رواية حق الرفض الفصل السادس
تاني يوم الصبح ملك كانت قاعدة على السفرة بتشرب قهوتها وريهام قدامها ساكتة بتقلب المعلقة في الكوباية من غير ما تشرب.
ملك بصتلها شوية وبعدين قالت: إنتي من ساعة ما جيتي وإنتي ساكتة.مالك؟
ريهام: ماما وافقت.إني أقابل الشخص اللي هي عايزاه.
ملك: طب وإنتي رايك ايه؟
ريهام: انا وافقت إني أقابله بس... مش إني أتجوزه.
ملك ابتسمت: كويس.
ريهام: كويس إزاي؟ أنا حاسة إني داخلة امتحان.ملك... هو أنا لو قعدت معاه وطلع كويس أبقى ظلمت الشخص اللي بحبه؟
ملك سكتت لحظة: مش بالضرورة.يعني إنك تقعدي مع حد مش معناه إنك وعدتيه بحاجة. بس في نفس الوقت متخليش حد يقنعك إنك لازم تحبيه عشان هو كويس.
ريهام بصتلها: إنتي عارفة إن كلامك سهل إنما لما يكون كل اللي حواليكي بيقولوا: "ده مناسب"، "ده كويس"، "ده عنده شغل"، "ده هيريحك"... وإنتي الوحيدة اللي بتقولي "بس أنا مش عايزاه"... بتحسي إن المشكلة فيكي.
ملك هزت راسها: أيوه... عارفة الإحساس ده كويس.
دخل سامح وهو بيلبس ساعته: صباح الخير.
ملك وريهام: صباح النور.
سامح بص لريهام: سمعت إن في حد جاي يتقدم لك.كويس الف مبروك مقدما
ملك بصت له: كويس ليه بقى ان شاء الله؟
سامح: يعني إيه كويس ليه؟ بنت عمي هتتجوز.
ملك: ايوا بس هي مش عايزة.وعمتك هى اللى جبراها...
سامح بص لريهام: انتى فعلا مش عايزة الشخص ده؟
ريهام: مش عارفة.
سامح: هو ايه اللى مش عارفه؟ طب إنتي عايزة إيه؟
ريهام سكتت.سامح استغرب: نا بكلمك إنتي ليه ساكتة؟
ريهام: عشان أول مرة حد يسألني السؤال ده.
سامح ابتسم بسخرية خفيفة: ياااه يعني إحنا بقينا وحشين أوي كده؟
ملك: محدش قال وحشين.بس ساعات بنعمل حاجات غلط وإحنا فاكرين إننا بنعمل الصح.
سامح: إنتي بقى بتتكلمي عن الجواز ولا عني؟
ملك: عن الاتنين.
سامح ضحك ضحكة قصيرة: ماشي يا ست ملك.
دخلت دينا من المطبخ وهي شايلة صينية.
حطتها على السفرة وبصت لسامح.
دينا: أنا عايزة أقولك حاجة.انا لقيت شغل.في نفس المجال اللي كنت بشتغل فيه قبل الجواز.في شركة قريبة من هنا.من تسعة لأربعة.
سامح: ماشي والبنت؟
دينا: هتكون مع اختك وقت الشغل.
سامح: ماشي هشوف.
دينا: لا متشوفش.إنت مش هتوافق أو ترفض إحنا هنتكلم ونقرر سوا.
سامح: بس أنا مش برفض.
دينا ابتسمت: بس شكلك مش مبسوط.
سامح: عشان الموضوع جه فجأة.
دينا: بس أنا بتكلم فيه من شهور.
سامح: بس أنا كنت فاكر إن الكلام ده مجرد رغبة.
دينا: وإيه المشكلة إن رغبتي تبقى مهمة؟ أنا مش بطلب أسيب البيت. ولا بطلب أرمي مسؤولياتي عليك. أنا عايزة أشتغل.
سامح: بس أنا خايف عليكي من التعب.
دينا ضحكت بهدوء: الغريبة إنك عمرك ما خفت عليا من تعب البيت كنت بصحى الصبح أطبخ وأنضف وأتابع البنت وأخلص طلبات البيت وأفضل مستنياك ترجع. عمرك ما قلتلي "كفاية عليكي".
سامح: عشان دي مسؤوليات البيت.
دينا: والشغل بردو مسؤولية بره البيت.طب ليه لما أنا أشتغل تبقى مسؤولية ولما إنت تشتغل تبقى حاجة طبيعية؟
سامح اتنهد: أنا مش ضدك يا دينا.انا بس خايف البيت يتأثر.
دينا: وأنا خايفة أنا أتأثر لو فضلت قاعدة هنا أكتر. أنا بقيت حاسة إني مش عارفة أنا مين غير "مرات سامح" و"أم فلانة".
سامح قرب منها: إنت دينا حبيبتي قبل مراتي وشريكتي وسندي فى الحياة...
دينا: طب وريني ده.سيبني أكون دينا اللى بتقول عليها من غير ما تحصرني فى واجبات ام ومسؤليات زوجه بس.....
بعد شوية سامح قال: طب جربي.بس في شرط واحد. لو حسيت إن البيت اتأثر نقعد ونتكلم.
دينا ردت فورا: موافقه بس أنا كمان عندي شرط.لو حسيت إن الشغل مأثر عليا هقولك. ولو حسيت إن البيت مأثر عليك إنت تقول لي. مش تروح تاخد قرار لوحدك.
سامح ابتسم: تمام اتفقنا.
ملك بصت لهم وقالت: ايوا بقى أهو هو ده الجواز.
سامح بص لها: إنتي بتتكلمي مين كدا يابت ؟ وبعدين ما تقولي لنفسك إنتي لسه مش عايزة تتجوزي أصلا.
ملك ضحكت: ما هو عشان كده شايفة الموضوع من بره. مش عايزه....
ريهام قالت بهدوء: يمكن اللي من بره ساعات بيشوف أوضح من اللي جوا.
سامح بص لها: يلا إنتي كمان؟ يا فرحه عمتي بيكي...
ريهام ضحكت: أنا ماليش دعوة.معملتش ولا قولت حاجه
في اللحظة دي دخل جمال.بص لهم: إيه الحكاية؟ مبقتش مرتاح للمتكم دي دايما بيبقى وراها مصيبه...
سامح قال: لا براءة المره دي.... بس دينا لقت شغل.
جمال بص لدينا: مبروك.وبعدين بص لسامح: وإنت موافق؟
سامح رد: ايوا يا بابا إحنا اتفقنا.
جمال هز راسه.وبعدين بص لكل الموجودين: تعرفوا أنا اكتشفت حاجة الفترة دي إن الواحد ممكن يقضي عمره فاكر إنه بيحمي اللي بيحبهم... وهو من غير ما يقصد بيمنعهم يعيشوا.أنا مش بقول إني كنت غلط في كل حاجة.بس يمكن كنت محتاج أسمع أكتر ما أتكلم.
جمال بص لريهام: وإنتي؟ الراجل اللي جاي بكرة.لو مش عايزاه متوافقيش.
ريهام بصت له بدهشة: حتى لو ماما زعلت؟
جمال: مامتك هتزعل يومين وبعدها هتنسى. إنما إنتي لو وافقتي على حاجة مش عايزاها اللي هيدفع التمن إنتي.
ريهام عينيها لمعت: طب ولو اخترت الشخص اللي أنا بحبه؟
جمال سكت لحظة: لو شخص كويس وبيحترمك وبيخاف عليكي وبيقدر يشيل مسؤولية نفسه... نتكلم.
ريهام: حتى لو دخله أقل؟
جمال رد بهدوء: الفلوس مهمة. مش هكدب عليكي وأقولك مش مهمة.بس مش كل حاجة.
وبعدين وجه كلامه لملك: وأنتي كمان.أنا مش عايزك تتجوزي عشان الناس تقول اتجوزت.بس كمان مش عايزك ترفضي أي حد لمجرد إنك خايفة.
ملك هزت راسها: بس أنا مش خايفة يا بابا
جمال: يبقى خدي وقتك.وأنا مصدقك.
ملك بصت له وكأن الجملة دي كانت أهم من كل الكلام اللي قاله قبل كده.
تاني يوم جه الشخص اللي أهل ريهام اختاروه.قعد وسط العيلة، وبدأ يتكلم عن شغله وبيته ومستقبله وخططه.وريهام كانت ساكتة.والدتها كانت مبتسمة طول الوقت.
عواطف: ما شاء الله عليه شاطر ومحترم وربنا كرمه.
معتز بص لريهام.: ممكن أسألك إنتي كام سؤال؟
ريهام رفعت عينيها: اكيد اتفضل.
معتز: إنتي عايزة تكملي شغل بعد الجواز؟
عواطف دخلت بسرعة: لا هي مش بتشتغل أصلا.
ريهام بصت لأمها.بس أنا عايزة أشتغل.
معتز سكت وبعدين قال: طب وأنا مش حابب مراتي تشتغل.أنا شايف إن البيت أولى.
ريهام: طب ولو أنا شايفة إن الاتنين مهمين؟
معتز اتوتر. عواطف قالت: يا بنتي دي أول قعدة. ايه هتبدا بالخناق والشد....
رهام ردت: لا يا ماما بس عشان كده لازم نتكلم.
معتز: خلاص ممكن نتفق بعد الجواز.
رهام ابتسمت ابتسامة صغيرة: لا.أنا مش هتجوز عشان نكتشف بعد الجواز إحنا متفقين على إيه.أنا مش عايزة أبدأ حياتي مع حد وأنا بخبي عنه حاجات عشان أخاف يرفضني.
معتز: افهم من كدا إنتي رافضة الجواز مني؟
رهام بصت له بثبات: للاسف أيوه.
عواطف شهقت: ريهام! انتي بتقولي ايه؟
رهام بصت لها: أنا آسفة يا ماما... بس أنا اللي هعيش.
جمال تدخل بهدوء: خلاص.
الأم بصت له.قالت لأ.
عواطف: بس إحنا لسه...
جمال: مفيش بس.
وبص لمعتز: حقك علينا بس البنت قالت رأيها.
معتز وقف سلم ومشي وأول ما الباب اتقفل عواطف انفجرت: إنتوا كلكم بقيتوا بتشجعوها علينا! وبتعصوها انها تسمع كلامنا....
جمال: لأ.احنا بنشجعها على إنها متكدبش على نفسها.
عواطف: يا سلام طب والناس؟
جمال بص لها: الناس هتتكلم.وهتسكت.إحنا اللي هنفضل عايشين مع بعض.
ملك كانت واقفة بعيد وسمعت الجملة ملك: يمكن المشكلة عمرها ما كانت إن البيت مفيهوش ست.واب خايف على بناته من بعدها... المشكلة إن البيت كان مليان ستات... بس كل واحدة فيهم كانت متعودة تسكت.
وسكتت.لأول مرة محدش رد عليها.
لأن الجملة دي... كانت تخصهم كلهم.
