رواية حب بين السطور الفصل السابع بقلم وعد محمد
– يعني اي مش وقته يا ممدوح انا عايزه افهم اي اللي حصل زمان انا معرفوش ؟
– عايزه افهم انت اي علاقتك بأدهم اصلا .. وازاي كنت تعرفه ومقولتليش ؟
كنت حاسه اني من كتر العصبيه هتجنن او هيحصلي حاجه ..فاهم لما تبقي مفكر نفسك عارف كل حاجه وف الاخر تطلع مش عارف ولا حاجه ؟
انا كنت كده.
مستنيه اعرف حاجه عن حياتي هما مش راضيين يقولوها شايفين انها من مصلحتي معرفش ؟
لا بتهزروا .. معرفش حاجه تخصني ؟
وقررتوا من غير ما تاخدوا رأيي ؟
والا ادهم بعد عشان شاف ان دا الحل المناسب ..
طب وانا ؟
مفكرتش فيا .. مفكرتش محتاجاك والا لا ..مفكرتش انا عايزاك تبعد والا لا ؟
اي الانانيه اللي كنت فيها دي ..
ممدوح كان مش عارف يقولي اي ولا يبدأ من انهي حته فلقيته قال:
ـ نطلع علي اي كافيه ونتكلم.
ملقاش مني رد ف شغل العربيه ومشينا من قدام الجامعه.
خدت بالي من ادهم اللي كان واقف وشافني ف العربيه مع ممدوح.
عيني جت في عينه ثواني.
هو بصلي وبعدين بص لممدوح.
ومش عارفه ليه حسيت ان نظرته كان فيها حاجه معرفتش افهمها.
بصيت قدامي بسرعه ومتكلمتش.
فضلنا ساكتين طول الطريق.
لحد ما ممدوح وقف قدام كافيه كنا بنروحله زمان.
نزلت من العربيه من غير ما استناه.
دخلت وقعدت على ترابيزه في ركن بعيد.
ممدوح دخل ورايا وقعد قدامي.
فضل ساكت ثواني.
وبعدين قال:
ـ قبل ما اقولك اي حاجه .. عايز اعرف ادهم قالك اي.
بصيتله باستغراب.
– قاللي ان في حاجات حصلت زمان وانا معرفهاش .. وان في حاجات انت كنت عارفها.
ممدوح بلع ريقه وبص بعيد.
ـ قالك اني كنت عارف ؟
– اه.
سكت.
– وقاللي ان في حاجات ممكن تغير نظرتي لكل اللي حصل.
ممدوح حط ايده على الترابيزه وفضل باصص قدامه.
ـ انتي عايزه تعرفي كل حاجه ؟
– اه.
ـ حتى لو اللي هقولك عليه يضايقك مني ؟
ضحكت ضحكه صغيره من كتر وجعي.
– هو لسه في حاجه ممكن تضايقني منك اكتر من انك تكون عارف كل دا وساكت ؟
سكت.
ومره واحده قال:
ـ انا اللي قولت لأدهم يبعد عنك.
حسيت اني مسمعتش كويس.
بصيتله.
– ايه ؟
ـ انا اللي طلبت منه يبعد عنك.
فضلت باصاله كام ثانيه.
مش عارفه ارد.
– انت ؟
هز راسه.
ـ اه.
– انت اللي قولتله ؟
ـ اه يا ملك.
رجعت بضهري على الكرسي.
حسيت ان نفسي اتسحب مني.
– ليه ؟
ممدوح سكت.
– ليه يا ممدوح ؟
ـ عشان وقتها كنت شايف ان علاقتكم هتأذيكي.
ضحكت تاني بس المره دي عيني دمعت.
– تأذيني ؟
ـ ايوا.
– وانت مين عشان تقرر دا ؟
ـ انا كنت خايف عليكي.
– خايف عليا لدرجة انك تبعدني عن الشخص اللي انا بحبه ؟
ـ ملك انا وقتها كنت شايف حاجات انتي مكنتيش شايفاها.
– زي اي ؟
سكت.
– ماتقول
ـ ادهم كان عنده حاجات كتير في حياته وقتها .. شغل .. سفر .. ضغط .. وانا كنت شايف انه مش مستقر.
– ودا يخليك تروحله وتقولله يبعد عني ؟
ـ انا ماقولتلوش يسيبك بالشكل دا.
بصيتله باستغراب.
– امال قولتله اي ؟
ممدوح اخد نفس طويل.
ـ قولتله انك متعلقه بيه اوي .. وانك لو فضلت مستنيه منه حاجات هو مش قادر يقدمها هتتعب.
–وبعدين ؟
ـ قولتله لو هو فعلا بيحبك .. يسيبلك مساحه تبعدي عنه.
بصيتله وانا مش مستوعبه.
– انا ؟
ـ ايوا
– انا قولتلك اني عايزه ابعد ؟
ـ لا.
– امال انت قلتله ليه ؟
ممدوح سكت.
ودي كانت اكتر حاجه وجعتني.
لانه مكنش عنده اجابه.
– كنت بتقرر من دماغك يا ممدوح ؟
ـ كنت فاكر اني بعمل الصح.
– واللي انت عملته كان صح ؟
مردش.
فضلت باصاله وانا بحاول اربط كل حاجه ببعض.
ادهم كان بيحبني.
وانا كنت فاكره انه هو اللي قرر يبعد.
لكن ممدوح كان السبب.
– طب ادهم وافق ليه ؟
ممدوح رفع عينه وبصلي.
ـ معرفش.
– ازاي متعرفش ؟
ـ يمكن كان شايف ان كلامي صح.
– يعني انت قولتله يبعد .. وهو بعد ؟بالسهوله دي !
ـ ملك..
– لا جاوبني.
ـ اه.
حسيت اني اتخنقت.
– من غير ما يسألني ؟
ممدوح سكت.
– من غير ما يقولي انا ؟
بصيت قدامي.
دموعي نزلت غصب عني.
مش عارفه كنت بعيط على اي.
على ادهم اللي مشي.
ولا على ممدوح اللي كان السبب.
ولا على نفسي اللي كنت عايشه سنين وانا فاكره اني عارفه سبب كل حاجه.
– يعني كل السنين دي وانا فاكره ان ادهم هو اللي اختار يسيبني ..
ممدوح قال بهدوء:
ـ انا اسف.
– متقولش اسف...اسف بتاعتك دي هتعملي اي ؟
سكت.
– انت عارف اكتر حاجه وجعتني ايه ؟
مردش.
– اني كنت مستنيه منه يرجع.
بصيتله.
– كنت مستنيه يتصل .. يسأل .. يحاول .. يعمل اي حاجه.
دموعي زادت.
– وهو معملش.
ممدوح كان باصصلي ومش عارف يقول اي.
– بس دلوقتي اكتشفت انك كنت سبب في ان القرار ده يحصل من الاول.
سكت شويه وبعدين قلت:
ـ بس في حاجه مش داخله دماغي.
ممدوح بصلي.
ـ ايه ؟
– ادهم.
ـ ماله ؟
– ليه سمع كلامك ؟
سكت.
– انت مش اخوه .. ولا صاحبه المقرب .. ولا حتى حد من اهله.
بصيتله بتركيز.
– ازاي تقولله يبعد عني وهو يسمعك ؟
ممدوح مكنش عنده رد واضح.
ـ يمكن لاني كنت عارف حاجات هو مكنش عارفها.
– زي اي ؟
ـ مش هقدر اقولك كل حاجه.
ضحكت بمراره.
– طبعًا.
وقفت من مكاني.
– كل واحد فيكم عنده حاجه مش عايز يقولهالي.
ممدوح قام بسرعه.
ـ ملك استني.
– لا.. مش هستني انا ماشيه
ـ اسمعيني.
– سمعتك كتير يا ممدوح
ـ انا معملتش كده عشان ابعدك عنه وخلاص.
بصيتله.
– امال عملته ليه ؟
ممدوح سكت.
فضل باصصلي ثواني وبعدين قال:
ـ عشان كنت خايف يحصل حاجه تندمي عليها.
– وقررت بدالي ؟مين اداك الحق اصلا؟
ـ كنت فاكر اني بحميكي.
ـ بس انت مكنتش بتحميني.
صوتي بدأ يتهز.
- انت حرمتني من حقي اني اختار.
سكت.
- حتى لو كنت شايف ان ادهم غلط .. كان المفروض تسيبني انا احدد اذا كنت عايزه اكمل معاه والا لا.
ممدوح نزل عينه.
ـ عندك حق.
الكلمه دي وجعتني اكتر.
لانه لأول مره ميدافعش عن نفسه.
خرجت من الكافيه.
ممدوح خرج ورايا.
ـ ملك استني.
- وديني البيت.
ـ نتكلم في العربيه.
- مش عايزه اتكلم.
ـ طيب بس اسمعيني.
بصيتله.
- انا مش قادره اسمع منك حاجه تاني دلوقتي.
سكت.
ركبت العربيه.
وهو ركب وساق.
طول الطريق محدش فينا اتكلم.
انا كنت باصه من الشباك.
وبفكر.
لسه كل دا حصل.
ولسه في حاجات انا معرفهاش.
بس اكتر حاجه كانت بتوجعني..
ان حتى بعد كل اللي عرفته..
لسه مش فاهمه ادهم.
ازاي ممدوح قاله يبعد..
وادهم سمع كلامه.
ازاي قدر يختفي من حياتي بكل السهوله دي ؟
ازاي محاولش حتى يعرفني اللي حصل ؟
ازاي محاولش يتمسك بيا ؟
يمكن ممدوح كان سبب.
بس ادهم برضه كان عنده اختيار.
كان ممكن يرفض.
كان ممكن يسألني.
كان ممكن ييجيلي.
كان ممكن يقوللي انه مش قادر يكمل.
كان ممكن يعمل اي حاجه غير انه يختفي.
حطيت ايدي على وشي.
يمكن ممدوح هو اللي بدأ الموضوع..
بس ادهم هو اللي كمله.
وسؤال تاني بدأ يلف في دماغي:
ليه ممدوح اصلا كان مهتم للدرجادي انه يبعدني عن ادهم ؟
بصيت قدامي.
ممدوح كان سايق وساكت.
حسيت اني لأول مره مش عارفه الشخص اللي جنبي ده.
ولأول مره..
وجوده اللي كان دايمًا بيطمني بقى مخوفني.
بعد شوية وقف قدام البيت.
نزلت من العربيه.
قبل ما اقفل الباب بصيتله.
- ممدوح.
ـ نعم؟
- متكلمنيش تاني.
اتصدم.
ـ ملك..
- مش دلوقتي.
ـ بس اسمعيني.
- انا سمعت كتير اوي النهارده.
قفلت الباب.
ودخلت البيت.
طلعت اوضتي وقفلت الباب ورايا.
وقفت في نص الاوضه.
مش عارفه اعمل اي.
قعدت على السرير.
وبدأت افكر في كل حاجه حصلت.
في اليوم اللي ادهم مشي فيه.
في كل مره كنت مستنيه مكالمته.
في كل مره سألت نفسي هو ليه اختار يبعد.
وفي ممدوح.
ممدوح اللي كان موجود طول الوقت.
ممدوح اللي كنت بثق فيه.
ممدوح اللي كان عارف.
ومش بس عارف..
ده كان جزء من السبب.
غمضت عيني.
وهمست لنفسي:
ـ ليه يا ممدوح ؟
وبعدها سؤال تاني جه في بالي.
يمكن اصعب.
هو ممدوح طلب من ادهم يبعد عني ليه من الاساس ؟
فتحت عيني.
ومعرفتش اجاوب.
بس لأول مره..
بدأت اشك ان الحكاية اللي انا عشتها سنين..
مكنتش الحكاية كاملة.
شكرا لزيارتكم عالم روايات سكيرهوم
