يشربهه مافهمت واما

الحادث فالكل شهد عليه وشافه متعمد ومن طرف الرجال الضربهه يلي هوه زوجهه .. صفنت وفكرت بهل حاله هيه عليهه عقوبة واحتمال ينفذ بريشه

هذاك النذل لو حاول يلفق عليهه التهمه لان راح يصدكون كلشي ويعتبروها مو بوعيهه وكاعد تتهمه زور او هيه يلي استفزته او امرته حتى يقتلهه ..

تنهدت وكمت عل لوحه كتبت المعلومات المهمه عنهه ووكفنه انه وفريقي نحل بيهه وواحد يرفع وواحد يكبس وانقسمنا قسمين من جهه يلي شهد

عل حادث وكالوا متعمد ومن جهه يلي ماشهدوا عليه وكالوا المره جانت مو بوعيه والحادث مو متعمد وطبعا هذولي الجهه كدرنه نقنعهم بالشفناه

احنه خليتهم يتناقشون بيناتهم وانه صفنت افكر بسالفه تعاطيهه للمخدرات شلون هيج طلع بالفحص وهيه رغم شافت الموت بعينهه ورغم

جروحهه ودمهه النزف ماصارلهه شي و بقت تحاول تلفت انتباهنه على طفلهه .. حسب علمي الشخص المتعاطي تقل طاقته ولمن يتعرض لحادث

ينفذ اخر قطره من طاقته بالخوف ويغمى عليه او تنقطع انفاسه لدقايق ويموت.. رغم هيه اغمى عليهه فتره بس رجعت كعدت وبطاقه قويه مالهه

اي علاقه بالمخدر يلي متعاطيته .. كتبت هل تفاصيل الفكرت بيهه بدفتر الملاحظات ورحت طلعت الملف الجبير مالت راهب خليته عل ميز

ووكفت اقره بي واتبع خطواته بالحل اخيرا وبعد مناقشات عقليه كدرت اتوصل لاطراف خيطين بهل قضيه وهنه مثلما ذكرت من قبل

- يا اما صاير شي بيناتهم قبل الحادث بدقايق ومسبب الهه تعاطي مخدرات وماحاجيته شهد بافادتهه ..

او ان الاطفال الهم علاقه بتهور الاب واقدامه على هيج فعل وتجرئه على قتلهه ..

لان لا الام يلي كعدت من الاغماء وهيه تحاول تنقذ طفلهه تكدر تتعاطى شي تدري بي مضر اله ولا الرجال يلي سكت عن مرته وماخاف تشتكي عليه

للشرطه وتعترف عليه اولما شردت ان ممكن يقتلهه لهل سبب لان لو راد جان كدر يقتلهه اولما

طلعت منه او يكدر يستدرجهه ويقتلهه بمكان مو مشبوه نفس مكان الحادث الجان بالسيطره والدنيا محتركه بي من الناس والسيارات..

لهنا كلشي تمام ولازم هسه ادور على السبب الحقيقي ويلي لازم اطلعه بمساعده راهب باخذ أفاده الرجال واعترافه .. هزيت راسي بايجابيه

اخذت ملف القضيه وطلعت تاركه وراي الفريق صافن ويفكر بكلامي .. نزلت لمكتب راهب دكيت الباب كال تفضل ودخلت خليت الملف جوه معصم

ايدي ودكيتله تحيه كال استريحي ونزلت ايدي اخذت الملف وتقدمت خليته عل ميز ورجعت وكفت بثبات وانه احجي ..

_سيدي هذا الملف يحتوي على الاشياء يلي استنتجتهه عن طريق الادله والمعلومات الاعرفهه بقضيه الام شهد تكدر تطلع عليهه وتنطيني رايك

أضف تعليقًا

المزيد من الخيارات

_اي اكيد تفضلي كعدي خليني اقره براحتي

_تامر سيدي ..

اجيت كعدت عل كرسي وبقه هوه يقره بتركيز بالتفاصيل والملاحظات يلي كاتبتهه هز راسه باعجاب ورفع انظاره الي وكال وهوه يطبك اصابع ايده سويه..

_لهنا حلج عال العال باقي بس السبب الحقيقي يلي يوصلج لنهايه القضيه مو

_اي ولهذا السبب اجيت اطلب مساعدتك حتى اخذ افاده الرجال وافهم منه سبب الحادث السواه واذا تسمحلي تكدر تنطيني اذن حتى اروح اخذ افاده

المره بنفسي واسالهه عن الحدث يلي جان فاصل بين طلعتهه من الماركت وبين الحادث 

_تمام اصلا ماتحتاجين اذن لانج رايحه وياي

_يعني انت هم رايد تروح

_اي لان عرفت من بدايه انهه مانطت الافاده كامله للشرطه واكو خلل بيهه لو لاحظتي

_شنو هوه

_لمن سالتهه الشرطه بيمن تشكين و كالت ان زوجها هوه يلي سبب الحادث وضرب سيارتهه متعمد 

_بس هذا المتاكدين منه احنه

_ احنه يلي شفنه ومتاكدين من مسبب الحادث ان زوجها بس هيه كولي شلون عرفت والسياره

الجانت تلاحكهه جاماتهه مضلله ومستحيل تكدر تميز الشخص يلي بداخلهه وهيه تسوق بهل سرعه والخوف 

_جائز تكون تعرفهه سياره رجلهه وتعرف رقمهه 

_شلون وهوه مكتوب بالبحث ان زوجها اشتره السياره قبل يومين وهيه جانت عند اهلهه من اسبوع ولا ملتقيه بي ولا تعرف عنه شي ولا شايفه السياره اصلا

_اها اشو مامكتوب هيج بالملف 

_لان هل معلومات مو الملف اليقدمهه الج لازم انتي تكتشفيهه بشطارتج 

_يعني انت ماكلولك بيهه وانما فكرت واستخرجتهه 

_لا انه وضعي يختلف عنج لان عندي سالم يبحث ويدورلي بمعلومات السيارات والمواقع والتواريخ اما انتو ماعدكم هيج شخص ولازم انتو يلي تطلعون هل معلومات

_بس شلون نطلعهه وهاي مو شغلتنه

_وانه شكتلكم لمن جبتكم للقاعه السريه مو كلت لازم تدرسون كل المجالات حتى تكدرون تحلون القضيه بكل سهوله 

_اي صحيح 

_وهمه ليش اصلا جانوا ينطوكم تدريب عل حواسيب والتهكير والبحث بالمواقع 

_هاا يعني لهل سبب وانه جنت افكر شنو فايده هل محاضرات اليوميه بس ليش ماوضحوا هل شي النه من بدايه ماكالوا راح نعلمكم عل هكر حتى تستفادون منه بحل القضايا

_انتو مو طلاب مدرسه لو جامعه ويكلولكم عن سبب كل تدريب انتو محققين وواجب المحقق يلكه سبب لكل شي يسوي وكلشي يشوفه حتى

شرب الماي لمن تباوعين للماي لازم تفكرين ليش الماي مايتسرب من الكلاص لو يتقطر 

_وياك حق سيدي طلعنه نتعلم وندرس بدون مانفهم شنو الهدف والسبب من دراستنه لهذي الاشياء انشاءالله منا ورايح نتعض ونمشي على هل اساس و انبه فريقي على هل نقاط 

_تمام وهسه شنو قررتي شراح تكون اول خطوه الج بهل قضيه

_اخذ افاده شهد الكامله 

_نتوكل هسه مدام بقه عل دوام بس ساعتين

_اي تمام سيدي اذا ماعندك شغل خلينه نروح هسه 

_تمام بدلي ملابسج العسكريه لبسي شي رسمي وشارتج بجيبج علكيهه وانتظريني بالساحه

_حاضر سيدي..

هز راسه بايجابيه ورجع عينه عل ملف كمت دكيتله تحيه وطلعت صعدت لمكتبي اخذت ملابسي الزي الرسمي للدوام اليومي العادي ورحت للحمامات

نزعت الستره السوده يلي كلهه دم من الطفل خليتهه بالغسيل الجاف هيه والبنطرون ورجعت لبست الطقم الرسمي الاسود وغيرت لفه حجابي

بعدما جان ملفوف لف على راسي هسه دنبسته من الرقبه وشمرت ذيوله على اكتافي من الجهتين عدلت مكياجي وطلعت بعدما كمل الزي العسكري

تنشيف وخليته بالجنطه  .. صعدت فوك خليت الملابس بالكومدي واخذت الشاره مالتي يلي رغم انهه مو رسميه ومابيهه رتبه الا اني كلما اشوفهه

احس بالمسؤؤليه وان حق المظلومين بيدي ولازم ارجعه .. المهم خليت الخيط بجيب الستره والشاره معلكه بره لزمت نقالي خليته بالجنطه وعلكتهه

على كتفي وبيدي فايل فارغ وقلم .. جيكت روحي بالمرايه الصغيره ونزلت للساحه بقيت افتر بيهه منتظره راهب كلهه ثواني وطلع هوه كذلك

لابس ملابس رسميه سوده وفاتح اول دكمتين من قميصه الابيض وطالع سلساله الفضي والساعه الفضيه بالايد ويمشي بهيبه ورزانه وهوه يعدل بردن سترته..

رفع عيونه وهوه عاكد حواجبه بجديه شافني صافنه بي لحدما وصل يم السياره وكف كبالي وخله اصابع اديه بجيوب البنطرون وكال بابتسامه خبث على وجهه..

_منظري يسحر هاا 

_ادري بروحي حلو بس كولي ماشاءالله لا انحسد من هل عيون السمره

_احم لا مو حلو اا قصدي ما احسد انه 

_ههه تمام صدكتج بس يله نروح لا نتاخر 

_اي يله تفضل 

_النساء اولا..

رفعت راسي باوعتله وهوه واكف يباوعلي من جوه ليفوك يتامل بطلتي ومبتسم ابتسامته الجانبيه التخربط علومي تحمحمت ورحت امشي كباله

حسيته بقه شوي واكف تالي اجه وراي ركبنه بالسياره باوعلي بعدما شغل السياره وكال ..

_جبتي جهاز التسجيل 

_جؤ نزلي جيبي جهاز التسجيل من سالم وتعالي ركض ومن باجر تجيبيلج واحد خاص بيج وبلغي فريقج كذلك يشترون 

_تمام حاضر ..

فتحت باب السياره ونزلت اركض دخلت للدائره بسرعه ورحت بوجهي لسالم وكفت يمه وانه فحطانه وهوه باوعلي باستغراب ووكف على حيله وكال ..

_نعم متدربه شموخ محتاجه شي

_راهب يريد جهاز التسجيل يلي تاخذون بي اعترافات وافادات المجرمين

_شو ماتصل علي وبلغني عنه

_ماعرف بس هوه بالسياره ورايحين ناخذ افاده الضحيه شهد اذا عندك علم بهل شي فمحتاجين الجهاز 

باوعتله بصدمه وبلعت ريجي بصعوبه من كلامه ابتسم وراح يدور بالكومدي طلعلي واحد من الاجهزه من الباكيت وانطانياه اخذته منه بتوتر

تشكرته ورجعت للسياره صعدت وانه افكر بحجايته وكل شوي تترواد لاذني انتبه علي راهب وسالني باستغراب بعدما حرك السياره وطلعنه من المكان..

_شصار وياج شموخ ليش اجيتي بالج مشغول 

_هاا لا ماصاير شي بس هيج افكر بالقضيه 

_متاكده

_اي سيدي لا يضل بالك..

هز راسه بايجابيه وعيونه تباوعلي بشك كلهه ربع ساعه من الصمت والهدوء وصلنه للمستشفى نزلنه قدمنه شاراتنه للاستقبال ياله انطونه رقم غرفتهه

لشهد عاد رحنالهه وقبلما نوصل لغرفتهه استوقفنه الاشخاص المشبوهين يلي واكفين باب غرفتهه  باوعت لراهب وباوعلي باستغراب وتكترنه وره

الحايط نراقب بيهم فتره وهمه يفترون والحيره والخبث مبين على وجوهتهم شكينه انهم كاعد يحجون وياهه او يسوون بيهه شي عاد بسرعه

راهب لزم ايدي ورحنه باتجاهم وكفوا باوعولنه وعبرناهم سوينه نفسنه ماجايين علمودهم .. دخلنه بغرفه الممرضين طلعنالهم شاراتنه وحجه راهب

ويه واحد من الممرضين وطلب منه يروح يدخل لغرفه شهد بحجه ان ياخذ دم منهه للتحليل حتى يشوفلنه شكاعد يصير بالغرفه وشيحجون عاد هوه

كلبه قوي والله خله و راح سوه مثلما كله راهب واحنه طلعنه وراه من وره الغرف وبقينه نراقب من بعيد شفناه دخل ومحد حاجاه وطول ربع ساعه

ياله طلع وملابسه مبهذله ووجهه أصفر شافنه واجه باتجاهنه وهوه يتلفت لزمه راهب وجابه يمنه

وره الحايط وساله شنو شاف وشسمع بلع ريجه بصعوبه وكال وهوه لسانه يرجف..

_سيدي جانوا ثنين زلم لازمين اسلحه وواكفين فوك راسهه للمريضه ويحجون وياهه ولمن دخلت

لزموني وهددوني ماحجي شي والا يكصون لساني وحتى اخذوا صوره لشارتي واسمي سيدي

_عن شنو جانوا يحجون ماسمعتهم

_لا سيدي بس اولما دخلت سمعت واحد منهم حجه بعصبيه وياهه وكلهه لسانج اكصه فاهمه وتالي انتبه علي لمن دخلت وسكت

_تمام هاذهو أريدك تجي هسه وياي للسياره تبقى بيهه لحدما نحل كلشي هنا ونضمن سلامتك ياله تطلع تمام 

_حاضر تامر سيدي

_شموخ وراي 

_حاضر سيدي..

طلعنه من المستشفى من غير طريق غرفتهه واتصل راهب بفريقه بلغهم يجهزون نفسهم ويجيبون زي المهمات مالتنه وياهم كلهه دقايق

واحنه باقين بره نراقب خاف يطلعون وما نلحك عليهم لحدما وصلوا الفريق بس استغربت ليش

ماتجمعوا يمنه ليش كل سياره راحت بجهه من جهةت المستشفى كبل التفتت لراهب باستغراب وجاوبني بدون ماسال..

_من كل عقلج يفوتون هيج فوته ويهددون الممرض بدون ما يخلون الهم حمايه بره تراقب الوضع الهم

_يعني هسه اكو منهم يراقبونه

_اكيد بس خليج طبيعيه لا ننكشف ويرحون يشردون 

_تمام بس الممرض لا تكله لا يخترع ويشرد من تالي ويصير بي شي

_لا تخافين عليه راح ياخذه سالم وياه للدائره نحتاجه هناك

_اي يكون احسن لان ماينحزرون هذول ممكن يشردون وينصبوله كمين من تالي 

_وياج حق..

هزيت راسي بايجابيه واجه سالم من بعيد بملابس مدنيه انطانه جنطتين كبار واخذ الممرض وياه وراح رجعنه صعدنه بالسياره احنه والتفت علي راهب وكال وهوه ينطيني الجنطه..

_ماعدنه وقت ومكان نجهز بي نفسنه بالكامل فقط نزعي الستره ولبسي الصدريه والعتاد ولبسي الحذاء بدل الكعب 

_تمام حاضر 

_لا تنسين حجابج لفي زين احتمال تصير مشابكات ويشتت انتباهج

_انشاءالله..

هز راسه ودار وجهه عني وهوه يلبس بالصدريه درت عل جهه الثانيه نزعت الستره وبقيت بس بالبلوزه الطويله يلي انطانياهه مره والبنطرون

لبست الصدريه وشديتهه حيل على صدري وبطني عبيت العتاد بالمسدسات وسحبت اقسام وثبتتهن

باماكنهن طلعت البوت لبسته برجلي وكملت بقيه الامور باوعلي راهب بتساؤل وكال..

_كملتي

_اي كملت كلشي

_يله رفعي اللثام خلينه نتوكل

_حاضر سيدي..

رفعت اللثام على وجهي ونزلنه نمشي من بين الناس وهوه يباوع على حيطان المستشفى والناس المتكترين على جهه دخلنه للمستشفى وبوجهنه

رحنه لمكان غرفتهه شفناهم موجودين بعدهم رفع راهب اللاسلكي عد للخمسه وامرهم يداهمون سحبنه اقسام وركضنه عليهم رفعنه الاسلحه

بوجوهتهم مالحكوا يتحركون دخلوا بقيه الفريق من شباك الغرفه والباب الثاني كلبشوا هذولي اللزمناهم ودخلنه للغرفه لكينه البقيه مكلبشينهم

ادور محاوله الكه مصدر الدم واشوفه من حلكهه فتحته وشاغت روحي لمن شفت لسانهه مكصوص والدم ينبع من حلكهه صحت لراهب واجه ركض

بسرعه باوع لحلكهه وعكد حواجبه بعصبيه ونطت عيونه شرار التفت عليهم وراح يهف مثل السبع لزم واحد من ياخته ورفعه من رقبته لازكه بالحايط ويحجي وياه..

_منو الكص لسانهه احجي لا اكص ايدك هسه احجييي

_مو مو انه هوه  هوه كصه الهه هوه

_منو هوه منو لك احجييي..

اجوا الممرضين التهوا بيهه يخيطون بلسانهه ويكعدوهه وانه بقيت اراقب براهب من بعد مسافه واشوفه لزمه للرجال من خوانيكه وعصرهه وهذاك

صار يفرفح جواه مثل الدجاجه تركه لمن صار وجهه احمر وراد يختنك سحب سلاحه وسحب اقسام وتقدم خلاه بحلكه وهوه يساله منو السوه

هيج رفع هذاك ايده ترجف واشر على واحد من بيناتهم وجهه خبيث وممسوخه منه الرحمه وكاله ان هوه يلي كصه عاد راهب عبالك لكاله حجه يذب

حركه كلبه بواحد اجه لزمه لهل خسيس وضربه كله بخشمه لزمه من ياخته موكفه واخذ ايده لواهه وره ضهره وساله منو امره يسوي هيج وليش سوه

هيج بيهه وهذاك يتلوه من الوجع وساكت اخر شي نفذ صبره ورفع ايده اللاويهه على كتفه وطكت  بصوت عالي معلنه عن كسرهه شهكت

وهذاك بقه يصرخ ونمطل بالكاع وراهب لا مل ولا كل اول مره هيج اشوفه يتصرف بعنف اتجاه شخص .. رجع لزم ايده الثانيه وكله بتهديد..

_تحجي لو اكسر ايدك الثانيه ومن بعدهاا لسانك 

_احجي بس عوفني راح احجييي ااخ ايدييي بووويه

_احجي يله غرد وكلي منو امرك تسوي هيج وليش 

_اخوهه هوه يلي كالي هوه يلي امرني اجيلهه للمستشفى واهدده ان تسكت وماتحجي شي عن الصار وياهه وان تذب الصوج برجلهه بالحادث

ولمن دره بيهه تريد تحجي للشرطه الحقيقه اجيت اهددهه مره ثانيه بس ماسمعت وبقت مصره

تحجيلكم عن الحقيقه فاضطريت اكصلهه لسانهه مثلما امرني اخوهه حتى ماتكدر تحجي 

_ليش رادك تسوي هيج 

_ماعرف بس هوه كلي خليهه تحجي عن زوجهه وتتهمه بدون ما تحجي شي زايد عن الصار وياهه 

_سااالم

_نعم سيدي

_سحلووهم واريد نجوم الظهر تشوفهم 

_حاضر سيدي..

اجه سالم سحلهم كلهم وهوه باقي واكف وصدره يصعد وينزل يتنفس بقوه وعصبيه خفت عليه

يصيرله شي لان شكله ونظراته جنونيه وترعب .. تقدمت عليه باوع بعيوني ودارهن عني وهوه متخصر وكتله..

_اهده راهب خلاص اهده انشاءلله مابيهه شي وراح يحاولون وياهه بلكي تكدر تحجي

_تدرين شنو اكثر شي يحرك اعصابي بشغلي

_شنو

_ممنوع علي اسوي بالمجرم نفس سوايته بالناس بكل مره اشوف مجرم يحترك كلبي واتمنى لو ربي

وشغلي يحلي ويخليني اسوي بيهم السووه بالعالم اتمنى اشربهم من نفس الكاس الشربو العالم منه بس حرام علي حرااام

_ صحيح ووياك حق لمن تشوف هيج شغلات تتعصب وتتمنى تردهه عليهم بس هيج شراح يكون فرقك عنهم اذا ترد المجرم بافعاله ماراح تفرق

الناس بين رجل القانون والمجرم ليش ساد القانون بالبلد اذا كل واحد تنكص ايده يكص ايد العالم ..

رفع راسه جر حسره ولزم كلبه مقلص عيونه متوجع باوعتله بترقب وخله ايده عل حايط ساند روحه وايده الثانيه على كلبه وكال بصوت مخنوك..

_اااخ كلبي 

_اسم الله راهب شبيك احجي وياي راهب

_ماكو شي 

_راهب فدوا لا تخوفني شبي كلبك 

_لا مابي شي هيج نغزه خفيفه اجتلي وهسه راحت 

_متاكد

_اي اي لا يضل بالج خلينه نطلع منا نطمن عل مره 

_تمام ..

طلعنه من المكان ورحنه لغرفه الطوارئ لكيناهه نايمه وشاش بحلكهه كاطعين بي النزيف اجه دكتور فحصهه وساله راهب عن حالتهه هز راسه باسف وكال..

_للاسف اللسان مكطوع من عرجه وماراح تكدر تحجي بعد او تنطق بكلمه يصير حالهه حال الخرسه ..

شد قبضه ايده راهب ودمارات رقبته برزت تشكرت الدكتور وطلع من الغرفه بقه هوه يفتر ويفرك وجهه بعصبيه وحيره اجيت امشي يمه وهوه يلوب واحجي وياه ..

_اهده راهب السوه هيج بيهه راح يتعاقب 

_مو حتى تثبت عليه التهمه 

_اي اذا ماتكدر تحجي تكدر تكتبلنه افادتهه والصار وياهه 

_ليش هم ماكاتبيلج انها اميه وماتعرف تقره وتكتب 

_شنوو لا يالله وتالي هسه شلون راح نعرف الحقيقه 

_انه اعرف شلون ..

باوعتله بتساؤل ورفع نقاله اتصل بسالم وكله..

_سالم نزلوا الكل عل تحقيق وحضرلي معداتي الحاده اريد اكص ايد كل واحد مشترك بهاي

الجريمتين .. لا لا انتظروني من اجي انه احقق لا تخلي اي محقق يدخللهم .. تمام يله هاذهو مع السلامه ..

سد الاتصال ورجع النقال بجيبه اشرلي وهوه يمشي وكال..

_وراي شموخ 

_وين سيدي 

_للدائره 

_والمره

_مايكدرون يوصلولهه بعد انتهت القضيه من جانبهه 

_هاا تمام..

طلعنه من المستشفى ركبنه بالسياره وطرنه للدائره واولما دخلنالهه نزع سترته وساعته والصدريه انطاهن لسالم وكف رداناته وهوه يمشي نزل من الدرج للطابق

الجوه الارضيه وانه فضولي اخذني وراه شفته وكف كبال القضبان فتحهه ودخل واجيت انه بدون مايشوفني طليت عليهم واشوفهه غرفه شبه ضلمه

وبيهه كلوب اصفر معلك بالوسطه واعمده بيهه سلاسل معلكين بيهه المجرمين راح وكف كبالهم وبقى يسالهم وواحد يشمر التهمه عل ثاني وكلمن

يكول فلان هوه يكرهه ويريد يقتلهه لحدما خلو شياطينه تطفر كدامه وراح متوجه لجوله النار الشاعله واخذ منهه سيخ من كد حرارته متحول من

الحديد الاسود صاير احمر لزمه وراح على اول واحد معلك وحجه وياه ماعرف شنو وهذاك بقه يباوع بخوف للسيخ ويهز راسه برفض ويحجي مامفهوم كلامهم

شنو بقيت اباوعلهم لحدما شاغت روحي لمن لزم ايده ومشه السيخ عليهه وهذاك صعد عياطه للسما لزمت كلبي وتخيلت السيخ يمشي علي وشاغت روحي

حسيت  ضجت من راهب وقساوته بس مالومه المفروض كل مجرم يكون هيج جزاءه واكثر لو ماعترف بغلطه..

عفته يسالهم ويحقق وياهم وطلعت انه اجه بوجهي سالم وجمدت بمكاني باوعلي باستغراب وبادلته بابتسامه متوتره ورحت بسرعه للمكتب

كاني مامسويه شي.. دخلت واجه الشرطي كاللنه ننزل لغرفه الحواسيب تذكرت كلام راهب ووكفتهم قبلما يطلعون وكتلهم..

_لحظه اريد انطيكم معلومه عرفتهه من المحقق راهب 

_شنو هيه

_احنه صارلنه سنه كامله نتدرب هنا وندخل محاضرات بس بعضهن مانعرف ليش كاعد ندرسهن اصلا وخاصه محاضره الحاسوب هذا تعرفون ان

السبب يلي خلاهم يعلمونه على البرمجه والتهكير انهه تفيدنه بمعرفه حقيقه المعلومات يلي تتقدم النه بملف القضيه لان مو دائما تكون افاده الشخص

المجني عليه كامله وحقيقيه ميه بالميه ومو دائما يقدمولنه معلومات كامله ومهمه بملف القضيه لهذا السبب اريد اطلب منكم منا ورايح تنتبهون اكثر

شي على هل محاضره وتكون الكم معرفه بيهه وماتصدكون لو اكلكم ان هل خاصيه هيه يلي حلت

القضيه المستلميهه حاليا وهيه يلي وضحتلنه الصوره من بعيد وخلتنه نعرف ان افاده الضحيه شهد مو كامله ..

بقوا كلهم يهزون براسهم ويفكرون بكلامي ابتسموا وكالوا هاذهو انشاءالله هزيت راسي واخذت ملفاتي ودفتر ملاحظاتي وطلعنه من المكتب صعدنه

للقاعه مالت الحاسوب دخلنه واخذنه محاضره وجان تركيزنه عشره على عشره واخيرا كدرنه نفهم

اكثر كل كلمات المحقق وشرحه للماده لان نعرف هدفنه من دراستنه لهل ماده صرنه نفهم ونعرف شلون نستفاد منهه ونتعلمهه ...

كملنه المحاضره وطلعنه لبقيه المحاضرات التدريبيه ومر اليوم كالعاده ورجعنه لبيوتنه ورجعت لاهلي وريانتي وروتيني اليومي وياهم

طلعت ثاني يوم جمعه ويه بابا ندور على روضه لريانه وكدرنه نلكه وحده تضم اكثر شي الاطفال الحساسين يلي عدهم حساسيه من شي معين

ويلي عدهم فتحات بالقلب ويلي عدهم مرض معين يمنعه من الاختلاط ويه البقيه ولكيت كم طفل عدهم ربو مثل ريانتي وهذا الطمني اكثر

حتى ابقي طفلتي عدهم فجنت جايبه كل المستمسكات وياي حتى فرد مره اسجلهه لمن الكه وحده مناسبه وفعلا سجلتهه وكملت ورجعنه للبيت

ومر تقريب الشهرين واحنه مدور بهاي القضيه بس بنفس الوقت نطلع مداهمات ونستلم قضايا جديده كل يوم ..

وبيوم اعتيادي ثاني اجه موعد تدريب راهب واولما دز علينه كالوا لازم نلبس الزي العسكري ونصعد لفوك السطح جانت الشمس قويه شوي وصكعتنه صكع

ياله صعد يمنه دكيناله تحيه ووكف كبالنه يباوعلنه بكل فخر وبيده سجل خلاه وره ضهره وصدمني لمن كال موجه كلامه للكل..

_اليوم اخر يوم راح اخذكم بيهه تدريب وطول هل عام الدربتكم بي واليوم بالذات شفت ثمار تعبي بيكم ماراحت عل خالي بلاش ورفعتوا راسي كبال

العميد بدرجاتكم التدريبيه العسكريه العاليه وجبتكم هنا حتى نسترجع ذكرى اول يوم تدريب وياكم واعلن عن نتائج تدريبكم ويلي من خلالهه

راح نحدد منو يلي راح ياخذ اعفاء تدريب ثاني سنه ومنو يلي راح يستمر بالتدريب ..

كلنه لزمنه كلبنه صارت الصدمه صدمتين من جهه قراره بعدم تدريبنه بعد ومن جهه نتائجنه حسيت نفسي بعدني بالسادس اعدادي وهيج كلبي صار يخفق

بجنون وهوه منتظر النتائج يلي راح تحدد مصيري هل سنه رغم انتظار نتيجه السادس اسهل لان جان نتيجه تعب سنه وحده بس هاي النتايج تختلف

لانهه فعلا مصيريه وبيهه ثمار تعب سنين من الدراسه رفع السجل وصار يصيح باسماء الناجحين وانه رغم واكفه بثبات وشاده قبضه ايدي بقوه 

الا ان الرجفه اجتاحتني ومثل السعفه صرت ارعد لحدما اجه دوري وصاح باسمي وهوه يباوع بعيوني بفخر وكال..

_شموخ شهم محمود مبروك طلعتي بالمركز الثالث من ال١٠ الاوائل تفضلي استلمي نتيجه..

باوعتله مبتسمه ودمعت عيوني فرح زفرت براحه وتقدمت باتجاهه وعيوني معلكه بعيونه التلمع مد ايده اخذ الكارت من سالم وانطانيا طفرت دمعه

من عيني ومسحتهه بسرعه بهتت ملامحه وهوه صافن بيه وكال ..

_الف مبروك وهذا اخر يوم تدخلين بي تدريبي بس انشاءلله مو اخر يوم تشوفيني بي بالدنيا 

_انشاءالله سيدي

_بالتوفيق وانشاءالله اشوف ترقيتج بعد ٥ سنين 

_انشاءالله وكل هذا بمجهودك وتشجيعك النه سيدي شكرا الك

1 تعليق

_تدللي ..

ابتسم وبادلته الابتسامه اخذت كارت النتيجه ورجعت لمكاني وصار يصيح باسماء ال٧ الاوائل

الباقيه وكفنه وبقينه نصفك للدرجاتهم متوسطه وجوه التسعين ورجع راهب صار بنصنه والتفت علينه وهوه يكول..

_اليوم استلمتوا النتيجه وباجر تستلمون الرتب والشهاده من الوزير والعميد فكونوا مستعدين وشدوا حيلكم بيضوا وجوهنه وخلي الكل يعرف

ان ضباط العراق وملازمينه ومحققينه همه فخر وعزوه البلد وصورتهه القويه والجميله يلي مليانه شموخ ورهبان..

باوعتله مبتسمه وكلبي رفرف لمن طبك اسمي ويه اسمه باخر كلماته النه ورجع كال مكمل كلامه..

_ معروف عني بشغلي لمن اكمل تدريب فئه من الشباب اطلق عليهم لقب يليق بيهم وانتو اكثر دفعه حبيتهه وافتخر بيهه لانكم من بدايه جنتو

على كلبي وشفت الشجاعه والقوه بعيونكم وجنت كلما اشوفكم اتذكر نفسي بايام تدريبي وانه بعمركم لهذا السبب راح يكون اسم فريقكم منا ورايح 

"آل رهبان " وخلي الكل يعرف من خلال شجاعتكم وذكاءكم ووطنيتكم شنو ومنو همه فريق آل رهبان وشلون شايلينهه للبلد بدمهم

_حاضرر سيدي..

كلامه هذا قشعر البدن ودب القوه والثقه بكلوبتنه ولا اراديا تقدمنه وحجينه بصوت عالي وثابت حاضر سيدي ودكينه تحيه بقه يباوع مبتسم ورفع

ايده دك تحيه النه .. بعدها خلينه ونزلنه لمكتبنه والكل فرحان بنتيجته ومتحمس لباجر لان راح يقابل الوزير ويتكرم ويترقى على ايده ويتعلكن

رتب الملازم عليه .. تنهدت براحه وانه اشوف نتيجه تعبي هل سنه بيدي ولان راح ارتاح من تدريب سنه اضافيه بس سرعان ما بهتت ابتسامتي

وحاوطت الخنكه راحتي لمن تذكرت كلامه وايقنت ان اليوم اخر تدريب الي عند راهب واخر يوم اشوفه احتمال راح يرجع لمحافظته لا وانما

اكيد راح يرجع لان شغله هناك ودائرته ولابد يرجعله ان جان باجر او بعد شهر .. يعني خلاص لهنا وتنتهي مسيرتي وياك راهب لهنا واكدر اكول

خلصت القصه وطويت الصفحه القديمه يلي جانت متعلكه من ١٢ سنه لهنا و صار لازم اخلي كل ذكرياتك بصندوق واقفل عليهن مدى العمر لهنا

وتنتهي قصه عشكنه يلي مالحكت تصير قصه وتكتمل .. بس راح يبقى ذكراك بكلبي راح تبقى عيونك العسليه تحلي بروحي ورغم راح اتعذب بعدك كم يوم او كم شهر واحتمال كم سنه بس عهد علي

يراهب كلبي ماراح يكون لغير كلبك ولا راح يقبل يعيش قريب من اي رجال ثاني غيرك.."وفي النهايه عدنا غرباء كما كنا ، و غرباء العشق سمينا "...