رواية اميرة وادي الذنوب الفصل الرابع
وقبل ما نبدأ نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
خلصت الحلقة اللي فاتت علي اميرة اللي خططت ونفذت وولعت في جوزها خالد وماكنتش تعرف ان طارق ابنها هايموت مع خالد. وبرضو محروق واتصدمت علياء من اللي قرته في مذكرات امها ولسة هاتكمل سمعت صوت خبط علي باب الاوضة حطت المذكرات بسرعه تحت المخدة وعملت نفسها نايمة ودخل عليها الاوضة نادر جوزها اللي راح وشالها وخرج بيها من الاوضة وهو بيسال نفسه.
بقيتي يا علياء تحبي تقعدي في اوضة مامتك كتير ياتري في اية،،،،،،
وتاني يوم من جوة اوضة نوم علياء يقف نادر قدام الدولاب ويخرج بدله منها ويلبسها وهو بيبص لعلياء اللي كانت قاعدة قدام التسريحه وبتبص للمريا وبتسرح شعرها وهي سرحانه وبتفكر في اللي قرته في مذكرات اميرة فيقول لها نادر
علياء أنتي مش ناويه تقومي من قدام المرايا بقي
ولكن علياء ما ردتش عليه فاستغرب نادر وندهه عليها تاني وبرضو ما ردتش فراح ناحيتها. وحط أيده علي كتفها فتتخط علياء فيقول لها نادر
أيه مالك اتخطيتي ليه كده
فتبص له علياء وتقول
ما فيش
نادر وهو بيقعد قدام منها
لا في انتي متغيره بقالك يومين. وبقيتي بتحبي تقعدي كتير ولوحدك في اوضة مامتك. في اية يا علياء انتي مخبيئة عني اية
فتعيط علياء بحرقة فياخدها نادر في حضنه ويقول
علياء مالك
فتمسح علياء دموعها وتبتسم وتقول
مافيش حاجه
نادر باصرار
لا. في انتي اتغيرتي من بعد موت مامتك وبقيتي ديما سرحانه او اما عايزه تدخلي اوضتها وتقعدي فيها لوحدك
أنا متاكد ان في حاجه مخبيها عني
علياء بارتباك
انا. عمري ما خبي عنك حاجه
نادر
كدة يا علياء. انا هاسيبك براحتك لغاية ما تيجي بنفسك وتحكي لي. ودلوقتي قومي ألبسي عشان تيجي معايا مؤتمر وزاره الصحه
علياء
انت قولتي امبارح وانا قولت لك ماليش مزاج اروح في حته
نادر
ليه مش عايزه تيجي معايا تغيري جو
علياء
معلش سيبني براحتي
نادر
واخرتها ايه يا علياء من ساعه موت مامتك وأنتي لابتروحي المستشفي تشوفي شغلك ولا بتخرجي مع صحابك وتروحي النادي
علياء
مش هارتاح الا لما اعرف مين قتل امي
نادر
تاني يا علياء. ده انتي بنفسك قراتي تقرير الطبيب الشرعي اللي اكد ان الوفاه نتيجه أنتحار مامتك بعد ما قطعت الوريد بتاع ايديها اليمين
علياء بعصبية
التقرير يتكتب في اللي يتكتب انا امي قبل ماتموت قالت انها ماعملتش في نفسيها حاجه وبعدين في نقطه انت مش واخد بالك منها انا أمي عمرها مامسكت اي حاجه بايديها الشمال أشمعني وهي بتنتحر مسكت المقص بايديها الشمال وقطعت الوريد بتاع ايديها اليمين
نادر
يعني انتي هاتفهمي اكتر من المباحث
علياء
اة يا نادر هافهم اكتر منهم. دي امي انا اللي ماتت وانا متاكدة انها ما بتكدبش عليه وماتت مقتوله
نادر
امك كانت مجنونه وممكن تعمل اكتر من كدة في نفسها
علياء بعصبية
نادر بلاش تغلط لو سمحت واتفضل روح مشوارك والحق وقتك وانا قادرة اوصل للحقيقة بنفسي مش محتاجة مساعدة منك
فيبص لها نادر ويقول
انت اعصابك تعبانه وانا مش هاتكلم معاكي دلوقتي.
وخرج نادر من الاوضة وهو في منتهي العصبية وتبص عليه علياء وبمجرد ما يتحرك بعربيته تروح بسرعه ناحية اوضه اميرة وتقتح مذكرات وادي الذنوب من جديد وتبدأ تكمل قرأ اللي كتبته اميرة
ولما شوفت وش طارق أبني اللي بيتحرق بسببي صرخت صرخه شرخت قلبي نصين وطفيت النار اللي بتاكل في ابني وخده في حضني وأنا مش قادره ابص في عيونه وهو عمال يصرخ ويتوجع من النار اللي كلت جسمه وخرجت من الشقه بسرعه وسيبت خالتي واهل الشارع بيطفوأ خالد وروحت بطارق ابني الي قرب مستشفي لينا لكنهم رفضوا يقبلو وقالو لي الحرق من الدرجه التالته يعني الموت لي رحمه لكني رفض أسمع كلامهم وخرجت من المستشفي وروحت لمستشفي تاني وتالت ورابع وكله بيقول نفس الكلام لغايه ما مات طارق ابني علي دراعي وهو في حضني وانا السبب رجعت بي شقتي وولاد الحلال خلصوا كل حاجه تخص الدفن والجنازه واندفن خالد وطارق وكان نفسي اندفن مع طارق لكن اللي بيندفن الميتين بس. و مع اني ميته بس قدام الناس ابان اني عايشة طالما في نفس داخل ونفس خارج،،،،،
وعرفت بعد كده من خالتي أيه اللي خلي طارق ينزل تحت عند شقه خالتي في نفس الوقت اللي نزل في خالد. وهو أن علياء بنتي كانت في الحمام وطارق كان عايز يخش الحمام ومذنوق اوي فنزل يخش الحمام اللي تحت من غير ماتشوفه خالتي عشان يعمل حمام وخالد كان فاتح الميه ولسه ماغيرش هدومه لكن الميه وهي ضعيفه ما بتشغلش السخان الغاز فطارق خبط علي خالد عشان يعمل حمام فخالد دخل طارق يعمل حمام لغايه السخان مايشتغل وطارق جوه الميه بقيت شديده واشتغل السخان والنار مسكت فيهم هما الاثنين بسبب الغاز اللي كان متسرب في الحمام ، ،،،،
وعيشت انا وخالتي في البيت لوحدينا لمده اربعين يوم بعد موت خالد وطارق والاربعين يوم طول كانت معامله خالتي معايا متغيره خالص وحاسه انها مش ضيقاني ففي ليله الاربعين وبعد اللي كانوا بيعزوا مشيوا قعد معها وقولت لها
خالتي أنتي مالك مش ضايقه تبصي في وشي ليه
بصيت لي خالتي بصه عمري مانسيتها وقالت لي
عايزاني ابص في وشك ازاي بعد ما قتلت ابني
اتصدمت وقولت لخالتي
خالتي انتي بتقولي ايه
خالتي وهي بتعيط
اميرة مالهوش لزوم اللف والدوران الليله اللي قبل موت ابني انتي نزلتي الفجر عندي وقال ايه عايزه تعملي حمام وأنا سيبتك تخشي الحمام لكني روحت بصيت عليكي لقيتك بتقطعي حته في خرطوم الانبوبه فهمت انتي ناويه علي ايه وطلعت وبيت معاكي زي ما انتي كنتي عايزه
اميرةباستغراب
ولما انتي شوفتيني ليه خليتي خالد يستخدم الحمام
رددت عليه بغضب شديد
عشان انا برضو كنت عايزا خالد يموت
وعيطت قوي وقالت
كان بيضربني كتير وعلي طول بيهني وكنت قدام العيله اتشرف بي واقول عليه كلام كله كدب وأستحملت معه فوق طاقتي لدرجه اني كنت بدعي عليه وقلبي بيقول امين أنا الام الوحيده اللي اتمنت موت ابنها من قلبها عشان كده سيبته يخش الحمام. لكن طارق راح وهو مالهوش ذنب يارتني شوفته قبل ماينزل ولحقته
وبدات خالتي تنهار وهي بتقول
لكن لما شوفت أبني وابن ابني بيتحرقه قدامي كان هاين عليه ارمي نفسي في حضنهم واتحرق معاهم وساعتها ندمت اني دعيت يوم علي ابني وأنا ربنا استجاب لي خالد واحشني اوي بعد كل اللي شوفته منه بتمني الايام ترجع بيا ومخلبهوش يخش الحمام
وقامت خالتي ومسكت رقبتي كانت عايزه تخنقني وهي بتقول
انتي السبب انتي اللي حرمتيني منه لازم تموتي زي ما هو مات وزي ماطارق مات
بصراحه سيبت نفسي لخالتي ودموعي بتنزل وأتمنيت انها تقدر تخنقي عشان اموت واروح لطارق لكنها سابت رقبتي وراحت وخداني بالحضن وقالت لي
كان لازم يموت انا عارفه انه بهدلك زي ما بهدلني بس ماكنتش عايزا يموت قدامي وكمان يموت محروق
وفضلت خالتي تعيط وبحرقه وانا بقول لها
عشان خاطري موتيني خليني ارتاح
بصيت لي وقالت
عيشي وربي بنتك. لكن بعيد عني
اميرة
أيه اللي بتقولي ده يا خالتي انا ماليش غيرك
خالتي
وانا كمان ماليش غيرك بس مش هاقدر أشوفك كل يوم قدامي ولا هاقدر اكل معاكي في طبق واحد ولا هاقدر أنسي انك انتي قتلت أبني الوحيد خدي بنتك وامشي من هنا يا اميرة
اميرة
أروح فين طيب
خالتي
ماعرفش أمشي بدل ماقتل بنتك او اقتلك أنتي انا الجنان بدا ينهش لحم راسي
وقامت خالتي وسابتني وانا خايفه منها وخايفه عليها خالتي اتجننت وممكن فعلا تقتل بنتي لميت هدومي وخد علياء بنتي ومشيت وروحت لشقه امي وابويا وطلعت مفتاح الشقه وجيت افتح الباب لقيت الباب مابيفتحش نديت علي صاحب البيت اللي احنا ماجرين الشقه منه نزل لي وقال لي
خير يا اميرة
اميرة
الباب مش عايز يفتح ليه يا عم ناجي
ناجي
ويفتح ازاي وانا غيرت كالون الشقة
اميرة
غيرت الكالون. ليه عملت كده
ناجي بنرفزه
شقتي وبعد موت ابوكي وامك من حقي انها ترجع لي
اميرة
طيب وانا
ناجي
أنت ايه يا بنت الناس ما أنتي عندك شقتك اللي اتجوزتي فيها
أميرة بسخريه
شقتي راحت مع اللي راح ومابقاش لي الا الشقه دي. ابوس رجليك دخلني الشقه انا والبت تعبانين وعايزين ننام
ناجي
ياريت ينفع انا اجارت الشقه وصاحبها الجديد جاي يستلمها بكره
اميرة
طيب والعفش اللي كان فيها
ناجي
شايله في المخزن بتاعي وقت ماتعوزي هاتي عربيه وتعالي خدي
اميرة
طيب وانا اروح فين دلوقتي انا والبت دي
ناجي
ارجعي شقتك
أميرة
تاني يا عم ناجي. انا ماليش شقه خلاص
ناجي
ليه كده بس
أميرة
اهو بقي اللي حصل يا عم ناجي
ناجي
طيب بصي انا هافتح لك الشقه تباتي فيها الليله دي عشان الوقت اتاخر وبكره الصبح اشوف لك شقه تقعدي فيها
أميرة
ربنا يخليك يا عم ناجي
وفتح لي باب الشقه وبيت فيها وتاني يوم الصبح بدا عم ناجي يدور لي علي شقه يكون ايجارها معقول لكن كل الايجارات في المنطقه عندنا غاليه وانا خرجت من عند خالتي مش معايا غير 50 جنيه. تعب معايا عم ناجي بصراحه وحل علينا الليل لغايه مالقيت اوضه فوق سطوح في عماره صاحب العماره يقرب لعم ناجي اتحايل عليه لغايه ما رضي وقعدني في الاوضه وخد مني 15 جنيه مقدمه واتفضل معايا 35 ج وطبعا كان لازم اشوف شغل عشان اكل منه انا وبنتي علياء وقعد ادور علي شغل لكن كل الابواب مقفوله روحت لخالتي قولت اخد منها فلوس لقيتها باعت البيت وسابت المنطقه كلها واسال عنها طيب راحت فين ما حدش يعرف وأسال في العيله فين خالتي ماحدش يعرف. قعد أسال نفسي طيب وبعدين أصرف علي البت دي منين عيشت فتره صعبه جدا وبقيت عايشه انا وبنتي علي الفلوس اللي بتلمها لي بنت عمتي خلود واللي كنت اعرفه عن خلود انها شغاله في مطعم في الهرم. وبصراحه صاحب البيت بعد ماعرف حالتي بدا ما يطلبش مني أيجار الاوضه اللي احنا قاعدين فيها لكن المشكله بدات أن اللي كان بيبعت لي فلوس من عائلتي مع خلود بطلوا يبعتوا وانا بقيت مش معايا حق البرشام اللي من غيره بموت فبقيت محتاجه فلوس أكل واشرب منها وفلوس أجيب بيها برشام عشان اقدر اقف علي رجلي فمن هنا كان لازم اشوف شغلانه يكون فيها فلوس أعرف اعيش منها كويس واسيب الاوضه اللي أحنا عايشين فيها و اللي كانت كل ما المطره تمطر علينا نغرق تحت سقفها وكلمت بنت عمتي خلود تشوف لي شغلانه معها في المطعم اللي هي شغاله في
لكن في الاول خلود مارضيتش ماعرفش ليه لكنها بعد كده قالت لي
هاشوف لك شغلانه معايا بس بلاش حد يعرف انا شغاله فين
وعدها اني احفظ سرها وانا مش فاهمه ايه العيب في انها تشتغل في مطعم المهم شافت لي شغالنه معها وبمجرد ماروحت المكان اللي شغاله في خلود ماتت اميرة الطيبه المغلوبه علي امرها واتولدت أميرة تانيه مابترحمش اللي يجي تحت ضرسها، ،،،،،،
وتقفل علياء المذكرات وهي بتعيط وتمسك دماغها ،،،،،،،،،
