رواية اميرة وادي الذنوب الفصل الثامن
وقبل ما نبدأ نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
مع نهايه الحلقة اللي فاتت عرفت علياء انها مش علياء وده سبب حيره كبيره وأسئله كتير دارت في دماغ علياء طيب يا تري هي مين وايه الحكايه لكن مع المفاجاه دي. لقيت علياء مفاجاة تانية وهو شاب راح لها الفيلا وطلب يقابلها وقبلته وقال لها انه اخوها طارق اللي كتبت عنه اميرة في مذكرتها انه مات محروق مع أبوها طيب ازاي ده حصل كل ده هانعرفه بأذن الله مع باقي الاحداث
واحنا دلوقتي جوة فيلا اميرة. وكان طارق قاعد قدام علياء اللي كانت في حاله انعدام وزن من اللي عرفته وكانت ماسكة في ايدها بطاقه شخصيه تخص طارق وشهاده ميلاد مكتوب فيها اسم الام اميرة وكان طارق بيقول
أظن كده بعد ما شوفتي شهاده ميلادي وبطاقتي اتاكدي اني اخوكي
علياء وهي بتحط الاوراق جنب منها وبتقول بصوت حزين
اخويا. بس جيت متاخر اوي مش عارفه افرح اني امي طلعت مذكرتها كدب واخويا لسه عايش ولا ازعل اني اصلا مش بنتها وده كمان طلع كدبه منها
وحكيت علياء لطارق اللي مكتوب في المذكرات وطارق كان بيسمع لها بكل تركيز. وبعد ان ماخلصت بدات علياء تمسك دماغها اوي وزاد عليها الصداع وطارق بدأ يلاحظ قد اية هي بتتوجع فقال لها
مالك
علياء
تعبانه شويه
طارق
الف سلامه عليكي.
علياء
الله يسلمك
طارق
بتاخدي علاج للصداع دة
علياء
سيبك مني. انا بخير
طارق
هي فين امي صحيح علشان اسالها لية كتبت في مذكرتها اني موت محروق
ويبدأ يبص في كل اركان الفيلا وهو بيقول
الا. هي فين صحيح نفسي اترمي في حضنها وحشاني قوي
علياء
هو انت ماتعرفش انها ماتت
اتصدم طارق وقال
ماتت من غير ماشوفها. الله يرحمها. كله من ابويا هو اللي فرق بيني وبينها
علياء بضحكه سخريه
هو كمان باباك خالد عايش.
طارق
بابا كان عايش ولسه ميت من اسبوع
علياء
طيب وانت عرفت عنواني ازاي
طارق
من ابويا ما هو كان عارف عنوان امي اميرة
علياء
وباباك ساب لية امنا وعاش في حته وهي عاشت في حته تانيه
طارق
عشان شافها وهي بتخونه. وسابها ومشي وهي حامل فيكي وماكنش يعرف انها حامل
علياء والصداع بيتمكن منها قالت
واضح ان كلام نادر صح وأمي. او اللي كنت فاكرها امي الهلوسه خليتها تكتب المذكرات الكدب دي بس انا كده بنتها ولا لا. ماهو انا ممكن اكون بنتها وبسبب الهلوسة كتبت اني مت زي ما قالت عليك. ولازم اعرف الحقيقة حتي لو كانت الحقيقة المرة
وتقف علياء وتبص ل طارق وتقول
انا اسفه لازم أقوم علشان حاسه اني تعبانه جدا
فيقف طارق ويقول
طيب خلاص اسيبك ترتاحي واروح اخلص شويه شغل ورايا وابقي ارجع اطمئن عليكي
ويخرج طارق من الفيلا وتطلع علياء لاوضة اميرة وتقف قدام المرايا الموجوده في الاوضة وتبص لنفسها في المرايا وتقول
انتي مين يالي عيشت حياتك كلها فاكره انك علياء ولو أميرة مش امي طيب مين امي. ولا انا بنت أميرة والهلوسه اللي عندها خليتها تكتب اني مش بنتها وده مش حقيقه وانا بنتها فعلا. كتير كل ده علي دماغي لزم اعرف الحقيقه. واكيد الحقيقة هلاقيها في المذكرات بتاعتها
وراحت بسرعه ناحيه المذكرات وبدات تكمل قراءه وكانت اميرة كاتبة ، ،،،،،
وفتحت باب الشقه لقيت الداده اللي بتقعد مع علياء مضروبه بمطواه في قلبها وجنب منها علياء بنتي سايحه في دمها وميته خدها في حضني وسرخت ومابقتيش عارفه اتمالك اعصابي وظهرت لي الشيطانه اللي جويا وقالت وهي بتبص علي علياء
علياء كمان ماتت. كل حاجه بتحبيها لازم تنحرمي منها اشمعني انتي اللي مكتوب عليكي تنحرمي من كل حبايبك
بصيت للشيطانه وقولت لها
عايزه اخد حق علياء من غير مارحم حد منهم
الشيطانه
حتي العاجز اللي انتي بتصرفي عليه
أميرة بغل شديد
حتي هو
الشيطانه وهي بتضحك
اللي انتي بتعملي ده هو الصح وانا ياما كنت مستغربه رحمتك بواحد زي عز بعد ما عرفتي هو اتجوزك ليه
أميرة وهي بتبص لبنتها الميته تقول
من النهارده مافيش رحمه ،،،،،،،،
وخرجت من الشقه وروحت للمستشفي وانا ناويه اخلص علي عز ويوسف ابنه. قبل منه علشان يحس بالنار اللي انا حسيتها ووصلت للمستشفي وفتحت باب الاوضه اللي هو محجوز فيها لقيته مشغل فيديو علي الشاشه اللي موجوده في الاوضه بصيت في الفيديو اللي شغال لقيته فيديو للناس اللي قتلو علياء والداده اللي كانت معاها بص لي وقال لي
تعالي اتفرجي وشوفي الفيديو وجماله وحلاوته
قلبي كان بيتعصر والنار قايده في وخرجت من شنطتي مسدس اشتريته مخصوص عشان اخلص بي علي عز بص عز للمسدس وضحك وقال
مسدس. جيبتي بكام ده
وقعد يضحك عز وبان انه مش خايف من الموت اللي بيقرب منه او ممكن فاكرني ماقدرش اقتله لكنه استفزني بضحكته وقربت منه وقولت له
انت فاكرني مش هاقدر ادوس علي الزناد
عز
انتي حتي لو عايزا تدوسي علي الزناد مش هتلحقي
وخرج من حمام الاوضه اتنين رجاله وراحو ناحيتي بسرعه وواحد منهم مسك أيدي اللي فيها المسدس والتاني جه من ورايا ولف ايده حوالين وسطي وكتفني بأيديه القويه جدا حاولت افلت منه ماقدرتش وخرجت من الحمام واحده فيها شبه كبير من عز وكان عندها اربعين سنه تقريبا. ووقفت قدامي وقعدت تبص لي من فوق لتحت وبغرور شديد وقالت
هي دي اللي. عملت فيك كده
وضربتني قلم خليت اللسه بتاعتي تجيب دم وبصيت للراجل اللي ماسك ايدي اللي فيها المسدس وكانها اشاره منها بانه يكسر ايدي وفعلا ضغط الراجل ده علي ايدي بمنتهي القوه كسرها وسيبت المسدس من ايدي وصرخت لكن الراجل التاني حط ايده علي بوقي ومنع الصرخه وقربت الست دي مني وبصيت في عينيه جامد وانا بعيط من الوجع وقالت
احب اعرفك بنفسي انا هاله الصاوي اخت عز الكبيره ومن حظك الاسود ان عز عرفني اللي حصل له بسببك وانا اللي يمس عز كانه مسني وانت لسه ماتعرفيش اللي بيمسني بعمل في ايه. وكانت البدايه اني خلصت علي بنتك وانتي اللي عليكي الدور
وبصت للراجل اللي ماسك ايدي المكسوره مره تانيه وضغط علي ايدي المكسوره بطريقه متوحشة خلت ايدي تولع نار من الوجع الشديد وعيطت اكتر واكتر وانا بصرخ صرخه مكتومه ولفت هاله حواليه ومسكتني من شعري وقالت
انتي يا زباله تعملي كده في اخويا. وحياه امك لو ليكي ام
عايشه لخلايها تحزن عليكي وانا بكسر عضمه عضمه من جسمك قبل ما اقتلك
وبصت للراجل بتاعها تاني ومسك ايدي التانيه وانا بتوجع ومش قادره افلت وقبل ما يكسرها ،،،،،،
لكن في الوقت ده تسمع علياء صوت ابنها بودي وهو بيصرخ فتسيب المذكرات وتجري بسرعه ناحية صوت عياط بودي. فتلاقي بودي واقع علي الارض ودماغه بتجيب دم. ،،،،،،،،
وفي نفس الوقت ومن جوة عربية نادر يقعد نادر مع طارق ومعهم غانم ويبص نادر لطارق ويقول له
اهم حاجه. يا جابر مشيت من الفيلا وعلياء مصدقه انك اخوها
جابر
طبعا يا باشا.
نادر
طيب تمام. كده بقي هاتيجي بكره بالليل وتعرفها انك مسافر في شغل ولما ترجع هاتبقي تتصل بيها. وزي ماظهرت في حياتها تختفي
ويخرج نادر ظرف جوة منه فلوس ويدي الظزف دة لجابر ويقول له
وده بقيت حسابك مقدما
فيفتح جابر الظرف ويبص في ويقول
ايه ده يا باشا
غانم
5000 ج. اللي اتفقنا معاك عليهم
فيدي جابر الظرف ل نادر ويقول
انا اتفقت معاكم قبل ما اعرف ان علياء هانم ثروتها تساوي 50 مليون جنيه. لا وكمان هي مش بنت أميرة
فيبص غانم لنادر باستغراب شديد ويقول غانم
هي مين اللي مش بنت أميرة. أيه الكلام ده وتقصد بي ايه يا روح امك
جابر
الكلام ده قالت له علياء وبكده انا الوريث الشرعي لاميرة هانم والاوراق اللي انت زورتها يا غانم باشا تثبت اني ابن اميرة الوحيد
نادر بعصبيه
انت بتقول ايه يا ابن، ،،
جابر مقاطعه له
لا. بلاش تغلط بدل ما غلط انا كمان واروح اقول لعلياء هانم ان انت اجرتني عشان اقول اني اخوها وتثبت لها ان امها مجنونه وتسيبها بقي من انها تدور علي اللي قتل امها. اللي ممكن يكون انت
نادر اللي وشة احمر من الضيق والغضب وكان بيستعد للرد علي جابر لكن غانم ميخليهوش يرد ويقول هو بتهديد
جابر. بلاش تلعب معانا اللعبه الوسخه دي والا هاحطك في السجن
فيضحك جابر ويقول
والله يا باشا. اللي هايدخل السجن اللي زور وانا هاطلع منها سليم. وصحيح الاتفاق اللي كان بينا متسجل صوت وصوره يعني اي غدر مش انا اللي هازعل انتم اللي هاتزعلو يا باشوات
ويفضل جابر باصص لهم وهو بيضحك ضحكه مستفزه وينزل من العربية وبعد مايمشي خطوتين يرجع لهم تاني ويدخل راسه من شباك العربيه ويقول لنادر ببرود
قول لعلياء. اخوكي جاي بكره يتغدي معاكي ونفسه ياكل فراخ من ايدك
ويخرج راسه من شباك العربيه ويسيبهم ويمشي وغانم ونادر يبصوا عليه بخنقة شديدة. ويبص غانم ل نادر ويقول
شوفت اخرت لعبتك اللي ماكنش ليها اي لزمه
نادر
هو انا كنت اعرف ان اللي اسمه جابر ده هايطلع واطي كده.
غانم
الله يسامحك يا اخي. بقي انا خدمت في الدخليه 7 سنين و الملف بتاعي مافيهوش نقطه سودا ابقي علي اخر الزمن ساعدت في تزوير اوراق رسميه وكل ده عشان تخلي علياء تصدقك انت وتتاكد ان امها مجنونه. قولت لك بلاش اللعبه دي ماسمعتش كلامي واديك بقيت تحت رحمه تمرجي هيستغل الورق اللي معه ويبقي زي الشوكه في طهرك
نادر
مش وقته الكلام ده يا غانم. جابر انا هاعرف ازاي اسكته انا كل اللي عايز اعرفه ايه حكايه ان علياء مش بنت أميرة
غانم بعد ان يتنهد يقول
انت مش كانت المذكرات معاك وقريتها
نادر
مالحقتش اقرها كلها. انا بس كل اللي عرفته انا اميرة ولعت في ابنها وجوزها عشان كده فكرت اني اجر واحد يعمل انه اخوها وساعتها بقي تصدق ان امها مجنونه وانها انتحرت
غانم
جايز. جابر ده بيلعب بينا والكلام ده كدب
نادر
يبقي لازم اروح اتاكد من علياء واشوف كلام جابر صح ولا، ،،،،
غانم مقاطعه له
تروح فين انت مجنون علياء قالت الكلام ده لجابر وبس علي انه طارق اخوها يبقي انت عرفت ازاي
نادر
صدق صح. طيب والعمل
غانم
انت تروح دلوقتي وتكون طبيعي معاها ممكن هي من نفسها تحكي لك وساعتها بقي نشوف هانعمل ايه. وسايبها بقي تعمل اللي هي عايزا وتدور علي اللي قتل امها
نادر
واخرتها أيه بس. من ساعه موت أميرة وانا حاسس اني مش متجوز اقولها تعالي نخرج تقولي لا. طيب نقعد مع بعض قاعده رومانسيه برضو لا. انا بني ادم وليا طاقه ومن حقي اعيش حياتي مع مراتي زي ما بتمنها
غانم
عذرك وفاهمك يا صاحبي بس لازم تقدر اللي هي في
نادر
وانا مين يقدر اللي انا حاسه انا واحد عايش ارمل مع ان مراته لسه عايشه. الله يسامحها بقي امها هي السبب في كل اللي احنا في ده
غانم
نادر هو انا مش اصحاب وبس احنا كمان اخوات.
نادر
اكيد طبعا يا غانم بس لية بتقول كدة
غانم
هو انت وراء اللي حصل لاميرة دة.
نادر بعصبية
تقصد اية يا غانم اني اكون سلط اللي يقتل اميرة
غانم
اصلي حاسس من كلامك عن اميرة ان كان في حاجة غامضة بينك وببنها
فيرتبك نادر ويبص لغانم ويسكت،،،،،،،
