رواية ديون النبض الفصل الثامن والاربعون 48 بقلم مروه صياح


 رواية ديون النبض الفصل الثامن والاربعون 

بصيت لمجد وقلت له:

وعد: ما ينفعش تاخد قرارك وإنت غضبان ومتسرع، وعشاني ما ينفعش تهدم كل اللي بنيته مرة واحدة. أنت لازم تفكر كويس جدًا قبل ما تاخد قرارك.

بص لي وقال بثبات:

مجد: وأنا قراري عارفه كويس جدًا.

وقبل ما أقدر أتكلم، قرب مني ومسك وشي بين كفوفه وقال:

مجد: وعد، خلاص... لا أنا ولا أنت هنبعد عن بعض تاني، مهما كانت النتائج. رقم واحد عندي هو أنتِ، وأي حاجة بعد كده تيجي بعدك.

بصيت له وقلت بقلق:

وعد: ما تعندش، أرجوك. أنا لازم أعرف أنت ناوي على إيه بالضبط.

مجد: أنا أتحرمت من حياتي أني اعيشها. كفاية لحد كده، وأنا مش هسمح لأي حد منهم إنه يشاركني في حياتي دي.

سكت شوية، وبعدها قلت له:

وعد: ما تعندش، أرجوك. أنا مش موافقة على أي قرار تاخده دلوقتي، مهما كان.

بص لي وقال:

مجد: اسمعيني يا وعد... زمان كنت بلح عليكي وأقولك إننا هنتجوز، وإنتِ كنتِ بترفضي. لكن دلوقتي أنا مش هسمحلك تقولي لأ.

بصيت له باستغراب:

وعد: يعني إيه؟

مجد: يعني خلاص، أنا سبتلك حرية القرار زمان، لكن دلوقتي إنتِ بقيتي مجبرة إنك تكوني معايا، سواء بمزاجك أو غصب عنك.

بصيت له وابتسمت وقلت:

وعد: بس أنا مش موافقة.

قرب مني هو كمان بابتسامة وقال:

مجد: إنتِ كدابة... طب بصي في عيني كده، وعينيكي هما اللي هيقولولي الحقيقة.

بصيت له للحظات، وبعدها وطيت راسي.

رفع إيده ومسك خدي بصوابعه وقال بحنان:

مجد: مش قلتلك، ما توطيش راسك كده أبدًا.

رفعت عيني له، وكنت حاسة إني مش قادرة أكتفي من وجوده قدامي. كنت مفتقدة كلامه معايا، واهتمامه، وكل تفصيلة صغيرة كانت بتجمعنا.

قلت له بصوت مليان شوق:

وعد: مجد... وحشتني قوي. وحشني كلامك معايا.

ضمني لحضنه مرة تانية، وكأن كل لحظات البُعد اللي فاتت اختفت في اللحظة دي.

وكانت رغد واقفة وقتها، مبتسمة وفرحانة جدًا إن ربنا جمعنا ببعض من تاني.

ولسه مجد بيقرب مني أكتر، رغد بصت له وقالت بابتسامة:

رغد: يا دكتور مجد... أحم أحم نحن هنا!

بصلها وابتسم، وبعدها شالني ووقف بيا، وزق الكرسي برجله بعيد وقال:

مجد: وعد، من هنا ورايح مش عايزك تقعدي على الكرسي ده أبدًا. 
إنتِ هتقفي على رجلك وهتتحركي تاني من جديد. أحنا هنوصل لده ... أنا عارف إنك قادرة.

حاوطت دراعاتي حوالين كتفه وقلت له:

وعد: طول ما إنت معايا، أي حاجة تانية هتيجي، وأنا هحاول لحد ما أوصل إن شاء الله إني أقف على رجلي تاني.

بص لي وقال:

مجد: أنا هبلغ بابا وحازم، وهنكتب كتابنا النهارده.

بصيت له بسرعة وقلت:

وعد: لا يا مجد، مش هينفع!

بص لي بجدية وقال:

مجد: أنا بتكلم جد على فكرة، مش بهزر. أنا خلاص أخدت قراري، ومحدش هيقف قصادي أو يعارضني فيه.

بصيت له بقلق وقلت:

وعد: طب قولي ناوي على إيه الأول؟

ابتسم وقال:

مجد: سيبك من أي حاجة دلوقتي. المهم، إنتِ هتقبلي تتجوزيني في شقة ياسين مؤقتًا، لحد ما شقتنا تجهز.

بصيت له وسكت شوية، وبعدها قلت بابتسامة فيها شوق:

وعد: تعرف يا مجد؟ شقتنا وحشتني قوي... كان نفسي أدخل فيها، بس ما كنتش بقدر.

ديون النبض 🫀

بقلم الكاتبة مروة صياح 🎯✍️

بصيت لمجد وقلت له:

وعد: كان نفسي أدخل فيها وألف في كل ركن فيها. كنت كل ما أفتكر اليوم اللي كنا بناخد فيه قراراتنا مع بعض، ونرتب ونختار ونجهز شقتنا، أحس قد إيه كنت مستنية اليوم اللي أعيش فيه كل ده معاك.

فضل مجد شايلني، وبعدها بص لرغد وقال:

مجد: رغد، هاتي المفاتيح... وتعالي افتحي الشقة.

رغد اتحركت بسرعة، وسابتنا وراحت فتحت الشقة.

مجد دخل بيا، وأول ما عدينا من الباب حسيت إني رجعت بالزمن لليوم اللي دخلت فيه الشقة لأول مرة.

فضلت أبص حواليّا، وهو كمان كان ساكت وبيبص لكل ركن فيها. كأننا بنسترجع مع بعض ذكريات اليوم اللي حلمنا فيه بحياتنا هنا.

دخل بيا كل أوضة، ووقف في كل مكان شوية، وكأنه بيحاول يستعيد تفاصيل الأيام اللي كنا بنخطط فيها لكل حاجة سوا.

وبعد فترة بص لي وقال:

مجد: ما تضيعيش عليا اللحظة دي... هتقبلي تتجوزيني ونعيش مع بعض؟ حتى لو في شقة بابا دلوقتي؟

بصيت له وقلت بابتسامة:

وعد: أنا كمان عندي مكان في قلبك، وده عندي بالدنيا كلها. تعرف إن كل ده مش فارق معايا؟ سواء كنا في أوضة أو شقة، أو حتى في أي مكان تاني... كل ده مش مهم. المهم إني أكون معاك، وأكون جوا قلبك.

بص لي، وكان واضح في عينيه قد إيه كلامي فرّحه. ولسه بيقرب مني، حطيت إيدي على شفايفه وقلت له:

وعد: ما تحترم نفسك!

بص لي وضحك، وبعدها ظهرت في عينيه لمعة غريبة، وقال:

مجد: إنتِ النهارده هتكوني زوجتي. أنا مش هسمح إننا نبعد عن بعض تاني. وهتكون في حضني يا وعد...

في اللحظة دي غمضت عيني، وسندت راسي على كتفه، وأنا حاسة إن كل اللي فات بقى ورا ضهرنا.

وبعد فترة خرجنا من الشقة ونزلنا تحت.

كان ياسين لسه ما يعرفش أي حاجة، ولا ماما كانت تعرف اللي حصل بيني وبين مجد.

لكن أول ما ياسين شاف مجد داخل وهو شايلني، قام وقف بسرعة من مكانه. وبمجرد ما بص لوشوشنا، ظهرت على ملامحه سعادة كبيرة جدًا.

فهم من غير ما نسرد له أي تفاصيل إن مجد عرف الحقيقة، وإننا رجعنا لبعض من تاني.

لكن مجد بص لياسين وكان واضح عليه إنه عايز يعاتبه ...

بصيت لمجد وقلت له:

وعد: خلاص يا مجد، بلاش عتاب دلوقتي. المهم إنك معايا.

بص لي وقال:

مجد: وأنا مش هرتاح ولا هكون سعيد بجد غير لما ترجعي زي الأول وأحسن كمان.

ابتسمت وقلت له:

وعد: صدقني، أي حاجة تانية مش مهمة طول ما إنت معايا.

مجد: بس إنتِ تهميني يا وعد. كل حاجة فيكي وتخصك تهمني... صحتك، ودراستك، وكل تفاصيل حياتك.

قعدنا على الكنبة، وبعد شوية كانت رغد نادت ماما، ولما دخلت وسلمت على مجد، فرحت جدًا بوجودنا مع بعض من تاني.

بعدها مجد قام وقال:

مجد: أنا هغيب عنكم ساعتين وراجع تاني.

وبص لرغد وقال:

مجد: ولما حازم ييجي، خليه يجيب المأذون.

وبعدها بص لياسين وقال:

مجد: بابا، بعد إذنك، ممكن تسيب لنا الشقة بتاعتك أنا ووعد من النهارده؟

ياسين بص له وابتسم وقال:

ياسين: ماشي يا دكتور مجد، مش هكون عازل بينكم.

في اللحظة دي وطيت راسي من الكسوف، وياسين قرب مني ومسك إيدي وقال:

ياسين: وعد، أنا حاسس إن النهارده أسعد يوم في حياتي. عمري ما حسيت بسعادة زي اللي أنا حاسس بيها دلوقتي.

وبعدها شاور لمجد يقرب، ومسك إيدي وحطها في إيد مجد وقال:

ياسين: ربنا ما يفرقكم عن بعض تاني.

كنت ببص لمجد، وفي نفس الوقت كان جوايا كلام نفسي أقوله له، فقلت بتردد:

وعد: عشان خاطري... ممكن نأجل كتب الكتاب شوية؟

بص لي باستغراب وقال:

مجد: ولا ليلة، ولا نص يوم، ولا حتى ساعة! بعد ما رجعتلك يا وعد؟

سكت شوية، وبعدها قال بنبرة هادية:

مجد: أنا مش هأخر عليكي، هرجع تاني بسرعة.

بصيت له وقلت:

وعد: طب قولي رايح فين؟ وهتعمل إيه؟

مجد فضل باصص قدامه للحظات، وبعدها قال بجدية:

مجد: لازم أعرف الدكتوره جيهان ليه عملت كده... لازم أسمع منها.

ديون النبض 🫀

بقلم الكاتبة مروة صياح 🎯✍️

بص لي مجد، وأنا كنت قلقانة جدًا عليه وعلى تصرفاته، لكن مهما حاولت أتكلم معاه، اللي في دماغه في دماغه.

بص لي وقال:

مجد: وعد، أنا مش هتأخر عليكي. قبل ما حازم ييجي، هكون أنا موجود.

فضلت أبص له بنظرة طويلة، وهو كمان فضل باصص لي، وبعدها أخدني في حضنه وطبع قبلة على راسي وقال:

مجد: والله يا وعد ما عايز أسيبك، بس صدقيني مش هتأخر عليكي.

وبعدها استأذن ومشي.

في اللحظة دي كنت قاعدة وقلبي مش مطمن، والتوتر واضح عليا.

بصيت لياسين وقلت له:

وعد: ياسين، أنا مش مطمنة لمجد.

بص لي وقال:

ياسين: وأنا مش عارف هو ممكن يتصرف إزاي أو يعمل إيه.

سكت شوية، وبعدها قلت:

وعد: أكيد دلوقتي هينفجر في الدكتورة جيهان وسارة.

هز راسه وقال:

ياسين: أنا اللي بفكر فيه حاجة واحدة بس دلوقتي.

بصيت له وقلت:

وعد: إيه هي؟

رد عليا وقال:

ياسين: أنا حتى لو مجد ساب كل اللي عمله، هو كده كده حقق الحلم اللي كان بيحلم بيه. بناه وبدأ يحطه على أرض الواقع، وأنا عارف إنه مش محتاج أي حاجة تانية من فلوس أمه ولا من فلوس جده. 

وزي ما إنتِ عارفة، هو حط كل اللي عنده في المستشفى دي. لكن اللي أنا بفكر فيه حاجة تانية خالص دلوقتي.

بصيت له وفهمت قصده، فقلت:

وعد: تقصد سارة والجنين اللي في بطنها؟

هز راسه وقال:

ياسين: أيوه.

قلت له:

وعد: ده نفس اللي بفكر فيه. مع الوقت ممكن هو ينسى، لكن أنا مش عايزة طفل لسه ما جاش الدنيا يتعذب ويحس بنفس الوجع اللي كان حاسس بيه، أو يتحرم من أبوه، وما يكونش قريب منه.

ياسين بص لي وقال:

ياسين: وعد، مهما قلتلك، أنا مش من حقي أفرض عليكي قرار، لكن حاولي أقنعيه، بس عارف إن القرار ده صعب عليكي.

بصيت له وقلت:

وعد: تقصد إيه؟

سكت شوية، وبعدها قلت له:

وعد: ياسين، عايزاك تعرف حاجة... أنا مش أنانية. رغم إن قلبي وجعني لما شوفت مجد مع واحدة غيري، لكن الوضع دلوقتي اتغير. سارة دلوقتي زوجته، وفي طفل لسه ما جاش الدنيا، وهي مسؤولة منه، والطفل ده كمان مسؤول منه.

أخدت نفس وكملت:

وعد: أنا عمري ما أبني سعادتي على سعادة غيري. وعشان كده، هيكون شرطي في زواجي من مجد إنه يستمر في زواجه من سارة.

بص لي ياسين، ومسك إيدي وطبطب عليها وقال:

ياسين: أنا كنت متأكد إنك هتفكري بالشكل ده.

أما مجد، فبعد ما سابنا، ركب عربيته واتحرك ناحية الفيلا.

وبمجرد ما وصل، دخل الفيلا والغضب مالي ملامحه، وأول ما دخل نادى بصوت عالي جدًا:

مجد: دكتورة جيهان! سارة!

سارة كانت فوق، فنزلت بسرعة، وكذلك دكتورة جيهان.

أول ما سمعوا صوته، فهموا إن في حاجة حصلت، لكن كانت دي أول مرة دكتورة جيهان تشوف مجد بالحالة دي.

بصت له بقلق وقالت:

د. جيهان: في إيه يا مجد؟ إيه الحالة اللي إنت فيها دي؟

بصلها نظرة طويلة، وبعدها قال:

مجد: أنا اللي عايز أعرف منك... في إيه بالضبط؟ إنتِ عملتي إيه؟

سكتت لحظة، وكأنها مش قادره تستوعب فيه ايه، وبعدها مجد كمل بصوت مليان وجع:

مجد: أنا مش فاهم... أنا لو مش ابنك، لو مجرد حد غريب عنك، مكنتيش هتدمّريني بالطريقة دي!

قرب منها خطوة وقال:

مجد: أنا مش قادر أصدق إن مفيش حاجة عملتيها إلا ودمرتيني بيها. من وأنا صغير وأنا حاسس بغيابك، وبغياب حبك وحنانك. كنتِ بتضغطي عليا وتجبريني على حاجات كتير، لدرجة إني علشان أريح نفسي من التعب والواقع اللي كنت عايشه، رغم إني كنت طفل صغير، كنت بنفذ كل اللي إنتِ عايزاه.

اتنهد وكمل:

مجد: ولما كبرت، ما حطيتش هدف قدامي غير إني أذاكر وأطلع الأول، علشان أحققلك اللي إنتِ عايزاه. ويا ريتك كنتِ اكتفيتي بكل ده!

بص لها والدموع بدأت تتجمع في عينيه:

مجد: طلعت دكتور زي ما إنتِ عايزة، وبقيت دكتور مشهور زي ما إنتِ عايزة. تقدري تقوليلي إنتِ كده مرتاحة؟ إنتِ كده سعيدة ومبسوطة؟

سكت لحظة، وبعدها قال جملة خرجت منه بكل الوجع اللي جواه:

مجد: تعرفي إيه؟ أنا لو كنت يتيم الأم، كان هيبقى أهون عليا بكتير من اللي أنا فيه ده.

دكتورة جيهان بصت له، واتصدمت من كلامه، وقالت:

د. جيهان: إنت بتقول إيه يا مجد؟ إنت مدرك إنت بتقول إيه؟ أنا عمري ما كنت أتخيل في يوم من الأيام إنك تجرحني بالطريقة دي!

مجد: وأنا كمان عمري ما كنت أتخيل إن أمي تعمل فيا كل ده!

في الوقت ده كانت سارة واقفة، وفهمت من كلامه إنه عرف كل حاجة.

قعدت على الكرسي، ووطت راسها، وفضلت تسمع المواجهة من غير ما تتكلم.

أما مجد، فبص لأمه وكمل:

مجد: كنت بحاول أرضيكي بكل الطرق. بعدتيني عن أختي وعن أبويا، وكنت مستحمل.
كنتِ بتضغطي عليا في حاجات كتير جدًا، وأنا بنفذها علشانك. لكن الحاجة الوحيدة اللي قلبي اختارها... ياريتك سيبتيهالي!

صوته بدأ يهتز، والدموع نزلت من عينيه:

مجد: ليه؟ ليه عملتي كده؟ ده أنا لو مش ابنك، مكنتيش هتعملي فيا كده! كنتِ هتخافي عليا أكتر من كده!

بصلها بعدم تصديق وقال:

مجد: إزاي؟ إزاي تبعدي وعد عني؟!

وبعدها قال بحدة:

مجد: أنا عرفت كل حاجة. عرفت إنك ضغطتي عليا علشان تسلبي مني الحاجة الوحيدة اللي كانت بتخليني سعيد، واستغلّيتي حبها وطيبة قلبها علشان إيه؟!

بدأ صوته يعلى أكتر:

مجد: ردي عليا! علشان خاطر إيه؟ عايزة تكسبي إيه تاني؟ عايزة إيه؟ عندك إيه لسه ما حققتيهوش؟

فتح دراعاته وبص حواليه وقال:

مجد: إنتِ عايشة في فيلا كبيرة، وعندك عربية واتنين، وعندك مستشفى استثمارية كبيرة، وشركة أدوية، غير الفلوس اللي في البنك... ومع ذلك كل ده مش مكفيكي؟!

قرب منها وقال بمرارة:

مجد: لدرجة إنك تقضي على ابنك، وتقضي على فرحته وسعادته بالشكل ده؟!

وبعدها لف ناحية سارة وقال:

مجد: وطبعًا بنت أخوكي، نسخة منك! ما اكتفتش بكل ده، لازم كل حاجة تطلبيها تتنفذ. وكأنها طلبت منكم طلب إن مجد يكون ليها! لازم يتنفذ..

بص للاتنين وكمل:

مجد: قلبتوا الدنيا كلها علشان تنفذوا اللي في دماغكم، إنتِ وهي! لدرجة إنكم تبعدوا الإنسانة اللي حبتني علشان شخصي أنا، وتكذبوا عليها الكذبة دي!

هز راسه بعدم تصديق وقال:

مجد: أنا مش قادر أصدق اللي إنتوا عملتوه فيا.

في اللحظة دي دكتورة جيهان قربت منه ووقفت قصاده، وقالت بسرعة:

د. جيهان: لا يا مجد، أنا مكنتش بعمل كده علشان أحافظ على الفلوس، ولا علشان أحافظ على فلوس سارة لو اتجوزت حد غيرك. صدقني، أنا عملت كل ده علشان ما تبعدش عني، وكمان سارة بتحبك، وهي أولى بيك.

مجد رفع راسه وبص لأمه بصدمة، وقال:

مجد : يعني إيه أولى بيا؟!
ديون النبض 🫀
بقلم الكاتبه مروة صياح 🎯 ✍️..

مجد كمل كلامه، وبص لأمه وقال:

مجد: يعني إيه سارة أولى بيا؟ وأنا مش من حقي أختار حياتي؟ مش من حقي أحب وأتحب؟ هو أنا ليه هفضل طول حياتي مجبر إني أسعدكم وأريحكم، وإنتوا محدش فيكم يفكر يريحني أو يسعدني؟!

بص لهم، وبعدها كمل بمرارة:

مجد: إنتوا استفدتوا إيه من كل اللي عملتوه؟ ساره اتجوزتني؟

وبص لأمه وقال: تقدري تقوليلي هي سعيدة؟ وبعدها أنا... أنا سعيد؟ إنتِ مبسوطة بالوضع اللي كلنا بقينا فيه؟

قرب خطوة وقال:

مجد: قوليلي عملتي إيه غير إنك هدمتينا كلنا؟ ويا ريتك هدمتينا إحنا بس، لأ... ده كمان كنتِ السبب في إنك تدمري حياة إنسانة كل ذنبها إنها قربت مني وحبتني علشان شخصي أنا وبس.

بعدها قعد ووطى راسه، وكأنه بيحاول يستوعب حجم الوجع اللي جواه، وقال:

مجد: أنا كنت مخبي عليها أنا ابن مين، لكن كل ده ما كانش في حساباتها. حسيت معاها قد إيه فيه شخص شايفني من جوايا، فيه حد قرب مني علشان أنا، مش علشان أي حاجة تانية.

رفع عينيه وبص لأمه وقال:

مجد: إنتِ فاكرة إنك كده قربتي مني؟ فاكرة بعد كل اللي عملتيه إني هكمل حياتي معاكي عادي؟ بالعكس... أنا وصلت لمرحلة بقيت بكره فيها حاجة اسمها كلمة أمي، وإنتِ السبب.

في اللحظة دي دكتورة جيهان بصت له، والدموع نزلت من عينيها، ووطت راسها وقالت:

د. جيهان: مجد، أنا يمكن غلطت، ويمكن قسيت عليك كتير، لكن أنا كمان كان غصب عني. كان لازم أكون كده علشان أقدر أربيك وأخليك تقف على رجليك.

سكتت شوية، وبعدها كملت:

د. جيهان: لو كنت فضلت مع أبوك، كنا مش هنقدر نعيش ولا نكمل حياتنا.

بص لها مجد، ورد عليها:

مجد: على الأقل كنا هنبقى أسرة، وكان ممكن يكون بينا حب وهدوء. لكن إنتِ اخترتي إيه؟ اخترتي الغرور، واخترتي تكملي علشان نفسك، مش علشان ابنك.

صوته بقى أكثر حدة وهو بيكمل:

مجد: إنتِ ضحيتي بابنك علشان نفسك، علشان توصلي للي إنتِ فيه دلوقتي. توصلي لدكتورة جيهان، رئيسة قسم القلب والجراحة، وصاحبة أكبر مستشفى لجراحة القلب. إنتِ مبسوطة باللي وصلتي له؟

بص حواليه وقال:

مجد: استمتعي بكل اللي جمعتيه وحققته، لكن اعرفي إنك فقدتيني للأبد.

وبعدها بص لسارة وقال:

مجد: وطبعًا إنتِ كنتِ معاها في كل حاجة، عارفة كل حاجة كانت ناوية عليها وبتعملها.

سارة بصت له وقالت والدموع في عينيها:

سارة: مجد، أنا غلطتي الوحيدة إني حبيتك بجد، لكن إنت عمرك ما شوفتني ولا حسيت بيا. وأنا كنت مستعدة أعمل أي حاجة علشان تكون ليا أنا.

بصلها مجد وابتسم ابتسامة صغيرة مليانة وجع، وقال:

مجد: وبقيت معاكي... تقدري تقوليلي بقيتي سعيدة؟

وطت راسها وما قدرتش ترد.

أما هو فكمل:

مجد: خلاص، أنا مش عايز أكون في حياتكم تاني، ولا عايز أشوف وشك ولا وشها. أنا هعتبر نفسي من هنا ورايح يتيم الأم.

دكتورة جيهان قربت منه بسرعة وحطت إيديها على شفايفه وقالت:

د. جيهان: لا يا مجد، ما تقولش كده!

بص لها وقال بهدوء موجع:

مجد: للأسف، هو ده اللي أنا حاسس بيه.

وبعدها بص لسارة وقال لامه:

مجد: وبالنسبة لبنت أخوكي، لما تقوم بالسلامة، على خير. 
لكن الطفل ده ملوش ذنب في أي حاجة حصلت، وأنا مش حاسس ناحيته بأي ذنب.

دكتورة جيهان بصت له وقالت:

د. جيهان: إزاي تحرم نفسك منه؟ إيه ذنب طفل زي ده؟

بص لها وصرخ في وشها:

مجد: وأنا إيه كان ذنبي؟! عشت العذاب ده كله ليه؟! إيه كان ذنبي إني من وأنا عندي خمس سنين، ولأكتر من عشرين سنة، أعيش في العذاب ده كله؟ والسبب في كل ده إنتِ!

في اللحظة دي سارة بدأت تبكي بشدة، وحطت إيديها على بطنها، وبصت لمجد وقالت:

سارة: مجد، صدقني أنا عرفت قد إيه أنا غلطانة. أنا مش عايزة أي حاجة لنفسي، أنا خدت نصيبي منك خلاص. 
بس كل اللي أنا عايزاه منك... أرجوك، ما تبعدش عن ابنك أو بنتك. على الأقل إنت جربت التعب والعذاب اللي إنت حسيت بيه، فما تخليش طفلك اللي جاي يحس بيه هو كمان.

بصلها وقال بحدة:

مجد: اللي هيشيل ذنب اللي حصل إنتوا مش أنا.....
وبعدها بص لساره وقال وانتي عارفه الحمل ده حصل إزاي مش بحب....
بصت له ساره ووطت راسها وحست بقهر وحرقه في قلبها لآنها مش بس خسرته دي كمان.... هي خسرت ابو طفلها اللي لسه مجاش...

وبعدها قام من مكانه وقال بحسم:

مجد: أنا مش داخل في الفيلا دي تاني، واعملوا حسابكم. أنا خلاص هقطع صلتي بيكم في كل حاجة. كل حاجة إنتِ تدبريها بنفسك يا دكتورة جيهان، أنا مش عايز منك أي حاجة.

وقف لحظة، وبعدها كمل:

مجد: أنا مش عايز من الدنيا دي كلها غير إني أعيش مرتاح مع مراتي، الإنسانة الوحيدة اللي إنتوا حاولتوا بكل الطرق تبعدوني عنها، ونجحتوا فعلًا في ده لفترة. لكن خلاص... أنا مش هدي لنفسي فرصة تانية إني أبعد عنها.

بص لهم للمرة الأخيرة وقال:

مجد: النهارده هكتب كتابي عليها، ومش عايز أي حاجة منكم.

وبعدها استدار وخرج من الفيلا، وساب وراه دكتورة جيهان وسارة، واقفين في مكانهم، والدموع مالية عينيهم.

كانت الصدمة أكبر من أي كلام، والندم بدأ يواجههم بالحقيقة اللي حاولوا يهربوا منها طويلًا...

لقد خسروا مجد، لكن الأصعب إن كل واحد فيهم بدأ يدرك إن اللي اتكسر جواه مش سهل يرجع زي الأول.


تعليقات