رواية جزيرة غراب الوادي الفصل العاشر
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«تمنت ألا يراها، وجاءت تتخفى في الظل.. لكن القدر كتب أن تخطو أولى خطواتها داخل ديار آل جهدان»
(عَلَى عَتَبَاتِ الرَّهْبَة)
﷽
عاد كل منهما إلى مكانه؛ موج إلى منزلها وجلال يباشر عمله وحراسته كالمعتاد.
ـــــــــــــــــــــــــ**
في المساء وعلى مائدة العشاء التي غاب عنها جلال كانت خضرة تجلس بسعادة عارمة لا تسعها ثم سألت بلهفة:
خضرة: خير يا عمدة خلصت ولا لسه؟!
غنام (بجفاف): خلاص خلصت جهزوا نفسكم أسبوع والجواز يتم.. ولو أعرف أتممه بكره كنت عملتها يا خضرة عشان أخلص منك!
خضرة (بفرحة): ألف بركة يارب الحمد لله عقبالك يا عليوة انت كمان.
يونس: مبروك يا بوي.. مبروك يا وليد.
وليد (بغرور وشماتة): عقبالك ولا هتقعد جار جلال؟!
غنام (بصرامة وزجر): وليد.. اكتم!
وليد (بتراجع خفيف): مش قصدي بهزر!
نجاة: مبروك ربنا يتمم بخير يا خوي وعقبال باقي إخواته.
وليد (بانتشوة): هعمل فرح محصلش في الجزيرة كلها والناس تحكي عنه سنين!
غنام: وإيه بقى اللي يحكوا عنه سنين؟!
وليد: بفكر أعمله في النهر بالمراكب!
غنام (بتهكم وسخرية): وماله يمكن ربنا يكرمك والعروسة تغطس منك متلحقش تجوز!
انطلقت ضحكات نجاة و وعد بهستيرية بينما صدمت خضرة وقالت بضيق:
خضرة: بعيد الشر ليه كِده يا عمدة؟!
غنام: عقّلي ولدك الفرح زي ما بنعمل ديماً.. بلاها مسخرة على آخر الزمن أدور في البحر أسقف وأزمر؟!
خضرة: بيهزر وياكم عادي يعني!
شاهين (بابتسامة خبيثة ونبرة هادئة): هزر يا وليد هزر، وماله.. ربنا يتمم بخير!
ـــــــــــ**
واصلوا الحديث عن ترتيبات الزفاف بينما كان جلال في ناحية أخرى يمر بحصانه ليجري جولته الليلة المعتادة.
وأثناء عبوره أمام أحد المنازل البسيطة كانت تجلس امرأة عجوز تُدعى "عَريفه" أمام بابها تتنسم نسائم الليل وحين سمعت وقع حوافر الحصان هتفت بضعف:
عَريفه: ولد خضرة ولا نعيمة؟!
توقف جلال بحصانه باستغراب واستدار يتفحصها ثم أجاب:
جلال: الست نعيمة!
عَريفه: كبيرها صوح.. جلال؟!
جلال: اه.. تعرفي أمي؟!
عَريفه (بابتسامة حانية): عز المعرفة أني اللي ولدتها فيك.. مش عارفة أحقق في وشك في العتمة زين بس ولد الوز عوام.. الهيبة تشبه عبد القادر كأنه لساه عايش!
تبسم جلال ضاحكاً بهدوء وقال:
جلال: سمعت الكلام ده قبل كِده مع أني مشفتش عمي عبد القادر حتى في الصور!
تأملته عَريفه لثوانٍ ثم تمتمت بنبرة ذات معنى:
عَريفه : عمك؟! وماله.. الله يسهل طريقك يا ولدي!
جلال: تسلمي يا خالة.
حث جلال حصانه وانطلق به ليملأ الليل بوقع حوافره بينما ظلت العجوز ترقبه في عتمة الطريق بابتسامة دافئة وغموض يلف نظراتها.
ـــــــــــــــــــــــــــــــ**
دلفت موج لغرفتها لتغفو ولكنها لم تفهم لما كان الغرور يتملكها أكثر من الخوف وقبل أن تنام خلود أجبرتها موج على الجلوس بأسئلتها الملحة:
خلود (بنعاس مقتضب): عاوزه إيه؟!
موج (بجدية واهتمام): بصيلي زين وركزي معاي!
خلود: اممممم.. ركزت!
موج: لو أنا.. ااا.. له، لو انتي راجل مثلاً وأنا موج قدامك إيه يعجبك فيا؟! يعني إيه يخليكي تعجبي بيا كـ "موج"؟!
خلود (بدهشة وتهكم): يا عيني.. كنتي زينة قبل ما تروحي عند خالتك زينب!
موج: بطلي رخامة وردي على كلامي!
خلود: مش فاهمة عشان أرد!
موج (بنفاذ صبر): يا بت صحصحي أنا موج وانتي مش خلود، انتي راجل دلوك.. فهمتي؟!
خلود: اه.. وبعدين؟!
موج: أنا بقى جيت قدامك أهه.. انتي كـ راجل إيه يعجبك فيا يعني إيه ملفت فيا بالنسبة لك؟!
خلود (وهي ترفع حواجبها): ااااااه فهمت!
أخذت خلود تتفحص موج من أعلى لأسفل بنظرة فاحصة، ثم قالت:
خلود: طيب خدي لفة كِده أتأكد!
موج (بحرد): لفة إيه خلصي يا حمارة انتي!
خلود: والله نظرتي كـ راجل ليكي وإيه يشد وإيه حلو، يعني جذاب أو كِدهون.. بسم الله.. ولا حاجة خالص!
تبدلت ملامح موج للغضب والغيظ الشديد:
موج: والله أقرف يعني ميح؟! اسم الله على جمالك اللي مخليكي شايفاني عفشة!
خلود (وهي تضحك بملء فمها): طيب أفصصك الأول.. قصيرة لسانك طويل، مش مدلعة زي البنات..قفل وـ
موج (مقاطعة بصرامة): اخرسي ونامي!
خلود: بهزر وياكي!
موج: قلتلك نامي.. أوعاكي تقوليلي حاجة تاني!
تسطحت موج على الفراش ولفت ظهرها لخلود وهي تنفخ بضيق فنادتها خلود بابتسامة خبيثة:
خلود: نمتي؟!
موج: نامت عليكي حيطة!
خلود: موج.. انتي فيه حد لمحلك بحاجة طيب إيه الاهتمام ده كلو مرّة واحدة؟!
موج (بمرارة وتهرب): اه فيه.. أبوكي انخمدي يا معصعصة يا أم مناخير كبيرة!
خلود (تضحك بصوت عالٍ): كِده يعني هنطلعوا سيئات بعض من أولها؟!
لم تجب موج على خلود واكتفت بالصمت لكن خلود واصلت كلامها بنبرة أهدأ وأقرب للجد:
خلود: اه قصيرة.. بس مش عُقرة حلوة وطولك زين والله الحلو فيكي إنك مش بيضة ولا سمرة لونك مميز.. وملامحك بقى عسسسل عينيكي حلوين وحواجبك بينوهم أكتر بعد الخالة زينب.. خشمك كبير شوية بس شغال!
موج (دون أن تلتفت إليها وبنبرة متهكمة): شغال؟!
خلود: اه.. يعني ماشي حاله!
موج: بس كِده يعني سكتي.. مفيش حاجة تاني؟!
خلود (بضحكة وغمز): بكلمك كـ راجل.. لو قلت حاجة تاني عيب ولا أقول؟!
موج (بحدة وتحذير): لمي روحك يا بت!
خلود: كلك على بعضك حلوة.. بس الشكل بعيد خالص عن الشخصية!
موج (بتصنع الثقة والغرور): مالها شخصيتي أرق بت في الجزيرة كلها!
ضحكت خلود بقوة وقالت:
خلود: أرق.. حصل !
موج: أصلاً أنا مش مستنية تحليلك.. أنا عارفة نفسي، جمال ودلال!
خلود: صوح.. بس ميمنعش إن فيكي حاجة خبي دلوك بكرة هتحكي لوحدك.. تصبحي على خير.
استلقت خلود وبعد لحظات قليلة غفت في نوم عميق بينما بقيت موج عاجزة عن النوم.
كانت كل عدة دقائق ترفع هاتفها بقلبٍ يترقب لتنظر في الشاشة: هل اتصل بها مرة أخرى أم لا لكن دون أي جديد.. ظلت تتنقل بين شاشة الاتصال وصورته على "واتساب" حائرة ومشتتة حتى غلبها النعاس واستسلمت للنوم.
ــــــــــــــــــــــــــــــــــــــــــــ**
في اليوم التالي
استيقظ جلال باكراً. وأثناء خروجه من السرايا كانت العائلة تجلس تتناول طعام الإفطار وحين مروره استوقفه غنّام بحزم:
غنّام: جلال.. رايح فين؟!
جلال: طالع شغل.
غنّام: والوكل إيه مش هاتفطر؟!
جلال: ماليش نفس.
خضرة (بتشفٍ ونبرة حادة): ده بدل ما تقول لأخوك حقك عليّ وتتأسف وتسكت.. ربنا يهديك يا جلال!
جلال (بنظر ثاقبة وهادئة): أتأسف لمين.. بعدين لمؤاخذة مش أبوي كل مرة يقولك مدخليش؟!
غنّام (ضرب بكفه على الطاولة وبصوت جاهر): جلال اتأدب دي مش شاهين هسيبك تغلط فيها!
جلال (بثبات): بس أنا مغلطش.. أنا بفكرها!
خضرة (بتصنع المظلومية): حقك عليّ يا جلال وماله ما أبوك سابك.. مسكت في أخوك وبكره تضربني أنا كمان وهو ساكت!
نجاة (بضيق ونفاذ صبر): خضرة بكفاية بقى!
غنّام (موجهاً حديثه لجلال): أخوك فرحه كمان أسبوع.. جهز دنيتك معاوزش مشاكل في الفرح والحراسة انت خابر هياجيني ناس من برة الجزيرة كلها.
جلال: وماله.. ربنا يتمم بخير.
تركهم جلال وغادر للخارج بينما قال شاهين بنبرة مسمومة وهو يتابع أثره:
شاهين: الظاهر جلال وراه واحدة لحست راسه.. كل ما ده بيتغير أكتر!
وليد (بتهكم وسخرية): اللي اتخانقتوا عليها.. بنت النجار يا خسارة!
شاهين (بنهرة حادة): اكتم وكمل وكلك!
خضرة: هو جلال بمنظره ده يعرف بنات ولا زفت اللي زيه هيعيش كِده، ميعرفش يعني إيه جواز وحرمة!
نجاة (بانزعاج ودفاع): ليه يعني ناقص إيد ولا رجل عن عيالك؟! مش عاجبك جلال بس عاجبك شاهين اللي كل ليـ...
غنّام (بقسوة وقاطعية): وبعدين وياكم علوا صوتكم كمان خلي الخدم يسمعوا فضايحنا نجاة.. بكفاية!
نجاة (وهي تخفض صوتها احتراماً): حاضر يا خوي.
ــــــــــــــــــــــــــــ**
عند الظهر
كانت موج في عملها مع زينب حتى أتى اتصال من "دميانة" فتنحت جانباً بعيداً عن الصوت وأجابت:
موج: ألو؟!
دميانة: أهلاً بالست موج!
موج (بابتسامة): ست يسمع منك يا أختي.. عاملة إيه؟!
دميانة: في نعمة والله.. انتي عاملة إيه؟!
موج: الحمد لله بخير.
دميانة (بنبرة فضول واهتمام): احكيلي بالتفصيل الممل.. أنا فاضية لك أهه!
موج (بتصنع عدم الفهم): احكيلك إيه؟!
دميانة: مش وقت استهبال من أول ما سبتي المشغل لغاية ما جلال بيه طلب رقمك.. بقيتي مهمة ولا تكوني عملتي مصيبة؟!
موج (بتركيز وشك): قلتيلي.. يبقى خد الرقم منك؟!
دميانة: اه هاني إدّاهولوا.. إيه بقى حكاية الخناقة اللي في المشغل دي؟!
موج: خناقة إيه؟!
دميانة: موج.. اعدلي وبلاها لف كلام اتخانقتي مع مين في المشغل ومشوكي وجلال خد رقمك يحذرك من المشاكل ليه؟!
موج (في سرها): اه.. جوزك قالك كِده؟!
دميانة: أيوه قالي.. اعترفي بقى!
صمتت موج قليلاً محاولة اختلاق عذر أو كذبة متقنة للخروج من الموقف بعيداً عن سر طردها الحقيقي والحديث عن "هدير":
موج: مفيش.. جابوا بنات جديدة وحبوا يتآمروا عليّ ويشوفوا حالهم مسكت فيهم والموضوع كبر فـ مشوني!
دميانة (بعدم اقتناع): يا سلام أصدق يعني؟! ما كنا بنتشاكل عادي والريسة بتلم الموضوع ديماً!
موج: إيه.. اه مش عارفة دول جايين شغل وصاية من بيت الحاكم عشان كِده مشوني أنا .. بعدين كنت زهقانة وزودتها شوية المهم سيبك.. عاملة إيه انتي وهاني؟!
دميانة (بشك لم يهدأ): كملي الأول.. وجلال خد رقمك ليه؟!
موج: معرفش مش بتقولي هاني قالك حذّرها؟!
دميانة: قال كِده اه.. بس جلال بيه بنفسه هيجي يحذرك انتي طيب ما يبعت حد من الحرس أسهل؟!
موج (بتملص وثبات): معرفش والله ما كلمنيش أصلاً في حاجة يمكن غيّر رأيه.
دميانة: متأكدة إنك مش مخبية عني حاجة يا موج؟!
موج: والله العظيم ما كلمني في حاجة صدقيني بقى!
دميانة: ماشي.. بس لو فيه جديد تكلميني وتحكيلي على طول!
موج: ماشي.. المهم ليكي وحشة والله!
دميانة: والله وانتي كمان يا موج!
ظلا تتحدثان سوياً؛ حيث أخبرتها موج عن عملها الجديد عند الخالة زينب وتبادلتا آخر الأخبار والحديث الحميم لفترة من الوقت قبل أن تنهيا المكالمة.
ـــــــــــــــــــــــــــــــــ**
في المساء
جلس جلال على ضفاف النهر وحيداً يتأمل المياه الثائرة في العتمة بينما كانت مجموعة من الحرس يجلسون على مسافة بعيدة يتسامرون فيما بينهم.
اقترب أحدهم بهدوء وأحضر له كوباً من الشاي الساخن ثم انسحب.
في تلك اللحظة أتاه اتصال من أخيه يونس:
جلال: ألو..
يونس: أيوه.. انت فين؟!
جلال: هكون فين يعني؟!
يونس: مش هتيجي ولا هتبيت برة الليلة برضه؟!
جلال: له جاي.. بس مش دلوك فيه حاجة؟!
يونس: له بطمن عليك.. انت زين؟!
جلال (ابتسم بتهكم خفيف): اه زين.. مالك وحشتك إياك؟!
يونس: وماله عيب يعني لما توحشني؟!
جلال: له مش عيب.. ماشي فيه حاجة تاني؟!
يونس: له.. سلامتك.
جلال: سلام.
أغلق مع يونس واكتف بكوبه وأكمل جلسته بهدوء. وبعد وقت قصير فتح هاتفه مرة أخرى وجذب رقم موج ثم رنّ دون تردد أو تفكير كالمرة السابقة.
ــــــــــــــــــــــــــــــ**
في الطرف الآخر.
كانت موج متمددة بين النوم واليقظة لكن ما إن رأت الأسم والمكالمة حتى انتفضت في فراشها كأن كهرباء لمستها تأكدت من الرقم بذهول ثم فتحت الخط وأجابت بنبرة تحاول جعلها هادئة:
موج: نعم؟!
جلال (بجفاف وصرامة): التليفون رن كتير على ما رديتي!
مطت موج شفتيها بطفش وضيق مكتوم وهي تهمس لنفسها ثم قالت:
موج: مسمعتش من أول ما رن.. خير؟!
صمت جلال لحظات ولا يعلم ماذا يقول أو كيف يبرر اتصاله بينما ساد الصمت من طرف موج أيضاً وهي تنتظر على جمر.
جلال (بعد برهة بنبرة حاسمة وصارمة): اسمعي زين.. أي حارس يكلمك يقولك تعالي لغنّام بيه لجلال لشاهين لأي حد.. متطلعيش معاه واوعاكي تروحي غير لما تكلميني الأول!
موج (بستغراب وعدم فهم): يعني إيه مش فاهمة! وأطلع مع حد ليه أصلاً؟!
جلال (متقاطعاً بحزم): مش مهم الفهم المهم تنفذي.. أي حد يقولك كِده تكلميني تعرفيني وتعرفي شكل الحارس زين أو تسأليه عن اسمه.
ولو محدش قالك اللي قلت عليه دلوك وحسيتي بحد بيضايقك برضه كلميني.. والأهم: أي مكان ياجي فيه اسم "شاهين" أعرف على طول!
موج (بتوجس وقلق): هو فيه حاجة أنا عملت حاجة؟!
جلال: له.. اسمعي الكلام وخلاص!
موج: حاضر.. إن شاء الله.
ساد الصمت بينهما مرة أخرى لثوانٍ وكانت موج على وشك أن تتكلم وتستفسر فسبقها هو بنبرته القاطعة:
جلال: سلام!
أغلق الخط فوراً دون انتظار ردها أو سماع حرف آخر.
وضع الهاتف جانباً وهو ينظر للنهر بوجه جامد كالخرسانة لكن عينيه كانت تلمعان بابتسامة خفية لا تُرعى.
أخذ عقله يدور في دوامة من الأسئلة: هل حقاً كل هذا الخوف والاهتمام لمجرد أن الحراسة مسؤوليته كما يُقنع نفسه أم أنه يستغل سلطته لحمايتها لغرض آخر أعمق.. غرض لا يتجرأ حتى على الأفصاح عنه لنفسه؟!
**
كانت موج ما تزال ممسكة بهاتفها تجلس في ظلام الغرفة الدامس والتفكير يعصف بعقلها.
لم تكن تفهم المغزى الحقيقي من حديثه وتحذيراته الصارمة
لكن كل أفكارها بدأت تتمحور حول هذا الرجل تحديداً؛ لِمَ بدأت تراه كثيراً في أيامها الأخيرة بهذه الصورة المكثفة؟!
بل كيف وصل به الأمر ليخترق خصوصيتها ويصل إلى هاتفها ورقمها الشخصي؟!
تنهدت بضيق وهي تقلب الهاتف بين يديها ثم وضعت يدها على قلبها الذي كان يخفق بنبرة غريبة لم تعتدها.
جلست لوقت ليس بالقصير تتأمل الشاشة المظلمة قبل أن تسحب غطاءها وتتسطح في فراشها مغمضة عينيها بقوة لتهرب من هذه الدوامة العنيفة ومن التفكير الذي أطار النوم من جفنيها.
ــــــــــــــــــــــــــــــ**
مرت الأيام سريعا وكان كل شيء هادئاً فلا اتصالات أخرى ولا مقابلات تجمعهما كان جلال يواصل يسعيه ليلاً ونهاراً لتأمين الجزيرة وتجهيز أجوائها لزفاف أخيه دون ثغرة واحدة
كي لا يستغلها شاهين ضده أو يضع والده في موقف حرج أمام ضيوفه الوافدين من خارج الجزيرة بدأ الجميع في سرايا الحاكم التجهيزات والترتيبات لحدثٍ يليق ببيت العمدة.
أما موج فكانت أيامها تمر بشكل عادي ومألوف بين العمل والمنزل ولكنها من حين لآخر كانت تجد نفسها تُلقي نظرة خفية على هاتفها تنتظر من داخلها -دون أن تعترف لنفسها- أي اتصال هاتف جديد منه.. لكن دون جدوى.
ـــــــــــــــــــــــــــــــ**
وفي يوم ما قبل الزفاف بيوم واحد وفي الصالون أثناء عمل موج مع الخالة زينب..
كانت موج تقوم بالتنظيف قبل مغادرتها العمل كالعادة بينما كانت زينب تأتي ببعض أغراض الصالون من الخارج.
دلفت زينب إلى موج بوجه يشع سعادة ونشاطاً وقالت بحماس:
زينب: طبعاً سمعتي يا بت يا موج عن فرح ولد الحاكم؟!
انقبض قلب موج للحظة واتسعت عينها برعب ودقات متسارعة وقالت بنبرة خائفة متلعثمة:
موج: صوح هيتجوز؟!
زينب (بذهول من رد فعلها): على أساس تعرفيه ومالك انقبضتي وتغير لونك كِده؟!
موج (تحاول التماسك وجمع شتات نفسها): له.. عادي مفيش الفرح ميتا؟!
زينب: مش معقول متعرفيش الناس بتتكلم من كام يوم.. المهم بكرة الجواز!
عبس وجه موج لا إرادياً وتكدرت ملامحها ولا تعلم لماذا شعرت بكل هذا الثقل في صدرها سرحت قليلاً وهي تحدث نفسها بأنه لهذا السبب لم يهاتفها أو يظهر أمامها منذ أيام.. كان مشغولاً بفتاته وزفافه
موج (بنبرة انكسار مكتومة): له مسمعتش.. يلا ربنا يتمم له بخير.
زينب: مش ده المهم.. المهم إننا هنروحوا السرايا عشان الزينة بتاعة حريم آل جهدان.. هيصي يا بت هتشوفي الخير على يدي بكرة!
موج (بشهقة وذهول): إيه سرايا مين ومين يروح؟! انتي هتعدلي العروسة؟!
زينب (بضحكة ساخرة): عروسة مين يا أختي له.. العروسة هتطلع برة الجزيرة تتعدل مش زي الغلابة اللي هنا خصوصاً الواد وليد ده
بيقولوا عنه مناخيره في السما ومتكبر على الآخر، أكيد مش هيجيبها تتعدل هنا!
موج (بتردد وذهول شتت عقلها): مين وليد مين؟! مش.. مش جلال بيه اللي هيتجوز؟!
زينب: له واحد تاني أخوه اسمه وليد!
تنحى العبث والضيق عن وجه موج فور سماع الاسم تلقائياً وانقشعت الغمامة عن قلبها في لحظة تنهدت بعمق وكأن روحاً ردت إليها ثم قالت لتداري موقفها:
موج: ااااه.. أمال انتي يعني هتروحي لمين هناك؟!
زينب: إحنا.. مش أنا لوحدي هنروح لحريم السرايا مرت الحاكم وحريم بيته يعني.
موج (بتراجع وخوف مفاجئ): له اعذريني يا خالة.. مقدرش أروح هناك أبداً!
زينب (بصدمة): نعم يا أختي يعني إيه متقدرش؟!
موج: انتي خابرة أبوي ميعرفش ولا أمي إنني بشتغل وياكي أقوم أروح السرايا؟!
أفرض حصلت حاجة ولا حد شافني غير إني ماليش في الجو ده.. أنا هستناكي هنا.
زينب: موج.. مش وقت عبطك انتي وأبوكي مقدرش أروح لحالي الشغل كتير ودول مش أي حد انتي مش هتعملي حاجة انتي هتعاونيني وبس وبعدين يا هبلة بقولك بيت الحاكم يعني هتشوفي الهنا وهيدوكي مال ياما عشان الفرح!
موج (بعزة نفس وحزم): له.. معوزاش حاجة من حد أنا بآخد أجرة شغلي وبس مش هشحت أنا!
زينب (بنهرة حادة): متلمي روحك يا بت هو أنا اللي بشحت إياك؟!
موج: مش قصدي طيب ما أنا لا بعدل ولا بزين.. هروح ليه بس الله يخليكي يا خالة اعفيني من الناس دي!
زينب: انتي فاكرة هنروح نلف في الزفة ده هنروح ندخلوا مطرح الحريم نخلصوا شغلتنا ونلف ونرجعوا، مالك خايفة كِده ليه؟!
موج (بتشتت وقلق من مواجهة جلال أو حراسه): مش عارفة.. هشوف.
زينب (بنبرة قاطعة): له هتروحي دلوك لو خلصتي روحي وجهزي روحك وعلى الضهر نكونوا هناك.. تيجي بدري عشان نلموا حاجتنا.
موج (بثقل وتفكير عميق): ربنا يسهل.. ماشي أروح أنا.. مع السلامة.
ــــــــــــــــ**
تركت موج زينب وخرجت لتعود إلى المنزل بينما وقفت زينب تنظر في أثرها باستغراب فكم من فتاة في الجزيرة تتمنى لو تطأ قدمها السرايا ولو للحظة واحدة لتشاهد عالم العمدة والحاكم!
ـــــــــــــــــــــــــــــــ**
مر الوقت على موج وهي غارقة في تفكير عميق وقلق متزايد بشأن ذهابها إلى السرايا في اليوم التالي.
وأثناء جلوسها في الخارج مع أخواتها أمام المنزل تحت ضوء القمر. كانت أحاديثهن تدور بكاملها حول الزفاف المرتقب:
ليلي (وهي تتنهد بحسرة): يا بخت العروسة اتفتحت لها طاقة القدر.. بيت الحاكم مرة واحدة!
فرح (بتهكم): عقبالك ياختي تلاقي اللي يستحملك!
ليلي (بحدة): اسكتي إنتي يا فقْرية.. ضيعتي فرصة عمرك والله بكرة لتندمي!
فرح: مالكيش فيه.. خليكي في نفسك إنتي!
خلود (بابتسامة ساخرة): يا ليلي.. إنتي عندك مشاكل نفسية !
ليلي: قصدك طموح فيه فرق كبير يا ذكية.
خلود: ده مش طموح.. البساطة نعمة يا ست ليلي ارضي باللي ربنا كتبه عشان يراضيكي.
ليلي: الحمد لله على كل حال.. بس وماله لما الإنسان يبص لفوق ويطمح للأحسن ولا إيه يا موج؟!
التفتت إليهن موج التي كانت صامتة طوال الوقت تستمع لحديثهن وعقلها في مكان آخر تماماً.
ظلت متخثرة دون رد لبرهة حتى نهضت فجأة وقالت بصوت شاحب:
موج: هادخل أنام.. راسي وجعاني ومش قادرة.
تركتهم ودلفت إلى الداخل بخطوات ثقيلة.
فرح (باستغراب): مالها دي النهاردة حاساها حاجة مزعلاها من الصبح!
خلود (بغموض وهي تتبع أثرها بعينها): معرفش مالها.. سرحانة وتاهية في دنيا تاني!
أكملن جلستهن لوقت قصير حتى حان وقت النوم
فدلفت خلود إلى الغرفة لتلتحق بموج فوجدتها لا تزال مستيقظة تقلّب وجهها في الفراش بعيون زائغة.
خلود (وهي تجلس بجانبها): مالك يا بنتي فيكي إيه من العصر؟
موج (بصوت خافت يخفي ارتباكاً): دماغي وجعاني من كتر التفكير.. مش قادرة أغمض عيني.
خلود (بإصرار وهي تنظر في عينيها): تفكير.. بتفكري في إيه كده ومخليكي على الهوا سارحة؟!
اعتدلت موج في جلستها بسرعة وتحدثت محتفظة ببعض التفاصيل لكنها أخبرتها بكل ما يقلقها عن حديث زينب وطلبها بمرافقتها إلى السرايا في اليوم التالي ومدى رعبها من فكرة الذهاب إلى هناك.
خلود (بوهن وتفكير): مش هاقولك افرحي وروحي بعد اللي عملوه معانا.. الراجل ده [جلال] بس إنتي رايحة لشغل معين وأكيد محدش هيكون فاضي ليكي وسط الزحمة دي!
موج (بانفعال خفيف): ده فرح وزحمة والكل هيكون متجمع أفرضي أبوي راح لأي سبب؟ أفرضي..
خلود (مقاطعة بابتسامة تشجيع): أقولك روحي.. غيري جو وتفرجي على الأجواء هناك مش دايماً بتقولي نفسك تطلعي تشوفي أماكن تانية؟!
اعتبري دي طلعة هتشوفي جو مختلف خالص وبالنسبة لخوفك.. إنتي بطبيعتك بتحبي تتخفي ومبتلفتيش النظرة لو مش عايزة!
موج (بدهشة): يعني إيه مش فاهمة وهناك هتخفي كيف أكيد له الناس كتير والمكان مكشوف!
خلود: مش قصدي.. لو خايفة عشان اسمك ميعرفوهوش هناك ممكن تتفقي مع الخالة زينب تناديكي بأي اسم تاني طول اليوم لغاية ما ترجعي بالسلامة!
صمتت موج لبرهة وأخذت تفكر في الاقتراح بجدية وسط مخاوفها المتلاحقة.
أكملت خلود محفزة إياها:
خلود: محدش يعرفك هناك غير جلال بيه.. وده ممكن تتجنبيه وتبعدي عن طريقه والاسم غيريه وخلاص والا تحبي أجي معاكي أنا كمان؟!
موج (وهي ترمقها بحدة مصنعة): اتنيلي تاجي فين يا هبلة؟!
خلود: يا ستي ده فرح كبير.. يعني محدش هيحاسب حد وأكيد مكان الحريم بيكون لوحده بعيد عن الرجالة!
موج (بتنهيدة طويلة): يمكن.. إن شاء الله ربنا يسهل.
خلود: إن شاء الله.. ولو حسيتي إنك مقدراش بجد خلاص وانتي حرة.
موج: ماشي.. هشوف الجو الصبح وأنا وحظي بقى!
أكملتا حديثهما الهادئ قليلاً حول ترتيبات الغد حتى مرّ الليل بسكونه استعداداً ليوم الزفاف المرتقب الذي سيقلب أجواء الجزيرة رأساً على عقب.
ــــــــــــــــــــــــــــــــــــــــــ**
في صباح اليوم التالي
كانت الأجواء هادئة في بيت فايز وموج لا زالت نائمة في فراشها بينما تسللت أشعة الشمس الخفيفة عبر النافذة.
مالت إليها خلود قبل خروجها وهمست في أذنها بابتسامة خبيثة:
خلود: صاحية لو صاحية ونويتي تروحي.. بلاش تلبسي القرف بتاعك ده البسي زين مش لازم ملون قوي وملفت بس كمان بلاش الكآبة السودا دي كلها يلا.. أشوفك بعد الرجعة إن شاء الله!
تركت خلود موج وخرجت لدراستها بينما فتحت موج عينها ببطء وتمددت في الفراش تنظر للسقف بتفكير شديد ثم تمتمت بصوت خافت وهي تغطس رأسها في الوسادة:
موج (بتهكم وسرها): ألبس إيه يعني هو فرحي ده لو ينفع ألبس جلابية أبوي دي كنت لبستها.
ــــــــــــــــــــــــــــــــ**
وفي نفس الوقت وفي الناحية الأخرى من الجزيرة.. كانت سرايا الحاكم تعيش أجواءً مختلفة تماماً
كان الجو يعج بالحركة والنشاط منذ ساعات الصباح الأولى؛ الترتيبات لا تتوقف والدخول والخروج لا يهدأ.
عشرات الخدم والرجال حركة لا تهدأ في الساحة الخارجية والحدائق ينظمون المقاعد ويجهزون الذبائح.. إلى جانب حركة الدخول والخروج للضيوف والوجهاء القادمين من الجزيرة وخارجها ليخرج الزفاف بالصورة الهائبة التي تليق بعائلة آل جهدان وبمكانة العمدة غنّام.
