رواية حب بين السطور الفصل السادس بقلم وعد محمد
صحيت تاني يوم وأنا حاسة إني مصدعة بشكل مش طبيعي.
فضلت شوية باصة للسقف وأنا بحاول أفتكر أنا حلمت بإيه.
بس الحقيقة إني مكنتش محتاجة أفتكر.
كل اللي حصل امبارح كان لسه في دماغي.
نظرات أدهم.
طريقته وهو بيناديني.
المحاضرة.
ولما طلب مني أفضل بعد الناس ما تمشي.
فتحت موبايلي لقيت رسالة منه.
"بشمهندسة ملك، لو سمحتي محتاجك بكرة بعد المحاضرة بخصوص حاجة تخص المادة."
فضلت باصة للرسالة ثواني.
"بشمهندسة ملك؟"
ضحكت بسخرية بسيطة.
هو حتى في الرسائل رسمي.
كتبت:
– تمام.
ومسحتها.
كتبت:
– حاضر.
ومسحتها برضه.
في الآخر قفلت الموبايل وحطيته جنبي.
مش عارفة ليه كنت متوترة بالشكل ده.
ما هو ممكن فعلًا يكون عايز يتكلم في حاجة تخص المادة.
يمكن أنا اللي مكبرة الموضوع.
يمكن هو فعلًا اتغير.
يمكن أنا اللي لسه شايفاه بعين زمان.
قمت من السرير ولبست بسرعة.
وأول ما خرجت من الأوضة لقيت ماما في المطبخ.
ـ صباح الخير يا ملوكتي.
– صباح النور يا ماما.
بصتلي شوية.
ـ إنتِ كويسة؟
– آه.
ـ شكلك مش كويس.
– مفيش، بس مصدعة شوية.
مدتلي كوباية العصير.
ـ اشربي دي وخدي اللانش بوكس.
– حاضر.
وأنا باخده سمعت صوت كلاكس من تحت.
وقفت مكاني.
ماما بصتلي وضحكت.
ـ أكيد ممدوح.
– هو مبيزهقش؟
ـ ده لو بإيده هيطلعلك الأوضة يا بنتي.
ضحكت غصب عني.
نزلت وأنا ماسكة شنطتي، ولقيت ممدوح واقف جنب العربية.
أول ما شافني بصلي من فوق لتحت.
ـ صباح الخير يا ملوكتي.
– صباح النور.
ـ إيه ده؟
– إيه؟
ـ النهارده مفيش زن؟
– مش فاهمة.
ـ امبارح كنتِ بتقوليلي سيبني ومش عايزة حد ييجي معاكي، النهارده نازلة من نفسك ورايقة.
ركبت العربية.
– ممدوح سوق بس.
ضحك وركب.
ـ حاضر يا ست ملك.
طول الطريق كان ساكت.
وأنا كنت ببص من الشباك.
بس كنت حاسة إنه عايز يسألني حاجة.
وفعلًا بعد شوية قال:
ـ ملك.
– نعم؟
ـ أدهم كلمك امبارح؟
سكت.
بصيتله.
– ليه؟
ـ بس بسأل.
– آه.
ـ وقالك إيه؟
– مفيش.
ـ مفيش إزاي؟
– قالي عايز يكلمني بخصوص حاجة.
سكت فجأة.
بصيتله.
لقيت إيده شدت على الدريكسيون شوية.
ـ وقالك إمتى؟
– بعد المحاضرة النهارده.
ـ تمام.
– تمام إيه؟
ـ ولا حاجة.
رجع يبص قدامه.
فضلت باصة له ثواني.
كان فيه حاجة في نبرته مش مريحاني.
– إنت تعرف حاجة؟
بصلي بسرعة.
ـ أعرف إيه؟
– مش عارفة.
ـ طب ما أنا لو أعرف حاجة كنت قولتلك.
سكت.
بس أنا مكنتش مقتنعة أوي.
وصلنا الجامعة.
قبل ما أنزل، ممدوح قال:
ـ أي حاجة تحصل، تكلميني.
–يوه بقي..
ـ انا قولت تكلميني
ضحكت.
ـ أصلًا إنت بتتكلم كتير.
ـ وأنا مالي، المهم إنك تكلّميني.
نزلت من العربية.
لقيت روان مستنياني عند البوابة.
ـ صباح الخير.
– صباح النور.
ـ إيه الأخبار؟
– ولا حاجة.
بصتلي بتركيز.
ـ أدهم؟
– روان!
ضحكت.
ـ خلاص خلاص، مش هجيب سيرته.
دخلنا الكلية، وفضلنا نتكلم في أي حاجة إلا هو.
لحد ما دخلنا المدرج.
وأول ما دخلت…
عينيا راحت عليه غصب عني.
كان واقف عند المكتب وبيجهز حاجته.
رفع عينه.
شافني.
ومرة واحدة ملامحه هديت.
بس المرة دي مفيش ابتسامة.
ولا صباح الخير.
ولا حتى كلمة.
بص بعيد وكمل اللي في إيده.
اتضايقت.
ومش عارفة ليه.
قعدت جنب روان.
وبدأت المحاضرة.
الغريب إنه المرة دي موجهليش أي سؤال.
ولا مرة.
حتى لما إيده كانت بتتحرك في اتجاه ناحيتي، كان بيختار حد تاني.
فضلت أقول لنفسي:
"مش كنتي عايزة يتجاهلك؟ أهو بيتجاهلك."
بس بدل ما أرتاح…
كنت متضايقة أكتر.
روان قربت مني.
ـ إنتِ مضايقة ليه؟
– مش مضايقة.
ـ شكلك بيقول غير كده.
– ركزي في المحاضرة يا روان.
بعد المحاضرة، خرجنا.
روان مشيت، وأنا فضلت شوية برا المدرج.
كنت بحاول أقنع نفسي إني مش مستنية أي حاجة.
لكن كل دقيقة كانت بتعدي كانت بتوترني أكتر.
رجعت المدرج تاني.
لقيته واقف عند المكتب، بيجمع حاجته بهدوء.
أول ما دخلت، رفع عينه عليا.
ـ اتفضلي.
وقفت مكاني.
– حضرتك كنت عايزني؟
حسيت إن كلمة "حضرتك" وجعتني أنا شخصيًا.
بس هو ملامحه متهزتش.
ـ آه.
سكت شوية.
وبعدين قال:
ـ اقعدي.
قعدت، وهو فضل واقف قدامي.
كان فيه صمت غريب.
صمت خلاني متوترة أكتر من أي كلام ممكن يقوله.
ـ أنا عايز أسألك سؤال.
– اتفضل.
بصلي كام ثانية.
ـ إنتِ بتتجنبيني ليه؟
ضحكت ضحكة صغيرة من التوتر.
– أنا؟
ـ أيوه.
– لا.
ـ ملك.
نبرته كانت هادية.
بس اسمي بالطريقة دي رجعلي حاجات كتير.
بصيت بعيد.
– أنا بس مش متعودة أشوفك هنا.
هز راسه ببطء.
ـ عارف.
– أمال بتسأل ليه؟
سكت.
وبعدين قال:
ـ يمكن كنت عايز أسمعها منك.
بصيتله باستغراب.
– تسمع إيه؟
ـ إن وجودي مضايقك.
سكت.
لأول مرة مقدرتش أنكر.
بصيت في الأرض.
– آه.
صوته اختفى.
فضل ساكت.
وأنا لأول مرة أحس إن اعترافي وجعه.
رفعت عيني عليه.
لقيته باصصلي، بس ملامحه كانت هادية أوي.
الهدوء اللي بيخبي حاجات كتير.
إيده كانت ماسكة طرف المكتب، وأصابعه بتتحرك حركة بسيطة كأنه بيحاول يسيطر على توتره.
بص للأرض.
وبعدين رفع عينه عليا تاني.
كان عايز يقول حاجة.
واضح.
بس مفيش ولا كلمة خرجت.
أنا كمان سكت.
ولأول مرة حسيت إن السكوت بينا أتقل من أي خناقة حصلت زمان.
مسحت دموعي بسرعة قبل ما تنزل واحدة تانية.
هو خد باله.
حرك إيده كأنه هيقرب أو يعمل حاجة، لكنه وقف نفسه في نص الحركة ورجعها مكانها.
الحركة دي وجعتني أكتر.
يمكن عشان زمان كان بيقرب من غير ما أفكر إذا كان ينفع أو لأ.
دلوقتي حتى المسافة بينا بقت محسوبة.
ـ أنا آسف.
الكلمة نزلت عليا تقيلة.
– على إيه؟
سكت.
ـ على حاجات كتير.
حسيت إن دموعي قربت تنزل.
– إنت دايمًا بتقول كده.
بصلي.
– "آسف."
ضحكت بحزن.
– بس عمرك ما قلت آسف على إيه.
فضل ساكت.
إيدي كانت ماسكة طرف الشنطة بقوة لدرجة إني حسيت صوابعي وجعتني.
بلعت ريقي بصعوبة، وحاولت أبان ثابتة، بس نفسي كان بيطلع متقطع.
– عارف أكتر حاجة وجعتني في اللي حصل؟
مردش.
– إنك مشيت من غير ما تديني فرصة أفهم.
عينيه نزلت للأرض.
– أنا فضلت أسأل نفسي أنا عملت إيه.
صوتي بدأ يهتز.
– فضلت أراجع كل كلمة قلتها، وكل موقف حصل بينا، وكل مرة حسيت إنك اتغيرت فيها.
مسحت دمعة نزلت على خدي.
– وفي الآخر وصلت لحاجة واحدة.
بصلي.
– إنك بطلت تحبني.
ملامحه اتغيرت.
بس مقلش حاجة.
– ودي كانت أسهل إجابة أصدقها.
سكت شوية.
وبعدين قال:
ـ وأنا كنت فاكر إنك هتكوني أحسن من غيري.
بصيتله بصدمة.
– أحسن من غيرك؟
ـ أيوه.
– وإنت مين قالك إني عايزة أبقى أحسن من غيرك؟
مردش.
– مين اداك الحق تقرر أنا محتاجة إيه؟
سكت.
– كنت فاكر إنك بتحميني؟
هز راسه.
– أنا كنت محتاجاك وقتها.
سكت.
– كنت محتاجاك تقوللي إنك هتفضل.
صوته خرج ضعيف:
ـ كنت عايز.
– بس ممسكتنيش.
سكت.
– كنت عايز ترجع، بس مرجعتش.
سكت.
– كنت عايز تطمن عليا، بس مطمنتش.
سكت.
كل مرة كنت أتكلم، كان صمته بيرد عليا أكتر من أي كلام.
وده كان بيوجعني.
– أنا عارفة إنك ممكن تكون كنت متألم.
بصلي.
– بس أنا كمان كنت متألمة يا أدهم.
دمعة نزلت منه.
ولأول مرة أشوفه مش عارف يبصلي.
اتوترت.
لأن أدهم اللي قدامي مكنش الشخص البارد اللي شوفته من يومين.
كان أدهم اللي أعرفه.
الشخص اللي كان بيتوجع لما يشوفني بعيط.
بس المرة دي هو اللي كان السبب.
ـ مين كان عارف؟
سألته فجأة.
رفع عينه.
– إيه؟
ـ مين كان عارف اللي حصل؟
سكت.
ـ ممدوح؟
الاسم نزل بينا كأنه حاجة تقيلة.
أدهم ملامحه اتغيرت.
ومردش.
حسيت قلبي وقع.
– ممدوح كان يعرف؟
ـ ملك…
– جاوبني.
سكت.
– كان يعرف؟
بعد ثواني قال:
ـ آه.
رجعت خطوة لورا.
– كان يعرف؟
هز راسه ببطء.
– جزء.
ضحكت ضحكة قصيرة وأنا مش مصدقة.
– جزء؟
سكت.
– وأنا معرفتش أي حاجة.
ـ كنت خايف عليكي.
– كلكم كنتوا خايفين عليا؟
دموعي نزلت.
– وكل واحد فيكم قرر عني.
أدهم قرب خطوة.
ـ ملك، أنا…
رفعت إيدي أمنعه.
– متقربش.
وقف مكانه.
فضلنا ساكتين.
أنا ببصله وهو باصصلي.
كان واضح إن عنده كلام كتير.
وأنا لأول مرة مكنتش عايزة أسمعه.
– أنا مش عايزة أعرف الحقيقة منك دلوقتي.
اتصدم.
ـ ليه؟
– عشان مش عارفة أصدقك.
سكت.
– ومش عارفة أصدق ممدوح.
نزل عينه.
– ومش عارفة حتى أصدق نفسي.
صوتي اتكسر في آخر كلمة.
لفيت عشان أمشي.
إيدي فضلت على مقبض الباب.
غمضت عيني ثواني.
مكنتش عايزة ألف.
لأني كنت عارفة إن أول ما أبصله، كل القوة اللي بحاول أظهر بيها ممكن تختفي.
سمعته بيقول:
ـ ملك.
وقفت.
لكن مابصتش وراه.
ـ أنا مكنتش ببعد عشان بطلت أحبك.
فضلت ساكتة.
دمعة نزلت غصب عني.
مسحتها بسرعة.
وبعد ثواني قلت:
– يمكن دي أكتر حاجة وجعتني.
سكت.
– إنك كنت فاكر إنك بتعمل الصح… وإنت كنت بتكسرني.
فتحت الباب ومشيت.
المرة دي، مسمعتش خطوات ورايا.
وصلت لبرا وأنا بحاول أتماسك.
لكن أول ما خرجت من المدرج، دموعي نزلت.
مسحتها بسرعة قبل ما حد يشوفني.
كنت فاكرة إني جاية الجامعة عشان أهرب من الماضي.
طلع الماضي هو اللي كان مستنيني هنا.
وفي نفس الوقت…
كان فيه سؤال واحد بس بيدور في دماغي.
ممدوح كان يعرف إيه؟
خرجت من الكلية وأنا مش حاسة بالطريق قدامي.
روان كانت مستنياني عند البوابة.
أول ما شافت وشي قربت مني.
ـ ملك؟ إنتِ كنتي بتعيطي؟
هزيت راسي.
– لا.
ـ عينيكي بتقول غير كده.
– أنا بس تعبانة.
ـ حصل إيه؟
بصيت ورايا ناحية باب المدرج.
ملقتش أدهم.
– مفيش.
روان فضلت ساكتة.
واضح إنها فهمت إني مش عايزة أتكلم.
بعد شوية سمعت كلاكس العربية.
ممدوح.
ركبت من غير ما أقول كلمة.
هو بصلي.
وبعدين بص قدامه.
مرش عليا ولا سؤال.
وده كان غريب.
طول الطريق كان ساكت.
وأنا كمان.
بس المرة دي…
كان السكوت بيني وبينه مختلف.
أنا عايزة أسأله.
وهو عارف إني عايزة أسأله.
بس ولا واحد فينا قال حاجة.
بعد كام دقيقة، قال بهدوء:
ـ أدهم قالك إيه؟
بصيتله.
قلبي دق.
– إنت عارف إنه كلمني؟
إيده ثبتت على الدريكسيون.
سكت ثواني.
وبعدين قال:
ـ كنت متوقع.
– ممدوح…
ـ مش دلوقتي يا ملك.
بصيت قدامي.
دموعي اتجمعت تاني.
ولأول مرة…
مبقتش عارفة مين الشخص اللي المفروض أخاف منه أكتر.
أدهم اللي مخبي الحقيقة…
ولا ممدوح اللي كان عارفها.
شكرا لزيارتكم عالم روايات سكيرهوم
