رواية فصلية بديلة ( شموخ ) الجزء الثاني الفصل السادس والخمسون بقلم ام ملكوت
:- وصلنه للبيت ونزلت اخذت ريانه من سلام حضنتهه ودخلت بيهه لداخل البيت وبوجهي رحت لغرفتي نزلتهه بالكاع وتوجهت للشباج قفلته زين
وسديت البرده اجين بدلت ملابسي وضميت السلاح جوه الملابس ردت اطلع ورجعت كلبي
_تمام تعالي ..
كامت وصعدنه فوك انه وياهه دخلنه لغرفتهه طلعت السلاح من جوه ملابسي و انطيته الهه اخذته من ايدي وهيه رافعه حاجبهه بتفاجئ و تكول..
_ولج هذا شثكله شلون تشيلينه
_عبالج هينه بقيت سنوات اعاني من ثكله لحدما اخوج علمني عليه
_علمج عليه شنو يعني على وجوده على ثكل السلاح
_عبورره فهمتي قصدي لا تحرفين الحجي
_ههه لا بس سالتج حتى الطف الجو
_هوه مال تلطفين الجو بهل زلك هذا
premium
_انه كاعد احجي على ثائر ادري بيج مهووسه باخوي بس مو كلشي ربطتي بي
_لاا هوه انه هم احجي على ثائر سلمنه ملفه للقضاء وهمه راح يشوفون شغلهم وياه ويمشي بدربه وانه بدربي بعد
_هممم صدكتج
_اوو عبير صايره ماصخه كلش
_اذا اخوج بكل شفطه منه ياخذ نص كيلو شكر مني شلون ماصير ماصخه
_عابت شكله الحمل مطلع عينج وصرتي سرسريه
_والله محد مطلع عيني غيركم انتي واخوج
_وشمسويلج اخوي ولج
_اححح كولي شنو المامسوي بحالي
_تدرين شنو يا شموخ
_غردي
_اكثر شعور حلو بالدنيا لمن تخلين راسج عل مخده البارده ويجي عزيز كلبج ينومج على كف ايده الدافي ..
حجت كلامهه بطريقه ماعرفت افسرهه خلت جسمي يتقشعر ولا اراديا تخيلت نفسي وراهب بهيج موقف تحمحمت ونفضت هل افكار من بالي وضربتهه خفيف على راسهه وكتلهه..
_سوالفج انتي ورجلج مالت الحب خليهه بعيده عني فدوا تره ماناقصه لعبان نفس
_اشوفج سرحتي بخيالج توه
_صايره تالفين كلام وشغلات ماصايره شكله الحمل ماثر عليج زايد
_اي خيه اي بلكي ياثر عليج بالايام الجايه
_همم تمام سبحي خيه سبحي بلكي يرجع عقلج لراسج
_اي وراح ادعي ربي يرجع عقلج وياي ..
باوعتلهه بنص عين وهيه ضحكت علي هزيت راسي باسف ونزلت انه وريانه واجه بوجهي راهب ردت انزل من جهه وصار كبالي رحت عل ثانيه
وصار كبالي وانه عيوني ماكدرت احطهه بعيونه بقيت واكفه وهوه تافاف ورجع نازل من الدرج وكف على جهه كالب وجهه ورحت انه للصاله
وكلبي احسه طاح بمعدتي من هل موقف كعدت اخذ نفس ودخلت عبير وراي باوعتلي مبتسمه
خزرتهه وهزت راسهه باسف وضحكت خفيف سالهه محمد شكو والعبوره كالتله محاوله تسمعني..
_وحده الله ماخذ عقلهه ومخلي مكانه حجار لا يضل بالك يمهه حبيبي تريد اسويلك عشه باجر عندك دوام الصبح لازم تنام من وكت
_لا عوفي العشه بعدين تعاي وياي اريد اكلج على شغله
_شنو هيه الشغله
_تعاي للغرفه وانتي تعرفين ..
باوعتله بشك الغبيه وراحت وراه ضحكت عليهه وكلت حل وياهه خلي تستلمهه مساع تضحك علي وهسه تسمعني كلام ومنا لبعد دقيقه تضل تصيح لربهه ..
هزيت راسي باسف ورفعت انظاري عل تلفزيون بقيت اباوع ويه امي وابوي لحدما صارت ب١١ تقريبا كمت جبت فراش الي ولريانه فرشته بالصاله وكال بابا باستغراب..
_الي ولريانه بابا ماكدر ارجع انام بالغرفه حاليا منا ليلزمون ثائر ما اامن بي
_اي بس ليش بالصاله تعالي لغرفتنه انه وامج نامي انتي وبنيتج
_لا بابا خليني هنا ارتاح اكثر وهيه غرفتكم صغيره ماريد اضايقكم
_لا شسالفه امشي روحي نامي يم امج وانه راح انام بالديوان لو بغرفه سلام
_لا ابد والله ماروح
_اها
_والله خليني هنا حبيبي بابا ارتاح اكثر وهم مكان واسع تدري بريانه تضايق من الغرفه الخنكه
_تمام براحتج جا يابويه اهم شي ريانه ماتضايق
_ههه اي حبيبي
_يله نامي ورتاحي واحنه خلينه نروح ننام تعبنه
_روحوا ارتاحوا يروحي تصبحون على خير
_أجمعين بنيتي ..
مسد على راسي وبست امي بخدهه وابتسمت طلعوا من الصاله وقفلت الباب وراهم قفلت الشباج زين و تمددت عل فراش واخذت ريانه يمي
منومتهه بحضني وكضيت الليل اصفن وافكر شلون لو حاول ياذيهه شلون اذا ماكدروا يلزمونه ورجع شرد مره ثانيه شلون اذا سواهه شغله عناد
ويجي يخطفهه مني لا اسم الله فال الله ولا فال بنادم انشاءالله يلزمونه انشاءالله مايصير شي من الكاعد افكر بي يارب دخيلك امتحنتني ببنتي مره
لا ترجع تختبرني وتمتحني بيهه لان هل مره ابد ماتحمل يصير عليهه شي لو شخص ياخذهه مني اموت ياربي ونظر عينهه ماتحمل لو حاول ثائر
ياخذهه مني ونجح بهل شي .. بقيت الوب واتكلب بفراشي وانه جافه عيني النوم خليت ريانه نايمه وكمت اخذت مفتاح سيارتي وطلعت للساحه
صعدت بيهه وسديت الباب وانه اراقب بالحديقه خاف يحاول يطفر على بيتنه مره ثانيه مرت ساعتين تقريبا شفتهه صارت ب٣ بليل اخذت نقالي
ربطته بالمسجل وشغلت "مناجاة المفتقرين / احمد الفتلاوي" نصيت الصوت حتى لا يطلع لبره ورجعت راسي عل كشن حاضنه رجلي لصدري
غمضت عيوني وانه استمع بكل جوارحي اله وكل ذكرياتي ويه ريانه تكونت كبالي وهاجمتني ذكريات راهب من جهه ثانيه وانه
روحي تعتصر ودموعي تنزل لا اراديه كلما تذكرته من كال للمحقق ساهر ان بي كورونا ومايصير يسلم عليه يعني طلع بي وماكايل لاحد من عدنه
حتى لا يقلق احد عليه او حتى لا يوصلي هل خبر واشفق عليه .. جريت حسره وفتحت عيوني وانه اشوفه من بعيد واكف يم المطبخ ويدخن ويحبس
الدخان بريته رجف كلبي عليه وانه اشوفه هيج يعذب بروحه تذكرت كلام عبير لمن كالت صار بكل مهمه اله يشمر روحه بحلك الموت حتى ينسى
ويتعارك ويه خالتي كلما حاولت تقنعه يتزوج .. حاولت اتجاهل وكفته هاي واتجاهل وجوده كبالي بس ماكدرت لزمت النقال طفيت الدعاء ونزلت من
السياره مشت خطواتي متردده وكلبي وجسمي يرجف بتوتر باوعلي وعكد حواجبه باستغراب وباوع وراي شاف السياره بقت مشتعله كلوباتهه
ودار انظاره عني بقه واكف بمكانه عكس كل مره لمن يشوفني يخلي ويدور وجهه ويبتعد عني ..
اجيت باتجاهه ردت ادخل بس كلبي منعني شديت قبضه ايدي والتفتت عليه باوعتله وهوه يدخن وكتله بصوت شبه مسموع..
_عوف التدخين مو مريض انته
_ما خصج
_راهب
_خير
_ليش هيج تحجي وياي
_كاعد احجي طبيعي مثل اي بشر عادي واكف كبالي
_تمام يجوز هذا تفكيرك هوه يلي راح ينجيك من هل حب واللعنه يلي لازمتك سنين طويله
_كولي شعندج
_اريدك تنساني وتبتعد عني
_وهوه هيج وباجر راح يصير هل شي
_شنو يصير باجر
_راح اخذ امي بما انهه تحسنت شوي وارجع لولايتي
_ومرضك
_ما خصج بمرضي
_شلون ماخصني هوه هذا حجي ياراهب انته مريض ومايجوز تروح مسافات بعيده وتتعب روحك بالشغل
_ ومره ثالثه اكلج ما خصج
_لا خصني وغصب عنك تسمعني وتكعد وتسكت هنا لحدما تطيب ذيج الساعه روح وين ماتريد
_توج ردتي ابتعد عنج واروح وهسه تكليلي ابقى انتي شنو تردين بالضبط هاا شنو هنا موجود كلبج شنو ضامر بداخله فهميني ..
بقه يحجي بحركه كلب وياشر باصابعه يلي بيهه الجكاره على جهه كلبي باوعتله وبلعت ريجي بصعوبه وانه احس
اختنكت من الدخان انتبه علي وبعد الجكاره شمرهه بالكاع وداس عليهه بحركه كلب وهوه داير ضهره عني ويكول..
_خلاص مو انتي ماترديني مو انتي رفضتيني حتى اخر رمق من انفاسج هاي هيه لعد لا تدخلين بيه ولا بمرضي ولا تملين علي اوامرج مفهوم
_ وراح تكدر تنساني
_وليش ماكدر عادي حتى لو مانسيتج مايهمني راح ارجع اعيش حياتي واتزوج واخلف وافرح كلب امي بضناي قبل لا تموت محرومه
_بهل بساطه
بكلبج عل اقل لخاطر ريان واحتياجهه للاب عوفي عنادج وخلينه نلتم ببيت واحد وريحي كلبنه كتلج لا تحرمين بنيتج من حنان الاب لجج وصلت المواصيل بالتهديد والاجبار وانتي بقيتي شامخه ومصره على قرارج ولا خفتي على حياتي ولا همج ابوج يغضب عليج واصريتي وكلتي كدام الكل ماريده ولا اريد اتزوجه لراهب وانه كتلج من قبل انتي رفضتي وصديتيني مرتين وهاي الثالثه ثابته ما من وراهه رجعه
_راهب..
كلت اسمه وانه دموعي تصب ومنزله راسي بفشله وندم حسيت فعلا مثلما كال هل مره ما من وراهه رجعه حسيت اني فقدته فعلا رغم واكف كبالي حاليا ..التفت علي وهوه عيونه حمره ويبلع ريجه بصعوبه صار كبالي مباشرتا ورجع كال وهوه ياشر على كلبه..
_لجج هذا الكلب حبج ١٢ سنه تفهمين شنو ١٢ سنه يعني المتزوجين بهذاك الوقت طفلهم عمره ١٢ او ١١ سنه لجج لو تحسبين عمري ويه عمر هل حب راح يصير ماخذ نصه وانه عرفتج عمري بس ٢١ سنه وحبيتج ولحد هذا
يومي باقي احبج ومتامل بنظره حب من عيونج وبهل سنين المرت ناس تزوجت وناس خلفت وناس سجلت جهالهه بالمدارس وناس ماتت
و ٤٨ فصل مر وانه باقي على فصل الشتا ذاك العرفتج بي متعلقه روحي بزوايا ذكرياتج بس خلاص اكتفيت من هل حب وروحي جزعت خليني اعيش الباقي
من عمري بعيد عنج ولو ملجوم بس عل اقل اكدر ابث الفرحه بكلب امي بشوفه ضناي وادري ماراح تقتنع روحي تحب غيرج وماراح يرضى صدري
ولا جفوف اديني تحضن غيرج بس اكدر اعيش بسلام وبال مرتاح والاخذهه تصيرلي سند وعزوه لكبرتي انه وامي وماتصدني بكل مره اطلب الحب منهه فلهنا خلاص يا شموخ كلشي انتهى وخلص ولهنا
نهى كلامه وانه عيوني متعلكه بعيونه وابجي بهدوء وروحي تحترك بكل كلمه يحجيهه صفن بيه لحظه وفرك وجهه بحيره ومشه خطوات يريد يدخل
عبر من يمي وكلبي واحتياج روحي اله هوه يلي جبرني وخلاني ارفع ايدي لازمه معصم ايده وكف جامد بمكانه بصفي والتفتت وراه ببطئ وتردد خليت جبيني
على ضهره وانه اسمع صوت انفاسه تتسارع بجنون وهوه جامد بمكانه ورافع راسه للسما وايده شاد قبضتهه.. بقيت على هل وضع دقايق واحنه ساكتين وبكلبي تمنيت وردته يفهمني ردته
يعرف البيه والبداخلي اله ردته يحس بلوعتي وان هل حب والفراك مو سهل علي انه همين .. ومن بعد افكار طويله وتردد عميق شديت قبضه ايدي محاوله استجمع قوتي وحجيت بصوت تعبان وانه راسي على ضهره ..
_شمهما حجه لساني ورفضك وشمهما حاول عقلي ينكر وجودك ورافض فكره القرب منك ومهما صار ودخل بيناتنه وفرقنه ف راح تبقى
روحي هيه الامر الناهي بهل قضيه راح تضل روحي تعلن حبهه الك وتمسكهه بيك لاخر رمق بيهه عكس لساني وعقلي وهل ظروف
المانعتني عنك ولحدما روحي تصعد لباريهه راح يبقى الك مكان بيهه او بالاحرى راح تبقى كل تفاصيلك متعلقه بيهه واتمنى تنسى كلام لساني
ورفض عقلي وتتمسك بروحي المتمسكه بيك ولا تتخلى عنهه شمهما حاولت الظروف الصعبه وكلامي يتدخل بيناتكم ..
كملت كلامي وهوه احس نفسه انقطع ثواني لزم ايدي نزلهه عن ايده والتفت علي يباوعلي بتساؤل نزلت راسي متشرده من نظراته ورجع رفع راسي باصابيعه وكال بغصه بعدما تنهد ..
_بس شموخ الحب مايكفي
_وانه اعرف هل شي بس بالنسبه النه احنه يكفي واكبر دليل على كلامي ان الحب خلانه نبتعد كل هل سنين عن الجنس المقابل ونحافظ على
نفسنه حتى نكون نصيب للنحبه وبس رغم اني فشلت بهل شي بس بقى كلبي وروحي ملك الك بعد رب العالمين
_وشنو الافهمه من كلامج يعني وتالي من بعد هل كلام شنو المطلوب مني شنو التردين اسوي بهاي الحاله وانتي تحبيني وتتشردين مني وتسمحين للظروف تدخل بيناتنه..
بلعت ريجي بصعوبه وروحي صرخت بداخلي وهيه تكول لا تعوفني لا تتخلى عني لا تكرهني وتكف عن حبي لا تحرمني من طلتك لا تحرمني
من شوفتك لا تحرمني عطر انفاسك راهب خليك وياي خليني ارتمي بحضنك خلي انفاسي تختلط بانفاسك خلي روحنه تصير وحده وننام
على فرد مخده كل العمر .. جانت كل هل كلمات والطلبات روحي تصرخ مطالبه بيهن وانه اباوع بعيونه بس ماكدرت انطق غير بكلمتين طلعت مني لا اراديا اختصرت كل معاناتي وكل احتياجي اله..
_راهب احبك
_هاا
_روحي هايمه بيك وكاعد تصرخ بطلبات مامعقوله ومادري اذا تسمعهه انته او لا..
بقه صافن بوجهي بتساؤل ويبلعم وعيونه تتجول بملامح وجهي محاول يستوعب الكلمات يلي حجيتهن نزلت انظاري عنه ودخلت للصاله متشرده ومستسلمه من لوم عقلي وتفكيري بالعواقب
عايفته لراهب وراي باقي بصفنته ضايع بين الحقيقه والجذب بين اليصدك وبين اليتجاهل كلامي وبين يروح لو يبقى يمي وبين اذا جان
الحب يكفي او مايكفي بس يكفي اني بينتله ان اعترافي هوه اشاره لقبولي بالمشي خطوه اتجاهه وموافقه مني على الارتباط بي ..
طليت عليه من الشباج وهوه التفت علي باوعلي واجه بخطوات متردده رفع اديه خلاهن على اديني اللازمه الشباج وكال بتساؤل..
_شموخ تردين احاجي عمي باجر
باوعلي بترقب بعدما نهى سؤاله وانه احس وجهي جمر من التوتر والفرحه والخجل ماعرف شصار بيه.. ابتسمت برضى ياله ارتخت ملامح
وجهه بسعاده وجر حسره براحه وهوه عيونه تلمع سحبت اديني من جوه اديه وسحبت البرده وكفت سانده ضهري عل حايط وانه روحي
تخربطت علومهه ومو كادره تبقى بمكانهه صار ودهه تطير وتحلق لمكان بعيد بهاي اللحظه من سعادتهه .. هاجم كلبي وضلوعي البرد والوجع يلي
جان مضمور بداخلي وهوه يحاول يطلع من روحي واتخلص منه لزمت صدري بالم ونزلت كاعده بالكاع .. رفعت راسي للسما وبجيت بضيقه
من تعب السنين وشقاء الايام بجيت ندم على كل لحظه وكل مره رفضت بيهه راهب وبعدته عني بجيت لان خليت نفسي بمكانه مساع وحسيت
بوجعه يلي خلف سجاجين بكلبي ماظن تروح اثرهه بجيت بصوت مكتوم وانه الغصه مستوطنه بلعومي فزت ريانه تدور علي واجيت اخذتهه
لحضني وهيه تباوعلي بقلق ضميت وجهه صدري وحضنتهه وانه احاول اوكف دموعي بس عبث عبالك صار سنين هل دموع متجمعه بعيوني وتوه
ياله اطلق سراحهه .. بقيت مستسلمه للدموع وانه اهز بريانه بحضني حتى ترجع تنام لحدما مرت ساعه تقريبا سمعت الآذان وريانه نامت خليتهه
بمكانهه وكمت توضيت ورجعت فرشت المصلايه ووكفت اصلي الفجر وانه دموعي مستمره تنزل بلوعه فرح على ندم على هول الفرج وحلاوته
كملت صلاتي وبقيت ساجده لربي حمدا وشكرا دقايق وكمت مسحت دموعي واخذت نفس عميق رفعت راسي وانه افكر براهب وشنو حاله هسه
وشلون راح ينام الليله ادري بي راح يبقى يلوب .. بهتت ملامحي وانه استرجع مساع لمن خليت راسي على ضهره وريحه الدوه طالعه من جسمه
سوده بوجهي عسى المرض بروحي ولا بيك يبعد روحي انته ياربي اشفي ونجي من هل مرض يارب دخيلك لا تخلي حالته تنتكس ويصير بي شي ..
"اللهم اني استودعتك روحي ومن يسكن فيها وهو الان مريض فاسالك يا الله ان تشافي سقمه وتداوي جرحه وتجبر خاطره وان تيسر حالهه
وتمد في عمره وان ترزقه من حولك وقوتك وترزقه من طيب كرمك اطيب الحلال وان تجعلني حلاله وتجعله نصيبي وتبارك لنا في عمرنا
وصحتنا وحياتنا وزواجنا وتتقبل اعمالنا وان تجمعنا معا على قبلة واحده نتوجه بها اليك ونعبدك ونرجوك خاشعين ، آمين رب العالمين "
ختمت الدعاء بالصلاة على محمد وسوره الفاتحه واهديتها لام البنين عليها السلام ب نيه الفرج لفيت المصلايه وكمت نزعت الشال عن راسي وتمددت يم
بنيتي حضنتهه وغمضت عيوني براحه ونمت واول مره احس تهنيت بنومتي وتعمقت بيهه للضهر كعدت على صوت امي فتحت عيوني واشوفهه
كاعده هيه وابوي يم راسي يسولفون كمت صبحت عليهم وباوعلي ابوي وعيونه تلمع ابتسم بوجهي ورفع ايده ماشرلي اجي يمه ..عدلت شعري واجيت كعدت يمه خله ايده على كتفي باس راسي وكال ..
_اليوم اتصلت على احسان وكتله ياخذلج اجازه مرضيه تجنبا لاي مخاطر خليج بالبيت هل فتره على ما يلقون القبض على ثائر
_ماكدر بابا شغلي محتاجني راح ابقى بس اليوم وباجر لازم ارجع بس ريانه خلوهه يمكم لا تودوهه للروضه
_ماشي تمام مثل ماتردين
_اي بابا حبيبي
_اييه الا صدك اليوم الفجريه وبعد الصلاة كعدت بالساحه وكان واحد اجالي من صبحيه الله وعيونه تلمع وطلب الحنايه مني وكال ان حنايتي رفعت العلم الابيض ..
رفعت راسي باوعتله وهوه يحجي ويه امي ويسمعني الكلام ابتسمت وامي سالته باستغراب..
_اي طلب ايدهه مني وكال عمي رايد ثمار سنيني منك
_معناهه راح تجيلهه خطابه على هل حجي ولو هوه ماشفت حالهه قبل فتره شلون تخبلت لمن حاولت تجبرهه على راهب تريدهه تتخبل علينه مره ثانيه
_واذا كتلج ان راهب نفسه الطلب ايدهه مني اليوم
_شنوو قصدك يعني الاجالك بالحلم راهب
_لا مو حلم هذا ياسماءي هاي الحقيقه التشبه الحلم
_ههه شكله يريد الجيله هل مره من سلاح شموخ
_ههههاي ..
ضحكت على ضحكه ابوي وكلام امي وهيه تباوع بجديه عفتهم يحجون وكمت من يمهم رحت لغرفتي سديت الباب وانه كلبي يخفق بجنون
راسي وضحكت على افكاري واضطراب نبضات كلبي اخذت ملابس ودخلت للحمام سبحت ونشفت وبدلت وطلعت انشف بشعري وجمدت بمكاني
لحظه لمن شفت عبير كاعده ومكتفه اديهه ومخليه رجل على رجل وتباوع بجديه عكدت حواجبي متصنعه الاستغراب وكتلهه وانه اتوجه لميز المرايه..
_خير انشاءالله شكو كاعده هل شكل جنج مومياء محنطه
_شنو صاير من وراي وانه مادري
_شنو شصاير
_شكايله لراهب انتي ومخبلته من الصبح
_شكايله اصلا ماشفته وبعدين هوه اخوج مخبل شنو خصني انه
_شمووخ
_حسني الفاظج يبنت شصاير يعني بيني وبينه هنه جم جمله متكونات من خمسين كلمه والف حرف كدر بيهه يفر دماغي ويفرمته وخله روحي تصيح احبك راهب ..
طفرت من مكانهه باوعتلي وهيه ترمش بعيونهه بصدمه وكالت..
_عليج الله
_اي والله بس هذا الصار بعد شنو تحجين عبالك مسوين شي حرام اعوذ بالله
_يعني اعترفتي لراهب
_اي
_شكتيله بالضبط
_ماكلت غير احبك راهب وكل......
_لجججج ابوسس حلكججج على هل كلمه الطلعت منه وطيرت عقل اخوي وحيدي..
خفيف وطلعت بره تمشي بسرعه وهيه تذب كولات" ياهل القوط ذبو القوط رهباني لبس قاطه"ضحكت على حركاتهه واجيت كملت
تنشيف شعري ومشطت لفيته بالقراصه ولبست الشال طلعت من الغرفه واجه بوجهي مرتضى باوعلي مبتسم وراح جمدت بمكاني وانه مستغربه
هاي بابا طلع حاجي لامه محمد كلهه ولا نوب كلهه فرحانه ويه فرحتي انه وراهب كلت يمكن طلعتي يمهم هسه مو وقتهه خليت ورجعت بخطواتي
2 تعليق
للغرفه ووكفني صوت ابوي وهوه يندهلي من الصاله .. غمضت عيوني بتوتر ورحت بخطوات متردده للصاله تحمحمت وشفتهم الكل كاعد
بالصاله حتى خالتي وفاء وانظارهم متوجهه علي يمكن جانت هاي اكثر لحظه مخجله بحياتي كلهه تمنيت الكاع تنشك وتبلعني
من وره نظراتهم سويت نفسي طبيعيه وجديه ودخلت اجيت كعدت يم ابوي وخله ايده على كتفي وكال..
_بويه شموخ راهب طلب ايدج مني واريد كدام الكل اسمع الموافقه منج احجي يابويه ولا تستحين انتي موافقه
_احم اي بابا
_يعني نتوكل تره هل مخبل يريد يجيب الشيخ يعقدلكم باجر والشور شورج يابويه..
رفعت راسي باوعت لراهب بتفاجئ وهوه يباوعلي بترقب ويهز رجله بتوتر منتظر موافقتي رجعت انظاري على ابوي وكتله..
_بكيفك بابا التشوفه
_يعني نتوكل
_لانج ماكسرتي بخاطر اخوي وماسمحتي يرجع وهوه مخذول
_ماهان علي وصدكي يلي سويته انه والصار كله هذا ماهان علي ولا ردت بيوم يصير بس بعد هيج حكمت ظروفي
_يله الفات مات ومنا ورايح خليج متمسكه براهب تره والله ماراح تلكين شخص يحبج بكثرما يحبج هوه ولا شخص يضحي بسنين عمره ويكضيهه منتظرج ومتولع كلبه عليج مثل راهب
_ادري ياخيه ادري بي بعد حيلي حيله
_يمه اروحلكم فدوا والله حتى ابني احسه كام يركص بطني من الفرحه
_هههه الله يتمملج على خير وتكومين بسلامه يارب
_يبعد روحي ويتتملكم على خير ويجمعكم سويه يارب ..
_هههه ايا كلبه نصي صوتج بالاول واحجي مثل الاودام
_تمام يله سولفي بله شصار وياج حتى الله هده كلبج وقبلتي براهب
1 تعليق
_انتي كلتيهه الله هداني
_اي الحمدلله بس اخاف سوالج شي منا منا وانجبرتي تقبلين بي ولج
_مثليش يعني
_يعني حضنه بوسه مطه على كوله محمد
_عابت ولا وحده
_بسسس لااااا ذييج السالفه ولج
_امداج اي والله صوجي كاعد احجي وياج
_هههه لا اتشاقه والله شبيج
_زوج جواريب
_لا احذيه
_ انتو بناتي لو ولادي
_شنو
_زوج احذيه بناتي لو ولادي
_هههه ايا كلبه
_هههه جا تقصفيني وترديني اسكت
_بعمرج ما سكتي بس يم راهب بعد ايدي
_هههه يله ولي ام حلك وحضري روحج مو اجلتي عرسج علمودنه هسه راح نعرس قبلج
_ههه ناكرين الجميل مو بيدكم بس ميخالف كلهه تهون لو عرستوا انتو وفضيتوهه لان اشتعل جدنه بكبره من وراكم
سديت الاتصال واجيت صبيت لريانه غده بصحن وكعدت اوكلهه كملت واخذتهه رحت لغرفتي كاسرتلهه الماي ودخلتهه للحمام سبحتهه ونشفتهه
وطلعت لبستهه ملابسهه وهيه تركص وتغني من وحدهه وفرحانه بعد روحي حاسه بفرحه امهه .. بوستهه وكعدتهه بحضني امشطلهه وهيه نعست
على ماكملت تمشيطهه تمددت بحضني ونامت ابتسمت على شكلهه الملائكي وبوستهه براسهه بقيت اهز بيهه خفيف لحدما تعمقت بالنومه اكثر
كمت شايلتهه بين ادي خليتهه بغرفه امي ورحت للمطبخ كعدنه نتغده انه وخالتي وفاء وتسولف على راهب وهوه صغير ولمن صار شاب شلون
عاقل وعمره مارافك اولاد مو زينين واصلا قله جان عنده اصدقاء بس لمن دخل للكليه كثروا اصدقاءه بقيت اتسمعلهه بكل جوارحي وهيه
تحجي بتربيته واخلاقه عبالهه مادري بي ولا عندي علم باخلاقه وادبه هذا يلي اختارته روحي ومستحيل الروح تخيب باشخاصهه .. كملنه اكل
وكمت غسلت ماعين وخالتي تشرب جاي كملت وطلعنه للصاله لكيت الولد طالعين كلهم بس ابوي باقي بالبيت يمنه رحت كعدت يمه وصرنه نتابع
مسلسل للمغرب كمنه توضينه وصلينه وتعشينه ورجعوا يكرزون حب ويتابعون اخبار .. كمت انه اخذت ريانتي وطلعت للحديقه كعدت عل مرجوحه
وخليتهه بحضني نباوع للقمر المنور سويه هناك ورجعوا الولد من بره مسيت عليهم ودخلوا للصاله همه وراهب رفعت راسي للسما الصافيه دقايق
ولفت انتباهي شخص واكف يم باب الكلدور التفتت وشفته راهب ابتسم واجه يتبختر بمشيته
وكف بعد مسافه قصيره عني ورفع راسه للسما وصرنه نباوع للقمر سويه هنااك وخطر بالي سؤال وكتله..
_ راهب
_ هااا يا امنيتي الوحيده ياجرحي القديم
_ليش جرحك
_خلينه نكول لجمه
_همم
_كولي يبعد حيلي شنو ردتي تكولين
_ليش القمر يطلع بس بليل
_حتى يضوي ضلمه هل ليل وينور درب النجوم بس تدرين هسه وجوده بالسما ونوره المالي الارض يشبه شنو بالنسبه الي
_ايي
_يشبه وجودج بحياتي هيج انتي دخلتي كلبي وانتشلتيني من ضلمات الوحده ونورتي زوايا كلبي بكلماتج
_زين تعرف منو يشبه بالنسبه الي
_ايي
_لمعه عيونك لمن تباوعلي ..
نزل انظاره علي وصفن بعيوني بهيام وعيونه لمعت ونورت روحي اكثر مما ضوه القمر منور ضلمه الليل بادلته الابتسامه وجر حسره حسيتهه طالعه من
غمج كلبه على كولته اجه صوت حمحمه من ورانه والتفتنه شفناه مرتضى تحمحمت ورجعت انظاري على ريانه وراهب راح ساله اذا محتاج شي كله لا
ماكو شي واخذه وراحوا للديوان كمت انه همين دخلت للغرفه واجت عبير اخذتني من ايدي وهيه تسحب بيه وراهه صعدتني لغرفتهه وسدت الباب التفتت علي وكالت بحماس..
_باجر عقدكم يصير الضهر كال عمي لازم نشوفلج شي يلوك لهل مناسبه حتى تلبسي خو ماتعقدين بطقم دوامج
_اي ليش لا عادي فكره حلوه والله قابل شبي طقم الدوام هل تعرس بي الوادم
_عابت الزلم تلبسه وتصور بي يوم عقدهم مو المره المهم دتعاي خليني اطلعلج فد فستان حلو يلوك لطولج اشتريت فساتين هواي انه بالحنه
_جا عندي انه همين ليش اخذ منج خوب البس مالاتي
_ههه اعتبري نفسج جايه تشترين اكثر قطعه حلوه واثريه من بين هل قطع تمام
_ههه تمام يله نشوف ..
نزلت ريانه من حضني بقت تفتر بالغرفه وصارت عبير تعرضلي فساتينهه بقت عيوني تلمع من الوانهم البراقه وهنه مشكلات فستان وردي
و تركوازي وابيض وبنفسجي واحمر واووو جايبه المحل وخالته بكنتورهه طلع ذوقهه حلو باللبس ومادري اختاريتلي كم فستان لونه حلوه ومناسب
وكمت قستهن عرضتلهه ازياء بيهن وواحد يكول للثاني انه احلى منك وجايات على قياسي بعدما نفص وزني همزين عاد كلهن اخذتلي صوره بيهن
وبقيت اتمعن بيهن والاحلى بالصوره قررت اخذه باوعتلهن واخذت التركوازي لونه حلو على بشرتي وتصميمه يبرز معالم الجسم برشاقه ومرتب ..
حسيتهه فرحانه اكثر مني ضحكت وهزيت راسي باسف على سوالفهه خطيه جان كل همهه خاف احسان اله نيه يتزوجني بالمستقبل عليهه وهسه انزاح همهه وطارت فرح
بخبر خطوبتي مو بس حبا باحسان لا حبا بيه همين .. صعدنه كلنه سويه لغرفه عبير وبدن بيه مكياج وتسريحه واحنه نسولف ونضحك هنااك وكالت زهره بخجل ..
_صدك اكلكم بنات انه حامل ..
التفتنه عليهه بتفاجئ وكتلهه بفرحه..
_صدك والله من يمته ولج
_صار ٣ اشهر حامل ومادري بروحي البارحه رحت للدكتوره وحسبتلي
_جا وين جنتي ولج وماتدرين بروحج
_مو عندي العاده متخربطه ودوم تغيب هل شكل قبل زواجي حتى ماتوقعت ان احبل بهل سرعه واصلا كالولي اذا متخربطه ماتحبلين بسهوله والحمدلله
_هاي شنو منين جابن هل حجي هذا كله رزق وبيد الله يمته مايريد ينطي لعبده والعاده مالهه شغل بسرعه وسهوله الحمل اذا ماجان اكو اكياس او فد شي يمنع الحمل
_اي حتى الدكتوره هيج كالت ومن شافت بطني متكوره كالت يمكن بيج ولد
_ماشاءالله ربي يتمملج على خير وتولدين بالسلامه حبيبتي هوه ولد بنيه كلشي يجي من الله حياه الله اهم شي الخلقه التامه والصحه
_اي والله ويتمملج على خير انتي همين يروحي والله كلش فرحتلج وخاصه لمن سردتلي جنان قصتكم انتي وراهب حيل تاثرت
_ههه ليش هيه شبيهه قصتنه غير عبالك فيلم توم وجيري لو انه اركض وراه لو هوه يركض وراي..
شهكت عبير وطكتني على ضهري وهيه تكول والبنات طكنهه ضحكه..
_فلشج يمفلوكه وينج ركضتي وراه اشو كضه عمره هل مكرود يركض وراج وانتي تشردين منه مثل الفار من يشرد من البزون
_ههه اي مو كتلج فاره وبزون
_هههه ام حلك ..
ضحكن وكملنه شغلنه خلال ساعتين كمت باوعت لطولي والفستان كلش عجبني التسريحه والمكياج فد شي بس الفستان ماعرف حسيته كاشف من جسمي
هواي واستحي اطلع بي كبال راهب لاول مره كلت للبنات وحصلتلي من كل وحده حجايه عاد خليت وسكتت صاحتلنه امي وكالت ان الشيخ اجه لزمت
كلبي عبالك يريد يطلع من مكانه وكل اطرافي صارت ترجف كعدت عل كرسي والبنات خافن وبقن يسالني وانه مادري شصار بيه كعدت عبير كبالي وكالت وهيه تحضن وجهي بثنين اديهه..
_شموخ حبي باوعيلي شبيج شنو صار وياج لا تخوفيني
_عبير ماريد انزل روحن انتن نزلن
_ياا شلون ننزل احنه وهوه الشيخ طالبج انتي العروس
_روحي كليله موافقه لو اريد اوكل ابوي ياخذ موافقتي ماكدر انزل وانطي الموافقه انه فدوا
_شسالفه شمووخ هاي انتي القويه
_لا مو قويه انه بهاي اللحظه احس اضعف كائن عل كره الارضيه
_وهسه شلون
_انطي موافقتي لابوي وخلي يصير موكلي
_مايصير ولج هاي بايام امج وابوج الموافقات تصير عن طريق الموكل هسه مايزوج احد الشيخ الا يسمع موافقه العرسان من لسانهم
_زين لحظه خليني اهده سكتن شويه خلي اصفي افكاري
_تمام ارتاحي شويه بس لا تطولين تره الشيخ راح يخلص عقد راهب..
كملت كلامهه وسمعت هلاهل خالتي وفاء من جوه عرفته الشيخ كمل من تسجيل موافقه راهب زادت
الرجفه عندي واجت امي كالت يله باوعتلي باستغراب وقلق واجت علي رفعت راسي وكالت بتساؤل..
_خير يمه شموخ شبيج ليش هيج عيونج ذبلن كلبج بي شي يمه
_امي خلي يجي ابوي انطي موافقتي ويصير موكل علي
_ياا يمه شهل حجي مايصير هذا الشي هسه صلي على محمد وتعالي وياي نزلي جوه يمي وانطي موافقتج للشيخ يله يمه حبيبتي انتي
_امي جسمي كاعد يرجف والله ماكدر اكوم على حيلي خاف امشي خطوتين واطيح من الدرج
_شسالفه بنيتي سمي بالرحمن حتى بزواجج الاول ماصار بيج هيج
_جنت مو بوعيي يا امي وهاي اللحظات ماتتقارن ابد بذيج اللحظه
_اهدي يايمه اقري سوره الفاتحه واهديهه لام البنين وتوكلي على ربج حبيب كلبج راهب منتظر جوه هوه والشيخ لا تفكرين ان لازم تنطين
موافقتج حتى تزوجين فكري انج تنطينه موافقتج حتى تصيرين حلال راهب وتنجمعون بالحلال
فكري ان خطواتج يلي راح تمشينهن وانتي رايحه تنطين موافقتج انهن خطواتج اتجاه عزيز كلبج وسعادتج وياه ..
صفنت افكر بكلامهه وسويت مثلما كلتلي اعتبرت ان هذا مو عقد زواج وانما عقد روحي بروحه بالحلال هزيت راسي بايجابيه واخذت نفس
انطتني عبير ماي شربت وكمت على حيلي رغم كلامهه طمني بس بقت الرجفه بيه مستمره نزلت من الدرج وهيه لازمه ايدي عبالهه صدك اطيح ..
لاكتني خالتي وفاء اخذتني لحضنهه ومسدت على شعري بقت تصلي على محمد واخذتني وامي للصاله كعدت عل كرسي وره الباب وبده الشيخ يحجي ويردد
ايات لحدما كمل سالني اذا موافقه او لا على ٣ مرات وكتله اني موافقه باركلي وراح دخل للديوان والنسوان طشت الجكليت وصارن يهلهلن
ابتسمت ودموعي نزلت وانه لازمه كلبي بيدي الصار يرفرف ويه صوت الهلاهل كمت على حيلي سلمت عل بنات وباركلي اندك الباب وكال ابوي راح يدخل راهب ..
بهتت ابتسامتي بتوتر وطلعوا الكل من الصاله بقيت صافنه هاي ليش عافونه وحدنه بدون مانطلب منهن هل شي وحتى ماهوسن النه سويه ..
من بين كل افكاري رفعت راسي لمن انفتح الباب وطل علي بحلاوه طوله وكشخته وهوه لابس قاط بدون الستره وفاتح اول دكمتين من قميصه مبين خلالهن
واخذ خصلات قليله بيده قرب باسهن وشمهن حيل وهوه مغمض رجعهن على رقبتي وصار بضهر كف ايده يمسد على خدي غمضت عيوني وانه اتامل بدفو
ايده وايقنت انهه نفس الايد الجانت تمسد علي وانه نايمه بالغيبوبه وهوه يلي جان يهمس بآيات قرآنية يم اذني حتى اشفى واصحى ..
كلهه لحظات من الصمت والتامل رفع راسي بيده وقرب طبع بوسه عذبه على جبيني ووجناتي وهمس يم اذني وهوه حاضن وجهي باديه..
_مبروك جمره افادي
_الله يبارك بيك
_تعالي نكعد
_اي..
اخذ ايدي ومشه باتجاه القنفه كعدني بجهه وراح كعد بجهه بعيد عني باوعتله باستغراب وكتله ..
_ليش رحت بعيد
_نسيتي اني مريض خليني هنا احسن لا اعديج وانتي توه طالعه من عمليه
_راهب
_شموخه
_ديربالك على نفسك وعوف الدخان فدوا تره ياثر عليك سلبا ويزيد حالتك سوء
_بالنسبه لادير بالي على نفسي هاي ماكدر عليهه خليتهه عليج انتي تديرين بالج علي بعد اما الدخان فجان يخفف علي بعدج واذا اخذ كل صبح ومسيه جرعه حنان منج ماراح احتاج للجكاره بعد اصير اتركهه وادخن حنانج
_احم تمام يعني راح تتركه
_لعيونج كلشي يهون حتى عمري
_اعوضه لعمرك الضاع انشاءالله اعوضه وماخلي يروح هباء
_ماراح هباء لا والله من اللحظه يلي انطيتي موافقتج وصرتي حلالي حسيت كل هل سنين الفاتت تعوضن وانزاح همهن ونسيت معاناتهن اصلا
_افديهن لهل سنين انه
_وانه روحي تفداج يبعد روحي ..
ابتسمت بخجل ونزلت عيوني عنه سمعته جر حسره وكال ..
_اححح والله لو ما مريض وخايف اعديج فلا اخليج تطلعين من الصاله وانتي سالمه..
ضحكت خفيف وباوعت بعيونه وانه كياني تخربط من كلماته تحمحمت وكمت باتجاهه باوعلي بتساؤل وبلع ريجه بصعوبه عباله راح اجي يمه..
درت انظاري عنه ورحت فتحت الباب وانه اضحك عليه بكلبي باوعت واشوفهه كلهه ملتمه تسمع علينه تافافت وكتلهن بصوت شبه مسموع..
_فوتوا خالاتي انتو فوتوا البيت بيتكم لا تستحون
_لا خليكم وحدكم
_لا هوه انه اصلا اجيت اصيحلجن اشو لا هوسه لا هلهوله صح حلقات ماكو بس عل اقل ركصه هوسه من هوسات اهل العماره لو كبرن وراح حيلهن ..
حجيت هيج حتى استفزهن وخالتي وامي كفن الردان دخلن للصاله والبنات وياهن وعلكت الهلاهل والهوسات وامي وخالتي وفاء وخالتي حلى
بالوسطه يهوسن ويذبن كولات عمارجيه رحت كعدت بصفه لراهب وحضن ايدي بين اديه والتفتت عليه وهوه يباوعلي وكال..
_ليش اجيتي يمي لا اعديج يمعوده
_منا ورايح انه وياك بكل خطوه وبكل فصل انه وياك واشاركك صحتك ومرضك وحزنك وفرحك الي حق بهذا الشي لو لا
1 تعليق
_الج يبا الج كل الحق شفايتلي واشوفج بكل لحظه اغمض بيهه عيني وافتحهه
_راهب
_لا تكولين اسمي بهل طريقه تراني كوه لازم روحي عنج
_ههه لا تلزمهه يكفي العمر الراح واحنه لازمين نفسنه
_يعني انطي اشاره لروحي حتى تداهم
_ههه..
ضحكت ودرت عيني عل بنات اجن باركن النه وكام هوه طلع الكمامه من جيبه لبسهه وحضن امه باسهه وحضن عبير والتفت علي و روحي محتركه
عليه وانه اشوفه لابس الكمامه بلعت ريجي بصعوبه وزيفت ابتسامتي عكد حواجبه باستغراب واجه اخذني من ادي موكفني كباله وكال..
_شبيج شموخي ليش عيونج حزينه
_مايهون علي اشوفك هيج روحي تمرمرت لمن عرفت بيك كورونا
_وروحج ماتمرمرت علي لمن رفضتيني قبل فتره
_عبالك كل الصار هان علي لا والله كلشي يهون الا نظره الخذلان الشفتهه بعينك عمري ماراح انساهه
_خلاص انسي كلشي صار من قبل وخلينه بالحاضر ونفكر بمستقبلنه سويه تمام
_اي تمام
_يله رايح انه للديوان ديري بالج على نفسج
_انشاءالله ..
قرب علي حضني وهمس يم اذني بانفاسه الحاره الخلت جسمي يرجف وابتسمت على اثر كلماته وهوه يكول ..
_انتظريني بعدين بليل مو تنامين
_وين انتظرك
_بالحديقه
_تمام ..
باسني وره اذاني وابتعد وانه كلبي يخفق بجنون والا شوي يغمى علي من هول هل احساس ابتسم بوجهي وطلع من الصاله دخل للديوان واخذتني
عبير وجنان ورحنه لغرفتي وهنه يسالني شنو شاورني ضحكت على سوالفهن وعل عناد ماكتلهن حركت دمهن توجهت لميز المرايه نزعت الاكسسوارات وكالت عبير بضجر..
_هسه تكولين لو اروح لاخوي يحجيلي شنو كالج
_عادي روحي لاخوج سمعي منه هاي اذا قبل يكلج
_لا يكول هوه ماله شغل
_مايكدر
_ليش يمه
_ انه ماسمحله
_افاا يول يالمسيطره خفي علينه
_هههه
_الله عليج كولي تره حتى ابني هدأ يريد يسمع منج الكاله خاله
_ههه تمام لخاطر ابن اخويه الحلو راح اكلجن
_اي يله كولي بسرعه
_احم شسمه هيج ماكو شي مهم فقط كلي احبج
_جذابه والله شفتكم حجيتو هواي
_ههه اي كال لا تنامين انتظر مكالمته بليل
_بس هاي
_اي
_كولي والله
_ولج عبوره فضولج هليام يرادله قطع روحي لرجلج التهي بي لا اتخبل عليج هسه
_ايييه تالي وكت مرت اخوي تملي علي اوامر
_لعد شلون منا ورايح انه الامر الناهي عليكم
_يول يول هاي انتي عشتي الدور بسرعه
_هههه كافي يله روحن اريد انام
_اي تنامين صدكنه امشن بنات امشن خلوهه تتسامر ويه الحب لا نلوث اذاناتنه احنه ..
ضحكت عليهن وهنه يباوعلي بنص عين بس ادريهن طايرات فرح وبدلهن يكابلنه انه وراهب ويسمعن سوالفنه.. كمت سديت الباب وراهن ورحت للكنتور طلعتلي ترواكه قماش بهاري لبستهه وفتحت شعري من التسريحه
لميته بقراصه وبقيته طايح على جوانب اكتافي رشيت عطر وطلعت من الغرفه لاكاني سلام فتح اديه وهوه الابتسامه شاكه حلكه وكال..
_ شموخنننه الف مبروك..
ضحكت ورحت حضنته ابتعدت وطبطب على كتفي وهوه يكول..
_تتهنين يبعد طولي ديري بالج عليه زلمه معدل رهبان
_اي اكيد لعد شلون بس انته هم تلحلح العروس خلصت سادس وانته توظفت بعد شمتانين
_مادري حاليا داخلين بحرب
_هاي شنو ليش..
شكرا لزيارتكم عالم روايات سكيرهوم
