رواية فصلية بديلة ( شموخ ) الجزء الثاني الفصل الثالث والخمسون بقلم ام ملكوت
_ردت تقتله .. ردت تقتل راهب يابويه .. ردت تقتل روحي يابويه وتحرمني منهه .. ردت تقتله و مامرت علي دقايق وانه اشكيلك واحجيلك شكد احبه وروحي متعلقه بي
_انتي جبرتيني اسوي هيج ومستعد هسه اقتله هنا لو رفضتي تتزوجين منه
_بابا انته كاعد تسمع التحجي شلون اقبل بي شلون اتزوجه شلون اخلي عيني بعينه بعد سوايتك هاي بي شلون تريد اصير انانيه واتزوجه وانه ابوي حاول يقتله
_مشكلتج انه قررت وانطيتكم خيار يا اما اقتله يا اما تزوجون الاسبوع الجاي..
فركت وجهي بنفاذ صبر وانه احس روحي بحلم وماكو شي من الكاعد ينحجي ويصير منطقي ضجرت من هل حال ومن هل موقف البايخ يلي انخلينه بي باوعت لراهب ورجعت حجيت ويه ابوي بنفاذ صبر..
_شنوو
_لو ماوافقتي تاخذينه لا تظنين ان بيتي يستقبلج مره ثانيه
_شكاعد تحجي بابا لا تخبلوني شنو مالي مكان بيناتكم شنو بيتكم مايستقبلني يعني شنو تريد تطردني تريد اعيش بالشوارع لو اكعد ايجارات انه وبنتي
_انطيتج خيار وحيد ماكو غيره لو تاخذين راهب لو مالج شي عند واحد بينه
_استغفرالله ياربي راح اتخبل والله راح اتخبل ادري شنو يعني ماتريدني بعد ماتريد بنتك شموخ الربت تحت جناحك عمرهه كله ماتريد تعيش عدكم
احجي بابا عيشتي وعيشه بنتي مثكله عليكم كول حتى هسه اخذ ريانه واروح اكعد ايجارات وبديره الملاهي ولا ابقى عندك
_ولللج شني تكعدين بالملاهي اموتج وعلي اشخل راسج بهاي لو عدتي هل حجي مره ثانيه
_جا شتردون مني شتردون شسويلكم بعد شسوي لروحي شسوي لبنتي وين اروح وين اولي لا انته
تريدني ولا اخوتي يردوني وين اروح انت كلي منو يستقبلني لو ما ابوي يستقبلني منو يعيشني لوما ابوي موجود
_عندج راهب هوه يعيشج كافي مليت وثكل همج على كلبي وان حجيتي هيج او هجيتي مرجعج لراهب وغصب عنج وعن الخلفج تاخذينه
_لكك كافيي راهب كافي تحجون بي كافي تجبروني عليه كافي تلوموني عليه كافييي تعبتوني والله تعبتتت..
من بين صدمتي وهضيمتي بكلامه وروحي الذبلت على وجوده بضهري بقيت ادك على صدري وابجي بهستيريه وكلهه التمت علينه من جهه محمد
ومرتضى يسحبون بابوي للديوان ويهدون بي ومن جهه امي وخالتي والبنات يلزمن باديه ويهدني .. وبوسط كل هل هوسه والقتلني نظرات راهب
التسولف خذلانهه بيه ماتركتني باوعتله بتوسل وروح ذايبه ووجع ثكيل وقوي هاجم راسي لزمته مغمضه بالم وختل توازني كعدت بالكاع دايخه
واذاني صار صوت وزه بيهه واديه وجسمي كله نمل وصوت امي والبنات صار يترادد لاذني بعيد رفعت راسي بثقل شفت امي بقت تصرخ وتاشر لابوي خوف خلته يجي يركض علي
لزمني من كتفي باوعتله بضياع وغثيان حاوطني غمضت عيوني وماحسيت على شي بعد وشنو الصار بيه...
.
.
"وجئت اسالها عما يكدرها ،، ترد الآمها عني وتخفيها ..
اختي عبير وانما لشوفه عزيزه كلبي رغم قررت انساهه وتناسيت حبهه ودفنته بغمج كلبي الا ان بالي ماكف عنهه عبالك تفرمت على حبهه والتفكير
بيهه رغم قبل جنت عايش على امل ميت بلقاءها بيوم من الايام بس هسه غير قبل.. ال ١٠ سنين مرت كلهه ماعذبتني بكثرما عذبتني هل سنه المرت
مثل القرن على كلبي لا نومتي مثل الاوادم ولا عيشتي مثلهم صار مايمر لحظه علي الا وانه اصفن وعقلي يسال كلبي ليش سوت هيج ليش ضحت
بحبنه ليش ماخلتنه نتهنى سويه وشحالهه هسه بدوامهه وبس لا هذا ابن عمهه حاول يتقرب منهه لان اعرفه وحاس بنظراته وتصرفاته اتجاهه
مو مريحه ومو نظرات اخ لاخته .. اخخخ ياشموخ شلون بيه وضيمي شلون بحياتي بدونج لا ونوب امي تضغط علي اتزوج ويوميه هوسه ومشكله
بسبب رفضي .. المهم هسه خليني اروح واشبع روحي بشوفه جمره كلبي وحلاوه طيفهه والله كريم .. بقيت افكر وانه احس شعور الامل دب
بكلبي بس ماريد انطي مجال ولا اتامل ويخيب املي تافافت وكلت نروح ونشوف تاليهه ويه بت الشهم الجمرت كلبي.. عاد بنفس الليله قررنه نطلع للبصره ثاني يوم كعدت
من الفجريه بدلت وطرت بسيارتي للدائره دخلت عل عميد اخذتلي اجازه مده اسبوع اريد اشبع هل مره وافول شوف منهه ياله ارجع وشيصير خل يصير
ماجنت ادري بالراح يصير وياي ولا الراح يسوي ابوهه بيوم رجعتنه للبصره رغم حاولت وحجيت وياهه بخصوص ريانه بس فاجأتني باسلوبهه الوقح
وياي وعلو صوتهه علي وهيه تحجي بروح جزعانه ادري الضغط العليهه مخبلهه بس مو سهله تصيح بوجهي كدام اهلهه والزلم ولو وحدنه عسه ماتشلع
بس ابوهه منعنه وكال نتركهه ضل بالي يمهه وصرت الوب وين راحت وين طلعت بنص الليل وبالشارع ماعرف شيصادفهه ومنو يشوفهه واذا
تضيع لو تندل وترجع كل هذا فكرت بي بثواني معدوده بس سرعان ما تطمنت لمن طلع وراهه ابوهه يجيبهه بقت ريانه ماده ايدهه باتجاه الباب
وتبجي تريد امهه بقيت احاول اسكتهه وماسكتت اجه سلام اخذهه مني يسكتهه وكذلك بقت مستمره تبجي وبالف ياويلاه لمن حجيت وياهه
وكتلهه ماما راحت تجيبهه نمنم ياله سكتت وبقت كل شوي تشهك بتعب وعيونهه عل باب فركت وجهي بحيره وبقينه نفتر بالحديقه كلبنه يلوب
عليهه منتظرينهه ترجع لهنااك ياله دخلت وراح سلام يمهه اخذت ريانه بكلب ملهوف ماجنهه القبل جم دقيقه شمرتهه علي جازعه روحهه منهه ومن الدنيا ..
بقت عيني عليهه قلقه وهيه عيونهه مورمه وحمره للحظه شتت انتباهي لمن ابوهه طلع بالبندقيه وتوجه ناحيتي مثبتهه على كلبي حجه العنده بعزم
وجديه وبشكل واضح وانه عبالك باب الجنه انفتحلي ماهمني تهديده ولا خلت السلاح بصدري ماهمني غير كلامه يلي فتحلي باب امل وماطلع
بيدي غير اني اوافق وبكل قوه على طلبه بس الخذلني والشلع كلبي رفضهه ااخ منهه ومن لسانهه اليمطر سجاجين كل وحده تكول انه احد من ثانيه
وتغرسهه بكلبي بقيت مره اباوعلهه ومره اباوع لابوهه وهوه ثابت ومصر على كلامه بس خذلتني اي واول مره انخذل هيج لمن فضلت تتشرد
بالشوارع والملاهي عن ان تقبل بيه وتفرح كليبي خذلتني لمن ماهمهه لو ابوهه كتلني خلاص وبقت مصره على رفضهه ..رغم كلامهه يلي اثبت حبهه
الي وتعلقهه بيه بس كلماتهه الجارحه ورفضهه جان اقسى على كلبي من حنيه اعترافهه خلتني بموقف صرت احس روحي بقفص مقفول وشغلت
النار بيه لا اكدر اطلع ولا اكدر انجي بروحي .. ابتعدت خطوات عنهه وانطيت لنفسي استعداد لتلقي الرصاصه لانهه صارت اهون الي من كلامهه الجارح
ولان خلاص انكسرت ثقتي بيهه وانخذل كلبي يلي توجر بحبهه واصبح رماد .. رغم هل موقف السواه ابوهه واجباره الهه ان تقبل بيه مارفلهه جفن ولا
حاولت تفكر بيه وبروحي الحتركت عليهه خذلتني وفشلتني كدام روحي والناس برفضهه القاطع.. منهه ومن كلامهه هذا قررت فعلا انساهه وابتعد
عنهه لان كلشي تسوي الي وسوته يهون علي الا كسره خاطري وسحله كرامتي كدام اهلهه قررت احتفظ باخر رمق من احترامي لذاتي واعوفهه
تعيش براحتهه ومثلما تحب ومدام تحملت وكدرت تعيش حياتهه بدوني هل سنه تكدر تعيش باقي حياتهه وماتحتاج وجودي بعد عكس كلبي الضعيف
يلي تمرمر بهاي السنه جانت هيه عايشه سعيده بين شغلهه واهلهه وناسهه يلي يحبوهه ومتاكد ماجيت على بالهه ولا حن كلبهه بيوم علي وحبت
تسمع اخباري ابد .. المهم يصير خير انشاءالله ياشموخ هاي هيه وخلصت صدك وياج ومنا ورايح ادوس على كلبي واكمل حياتي ورغم فكره الزواج
جنت شايلهه من راسي بسبب حبي الهه وتعلقي بيهه بس هل مره صدك حسيت اني تافه واناني لان حارم روحي واهلي من السعاده ومن صوت الطفل
يلي عمرهه كله امي تنتطر تسمعه بالبيت بسبب حبي الماله مقابل لهل انسانه .. غطست بافكاري وانه اباوعلهه بخذلان صارت تدك على صدرهه بكل
مابيهه من حيل وتحجي بصوت عالي .. وسرعان مانهارت طايحه بالكاع رغم رجلي اخذتني الهه لا اراديا وعيوني بقت تباوعلهه بترقب تريد تشوف
ركضت عليهه لزمتهه من ضهرهه ساندهه واصيح باسمهه وابوهه اجه يركض حاول يكعدهه ماتكعد شمرنه عليهه ماي وكذلك ماكو خليت ايدي على
خشمهه واشوف تنفسهه ضعيف خبرت ابوهه بهل شي لو هوه تخبل كام وحاول يشيلهه بين اديه ملهوف وخايف بس ماحملته رجليه وخانته قواه ..
اجه بسرعه تقدم وشالهه بين اديه اخوهه مرتضى وركض بيهه للسياره وانه سندت ابوهه يلي مادري شصار بي من الخوف والا شوي جان راح بيهه ..
صعدته بالسياره يمهه هيه ومرتضى وركبت بالصدر يم محمد وطار بينه للمستشفى عايفين ورانه امهه تبجي وتدعي مايصير بيهه شي ..
كلهه دقايق ووصلنه للمستشفى وكذلك نزلهه مرتضى يفتر بيهه بالطوارئ يريدله مكان يخليهه بي ماكو كلهه مليانه مرضى رحت بسرعه عل غرف
اخذتلي سديه وركضت بيهه اله نزلهه عليهه واجه الدكتور فحص عيونهه وتنفسهه وهد حيلي من كال للممرضين اليمه..
_حولوهه عمليات بسرعه صاير وياهه سكته قلبيه ..
وكفت وانهدمت قواي بقيت جامد بمكاني محاول استوعب كلامه ودايخ بافكاري مره اكول قصده على شموخ ومره اكول خاف يقصد غيرهه..
اخذوهه لغرفه العمليات واخذوا روحي وياهه وابوهه لزم راسه وكعد بالكاع وكوه شالوه الولد مكعدينه عل كرسي وهوه يلوم بروحه ويضرب
على راسه ويبجي وانه روحي صارت تلوب وتفتر بالمستشفى وضاكت بعيني الوسيعه طلعت بره اخذ نفس بس حتى الهوى غصيت بي بقيت لازم صدري
اضرب عليه وعيوني احتقنت مجمره مادري شسوي ووين اروح وشلون اشرد من كود الافكار السيئه الكاعد توهوس براسي وين اشرد منهن وين
انطي وجهي حتى لا انجلط وراهه بسبب خوفي وين .. بقيت متخصر وافتر طلعت باكيت جكايري
وكله انطحن بريتي خلال دقيقه وحده ..طلع محمد طبطب على ضهري بتعب والتفتت عليه بروح حايره وكتله..
_كله بسببي ياخوي كله هذا لان اجيت وحجيت وياهه انه زدت الحمل عليهه ودخلتهه بحلك الموت
_لا تحجي هيج راهب انت مالك علاقه بالصار كله ومالك ذنب بشي حتى كلامك وياهه جان معقول ولابد واحد يحجي وياهه حتى لو ماحجيت انته
بس هيه على كولتك جانت مضغوطه بالشغل وتربيه بتهه وزاد الضغط عليهه لمن فكرت ان تعبهه وتضحيتهه علمود بتهه ممكن تروح عل خالي بلاش لو تضحيتهه تنكلب ضدهه بالمستقبل
_ماستاهل حبهه ماستاهل تقبل بيه وانه هيج سويت بيهه رغم كل عمري كضيته احبهه وافهم واتفهم كل تصرف وكل قرار تتخذه ناحيتنه بس
هل مره غلطت وحيل هم ماجان لازم اضغط عليهه هل شكل وباعز شي عدهه ماجان لازم التقي بيهه بعد هل سنه واحاول اتناقش وياهه بنفس الموضوع يلي رفضتني علموده الاف المرات
_تهون ياخويه كل هل اشياء تهون بس لا تلوم روحك تره مالك وابوي علاقه بالصار وهيه جانت من قبلما تحجي وياهه مبينه عليهه اعراض السكته بس خلي نكول السويتوه عجل اصابتهه بيهه لا اكثر
_من اجت بت عمك كالتلك عليهه مو
_اي جان راسهه يوجعهه ووجهه اصفر وترجف وعيونهه ضايعه حسيت بيهه مو على بعضهه بس اصرت انهه مابيهه شي ورحت عنهه بس بقيت
اراقبهه وهيه كل الطلعه جانت تتصفن وتلزم كلبهه كل شوي يعني خويه جانت السكته نصيبهه اليوم لا محاله
_اووف ياخويه عساهه بكلبي هل سكته ولا بيهه عساني متت قبل لا اشوفهه هيج منهاره كبالي وضايعه انفاسهه
_ شد حيلك ياخوي وادعيلهه انشاءالله ربك ينجيهه منهه وتكوم بسلامه
_انشاءالله ياخوي انشاءالله
_يله خلينه ندخل جوه لا تبقى هنا بارده
_روحي مجمره ماحس بشي خليني هنا مالي عين ادخل واباوع لابوك
_لاا شسالفه يمعود ابوي كلبه ابيض لا تشوف قساوته مساع جان بس يحاول يجمعكم لا اكثر
_ولو ياخويه ولو بيني وبينك بعد الكلام يلي دار بيني وبين شموخ كدامكم صرت اخجل احط عيني بعين واحد منكم
_ليش
_بعد
_لان بينت روحك المجمره كبالنه لان وضحتلنه انك تحبهه ورايدهه وتحاول تخليهه تستغني عن فكره البعد عنك
_ لا مو هيج
_جا ليش ..
باوعتله بحيره ورفعت انظاري للسما اخذت نفس وزفرته بقهر وهوه هز راسه باسف وطبطب على كتفي باوعتله وهوه عبالك يعرف البينه والبداخلنه
عافني ودخل جوه .. توجهت للكرسي كعدت ساند عكس ايدي على رجليه وافرك بوجهي بتعب لزمت
نقالي طلعت صوتهه واحس ماي جمر ونزل على
كلبي بحيث لزمته متالم ومغمض عيوني.. كمت دخلت جوه وبوجهي للحمامات غسلت وجهي وحاولت اخذ نفس ماحس الا دوخه حاوطتني
واختل توازني الا شوي بقيت ادلك براسي وطلع سلام اخوهه من الحمام باوعلي باستغراب واجه علي بسرعه خله ايده على كتفي وسالني بقلق..
_خير راهب شبيك ليش هيج حالك
_لا مابيه شي خليني هسه شويه وارتاح
_تعالي اطلع وياي اكعد اشربلك ميه لا تطيح علينه
_اي راح ..
كمت على حيلي مشيتلي بس خطوتين ورجعت دخت بعد اقوى لزمت ايده وهوه سندني مطلعني بره وانه عيوني حاوطهه ضباب كلشي ماشوف بس
خيال كبالي كعدني عل كرسي واجه محمد يسالني شبيه وشصارلي اشترلهم بيدي ماكو شي وانه ساكت وحيلي مهدود ماكدر حتى احجي كلمه ..
راح سلام مادري وين ورجعت راسي عل حايط محاول اهدي الدوخه لحدما حسيت على شخص لزم ايدي وخله بيهه مادري شنو فتحت عيوني كوه
واشوفه الممرض خله جهاز الضغط بيدي وصار يقيسلياه رجعت غمضت عيوني واتبع كلامه وهوه يكلي..
_اهده واخذ نفس عميق وزفره خليك طبيعي لا تفكر بشي تمام
_تمام
_بشنو تحس هسه
_دوخه وحيلي انهد
_اوو جا طبعا تدوخ اذا انته ضغطك مفول شلون ماينهد حيلك.. اخذوا للطوارئ خلي ينطونه ابرتين ضغط
واوكسجين ضغطه صاعد 150/ 100 واحتمال يشكل وياك ارتفاع ضغط مزمن اذا مانخفض خلال ساعه وحده ..
هزيت راسي بايجابيه وانه مغمض وجاوبه محمد عني واجه سندني من كتفي واخذني للطوارئ كعدت عل سديه واجه الممرض علكلي مغذي ووياه
جهاز الأوكسجين وابرتين طلع الاولى زرقهه والثانيه خلاهه على جهه وره ١٠ دقايق رجع زرقهه الي بقيت متسطح وبين النايم والكاعد وانه بالي
_هاا خويه شصار وياهه رويحتي طلعت من العمليات طلع الدكتور طمنكم عليهه كال اذا صارت زينه لو بعدهه كعدت لو بعدهه ام عيون سمره حبيبتي كعدت
_احمم لا ماشاءالله عليهه نجحت عمليتهه و عدت مرحله الخطر واستقرت حالتهه وهسه كاعده الحمدلله بس بعدهه تحت المراقبه
_متاكد ياخوي يعني شموخ مابيهه شي كعدت كعدت لو تضحك علي حتى اطمن
_لا والله كعدت واذا تريد اخذك تشوفهه بعينك
_اي اخذني الهه انطيني ايدك خلي اكوم بعدهه الدوخه بيه خاف مايحملني رجلي الهه
_تمام انطيني ايدك خويه ابو معاذ..
لزمت الكانوله شلعتهه وكمت بلهفه لزمت ايده ومشينه لغرفتهه وانه الكاع تفتر بيه بعدهه بس روحي تدور عليهه وماهمهه شي وصلنه اخيرا
وطليت عليهه وهيه لازمه ايد ابوهه تعاتبه ودموعهه تجري سكته بقيت واكف وانه روحي تنمرد عليهه لمن اسمعهه تكله ..
.
.
:- ظلام دامس محاوطني الوقت والزمن متوقف يم دقيقه وحده نايمه وبغير عالم بس يتراود باحلامي لمن راد ابوي يطلق النار على راهب لمن
حاول يطشر كلبه لو لا رفعت السلاح عنه .. فتحت عيوني بعد ماعرف شكد من الوقت واشوفه كبالي ابوي الراد يفني مكاني العشت بي كل هل سنين
بين ضلوع راهب .. باوعتله بتعب ولوم ودمعه عتاب طاحت على خدي اجه علي يركض وانه روحي خاويه وجسمي خدران وريجي ناشف ..
رفعت ايدي طالبه الامان والدفو من ايده وهوه ماقصر اخذ ايدي باسهه وخلاهه على وجهه وهوه يبجي ويكول..
_سامحيني بويه سامحيني وعذريني يشمعه بيتي انه السبب بالصار وياج انه الضغطت عليج وخليت يصير بيج يلي صار
_بابا لا تبجي
_شلون مابجي يابويه شلون وانه روحي انمردت عليج وضاعت بين افكارهه شلون وانه تخبلت من شفتج طايحه بين اديه
_ليش سويت هيج بابا
_كله السويته الج يابويه ولمصلحتج وحتى اشوف السعاده بعيونج بس ماظنيت راح يصير بيج هيج
ماظنيت ان اصراري وعنادي راح يدخلج بحلك الموت كسرتي ضهري يابويه بطيحتج هاي طيحتي حيلي وياج
_كتلك ماريد راهب كتلك ماريد اتزوج منه ليش حاولت تجبرني على شي ماريده ولا ممكن اريده بيوم انه وثقت بيك وحجيتلك عن حبي اله
وعذابي بفركاه ليش فشلتني كباله وحاولت تسلب روحه ليش يابويه ردت تقتل انسان بريئ ومظلوم وكضه كل سنين عمره وهوه يحبني وينتظرني
_شموخ بويه كافي لا تحجين لا تحركين دمج وتقهرين بروحج بعدج يابويه تره
_ليش عاندت وماسمعت رايي ليش حاولت تزوجني اله غصب عني هيج يهون عليك تحط بنيتك بموقف ما من رجعه وكسرت خاطر الرجال كدام الكل
_خلاص بويه لا تحجين خلاص التردينه يصير واذا راهب مالج نفس بي ولا تردين ترتبطين بي هسه احاجي واخلي يبتعد عنج
_خلي يرجع لبيته ماريد اشوفه بعد ماريد حتى كلبي اليحبه يابويه
_هاذهو بويه تردينه يرجع تمام راح اخلي يرجع وهسه هم بس يكون خاطرج طيب وتكوميلنه بالسلامه ..
بلعت ريجي بصعوبه وانه المح طيفه لراهب واكف يم الباب ويسمع كلامنه رغم روحي البقت تلوب عليه وعلى نظره منه بس ماكدر اخرب كلشي هسه
ماكدر ارجع اخرب حياته وادمر الباقي من سنينه خلي يروح يشوف غيري تسعده وترضي انه ماستاهل هيج شخص مثل راهب ولا استاهل حبه
انه تلوكلي الوحده و مو وجه حب وحنان .. غمضت عيوني ونزلت دمعتي ثلج على خدي عكس كل مره تطيح مجمره سمعت خطواته طلعت
من الغرفه وروحي طلعت وياه دخلت بدوامه افكاري وراسي صار يون علي كلت لابوي وراح صاح الدكتور فحصتي بس ماقبل ينطيني مسكن
لان توه رايح مني وتعال هسه فوك وجع كلبي لازم اتحمل وجع راسي نص ساعه لبينما يروح البنج تماما مني ويحطولي مسكن .. وهيج مرت ساعه
وانه اهز راسي وادلك بي محاوله اخفف الوجع وابوي يقره آيات يم راسي اخيرا اجه الممرض قاس ضغطي وطلع منخفض انطاني بطل لبن شربت وابره مسكن وفتره ياله اختفى الوجع
ورجعتلي الرؤيه طبيعيه بعدما جانت ضبابيه بسبب الالم .. غمضت عيوني وغطست بالظلام فتره مو طويله وكعدت على صوت الاذان رفعت
راسي وانه اشوف امي جايه ونايمه عل كرسي يمي وابوي عل قنفه هوه ومحمد وسلام واكف متكتف ومغمض عيونه باوعت للساعه ب٤ ونص
الفجر حاولت اكوم للحمام ولزمني وجع راسي رجعت تمددت وبقيت حيرانه ماكدر اكعد امي
خطيه وهيه نايمه واستحي احجي ويه سلام ياخذني عاد هوه فتح عيونه باوعلي واجه علي سالني بهمس وقلق..
_هاا خويه حبيبتي شلون صرتي
_زينه شوي بس راسي ثكيل وياذيني من اكوم
_وين رايحه ليش تردين تكومين خليج نايمه
_اريد اروح للحمام
_تمام تعاي اوديج انه لو تردين اكعد امي تجي وياج خاف تدوخين هناك
_لا مابيه شي بس اسندني خلي اكوم على حيلي
_يله انطيني ايدج..
خليت ايدي بايده وكمت كوه وكفت على حيلي وانه حيلي مهدود عدل الشال على راسي مغطي بقايا شعري الطالعه وطلعنه بره اجه بوجهي راهب
كاعد هل كرسي ومغمض عيونه وكفت جامده بمكاني صفنت بي وسلام همس يم اذني ومرد كلبي وهوه يكول..
_خطيه انهد حيله عليج دخلت للحمامات لكيته مكرفص ووجهه اصفر ولازم راسه خفت ينجلط
وراج بس همزين طلع بس ارتفاع ضغط ورجع طبيعي لمن انطوه اوكسجين وابرتين ضغط
_وليش كاعد تحجيلي هل اشياء
_ حسيتج تردين تعرفين
تصنعت اللامبالاة وكملت طريقي دخلت للحمام وبقه واكف هوه ساند راسه عل حايط دخلت وانه اسند بحيلي عل حيطان بقيت ثواني واكفه ابجي كلبي مخترك عليه ومن الصار ويا تالي كلت مايصير
اضعف خليني بس هل يومين اقوى بعينه تالي من يرجع اكدر ابجي واحزن براحتي .. اخذت تفس مسحت دموعي ودخلت للحمامات كملت وغسلت وجهي
توضيت وطلعت اجه علي بسرعه سندني من ايدي ورجعت للغرفه وفتت من يمه لراهب وانه متجاهله
نظراته القلقه علي وصفنته بيه .. تمددت عل جربايه بتثاقل وفزت امي باوعتلي بقلق وكالت بتساؤل..
1 تعليق
_ها يمه شموخه حبيبتي كعدتي تردين شي اجيبلج شي
_لا امي حبيبتي بس جنت بالحمام وتوه رجعت
_يا يمه منو اخذج جا وشلون رحتي وماكعدتيني اخذج
_لا شلون جا المن موجوده يمج انه يا يمه غير حتى البي احتياجاتج شسوي بروحي لو دختي وطحتي بالحمام لا سمح الله وصار بيج شي
_ماتقصرين انتي يبعد حيلي بس مابيه شي شوفه عينج رحت ورجعت وانه ماصايرلي شي
_يله الحمدلله نامي هسه ارتاحي واذا تحتاجين شي مره ثانيه انه يمج بنيتي لا ترحين وحدج اخاف عليج
_انشاءالله حبيبتي..
ابتسمتلي وباستني براسي وغطتني غمضت عيوني وانه بالي مو يمي وانما بره يم السلبه بنظراته رغم كلشي سويته بي ورغم كلامي
القاسي عليه بس بقه مصر ومجاهد يحبني ويهتم ويخاف علي ادري شنو من كلب شايل شنو من حب زارع الله بكلبك اتجاهي ليش هيج صعبه
عليك تنساني وتكمل حياتك ليش صعبه عليك تعوفني رغم كل الكلام الجارح الحجيته الك .. لكك شلون بيك ياراهب شلون بكلبك التمرمر علي شلون
اكدر اصير انانيه واقبل بيك بعد كل هل عذاب وازيد عذابك ولو نفترض قبلت بيك ووافقت اصير حلالك شلون راح اكدر اجازي حبك الي كل هل
سنين شلون راح اكدر انام مرتاحه وانه حبك واصرارك علي صار مثل الدين برقبتي لا اكدر ادفعله عمري ويعتقني ولا اكدر اتجاهل سنينه
الكضت لخاطري واعيش مرتاحه .. مرت الفجريه علي وانه ضايعه بافكاري لحدما اشرقت الشمس وهل الليل على كلبي لمن طل علي بطوله الحلو
يباوعلي بقلق .. صفن بيه لحظات وهوه يحاول يتاكد اني بخير تالي جر حسره ونزل راسه طالع من الغرفه وهوه
الكسره مبينه بعيونه .. خليت ايدي على عيوني محاوله اخفي دموعي وفزيت على صوت بابا لمن لزم ايدي وكال بقلق..
_ها بابا شموخ كعدتي راسج ياذيج تردين اصيح للدكتور
_لا بابا بس شوي ياذيني هسه اخذ حبايه مسكن واصير زينه لا يضل بالك
_متاكده بويه
_اي والله متاكده ..
هز راسه بايجابيه وعيونه تباوعلي بشك راح طلع الكبسول من العلاكه خلالي حبايه بيدي ورجعه وانطاني ماي شربتهه وهوه طلع صاح للممرضه
اجت فحصتلي ضغطي وسكري وكالت ان سكري منخفض درجه لازم اكل شي حلو عاد بابا بسرعه طلع وراهه على ما جابلي ريوك ورجع كلهه كعدت
وبقت تسالني وتطمن على وضعي دخل بعدهم عني وكعد كبالي فتح العلاكه طلع منهه كيك ساده وحالي صار يوكلني بيده ويشربني عصير لحدما
خلصن وشبعت كلت الحمدلله واحس توه الدم مشه براسي .. تمددت فتره وهمه يسولفون عن
الضغط واسباب السكته القلبيه عكدت حواجبي باستغراب وكتلهم موجهه السؤال لابوي..
_ شنو منو الصار بيهه سكته قلبيه بابا
_ انتي يابويه الصار وياج البارحه هوه سكته قلبيه بسبب ارتفاع الضغط وانسداد بالشريان
_لا صدك
_اي والله يابويه وعساهه بروحي هل سكته ولا بيج
_اسم الله عليك بابا لا تحجي هيج انه شلي بدنيا بدونك يابويه تنعدم عافيتي والله
_اسم الله عليج بنيتي
_بس بابا انه ماصار عندي اعراض بوقتهه قويه فقط وجع لازم كلبي فجاتا وحيلي انهد دايخه
_اخوج محمد يكول بدت تبين عليج من جنه طالعين وراسج صار ياذيج وصرتي صفره بس ماخله باله واستبعد من ان تكون سكته قلبيه ومنا احنه زودناهه عليج
من رجعنه للبيت فالحمدلله لحكنه عليج وماصار بيج شلل نصفي لو صرع يابويه والا جان انجلطت وراج
_شلون تحسين راسج صار هسه
_بعده شوي يصل علي من هاي الجهه
_اي هذا الم التعب طبيعي هسه بس تنامين ترتاحين يروح
_انشاءالله ..
هز راسه بايجابيه ودخل محمد جايب ريوك الهم كعدوا ياكلون لفات وعصاير وانه اباوعلهم اجه الممرض راد ولي امري وراح ابوي وياه لبره فتره ورجع وهوه يصفن وسألوه الولد..
_ها بويه خير شكالك الدكتور وشراد منك
_بويه محمد يكول لازم هل يومين نبقيهه بالمستشفى تحت المراقبه لان حاله كلبهه مو مستقره بعدهه والشريان لازم ياخذوله اشعه باجر
_اي نخليهه شكدما تحتاج بس خلي تصير زينه وتكوم بالسلامه
_وهوه هيج
_وبس هاي يعني ماكال شي ثاني لان وضعك ماعاجبني
_لا بس خفت عليهه ليش حتى يبقيهه هل يومين مدام كعدت ومابيهه شي
_يجوز هيج حتى يتاكدون اكثر لا تخاف مابيهه الا العافيه وكلهه يومين وتطلع انشاءالله
_انشاءالله يابويه انشاءالله..
باوعتله تنهدت وبادلني بنظره خوف وقلق ابتسمت وغمضت عيوني اطمنه وهوه اجه علي باس راسي ومسد عليه وبقه كاعد يمي للضهريه كاموا راحوا
للجامع يصلون هوه ومحمد وسلام وامي بقت يمي كامت توضت وفرشت مصلايتهه بالغرفه وصلت فتره ورجعوا وهمه بيدهم علاليك الغده
فرشوا عل ميز وكعدوا ياكلون وامي تشربني الشوربه لحدما شبعت كلت الحمدلله ورجعت تمددت مغمضه عيوني بتعب فتره وفتحت عيوني
فازه على صوت ريانتي وهيه تصيحلي ماما اجه شايلهه احسان اخذتهه منه بلهفه وتحمدلي بسلامه
هوه وجنان وبقوا يسالوني يتطمنون علي بقيت ريانتي بحضني وانه ابوس بيهه واحضن كعدت جنان يمي وكالت بقلق..
_شلون صرتي هسه ليش خلاج الدكتور بعد يومين تبقين صاير شي
_لا ماصاير حبي بس حتى يتاكدرون من سلامتي اكثر
_اي الحمدلله طمنتيني
_احم جنان قربي شوي
_ها حبي كولي
_شفتي بره لو رايح
_منو هوه
_شسمه ابن خاله وفاء موجود بره بعده لو راح
_لا ماموجود رجع من الفجر لبيت عمو شهم طمنه على حالتج ولم ملابسه راد يروح ويرجع لمحافظته بس ابوي لزمه كوه وحلف عليه مايطلع من البيت بدون علم عمي شهم والا ترجعون من المستشفى ويسمحله عمي يروح ياله يتركه
_ليش منعه ليش ماخلاه يطلع
_ماعرف يجوز ابوج مخابره لابوي وموصي مايخلي راهب يطلع لو رجع للبيت
_استغفرالله ياربي شلون بله انه بابوي مو كال ماراح اضغط عليج بعد مو كال التردينه يصير ليش بعده لازم راهب من خوانيكه ومايقبل يخلي يروح
_اهدي حبيبتي لا تعصبين تره بعدج انتي عقلج رجيج لا يطير نوب وتتخبلين علينه فوك مانتي متخبله
_ليش هوه انه ضال براسي عقل هنه هاا كدوتهن ذرات وطارن بالسكته البارحه
_ههه ماتشوفين شر يبعد حيلي
_مرمرتني روحي خيه مرمرتني
_الله يساعدج ويهديج للطريق الصحيح
_امين رب العالمين ..
ابتسمت ومسدت على كتفي بحنيه ابتعدت ريانه من حضني وكعدت كبالي لزمت اصابيعي تعد بيهن وهيه تحجي بتقطع..
_ماما هذا داده مو حلو
_منو هوه ماماتي
_هذا هيج هوه هيج لابس هداء شبير
_داده مرتضى
_لااا مو هوه
_جا منو
_واهد هوه هوه شبير فو فو فوووك داعد ..
ابتسمت على سوالفهه وشلون توصف بيدهه الشافته وكلمه مفهومه وكلمه لا وماخليت بالي ويه كلامهه ولا ظنيت ان ممكن يكون فعلا اكو شخص
يخوف واكف كبالهه مثلما كالت .. بقيت العب بشعراتهه وصافنه براهب يريد يروح مو ليش يجي وليش يحجي هيج اذا هوه هيج ناوي الرجعه اصلا
ليش حتى يعذبني هل شكل يجي يحجيله كلمتين يخربطلي كياني بيهن وتالي يرجع يبتعد اوو هسه انه الثانيه شريد منه خلي يروح بعد احسن خلي
يعيش حياته ويتزوج ويخلف شكو كلبي يحن عليه ومخلي لازك بيه مثل لزكه العلج ..استغفرالله ربي استغفر الله حلتهه يمك ياربي وبس انته تكدر
تحلهه لهل عقده يلي عقدت روحي وحياتي وحتى شرايين كلبي .. غمضت عيوني وهزيت راسي
بحيره وخنكه حاوطت صدري وملل قاتل اشتاح جسدي كثرما بقيت نايمه كل هل ساعات باوعت لابوي وكتله بتوسل..
_ماكدر حباب روحي حاجي الدكتور وساله اذا اكدر اطلع لان مخنوكه كلش
_تمام رايح اشوفه بله واجيلج ..
هزيت راسي بايجابيه وراح فتره تالي رجع وهوه بيده كرسي متحرك باوعلي مبتسم وكال..
_كال عادي تطلع بس لا تطول بره بارده وخاف تتمرض وصدرهه تجي رطوبه
_لا بس شوي ماطول
_تمام يله تعالي بعد ابوج تعالي..
اجه حضني ورفعني مثل الجهال وكعدني بالكرسي ضحكت على حركاته وهوه يجيب بالملحف يغطي رجلي عن البرد كام عدل الشال وضم شعري
وسحبني طالع بيه للساحه افترينه شويه وانه اباوع للسما مغيمه والهوى بي بروده خفيفه ابتسمت وغمضت عيوني وانه استنشق الهوى البارد
متاكده هذا عطره مو غريب علي بس ليش كاعد اشمه بمكان بي بس انه وابوي .. صفنت وعبر رجال من يمنه ظنيت ان العطر منه ورخيت ضهري عل كرسي بخذلان وكال بابا بتساؤل..
_شبيج بويه ليش بقيتي تتلفتين
_لا هيج بس عطر الرجال يلي فات عجبني
_ههه اروح اكله على اسمه
_لا عيب شيكول علينه هسه ادريك سبورت بس مو لهل درجه شهمي
_هههه شهمي لو قوسي
_اوسي لو بان ههه
_هههههاي
_ربي يديم هل ضحكه ومايحرمني منهه
_بشوفتج بخير كبالي انه الضحكه واهلهه واهل الفرح همين يعتبون كلبي
_يبعد كلبي كلبك باباتي حبيبي..
ابتسم وعيونه مدمعه باسني براسي وخلاه على صدره غمضت عيوني محاوله امنع دمعتي من ان تنزل واخذت نفس عميق وحبسته ابتعدت عن حضنه وهوه يمسد على كتفي وكال..
_يله بويه ندخل
_بابا
_امري
_ليش ماخليت راهب يروح انته مو وعدتني تخلي يرجع لمحافظته
_منو كلج اني ماخليته
_جا ليش عمي ساجد منعه من الرجعه اليوم الصبح اذا مو انته محاجي وموصي
_اي صحيح انه كتله ووصيته مايخلي يروح لو راد بس مو لاني عندي نيه وياه لا وانما هوه وامه خطاري يابويه وزحمه وعيب اخليهم يرحون بهل شكل هذا الضيف اله احترامه وكرامته يابويه
_احم اشوفك البارحه ردت تزرف صدره بجيله
_البارحه يوم واليوم يوم جديد هسه مشيهه واعتبري الصار البارحه كله حلم
_همم تمام اجرب
_ههه يله خلينه نفوت لاتأخذين برد وتتمرضين مو زين عليج وانتي بهل حاله
_يله تمام ..
كام على حيله صار وراي واخذ يدفع الكرسي الي لحدما وصلنه للغرفه دخلنه ولاحظت على محمد ماموجود كعدت عل جربايه وابوي سال سلام وين محمد وكاله وهوه عينه علي..
_احم بويه محمد راح يم راهب قبل شوي اجو للطوارئ هوه وامه
_ليش شبيهه امه
_مادري فجاتا متخربطه عليهم وطاكتهه حمى جنه يمهم وهمه يفحصونهه شكو بيهه عدهه كورونا فكالوا راح ياخذولهه مسحه منا لباجر ويراقبون الحمى مالتهه اذا تنزل او لا
_هاي شنو منين اجتلهه هل مكروده وهيه محبوسه بالبيت
_والله مادري على كوله الدكتور كورونا منتشره بالهوى مو شرط واحد يختلط ويجوز من البارحه من طلعنه مخالطه شخص بي كورونا وعاديهه
_يله بله الله ينجيهه نوب هيه مره جبيره ومريضه وينهه وين الكورونا بس كون ماتطلع بيهه
_انشاءالله مابيهه شي
_وهسه محمد بقى يمهم
_اي هوه ومرته وراهب يمهه ضالين
_جا مرته حامل شلون يصير يبقيهه بالطوارئ وكله امراض خلي اروح احاجيهم لا تنعدي وتروح ابنهه
_تمام يله ديربالك عليهن
_انشاءالله..
طبطب على كتفه وراح ابوي وانه بقيت الوب بمكاني منين اجتلهه كورونا وشلون صابتهه معقوله صدك من البارحه بس لا هيه تبين وره ١٥ يوم اذا
الشخص منعدي او لا يعني مو من البارحه استغفرالله ياربي شلون بيهه هل مره ماعدهه حظ منين اجتلهه وهيه منا ضغط وسكر وعضامهه
تعبانه يارب نجيهه وكومهه بسلامه يارب مايطلع بيهه كورونا والا صدك تروح بيهه لا سمح الله ..
بقينه ننتظر فتره ودخل ابوي هوه وعبير هيه شافتني لو انهارت اجت علي حضنتني وصارت تبجي وتكطع كلبي بكلامهه..
_شمووخ امييي راح تروح من ايديي ولج امييي شسوي لو طلع بيهه كورونا وهيه ضغط وسكر والله تموت ماتتحمل هل مرض تمووت
_لا يروحي لا تكولين هيج مابيهه الا العافيه انشاءالله لا تبجين مابيهه شي هسه تلكيهه ماخذه برد من طلعه البارحه ومصخنه وبس ينطونهه مغذي وخافض حراره تصير زينه وتكعد لا تخافين
_ولج يكول الدكتور شاك بيهه كورونا يعني لو مامتاكد مايكول هيج مايحجي ويكطع بروحي عليهه
_مايفتهمون هذول الدكاتره وهل وكت كلما شافوا واحد مصخن لو يكح كالوا بي كورونا
_هيج رايج
_اي يروحي انشاءالله مايكون بيهه شي ومنا لليل تكعد وتسولفين وياهه وتشوفين صحتهه تمام
_انشاءالله يارب انشاءالله والله اذا صار بيهه شي ماتحمل والله اطك واموت وراهه
_لا اسم الله عليج وعليهه ماراح يصير بيهه شي خلي عينج بعين الله وكولي يالله واهدي انتي مو بس بنت خاله وفاء هسه انتي ام لطفلج الحاملته ببطنج مايجوز تكطعين بطنج قهر لا يروح بيهه يمعوده
_مو بيدي شموخ والله مو بيدي نار وتسعر بكلبي شوفه امي وهيه معلكيلهه المغذي وحالتهه حاله
_الله يشفيهه ادعيلهه ربي يكومهه بسلامه ومايكون صاير بيهه مرض خطير خلي ايمانج بالله قوي لا تضعفين امج وابنج بحاجتج هسه لا تروحين واحد بيهم من وره البجي والقهر وتالي تتندمين
تحجي بدون وعي وسكتت لمن وصلت لكلمه بس وشكلهه تذكرت حاله خالتي مثلما كالت هسه باوعتلي وعيونهه حمره ورجعت نزلت دموعهه
وصارت تبجي بقهر مرمرت روحي حضنتهه وبقيت امسد على ضهرهه لحدما هدات من وحدهه وابتعدت شربتهه امي ماي وحجت وياهه وكامت
ودتهه للحمام تغسل وجهه .. جريت حسره وعبالك طلع دخان من صدري على هل قهره هاي اجت ريانه يمي ابتسمت بتعب ونزلت اخذتهه لحضني
ردت ارجع اتمدد ماكدرت عبالك سجين وجمدت بكلبي والكاع افترت بيه نزلت ريانه من حضني حتى لا تطيح وانه الدوخه لاطشه بيه غمضت
عيوني وبقيت اتنفس بعمق وهيه تزيد اكثر جسمي صار يرجف ولساني انربط وخدر مديت ايدي كوه عل كلاص طيحته بالكاع محاوله اسوي صوت
وراحت ريانه تركض لبره تصرخ خايفه علي ..دخل سلام وهيه وياه باوعتله بتوسل شافني هيج او تخبل اجه ركض علي بسرعه وهوه يحجي وياي
وانه الوشوشه استوطنت اذني وكلبي وايدي اليسرى خدرت وصار جسمي يون علي لزمت ايده عصرتهه حيل وغمضت عيوني على اثر صرخاته مستنجد بالممرضين وماحسيت على شي
منا لمرت فتره بين حلم وحقيقه بين الكاعده والنايمه ايد حنونه وخشنه تمسد على خدي وشخص يهمس بصوت خشن يم اذني بآيات قرآنيه
وينفخ بوجهي وريحه الجكاير استوطنت صدري فتحت عيوني وانه ماشوف غير ضباب كبالي ثواني ووضحت الرؤيه عندي وشفت ماكو احد بالمكان
الحسيت ان اكو شخص بي التفتت عل جهه الثانيه وشفت امي كاعده عل كرسي وايدهه على خدهه مغمضه ونايمه وريانه عل قنفه منومتهه
والغرفه ضلمه بقيت اتلفت بحيره واستغراب.. شويه ودخل ابوي وسلام شافوني كاعده واجو علي لزمني بابا من خدي وايقنت ان الايد الجانت
تمسد علي مو ايد ابوي رغم نفس الدفو بس مو نفس الملمس فزيت من صفنتي لمن هز كتفي وسالني بقلق..
_بويه شموخ تسمعيني ليش ساكته لا تخوفيني عليج بويه احجي كلمه
_ها بابا
_هففف الحمدلله يارب الحمدلله ولج بويه وكفتي كلبي عليج صار ساعه اندهلج وانتي ماتجاوبيني وبس صافنه بالفراغ
_شنو صار بابا
_ماصار بويه لا تخافين رجعي نامي ارتاحي حبيبتي
_ليش اغمى علي فجاتا مساع..
باوع لسلام بحيره ورجع باوعلي وفتحت عيوني بصدمه لمن كال ..
_صارلج ٣ ايام يابويه من اغمى عليج شنو من مساع
_صدك
_اي والله صارت عندج مضاعفات لمن ارتفع ضغطج ورادت سكته ثانيه تصيبج لو لا لطف الله وصرخه ريانه لاخوج والا جان رحتي بيهه لا سمح الله...
شكرا لزيارتكم عالم روايات سكيرهوم
