رواية خلخال مشوه الفصل الثامن بقلم زمرده
كللهم اتاخرت لا تنوي
ع الروحه
تدري اليضل وحده
تستاحش اجروحه
•---∞∞∞∞∞∞∞---•
°حواري°
قبل لا أطب سمعته يگول ...
عبد الحق : شني وين صرت ؟
وبس طبيت للمطبخ بعد ما سمعت شي ،نزلت السدريه من راسي وفتحت شعري منگع تنگع ونص هدومي تبللت ،نشفت شعري بعباة أمي المعلگة وبس خلصت خليته مفتوح حتى ينشف كلش
وضليت افتر بالمطبخ ما أعرف شجاني حسيت بروحي جعت
طلعتلي خبزاية من المجمده وگعدت بين ما تموع ما أعرف بشنو افكر هيج خيط وخرابيط ومن شفتها ذبت روحها گمت طلعتلي خياره گصگصتها وخليتها بالخبزه وملحتها ولفيتها وگعدت اكل أطول لفه بحياتي اسكت بيها جوعتي ،وبنص اندماجي ويَّ اللفه غصيت غصه ما أعرف شلون عشت وراها من سمعت صوته يم باب المطبخ يحجي بالموبايل
عبد الحق : شعدك ماشي ويَّ ليث ،جا ليش شتلتني هنا مو متفقين نروح انا وياك
لملمت روحي اريد اطفر من سمعته گال
عبد الحق : راح اطبن اشرب ماي من بيتكم ،انجب انا گتلك لان زحمه اطبن بدون ما تعرف
وبس خليت رجلي بالگاع ناوية اصير بيب بيب ،گلبتني الدشداشة من صارت جوه رجلي ودست عليها ،غير تفلشت تفلش واللفه كلها اتطشرت فوگاي ،من قوة الموقف ما تحركت وسويت روحي
ميته من طب يركض على صوت الطبه القوية الصارت أثر طيحتي ...
بنص ذاك التمثيل وحصرتني البجيه من اجه يضرب على خدي مصدگ بيَّ متخربطه ،انخبص خبص يريد يخابر عزيز وانا لزمت ايده، كافي بعد مو مال تمثيل الا عزيز يلگفني سوالفي ما تعبر عليه
باوعلي وباوع الايدي بسرعه هديتها وگمت اتلفت واحجي بصوت ناصي واحس بروحي هاي الرعنه ترجف رجف ،شلون الزگها ،شلون تتلزگ بيا چذبه وهذا هم ما تعبر عليه دروبي لان صاحبه عزيز بعد
تعثلمت شأحجي وياه من سألني
عبد الحق : ليش طحتي ؟ بيج شي ؟
حمحمت اطگطگ باصابعي
_ صرت زينه انا كلشي مابيَّ
باوعلي مزغر عيونه ورجفة صوتي احسها فضيحه من احجي ،اول تالي أرجف هيج ثول حتى ثول شبيج حواري هاي عود أنتِ السباعيه الما تخافين ،بس هذا حق نسخة عزيز مو أي واحد حواري هذا ما تعبر عليه جذبه خواته يگولون
عبد الحق : تستري
باوعتله مستغربة من حجايته ،شنو تستري قابل
شبيه انا
ومن طخت عدي انا بلايه حجاب طگيتها بركضه عدل وگبل بفراشي الطم وارفس من القهر ،شلون احط عيني بعينه بعد وهوَ شافني مفرعه وكلها بكوم و الفضيحه دلعة ثوبي بكوم ..!!
وبهل ليلة شني عود گدرت انام خلصتها كلساع ينعاد براسي الموقف واشبع قهر وعيني تجافيها النوم بالزايد بحيث مشيت للأمتحان وانا يمكن ما نايمتلي غير ساعه ما عولت يخلص الدوام وارد احط راسي وانام وهم لان خميس ...
نمت وما گعدت غير بالليل كاتلني الجوع ،مشيت اسويلي لگمة وانا صارت بيه خوفه من طبة المطبخ
بس سويتلي لفة جبن وگلاص جاي رجعت طياره للغرفة گعدت اكل واصفن شبعانه نوم وين امشي ..!
°هيوفة°
ما صار هواي گعدت من النوم وانا كاتلتني الضوجه من الغرفة روحي ملت ،گاعده يمي ميمنة وجده ما عايفاتني واكثر
شي ميمنة هواي جاي تتعب وياي ولا عافتني ابد ..
گعدت گبالي تحاجيني
ميمنة : اغسلج شعرج ؟
_ ياريت والله
ميمنة : زين جده مايصير اسبحها ؟
غضة : والله ما أعرف ياجده ،أمشي أسالي عمتج .
مشت تسأل أمي و شوي رجعت أمي وياها
زهرة : متوازيه تسبحين ؟
_ عفنت يمه
باوعتلي ما راضيه
زهرة : خلي رجلها بعيده وابد لا تگربين الماي يمها
ميمنة : خوش
زهرة : تعاي غاااية
طبت غاية تلم بشعرها هستوها أجت من المدرسة وگفت يم الباب
غاية : ها يمه
زهرة : عيني بت عمج وحطن أختج بالكرسي
غاية : صار
اجت تگومني ويَّ ميمنة كل وحده لازمتني من ايد امي جابت الكرسي خلته قريب مني ماكو خطوه على رجلي المابيها شي وگعدت على الكرسي ودفعتني ميمنة للحمام ،سبحتني هيَ ودفعتني ورجعتني للغرفة وجده گامت جابت الصوبه وحطتها قريب مني تخاف لا ابرد
غضة : دفيها زين حبوبه ميمنه اذا تتمرض فلاونزه ما تطيب رجلها
وميمنة بدون ما أحد يوصيها خنگتني على گد ما لبستني هدوم ،وأخر شي لبستني الجواريب برجل وحده وجفون مگابلتني وتضحك عليَّ وهيَّ تعيط بيها وين يالله عافتنه وطلعت من الغرفة ولحگتها جده هم
وخرت الخاولي من شعري وجابت المشط وگعدت تمشطلي وتحجي
ميمنة : انا ملاحظه كل ما تجي ريحانة صخر ينگلب حاله اليوم الصبح عيونه حمر دم مبين ضغطه صاعد
_ انا كلش يقهرني بس اسوي نفسي ما اعرف البي لان تزوجت ولازم يتقبل هيَّ على ذمة رجال
ميمنة : والله مبين ولا متقبل ولا راح يتقبل ،جا غير طلع أول البارحه ولگاهم سوا ،وصارله يومين بس يصيح ويعيط اليوم رزلج ليث الصبح لان ما رايح للگيعان امس
_ راح يضل فد اسبوع بعد يعارك ذبان وجهه ،بس شبيده أخوي هم ما أعرف شلونه جا غير عليَّ تزوجت
ميمنة : لا تلومي هيوفة ،انا شاهده شگد رايدها وبعدين الله ما قسمها اله وهوَ ما متقبل صارت مو اله بعد ذيج السنين كلها
_ هوَ عنودي لو جاي حاجي الجدي چان ما صار الصار
ميمنة : جا شني يجبرها عليه ؟
_ ما أعرف انا حايره ،لا الاگدر الومها ولا الومه وضاله اموت قهر يوميا من اشوفه هيج
ميمنة : يتظاهر مابي شي بس هوَ صاير نار كبره ،ونهار كله يطحن جگاير
_ اوووف ،والله گلبي يتفطر على حاله ،نساها شوي من ضلت هواي ما جايه وهسة رجع حاله اضرب من قبل
ميمنة : خبر حملها حسيته مثل الضربه القاضيه اله والله انا هميت بي ،تمنيته طالع وما تصير البشاره گدام عينه
_ خليها سكته انا متت من القهر ،بس فرحتلها صار سنين ملوع گلبها
ميمنة : أي والله
خلت الضفيره على چتفي وگامت تريد تشر الخاولي
وانا لفيت روحي بالغطه بردانه ،شوي وأجت امي وجده گعدن يمي انا ما اگدر اطلع لان سابحه عاد هنَّ گعدن يمي يسولفن وانا اسمعلهن
زهرة : عمه ما گالج عمي يخطب منو لصخر ؟
غضة : وانا شمعرفني
زهرة : لا والله تعرفين بس ماتحجين
غضة : جا اذا تعرفين بيَّ أعرف اسكتي وخلي كلشي لوكته
زهرة : جا شني انا مو أمه ولازم أعرف
غضة : وشني من راح تعرفين شتسوين ؟
زهرة : يااا عمه جا غير أريد أعرف چنتي مني
غضة : انا اعرفها اسكتي يالله كافي
زهرة : گليلي
غضة : لا ما احجي شيخلصني من عمج هسه يگول ما ضميتي سالفه
سكتت أمي من شافت جده مابيها مجال تحجي ،شوي واجت جفون بدلت ومشت للمدرسة جده گامت تنام بغرفتها وأمي طلعت تسوي الغده وانا رجعت يمي ميمنة مطببه الهدوم النضيفه من الحبل ،گعدت تسفطهن وتحجي وياي
ميمنة : نسيت اگلج أجت ام صاحب برهان ،مهند تعرفي صاحبه من الزغر
_ أي
دنگت راسها تشيل الهدوم تخليهن بمكانهن ناس بالكنتور وناس بالبوفيه ،همست
ميمنة : تخطبني تريد
زغرت عيوني مبتسمه
_ وهاي شوكت ؟
ميمنة : أمي گالتلي جايتهم ،حتى رايده تشوفني وأمي مسولفتلها على حالنه وگايلتها يم بيت جدها
_ والله اذا قسمه زينه ارضي ،العمر يركض ركض
هزت رأسها ب أي
ميمنة : ادعيلي الله يقدم البي الخير الي
_ أمين
طول الوكت ضليت فرحانه بهل خبر ،اتمنى تتزوج وتستقر بحياتها ،ميمنة انسانه تستاهل بس الخير واتمنى مهند يحافظ عليها ويقدملها كلشي تتمناه لان والله مثلها انسانه ماكو مو لان صديقتي بس فعلاً هيَ اسم على مسمى ،وجودها ويانه خير هادئه مثل
النسمه ،شگد تفتر وتتحرك ما تگول أوف ولا تمل تخدم الزغير گبل الجبير وما على وجهه غير الابتسامه ،طول هاي الايام يمنه وهيَ ابد ما گعدت حتى لو رادت تشتغل امي ما تعرف بيها شوكت اشتغلت وشوكت كملت ...
طلعتني العصر من حست بيَّ مليت من گعدة الغرفة
ويَّ طلعتي طبت جفون من المدرسة ،حطت جنطتها بالگاع وردت للمطبخ ،شوي وسمعت صوت نوح طب من برة يحجي وياها
نوح : جبتلج شي
اسمعها تسأله بفضول
جفون : شنو هوَ ؟
نوح : كتاكيت ،مو ردتي ؟
ضحكت بصوت وصلني لهنا ،وانا على صوت ضحكتها أبتسمت
جفون : عليك الله ؟
نوح : أي والله ،خليتهن بره روحي جيبيهن
اختفى صوتها مبين راحت تجيبهن ،وانا باوعت على باب المطبخ شفته طب ،باوعلي وأبتسم اجى يمي
نوح : وجهج يلمع ،شني سابحه ؟
_ أي سبحت
نوح : جا شگد چنتي وصخه ،باعي وجهج شلون يضوي
طلعت جده من الغرفة تعدل بشيلتها ومبين سمعت حجي نوح من صاحت بي
غضة : خايب بسك يا مفلوك راح تدولبها بعينك
ضحك يباوع على رجلي السالمه
نوح : يعني اذا حسدتها تنكسر رجلها الثانيه مثلاً ؟
ضربته بعوجيتيها وگعدت بصفي تحجي عليه
غضة : اسم الله فال الله ولا فالك ،بيش طالبها طلابه
نوح : نسيت احنه ويامن اندگينه ويَّ عزيزة گلبج ،اعتذر عيني غضة
غضة : خوش
گام يريد يطلع وبنفس الوكت طبت جفون من بره شايله كتاكيت أثنين بأيدها واحد لون أخضر والثاني أصفر وصوتهن من ينوصن شعلوه
أبتسمت من شفتها شلون فرحانه بيهن ونوح من شافها طبت ضل واگف يباوعلها ويعدل بشعره
غضة : هاي شني بيدج ولج ؟
ضحكت تراويهن لجده
جفون : كتاكيتي ،كرفس وليمون
غضة : احمدك ربي ،من وزعت عقول نسيت هل فرخه
نوح : شني جده لا تحاجيها
غضة : انا ما حاجيه عليها بس اردينها تكبر تعقل جا شني صارت شكبرها هاي ذاك اليوم خطبنها مني بالمجلس وهيَ بعدها تدور كتاكيت
جان مبتسم بس حجت جده ووصلت لسالفة خطبنها اتبخرت ابتسامته وعگد الحاجب
نوح : مني خطبتها ؟
غضة : يا وشلگ غرض أنتَ ؟
نوح : شني شلي غرض جده جا غير أبن عمها انا
غضة : هم صح ،أم أحمد صاحبتنه رادتها الابنها أحمد الجبير ،شافتها شلون كبرانه ومحلوه گالت امشي عليها بفرحة الزهره ،وانا والله ياجده اشوفنهم خوش ناس
اندار على جفون خازها وهيَّ لازمه كتاكيتها بأيدها وتباوع بعيونها عليه وعلى جده
ونوح من شافها ساكته اندار لجده مگلوب گلب ،هذا
أخوي الهادئ عيونه صارت بگصته
نوح : وأنتِ جده مكيفه تتفاخرين بحفيداتج مسويتلهن عرض گدام النسوان ،شوووفن حفيداتي
حلوووات ويّجيبن العيين
غضة : وخرس لهل صوت شبيك تتنتور علينه
نوح : اسكتي مني جده
اندار على جفون خازرها
نوح : خلِ اشوفج بعد طالعه گدام النسوان
غضة : وأنتَ شلك غرض ؟
نوح : جددده بروح ابوج اسكتي مني
سكتت جده تباوعله وچن بعيونها تريد تقراه ،مشى طلع من البيت وجفون گعدت يمي ونزلت كتاكيتها
بالگاع يلعبن وجده تصيح عليها
غضة : خايبه شيليهن لا اطگهن بالعوجيه
جفون : شني جده تخافين منهن ؟
غضة : يااا ،لا ولج بس تكش روحي منهن
جفون : جده دخيلج يا تكش روحج غير شوفتهن ترد الروح
غضة : جا هوَ الخبال شلون يصير احمر اخضر
جفون : لا اخضر واصفر
ضحكت وگامت تبدل من جده غمتها ،عافت كتاكيتها ومشت وهنَّ شلعن گلب ميمنة اجت تكنس وهنَّ يگمزن عليها ،هشتهن بالمكناسه وكملت كنس ومشت للمطبخ صبت غده الجفون وأجت خلته ومشت صاحتلها ،رجعن ثنينهن ،ميمنة گعدت يمي وجفون گعدت تاكل وتسولف على امتحانها وغاية جوه
وبس خلصت شالت صينيتها ومشت للمطبخ شوي وردت بأيدها ماعون زغير بي تمن ،خلته گبال الكتاكيت وأجت گعدت يمنه ،خلت راسها على رجل
ميمنة ومددت تلف أطراف شعرها على أصبعها ...
احجي ويَّ ميمنة وبنفس الوكت طبت بركة تركض والعباية وگعت من رأسها ترجف وتحجي
بركة : الولد وين ؟ اريد واحد منهم يلحگ لبصائر ..
°غاية°
لطمت ميمنة وصاحت
ميمنة : شبيهااا
بركة ترجف بالگوه واگفه على طولها تحجي بسرعه
بركة : صار يومين دايخه وضغطها هابط حق يلح عليها أمشي أخذج للمستشفى وهيَ ما ترضه ،واليوم
تغسل مواعين و وگعت ردنه بس نگعدها انا وأمي وهيَ ماكو ولا فتحت عينها ونوبه ولا واحد يمنه
بس كملت حجيها ركضت ميمنة لبست عباتها وأمي وراهن ومشن لبيت عمي يوسف
وانا ما گدرت اضل هنا لبست عباتي ومشيت و بس طلعت شفت جفون وراي لاحگتني
صحت بيها
_ شعدج لاحگتني ؟
جفون : جا شني بس حلال عليج تمشين ؟
ما رديت عليها ومشيت ،بس طبينه صارت گدامنه ميمنة تريد تطلع ،مستعجله صحت وراها ما حاجتني ويمكن ما سمعتني اصلاً ...
طبيت بالصاله شفت عمه گاعده وخاله رأس بصائر بحضنها وتبجي وأمي ترش ماي على وجه بصائر صحت من شفتها تحرك فصوص عيونها بس مغمضه
_ جاي تحرك عيونهااا
أمي صارت تضرب على خدها فتحت عيونها تحرك بيهن دايخه ،وايدها على رأسها وبنفس الوكت طبت ميمنة و وراها عبد الحق وفقار ،بسرعه أجه هوَ گعد گدامها يحاجيها مخبوص
فقار : بصائر ،ولج وگعتي گلبي شجاج ؟
عبد الحق : وخر منها لا ادفرك
عاط فقار روحه بخشمه ومن گد ما مخبوص وخايف عليها ذب حرگته ب حق
فقار : وكت غيررتك هسه ،وكتهااا يعني ما تشوف حالها
خزرة ودنگ يريد يشيلها
عبد الحق : انجب لا اطلعك منا دفرات
فقار وگف يباوعله شيحجي وياه يدري بعبد الحق هسه صدگ يسويها ويطلعه دفرات
عبد الحق : جيبولي شال وعباية الها بساع
ركضت بركة جابتهن وأجت اخذتهن من ايدها ميمنة لفتها وهيَّ بحضنه وبس سترتها زين طلع بيها للمستشفى وفقار لحگة وميمنة هم لان بعدها لابسة عبايتها مشت وياهم اسمع حق صاح بيها
عبد الحق : وين جايّه ،ردي ميمنة مستشفى ودنيا وين تردين تمشين
فقار : خلها تمشي ويانه ،وكت غيرتك هسه ؟
سكت حق ومشى وفقار يشغل السياره وميمنة كملت طريقها وراهم وراحوا للمستشفى ،عمه تلوب ضلت وأمي تهدي بيها جفون بصفي گاعده ندستها من شفت خاله أصبعها على رأسها واعرفها من
هيجِ تسوي معناها جاي تفكر بشي وتريد تسوي ..!!
باوعت بوجهي وعاطت
جفون : زرفتي كلااااتي، شبيج ؟
باوعتلها أمي من سمعتها عاطت
زهرة : شبيج يمه ؟
جفون : ماكو شي عمه
ما حاجتها وردت تحجي ويَّ عمه وانا ما عفتها سألتها
_ بشنو جاي تفكرين ؟
جفون : أريد اروح اشوف كتاكيتي محد يمهن
غميتها وغميت روحي
_ وانا عبالي شوف شعدج
جفون : جا غير محد يمهن
_ وجده وهيوفة مو هناك
جفون : وين جده تگدر تگوملهن لو هيوفة
_ جا امشي للبيت
جفون : امشي وياي
_ گومي
گمت اعدل بحجابي ،لبست عباتي وطلعنه ،قريب لا نوصل على بيتنه لاگانه عزيز بس شافنه خنزر وعاط بينه
عزيز : شمطلعچن ؟
عدلت عباتي احجي ويا
_ بصائر تخربطت ومشينه لبيت عمي يوسف
وعود شني فگ العگده مال حاجب لا ابد ،من شفته ساكت جريت جفون وگلتله مرخصتك وطفرت للبيت بس طبينه شفت نوح گاعد بالحوش يخابر هم جابنه بخزره ونزل الموبايل
نوح : وين چنتن ؟
دگت رجلها بالگاع متنرفزه
جفون : شبيكم كلساع واحد جاينه وين چنتن و وين ،شبيكم يعنييي وين موليات غير لبيت عمي يوسف
نوح : لسااانج جفون
جفون : شبي لساني ،ترررره تبزعون والله
حجت وطبت وانا ضليت واگفه اباوعلها من راحت انداريت على نوح من سألني
نوح : شعدچن يم بيت عمي يوسف ؟
ما حجه شي بعد من گلتله
_ مرة صاحبك تخربطت ومشينه احنه وأمي
مشيت اطب جوه واسمعه خابر على فقار يسأله على بصائر ،ذبيت عباتي بالمطبخ ورجعتله
_ شني شگالك فقار ؟
نوح : ضغطها هابط كلش يگول حتى من خلولها المغذي طاحت علينه بالالف ياعلي الا صاحيه
_ وهسه ما صارت زينة ؟
نوح : لا يگول شويَ أحسن بس يخلص مغذيها يردون للقرية
_ خوش
مشى هوَ يطلع ومن سألته وين رايح گال ماشي يلحگهم ،طبيت انا جوه بس شافتني هيوفة هي وجده ثنينهن صاحني گعدت يمهن يسألني بيَّ على
بصائر وانا احجيلهن
_ هسه نوح خابر فقار يگول صارت أحسن بس تخلص المغذي يردون
غضة : من يوم يومها هل بصائر مشلولة حال ويَّ الهبوط شوكت تفك منه ما أعرف
هيوفة : تگطع الگلب والله هواي تقهرني
غضة : ياحبوبة انا اشبع قهر من اشوفن ايدها مزرفة يوميا كانونه
اسمع بحجيهن وقهري يزيد عليها ،جفون ما أعرف وينها مختفيه من سألت جده عليها گالت
غضة : طبت مطنگره وما تتحاجه اخذت فروخها ومشت للغرفة
_ يا فروخ ؟
غضة : هذنِ كتاكيتها ليمون والثاني ما أعرف شسمه نعنان ما أعرف كرفس
ضحكت
هيوفة : ليمون وكرفس
غضة : الله يطيها العقل على هاي الأسماء
گمت وعفتهن يسولفن ومشيت الغرفتنه بس فتحت الباب صاحت
جفون : اهوووو شعدج جايه
_ وسم شبيج مطنگره ؟
جفون : ضوجني اخوج
_ بشنو ضوجج ؟
جفون : اليوم ما أعرف شبي وياي ،ساعه يگلي بعد لا تطلعين بالمجالس وساعه يخزرني لان مشيت لبيت عمي وهمَ منا لهنا ،أخوج ما أعرف شبي شادها وياي كلش
_ غير حسبة أخته أنتِ ويخاف عليج
جفون : جاي يخنگني والله ،انا منا عايشة عمري بالدفرات ومنا هوَ ساعه يضحكني ويوم يضوجني
أخوج مو مثل گبل والله ،ابد ما جان هيج ما أعرف شجاه وهيجِ تغير
_ يغار عليج مثل ما يغار علينه ،هسه مو بس حجه وياج انا هم شملني ماضجت وعذرته من شافنه طالعات وحدنه شني يضحك بوجهنه وما يسألنه منين جايات
جفون : ما أعرف ،انا صايره احسه مو طبيعي ما واحسه يريد يعاركني على كلشي ومرات يضحك بوجهي على كلشي ويجيبلي شأريد ،لو أخوج مو صاحي لو انا
_ هوَ صاحي بس أنتِ مشكوك بسالفتج
جفون : شنو قصدج ولج ؟
ضحكت وگعدت والكتاكيت يفترن يمي
_ هسه على شنو هل ضوجه هاي و وجهج صاير أحمر وعاگده حواجبج الخيوط
جفون : تواسيني جاي لو تحجين عليَّ
_ الاثنين
جفون : خب ولي مني خلِ أقره
_ اليوم خميس صدگ تحجين ؟
جفون : أي صدگ ،جا شني غير اريد اطب وزاري
_ على هاي قرايتج غصباً على رأس المدرسة اطبين وزاري
ضحكت تعدل بشعرها
جفون : جا شعبالج أنا جفون مو حي الله
غميتها من صارت ترمش بعيونها والغرور يطافر بالغرفة عليَّ ،ضليت گاعده يمها نلعب ويَّ الكتاكيت
ومن سمعت صوت نوح طلعت اركض معناها أجوي من المستشفى
_ هاااا نوح اجيتوا ؟
نوح : لا هسه فد نص ساعه
ضحكت ومشيت يمه أحجي
_ وصلني الهم اروح اشوف بصائر
صحت الها
_ جفون تمشين وياي ؟
اجاني صوتها من الغرفة
جفون : لا روحي بس أنتِ
لبست عباتي ومشينه انا ونوح ،بس طلعنه من البيت سألني
نوح : شبيها جفون مطنگره ؟
ما ردت احجيله ،لان وره شويَ يردون حبابيب
_ ما أعرف هيَ ضايجه
نوح : انا من جم يوم سمعتها تگول الامي تريد تمشي تزو أمها وابوها ،خاف ضايجه لان ما أحد اخذها تزورهم ؟
_ يمكن ،وصح هيَ صارلها هواي ما زايرتهم ،وهمَ منا احنه التهينه بالمشاكل
نوح : انا والله لو بس افرغ اخذها واخذ أمي ويانه
گلتله
_ أي احسن
وانا بگلبي اگول وينج تسمعين حجيه
طبيت لان باب بيت عمي يوسف مفتوح وهوَ روايَ صاح أول ما طبينه
نوح : حق
مشيت انا اطب جوه وحق طلعله ،وبنفس الوكت طبوا وراي همَ للصاله ،اول ما طبيت صارت عيوني عليها نايمه وراسها على رجلين امها ومتغطيه بعبايتها روحها رايحه وفقار گاعد گدامها يمسح بايده على مكان الكانونه ويحجي وياها
فقار : ريت التعب الجاسج بگلبي ،من عافيتي على عافتيج
شيماء : اسم الله عمه ،شبيك هيج تحجي
فقار : راح حيلي من شفتها بلايه حيل
بالگوه يطلع صوتها تحاجي
بصائر : فقاااري ،مابيَّ شي صرت زينه والله
حق واگف يخوزر ونوح مطيهم ضهره يباوع على حق ويرگص بحواجبه يضحك ،نتر ما متحمل يسكت اكثر بعد
عبد الحق : سويتها بلايه ملح تره ،دست على نفسي بما فيهِ الكفااايه
فقار : وانا متحملك والله شلون ما أعرف
عبد الحق : أنجب
فقار : تره ماضل شي ونعرس
عبد الحق : گم اطلع بره
فقار : لا اله الا الله ،وخررت عمي وخررررت
گام فقار وهوَ وحق واحد يخزر بالثاني ،تقدمت گعدت بمكان نوح احجي وياها
_ بصائر شلون صرتي ؟ أن شاء الله احسن ؟
بصائر : الحمدلله زينه
انداريت على حق احجي ويا
_ شگد ضغطها نازل
عبد الحق : ضغط الگلب نازل كلش ما أعرف شلون الله عداها على خير
_ الحمدلله
وانا گاعده سمعت صوت جده تلگاها نوح وليث طب هوَ وياها ،وصلها وتحمد لبصائر بالسلامه ومشى
گعدت يم رجلين بصائر تحجي وياها
غضة : سوده عليَّ ياحبوبه يالفقيره ،ريت المرض بالكيرهوج أن شاء الله ،شلون صرتي يابعد حبوبتج ؟
بصائر : الحمدلله جده زينه ،بس أحس بروحي بعدني دايخه
جده باوعت لفقار ورجعت باوعت لبصائر وحجت موجهه كلامها اله وخلت حق يگمز
غضة : شحال گلبك ياحبوبه وهذا حال محبوبتك
وگبل لا يحجي فقار نتر حق
عبد الحق : هااا جده سالمييين ؟
غضة : اركد حبوبه شبيك تگمز تراها مرته
عبد الحق : جا گدااامي تحجين ؟
غضة : جا وأنتَ شدخلك ؟
عبد الحق : لا يااااربي ،جده لاگيتني مگرررن لو شني ؟
غضة : جا بالحلال جده شني متورج على عرضك بالحرام
عبد الحق : لااا امشي انا احسلي
غضة : الله وياك حبوبه ،تعال فقوري اگعد يم مريتك
خزرهم حق وطلع يعارك ذبان وجهه ويحجي ويَّ روحه
شيماء : ليش هيج تحرگين بگلبه عمه ؟
غضة : جا غير مريته ،شني حارمه منها ؟
ضحك فقار واجه گعد يم بصائر ،رفع ايدها يبوسها ويحجي ويَّ جده
فقار : الف رحمه على والديج يا جده ،والله نايم على خوانيگي ما يخليني اتنفس
غضة : يااا ،تعالي وانا وياك اجي تشوفها واريدلي واحد يفك حلگه
نوح : امشي انا احسلي
ضحك فقار واندارله
فقار : خايب والله نسيتك
نوح : طبعاً تنساني ،انا منو شنو بيش الكيلو
اعتلى صوت ضحكته اكثر يشاقي
فقار : من تأخذ شحمتك تعذرني ،واذكرك من تبيعني
غضة : ياشحمة ولكَ نوووح ؟
نوح : ما تبات سالفه بلسانك ،هاك شراااح يخلصنه
غضة : احجولي ولكم
زهرة : احجولنه
باوعلهن وطلع وضل فقار هنا وخبصنا احجي ما احجي ،والله وانا هم اريده يحجي لان اشتغل عدي فضول حواري
فقار : شبيچن ما صدگتن تلگن سالفة ،عمي نتشاقه
غضة : جا خوش انا ما ادافعلك بعد يم حق
فقار : عادي جده ماضل شي واخذها يمي وبغرفتي الله لا يعوزني عليكم
غضة : يااا ياااا الفلك كون لهل لسان ،الخطفوك ماعرفوا يگصوه
فقار : خلف الله عليج
زهرة : لا تزعل من جدتك تشاقيك
فقار : لا شني ما ازعل ،ازعل وازعل و زعلي ثگيل
بصائر : جده ليش زعلتي فقاااري
غضة : فقارها ،خيبه يلام بيج حق أم حلگ الفاهي
بصائر : ياجده شبسرعه گلبتي عليَّ
فقار : جا ما تعرفين جده بسرعه تگلب
غضة : انجبوا يلا
ضحك فقار وما أعرف شني دنگ يحجي ويَّ بصائر وانا گمت گعدت يم أمي
زهرة : جفون ضلت يم هيوفة ؟
_ وانا شمدريني جا غير أجيت گبل جده ،بس أي هيَ ضلت بالبيت
عافتني تحجي ويَّ عمه ،وانا گمت مشيت للمطبخ يم ميمنة ما أعرف شتسوي ،اول ما طبيت سألتها
_شجاي تسوين ؟
اندارتلي ورجعت تخوط بالجدر
ميمنة : اسوي اكل لبصائر بلكي يصعد ضغطها بعد
_ أي أحسن ،عاشت ايدج
ميمنة : وايدج
أبتسمت ومشيت كفيت رداناتي اغسل المواعين المستمعلتهن ميمنة ،واسولف وياها ،طبت بركة ضايجه تدردم گعدت بعتبة باب المطبخ روحها بخشمها
ميمنة : شبيج ؟
بركة : عدي امتحان وانا كلشي ما قاريتله ولا فاتحه الكتاب ولا شايفته أصلاً
خزرتها ما راضيه على حجيها
ميمنة : وليش ما فاتحه الكتاب ؟
بركة : ما الحگ والله ،شني امتحان فوگ امتحان وفوگاها يّجن يطن دروس جديده ،يسطررن والله
ميمنة : اذا من هسه تقرين تلحگين
بركة : هوَ راح اقره لان هاي المعلمه حقنه لو اموت ما تأجلياه
ميمنة : جا لا تضيعين وكت
هزت رأسها ب أي وضلت گاعده يمنه بين ما خلصت ميمنة وانا هم خلصت مشينه ثلاثتنه للصاله ميمنة گعدت بصائر توكلها وانا وبركة گعدنه نحش بالمعلمات ،اندمجت وياها بالسوالف إلى أن أمي گالت لازم نمشي
لبست عباتي وطلعت وره أمي ،وبس وصلنه لبيتنه شفت الولد كلهم ملتمين ببابنه حاجتهم أمي وطبت وانا وراها وبس طبيت للصاله شفت حواري وجفون گاعدات يم هيوفة
أبتسمت ومشيت احاجيها
_ اليوم يمنه
حواري : فلك جا غير بس البارحه ما اجيتكم
هيوفة : هلا بيج بكل وكت
حواري : فدوه لهاي الشكولات الحلوه
أبتسمت وباوعتلي تسأل على بصائر
هيوفة : بصائر شلونها ؟
_ زينه بس بعدها تعبانه حتى وجهه شاحب لونه كلش
هيوفة : والله تقهرني ،تمنيت اگدر امشي جان مشيتلها
حواري : اريد اروحن اشوفها بس استحي
جفون : هااا مني التستحي ؟
حواري : خايبات اسكتن جا غير الله حطني بموقف ويَّ حق يفشل حتى حايره شلون بعد احط عيني بعينه
جفون : موقف شني ؟
هيوفة : احجيلنه شني هذا الموقف المخلي حواري تستحي
حمحمت تباوعلنه وچنها خجلانه تحجي
وضلت ما حجت جفون ما تحملت وعاطت بيها
جفون : علي أبو الحسن وياج ،أحجي عاااد
حواري : خايبات والله استحي احجيلچن
هيوفة : أول تالي تستحين ،دحجي عاد لا اگوم اطگج والله
حواري : وين تگدرين تگومين أنتِ
ضحكنه وهيوفة طگتها على رأسها
هيوفة : امداج مو صوجج صوج المشغله فضولج وتريد تسمع
ضحكت تراضي بيها
حواري : لا تزعلين والله راح احجي
جفون : ديلا عاد
حواري : احم احم
جفون : احمااات ،تحجين لو اسويج عجينات
حواري : حجيت حجيت ،باعن
كلنه گلنالها
_ باوعنه
بدت تحجيلنه على الموقف الصار بيها ويَّ حق ومن وصلت تسولفلنه شلون سوت روحها متخربطه رزلتها هيوفة
هيوفة : ماتوبين أنتِ ؟
حواري : جا غير من الفشله حرت وين اطي وجهي ما لگيت حل غير اسوي روحي متخربطه
هيوفة : وتالي شصار ؟
حواري : ما صار بس انا المعدله من الخوف نسيت روحي بلايه حجاب ما انتبهت الا من گالي تستري
صحنه كلنه
_ شاااافج
هزت رأسها بأي وعيونها لمعت بالدموع
حواري : ونوب الدلعه شكبرها
هيوفة : يمه انا منج اطم روحي مو بس ما أخلي عيني بعينه
حواري : عفيه زيديها عليَّ بدال ما تواسيني
هيوفة : خااايبه حق ،حق شااافج مفرعه ،يمه صخااام بعيني
حواري : اگوم أولي للبيت احسلي لان لو ابقى يمج اكتل روحي من القهر
ضحكت هيوفة تجر بيها من رادت تگوم تمشي وهيَ تصيح
حواري : هديني أولي ،تزيدين همي وانا ميته من القهر
هيوفة : تعاي گعدي وبعد ما احجي اصير فقيره مثلج
حواري : لا صدگت
ضحكت تلاشيها
هيوفة : يعني أنتِ مو فقيره ؟
حواري : لا خيه منيلي فقيره
هيوفة : تعترف
حواري : جا شني اجذب عليجن لو على روحي
هيوفة : صدگ ريحانة مشت ؟
حواري : أي اجه رجلها اخذها گبل لا أجيكم
هيوفة : والله لو ضاله هل جم يوم بين ما يثبت الجاهل ببطنها وراها تمشي
حواري : هم أمي گالت بس هوَ خطيه أجه وبعد ما گدرت تگله لا ما امشي ،گال هوَ اجيبها الكم كل چم يوم
هيوفة : أي احسن
أمي أول ما اجينه طبت نامت وحواري ضلت گاعده يمنه نسولف ونضحك ،اليوم خميس نريد نطلع حيف الامتحانات البعدهن ما خلصن ،صارت الساعه بالعشره گمنه انا وجفون گلينه بتيته وسوينه جاي وردينه يم هيوفة وحواري ناكل ونخبط سوالف بنص
سالفتنه گالت
حواري : انا عاجبني البس فستان بدون عباية بعرس فقار
هيوفة : حتى نزف فقار وندفنج
حواري : لا والله ماعليَّ انا خالتها براسي ،البس فستان مستور والله وحتى مو لون فاتح البس غامق
جفون : خطيه جاي تتحلم جيبولي ماي اصحيها
ضحكت وهيوفة گالتلها
هيوفة : وشني اخوانج يرضون ؟
حواري : ما اخليهن يلجحوني
جفون : لا صدگ هسه تأكدت أنتِ مو بوعيج وجاي تهذين
حواري : خب امشي شني والله يالله غير عررس الله الأحد غير عرررس
هيوفة : جا شني بالاعراس نتصلخ ؟
حواري : بسم الله سوتنه متصلخين
هيوفة : جا شني عباتج سترج وأنتِ تردين تذبيها
حواري : بطلت عمي بطلت
هيوفة : أي عفية
رفعت رأسي على صوت ليث بسرعه لبست حجابها حواري وجفون گامت للغرفة ،طب هوَ مدنگ سلم وباوعلي
ليث : غاية جوعان انا ماكو شي اكله ؟
گمت امشي للمطبخ واحجي ويا
_ هسه اسويلك بس اصعد بدل وانزل
ليث : جا خوش
طبيت انا للمطبخ وهوَ مشى يصعد فوگ ،ترست القوري ماي وخليته على النار وطلعت طماطه اثرمها اريد اگليها واجت يمي حواري
انداريت عليها
_ هاا شعجب اجيتي عاد ماتحبين طبة المطبخ أنتِ ؟
حواري : گلت اجي اونسج خطية ضاله وحدج
_ لو هيج الحنية لو لا
حواري : جا شعبالج
ضحكت ومشيت جبت طاوه خليتها على النار وخليت بيها زيت وبس حمت شويَ خليت الطماطه
وانداريت على صوته وراي
ليث : هاا شسويتيلي ؟
_ گليتلك طماطه
ليث : عاشت ايدج ،واريد وياها كركم شويَ تعرفين بيَّ أحب بيها طعم
_ أي اعرفك شلون تحبها ،بس اگعد شوي بين ما تستوي
مشى للصاله وانا ضليت بالمطبخ حضرت الصينيه وبس أستوت الطماطه خليتها بالصنينه صبيت گلاص الجاي وشلتها ومشيت للصاله بس شافني گام اخذها من ايدي مبتسم ،خلاها بالگاع گاعد بصف هيوفة ياكل ويحجي وياها وانا هم گعدت وأجت بصفي حواري گاعده بس تحوس وكلساع تعدل بشالها
ليث : شني تاخذين دواج لا ؟
هيوفة : أي والله اخذه وهم ماضل شي ويخلص لازم ارجع اجيبه
ليث : بس يخلص گليلي انا اجيبه الج
هيوفة : خوش ،صح ليث شأخبار الموكب ؟
ليث : جانوا لازمينه ولد جماعتنه وأليوم لا رديناله ورجع اقوى من گبل
هيوفة : جا خوش هم زين
ليث : انا قليل امشي هناك يمهم لان ملتهي بالزرع والله تعب الگيعان
هيوفة : سوده عليَّ
ليث : أسم الله عليج ،تعدي ما ضل شي للحصاد
هيوفة : أن شاء الله تحصودن بالسلامة
ليث : أي والله ونعوض كون خسارة العام
هيوفة : أنتَ شتشوف هل سنه الحنطه شلونها ؟
ليث : والله مبينه راح تذبلنه خير من الله ،بس كون الله يسترنه وتعدي هل أشهر بخير
هيوفة : أن شاء الله ،اكل واصعد نام والصبح اذا رادوا يگعدوك ما اخليهم
ليث : اروح فدوه لوجهج
أبتسمت وهوَ شال صينيته ومشى للمطبخ ،احب شلون ما يستنكف لو سواله شغله ،بحيث هوَ رجع حمه الجاي وصبله وانا واگفه اغسل بالطاوه ،وگبل
لا يطلع أجه باسني من راسي وبس مشى حواري أجت يمي جانت واگفه على صفحه تباوع
حواري : لج هذا اخوج ناااادر ،اول مره اشوف واحد من ولدنه هيج
ضحكت
_ لا هذا غير عنهم ،المملوح على گولة جده
حواري : والله صدگ غير عنهم ،فقار مثله بس عزيز وضيررم يمه بالظيييم ،اذا ضيرم بي مجال عزيز لا ابد
_ بس لو تعوفي أنتِ وما تخلين راسج برأسه جان ما ضوجج
حواري : خايبه ما اگدر وين أنا اگدر على لساني شيسكتني
_ جا ضلي عرك أنتِ وياه
حواري : مرات ضايجه من اعاركه اتونس
_ الحمدلله
مسحت ايدي بثوبي من الماي ومشيت للصاله وهيَ أجت وراي وبنفس الوكت اندگ باب المطبخ وطب نوح وفقار ،طبوا يتشاقون من شافها عاف نوح وباوعلها
فقار : جا جاية هنا وما ترحين تشوفين مرتي ،شلون حماية ادبسزز أنتِ .
حواري : جا شمدريني انا أجيت هنا ودريت
فقار : وشعدج جاية ؟
نوح : هاا سالمين ؟
فقار : ولك صايره ما ترگد بالبيت
نوح : جا حقها تضوج وحدها وتجي هنا
فقار : وأمي خطيه
نوح : تزوج وخلي مرتك يم أمك
ضحك فقار مأيس ،وحواري مشت جابت عباتها من گالها يمشون ،لبستها وطلعت وراه وانا وصلتها للباب وطبيت مشيت بسرعه للغرفة اعدل فراش هيوفة ونوح طببها خلاها عليه وگعد يحجي وياها گبل لا يمشي ينام
نوح : شلونها رجلج ؟ توجعج ؟
هيوفة : أي والله توجعني بس شسوي اشرب مسكنات يهده الوجع شويَ و وره شويَ يرد عليَّ وضاله هيج
نوح : يلا ما ضل شي وترجعين تفترين بالبيت ونتريگ من ايدج
ضحكت اشاقه وياهُم
_ هسه تگلك ما اريد اطيب خليني هيج
ضحك وگام يريد يطلع ،وگبل لا يطلع باوع لجفون الواگفه على صفحه ومندگه رأسها ،أخذ نفس ونزل عينه ومشى طلع وهيَ أجت مدت فراشها وشمرت نفسها عليه وبساع نامت وانا لملمت الغرفة وفرشت فراشي وگبل لا اطفي الضوه باوعت على هيوفة هم نامت عاد طفيت الضوه ومددت
°حواري°
گاعده اقره وصايره الطالبه الحبايه وطبت عليَّ أمي رفعت رأسي ابوعلها وهيَ تحجي
نجوى : ما خلصتي ؟
_ ضلي شويَ واخلص حتى باجر اراجع
نجوى : جا گومي امشي وياي لبيت عمج يوسف وين تضلين هنا وحدج
دنگت رأسي بالكتاب
_ لا يمه وين جاي أقره
نجوى : امشي ما نتأخر ونرد
_ يمه دعوفني وروحي وحدج
نجوى : جا شيخلصني من اخوج ،دگومي يمه ليش تعلين گلبي
نزلت كتابي مستسلمه ،هاي هيَ أم ضيرم قفلت بعد تاخذني وياها يعني تاخذني گمت بدلت ثوبي ولبست حجابي وعباتي ومشيت وياها وگد ما انا حضي حلو من دگت الباب فتحه حق
سلمت عليه أمي وطبت وانا وراها وهوَ وراي سد الباب واجه ،هاي انا حواري ما رفعت عيني ولا گدرت ارفعها طول ما هوَ گاعد گدامنه بالصاله
أمي منطلقه تسولف ويَّ عمه وانا ضاله اهش ذبان
والحمدلله نقذتني ميمنة من صاحتني بالمطبخ يمها ذبيت عباتي ومشيتلها
بس طبيت ركضت اخذت دولكة الماي أصب
لروحي بالگلاص ،شربته كله واحس بروحي مبوخه
من المستحه ولا اگدر ارجع اطب جوه
ميمنة : شبيج حواري ؟
هفيت على وجهي
_ مابيَّ شي بس شو جني مصخنه
أجت حطت ايدها على گصتي
ميمنة : أي والله ولج چن عدج بداية صخونه
_ يمكن لان سبحت العصر وهسه الجو برد
ميمنة : أي اكيد ،امشي طبي جوه المطبخ بارد وهدومج مو ثخان
_ لا خليني گاعده يمج
ميمنة : وين ضاله ،امشي انا بس اصب الجاي الحگج
_ خوش
مشيت ادفر بنفسي واقنع بروحي ،يالله حواري شني يمكن نسى الصار كافي توهوسين ،انا اقنع بروحي وما مقتنعه ،بس گعدت لزگت بأمي شوي وأجت ميمنة قدمت الجاي ومشت للغرفة تگعد بصائر گالت
عمه نجوى هستوها نايمه ،وبس طلعت ميمنة طلعت وراها بصائر غسلت وجهه وأجت سلمت على أمي وانا گمت بوستها ،بوستين ،بالثانيه گتلها بيني و بينها
_ الثانيه بالنيابه عن أخوي
أبتسمت وگعدت وانا رديت بمكاني وهذا بعده گاعد ياربي شعده مگابلنه احس گاعد على نفسي ولا حتى اگدر احجي لان جاي افكر اذا سمع صوتي يتذكر موقفي الخايس
فززتني ايدها من خلتها على رجلي تحاجيني
بصائر : شبيج اليوم ساكته ؟
ردت احجي وأجت عيني عليه رفع راسه باوعلي ورجع يباوع بموبايله ،وانا هذا صوتي اختفى بالگوه الا حجيت وگتلها
_ دايخه بالامتحان
بصائر : قارية ؟
_ أي والله بديت من اليوم وباجر ارجع ،ارجع من جديد حتى لا انسى واجاوب
بصائر : جا لا تخافين
هزيت رأسي ب أي وضليت گاعده اتصفن هاي انا الاموت على السربته ما عولت أمي تگول يلا ،گمت بسرعه لبست عباتي وطلعت وراها بس وين أمي وعمتي ضلن يحجن بالباب ما فضنها الا من گتلها
_ ماشيه گدامج
جرتني من ردت امشي
نجوى : فلك الفلكج وين مولينه اذا يشوفج اخوانج شيخلصنه
_ جا فضنها فدوه اروحلچن مو اريد اقره
شيماء : خيه اذا رسبت تحطنه حجه
نجوى : أي والله ،تصبحون على خير
شيماء : وأنتِ من اهل الخير
فرجت يا الله، مشينه وبس وصلنه للبيت بوجهي لكتابي رجعت اقره وبس كملت شمرت الكتاب ونمت
جفي على وجهي ما گعدني غير صوت فقار ،غطيت رأسي بالمخده وهم ما فاد ويَّ صوته ،أخر شي أيست وگعدت على حيلي
اباوعله وعيوني مطفيه
فقار : گومي اكويلي دشداشتي مال طلعه اريد امشي للمجلس
خليت ايدي على حلگي اتثاوب
_ شوكت تمشي ؟
فقار : العصر
فتحت عيني وصحت
_ جا ليش هسه مگعدني ؟
فقار : مو اعرفج تنسين عاد إأمن على روحي واخليج تكويها گدامي
تمددت وغطيت حتى رأسي احاجيه
_ انا بس اگعد اكويها
فقار : لا صدگتج
_ خب والله بس امشي
فقار : احرگج بالاوتي لو لگيتج ما كاويتها
_ أي ميخالف
بس طلع رجعت نمت ،ومن گعدت تريگت وخلصت النهار افتر بالبيت ومن صار العصر گعدت اراجع القريته وحضي الحلو نسيت دشداشة فقار ،بحيث ما تذكرتها الا من سمعت صوته بالصاله ...
طلعت اركض وهوَ بس شافني عرف ما كاويتها ،صاح وراي وانا على الدرج أصعد لغرفته
فقار : هااا شحجينه احنه ،مو گلتلج تنسيها
جبتها ورديت اركض وانا على الدرج احجي وياه
_ بين ما تسبح انا كاويتها
فقار : ومنو گايلج انا اريد اسبح
_ لا اسبح شني شلون تمشي ما سابح
سكت ما حجه شي وانا ركضت لغرفة امي جبت الاوتي وگعدت اكويها وما اعرف شلون غفلت عنها لزگت بالاوتي نص ردانها ماع جا شني غير روحي ماعت وياه
اخذتها الامي اطگطگ وهيَّ بس شافتني خرطت خدودها عرفت بيَّ حرگتها
نجوى : احترگت مو ؟
هزيت رأسي ب أي
نجوى : هواي ،شو اشوفهاا
عتتها من ايدي وبس شافتها غمتني
نجوى : جيره هاي ما دبرتيها ،اكليها شراح يخلصج لو طگج لا تجين تركضين وراي
_ يااا يمه شبيج تخوفينيي
نجوى : جا حرگتي الزينه ،لو وحده من القديمات فدوه بس هسه بيمن يمشي
_ جا يمه انا شمعرفني الاوتي حار
نجوى : ما عرفتي تنصي ؟
_ لا نسيت
نجوى : مو جديده ،صايبج زهايمر
فزيت من سمعت صوته وراي جا غير احرك رگبتي
شكلت
فقار : ها المعدله حرگتيها ؟
باوعتله وعصرت عيوني بسرعه غورگن بالدموع
_ شوف انا ما اعرف الاوتي عالي ،لو اعرف جان نصيته
فقار : يعني احترگت ؟
هزيت رأسي ب أي وطاحن دموعي
فقار : جا جيبيلي غيرها أمري لالله
ضحكت ومسحت دموعي الچذابيات
_ صار
طگيتها بركضه لغرفته جبتله غير دشداشة ونزلت اخذها من ايدي يباوعلي صفح يريد يحجي بس لازماته دموعي ،لبسها وطلع وانا رديت اقره بس والله بعدني مقهوره عليها فصلها غاليه ،بس انا شمدريني الاوتي عالي جا غير مسطور راسي من أمتحان باجر حتى مشى بيَّ الوكت وانا چن جاي احفظ من جديد مو اراجع ما عولت شوكت اكمل وانام وبس كملت حتى ما لميت الكتب نمت بنص الهوسه هاي ومن گعدتني أمي گمت اطوطح امشي واباوع بعين وحده ...
گعدت اتريگ وانا كتابي بأيدي اراجع وضيرم گدامي وترتني اسألته
ضيرم : قريتي زين ؟
نزلت گلاص الجاي ارد عليه
_ والله يومين انا بس اقره اذا مو اقل شي ثمانين طگني
ضيرم : لا ما اطگج انا متاني الدخول الوزاري ،صدگ ابطلج لو ما طبيتي
شلت كتابي اريد امشي لان سمعت صوت هون الخط وگبل لا اطلع حاجيته
_ والله لا هل سنه اطب وزاري وشوف
ضيرم : جا خوش حتى الج خوش هدية مني
أبتسمت وطلعت بس ردت أصعد بالخط شفت رقية گاعدة بمكاني گتلها
_ وخري من مكاني لا ادفرج من الكيه
رُقية : لازم تراضيتن ؟
_ أي ،يالله وخري
ضحكت وردت لكرسيها وانا گعدت بمكاني الجانت گاعده بي ،وبس وصلنه للمدرسة كل وحده ركضت لصفها ،هل أيام مسويتلنه رعب دگ امتحانات ما ضل شي لنص السنه وانحصرنه هسه بالشهريات...
ومن امتحنت وحسبت درجتي تجي بالتسعين روحي ردت ،ومن رديت بوجهي لضيرم گلتله گال من اجيب الورقة الا احصل هديتي وما عولت شوكت المعلمه تطينه الأوراق وبيوم الوزعتهن واخذتها طرت وانا اشوف درجتي واحد و تسعين وبس رديت للبيت اطيتها بأيد ضيرم وانا مبتسمه وهوَ بس شافها أبتسم
ضيرم : هاي الدرجات الترد الروح ،گليلي شني تردين اجيبلج ؟
صفنت وانا افكر شأريد و من كل عقلي گلت
_ أريد زنجيل ذهب بي حرفي بالانكليزي
ضحك وضرب على رأسي بالوقة
ضيرم : جا لو جايبلج انا احسلي ولا مخليج تختارين وتخسريني
رفعت حاجبي
_ جا ما استاهل اناااا ؟
ضيرم : تستاهلين يابه ،امشي طبي وسهله
اطاني ورقتي وطبيت امي گاعده بالصاله تخيط من هسه بجهاز ابن ما أعرف بت ريحانة بس شافتني عافت الابره جانت تلضمها
نجوى : بشري وزعوا الأوراق ؟
مشيت يمها اراويها الورقة واحجي
_ جبت واحد وتسعيين ،تخيلي انا جبت واحد وتسعيين
نجوى : جا من اگلج اليقره ينجح تگليلي لا يمه المدرسه حظوظ
ضحكت وانا اگلها
_ سحبت كلامي
نجوى : امشي بدلي وتعاي تغدي
_ واريد انام
نجوى : نامي براحتج ،مو عدكم عطلة ؟
هزيت رأسي ب أي
_ اطوها عطله مال اربعين
نجوى :جم يوم ؟
_ الخميس دوام بس المديرة گالت الأحد الا نداوم
نجوى : جا خوش اشبعي نوم عوضي تعب هاي الامتحانات
_ أي والله انشگ حلگي
ضليت احجيلها شويَ على بهذلة الامتحانات ،مشيت بدلت ورجعت صبيتلي اكل وگعدت اكل ،احس طعم الاكل غير لان عطلة
وانفتحت شهيتي اكثر من ثاني يوم طب ضيرم وصاحني بأيدة علاگة زغيره وانا كلش زين اعرف هاي العلاگة مال ذهب ،ومن فتحها وشفت العلبة طار گلبي والضحكه ترست وجهي وانا اشوفها مثل ما ردت حرفي والزنجيل ،ناعمات بنعومة كلش حلوه لا هنَّ كبار ولا زغار ...
الضحكه تارسه وجهي وانا اگلب بي بيدي واحجي وياه
_ شكراا شكرااا
أبتسم وهوَ يشوفني شلون فرحانه
ضيرم : تدللين يابه ،هديتج الاكبر على الوزاري
ضحك اهز رأسي ب أي ومشيت اللبسها ،طبيت للمطبخ وگفت گدام المراية ولبستها وانا اباوعلها شلون صارت تلمع على رگبتي
انداريت على صوت عزيز وراي
عزيز : هاي شني ؟
رفعت السنسله اشوفها اله
_ ضيرم جابلي هاي هدية لان جبت واحد وتسعين بالامتحان
هز أيده وصاح
عزيز : فلوسك زايده ،وانا البارحة گتلك دايني تگلي ماعدي
طب ضيرم للمطبخ مسح على شواربه
ضيرم : جا ليش اداينك وانا أعرف بيك نايم على الفلوس ،خانگهن خنگ
عزيز : جا غير جاي الم للسياره مو تعرف بيَّ
ضيرم : طلع منهن ،غير سالفه هاي تلم وتداين مني
عزيز : جا هاي البتره احسن مني اجيبلها گلادة بذيج الحسبه ويمكن اكثر حتى من الفلوس الردتك تداينهن الي
ضيرم : أي والله صح
عزيز : الله لا يعوزني عليك
ضيرم : خوش
ضحك ضيرم وطلع من المطبخ وعزيز لحگه يحجي وضيرم ساكت ،وانا ضليت كلساع يا رايحه يا راده اشوف الگلادة على رگبتي وامي جانت نايمه من گعدت خبصتها خبص بيها كلساع وگتلها شوفيها حلوه لو لا ...
°ليث°
نوح : ولك عزيزز تعااال راح يوگع الچادر
نوح لازملي الجادر وانا صاعد على الدرج افك الحدايد مالته
ضيرم : استعجل ليث كومة شغل ورانه
_ جا اطييير شبيك مو هل جاي افكه
ضيرم : ديالله بساع ،تعال فقااار شو ماخذلك ركن شني مكسرر
فقار : انا عريس شني تشغلوني
ضيرم : تعال لا أمدك هنا واشوفك العريس شلون يصير
ضحك ومشى يشيل الجدر
فقار : هاا اهااا اشتغلت عمي اشتغلت
باوعله صفح ودار وجهه علينه ،واگف فوگ رأسنه چن ملك الموت وصخر گاعد على الكرسي يوجه بالولد ومن تصير شغله ما تعجبه يصيح هرجنه هرج خلانه نركض مراكض وهوَ وضيرم بس يباوعون ...
نزلت من الدرج واجه فقار اخذه ما اعرف شيريد بي ،وانا مشيت ويَّ عزيز من صاحني شلنه القزن نطببه بالحسينيه و لحگنه عبد الحق شايل برميل الماي ...
ضلينه لليل احنه نشتغل ومن كملنه قفلته الحسينيه وردينه للبيت نحظر روحنه نمشي لكربله
°غاية°
طب ليث هدومه كلهن تراب ،وراه طب صخر عكسه بالضبط دشداشته تلمع ،ليث جابله هدوم ونزل يريد يسبح صاحه
صخر : لا تتأخر ليث اريد اسبح انا هم
ليث : لا ما اتأخر
طب يسبح وانا اركض منا ومنا احضر هدومهم ياخذوهن وياهم يومين ضل لزيارة الأربعين وهمَ هم يالله يلحگون نص الطريق راح يرحونه سيارات
كل سنه يكفون الموكب كبل هيج وكت بس هل مره طريقنه ضلت الزوار تمشي بي وما گدروا يسدوه ويمشون ...
صعدت لغرفة صخر طلعت جنطته مال مشاية خليتله بطرونه الأسود وفانيله سوده وهم بجامه وفانيله خاف ما يگدر يلبس البطرون وباقي احتياجاته الوصاني عليهن وبس كملت مشيت لغرفة ليث هم حضرتله اليريده ونزلت جوه لاگاني ليث يصعد
ليث : حضرتيلي غراضي ؟
_ أي ،وشوف اذا اكو نقص صيحني
ليث : خوش
نزلت وهوَ كمل طريقه ،مشيت گعدت يم هيوفة وجده گاعدات بالصاله
بس گعدت سألتني
هيوفة : حضرتي غراض الولد ؟
_ أي حضرتهن ،كل سنه أنتِ تحضريهن وانا بكلشي ما أعرف انا ،هل سنه وين اخذت مكانج
هيوفة : السنه الجايه أن شاء الله ما اخليج تسويّن شي
أبتسمت
_ دطيبي هسه والله كريم
هيوفة : أن شاء الله ،والله جاي اموت من الگعده
_ حقج والله شني متعوده تفترين وهيجِ برمشة عين صرتي ما تدوسين الگاع وحدج
قاطعني جده ما راضيه لان هيج احجي
غضة : بعد بعد ،بجيها
ضحكت
_ لا والله جده بس جاي اواسيها
غضة : جا لو كل اليواسون مثلج چان كل المرضى انتحرت
اجت جفون تضحك
جفون : شني جده صراحتج تقهر
غضة : جا هيَ تريد تبجيها
جفون : جا جده أنتِ أهم شي عدج هيوفة واحنه لا هيج لاگينه بالزباله
غضة : لا حبوبة ما بيچن وحده لاگيها بالزباله ،انا امشي بكل طلوگه ويَّ امهاتجن
جفون : جده أخذيني وياج من تمشين للأربعين مال أبوج الله يرحمه ،أريد امشي ازور أمي وأبوي
غضة : يااا وين أخذج بهذا وجهج اليجيب التايه
جفون : اهووو جده ياوجه
غضة : شني انا مضحكه وتضحكين عليَّ جا غير بياضج يشع
ضحكت انا وهيوفة وجفون طنگرت
جفون : ما عليَّ جده لو تاخذيني لو تگولين لواحد من الولد ياخذني انا وعمه لان طگت روحي والله
غضة : حگج ياجده بس اشوفن اذا رضى جدج أخذج وياي واذا لا اخلي ليث ياخذج أنتِ وعمتج
_ لا جده نوح گال هوَ ياخذها
غضة : جا خوش
جفون : ما ما امشي وياه
غضة : ليش ولج ؟
جفون : ما انا ويَّ نوح ما امشي
غضة : اااخ منج العرررمه
جفون : يبوووو ،يا سالفة العرمه الما تخلص
ضحكت وگمت يم أمي اساعدها ،وانا اغسل بسلالي الثلاجه سمعت صوت ليث بالصاله وصخر هم يحجون ويَّ جده وبنفس الوكت طب نوح يمشي مستعجل ،بس طب للصاله حجه ويَّ الولد
نوح : تانوني بس اسبح ،انا وفقار هم نمشي وياكم
ليث : جا مو گلتوا تلحگونه ؟
نوح : لا نمشي وياكم احسن
صخر : جا بسرعه لا تتأخر
نوح : ربع ساعه ،تعاي غاااية هدومي حضريهن بساع
سديت البوري ومشيت اصعد فوگ ،وهوَ طب يسبح بين ما حضرتله هدومه وخليتهن على جربايته ونزلت وهوَ صعد يركض مشط واخذ جنطته ونزل والولد كلهم التموا بحوشنه بين ما يّجي فقار ،وبس اجه مشوا كلهم واحنه نوصيهم يدعلونه
وبس سدوا الباب احنه طبينه وضل البيت فارغ من الولد وابهتانه وماكو غير بس جدي ضل هنا ...
گعدت اباوع على المسلسل ويَّ جده اتابع هنود وانا شني وياها ماخذي الواهس
غضة : يا كون فلك الفلكم اعلانكم ساعة شني شوكت يگضي
_ أي والله جده يلعبون النفس باعلاناتهم
وبس خلصت المسلسل جده مشت تنام وانا هم طبيت للغرفة حتى انام ،بس تذكرت ما شارة الهدوم الغسلتهن ،طلعت بساع بنص البرد اليگص گص شريتهن ورديت نمت ،وعلى هل حال مشت اليومين وبيوم الزياره ،كلنه التمينه الضهر قرينه زيارة عاشوراء وصلينه ركعتين لكُل من استشهد بواقعة الطف ...
وبالليل اجوي الولد تلكيناهم ب
_ "الله يساعدكم، وزيارة مقبولة"
نوح گعد ماد رجليه يفكر بيهن نص الطريق رادينه مشي وليث گعد يطگ بالفرگاس التارس اصابعه ،وصخر گاعد يدخن ويحجي ويَّ جده يسولفلها على أجواء المشي وجده وره كل حجاية تگول
غضة : ريت عدي حيل وأمشي للحسين
صخر : خلِ بس تعدي فتره وانا اخذكم
غضة : والله تسوي فضل ياحبوبه
صخر : تدللين جده ،مرخصتكم گايم اسبح
طگيتها ركضة گبله اشوف الحمام نضيف لو لا ،من شفته نضيف طلعتله هوَ واگف بالباب يعرفني جاي اجيگ الحمام
_ طب خويه الحمام نضيف
صخر : ماعدي حيل أصعد تگدرين تنزلين هدومي ؟
_ صار تدلل
أبتسم وطب يسبح وانا مشيت نزلتله هدومه اطيتهن بيد نوح وداهن اله استحي انا ادگ الباب عليه
وبس طلع طب وراه ليث سبح وطلع وبين ما يسبح نوح وگفت انا وأمي نسويلهم عشه لان بالطريق نايمين وما ماكلين شي
بس كملت الصنينه هل مرة تگابلنه عليها انا وجفون شلناها نوديها للصالة ،بس شافنه نوح صاح
نوح : هااااي شكووو ،شعجب ما صحتني اشيلها ؟
ضحكت ونزلناها احاجيه
_ گلت خطية لان زاير وتعبان
نوح : الله يطيج هم زين حنيتي بحالي
ضحكت وگعدت وياهم اكل لان كلهن تعشن بس أنا لا
أصب جاي واسمع سوالفهم
نوح : المحامي دگته الفلاونزة كلش
ليث : جا غير سبح بماي بارد ،شگد گلتله لاتسبح وهوَ دگ عناد
صخر : خابرته گبل شوي گال زايد ما ناقص
ليث : اريد امشي اشوفه
صخر : وانا هم امشي وياك
بس كملوا اكل غسلوا ومشوا يشوفون عزيز ما گدروا ما يمشوله ،طلعوا واحد وره الثاني وصخر أخر واحد بيهم وبس مشوا انا وجفون شلنه الصينيه وغسلنه المواعين وبس كملنه مشينه للغرفة ،مديت فراشي قريب على فراشي هيوفة النايمة وحطيت راسي ونمت لازم من باجر اقره للأمتحان هم يالله الحگ لان بالنص فصل انا ولا قاريته ...
°حواري°
گاعده بالمطبخ واسمع سوالفهم ،كلهم أجوي حتى يشوفون عزيز داگته الفلاونزة دگ بحيث شني دخان يطلع من خشمه گد ما مصخن
ليث : گلتلك لا تسبح بس راسك يابس والبراسك براسك
گح ورد على ليث
عزيز : طالع على أبن عمي الجبير
صخر : أنجب
عزيز : مشكور
صخر : تدلل حتى بعد لا تحجيني وانا ساكت
ضحك عزيز وما سمعت شرد على صخر ،وانا گمت اركض للمطبخ من سمعت باب الديوانيه البره انفتح ،باوعت من الشباك عبد الحق يفتر بالحديقه ويخابر ...
ما لحگت اضم روحي لجحني واگفه اباوعله ،خزرني ومشى يطب لليديوانيه ،وانا ضليت اعضعض بأصابعي من القهر ،ليش كل موقف يجمعني ويَّ هل انسان اخيس من القبله ..!!
ما أعرف اعتب على حضي لو على فضولي اليوميه شامرني بداهيه وما اگدر اعوفه
رديت للغرفة اصفن ويَّ الحياطين ،صح گبل جنت فضوليه بس هسه اكثر لان ضاله وحدي احير وين اطي وجهي ...
°غاية°
خليت أيدي على خدي واباوع على جده تعارك بصخر تريد تاخذني وياها للأربعين وهوَ ما راضي
صخر : جده شني يوميا ماخذه وحده من البنات وياج هسه تجينه حجاية
غضة : حجاية شني ،خاب ما تنجب جا غير ماخذتها لهلي
صخر : من الاخير جده غاية ما تمشي
غضة : جا خوش انا اگلن لجدك
صخر : شني السالفه جده ؟
غضة : جا انا بعازة وحده من البنات وياي وأنتَ تريدني امشي وحدي بلايه ضمير
سحب نفس من الجگارة يفكر ،وحتى من گال خلِ تروح أعرف بس ما مقتنع ، و وراها ستمية الف مره وصاها عليَّ بحيث عل گلب جده وخلاها تعيط بي ورحها طافره
أنا گبالها گاعده ولان اشوفة ما راضي حتى أخاف امشي احظر روحي ولوما جده گايلتلي گومي جان ضليت گاعده والگعده گعده
بس طبيت للغرفة صاحتني يمها
هيوفة : اخذيي گلبياتج الجدد السود ،واخذي شال للأحتياط، واللبسي شالي الجديد حلو يطلع عليج وهم عطري اخذي
ضحكت
_ وين ماشيه لعرس ؟
هزت أيدها
هيوفة : جا راح تمشين وتشوفيهن ،نسوان أل خبير دولاب أگشر ،فاتحه و وحدتهن لابسه تراچي ومحبس ذهب والمتزوجه لابسه حلقتها ،ليگول عدهن استعراض مال ذهب
_ جا راح اللبس التراجي مالاتي
هيوفة : أي والله اللبسيهن ،المن ضامتهن ؟
_ ماتعرفين أخاف عليهن لأن هدية من ليث ،كلش مستعزه بيهن
هيوفة : جا حرامات يمشي موديلهن وبعدج ضامتهن
اخذت بكلامها وفتحت الكنتور ضامتهن ويَّ هدوم الطلعه ،فتحت العلبه وانا اباوعلهن ولا خالتهن بأذني كلش احبهن لان اكبر هدية مال نجاحي من الثالث متوسط ،شجعتني هيوفة ولبستهن وحظرت هدومي ونمت گعدت الفجر على صوت جده تگعدني
گمت امشي مطفيه ،شفت أمي گاعده محظره الريوگ وخالته بالگاع وجده وجدي گعدوا يتريگون وانا غسلت وجهي وگعدت اتريك وياهم وبس كملت مشيت للغرفة حضرت روحي وطلعت بأيدي عباتي
وجنطتي ...
رفعت رأسي على صوت خطوات على الدرج ،شفته صخر ينزل بكامل كشخته ،لابس الدشداشة السوده ومعدل شعره بشكل حلو وايده مزينتها الساعه الجلد الجوزيه بلون الشحاطه ،استغربت ما أعرف بي هوَ راح يوصلنه الا من گال
صخر : كملتوا ؟ نمشي ؟
طلعت جده وانا لبست عباتي ورجعت شلت جنطتي ومشيت وره جده ،جدي صعد بالصدر وانا وياها وره ،شغل السياره ومشينه الاحد المحافظات البعيده
طول الطريق انا كلساع اسأل جده شوكت نوصل وهيَ تگلي
بعد ،وساعات الا شفت عبارة
"أحد المحافظات ترحب بكم"
بس قريتها انداريت على جده
_ هذا المدخل ،وصلنه مو جده ؟
غضة : أي بس بعد جده ساعة هيج ونطبلهم
سكتت اباوع من الجامه وراح تعبي من بدة صخر يطب بدرابين واخر شي طبگ گبال بيت ضخم كلش وجده فتحت الباب تريد تنزل ،عرفت هذا بيت
"أل خبير"من طلعوا كومة زلم يتلگونه ،من المستحى ضميت روحي بعباية جده وما وخرت الا أن طبينه جوه وتلگنه النسوان ليگول فيلق بدر لا وحده ولا أثنين انشلع خدي من السلام ...
طبينه جوه وانا اباوع على بيتهم شگد ما بيتنه جبير هذا عداله بمرتين ،انا بس دوم اسمع جده تحجي بي وهسه شفته بعيوني وشفت اجوائهم واعدادهم الهائله ،والمصيبه مو كلهم نص من اولاد واحفاد أل خبير هنا عايشين،صايرين ملحمة كلكامش
ما تحركت ضليت لازگه بجده وهيَ مندمجه تحجي ويَّ مرة اخوها وانا اسمعلهن بس شتت تركيزي من طبت بنية ما شفتها گبل شوي اندريت على جده من گالت
غضة : ياهلا ببت أخوي ،تعاي أحبج بعد عمتج
گمتلها اسلم عليها وهيَ مدتلي أيدها مبتسمه
نسمات : انا نسمات بت خالتج ناهده ..
