رواية حق الرفض الفصل الرابع
ملك كانت لسه واقفة في المطبخ لما صوت سامح علي من الصالة.
سامح: هو أنا مش بنادي عليكي مبترديش ليه؟
دينا: كنت سامعاك..... معلش كنت في المطبخ.مع ملك...
سامح: واعمل بايه سمعاك دي وانتي مش بتردي عليا ها.... وكنتي بتتكلمي مع ملك في إيه بقى ومهم للدرجه دي علشان مترديش عليا
دينا قالت: مفيش كنا بنتكلم.في حاجات عادية.وفي موضوع الجواز.
سامح ضحك بسخرية: طبعا. من ساعة ما ملك قررت تعمل فيها مناصره حقوق المراه وإنتي بقيتي متأثرة بكلامها.
دينا: أنا مش متأثرة بحد. انا بس عندي رأيي.
سامح: يا سلام رأيك اللي ظهر فجأة؟ وافعالك اللى اتغيرت وانتى بقيتي متغيره كدا ومش مفهومه...
دينا خدت نفس: سامح مش عايزة أتكلم في الموضوع. بلاش صوتنا يعلى ونفرج علينا البيت خلينا نقفل الموضوع هنا وانا اسفه ليك.... لما نرجع بيتنا اعمل اللى انتو عاوزه بلاش هنا...
سامح: ليه؟ خايفه من ايه يا ست دينا يعرفوا ان مرات ابنهم مش زي ماهم مفكرين.....
دينا بحزن: لا يا سامح بس عشان مش عايزة نتخانق.وانت صوتك عالي.
سامح: عشان إنتي مش بتسمعيني.لأ إنتي بقالك فترة مش سامعاني أصلا.
دينا: علشان كل ما أتكلم تقول لي ما تكبريش الموضوع. ويطلع الحق عليا وانا اللى بعتذر وبتعاقب فى الاخر وانت حتى مش بتسمعني يا سامح...
سامح: بلاش جو الصعبنيات دا انا بقول كدا عشان فعلا بتكبري المواضيع. وبتعملي مشكله من مفيش وانا راجل شغال وطافح الدم برا البيت عايز لما ارجع ملاقيش اى حوار من حوارتك دي....
دينا: يعني لما أكون زعلانة يبقى الموضوع كبير بالنسبالي.انت مره حاولت تفهمني ولا تسمعني وزي ما انت طافح الدم برا البيت انا طافحه الدم جوا البيت من اكل وشرب وتنضيف واودي مدارس ودروس وتمارين انا ببقى عامله زى عقارب الساعه طول اليوم بلف بلف وانت مش حاسس ولا فاهم وكل نا احاول اتكلم معاك تقولي نكديه وبتاعت حوارات....
سامح: طب وأنا أعمل إيه؟ ما كل الستات بتعمل اللى بتعمليه دا ولا انتى بقى الست الخارقه النادره اللى بتعملي اللى محدش بيعمله انتى من عيله واحده وبتشتكى امال اللى عندهم اتنين وتلاته يعملوا ايه....
دينا: تعمل انك تسمعني.مش مستني دورك عشان ترد. انت شايفه اني بشتكي ونكديه وانا بس كنت بفضفض عن يومي ومش عايزه غير كلمه تطيب خاطري ولا تخبط على كتفي وتقولي كتر خيرك....
سامح سكت ثواني وبعدين قال: إنتي متغيرة.وملك هي السبب.
دينا بصوت ثابت: ملك مش السبب أنا اللى تعبت من إني كل ما أزعل منك أخاف أتكلم.أخاف من رد فعلك انا عرفه انك عمرك ما ضربتني بس كمان مش لازم الضرب عشان الست تخاف.
الكلمة وقعت تقيلة.سامح بص لها: يااه إنتي شايفاني وحش للدرجه دي
دينا: لا شايفاك شخص اتعود إن كلمته تمشي.مهما كان التمن...
سامح: ما هو ده طبيي عشان أنا راجل البيت.
دينا ابتسمت بحزن: ودي الجملة اللي بتبوظ بيوت كتير.وتخربها... لما تقول راجل البيت كأنك بتقول إن رأيي أقل.
سامح: مين قال كده؟ قولي مره قللت منك فيها...
دينا بدأت تعد على صوابعها: لما أقول لك إني مش عايزة أروح عند أهلك تقول لي لازم.ولما أقول لك إني تعبانة تقول لي روحي عند أمي عشان تساعديها.الله يرحمها ودلوقتي علشان هي مش موجوده بقيت باجي بردو علشان املى مكانها مع انك عندك بدل الاخت اتنين...لما أقول لك إني عايزة أشتغل تقول لي بيتنا محتاجني.
سامح: لما كنت بجيبك عند اهلى فدا علشان انتى مرات ابنهم ومن واجبك دا ولما رفضت تشغتلي علشان إنتي مش محتاجة فلوس.
دينا: بس انا مراتك الاول يا سامح قبل ما اكون مرات ابنهم... ومين قال انى هشتغل علشان الفلوس أنا محتاجة نفسي.محتاجه حاجة تخصني أنا.
سامح: انتى معندكيش، كدا..... إنتي عندك بيت وبنت وزوج كل دول مش يخصوكي...
دينا: وعندي أنا كمان انا مش عايزة أكون أم وبس ولا زوجه وبس.
سامح: يعني البيت مقصر معاكي؟بعد عشر سنين جواز؟فجأة اكتشفتي إنك مش مبسوطة.
دينا: لا بعد عشر سنين أنا اكتشفت إني طول السنين دي كنت بحاول أقنع نفسي إني مبسوطة.
ملك خرجت من المطبخ: كفاية الموضوع بدا منين ليوصل لهنا استهدوا بالله...
سامح لف لها: إنتي كنتي بتتصنتي علينا متدخليش.وقولتلك ميه مره ملكيش دعوه بيا انا مراتى وكفايه اوى لحد هنا...
دينا قالت: سامح سيبها. مطلعش عصبيتك فيها هي ملهاش دعوة...
سامح: إنتي كمان بتدافعي عنها؟ دا من امتى وانتو صحاب اوى كدا ومن امتى وانتى بتتكلمى مع حد وبطلعي اسرار البيت برا...
دينا: مش بدافع عنها.بقول لك متحولش الموضوع لخناقة بينك وبين أختك.وانا محكتش ولا قولت حاجه هي اللى جات على صوتك العالي انا مالي...
سامح بص لملك: إنتي من يوم ما رفضتي الجواز وإنتي عاملة مشكلة في البيت. انتى عايزه ايه؟ عايزه كلنا بيتنا يتخرب ونقعد نسمع كلام من اللى يسوا واللى ميسواش علشان تنبسطي....
ملك ردت: أنا ما عملتش مشكلة.أنا قلت لأ.على جوازي.
سامح: وانتى ال لأ بتاعتك دي من ساعه ما نطقتيها والبيت كله اتقلب.
ملك: عشان كل واحد شايف إن من حقه يقرر بدالي.
سامح قال: إنتي اللى عايزة تعيشي من غير مسؤولية.
ملك: بالعكس انا عايزة أتحمل مسؤولية قراراتي.
سامح: يا سلام دي جملة حلوة جدا.بس الحياة مش كلام.وبس المفروض إن الإنسان لما يكبر لازم يفكر في اللي حواليه.انما إنتي بتفكري في نفسك.وبس
ملك: ايوا علشان لأول مرة في حياتي بفكر في نفسي.وده مش أنانيه ولو كل واحد نسي نفسه عشان البيت الناس اللي في البيت هتبقى إيه؟
سكت.دينا لأول مرة ابتسمت.
سامح بص لها: اه إنتي مبسوطة بكلامها وباللي بيحصل طبعا....
دينا ردت: أنا مبسوطة إنها قالت اللي أنا مش عارفة أقوله.
سامح اتوجع من الجملة: يعني أنا ظالمك؟
دينا قالت: أنا ما قلتش كده.أنا بقول إن في حاجات وجعتني.
سامح: طالما عيشتي هباب كدا طب ليه مستحملة عشر سنين؟
دينا بصت له: عشان كنت فاكرة إن الاستمرار دليل إن الجواز ناجح.بس اكتشفت إن في فرق بين إن البيت واقف وإن الناس اللي جواه مرتاحة.
الهدوء نزل على الصالة.فجأة صوت باب الشقة اتفتح.أبوهم دخل.بص لهم.
جمال: متجمعين عند النبي ان شاء الله بس مال وشوشكم مقلوبه كدا في إيه؟
سامح رد: اهلا بحضرتك... مفيش.
دينا قالت: لا في وفي كلام لازم يتقال.
جمال بص لها: دلوقتي؟ قدام ملك؟
دينا ردت بهدوء: ايوا يا عمي بعد اذنك وملك واحدة من أهل البيت. مش غريبه يعني....
جمال قعد: طيب اتكلموا.لما نشوف اخرتها ايه معاكم...
دينا بصت لسامح: بعد اذنك يا عمي أنا عايزة أرجع أشتغل.
جمال قال: ليه؟ وبعدين انا مالي دي حاجة بينك وبين جوزك.
دينا بصت له: أنا مش بطلب أسيب بيتي ومش بطلب أبقى ضد سامح.أنا بس عايزة يبقى عندي حاجة تخصني.
سامح قال: والبيت؟ والبنت؟ وأنا؟
دينا بصت له: بيت مش هسيبه والبنت مش هسيبها إنت مش حاجة أسيبها.إنت شريكي.
دينا لأول مرة ما كانتش بتتكلم باعتبارها زوجة بتحاول ترضي زوجها.كانت بتتكلم باعتبارها إنسانة لها رغبة وقرار.
لكن سامح قال جملة واحدة غيرت شكل الكلام كله: ولو قولت لك لأ؟
دينا أخدت نفس طويل: ساعتها هنعرف إذا كان اللي بينا جواز... ولا مجرد أوامر وأنا بنفذها.
ولا واحد اتكلم.لكن ملك فهمت إن من اللحظة دي...المشكلة ما بقتش جواز ملك بس.المشكلة بقت أكبر.بقت عن كل ست في البيت عندها كلمة...لكنها اتعودت تقولها جواها.
