رواية لا أمان لك الفصل الثامن بقلم ورود الخالدي
امنية:::
من كلي بس لا متدرين شكد احبج..تفاجئت كتله بسرعة:
يعمر هم رجعنه لهذا الحجي اني مصدكت انت صرت زين وياي وتعاملني معامله عادية يعني اني شكد حجيت وياك وكتلك ..عوفني بحالي الي ابالك ميصير ليش ترجع تعيد نفس الكلام السابق!!
شفت ملامحة تغيرت كلي:
امنية شنو هو الكلام الي اعيده!!
يعني كلامك الاولي مال مخليج براسي واجيبج للدرب تره عيب هالحجي!!
هههه..لا..لا هاي وين راح عقلج هالكلام راح بوقته..بس متوقعت تتفاجئين هالشكل بكلمة احبج..امنية معقوله انتي محاسه بيه!!
احس بشنو يعمر!!
خرررب..شنو تغشمين نفسج ..لو اله تشلعين كلبي تعرفين كولش زين اني احبج..!!!
اعرف كولش زين!!منين اعرف يعني ..!!واذا حبيتني شحيصير..ههه..ها..راح نرجع لاسطوانه حبيني..واحبج مو!؟..يمعود شهالحجي مال المراهقين شنو اني جاهله وتريد ترسم عليه دور الحب تره تره فتت ب٢٩سنه وانت هم تقريبا خلصت ال٣٣سنه..بله احنا مال حبيني واحبج؟؟
وليش لا ميصير نحب...حب شريف!!
من كلي حب شريف تاكدت هو معنده نيه لعب صفنت بوجهه مره لخ!!
انت..انت تحب حب شريف..شو الكلمة غريبة!!
ليش..ليش غريبة امنية ..احبج واريد اخطبج..شكو بيها!؟
تخطبني..تحجي صدوك؟؟
اي والله واصلا ..جنت معتقد انتي حاسه بيه ومتوقعة ..هالشي!!
رحت كعدت ع القنفة احاول استوعب كلامة حتى ارد عليه رد مناسب..شافني سكتت اجه كعد يمي
شو سكتي امنية..يعني ماكو رد ؟؟
يعمر ..تكدر تسمعني للنهايه بدون متنفعل!!؟؟
وليش انفعل يعني دنحجي بموضوع زواج ومستقبل!
ترددت بعدين كتله:
يعمر..اني اعرف انت تغيرت واعرف تغيرت للافضل..بس والله متوقعت تجي تعرض عليه موضوع زواج..يمكن لو وحدة غيري تفرح يخطبها واحد مثلك متحمل مسؤولية وشكله جذاب وحياته تغيرت للافضل بس فدوة لتزعل مني اني ما اكدر ارحب بحبك وفكرة الزواج منك؟؟
ليش..ليش مترحبين بحبي وفكرة الزواج مني شنو المانع!! وشنو فرقج عن اي وحدة ثانيه!!
المانع هو انه اني اعرفك..اعرف حياتك السابقة واعرف..انه انت جنت عايشها غلط..لهذا بعمري مراح أأمن حياتي..وسعادتي وياك..لان معندي ثقه بيك حتى اذا تغيرت فتره راح يضل بكلبي هاجس وخوفه انك ممكن ترجع باي وقت لحياة الغلط والفساد الي عايشها باختصار يعني (ما الك امأن )...وهذا مو معنى اني قصدي اكسر كلبك لا والله انت ..بحكم اخويه واتمنالك الخير واتمنى تلكة بنت الحلال الي تسعدك وتريح بالك...
حسيته شكد انصدم من كلامي بداخلي متت قهر خطيه وجهه كوله انكلب كوه طلعت الكلمات من حلكة:
بحكم اخوج شنو امنية..وشنو تتمنيلي بنت الحلال..!!
اي اتمنى تلكة بنت حلال غيري متعرفك وتكدر تثق بيك وتسعدك؟؟
بس..بس اني احبج انتي..وما اريد غيرج..اصلا اول مرة احب اول مرة كلبي يتعلق ..ويعرف الحب!!
يربي شكوله صوته وطريقه كلامة ونظراته حيل كسرت كلبي..فكتله:
يعمر..والله الف وحدة تتمناك ..اني..اني كولش اسفه لان..لان دا ارفضك؟؟
يعني ..يعني ..شنو امنيه مراح تصيرين مرتي..مراح تصيرين عروستي..وذيج الخيالات والاحلام الي جنت احلم..بيها مراح تتحقق يعني مراح اصبح كل يوم ع عيونج الحلوات مراح اكدر اععضعض هالخدود الذابحاتني..و..و مراح تخلفيلي دسته جهال؟؟يعني..
متحملت ابد..مكدرت اتحمل نبرة صوته اليائسة ونظرته التكسر الخاطر هو يحجي واني دمعت وقبل ميكمل كتله:
اسفه..والله..اسفه..حيل اسفه يعمر
من شافني دمعت ع موده حس بيه انكسر خاطري عليه ويمكن مسمحتله كرامته احد ينكسر خاطرة عليه دنك وهيج مثل الي بقه يفكر شويه بعدين مرر اصابعة بشعره والتفت عليه..عبالك ديجمع افكارة..ويحاول يكون قوي كدامي وكلي:
يمعودة ع كيفج عليمن دمعتي..عادي ولا يهمج تره مراح اموت ..اذا رفضتيني....هاي هيه قابل اجبرج حتى تقبلين براحتج امنية....براحتج..انسي الي كلته ومصار شي..اسحب كل كلامي..
بس..بس انت..اقصد..يعني.....!!!
ابتسم وادري ابتسامته جذب وكلي:
ههه..شبيه اني مبيه شي ..يله كومي خلي نروح للبيت اني هم تعبان وجوعان ممتعشي ..
بقيت شويه اراقب ملامحة اعرف حيل اذيته واعرف هو بالكوه يحاول يبين كدامي ممهتم وقوي خطية يكولي احبج واول مرة احب..صح انكسر خاطري عليه بس مو معناها اقبل ارتبط بيه لمجرد اني متعاطفه وياه لان الزواج شي اكبر من مجرد تعاطف ..ما اكدر اقبل حبه واتزوجة لان فعلا اني ما الي ثقه ولا اكدر.. أأمن بيه وارتبط مصيري وياه..كمت اخذت الدشداشه وصعدت وياه بسيارته الطريق كوله محاجاني ساكت ويدخن جكارة وره اللخ محترك كلبه اني مو جماد ولا معندي كلب حاسه بيه وحاسه شنو معنى شخص يرفض حب شخص..وابد مو هين عليه..يمكن..لو شخص غيره مصايرة بيني وبينه كل ذيج المواقف مجان تاثرت عليه بس يعمر هوايه جمعتني بيه امور ومشاكل ويمكن هالمشاكل خلته مو شخص عادي بالنسبه الي ..
يعمر:::
رجعت للبيت واول مفتت ملتفتت كبل صعدت لغرفتي بكلبي نار يمكن متطفى لو اصب عليها مي البحر..خررب رفضتني..بكل سهولة تكولي اسفه..ورفضتني..اني الي مفكر بس اكولها احبج تكولي اذا تحبني تعال اخطبني..مفكر راح تفرح من اعرض عليها الزواج..بس صدمتني صدمة موت من كالت ما اكدر اقبل حبك واتزوجك لان ماالك امان وما اثق بيك لان اعرف ماضيك ..واتمنى الخير الك ويه بت حلال غيري..راح اموت لا اصلا متت من سمعت ردها..كعدت ع طرف جربايتي احس راسي حينفجر اني يعمر الي عمري محبيت عمري مفكرت بالحب ...واضحك على الي يحبون..طاح حظي وحبيت هههه وجماله بس حبيت وكلبي عرف الحب انرفضت بكل برود..بقيت ادخن جكارة وره جكارة وفكرت اطلع ..من البيت اروح اشرب منا لما انسى كل كلمة كالتها الي وفعلا كمت بس ردت افتح باب غرفتي تراجعت....كلت لنفسي لا يعمر عمت عينك اذا ترجع للشرب....وتخلي رفضها يرجعك لحاله يأس ..مو انت الي تكعد تشرب حتى تنسى مو انت الي تكعد تندب حظك لان محصلتها..بيك خير حصلها وريح كلبك..ترضة مترضة بيك حصلها..واليصير يصير اهده..وريح اعصابك وفكر..بعقلانية تره العصبيه وفورة الدم ابد ماكو وراهن نتيجة..هي مكارهتك..اي مكارهتك انت مو غبي..البنية خايفة منك متامن بيك كل تفكيرها محصور بماضيك..تخاف ترتبط بيك لان متريد تعيش بقلق بسبب فكرة ممكن ترجع لوضعك الاولي..وحياتك المخربطة وانت هم كرامتك متسمحلك تكعد تتوسل بيها وتحلفلها انه انت راح تضل مخلص الها ومترجع لسوالفك التعبانه حتى لو انت فعلا..هذا قرارك الحقيقي. التواسيل والترجي مو شيمتك..ولوم نفسك واليأس هم مو شيمتك..لان الياس والتواسيل والملامة للجبناء وانت موجبان..صرت وتصورت الي تريدة تحصلة وانت تريدها..وميت عليها..لعد ..فكر وخطط..شلون تحصلها..واكيد راح توصل للي تريدة وفعلا بقيت طول الليل كاعد افكر يمكن خلصت باكيتين جكاير بس ..الصبح وصلت لاخر قرار ..ماكو غيره ..امنيه نقطة ضعفها ..عائلتها واهمهم امها ومن خلال امها تكدر توصل الها..بطريقة متخطر على بال ابليس نفسه خصوصا انت تعرف امها تتمنى تزوجها..لان امها دائما تسولف بيها وتتمنى تجيها قسمة هاي هيه ..هذا هو المنفذ الصحيح الي تكدر تدخل منه ..وتوصل لهدفك.. ولان منمت الى ان طلع ضوة النهار غمضت عيوني .ونمت ..كعدت الساعة بالتسعة نزلت غسلت لكيت امي بالمطبخ متحضرة تريد تروح للمستشفى ريكتني ع السريع..حتى اوصلها لان اني اصلا تاخرت على شغلي..وفكرت اكيد امنيه بعدها نايمة بس من صعدت امي يمي بالسيارة كتلها:
لعد امنية متروح وياج للمستشفى!!
البنيه كعدت من الفجر راحت لبيتهم حتى ريوك متريكت جلبت بيها تتريك تكول..عندي شغل لازم اروح وراحت من وكت
فكرت..واحجي ويه نفسي..اوووف ...اوف امنية من الفجر رجعتي لبيتكم اي متوقع هالتصرف منج تتهزمين مني حتى ما اشوفج لان رفضتيني..كاتلج العطف ..والشفقة اني اعلمج..دصيري من نصيبي اله اخليج بكلبي..واقفله عليج❤️❤️❤️❤️
وصلت امي للمستشفى امي عاتبت امها:
شبيها بتج مصدكت الصبح يصير وطلعت!!
هي هاي امنية تستحي من خيالها موزين قبلت تبات خابرتني من الصبح كالت راح اجيج للمستشفى كتلها ضلي بالبيت ام يعمر راح تجي تضل يم نازك واني راح اجي بالعشرة للبيت وعود بالليل ارجع ابات يمها..
فكرت اي هاي خوش فرصه ابقي امي بالمستشفى واخذ ام امنية اوصلها للبيت وياي..فكتلها:
لعد استعجلي خاله خلي اوصلج بطريقي
مو رفوله بعدها نايمة من تكعد اروح..
امي كالت:
خليها نايمة الطفله يم اختها!!
مو هاي بس تكعد متلكاني تضل تبجي!!
انتي معلمتها ..بنيه حديثة شنو وين مترحين معلكتها بركبتج خليها..تتعود تتعلم ع الناس!!
مو خاف اروح وتكعد تبجي..
لا متبجي اني يمها ونازك هم تسولف وياها بين مترحين وتجين العصر
ماشي بس اذا كعدت وبجت خلي نازك تخابرني اجيها.
يمعودة دروحي بدلي وارتاحي..
اي رايحة
واخذت ام امنية وياي..ولان اني منايم زين مبين شكلي تعبان هي سألتني:
شبيك بعد خالتك شو جنك ما الك خلك!!
والله منمت الليل كوله
ليش ..شنو مريض اسم الله!
ياريت مريض..ميت قهر وميت ضيم!
اسم الله منو قاهرك..اصلا منو يكدر يقهرك!!
بتج..خاله..بتج دمرتني..!!
بتي.؟؟هاي يابت منهن وشعدهن بناتي وياك!!
امنية..دمرتني خاله..والله مستحي احجي وياج بس بعد ما اتحمل خلص كلبي!!
بعد خالتك خوفتني شبيها امنيه وياك ..شو امنية عاقله!!
هي لان عاقله مخبلتني ومدمرتتي؟؟
شو كولشي ما افتهم منك!!
خاله احجيلجياها هيج بصراحة..احبها..والله صار سنه تقريبا. .من اول يوم شفتها بعرس صفوان واني كلبي معلك بيها..اصلا..وما انكر حبها..غير حياتي للاحسن والحمد لله شوفه عينج رب العالمين من عليه بهالهدايه ..ومعندي بعد زايدة ناقصة...بس هي متريدني!!
يعني انت حاجي وياها!
شفتي ..حتى انتي امها مكايلتج انه اني صار شكد اتوسل بيها حتى اجي اتقدملها واتزوجها..هالكد ممعتبرة موضوعي ميسوة تحجي بيه وياج..ليش شبيه اني..ناقصني شي حتى هيج رافضتني!!
شفتها ابتسمت وملامحها وردت من كتلها اريد اخطبها:
لا تهتم اني احجي وياها
لتحجين ولا اتعبين نفسج ..بتج تكولي لو تصير نبي ما اقبل بيك
عزززة ..شوكاحتها هيه هيج تكولك!!
اي والله..
خاله لتزعل اذا مراضيه اني هم مااكدر اجبرها وزواج بالكره هم ميصير!
هي مكارهتني..تكولي مأ الك امان اخاف اتزوجك وترجع لمكسراتك واني والله وحق اسم الله ..ما الي اي نيه ارجع مثل قبل ..بس هي متقتنع!
خليني احجي وياها واقنعها!
كتلج ميفيد الحجي وتعرفيها..راسها يابس. ؟؟
اي والله راسها يابس ..مثل الصخر..بس شبيدي عليك خاله ..تدري ..بيه شكد اعزك وهسه من كتلي اريد اخطب امنيه وداعة المرحوم كلبي طار من الفرحة ..
خاله هواية بيدج تكدرين ..لخاطر الملائكة ساعديني ..تره مدمر اني..بتج دمرتني حتى ما اكدر انام من التفكير احبها...وداعتج خاله اذا صارت من نصيبي لاخليها ملكة ..
اي شلون اساعدك قابل اجبرها!!
اكو طريقة تخليها كدام الامر الواقع بس احسها صعبه عليج..بس اذا تعزيني..مراح يصعب عليج شي!
وحجيت الها بفكرتي بالبدايه ضاجت وكالت مستحيل اسوي ابتي هالشي بس اني قنعتها..لان معدنا غير حل وبالملحةمالتي اقتنعت..وقررت تساعدني فعلا..لان هي هم تريد تزوج بتها وتطمئن عليها..واني هم..حلفتلها اخلي بتها جوه عيوني واني صادق بيميني لان فعلا اني احبها واريد اخليلها ملكة حياتي..
امنية::
ملتهيه اخلي دهن للمكينه ودك موبايلي ..برقم ماما..فكرت ليش تخابرني مو كالت راح اجي بس من جاوبت سمعتها تكولي راح يجيج يعمر انطي الجنطة مال الملابس الي محضريهن للبنوته ..لان اني فعلا مخيطة هواية ملابس مال اطفال ومخليتهن بجنطة ع اساس اندزهن الها لان هي اصلا ابداية التاسع جانت ..متوقعنا تجيب قبل موعد ولادتها فالملابس بقت عندي بس من كالت يعمر جاي ياخذهن ضجت كلت هسه ماما ملكت غير يعمر ادزة.فسديت المكالمة وطلعت الجنطة ...ادري بيه ماخذ ميانه وحدة يفتح الباب ويفوت فمطلعت انتظرته بالصالة وفعلا ..اجه وره شويه سمعت دكاته خفيفة ع الباب الخشب مال الصاله شلت الجنطة حتى بسرعة انطيهيا ويروح...بس من فتحتله الباب كلي:
صباح الخير امنيه:
هلو يعمر صباح النور.
ومديت ايدي بيها الجنطة بس هو كلي:
امنية اكدر احجي وياج خمس دقايق!!
يعمر شنحجي بعد!!
لتضوجين اني مجاي اضوجج..
تفضل..
دخل كعد ع القنفة جيت كعدت يمه كلي:
امنية البارحة الحجي الحجيناه فكرتي بيه انتي تره اني منمت للصبح!
يعمر..اسفه حتى استحي كل شويه اكولك اسفه يعني كتلك كلامي النهائي!!
بس اني ممصدك انتي رافضتني للنهاية...حاس اكو امل..بداخلي!!..محاس انتي كارهتني!!
لا..لا والله مكارهتك وربي يشهد ليش اكرهك....بس كتلك..اسبابي واستحي اعيدهن بعد!
شو هذا بدون مقدمات كام جرني وحضني حيل وكلي:
وشنو تتوقعين يعمر يستسلم ..ويعوف احلامه ع مود خوف وقلق براسج..وج احبج..وحق رب السموات اخذج..وتصيرين مرتي لو اعرف الدنيا هاي كولها توكف ضدي
يعمر هدني تحجي من كل عقلك بعدين مو عيب هيج حاضني الف مرة كتلك لتجاوز حدودك وياي..
حبيبتي ومرتي..المستقبلية احضنج واحضن ابوج هم..
يعمر هدني ..الله يخليك..هدني ..
بعدني دا احجي وفاتت ماما شافته حاضني عززززة..عزززة...هسه شتفكر!!اول مفاتت ضلت صافنه بوجوهنه ثواني بعدين صرخت بوجوهنا:
ولكم شتسوون يمصخمين..
هو هدني..كتلها ..
ماما..اسمعيني:
ولج شسمع..ونزعت شحاطتها وجتي عليه ضربنتي ع متني هو لزم ايدها:
ولك تلزم ايدي اصبرلي اليوم احرك اهلك..حرك..
عوفيها خاله ..
اعوفها شنو ولك شتسوي ويه بتي..
ماما بس خلي اشرحلج!!
شتشرحين كاعدين ومتحاضنين انتي وهذا الماعنده شرف!
خاله لتغلطين..ولتصيحين وتلمين العالم ..
بس ماما بعلو صوتها..تصيح :
سد حلكك اليوم ..اثنينكم تنذبحون ..خلي اخابر عمها يجي يذبحها ويذبحك وطلعت الموبايل..تريد تخابر!
يعمر اخذه منها بس اني شنو ارجف حتى الكلام ميطلع هالكد مخفت من موقف ماما وصوت صياحها بس يعمر كلها:
عليمن هالفضايح والذبح..اني اصلح كولشي ..
شتصلح ولك..حاضن بتي وابيتنا والله اليعلم شمسوين..بعد!!
اي خاله غلطنا ..بس كولشي يتصلح اهدي
هي سمعته كال غلطنا كعدت بالكاع كامت تلطم:
غلطتو..ولكم غلطتو..يبووو..يبووووو!!!
اني صرخت بوجه ..يعمر
لك شدتحجي انت تخبلت
رحت يم رجلين ماما:
يوم جذب..جذب لتصدكين والله ماكو شي من هالحجي..هذا جذاب!!
يمه..يمه لو ميته احسلي ولج هي هاي تربيتي ولج تنزلين راسي للكاع
وحدهن دموعي نزلن ارجف واحجي:
يوم جذب والله ماكو شي
هو كعد ع كماميزة وكلها:
خاله ..اني اصلح كولشي ..تره ما اعوفها وراي..من الصبح اجي اخطبها..
التفتت عليه:
لك سد حلكك شتصلح انت تخبلت هاي شدتحجي ليش تجذب حتموتها لماما الله ينتقم منك
ماما ضلت تلهت ركضت جبتلها مي شمرت الكلاص من ايدي
وتفرفح:
يمه..انفضحت..يمه..انفضحت..فضحتنا بت جابر شحجي شكول شحطلها واطيب هاي!
خاله كتلج ماكو داعي لكل هذا
اسمع ولك الليلة تجيب اهلك وتجيب وياهم سيد وتعقد على بتي..لا وحق رب السموات اخليها تصير دم ..ولا عبالك بتي تايهه تره عدها عمام وعشيرة تكسر ضهرك وضهر الخلفوك؟؟
متت من البجي:
يوم ماكو شي شنو يجيب اهله ويعقد والله ممسويلي شي مابيناتنا شي هذا يجذب والله حجيه كوله جذب
سدي حلكج ام الاحضان اليوم اموتج ..بعدج تسولفين عين بعين..همزين لزمتكم لزم يد..والتفتت عليه:
كوم ولك اطلع من بيتي ..منا للعصر اذا مجيت انت وابوك واهلك تخطبون ابلغ عمها..وعود اخلص منها بذيج الساعة
عافنا وطلع كعدت ..كبالها دموعي يجرن:
يوم والله ماكو شي ليش متصدكين بيه هذا يجذب مصدك تشوفينا بهالموقف حتى يجذبله هالجذبه!!
زمخت بيه:
وليش يجذب ..اكو واحد يجذب هيج جذبة ويورط روحة!!
اي والله يوم ..هو..هو يريد يخطبني واني رفضته وكلي اخذج لو كل الدنيا تصير كبالي ومن سوء حظي دخلتي ولكيتنا بهالموقف!!
وهسه ترديني اصدكج بعدين ليش رافضته شبيه اذا حجيج صدوك!!
يوم شنو شبيه..تعرفين ماضيه شنو!!
ولج اني اصدك بيج بعد ما لكيتج بحضنه وج خلي ياخذج ويستر عليج ..لتطلعين حبلة منه!!
كمت ارجف اكثر من حجيها ودموعي يجرن:
يوم سكتي..سكتي شهالحجي والله مابيه شي. اخذيني للدكتورة اذا متصدكين والله مصاير بيني وبينه شي!!
شبيه تخبلت افضح روحي يم الدكتورات وسستراتهن..اني تالي عمري اخذ بتي للفحص!!
يوم وروح ابويه يجذب..بس يريد يتزوجني شلون مجان!!
ما اصدك بيج..بعد ما الي ثقه بيج ابد والولد ..سواء يصدك لو يجذب راح يجي يخطب سدي حلكج..لو اروح اسولف العمج كل سوالفج واخلي يذبحج ويخلصني من عارج
شكرا لزيارتكم عالم روايات سكيرهوم
