رواية رحيلها مميت الفصل الخامس
استغرب محمد من تعب ميرنا وافتكر إن عندها برد في معدتها. دخل وراها وهو بيطبطب على ظهرها وبيشيل شعرها عن وشها، وبيسألها بهدوء: إنتِ أكلتي حاجة طيب تعبتك، أو أخدتِ دوش وطلعتي للهوا؟
رفعت ميرنا راسها بتعب وهي بتتعدل، وبصت له وقالت: لا، محصلش، أنا مأكلتش حاجة من الصبح، وأديك شوف مامتك عملت إيه في الغدا بتاعنا.
غسلت وشها وقالت: أنا مبقيتش عارفة أعمل إيه، أنا حاسة إن التعب اللي عندي دا من الضغط النفسي اللي والدتك حطتني فيه الأيام اللي فاتت كلها، من ساعة جوازي لحد إنهاردة.
كتف محمد إيديه وسند على باب الحمام وهو شايفها بتغسل وشها وبتظبط نفسها، وقال: تحبي نروح للدكتور علشان نطمن عليكي بشكل أفضل؟
حركت ميرنا راسها يمين وشمال وقالت: لا لا، أنا هبقى كويسة. روح إنت كُل، إنت على لحم بطنك من الصبح ومتغدتش.
محمد بهدوء: أنا مش هاكُل ولا لقمة من غيرك.
ميرنا بتعب: يا محمد بقى، بطل الشغل دا. إنت شايف أنا معدتي تعبانة إزاي، مش هعرف آكل.
قرب منها محمد وحط إيده على كتفها وهو بيمسح عليها بهدوء وقال: هناكل وهنفتح نفس بعض. إنتِ أعصابك تعبت، ممكن الضغط واطي عندك أو عالي بسبب اللي حصل إنهاردة، لكن هناكُل وهتبقي كويسة.
خرج مع ميرنا من الحمام وسندها لحد ما قعدت على الكنبة، فتح التكييف على درجة متوسطة ومناسبة، لأن الجو بدأ يبقى حر، وحطوا الأكل.
وبينما هو بيدور على فيلم في التليفزيون، سمعوا صوت البوابة بتتفتح وبييجي ناس بتستقبلهم والدته تحت.
بص لميرنا بـِ إستغراب، فـ رفعت أكتافها بـ لامُبالاة وقالِت: أكيد حد من معارفكُم أو قرايبكم جاي يزورها ويطمن عليها، يا رب بس متنتفش ريشي قُدامهم وأنا معملتلهاش حاجة.
قعدوا ياكلوا، ولاحظت ميرنا إن محمد بيحاول يسمع مين اللي عند والدته، لغاية ما قال لها ببساطة: دي سُهى بنت خالتي.
ميرنا ردت بهدوء: هي سُهى دي أنا عُمري ما شوفتها يعني غير في الفرح، إيه اللي فكرها بوالدتك وخلاها تيجي تزورها؟
محمد بـِ إستغراب: مش عارف.
خلصوا أكل، وأكل محمد بشراهة وشهية، لأنه بالفعل كان على لحم بطنه من الصبح، أما ميرنا أكلت لُقم صغيرة، لأنها مكانتش قادرة خالص.
وهي بتغسل الأطباق وبتظبط المكان، مسكت فوطة صغيرة ومسحت بيها الترابيزة، فقال لها محمد بهدوء: أنا هنزل أشوف فيه إيه. أنا حاسس إن خالتي تعبانة وبنتها جاية يعني تقول لأمي علشان تبقى معاها، هشوف فيه إيه وأجيلك على طول.
ميرنا معترضتش وقالت بهدوء: خلاص، تمام.
ساب باب الشقة مفتوح، لكنه قفل السلك ونزل لتحت، واتأخر.
بعد ما ميرنا خلصت الترويق مطرح الأكل، حست بدوخة وهبوط، فـ قعدت على الكُرسي مكانها، وكان فيه حبات من العرق البارد على جبهتها.
لما لقت إن محمد اتأخر، قررت إنها تبعتلُه علشان تعرف هو فين كُل دا، ممكن يكون فيه حاجة.
مسكت التليفون بتاعها ودخلت على الواتساب وبعتتلُه: «في إيه يا محمد؟ إنت كُل دا تحت بتعمل إيه؟»
الرسالة اتبعتت، مشافهاش ومردش عليها لمدة نص ساعة.
بدأت تهز رجلها بعصبية وهي حاسة إن دمها بيفور، مش من التعب بس، لكن من تصرف محمد العجيب لما سمع صوت بنت خالته لما جت.
الغيرة بدأت تشتعل فيها، لأنها فاكرة كويس جدًا نظرات بنت خالته ليهم في الفرح، وكل ما يشوفوا فيديو الفرح تقوله: هي مالها بتبُصلك كدا ليه؟
مقدرتش تستنى أكتر، لبست الإسدال بتاعها، لأنها مكانش فيها حيل إنها تلبس وتغير هدومها بتاعة البيت وتسرح شعرها، فقررت تلبس اسدال الصلاة ورشت برفان ونزلت تحت.
وهي واقفة عند الباب، كانت خايفة ومرتابة من حماتها ومن رد فعل حماتها لما تشوفها قدامها.
فتحت السلك شوية ووقفت عند الباب، وخبطت خبطتين على الباب الخشب المفتوح.
حماتها وشها اتقلب أول ما شافتها.
وسُهى كانت قاعدة بمنتهى الشياكة والتأنق، يعني كانت حاجة special خالص. كانت لابسة هاي هيلز عملية، ولابسة سوت لونه بيج شكله حلو، وحاطة ميكب ومهتمة بنفسها، ومحمد قاعد بيتكلم معاها.
لكن لما ميرنا خبطت على الباب، كلهم التفتوا ليها.
محمد بهدوء: تعالي يا ميرنا، تعالي اقعدي جنبي.
بلعت ميرنا ريقها وهي بتبص لحماتها، ودخلت وقعدت جنب محمد، وابتسمت ابتسامة صفراء وقالت وهي موجهة كلامها لـِ سُهى: إزيك يا سُهى؟
ابتسمت لها سُهى ابتسامة صغيرة، وبعدين بصت لمحمد ومردتش عليها السلام.
راحت ميرنا بصت لمحمد بـِ عتاب، اللي مكانش باصص ناحيتها أساسًا، ومندمج مع سُهى تمامًا في الكلام.
وهنا حماتها اتبسطت جدًا من الموقف اللي حصل دا، وابتدت تشكر في سُهى قدامها وتتغزل في جمالها وشياكتها وأناقتها.
وبعدين أشارت على ميرنا وقالت: أديكِ شايفة حظي في مرات ابني، نازلة بإسدال الصلاة رايحة جاية بيه، لما داب على جسمها.
سكتت ميرنا لحظات، وبصت لحماتها من غير ما ترد، وهي حاسة إن جسمها كله سخن رغم إنها من شوية كانت بتعرق عرق بارد من الهبوط.
سُهى ابتسمت ابتسامة صغيرة وهي بتبص لميرنا، وقالِت: يمكن ميرنا من النوع اللي مبيعرفش يهتم بنفسُه كـ أنثى، محتاجة تعليم في الحتة دي.
ردت حماتها بسرعة وهي بتبص لها من فوق لتحت: إنتِ شايفة الفرق بنفسك. إنتِ واحدة نازلة من بيتها وهي عارفة رايحة فين، إنما دي من يوم ما دخلت بيتي وهي ماشية كدا وخلاص.
شدت ميرنا على إيديها في حجرها، وحاولت تبلع الغصة اللي وقفت في زورها.
محمد أخيرًا بصلها وقال: ماما، خلاص بقى.
ضحكت والدته وقالت: أنا بقول الحقيقة، هو أنا بقول حاجة غلط؟
رد محمد وهو بيحاول ينهي الكلام: ماشي، بس مش وقت الكلام دا.
بصت له ميرنا للحظة، مستنية منه كلمة تانية، كلمة واحدة بس تحسسها إنه شايف اللي بيحصل حواليه، لكنه رجع يبص لـ سُهى وهي بتتكلم.
سألتها سُهى ببرود: إنتِ بقالك قد إيه متجوزة يا ميرنا؟
ردت ميرنا وقالِت: ما إنتِ عارفة يا حبيبتي وحضرتي الفرح..
هزت سُهى راسها وقالت: آه، فعلًا.. لو محتاجة تتحركي ونروح محلات تجيبي هدوم خروج وهدوم بيت أنثوية كدا أنا مُمكِن اخدِك بعربيتي.
ميرنا وصل بيها الضيق مبلغُه فـ ردت وقالِت: حبيبتي أنا دولابي مبعرفش أقفله من كُتر الهدوم اللي عندي، ومحمد موجود وعربيته موجودة لو إحتاجت شيء هروح معاه، أركب معاكِ انتِ بصفتك إيه؟
ضحكت سُهى بـِ صفار وبصت لخالتها وهي بتقول: ممم عصبية أوي يا خالتو، الله يعينك يا محمد.
وضحكت وكأنها بتهزر!
حماتها ضحكت وقالت: دي كدا من أول يوم، وتعرف كمان إزاي تخلّي ابني ياكل في نفسُه من الضيق.
ميرنا رفعت عينيها لها وقالت: أنا؟
قالت حماتها: آه إنتِ.
محمد إتنهد وقال: ماما، بلاش نفتح الموضوع دا.
لكن والدته كملت، وكأنها مستنية اللحظة دي من زمان: أنا مكونتش عيزاكِ لإبني بس هو اللي أصر.
وسُهى بتضحك بخُبث وهي بتلف وشها قال يعني خايفة على مشاعِر ميرنا.
بصت ميرنا لمحمد مرة تانية.
المرة دي مستنتش منه حاجة.
قامت بهدوء من مكانها وقالت: أنا هطلع.
كملت وهي بتحاول تثبت صوتها: علشان أنا تعبانة.
وقبل ما تتحرك، حست بدوخة مفاجئة، فـ مسكت طرف الكرسي بإيدها.
محمد قام بسرعة: ميرنا!
مسكها من دراعها وسندها، وبص في وشها بقلق: إنتِ كويسة؟
هزت راسها وهي بتحاول تاخد نفسها: آه، كويسة.
سُهى قامت هي كمان من مكانها، وقالت بِهدوء: هي وشها أصفر أوي كدا ليه؟ تحب ناخدها للدكتور؟
حماتها بصت لميرنا وقالت ببرود: ما هي من الصبح قاعدة من غير أكل، وبعدين تقولك تعبانة.
محمد بص لأمه بنظرة ضيق واضحة، وبعدها رجع لميرنا: تعالي اطلعي فوق.
قالت ميرنا بصوت واطي: أنا أقدر أطلع لوحدي.
لكنه مسابش دراعها، وقال: لا، هطلع معاكِ.
وهو بياخدها ناحية السلم، سمعت ميرنا صوت حماتها وهي بتقول لـِ سُهى بنبرة خافتة، لكنها وصلت لها بوضوح: أهو شوفتي؟ ما صدقت إنك تيجي، قامت عاملة نفسها هتقع.. كهينة وعرفت توقع إبني.
وقفت ميرنا لحظة.
محمد بص ليها وهي مش بتكمل مشي معاه فـ قال: قربنا نوصل الشقة يا حبيبي.
مردتش.
بس بصت قدامها، وضغطت على شفايفها، وكملت طلوع وهي حاسة إن الدموع بدأت تتجمع في عينيها.
أما محمد، فبص لتحت ناحية شقة والدتُه بنظرة طويلة، وهو مقرر هيعمل إيه الفترة الجاية..
