رواية خلخال مشوه الفصل الخامس 5 بقلم زمرده

 



رواية خلخال مشوه الفصل الخامس بقلم زمرده



بعَد هذا الضيَاع منيّن
أريَد ابدي
حلِم عميَان حلميَ مو
حلِم ورَدي

•---∞∞∞∞∞∞∞---•

خليت جنطتي بالگاع
_ بسم الله ليش هيج تأخذ خطيتي

ضيرم : ياخطيتج جا غير هاي طبتج حافضها وراها مصيبة گولي شمسوية ؟

_ ما مسوية شي بس تعاركنه ويَّ بنات بيت غازي

صفن يباوعلي هز رأسه بجزع
ضيرم : منيلج هاي الصلافه ؟

_ جا غير أجيت اگلك ،عمي حرنه نحجيلكم ما ترضون ضيمينه عليكم تقومون القيامه على راسنه

عزيز : باع باع ،تلومني وياها لسانها أطول منها

ضيرم : اسكت عزيز خلني اعرف شصاير ،احجي ؟

بديت احجيله كلشي من الفرصه شلون تحارشن بيَّ وشحجن بالحله وشلون كتلناهن ،بس خلصت حجي
ضرب على رجله فاير

ضيرم : لو مدمياتهن

عزيز : شسالفه ضيرم ؟

ضيرم : جا ما سمعت شيحجن

_ يعني عادي كتلناهن

باوعلي ساكت وانا صافنه بوجهه
ضيرم : طلعي

ماحجيت شي وطلعت ،بس طبيت للصاله شافني أمي وريحانة
ريحانة : يا شني هاي ولج شبيج ؟

نزعت عباتي احجي
_ تعاركنا أحنه وبنات غازي غازات

لطمت على خدها ما راضيه وأجت جرتني من أذني
من وره الشال
نجوى : ما توبين من بنات غازي أنتِ ؟

_ لا والله فلا اتوب ،جا شني اخليهن يحجن بكيفهن

نجوى : شيحجن ؟

حجيتلها منفعله وبس خلصت كلامي گالت
نجوى : لو لابستهن هسه راح تزيد مصيبتنه ،فوگ
الاحنه بي راح نتصخم بالزايد

_ شني يمه تردين اسمعهن يحجن علينه لا والف
لا ولااسكت

نجوى : ضلي يوميا طلابة وياهن

ماحجيت شي ومشيت للغرفة بدلت وطلعت گعدت
يم ريحانة گاعده تثرم سبيناغ
_ ميته من الجوع وبعدجن لهسه ما مسويات الغده

نجوى : گومي گليلج طماطه واكلي

مددت أرد عليها
_ وين بيَّ حيل

نجوى : يايمه من عچزج

کامت گلتلي طماطه وجابتها گعدت اكلت وبس كملت اخذت الصينه وديتها للمطبخ بس شافتني صاحت
نجوى : عاد اغسلي الطاوه

_ هيَ طاوه أنتِ اغسليها يمه انا تعبانه

هزت أيدها ما راضيه استسلمت وانا غسلتها وغسلت ومشيت للغرفة شمرت روحي بالفراش رأسي
يريد يطگ ما شبعانه نوم هستوني أريد اغفى وأجتني ريحانة تريد نمشي لبيت جدي راح تجي هيوفة من المستشفى ...

°هيوفة °

ماده أيدي للممرضه تفتح المغذي والدكتور واگف
يم راسي يطي تعليمات وانا أحس من ثگل رجلي
اريد اموت بس فتحت المغذي من الكانونه طلعت
والدكتور بس خلص حجيه هم مشى ...

أجت امي عدلتلي الشال ولبستني عباتي وشالني
ليث خلاني بالكرسي أمي شايله الغراض
وليث يدفع بيَّ بس طلعنه شفتهم كلهم بالحديقه
واگفين متانينه بأصعب حال ودورته بينهم بس ماكو وين يگدر يجي وهوَ صوابه ما طايب

أبوي أجاني گعد گبالي يحجي وياي
محمد : هيفاء بويه شلونج خوما متوجعه ؟

_ الحمدلله بويه

محمد : سوده عليَّ يابويه ريت وجعج بيَّ

_ أسم الله عليك بويه لاتحجي هيج

محمد : شوفتج بهل حال كأسره گلبي والله

عبد الحق : گول يالله عمي هاي اخيتنه گدامك سالمه طلعت من العملية وهذا اهم شي

فقار : ولج ركضتينه والله

برهان : انا هديت الواجب وأجيت خلتنه ما نندل دربنه

أبتسمت وعيوني لمعت بالدموع تمنيته وياهم هسه واگف ويگلي "سطرتينه" حجاياته حافضتهن انا حافضه كل حرف ينطق بي لسانه دنگت رأسي من
شافوني اريد ابجي انخبصوا عبالهم بيَّ شي ما يدرون شگد متمنيته وياهم هسه ...

محمد : شبيج بويه ،يوجعج شي احجيلي ؟

تحجحت ب رجلي وانا وجع گلبي اقوى من وجعها
دفعني ليث يوصلني للسياره فتح الباب وشالني
خلاني وره وأمي بصفي وأبوي بالصدر وهوَ صعد يسوق حرك و ولد عمي ورانه بسيارتهم
بس وصلنه للقريه نزلني ليث ورجعني بالكرسي ،تلگاني جدي و عمامي ومن بينهم لمعت
عيوني من شفته واگف يم الباب وأيده على مكان
عمليته يباوع عليَّ ،أي والله جاي يباوعلي ...

بس نضراته مو الاتمناهن نضرة استعطاف على وضعي لا اكثر ولا اقل ...!!

دنگت رأسي ودفعني ليث يم الباب ذبحوا طلي يم رجلي وطببني ليث جوه ،وبس وصلت لباب المطبخ أبتسمت من شفتهن كلهن ملتمات تلگني حتى ريحانة
يبوسن بيَّ والقهر على وضعي بعيونهن من بينهن ماشفتها درت وجهي ادورها واگفه يم باب المطبخ
تبجي وتمسح بعيونها ،أشرت الها تجي اجتني حضنتني وبجت بصوت عالي وانا أطمنها انا رجعت
بس هي ماتقبل تصدگ هاي انا بخير وطلعت منها
بسلامه
زهرة : كافي يمه جفون ،كافي بعد عمتج عيوناتج
راحن

وخرت مني تباوع على رجلي أبتسمت احجي وياها
_ كافي بجيتي اكثر مني ،هايَ انا رجعت وكلشي
ما صارلي

هزت رأسها ب أي ودفعتني تطبنني جوه وجده وراها
تهوس بشيلتها
غضة : هلا بيج هلا ،وبجيتج هلا ،يمه هلا بريشة بيتنه ،يمه هلا بعزيزة جدتها

ضحكت اباوعلها شلون واگفه تهوس وفرحانه ،ساعدني انزل من الكرسي على فراشي الفارشاته بالصاله
مددت مرجعه ضهري واباوعلهن مخبوصات وصوت
الولد بالحوش مخبوصين يردون يوزعون الذبيحه
لان جده ناذره توزعها للفقره ...

جده گاعده بصفي وكلساع سألتني
غضة : خوما موجعه ياحبوبة ؟

وأنا حتى لو موجوعه ما أريد اقلقها حتى لو أحس
بوجع اگلها لا ،بس ما دامت النه ،ولا عدت لمتنه بخير ،انگلب كلشي بمرشة عين ويا صوت الجيلات
الهلت علينه مثل المطر

°غاية°

ملتمات بالمطبخ والولد بره يگطعون اللحم وهلت
علينه الجيلات ربدت جام الشباك والباب
ويَّ صوت الجيلات صوت عياطنه صار ماله والي عشنه رعب بهذا الوكت،والولد بره طلعوا يركضون واحنه هنا گلوبنه وگعت كلنه گاعدات بالگاع لا البينه گدرت تمشي ولا الوگفت من الخوف لا تطيح بينه
جيله بعد ما تحركنه

صياحهم بره هرج القرية ،و ولدنه لهنا نسمع صوتهم
شلون مفرفحه گلوبهم عرفوهم هذولِ بيت غازي
دگونه ،طب ضيرم بالحوش شايطه اعصابه يصيح طب وراه صخر يسكته لا تطگ عمليته..

رفعت رأسي اباوع من الشباك الما بقت بي ولا جامه
سالمه ،المطبخ بعيد على باب الشارع بس لان هواي
رموا لهنا وصلت جيلاتهم

ضيرم : والله اذا ما حميت چيلاتهم وبيدهم خليتهن
فلا أتسمه من أحفاد رأجس

صخر : هيد منا صوابك كافي تگمزز على رأسنه

ضيرم : جا عبالك راح اعديهن ،وحده وحده من عيونهم اطلعهن وبنفس مكان صوابي اصوبهم مو أنا ألاسكت عن حگي

صخر : جا هوَ منو گايلك اسكت بس غير نخاف عليك

ضيرم : عرچ ما يصيبني بس هدوني الهم

سكت صخر يباوعله وما أعرف شعجب ساكت كل مرة هوَ وضيرم يگمز ،بس جن اكو شي برأسه ..!!

طب جدي يمشي بكل حزم وطبوا وراه الولد وعمامي وگفتهم هاي اكبر مكيده لبيت غازي ال
عبود
رأجس : بيت غازي شنوا على روحهم ،وهاي طبتهم لقرية رأجس ال غضب تدفعوهم حگها موش بالرخيص .

وكلهم فد صوت ردوا
_ تأمر

أباوع عليهم و وشوش عليَّ صوت الجام ميمنة جاي
تلم بي ،اجت جده تتجى على عوجيتها ،باوعت على الگاع تحجي على بيت غازي
غضة : يمن كون لا وفقكم الله على هل طرگاعه هاي

شيماء : والله گلوبنه طاحت ،الله تفضل علينه وما طاحت جيله بواحد

زهرة : أي والله ما أعرف شلون الله سترنه

غضة : الحمدلله ، عينج حبوبة ميمنة لا تتعورين

ميمنة : صار جده

طلعت حانيه ضهرها بتعب ،باوعت على الولد وچن
بعيونها تحسبهم ،وبس شافتهم كلهم واگفين داير مداير جدي دارت وجهه وطبت تحمد الله همَ بخير
بدون ما تدخل بكلشي راح يسوّنه ببيت غازي ..!!!

أنا عيوني متعلگه يمهم ،بنص تخطيطهم صاح جدي
يحاجي بصخر
رأجس : أريد تدبرلي عشر تفگات ،ساعه واريدنهن
هنا .

صخر : صار تأمر

رأجس : ليلهم تگلبوه صبح ،أريدن صوت الجيلات يوصل للقرية ،ندموهم على الساعة الطبوا بيها القرية غفل .

ومنا ولدنه گلبهم موجر من بيت غازي گبل هوسوا
لحجي جدي وتحزموا حزام يحسبون ساعة ساعة وچن هاي احلى ليلة عدهم من شال كل واحد بيهم
التفگه وتحزموا بالحوش واگفين وجدي يحجي وياهم
رأجس : اذا ما تزرفون بيوتهم بالجيلات لا تردولي

صخر : افااا جدي ،احنه الها

فقار : اذا ما شردناهم ما نتسمى عگاب ألراجس

عزيز : ننسجن وانا اطلعكم

نوح : جا شني تضحك علينه غير راح تنسجن ويانه

عزيز : صح نسيت

ضحكوا همَ الاثنين ولا چن رايحين يدگون عدهم مثل الزلاطه واحنه هنا گلوبنة واگعه ولطم عماتي وأمي صاير بفلس
زهرة : انا على ساعة اموت من فواينهم

شيماء : هاا اهااا راح يروحون بيها الولد هل طلعوا

نجوى : راحوا ولدي حتى المصوب وياهم ،شحجي
عليك عمي تذبهم يوميا بداهيه

زهرة : غير گلنة نحلها عشاير ،لا يردوها الا وحده بوحده

غضة : ما تسكتن چنچن ططاوي ،زلام همَ ،يردون
الجيله بعشره تردن يگعدون هنا حالهم من حالجن

سكتن من عاطت بيهن جده ،كلهم مشوا بس جدي ضل
گاعدلهم بالحوش،ماكو ربع ساعة وارجت القرية بصوت الجيلات ،الرعب ترس گلوبنه بهل ساعة
وجدي ضحك وگام على حيله يباوع على الجيلات
اليخطفن بالسمه من قريتنه ...

رأجس : عگاب ،والله عگاب ،رفعة رأسي ماضع التعب بيكم

درت وجهي على عماتي يتراجفن وخوب أمي حلگها يابس ،ركضت جبت حباية السكر الها ،شربتها وتنادي

زهرة : نادي علياً مُظهر العجائب ،تجدهُ عوناً لك في
الشدائد ،دخيلك ياعلي ،دخيلك يا أبو الحسنين أحفضهم وردهم النه سالمين .

رجعت اباوع من الشباك من سمعت صوتهم طبوا رافعين جيلاتهم بكل فخر رموا وچن جاي يوصلون
رساله ،احنه الدگيناكم ..!!

لموا السلاح صخر وعبد الحق ،واخذوهن يضموهن ببيت عمي يوسف خاف لا تجي الشرطه
باقر : وهاي دگوهم بويه ،احجيلنه المشكله هسه كبرت ما زغرت وحتى على جعفر راح يعاندون اكثر

رأجس : حگنه هذا ،الدگونه بالاول همَ أحنه ما عايلين

محمد : والله انا فلا قابل بس شأحجي ،نگدر نوديلهم گوامه ونفضها مو نرجع ندگهم

رأجس : جا هاي زلامي المن رأيدهم اذا ما رادوا الجيله بدم

محمد : جا اذا نضل هيج زلامك تروح بيها ،حالهم
حال ذاك المسجون

رأجس : كافي اسكتوا .

سكتوا عمي باقر وأبوي ،والولد ولا چن سمعوا حجي أبوي وعمي كل همهم جدي وياهم وساندهم ...

وخرت من الشباك من شافني صخر وخزرني يأشرلي
وخري ،گعدت يم حواري مرجعه ضهرها على الحايط
ومغمضه عيونها ندستها ،فتحت عيونها باوعتلي
ورجعت غمضت
_ شبيج ؟

حواري : مابيَّ شي ،بس نعسانه ما نمت

_ انا اليوم رجلي فد نوب مو زينة ،بس امتحنت
اجه نوح اخذني عبالي ارتاح تالي خوش أرتاحيت

أجت بركة گعدت يمنه
بركة : جا أنا هم بس بدلت هدوم المدرسة أجيت هنا لان ملتمين
ضحكت تكمل
بركة : شلون لمة كلها جيلات

_ انا گلت خطية اعوفنها وحدها

بركة : جا صدگ ما گتيلي راح تطلعين عاد اطلع وياج

_ نسيت والله فكري كله جان بالامتحان

سكتنه من اندگ باب المطبخ ولان انا گاعده بصفه گمت فتحته
ليث : حضرن العشه فطسنه من الجوع

زهرة : صار يمه ،ساعة زمان والعشه كامل

گامن ميمنة وريحانة وبصائر يسون العشه وأمي وياهن تگلهن شيسوّن ،هم زين ما گومتنه وضلينه گاعدات والا جان حواري ماتت كلشي ولا الشغل
بسرعه غمضت عيونها من گال ليث عشه خاف لا
أحد يحشمها ...

گمت امشي اشوف هيوفة ،من خبصتنه حتى نسيتها
بس طبيت الصاله شفتها متمدده ويمها جده وجفون
گاعدات وهيَ تحجي ويَّ جفون
جفون : هاي غاية رايه أجتج .

گعدت بصفها اضربها على جتفها
_ كافي يوميا لقب جديد، شنو سالفتج ويَّ أسمي ؟

جفون : جا بس انا يلقبوني رموش ،خليج وياي غاية رايه

_ أسمي هيبه ،هيييبه

جفون : وانا اسمي جفون ،لا هوَ چفن ولا گبر

ضحكت وباوعت على هيوفة اسألها
_ شلونها رجلج ؟

هيوفة : توجعني كلش بس ساكته

_ شلون ما توجعج على هل حدايد البيها

هيوفة : جا شسوي ،الولد وين ؟

_ بالديوان طبوا ،جاي يسون عشه هسه الهم

هيوفة : والله ما متت بالعمليه راح اموت من الخوف

غضة : ما تسكتين ،أسم الله من سيرة الموت

ضحكت هيوفة بس كلامها مبين عليها شگد متوجعه
بس ما تريد تقلقنه ،بس تعشينه وشربوا الجاي
تعالت الأصوات بره دازيلنه گوامه ...!

ركضت طلعت الاستكاين مال خطار ويمي ميمنة تترس شكر بالعلبة ،طب نوح يأخذ الماي لزمته أمي
تحاجي
زهرة : ولك يمه نوح شكو منو ذولِ ؟

اطته ريحانة الماي واندار يحجي الامي بسرعه
نوح : ناس من عشيرتهم وغير عشاير ،اجوا مگاومينه لان راميهم

زهرة : أي

نوح : جدي گالهم همَ رمونه بالاول ،طلع جايّن وما يعرفون موش احنه البدينه

زهرة : يااا وشراح يصير ؟

نوح : ما أعرف ،ماشي اودي الماي ،لا تتأخرن بالجاي

طلع وانا مشيت اغسل الاستكاين وبصائر تاخذهن مني تخليهن بالصينيه وميمنة تخليلهن شكر
وصوت صياحهم گب بالديوان بس لان الصوت مو
قريب ما نعرف على شنو الا من طب نوح يأخذ الجاي سألناه شكو گال
نوح : يردون يصالحونه وياهم والولد ما يرضون وجدي وياهم بس عمامي راضين بالصلح

زهرة : ياا يااا وليش ما يرضون

نوح : أحسن جا شني عگب ما دگونه نصالح وياهم لا والف لا

زهرة : ضلوا ،ضلوا هيج يوميا طلابة

نوح : جا يمه تدرين شني يگولون يطوكم مرة وأنتم هم اخذوا منهم مرة وهيج عود تفض مشاكلكم

زهرة : شني لا يمه ،شبينه مخابيل ونطي لبيت غازي

نوح : غير على هاي الولد يگمزون وما راضين

زهرة : حگهم، زين يسوون

اخذ الجاي من كملته ميمنة ومشى راجع للديوان
مشى الوكت والگعده طولت ونتيجة ماكو بعدهم ولدنه راكبين راسهم وبس مشوا ،طبوا من باب المطبخ وعمامي يحجون عليهم وجدي ساكت مخليهم بكيفهم
صخر : والله أيدي بأيدهم ما احطها ،انا اتصالح ويَّ بيت غازي والله حسافه اسالمهم

محمد : محمل عليك انا والله بالگوه كاض ايدي منك
نوصل للصلح وتگمز أنتَ وهذا أبو گمزة

ضيرم : جا تريد تطيهم مرة ،احنه نطي لبيت غازي مرة شني تخبلنه ونرضه

محمد : وحده بوحده

عبد الحق : والله انا خواتي لحد يوصلهن

محمد : اها ؟

عبد الحق :أي والله عمي شني مخبل واطيهم ميمنة لو بركة الجاهل ،اعذروني خواتي خط أحمر

ضيرم : وانا حواري لا أحد يگرب صوبها لان اتخبل
عليكم

محمد : والله من كون صدگ اطي حواري ونفك من مشاكلها

استغربت من حجيهم ،انداريت اباوع على حواري لگيتها وجهه صاير اصفر تباوعلهم بخوف وعلى جهه
جفون تطگطگ ،درت عيوني منهن مستغربة
مسويات شي ذني الاثنين ...!!

عبد الحق : جا همَ زلم لو نعل يطلعون وره نسوان

ضيرم : والله يستاهلن وزين ما سوون من كتلنهن.

محمد : هاا يعني أنتَ تعرف ؟

ضيرم : أي وعاشت ايدهن لان ما خلننهن ياكل تبن
زايد

اندار أبوي يحاجي عمي
محمد : شلون ويَّ أبنك بااااقر على ساعة ابتلي بي

باقر : ايدك الك وياه

باوع ضيرم لجدي ،وجدي نزل على أبوي وعمي دوسه ونص ما راضي شني يحجون ويَّ ضيرم حفيده اليطرب على المشاكل وهوَ يتباهه بي مكيف
على عصبيته ولا يوم حجه وگاله لا تعارك
دوم يگله اكتل وانا افصل وعمي وأبوي شايطين من
جدي وما بيدهم شي ...

گمت اطب للصاله اشوف هيوفة ،الولد يردون يطبون
جوه ،باوعت لفراشها فارغ

_ جا وين هيوفة ؟

غضة : طببتها ميمنة للغرفة .

مشيت للغرفة ،فتحت الباب وباوعت عليها گاعده
ومادة رجليها وميمنة يمها تطيها دواها
سديت الباب وگعدت يمهن عايشات بغير جو ولا چن بره اكو هوسة

ميمنة : تنامين ؟

هيوفة : لا وين اگدر ومنا صوتهم

ميمنة : اطلع اسكتهم الج

ضحكت هيوفة تهز رأسها ب لا ،گمت جبت جنطتني
وگعدت يمهن اقره تحاظير باجر عدي أدب واسلامية هم زين مو هواي لان كلش مالي خلگ ولا الجو
يساعد للدراسه ...

رفعت رأسي على صوتهن من طبن للغرفة يدردمن
جفون : والله يالله عمي محمد مسوينه دوشگ
مال رزايل يرزل الرايح والجاي ،هاي فوگ ما كتلناهن لان يحجن عليهم بس والله مو صوجهم

حواري : صوجنه احنى لوگيات

طبت وراهن بصائر تحجي لان عايفاتها وحدها بالمطبخ
بصائر : شني شو عفتني وحدي ؟

جفون : اعذريني عدي امتحان وباجر صبحي

حواري : وانا علاقتي موزينه ويا المواعين دوم اكسر بيهن

بصائر : شگد خايسات وچايفات

مشت ضايجه تدردم وهنَّ ولا چنهن گعدن يسولفن الميمنة وهيوفة شلون كتلن بنات غازي وبس خلصن
حجي گالتهلن
ميمنة : وباچر تداومون ؟

حواري : شني ترديني أضم روحي ،خايفة من بنات
غازي غازات

ميمنة : شتحجين وياهن بالله

هيوفة : أخوها منو أبو گمزه طالعه عليه

شمرت القلم ضايجه
_ شلون يعني ما نقره ؟

حواري : وسم الهاري لو جاي بوجهي

_ شني ما عدچن دروس ؟

جفون : انا كلشي ماعدي

ميمنة : جا مو عدج امتحان ؟

ضحكت تحرك بحواجبهه ،مبين چذبت على بصائر
وشردت
حواري : انا عدي بس تحضير كيميه

_ جا إسكتن خلني ادرس وانام

حواري : هاي عود أنتِ ضهري ،جا احنه اهل الصباحي ما نريد انام

_ ماريد امشي للمدرسه مسطوره

ضلن گاعدات يمي منا لمن صاحت مرة عمي باقر على حواري واخذتها هيَ وريحانه ومشن ،ميمنة ما راحت ضلت يمنه و جفون فرشت فراشها ومددت ماكو شوي ونامت وانا بس
كملت گمت طلعت بره اشوف الوضع ،لگيتهم بعدهم
گاعدين بالصاله وكل واحد بيده گلاص الجاي
مشيت للمطبخ بس طبيت باوعت عليها مقهوره وحدها تفتر وهيَ منا مشلوع گلبها هل يومين ويانه

وگفت وراها احجي
_ تعبانج هواي

اندارتلي هزت رأسها ب لا تجلف بالطباخ
ميمنة : ياتعب يمعوده ،أهم شي سلامة هيفاء والولد

_ أي والله ،اساعدج بشي ؟

ميمنة : لا كلشي كملت روحي نامي وراج دوام

_ ما نعسانه

ميمنة : هيوفة نامت ؟

_ أي

ميمنة : لوما الدوه فلا جان نامت ،أبرة المسكن الضربتها الها قوية

_ اگول نامت مثل الجثه

ميمنة : اسم الله

_ يا شبيج گلت مثل مثل

ميمنة : أي لا تضربين امثال

_ امشي احسلي وأنتِ ضلي هنا وحدج

ميمنة : جا شني شلون شفتيني اخافن أضل وحدي

_ اها

ميمنة : أي والله ،روحي روحي

شحتتني من المطبخ ،طلعت وهيَ ضلت تكمل شغلها انقهرت هواي جاي نتعبها بس مانگدر نقصر ويَّ
دراستنه ،طبيت للغرفة حضرت هدومي ومديت فراشي وبس مددت مادري شلون بسرعه غفيت،گعدت على صوتها تندهني وتجر البطانيه مني

ميمنة : ولج شلعتي گلبي گومي

گمت اتثاوب ،باوعت للساعة ومن شفتها هستوها بثمانيه شطت من القهر
_ بثامنيييه شكو مگعدتني ؟

ميمنة : وخرس لهل صوت راح تگعدين هيفاء

_ عليج الله مو تعرفين ضهري ،ليش گعدتيني ؟

ميمنة : جا غير أريد انضف گعدتج وياي

_ وانا وين اگدر انضف منا رجلي متعوقة

ميمنة : جا اگعد جفون الخايسه

_ ليش ما تانيتيني من أجي ؟

ميمنة : على ساعة الساعة جاينه أحد وأنتِ والعصر الا تجين ،فضيها وأمشي بلا لغوة

نترت بيَّ وراحت ،وانا مشيت وراها ادردم
_ فوگ حگه دگه

ميمنة : تريگي بين ما انا اعچن وصميلي هل حلگ
هذا

طبيت ورها للمطبخ حميت الجاي وصبيت بگلاص
ومن العجز طلعت چبن وصمون جايبين للريوگ وگعدت اكل وهيَ گبالي تنخل ،بس كملت گامت جابت چدر الماي مدفيته وگعدت تعچن بكل سهوله
مثلي بالضبط يعني ...

ضحكت من شافتني اباوعلها بكل تركيز
ميمنة : شبيج هلگد مركزه ؟

أبتسمت اخلي لگمة بحلگي واحجي وياها
_ اقوى طموحاتي هاي فرة العجين مثلج أنتِ وهيوفة

باوعتلي ورجعت دنگت تعجن وبأبتسامه تحجي وياي
ميمنة : هاي فرة العجينة تتعلميها كل ما عجنتي هواي ومر وكت وأنتِ تخبزين

_ انا على الاصابع ينعدن المرات العجنت بيهن .

ميمنة : شوفيني صار فوگ العشر سنين انا اخبز

_ من جنت انا جاهل

غطت المعجنه بالصينيه وردت عليَّ
ميمنة : من خبزت أول مره عمة زهرة جانت يمنه وعلمتني شلون أطب الخبزه بالتنور ومنها صار اكثر شئ احبه الخبز

_ بس مو يتعب ؟

ميمنة : قبل جنت هواي اتعب بس هسه لا اشوفنه شي عادي حاله حال الكنس والمسح

_ اممم

غسلت ايدها على المغسله واندارتلي
ميمنة : اذا نضل نحجي تروحين للمدرسة وبعدنا ما منضفات

شربت اخر شي من الجاي
_ خلصت

گمت وشلت صينيتي خليتها على السنك وطلعت وياها هيَ استلمت المضيف وانا الحوش رشيته وكنسته وطيح حضي اوراق النبگه تارسات الگاع
على ما خلصت الحوش خلصت روحي ،وانداريت
على صوتها وراي تحجي
ميمنة : خلصتي ؟

هزيت رأسي ب أي
_ حلگي انشگ

ميمنة : حشاج

طبينه سوه للبيت هيَ كنست وانا حطيت سطلة المسح امسح ،وبس خلصت ركضت للحمام اسبح
ومن طلعت لگيتها تشنگ
_ راح تخبزين ؟

ميمنة : أي اختمر العجين

زهرة : يطيج العافيه ياعمه هواي جاي نتعبج

ميمنة : صدگ چذب عمه احسبيني هيوفة وجاي تشتغل

زهرة : بعد روحي ياميمنة

ميمنة : سالمه روحج عمه

شالت صينيه الشناگات
ميمنة : راح اخبز ماضل وكت للغده

زهرة : عاشت ايدج

أبتسمت وطلعت وانا ركضت بدلت وطلعت شايله جنطتي بأيدي ،وبس صعدت بالخط بصفها ندستني
بركة : رجعولنه أختي تبهذلنه بلاها

_ انجبي جا احنه شلون بينه

بركة : جا انا انكربت كراب الله وكيلج

_ حركي روحج شويَ ،حسي بتعب ميمنة وياكم

بركة : جنت اگلها شمسوية ،وشني تعبانه ،هسه حسيت بيها والله

غميتها وانداريت اباوع للشارع ،ومن وصلنه نزلت أنا وبركة نمشي براحتنه لان بعد ما داگ الجرس
وبس دگ ركضنه كل وحدها لصفها ،انا للخامس وهيَ
للرابع ،اول درس جان عدي اسلامية والحمدلله
گومتني بالسوره ،قريتها كلها وركزت ويَّ الدفتر بأيدها خلتلي خمس درجات كاملات ،أبتسمت مرتاحه وگعدت وهيج خلص أول درس ،ومثل ما
توقعت بنات بيت غازي المزروعات بكل مدرسه ما
راح يعوفنه بحالنه ...!!

لزمت بركة اجرها ما أريد تتواجه وياهن وهيَ بأيدي تگمز
_ كاااافي عوفيهن ،مو تعرفين متقصدات يعلين

بركة : هدينييي

_جا انا مو كل مره اهد وياج بس هسه مو وكتها

بركة : اذا ما اجفص ببطونهن ما ارتاح

_تكبر المشاكل شبيج ما تفتهمين ؟

تأفأفت ضايجه وگعدت على الرحله
بركة : بس والله اذا تحارشن بيَّ بعد مرة اشگ حلوگهن الخايسه

_ وانا وياج اذا عالن بعد حضهن نطيحه

سكتت تباوعلهن بخزره وهنَّ يتبسبسن ،انا كل مره اشغل ايدي عليهن اشبعهن تكفخ بس هل مره جاي انعل الشيطان واسكت ما اريد تكبر ما تزغر المشاكل بسببنه ...

من صارت الحله درت وجهي منهن وطلعت بسرعه اجرحر ببركه لان بالگوه لازمتها منهن ،وبالاصل انا بالگوه لازمه روحي ما ساحلتهن على حرگان الدم الچاي نعيشه ..!!

بس نزلت من الخط صار بوجهي عزيز الشايف روحه على گولة حواري ،خزرني ومشى
هزيت أيدي وطبيت للبيت ،صارت گدامي ميمنة گاعده هيَ وأمي بالمطبخ وگدامهن علاگة الخضره
ينضفن بيها ،شمرت جنطتي وگعدت يمهن اسولف
الهن على بنات غازي غازات على گولة حواري

زهرة : زين من عفتنهن عاشت ايدچن ،متقصدات جاي يعيلن بيچن حتى يضيع حگنه

_ انا هم حسيت ،بس بركة بالف ياعلي الا عافتهن

ميمنة : أختي واعرفها زين وسكتت

_ شلعت گلبي والله

زهرة : عدت الحمدلله ،تتغدين ؟

_ أي والله جوعانه كلش

زهرة : جا گومي بدلي وتعاي

_ خوش

گمت مشيت للغرفة فتحتها وطبيت ،هيوفة متمدده
ومفتحه عيونها چن هستوها گاعده
من شافتني غمضت عيونها ورجعت فتحتهن و ونت
بوجع من حركت رجليها ،مشيت يمها خايفه عليها
اسألها
_ شبيج ؟ توجعج رجلج ؟

دنگت متوجعه ودموعها وگعن بسرعه ،تخبلت من شفتها تبچي ،گعدت احجي وياها
_ بس گليلي ليش تبجين ؟

هيوفة : رچلي موتتني ،وجعها يدگ بروحي

بجت بوجع وكل دمعة توگع من عيونها تشرح شگد
هيَ متوجعه ،وعلى صوت أثر بجيها طبت جده
من شافتها تبجي صارت مو جده طرزان برمشة عين
لمتها بحضنها تحاجيها
غضة : موجوعة عزيزة گلب غضة ؟

هيوفة : جاي اموت جده ،حتى روحي احس توجعني ،ما اگدر لا اتحرك ولا امشي هذا الحمام صار حسره عليَّ أحس روحي عاچزه

غضة : لا تحجين هيج گلها فتره وتصير سوالف مو معلمتج على كلشي تگولين الحمدلله

هيوفة : الحمدلله ،بس والله تعبت جده هاي يومين وهيج مليت شلون بيَّ

غضة : هذا يسموه اعتراض على حكم رب العالمين
وانا مو هيج ربيتج

هيوفة : لا والله جده مو تعرفين متعلمه افتر نهاري
كله هسه وين اطي وجهي انا وهاي الحدايد

غضة : ميخالف حبوبه تحمليهن

سكتت تمسح بعيونها وتهز رأسها تحاول تتقبلهن ولو
شوي ولان بعدها بالبداية شي اكيد تواجه صعوبة
بأنُ تتاقلم وياهن

گمت اخذت هدوم ورحت للحمام بدلت ورجعت گعدت يمها احجيلها كلشي صار وياي اليوم حتى لا
تمل وتحسنه ما مهتميلها
وبالغده كلنه گعدنه يمها تغدينه والحمدلله تغيرت
شوي من نفسيتها وگعدت تضحك وتسولف ويانه بكل راحه ...

اباوع لجفون الما ناوية لا تكبر ولا تعقل كل همها تسويلنه حديقة حيوانات هنا بالبيت
جفون : باعوا انا ما عليه أريدن كتاكيت ومفكرة حتى بأسمائهن

غضة :خايبة شكبرج وتدورين كتاكيت

ميمنة : جده ترا بعدها جاهله

جفون : لان صافه وياي راح اغلس على كلمة الجاهله

ضحكنه وهيَ من كل عقلها تحجي
جفون : أريدن اخضر حتى اسمي كرفس ،واصفر حتى اسمي ليمون

هيوفة : ماتردين احمر تسمي طماطه ؟

جفون : لا هيج راح اسوي زلاطه

تحجي طبيعي واحنه نضحك على سوالفها وهيَ
بس سمعت صوت نوح قريب من الغرفة گالت
جفون : راح اگول لنوح يجيبلي

طب نوح للغرفة وچنه سمعها لان قبل السلام سألها
نوح : شتردين اجيبلج ؟

ضحكت وصفگت ايدها بحماس ،حركتها المُعتاده
جفون : اريدن كتاكيت ثنين واريدهن ملونات واحد اخضر و واحد أصفر

أشر على عيونه
نوح : من عيوني ،وبعد ؟

ضحكت تباوعلنه
جفون : راح يجيبلي

أبتسم من شاف فرحتها ،تنهد وگعد يمنه يحجي ويَّ
هيوفة ،وماكو أقل النص ساعه وطلع خابره فقار ...

°حواري°

افتر وراها وادردم ما راضيه تمشي كلشي ما شفنه منها ،وهيَ تلم بهدومها وتقنعني ما تضل هواي وتجينه بس انا كلش زين اعرف اذا مشت اقل شي شهرين الا نرجع نشوفها
_ شني ترحين شفتهمنه منج ؟

ريحانة : ما اطول هواي والله بعد

_ لا هاج صدگت

ريحانة :جا هوَ بيدي شبيچ أنتِ تزيدين بضيمي ؟

حضنتها اشرح الها
_ والله اشتاقلج وافرح من تجين يمي ،وحشه البيت عليَّ بس انا ضاله اهوبز ويَّ اخوانج

ضحكت و وخرتني تعدل بشعري
ريحانة : جا شحلاها وحشتج هاي ،تدرين صرت اشتاگ لكل يوم بهذا البيت

أبتسمت اشاقيها
_ وتكفخ أبوج هم اشتاگيتيله ؟

ريحانة : تصدگين لو ضاله على تكفخ أبوج ولا استلمتني الدنيا هيَ تكفخ بيَّ

لمعت عيونها بسرعه ،دارت وجها مني تمسح بدموعها الوگعن ،انا تحرگ گلبي من اشوفها تبجي أحس بروحي تنعصر عصر لو طاحت دموعها گدامي ،كلش
انقهر عليها واحس أختي دوم مكسورة خاطر ..!!

طبت أمي تحجي وياها وهيَ تدير بوجها منها ما تريدها تشوف عيونها المغورگه
بس أمي ما تفوتها بسرعه عرفت بريحانة باجية
وبس گالتلها ليش باجية انفجرت تبجي من كل گلبها
لمتها بحضنها تحاجيها

نجوى : شني سالفتج ريحانة ،المن هل الدموع ؟

تمسح بعيونها وتحجي وصوتها مخنوگ
ريحانة : راح ارد للسجن ،يمه والله گلبي تعب ،تعبت انا مليت عايشه يم ناس لا تخاف من الله ولا من عباده

نجوى : تضلين هنا ؟وانا اخلي ضيرم يحاجي رچلج

ريحانة : لا يمه امشي احسلي

نجوى : جا شلون تمشين وهيج خلگج مگدر

ريحانة : هسه اصير زينه

سكتت منها أمي وانا بس اباوع بعيوني مقهوره عليها كلش ،عدلت شالها وطلعت من اجه فقار وگال
اجه رجلها ،مشيت وراها اباوع من شباك المطبخ تلگتنه تسلم عليه تدير بعيونها منه ما تريده ينتبه عليها باجيه ،لزم ايدها يسألها

حمزة : شبيهن عيونج حمر ؟

ريحانة : سبحت وطب بيهن شامبو

حمزة : شني تچذبين عليَّ ،أعرفج من تبجين

ريحانة : بعدني ما شبعت من أهلي

حمزة : وعلى هاي تبجين ؟

هزت رأسها ب أي
حمزة : جا ضلي يومين بعد وانا اجي أخذج

ريحانة : والله ؟

حمزة : والله ،انا اشوف ضيرم واروحن

أبتسمت بفرح وحضنته من بطنه ،بنفس الوكت انفتح باب الشارع وطب صخر هوَ وعزيز ،بهت عيونه تعلگت يمهم دار وجهه من عزيز صاح

عزيز : شني اليوم منورنه النسيب الثگيل

ضحك حمزه ومشى يسلم عليهم ،سلم على عزيز ومد أيده على صخر ،بلع ريگة يباوع على حمزه ،تحمحم وسالمه وبسرعة مشى يطب للديوانيه
مشوا وراه وريحانة اجت طبت يمي ،ماگدرت اعتبر
الصار بس احراچ من الموقف انا بهاي السوالف اركز
افصل الگدامي تفصال وبس اجت يمي سألتها

_ شبي صخر ؟

ريحانة : شبي ؟

_ انگلب حاله من شافج واگفه أنتِ وحمزه

ارتبكت و صارت تدور عيونها مني وبارتباك تحجي
ريحانة : مابي شي ،بس تعرفين هوَ شلون ما يقبل بالموقف الصار ويمكن انحرج

باوعتلها مزغره عيوني ،لا السالفه مو خاليه ولو تحلفلي على حجيها هم ما راح اصدگ ،اكو شي والله
شني أول مرة اشوفه بهذا الحال المخربط ...!!

طبت هيَ للصاله وانا ركضت لباب الديوانية اتسنط عليهم ،الوكت كلة ساكت و ولا طلع حسه ابد حتى
ضيرم حس عليه
ضيرم : شبيك ؟ شو ابد ما حجيت .

صخر : مابيَّ شي بس راسي يوجعني

ضيرم : خاف ضغطك ؟

صخر : ما أعرف

ضيرم : شلون ما تعرف ،عيونك چبده مال دم صايرات

عزيز : روح للمضمد قيسه ،شو حتى نفسك ما أعرف شلونه

حمزة : عدك ضغط ؟

ضيرم : گله شگد يصعد ،لا تگله عدك لو لا ،لان صخر تعدى هاي المرحله

بس همَ يحجون وهوَ ساكت ،ماگال شي وترخص ومشى ،طبيت للصاله اصفن واسولف ويَّ روحي
بسلا البالي صدگ ...!!

طبيت للغرفة وانا كل فكري بوضعه الما اله تفسير
غير البراسي ،صفنت ويَّ روحي ومن جبتها منا خليتها منا گمت امشي اسألها

طبيت للمطبخ ،شفتها واگفه تسوي جاي ،وگفت بصفها احاجيها
_ شبي صخر ؟

عافت الاستكان وباوعتلي ،ما أعرف تچذب عليَّ
لو صدگ ما تعرف
ريحانة : شمعرفني انا وتسأليني كلساع جايتني شبي ما شبي

_ حاله كله انگلب ،طب يضحك ومن شافج أنتِ وحمزة حتى ضغطه صعد

ريحانة : هاي أنتِ شجاي تحجين ؟

_ جا غير هذا الصدگ

ريحانة : يا صدگ اسكتي يمعوده

سكتت اباوعلها عافتني ومشت تودي الجاي لليدوانية ،وانا گعدت بالمطبخ حايره من أريد اصدگ حجيها بس ينعاد حاله گدام عيني يصيبني الفضول واريد أعرف شني سالفته وليش هيج من شافهم
ما جنه صخر ،تناثر كله وحتى ماگدر يلم روحه ويتظاهر كلشي مابي ...

بس الما خليته برأسي هذا حاله ،ونار گلبة راح تشب وتحرگ الاخضر واليابس تخلي شرار النار ينشاف
بالسمه بجگاره من ايده ..!!!

°ليث°

افتر على مكاين الماي ،ضلمه وبس أنا وحدي اضوي بالايت وبس تاكدت منهن يشتغلن مشيت أريدن ارجع وبس صوت خطواتي والهوى العالي بالمجان

ضويت على الگاع أريدن اعبر الساگيه بس رجعت
من سمعت صوت خطوات وراي
انداريت بسرعه اشوفهن شني هذا الشي الخطف مني ،بس ما لحگت اشوفه لان جان كلش سريع وبلمح البصر اختفى حتى الصوت ..!!

ضليت اديرن براسي اباوع بين الاشجار ،ماكو شي
توقعت يتخايلي ،بس من مشيت هم انعاد نفس الصوت ،تعوذت الشيطان ومشيت گريب على گيعان
بيت غازي شفت ضل أحد واگف وهذا الضل كلش زين اعرفة

مشيت اشوفنه ،وما خاب ضني ،هوَ واگف مچتف
وحده من ايده والثانيه يدخن بيها الجگارة ،يسحبها بكل شراهه تأكدت من جرته للنفس اكو شي
غاثه وگبل لا اوصل يمه ،سحب أخر نفس من الجگاره وشمرها بالزرع ...

صحت متخبل من سوايته
_ ولك شلوووون تشمرهااا

باوعلي ولا مهتم ومشى ،وانا مثل المخبل گعدت ادور بالگاع على الچگاره ،والله اذا شبت النار بالگاع
شيطفيها ..!!

رفعت رأسي على صوت صيحته بأسمي ،انداريت
من أشرلي بأيدة وگمت ادگ على رأسي من شفت النار شابه وراي وماكلة الزرع
_ شسووووويت ولك شسووويت صخمت روسنه
صخررر

باوعلي يفرگ بصدره وانا افتريت بمكاني حاير شلون اطفيها والماي بعيد عليَّ ،وكل ما بيها النار تاكل
الگاع ازيد وشرارها يطاير بالجوه ،گعدت بمكاني مدنگ راسي بيا وجهه اروحن للبيت وشحجي شراح يخلصنه من أبوي ...!!

كل شراره تمر مني وتوگع بالگاع توج النار اكثر وتكبرها ،وكل هذا هوَ واگف يباوع وساكت ولا تحرك ولا چن سواله مصيبه ما تتسولف ...

مشيت يمه أحجي ويا وهوَ ولا يرد عليَّ چن باله مو يمي ،هزيته من أچتافه
_ شبيك صخررر ؟

نتر أيدي واندار مطيني ضهره ،خلاني وحدي ويَّ الناس البدت تلتم بسبة النار الكبرت وشرارها ترس كل مكان ،سحبت روحي من شفت چم واحد من بيت
غازي أجوي يركضون من بعيد ...

بس طبيت للبيت صحت من الباب
_ بوياااا چدي ،الحگوا تصخمت روسنه

طلعولي يسألون شكو ،دورت بعيوني عليه ما لگيته
ما لافي للبيت
_ صخر حرگ گيعان بيت غازي .

°غاية°

لطمنا أنا وچده وأمي نشغت وگعدت بالکاع تدگ
على رأسها
رأجس : ليش حرگهن ؟

ليث : أندري ،شمرله جگاره وشبت النار بيها

صاح أبوي متخبل من فعلته
محمد : والله اذا الززمه اخلي ينسى دربة منييين صاير كلش لا يرد ولا يحسب حساب الاحد

رأجس : طگه وشوف والله منك اتبره وگول ما گال أبوي

محمد : جااا بويه هااااي سواية يسويها ؟

رأجس : منو يگول متقصد ،خلِ يجي ونفهم منه .

وماعدت ساعة واشتعل الچو بالجيلات ،گمت اتراجف اباوع على ولدنه كلهم طلعوا ،حيل خايفة
أول مره هيج اخاف لان هل مره الحگ علينه مو
ويانه ...

طلعت ميمنة تتراجف من الغرفة ومبين گعدت على صوت الرمي
ميمنة : شكووو ؟ شصاير ؟

تسأل بيَّ وانا من الخوف لساني مربوط
جاوبتها چده
غضة : صخر حرگ گيعان بيت غازي وهل هدوا علينه

نشغت وركضت تباوع من الشباك وياي ،باب الحوش
مفتوح وصوت ولدنه هرج القرية يتصايحون من
ويَّ بيت غازي ،صارت مواجهه قوية بيناتهم وحتى تضاربوا لان بيت غازي لهنا وصوت غلطهم ومسبتهم يوصلنه ...

زهرة : ليش هيج يمه ،ليش صخر يمه شجاك

تلطم على رجليها و ويَّ كل صيحه منهم لونها ينخطف منا لمن كلش انتهت صعد عدها السكر انخبصنه بيها خبص

جبتلها الحباية أرجف من الخوف عليها ،واجت ميمنة بسرعة بأيدها گلاص الماي اخذته من ايدها واطيتها الحباية شربت وهيَ تون خايفة على الولد ...

گعدت مرجعه ضهري على باب المطبخ ما فضت
سالفتهم وكل ما جايها تزيد ما تنقص ،لنص الليل طبوا بالحوش مسلحين ،أمي بس شافتهم وگعت
علينه فول سكرها ،نسوان عمامي طبن كل وحده
تتوسل بولدها ما يمشون يهدون عليهم
وهمَ راكبين راسهم ولا بيهم واحد هاد وسمع حجاية

لهسه صخر ماكو وهمَ بس يردونه يّجي يعرفون منه متقصد لو لا ..!!

طلعت بالحوش اباوع عليهم وگفتهم ترهب كل واحد شايله تفگه محزمين وچدي واگف بنصهم
وعمامي وأبوي واگفين على جهه كل واحد بيهم متخبل على صخر ولو وگع بيدهم الله يستر شناوين عليه...

انفتح الباب وطب يباوع عليهم ،وهمَ گبوا عليه عمامي بس يردونه يطيح بيدهم وجدي يصيح بيهم ما راضي لان يحاجوه

سأله جدي
رأجس : احجيلي متقصد تحرگهن ؟

هز رأسه ب أي
صخر : بس ما حسبت هيج يصير كلها چگاره

رأجس : ليش حرگتهن ؟

صخر : نار بگلبي وشعلتها بگيعانهم

كلهم سكتوا مستغربين من حجاياته ،بس ما دام
استغرابهم من أبوي تقدم عليه يريد يطگه وجدي
وگف بوجهه ما راضي

رأجس : اذا تطگه اطگك والله

وگف أبوي گدام جدي شايط
محمد : هااااك شوف ،هاااي اولها ،فرعنتهم بويه والله تفرعنوا واحدهم يحرگ دوانم بدون لا يحسب حساب لان أنتَ بضهره

رأجس : أنا ادفع فلوس زرعهم ،شتريد بعد ؟

صفگ أيد بأيد يفتر بمكانه ويحجي
محمد : هاااك شوووف ،هاي مساندتك طيحت حضهم

رأجس : كاااافي چا شني ترديني اطي الهم على طبق من ذهب ،الفلوس اطيها ،من جيبي مو من جيبك

محمد : مو على الفلوس ،يااا أمة الاسلام مو على الفلوس أنا ما راضي على تصفگك اله

جدي سوا روحه ما يسمعه ،واندار يحاجي بصخر
رأجس : شني الخلاك هيج تسوي ؟

محمد : هيج ضايج وراد يتونس لان يعرف اكو چد خسار للترعن مالته

رأجس : أجي اطگك حتى تسكت ؟

سكت أبوي وبعيونه يريد ياكل صخر لو وگع بيده
والله يمكن ولا عظم يضل بي صاحي
صخر : ماكو شي چدي ،بس خسرت چم مليون بسبتهم وما أعرف من حرگة گلبي شلون مشيت لگيعناهم وحرگتهن .

رأجس : شني ليش خسرت ؟

صخر : ما أعرف هيج بلمح البصر راحن فلوسي

يوسف : وهسه راح تخسرنه عدالهن بچم مره

خزرة چدي
رأجس : دافعهن من جيبك ؟

يوسف : وهاي ولدنة اليوميه شايلين التفگ وهادين ما تخاف عليهم ؟

رأجس : عگاب ،ما يصيبهم شي بس أسكت أنتَ .

ما أحد فتح حلگه بعد ،نسوان عمي كلهن گعدن بالمطبخ يمنه بس طبوا الولد وأخر شي صخر بجت أمي تصيحه ،گعد گدامها
زهرة : شبيك يمه ؟ ليش هيج سويت ؟

صخر : صارت بعد ،وأنتِ شبيج شني هل بچي ،ضمي دموعج يمه من اموتن ابجيهن

نشغت ما راضيه على حجيه
زهرة : ليش هيج تحجي وتخلي گلبي يغذي بنار

صخر : جا هنيالي اخلص لان انا بساعات هسه أتمنى الموت بيهن

أمي حارت شتحجي ويا بنفس الوكت طبت حواري وريحانة ،دار وجهه من طبن ،باوع عليهن وگام يمسح بوجهه ما أعرف شبي وليش هيج من سنين يضوج من شوفتها ....!

ريحانة : وگع گلبي من صوت الجيلات والله

جاي يطلع من المطبخ من سمعها حجت التفت
وبكل هدوء حاجاها
صخر : سلامة گلبج ريحان .

رمشيت بعيونها ودنگت رأسها تعدل بردن العباية وهوَ طلع من المطبخ
گعدت بصف ميمنة احاجيها
_ راح يخبلني ليش هلگد يكرها ؟

ميمنة : ما يكرها

_ والله يكرها ما تشوفي الوحيده حتى ما يسلم عليها

ميمنة : هو هذا طبعة

_ والله انقهر من اشوفها تنقهر منه

ميمنة : يجوز مقهوره عليه

_ على شنو تنقهر عليه ؟

ميمنة : أنا من انعس اگوم اخربط لا تحطين بالج يمي

سكتت منها وگمت گعدت يم البنات لان صدگ مبين منعسه وما تعرف شتحجي
بركة : انا لو ولد اشيل تفگه واطلع وياهم ارمي .

بصائر : انا لوما فقار اهدن ويا أخوتي

حواري : كلش وحق يخليج ،جا غير يطک ضهرج بالنص

بصائر : شبيج عود اصير المره الما تخاف بس من رجالها

بركة : احلف عليها ما تخاف من فقار أبد

ضحكت وتربعت تسولف ،على مغامرتها وياه
بصائر : هاي البارحة عود اجاني وردنه نخنس وحدنه تالي أبوي لگفنه

بركة : والليل كله خلصها بس يرزل ويحجي لوما هيَ ساكته جان حتى طگها والله

حواري : ليش يطگها ؟

بركة : احم ،احم ،مو لگاها گاعدة بحضنه

ضحكت بصوت من تخيلت الموقف وهيَ تضربني تريدني اسكت
بصائر : الله يشهرج ،اسكتي ولج .

عاطت بينه أمي ما راضيه على صوتنه العالي ،سكتنه بس كل وحده بينه بالگوه لازمه ضحكتها وهيَ
تخوزر بينه ،بس ما دامت ضحكتنه وهيَ تخبلت تبجي وتعيط من طب نوح عيونه تلمع و وضعه مخربط ،من بيناتنه هيَ سألته لان شافته من طب
يرچف

بصائر : شبيك نوح ؟

باوعلها ودار وجهه يسمع بعيونه يريد يطلع صاحت
وراه
بصائر : شكووو نوح

رجع مختنگ بالگوه يحجي
نوح : بيت غازي متعرضين ل فقار وما أعرف هسه ميت لو عدل ...🪾



تعليقات