رواية خلخال مشوه الفصل الرابع 4 بقلم زمرده

 

 

 


رواية خلخال مشوه الفصل الرابع بقلم زمرده


شنهي اليجبرك عالصَبر
وشنهي اليجبرك تنتظر إلمن تِحن

•---∞∞∞∞∞∞∞---•

الدكتور : مبين تحتاج عملية

نشغت أمي من سمعت حجي الدكتور ،وانا لمعت
الدموع بعيني أخاف من العمليه والله
زهرة : يمه بتي

ليث : يا عملية دخيلك ؟

الدكتور : وضعها حرج للأسف تحتاج بلاتين

زهرة : يا هيوفة يايمه ،سوده بوجهي

استسلم ليث و قبل على حجي الدكتور لان ما خله
النه خيار ثاني غير العمليه،وانا من تخليت گدام الأمر الواقع حسيت حتى الوجع زاد عليَّ
ليث : زين ،هنا نسويها لو وين ؟

الدكتور : اذا تريد هنا ،بس الأفضل ولوضعها نحولها مستشفى أهلي لان العناية مكثفه بيها

ليث : هاي هيَ دكتور حولنه على الاهلي

كتب بينه تحويله على المستشفى الاهلي ،اخذ التحويله ليث وطلعنه اريد امشي ما اگدر كل ما جاي
احس الوجع يوصل لگلبي ،گعدت بالگاع لازمه
رجلي وابجي هاي هيَ ولا اگدر امشي بعد جاي اموت والله ...

اجاني ليث يركض گعدت گبالي يحاجيني وانا بس
دموعي تحجي عجزي بهذا الوكت
ليث : گليلي اجيبلج كرسي ؟

هزيت رأسي ب أي
زهرة : أحسن يمه جيبلها كرسي ماتگدر تمشي سوده بوجه أمها

راح ليث يجيب الكرسي وانا من بين دموعي همست
_ أسم الله عليج

زهرة : جا كل الصار بيج من جوه راسي ،لوما انا
صايحتج على الچدوره ما جان صار بيج شي كله مني

_ لا تلومين نفسج يمه هذا قدر مكتوب

سكتت تباوعلي وبعيونها القهر مبين وهيَ تشوفني
شلون مفرفحه روحي ،رجع ليث جايب الكرسي
وگفه قريب مني وشالني خلاني بي ومشى يدفعني
غطيت وجهي بالعباية مستحيه احس عيون الناس كلها عليَّ والرايح والجاي يباوعلي بأستعطاف ...

بس وصلنه للسياره فتح الباب الوره وشالني خلاني
بيها ورجع بسرعه يرجع الكرسي وأمي صعدت
بالصدر ،ومن الوجع تمنيت هسه اسوي العمليه واخلص ولا هل ضيم هذا بس ما جنت ادري الوجع
الجاي اقوى ..!!!

°غاية°

راحوا واحنه على نار ضلينه ،انا وجفون وجده الگلبتها مناحه من طب صخر يركض للبيت ،تلگيته
اگطع طريقة يريد يصعد فوگ
_ شكو خوية شصايرر ؟

وگف يباوعلي ويباوع لجده وجنه حاير بين يحجي
وبين لا
غضة : خايب احجي فتيت گلبي ،گلي شكو شبيك
تركض

مسح وجهه بجف أيده، وبس نزلها گال وخلانه نتلاطم
صخر : عزيزتج جده رايح يسوّلها عمليه ،رجلها
فد مره منتهيه وماكو حل غير البلاتين

عاطت جده ولطمت على رأسها ،وانا من الصدمه
ضليت مخلية ايدي على حلگي ودموعي انجمعت بعيوني وانا اسمعله يحجي
صخر : يگول ليث خطوه وحده ماتگدر تمشي حالتها جاي تسوء

غضة : يمه سوده بوجهي ياريشة بيتنا ياحبوبة ياهيوفة سوه بوجهي

صخر : گولي يالله جده لا يصعد ضغطج ،نحير
بيج بيها

غضة : يا ولك كون من عافيتي على عافيتها

صخر : سمي بسم الله جده ،رايح ابدل والحگهم
للمستشفى

غضة : اخذني وياك عليك الحسين

صخر : وين ماخذج جده ،جا والبنات منو يبقى يمهن ؟

غضة : جا ابقى هنا واعوفن هيوفة ،لا والله اروحن

صخر : باجر عمليتها الصبح اجي انا أخذج

غضة : اروحن هسه مو بكيفك

صخر : شني جده گلتلج باجر

غضة : واذا ما اجيتني ؟

لزم شواربه يحلف
صخر : تعرفيني من الزم شاربي ،وعد من هل شارب باجر جايج انا لو اوديلج واحد من الولد

غضة : خوش

صعد يركض يريد بسرعه يبدل ويروح ،وانا وجفون
گعدنه وحده تصفن بوجه الثانيه ،وجده ساعه تنعى
ساعه تبجي واحنه بالحالتين دموعنه تجري ،بنص
نواعيها على عزيزة گلبها مثل ما تسميها طبت ميمنة
تهف بعباتها ،شعرها من الشال طالع ومبين لابسته
مستعجله ،من شافت گعدتنه وسمعت نواعي جده
ذاكرة اسم صديقتها لطمت على خدها تسألني ...

ميمنة : ولج غاية صدگ السمعته ،مكسوره رجل هيوفة والا عمليه ؟

بصوتي المبحوح من القهر گتلها إأكد على السامعته
_ أي ،وباجر الصبح عمليتها

ميمنة : صخام بعيني ،ولج شلون انكسرت ؟

گعدت گبالي نسولفلها ،وهيَ ويا كل حجاية تلطم
ودموعها يزيدن
غضة : راحت منا شايغة روحها ياحبوبه ،فرفحت روح رفيچتج من الوجع
وميمنة منا ميته من القهر وبحجي جده تزيد بالبجي

طش الخبر بالقرية ،جدي وأبوي لاحگين صخر للمستشفى ،و ولدنه نصهم هدوا الموكب وسكنوا المستشفى ما مخليهم يطبون وضالين الليل كله
بره گاعدين ،واحنه هنا نتحرمص الخبر نچدي جداوه ....

°حواري°

أفتر بالمطبخ الخطار ما يگضون ،كل ساع صايحين
جاي جاي ،وانا مثل البنگاليه افتر ولا هدت ولا
گعدت ،اضوج واتذكر لو صايرله شي وانجب واسوي
الجاي وانا الممنونه ،الحمدلله من طلع بخير
وسلامه ميخالف الجاي ولو تعب بس ميخالف ...

دگيت باب الديوانية طلعلي فقار اخذ الجاي مني
وطب ،وانا گعدت مهدود حيلي اباوع للهوسه هاي
شلون اگضيها

دفرت نفسي الف دفره الا غسلتهن وبس كملت
طلعت اركض من المطبخ شارده لا يصيحوني خلِ
انام عاد ما نايمه مثل الاوادم...

بس حطيت رأسي على المخده فززني صوت دگة
باب الغرفة ،گعدت على حيلي من طب فقار
وجهه مخطوف لونه
_ شكو شبيك فقار ؟

فقار : ولج هيوفة طايحه ومكسوره رجلها بس راح
يطببوها عمليات

نشغت فاتحه عيوني
_ عليك الله

فقار : والله

گمت على حيلي اتعثر بمشيتي
_ اخذني الهم عليك الله

فقار : رايح يم ضيرم وأنتِ كملي والحگيني

_ خوش خوش

راح وانا ركض ركض لبست حجابي وعباتي وطلعت
وراه ،دگيت باب الديوانيه حتى يطلعلي صاح
فقار : تعاي ماكو احد

فتحتها وطبيت ماكو احد بس فقار وضيرم گاعد
على الجرباية المخليها اله ومخلي مخاد وراه
ضيرم : شكو وين ماشية؟

فقار : بت عمي محمد مكسوره رجلها ويگولون الا
عمليه ،وحور رادت اوديها الهم

ضيرم : مني ؟

فقار : هيفاء

ضيرم : ما تستاهل والله ،شني شلون انكسرت ؟

فقار : يگول نوح واگعه من الكرسي

ضيرم : وهاي كله لان وگعت من كرسي ؟

فقار : رادت تصير بعد ،عينك على نفسك بس اوديها وارجعلك

ضيرم : لا يضل بالك

طلع فقار وأنا وراه أمشي ،بس طبيت لبيت جدي
شفتها گاعده بالمطبخ تبجي ولامه نفسها وبس
صوت شهگتها الخفيقه مسموعه
_ جفون .

بس صحتها رفعت رأسها وجهه الأبيض صاير أحمر
وعيونها مورمه على گد ما باجيه
جفون : حور

گعدت گدامها لزمت ايدها احاجيها
_ ها عيوني

جفون : گلبي راح يوگف من الخوف عليها والله

_ أسم الله ،من شوكت هيج خوافة أنتِ ؟

جفون : أخاف اخسرها وما الگه أحد يهتم بيَّ مثلها
والله الانسانه الوحيده الاحس بروحي زغيره
يمها وتشيل همي ،شلون لو صار بهيوفة شي گليلي .

احجي وياها بهدوء ،وانا مثلها خايفة بس ما اريد
أحسسها
_ مايصير شي قابل أول الناس تسوي عمليه ،كلها
جم ساعة وتطلع وكلشي مابيها

جفون : باعي

_ باوعت

جفون : هيَ صح ماتخاف بس تخاف من العمليه اعرفها لان دوم تگول من اتزوج واحبل ما اجيب
عمليه أخاف

_ تسويها وتصير سوالف ،گومي نطب جوه هنا بارده

گومتها وياي للصاله ،لگيت جده گاعده وماده رجليها
وفاتحه شيلتها ،وجده قلة ما اشوفها فاتحه شيلتها
الا اذا جانت كلش مختنگه ...

على جهه متمدده غاية على رجل ميمنة ،گعدت انا وجفون بصفهن ،اصفن بالحياطين ،لنص الليل كلها
التمت هنا ،أمي ونسوان عمامي والبنات وحتى مرة
عمي سمير العكره من سمعت اجت من الباب تحجي

_ لو مطيها الاخوي گبل لا تتعوق

سمعتها جده وگامتلها منا روحها فايره وهاي زادتها
عليها بحجيها
غضة : اجي اكسر عوجيتي على راسج واحط ضيم
گلبي كله بيج

خالدة : جا عمه مجذبة انا

غضة : تحومين على كتلتج أنتِ ،المن جايتنه ؟

خالدة : ياا يااا عمه شني المن جاية ،ماترديني اجي ؟

غضة : أي ماريدج تجين ،لا هلا بجيتج

نجوى : لا عمه مو هيج

غضة : جا تجي تذب سمها مثل الحيه وتمشي

شيماء : لاتحطين بالج يم حجيها شني ما تعرفيها أنتِ ؟

خالدة : شو حجيج ما أعرف شلونه

شيماء : جا غير اريد اهدي عمتي اسكتي أنتِ أطي
من روحج شوي

سكتت تباوع لجده وبعيونها مبين الكره ،سكتت جده منها ورجعت گعدت بمكانها ،وانا وبركة وبصائر مشينه للمطبخ نسوي عشه ،لهسه مابينه أحد ماكله لگمه...

فتحت المجمده اباوع بيها ،طلعت لحم مثروم
_ نسوي كباب عروگ ونواشف ؟

بصائر : أي نسوي ،بس خلِ اصيح ميمنة تسوي الكباب انا ما اعرف

_ خوش وانا هم ما اعرفله

مشت تصيح ميمنة وانا طلعت البتيته اگشر بيها وطبت ميمنه تحضر بغراض الكباب وتحجي علينه
ميمنة : كله كباب عروگ شكبرجن بعد تصيرين

بركة : تره انا وحواري كله عمرنه سطعش سنه

ميمنة : جا أنا بعمرجن شايله بيت اهلي على رأسي وحتى خبز اخبز

_ هاي أنتِ مو احنه

ميمنة : ليش شفرقچن ؟

_ جا أنا ما مقصره كلشي اسوي بالبيت بس خبز
وطبخ ما أعرف

ميمنة : صيت المرة بخبزها وطبخها

_أنا ماريدن الصيت

ميمنة : ضلي ضلي مبربعه بالنوم

_ تره انا ثالث وهاي السنه الثانيه لازم ادرس مو اشتغل

ميمنة : نشوف من تعبرين الثالث الله كريم لوكتها

_ الله كريم

ميمنة : ونعم بالله

طلعت طحين تخلي على الكباب ورجعت صفنت
بالها يم هيوفة أعرف بيها شگد تحبها وشلون صداقتهن قوية ...

كملنه العشه والتمينه على السفره بالصاله ،جده ولا
اكلت وخلصتها بس تباوع لمكان هيوفة بصفها
غضة : سوده عليَّ يا حبوبة يوميا مجانها بصفي گاعده .

شيماء : شني السالفه عمه كافي بجي والله حتى
فال مو حلو عليها

غضة : ولج يمه عمت عيني ما اگدر احطن لگمة بحلگي وهيَ ماكو

شيماء : دكلي ياعمه والله موزين عليج هيج لازم تشربين دواج

بالگوه اكلت لگمه وگامت تغسل ،واحنه بس كملنه
لمينه السفره و وگفت ميمنة تغسل المواعين هيَ
وبصائر ،بنفس الوكت طب نوح من باب المطبخ سلم وحاجه جفون
نوح : حضري هدوم الهيوفة بين ما اسبح

مشى يريد يطب وگفته ميمنة تسأله
ميمنة : عليك الله نوح شلونها ،خوما متأذيه

نوح : گولي شگد متأذية

ميمنة : شفتها ؟خلوك تطب ؟

نوح : أي ،بس ما يخلونه ربع ساعه ونطلع

جفون : شوكت عمليتها ساعة بيش ؟

نوح : بالسبعه الصبح ،يالله بسرعه حضرلي هدوم
أريد ارجع هناك

جفون : صار

أبتسم بوجهه ودار باوع على غاية الگاعده بالگاع
نوح : شلون صارت رجلج ؟

غاية : توجعني

نوح : شسالفتجن ويا الرجل

غاية : حضنه الحلو غير

ضل يحجي ويا غاية شوي ومشى يسبح ،وانا گعدت اباوع عليهن يفترن ،مشت جفون حضرت هدوم
لهيوفة وخلتهن بجنطه ونوح من كمل اخذهن يرجع للمستشفى

كلها مشت وضليت بس انا وميمنة يم البنات ،گمت اطلع بره
أشتم هوه اختنگت كلش الأجواء هاي قبضت گلبي
گعدت بالحوش يم گن بطوط جفون
افكر بأمتحان الأحد اليوم خلص وباجر سبت شلون
الحگ أكمل الفصل كله ....

على نفس گعدتي واندگ الباب ،گمت انكث هدومي
من التراب ومشيت اشوف منو ،فتحت الباب
ومديت رأسي ،بعدني ما شايفة منو وگمزت من انجر
الباب ورجع انطبگ وصوته من وره الباب ينتر
عبد الحق : ادبسزز تمدين رأسج

_ حق

عبد الحق : لا شبحه ،انا الج حور،وخري خلِ أطب

وخرت من الباب وهوَ طب يباوعلي بخزره ،دنگت
رأسي اطگطگ اصابعي من التوتر من حجه يهدد
عبد الحق : والله رأسج افصمه من جسمج لو شفتج مادته من الباب بعد

عضيت لساني يحكني لازم يرد ،بس هذا اذا رديت
عليه يجيبني بكفخه ينسيني اليوم الامي بي
جابتني
عبد الحق : جده وين ؟

أشرتله
_ جوه

مشى يطب وانا وراه أعض بأصابعي ،ليش سكتتله
شني أول تالي اسكت الأحد انا ،نزلت ايدي من
اندار باوعلي ورجع مشى مطيني ضهره وطب جوه من باب المطبخ وانا بقيت واگفه بمكاني ارمش بعيوني أحس نضرته مادري شلونها اول مرة يباوعلي وهلگد يطول ما منزل عيونه ،مو أول مره احجي
وياه بس اول مره احس بي شي غريب ...!!

طردت افكاري وطبيت جوه شفته گاعد گدام جده
يواسيها ،كلنه نعرف بيها شني هيوفة بالنسبه الها
وشگد تحبها ،يمكن اكثر حفيده هلگد متعلقه بيها
جده ،بحيث للصبح ضلت ما شايفة النوم وتحوس
وبس سمعت صوت الباب گامت على حيلها...

غضة : شوفن منو اجه ولجن

گمت بسرعه اشوف منو اجه بس انا وغاية گاعدات
جفون استسلمت ونامت بغرفة جده وميمنة
نامت بالصاله يمنه ،مشيت بسرعه من سمعت صوت
خطوات تتقرب من باب المطبخ ،فتحته بسرعه لان
قافلي ،طب ليث بالگوه يمشي والتعب مبين عليه
جده وراي جايه ما تحملت تضل گاعده
غضة : ها حبوبة ليث ،أجيت تاخذني ؟

ليث : أخذج جده بس خلِ أناملي ساعه حيل ماضل
عدي والله

غضة : نام جده وانا اگعدك

ليث : لا تخلني انام اكثر بعد ساعتين لعمليتها

غضة : لا جده شلون هوَ انا بس اريد اروحن گلبي
غادي نار عليها

ليث : سلامة گلبج ،مرخصتكم

صعد فوگ يسحل بروحه وانا عيوني وراه تتبع كل
خطوه يخطيها ،نزلت عيوني من شفت جده
تباوعلي

غاية : وخري الغطه من وجه ميمنة

وخرت الغطه احجي وياها
_ ليش هيج مختنگه

غاية : جا غير طب ليث وشعرها طالع عاد سترتها

_ خوش

مشيت گعدت يمها ،خليت أيدي على خدي وبالي راح لبعيد كلش
غاية : شبيج ؟

درت وجهي عليها
_ مابيَّ شي

غاية : جا وين صافنه ؟

_ هيج افكر بالامتحان

سكتت تباوع على ميمنة النايمه وشالها نازل طالعه
گذلتها ونازله على خدها
غاية : انا وياها مشتركات بنفس الشعر

_ كلش

غاية : بس هيَ دوم تگصه حرامات ماتخلي يطول

_ تگول ثگيل

غاية : أي والله صح ،رايحه رگبتي منه

هزيت رأسي ب أي وسكتت ،من حسيت بروحي نعست گمت مشيت لغرفة جدة تمددت بصف جفون
وبسرعه نمت ،ماگعدت غير على صوت الهوسة
لبست شالي وطلعت افرك بعيوني

_ صباح الخير

جدي وعمي محمد وصخر گاعدين بالصاله يشربون
جاي ويمهم گاعده غاية ماخذتلها ركن تقره ردوا عليَّ غسلت وجهي ومشيت للمطبخ اسمع صوت سوالفهن
بس طبيت شفتهن يغسلن مواعين صبحت عليهن
وگعدت اسأل على هيوفة

_ سوت العمليه مو ؟

ميمنة : أي الحمدلله وطلعت بس بعده ما فاكها البنج

_ الحمدلله ،الف الحمدلله

ميمنة : يستاهل الحمد ،تتريگين ؟

_ أي والله ميته جوع

ميمنة : شتردين ،بيض لو جبن ؟

_ بيض

جفون : أييييع حشه نعمة الله

_ ولج الجبن ما يسند الگلب

جفون : لا والله يسند الگلب جا شني البيض وزفرته

_ انا احبه ،معدتي لو معدتج

جفون : عييييع

ضحكت وأخذت الصينيه من أيد ميمنة وگعدت اكل وجفون تباوعلي لعبانه روحها ،بس تعرف اذا تگول بعد مره ايع احط الطاوه براسها ...

بس كملت شلت الصينيه وغسلت الطاوه والگلاص
وانداريت احجي ويَّ ميمنة
_ اريد اروح لبيتنه اقره باجر عدي أمتحان

ميمنة : جا روحي شني ضلتج هنا

_ دگولي لا

ميمنة : جا ما اعرفج بس تردين تطفرين من الامتحانات

ضحكت
_ فهمتيني غلط

جفون : لا فهمتج صح كسولة

_ السجاجه اسكتي

جفون : اهووو راح تحسدني

_ ولج ميمنة تسج سج وانا أم السنه الثانيه مو مثلها

جفون : راح اگوم اجفص بمصارينج

ميمنة : السجاجين يخافون من العين اسكتي

ضحكت وهيَ ضاجت تحاجي ميمنة
جفون : جا حتى أنتِ عليَّ

ميمنة : اشاقيج

جفون : لا تتشاقن هيج أنا حلگي مشگوك والله بس
اريد اخلص من الثالث وافضها

ميمنة : تخلصين أنتِ ،لا تخافين مادام شاده حيلج

ضحكت
_ شادته بحبل

ميمنة : وأنتِ اذا ضليتي على هاي سوالفج الا معجزة يالله تطلعين من الثالث

_ شبيچن غاسلات ايدچن مني ؟

ميمنة : انا مو بس غاسلتها ،سبحت

ضحكت بعالي صوتي ومن اجتني صيحه من صخر
سكتت مخليه ايدي على حلگي واضحك بدون
صوت
ميمنة : گلت راح تتأثر وتنقهر ،بس طلعتي بدون مشاعر

حركتلها حواجبي
_ عفتهن الچن عيني

ميمنة : روحي للبيت أقري ضوجتيني

فريت عيوني ما مهتمه ومشيت جبت عباتي
لبستها وضليت واگفه بمكاني من صاح صخر
صخر : انا اوصلج اوگفي

وگفت بمكاني يم باب المطبخ وهوَ طلع لبس شحاطته وأشرلي امشي ،مشيت وهوَ گدامي هذا هوَ بيتنه بس هوَ ما يقبل وحده تطلع وحدها ...

بس وصلني للباب طبيت وهوَ طب وراي للديوانيه
يم ضيرم ،نزعت عباتي بالمطبخ واسمعهم
يحجون من باب الديوانية الجوه صوتهم يوصلني
لان ما شاء الله شادين مكبرات صوت
صخر : شلونه أبو صگر ؟

ضحك يرد عليه
ضيرم : الحمدلله ،بشرني شلون صارت بت عمي ؟

صخر : ماندري بعدها ما صاحيه من البنج

ضيرم : جا شعجب رجعت أنتَ ؟

صخر : خابرني حق علمود صادق أبن بيت غازي
متلاگين ومتعاركين وحق يتهدد يروح يفلش بيبتهم
بالجيلات لان غاثه بحجاية ،وانا خليت ورجعت
لان أعرف حق ما يگعد ويسويها صدگ ويصير الحگ
علينه مو ويانه

ضيرم : جا صح شسويتوا ؟

صخر : كلشي ما مسوين بعد ،بس جدي گال ندزلهم گوامه بس تطلع أختك من المستشفى

ضيرم : كبرت وما زغرت

صخر : خلها تكبر واحنه الها

ضيرم : جا تانوني اطيب شني ابقى هنا وما أهد وياكم

صخر : يلام أبوي من يسميك أبو گمزه

ضيرم : الاگرع يّعير أبو حباية ،على الاساس تنگط
هدوء أنتَ

ضحكوا همَ الاثنين ،وانا مشيت اطب جوه من سمعت صوت أمي بالصاله ،ضحكت من شفتها
ريحانة أختي

نجوى : هاي أجتي أختج المسربته

ضحكت وگامتلي ،مشيت بسرعه اسلم عليها
_ مشتاقتلج

ريحانة : وانا هم والله طاگ گلبي عليكم بس تعرفن جاي نشيل وحالنه بالضيم

_ والله مايصير هيج لا تباتين عمي بس تعاي جم ساعه وارجعي خاف ناكلج

ضحكت وگِعدت
ريحانة : والله لوما صواب ضيرم فلا جان خلوني
أجي

گعدت يمها اتحسب على عيالها
_ حسبي الله عليهم ،جا غير احنه اهلج شني بس
الهم أنتِ ما نشوفج

ريحانة : تفكيرهم هذا ،مو بس انا الله وكيلج ولا
چنه تمشي الاهلها وتبات يمهم

نجوى : والله لو ادري هيج ولا اطيج الهم

ريحانة : يمه والله ما مصبرني على العيشه يمهم غير بس حمزة

نجوى : جا حتى هوَ يردن يفلسنج منه

أخذت نفس ضايجه
ريحانة : خليني ساكته يمه ،گلبي محمل هاكثر بس
اگولن تهون وميخالف ويّجي يوم الله يجبر خاطري

نجوى : أن شاء الله يمه ،شمشتهيه اسويلج غده ؟

ريحانة : لا تسويّن مشتهيه اكل من الموكب وهم اريد اطلب مرادي

نجوى : جا خوش

باوعتلي تسأل
نجوى : سمعت صوت صخر ،بعده هنا ؟

_ أي گاعد يم ضيرم

نجوى : جا خلي هوَ يگل للولد يّجيبولنه

گامت أمي تروح للديوانيه وانا مشيت وراها ،طبت
هيَ وانا ضليت واگفه يم الباب اتسنط
نجوى : شلونك عمه صخر

صخر : هلا عمه ،الحمدلله بخير وأنتِ ؟

نجوى : على الله ،بعد عمتك رايدتك بخدمة

صخر : إأمري

نجوى : ما يأمر عليك ظالم ،شوف يمه يمنه ريحانة
ومشتهيه اكل من الموكب و الوليدات يشلعون گلبي محد يقبل يجيب النه ،حاجيهم أنتَ

ما سمعت ردة ،فتحت باب الديوانيه أباوع ،بلع ريگة يمسح وجهه بجف أيده ،حمحم وبهدوء رد على
أمي
صخر : صار من عيوني ،تدللين أنتِ وريحان

نجوى : بعد روحي ،راح نتعبك

صخر : تعبكم راحه عمه ،مرخصتكم

سديت الباب بسرعه من گام يريد يطلع ،رجعت ركض
للصاله ،ريحانة گاعده وصافنه وبالها ما أعرف وين
حركت أيدي گبال وجهه ،باوعتلي
_ شبيج ؟

ريحانة : شوكت الله يرزقني بجاهل صار خمس سنين ما خليت لا طبيب ولا إِمام ما مشيتله ،والله
بديت إأيس

_ من شوكت هيج تحجين ،جا الله مو بعيدة عليه
يعوضج ويجبر خاطرج بس گولي يالله

ريحانة : يالله

گمنه اثنينه من صاحتنه أمي
نجوى : ريحانة وحواري تعالن هنا يمنه أنا وضيرم

مشينه للديوانيه هيَ طبت وانا وراها ،ضحك ضيرم
بس شافها
ضيرم : مثل هلال العيد ما نشوفج بس بالمناسبات

أبتسمت ومشت تسلم عليه وانا گعدت بصفها من
گعدت يم ضيرم تحجي وياه
ريحانة : الله وكيلك مشتاقتلكم

ضيرم : واحنه اكثر خويه ،جا هيج تگطعين بينه ؟

ريحانة : جاي نشيل لبيت جديد وحالنه بالظيم ولا
وحده من الچنانين مخليها تمشي الاهلها

ضيرم : جا مو عدج مبايل خبريني انا اجيج

ريحانة : حتى لو تجي اعرفهم ما راح يرضون اجي
وياك

ضيرم : شني بكيفهم

ريحانة : هسه لا تصير عصبي مو هاي انا أجيت وضاله على گلبكم يومين بعد شتردون

ضيرم : على هاي گطعتج كون تضلين اسبوع بالقليل

ريحانة : يا ،يا وين يخلوني

ضيرم : خلِ يگومون بكيفهم ،جا شني مطيج الهم
فلاحه ملاجه .

بسرعه انگلب وصار نار ضايج لان ما يخلوها تجينه
ضالين بحسرة شوفتها ،وقبل اسبوع ضيرم حاجه
أمي عصبي لأن ما جايتنه وهسه عرف السبب من
عيالها صار نار كبره وأمي وريحانه بالگوه سكتنه وحلفت ما تگطع بعد وتجي واذا رادت تجي تخابره
هوَ يجيها

گمنا أنا وياها وطلعنه من الديوانيه ،طلعت للحوش
وأنا اباوع عليها ،هلگد روحها حزينه حتى بمشيتها
مو مستقيمه ....

تمشي ومبين الحجي الما حاجيته متعبها اكثر من
التنطق بي ،عفتها وطبيت جوه ،طلعتلي هدوم
وطبيت سبحت ،ماكو ساعه واندگ بابنه طلعت أمي
ورجعت بيدها سفريات ثنين متروسات اكل
وريحته ترست البيت ،أمي خلتهن بالمطبخ وركضت
ريحانة طلعت خاشوگه تاكل مغمضه عيونها مستلذه
بالطعم

نجوى : ولج راح تشبعين بالتنگش ،گعدن اخيجن
يأكل ويانه

_ هسه انا اگعده

مشيت للديوانيه فتحت الباب ،ورحت يمه اندهه فتح عيونه باوعلي ورجع غمض ،شنهاي ولا هادي
مبين بعده عصبي ..!!

رجعت اندهه واحجي
_ تتغده ويانه ؟

ضيرم : لا اكلوا بالعافيه

_ ماجعت هسه ؟

ضيرم : لا ،من اجوع اگلجن

_ خوش

طلعت من الديوانيه أحاجي أمي
_ يمه يگول ما يريد

نجوى : عوفنه براحته من يجوع انا اسويله ،خلن
الاكل بصينيه وتعالن نگعد بالحوش الجو حلو

_ جا رايحه اجيب حصير

مشيت صعدت فوگ طلعت حصير زغيره ونزلت لحگتهن بره
نجوى : افرشيها يم الخضره

فرشتها يم الخضره وخلينه الصينية وگعدنه وبين
السالفه والضحكه خلصنه الاكل
ريحانة : صدگ هيوفة طلعت من العمليات ؟

_ أي طلعت بس گالوا بعدها ما صايحه من البنج بس
هسه أكيد صحت

ريحانة : كون يطلعوها گبل لا امشي عاد اشوفها

_ بلكي الله تطلع

ريحانة : اذا ماكو اخلي واحد من الولد ياخذني للمستشفى ما اروح اذا ما اشوفها

نجوى : سولفتلنه چدتج على حالها يكسر الخاطر والله

ريحانة : ما تستاهل والله خطيه

نجوى : الحمدلله أهم شي طلعت بخير من العمليه

گمت ازگي الخضره وهنَّ يسولفن ،تذكرت عدي أمتحان وشلون امتحان فيزيه وانا شلون احبها من
العام ساحلتني ما ساحلتها...

عفتهن وطبيت جوه ،طلعت كتابي ودفتري وبديت
اقره ،ساعه تجر ساعه ولليل الا خلصت ،وبس خلصت دگيت رجل الا اروح لبيت جدي لبست عباتي
و وگفت الأمي الح عليها تاخذني
نجوى : جا مو الصبح اجيتي منهم ؟

_ ميخالف يمه جا غير عدهم شده ،ريحانة امشي
أنتِ هم

ريحانة : هاا

_ شبيج عيب من البنات يعرفن بيج جايه وما مشيتيلهن وهنَّ وحدهن حتى جده عافتهن

اقنع بيها بس اريدها تمشي وياي عاد امي تقبل تاخذني ،من حجيت هيج گالت
ريحانة : جا تانيني بس احضر روحي بسرعه

مشت لغرفتنه أنا وياها قبل
_ لا تتأخرين

گعدت مبتسمه وأمي تباوعلي وتخزر ،غلست ودرت
وجهي على باب الغرفة متانيتها شوي وطلعت عباتها بأيدها
ريحانة : كملت

نجوى : اوكفن البس عباتي

لبست عباتها واحت ،مشينه وبس وصلنه شفنه صخر
وعبد الحق واگفين بالباب مال بيت جدي،بس وصلنه قريب منهم وخروا من الباب واحنه طبينه
تلگتنه ميمنة من الباب بعدها يمهم وطارت من شافت
ريحانة
ميمنة : الگاطعه وينج كل اليتزوجن مثلج هيج يگطعن لو شنو ؟

ضحكت ريحانه تبرر الها
ريحانة : جا غير ماخذه عيال حكم فرعون مو مثل
حكمهم

ميمنة : الله يساعدج بس مو هيج صار خمس اشهر ما شايفينج

ريحانة : شسوي مو بيدي والله جا انا ما اكيف أجيكم بس بعد شجابرك على المر غير الأمر منه

فززنه من دگ باب الشارع وصاح
صخر : طبن جوه كملن سوالفچن

طبينه جوه بس گعدنه اجت جده من المستشفى حيلها رايح ومبين التعب عليها ومنا هيَ ولا نامت
من القلق ،بس شافت ريحانة بوستها تحجي
غضة : هلا بزينة البنوات ،ريحان حبوبة شلونج ؟

ريحانة : الحمدلله جده ،وأنتِ ؟

غضة : برحمة الباري

نجوى : بشرينه عمه شلونها هيوفة

غضة : بالظيم حالها يكسر باب الگلب ،عيوني عمت
من البجي عليها ،بس فكها البنج ما هدها الوجع
بعد تشيط لسابع سمه من وجع الحدايد برجلها.

نجوى : اوووف سودة عليَّ

ريحانة : ماعرفتي جده شوكت يطلعوها ؟

غضة : باجر يمكن

ريحانة : خوش عاد اشوفها گبل لا اروح

غضة : يا ليش شوكت تمشين ؟

ريحانة : الاثنين

غضة : يا شني طالبه اجازتج

ريحانة : شسوي جده

سكتت جده تباوعلها ما راضيه بس ما حجت بعد
وانا من شفت الأجواء ما تناسبني گمت مشيت يم
جفون ،فتحت باب الغرفة وطبيت هزيت أيدي من
شفتها نايمه ،جا شبيه انا طنطل باجر دوامنه
صباحي انا وهيَ وبعدني گاعده ،غميتها وطلعت هسه انا شلون بيه ويامن اسولف ....

گعدت بصف غاية ادردم براسها اخير شي ملت وسدت حلگي خلتني ارافس
غاية : بس شوي اسكتي بداعة ست بيداء

عضيتها من ايدها خزرتني موجوعه
غاية : شبيج مجلوبة ؟

_ جا ما لگيتي غير ست بيداء تلحفيني بيها ؟

غاية : ولي

ضحكت وجريت خدودها
_ شبيج ما تتحملين شقه

غاية : لا والله بس تعبانه ومنا الفلاونزه اليوم مسيره عليَّ وانا باجر عدي أمتحان

_ اشربي دوه

غاية : جابلي صخر وشربت بس ما فاد تعرفيني من اطيح فلاونزه شهر اضل طايح حضي

_ حشاه

عگدت حاجبها مافاهمه
غاية : منو ؟

_ حضج

غاية : امداج تافهه

ضحكت وگمت رجعت يم أمي وجده ،وعلى جهه
گاعدات ريحانه وميمنه يسولفن عاد تلاگن مبين محملات طن واطنان سوالف ،ماكو ساعة وأمي گالت امشن ،وانا هم الله هداني نعست بس رجعنه حطيت رأسي ونمت وگعدت الصبح على صوت أمي تگعدني
گمت بالگوه اسحل بروحي سحل غسلت
وجهي وگعدت بالمطبخ مطنگره ،فات مني عزيز....

عزيز : هاي أنتِ كل يوم هيج تجيج الطنگوره ويا
الصباحي لو شني ؟

نجوى : أي يمه بس بالصبحي هيج ،تاخذلها ربع
ساعه يالله تفك

اجه فقار يباوع عليَّ ويضحك
فقار : خاف ماكله لحم يمه ؟

عزيز : مال مطاية مو ؟

فقار : أي

عزيز : انا هم شاك

ضحكت أمي وانا أخزر بيهم ،گمت ضايجه مشيت
للغرفة بدلت وطلعت اتريگ بيدي كتابي اراجع
امتحاني اول درس
عزيز : شني امتحانج ؟

شربت من الجاي وعيني بالكتاب
_ العكره الماتنحب ،فيزيه

عزيز : بس اسمها يسوي جالي

_ أي والله

عزيز : ما ترحين لدكتورنه يقريج ؟

_ لا يمه شبيه ما رايده روحي ،جا غير اذا اجاوبه
غلط يجيبني بكفخه يخليني تصير بيَّ روطه

عزيز : والله خوش يفهم

_ لازم كفخاته خلنك تصير محامي

عزيز : لسانج الله يعينج عليه ،لان راح انا اجيبج
بكفخه اذا ما ضميتي

گمت من الصينيه اسوي روحي ضايجه
_ خوب أنتم حيره شنحجي وياكم ،لا نشاقه ولا نسكت ولا نحجي مادري شتردون العجب ما يعجبكم

عزيز : اهفج بالگلاص

صاح من الديوان
ضيرم : كافي عزيز عوفها جاهله

دگيت رجلي بالگاع شگد اضوج من كلمة جاهله عفتهم ضايجه مزاجي خربوه اريد اتعارك حتى ويا
الحايط طبيت لغرفتي طلعت عباتي لبستها وشلت الجنطه والكتاب وطلعت للخطط من سمعت صوت الهورن مالته ...

صعدت بصف جفون ساكته ورقية وراي تندس بيَّ
تريد احاجيها ،درت وجهي عليها
رقية : شبيج مطنگره ؟

_ غثوني من الصبح

رقية : منو ؟

_ عزيز الشايف روحه

ضحكت خنسه
رقية : أول مرة أسمع وحده تحجي على اخوها

_ انا لان كلش شايف روووحه

رقية : اذنييي اريدها

درت وجهي منها ،وبس وصلنه نزلنه بوجهنه نتراكض للصفوف اليوم اول أمتحان من أمتحانات الشهر الثاني مادري شعجب هل سنه متأخرين العام گبل
هيج وكت بدينه بالشهر الثاني ،بس يالله بعد احسن
عاد نضبط المواد ولو غاسله ايدي من الثالث انا ...

أول ما طبيت طبت وراي ست بيداء المكرهتني بالفيزياء ،صاحت طلعن الأوراق بسرعه ،انا محضره
ورقتي من البيت طلعتها من الكتاب بسرعه وگعدت
عيني على السبوره...

افترت تشوف الوضع ،من شافت ورقتي گدامي وحتى الاسم مكتوب عليها ،شالتها گلبت بيها ورجعتها ،من خلصت راحت للسبوره تكتب الاسأله
وأنا وياها وياها احل ومكيفه أجوبتي تقريباً صح

بس كملت راجعت وسلمتها الورقة ورجعت بمكاني
وبس خلص الدرس الاول بده درس العربي الي هوَ
بالاصل درس الفيزياء بس صار تبادل ...

وبس دگ جرص الفرصه خلص درس العربي وطلعنه ورا المدرسه هاجات من الصفوف ،وانا لان حضي
فگر اليوم ومزاجي حلو طلعن بوجهي بنات بيت غازي ،مشيت عاكسه طريقي اتجنب المشاكل بس مبين هنَّ ناوياتها.

انداريت عليهن من سمعت وحده منهن تگول
_ اخوج الصوبه أخوي شلون صار ؟

واگفات ثنينهن يباوعلي وانا كلش زين اعرف هاي مو نبرة سؤال شني ميتات علينه ويسألن ،هاي جايات يتشمتن ويردني احطهن واكتلهن بس تعوذت الشيطان ومشيت اعوفهن بس ما عافني بحالي ويَّ الحله شفتهن واگفات يباوعن عليَّ ومادري شنو يحجن ويأشرن لصديقاتهن ،ومن فتت منهن وسمعت
الحجي ماضل عقل براسي ...

جريتهن اثنينهن من شالاتهن اسحل بيهن واحجي محترگ دمي
_ منو الجبناء ،احنه لو أنتم السادين موكبكم من الخوف من ولدنه

وهنَّ بأيدي مثل النعجات ،جفون اجت تركض هي ورقية من شافني اكفخ بيهن هدن وياي استلمن وحده وانا وحده والله نسيناهن دربهن ،أخر شي جبتها هاي
الحجت براچدي فريت وجهه وركضت للخط أصعد
اللهث وجفون صعدت حالها بالضيم كلها تراب انا
اشوه منها ورقية حتى جنطتها متربه لان شمرتها بالگاع
رقية : باجر ننفصل والله

_ وفصلتهم جا نخليها تحجي بكيفها

جفون : والله أريد ارجعلهن اطيح حضهن بعد

صديقتنه ورانه حجت
_ جا أنتن شبقيتن بيهن ،والله گلت راح يموتن بأيدچن

جفون : انا أجيت احط طابوگه براسها هاي الادبسزز النايمه بالثاني بس تعوذت الشيطان لا تموت وابتلي

_ حرامات لو اموتتها عاد احنه مفصولات مفصولات كون ننفصل على شي يسوى

رقية : خايبات اسكتن جا واهلنه هسه شراح يخلصنه منهم

_ والله اذا همَ يقبلون الحجاية على روحهم انا ما اقبلها

ضلينه نسولف وبس وصلنه لبيوتنه قررت ما اضم وأمشي اسولف لضيرم خاف لا صدگ بأجر انفصل لان اكيد هسه المديره عرفت بعركتنه ...

بس طبيت للبيت بوجهي للديوانيه ،دگيت الباب
وطبيت لگيته کاعد هوَ وعزيز ،خزرني بس شافني وانا غلست ومشيت يم ضيرم
بس شافني عرف وراي مصيبه
ضيرم : يا ستار ياربي، شمسوية ولج ؟ ... 


تعليقات