رواية جزيرة غراب الوادي الفصل الحادي عشر
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«تَخَفَّتْ لِلْدُّخُولِ كَيْ لا يَشْعُرَ بِوُجُودِهَا.. وَلَكِنَّهَا لَمْ تَكُنْ تَعْلَمُ أَنَّ هَذِهِ الخَطْوَةَ قَدْ تَكُونُ أولَى سُطُورِ الحُبِّ الَّذِي سَيَعْصِفُ بِقَلْبَيْهِمَا»
(في عَرين الأسد)
﷽
وصلت موج بعد وقت إلى عملها وكانت زينب تنتظرها على أحر من الجمر وما إن دلفت من الباب حتى بادرتها زينب بنبرة لائمة ومستعجلة:
زينب: حمد الله على السلامة كل ده؟! مردتيش عليّ ليه على التليفون؟!
موج: معلش يا خالة مسمعتش.. انتي رنيتي؟!
زينب: يلا المهم إنك جيتي.. أنا قلت بتتهربي ومعدتيش طالعة وياي!
موج (بتوسل خفي): يعني مفيش حل إني مروحش أصلاً.
زينب: له قلتلك محتاجاكي والمشوار سهل انتي بس اللي مصعباها على حالك!
موج: ربنا يستر بس.. دلوك لما نروح إن شاء الله بلاها اسم موج هناك!
زينب (بذهول واستغراب): يعني إيه بلاها موج؟
موج: أخاف أبوي يعرف وانتي خابرة اسمي مش مكرر كتير أو مش موجود أصلاً هنا.. قوليلي أي اسم تاني يعني... أقولك قوللي "صباح"
زينب (ضحكت بصوت عالٍ): صباح وماله يا ستي يارب بس ما أنساش وألخبط الدنيا!
موج: إن شاء الله مش هتنسي.. هنمشوا ميتا بقى؟!
زينب: شوي كِده وهيبعتولنا عربية.
ثم نظرت زينب إلى ثوب موج الغامق وقالت بعتاب:
زينب: انتي ليه كل لبسك كاتم كِده كنتي لوني شوية يا بت بدال الكآبة دي..دا فرح!
موج: وأنا مالي بالفرح.. وحش اللبس إياك؟!
زينب: له عسل عليكي.. بس غامق زيادة عن اللزوم!
موج: مش بحب الألوان.. مش مهم.
زينب: مش مشكلة يلا نجهزوا شوية حاجات عشان أول ما نمشوا نكونوا جاهزين.
بدأتا في جمع الأغراض وأدوات التجميل في حقائب خاصة حتى وصل حارس يتبع السرايا بسيارة لتقلّهما إلى هناك.
خرجتا سوياً وسط توتر شديد ينتاب موج.. توتر كان يتصاعد ويقتضم قلبها كلما قطعت السيارة مسافة أقرب نحو بيت الحاكم.
ــــــــــــــــــــــــــــــــــــــــــــ**
في ذلك الوقت.
كان جلال قد أتم بتدقيق تام تأمين كل مداخل ومخارج الجزيرة وتجهيز الأجواء الخارجية لاستقبال الوفود والضيوف القادمين من خارج الجزيرة ثم توجه عائداً إلى السرايا لإكمال آخر ترتيباته وإشرافه المباشر على الحراسة الداخلية قبل بدء مراسم الزفاف.
ــــــــــــــ**
وصلت السيارة إلى السرايا ونزلت موج مع زينب داخل الأسوار والعمدان الضخمة.
نظرت موج حولها بذهول وانبهرت بالتفاصيل فقالت لها زينب بصوت خفيض:
زينب: يلا يا موج اتفرجي على البيوت العالية والسرايات مش زينا خالص.. بس تعرفي كلهم غل وسواد!
موج (بهمس حاد وارتباك): يا خالة قلتلك "صباح"
زينب (تضرب جبهتها بخفة): يوه نسيت.. صباح صباح، صباح، خلاص ركزت أهه!
موج: انتي جيتي هنا قبل كِده شكلِك تعرفي ناسها زين!
زينب: اه جيت كام مرة.. بس إيه مش سرايا وناس "هاي" وبس؟ ده جحر عقارب خصوصاً مرت الحاكم.. يا ساتر أحسنلك اتجنبيها خالص حُرمة مناخيرها في السما وسليطة لسان!
موج: أنا ماليش صالح بحد خالص.. أنا وراكي قوليلي اعملي أعمل.. سوي أسوي وبس!
زينب: ماشي يا ستي.
في تلك اللحظة أتت نحوهما الخادمة الكبيرة حكمة:
حكمة: إزيك يا زينب؟!
زينب: مرحب يا حكمة.. عامِلة إيه؟!
حكمة: بخير الحمد لله.. يلا مستنييك على نار عشان تلحقي تخلصي الشغل!
زينب: حاضر يلا يا موـ.. يا صباح!
ــــ**
دلفتا بخطوات ثقيلة خلف حكمة باتجاه الجناح الخاص بالنساء في عمق السرايا.. وموج تتلفت حولها بقلب يخفق كالطبول.
جلست موج وزينب قليلاً في الغرفة المخصصة لهن حتى دَلَفَت "وعد" أولاً؛ كانت تتغنج في مشيتها وتحركاتها محاولة إثبات أمام الجميع أنها الأفضل والمفضلة في السرايا وأكثرهن جمالاً ودلالاً.
ألقت وعد السلام بنبرة متعالية ثم بدأت زينب بعملها معها مباشرة بينما ظلت موج تجلس جانباً بثبات ودون فعل أي شيء في البداية.
بعد دقائق دخل بقية حريم السرايا تباعاً: كريمة، وخضرة، ونجاة.
كريمة (بابتسامة هادئة): إزيك يا زينب عاملة إيه؟!
زينب: الحمد لله يا ست كريمة.
ثم التفتت نحو خضرة وقالت بترحيب: مبروك يا ست خضرة ربنا يتمم بخير وعقبال الباقيين إنشاءلله!
خضرة (بنبرة جافة): تعيشي يا زينب.
نظرت نجاة بنظرات فاحصة نحو موج وقالت:
نجاة: بتِك دي يا زينب؟!
زينب (بضحكة خفيفة): كل دي بنتي له دي بنت شغالّة معاي بتساعدني.
خضرة (بقلة صبر): همي وشدي حيلك عشان نخلصوا!
أكملت زينب عملها بهمة ونشاط بينما وقفت موج تساعدها في تجهيز الأغراض والتنظيف خلفها بهدوء حذر.
انتهت زينب من تحهيز وعد فوقفت الأخيرة تتفحص نفسها في المرآة باستعلاء وقالت:
وعد: أطلع أجهز روحي وأتزين عندي في أوضتي أحسن.. أصل مش بحب أستخدم الحاجات دي لتكون رخيصة، لمؤاخذة يعني يا زينب!
زينب (بتماسك وذكاء): ولا يهمك.. بس أنا جبت الطلبات اللي طلبتها الست كريمة بالضبط زي ما قالت.
وعد (بغمزة وخفة): وماله.. كريمة عندك أهي.
تركتهم وعد وخرجت بفرقعة كعبها بينما نظرت خضرة بنظرة استهانة ونقد لموج وقالت:
خضرة: انتي مش بتعملي حاجة واصل؟ بس واقفة وراها زي الصبي كِده مش بتعرفي تعملي البتاع اللي بينعمل في الرجلين ده؟!
اتسعت عينا موج ورفعت حاجبها بستغراب دون أن تنطق بحرف فتدخلت زينب بسرعة ولطفت الأجواء بضحكة ارتباك لتمرير الموقف:
زينب: له مش بتعرف أصلها لسه جديدة معاي في الشغل ومتعلمتش!
رمقتها خضرة بنظرة متفحصة وقالت:
خضرة: اه.. جديدة!
ثم التفتت إلى موج وعقبت بجفاف:
خضرة: وانتِ خرسة لازم هي ترد عنك ولا إيه؟
ردت موج بثبات ونبرة هادئة:
موج: له مش خرسة.. بس بستغرب.
خضرة (بعقد حاجبين): على إيه؟!
موج: لما تكون الرجل زرقا وصاحبتها مهملة فيها من أساسه.. يفيد بإيه التنضيف؟!
اشتعل وجه خضرة بالغيظ وقالت بغضب مكتوم:
خضرة: تقصدي إيه يا بت أنتِ؟!
تدخلت زينب بذعر وربكة وهي تنظر لموج محذرة:
زينب: مو.. احم قصدي يا صباح لمّي الحاجات اللي هناك دي بسرعة!
ثم التفتت إلى خضرة تلين خاطرها وتدارك الموقف قبل تفاقمه:
زينب: معلهش يا ست خضرة هي دبش شوية.. وأشارت إلى رأسها بسبابته الخفية محاوِلة إيهامها بأنها غير متزنة عقلياً كي تنهي الشجار قبل أن تشتعل السرايا.
خضرة (وهي تمط شفتيها بتكبر): امممم.. وماله!
أتت ابنته شاهين الصغيرة برفقة الخادمة "حكمة"ثم تركتها وخرجت وبعد وقت قصير شعرت الطفلة بالضيق والملل داخل الغرفة فبدأت بالبكاء الشديد متشبثة بباب الخروج.
حاولن تهدئتها دون فائدة فبدأت كريمة تنادي على حكمة لتأخذها لكن صوتها لم يصل للخارج لكثرة اللغط والهرج.
التفتت كريمة نحو موج وقالت بنبرة هادئة:
كريمة: قلتِ اسمك إيه ؟!
موج (بارتباك سريع): صباح..
كريمة: معلهش يا صباح.. اطلعي من الباب ده هتلاقي المطبخ في وشك على طول ادّي البت لحكمة خليها تلهيها بعيد.
نظرت موج نحو زينب بتوجس فغمزت لها الأخيرة بعينيها تحثها على موافقة الطلب.
موج: ماشي..
حملت موج الطفلة الصغيرة وخرجت مسرعة متجهة نحو المطبخ لتعطيها لحكمة وتعود فوراً للجناح. كانت خطواتها متسرعة وعيناها على الطفلة
فلم تلاحظ مرور "يونس" في الممر وكادت أن ترتطم به بقوة لولا أنها توقفت في اللحظة الأخيرة!
موج (بشهقة وهي تخفض رأسها): لمؤاخذة.. منتبهتش!
التفت إليها يونس ثم تبدلت ملامحه فوراً للدهشة والغربة؛ فقد عرف وجهها على الفور.. إنها الفتاة صاحبة "المقص" في السوق!
يونس: حصل خير..
لم تنتظر موج أن يستوعب موقفه بل أكملت طريقها بسرعة نحو المطبخ تفتش عن حكمة لتتخلص من أي مواجهة.
في تلك اللحظة دلف "جلال" خلف يونس عائداً لغرفته ليبدل ثيابه قبل بدء إستقبال أخر ضيوف الزفاف فرأى أخاه واقفاً في منتصف الممر ينظر نحو المطبخ بشرود وذهول!
مرّ جلال بجانبه وقال بنبرة جافة:
جلال: مالك مبلم كِده ليه؟!
يونس: دقيقة بس يا جلال!
وقف جلال والتفت إليه مستغرباً ورسم ملامح الصرامة المعتادة على وجهه:
جلال: إيه.. فيه حاجة ولا إيه؟!
يونس (بمكر ليتأكد من شكوكه حول اهتمام أخيه): البت دي.. لسه شايفها داخلة المطبخ دلوك!
جلال (بجفاء وعدم اهتمام متصنع): بت مين؟!
يونس: بتاعة السوق والمقص!
جلال (بثبات بارد وزجر خفيف): سوق إيه وبتاع إيه؟! مش فاهم منك حاجة.. روح جهز روحك علشان ضيوف أبوك !
يونس (بإصرار وابتسامة خبيثة): يا خوي ركز معاي البت إياها اللي الظابط كان هيحبسها عشان المقص!
اتسعت عينا جلال بدهشة وتقصٍّ مفاجئ ونبض قلبه بحدة حاول إخفاءها:
جلال: مالها؟!
يونس (وهو يبتسم بذكاء): بقولك هنا لسه داخلة المطبخ دلوك.. غريبة صح يالا ما علينا ؟!
ثم تركه يونس ودلف ببطء ليقف بعيداً يرقب المشهد وقف جلال ينظر نحو المطبخ بذهول وعدم تصديق وهو يحدث نفسه بغضب مكتوم:
جلال: بتعمل إيه هنا دي؟!
لم يستطع الانتظار أو التفكير أكثر بل سار بخطوات واسعة نحو المطبخ. كانت موج قد سلمت الطفلة لحكمة وعادت أدراجها مسرعة وعندما رفعت رأسها ورأته واقفاً أمامها كالسد شهقت بفزع ورجعت خطوة للخلف!
جلال (بدهشة قلقة وعصبية مكتومة): انتي بتعملي إيه هنا؟!
موج (بارتباك تحاول التماسك): مفيش.. أنا.. احم جيت شغل!
عند ذكر كلمة "شغل" شعر جلال بضيق شديد واحتراق في صدره وقال بنبرة حادة:
جلال: شغل.. انتي جاية مع الخدم إياك؟!
موج (بعزة نفس حادة): خدم إيه له شغل مع الخالة زينب!
جلال: وزينب دي بتعمل إيه يعني؟!
موج: بتعمل شغل يعني.. حاجة كِده.. حاجة حريمي!
جلال (بصوت عالٍ غصباً عنه وهو يفقد أعصابه): اه خلاص ملقتيش غير هنا وتاجي؟ والنهاردة بالذات؟
تلفت بعض الخدم المارين بالممر مستغربين من صوته المرتفع.
انتبه جلال لنفسه وللأنظار الفضولية حولهما وفي لحظة انفعال سحبها من ذراعها بقوة ودلف بها إلى أمام غرفته القريبة تحت محاولات موج المستميتة للإفلات منه!
موج (بحدة وصوت خفيض): بعد أذنك يا بيه متمسكنيش كِده.. بعد عني!
جلال : اسمعي يا بت انتي.. تروحي دلوك على بيتكم على طول أوعاكي ألمحك هنا تاني!
موج: مقدرش أسيب الخالة لوحدها أصلاً قربنا نخلصوا وهنروحوا!
جلال (بنبرة قاطعة لا تقبل النقاش): قلت تمشي من غير كلام كتير قعاد دقيقة واحدة هنا تاني.. له!
موج (بضيق ): معلش يعني ليه؟ أنا مش بعمل حاجة غلط ولا حرامية هسرق داركم!
اقترب منها جلال خطوة محذراً إياها بعينين تشتعلان:
جلال: بلاش مقاوحة وقلة أدب!
تلفت حوله يضبط أنفاسه الثائرة ثم أخرج هاتفه وسحب رقم "منعم" الحارس:
جلال: انت فين يا منعم؟!
منعم: برة يا بيه.
جلال: جهز أي عربية على جنب بعيد عن الدوشة والزحمة!
منعم (باستغراب): خير يا بيه.. فيه حاجة؟!
جلال: اعمل اللي قلت عليه وخلاص يا منعم!
أغلق الهاتف بغضب ثم التفت إليها وقال بأمر:
جلال: تمشي وراي ولا أسحبك من يدك برة؟!
موج: هروح فين يعني؟!
جلال: هتتفضلي تروحي على داركم!
موج: طيب هجيب حاجتي وأقول للخالة الول.. لتزعل مني!
جلال: حاجتك هبعتهالك أو تاخدهالك وياها .. يلا!
موج (بطفش ونفاذ صبر): هو فيه إيه حتى لو أوامر قولي عشان كذا وكذا يعني إيه أجي مع وحدة وأسيبها وأمشي وأسيب حاجتي.. أنا معملتش حاجة غلط!
تنهد جلال بقلة حيلة ثم أمسك يدها ليخرجها من الباب الخلفي فنفضت موج يدها بقوة وغضب وعيناها تتحديان عينيه:
موج: قلتلك متمسكش يدي اه.. جلال بيه على عيني ورأسي لكن فيه حدود أوعاك تتعداها حتى لو ابن الحاكم وأنا في داركم!
جلال: عارف حدودي زين... وإنتِ كمان اعرفي حدودك.
موج: عارفاها وعشان كده بقولك متتعداهاش.
استغرب جلال من جرأتها وطريقتها الناطحة للكبرياء لكنه نظر إلى وجهها المشتعل بالكرامة وتبسم رغماً عنه ابتسامة خفية لم يستطع إخفاءها.
استغربت موج من نظرته وابتسامته المفاجئة فأبعدت عينيها عنه فوراً وهي ترفع رأسها بغير مبالاة.
جلال: لسانك ده هيتعبني
ثم أكمل بنبرة أهدأ : ماشي.. يبقى تطلعي وراي من سكات!
خرج وسارت خلفه بخطوات غاضبة من باب خلفي بعيد عن العيون.
بينما خرج يونس من مخبأه بعد مرورهم أخذ يمسح وجهه كالمذهول محدثاً نفسه بنبرة يمتزج فيها الذهول بالصدمة:
يونس: مستحيل.. جلال أخوي؟!
ثم انطلقت منه ضحكة خفيفة خافتة ملأها الاستمتاع والدهشة وهو يربت على صدره وينظر في أثرهم:
يونس: حلو والله.. طلع عشقان ومداري
ـــــــــ**
توجه جلال وموج حيث كان منعم ينتظر بالسيارة في جانب هادئ من السرايا.
وقف جلال وفتح الباب الخلفي للسيارة.
جلال: اركبي.
موج (بتمرد): بيني وبين حاجتي خطوة.. لو ضاعت ولا انسرقت مين يجيبلي غيرها؟!
جلال (بنبرة لا تحتمل التراجع): اركبي يا موج!
وقف منعم ينظر بدهشة من أفعال سيده واهتمامه غير المفهوم بهذه الفتاة.
ركبت موج السيارة وهي تدمدم بغضب فأغلق جلال الباب والتفت لمنعم يوصيه بصوت خفيض:
جلال: وصلها لمكان قريب من بيت فايز النجار.. لو تعرفه.
بس بلاش لغاية البيت بالظبط أي مكان على جنب نزلها فيه وم تتأخرش!
منعم: حاضر يا جلال بيه.
ركب منعم وقبل ان يغادر بالسيارة
مال جلال رأسه قليلاً ونظر عبر نافذة السيارة المفتوحة نحو موج يلقي بكلماته الأخيرة بنبرة حازمة يحافها القلق قبل أن تنطلق السيارة:
جلال: خلي بالك.. قلتلك قبل كِده لو حد بعتلك ولا قالك تاجي أي مكان تخبريني وانتي جيتي من غير ما أعرف!
موج (وهي تدافع عن نفسها): بس محدش بعتلي المرة دي.. ده سبب تاني خالص!
جلال (بقاطعية وثبات وهو يتأمل عينينها): أيًا كان.. كنتي لازم تقوليلي برضه ويا ريت متكرريهاش تاني!
أنهى جملته الصارمة ثم رفع قامته الشامخة واعتدل في وقفته وأشار لمنعم بيديه أن ينطلق بالسيارة فوراً ليغادر خارج أسوار السرايا.
بينما وقف جلال يتابع الطيف الراحل ثم
دلف للداخل لمرة أخرى وأرسل يستدعي "حكمة" فخرجت له مسرعة.
جلال: ادخلي دلوك مطرح الحريم قولي للست اللي اسمها زينب إن صاحبتها اللي كانت معاها مشت ضروري وخليها تاخد حاجتها معاها!
حكمة (بحيرة واستغراب): يعني إيه يا بيه مش فاهمة!
جلال (بصبر): مش فيه حرمة اسمها زينب جوه؟!
حكمة: اه..
جلال: البت اللي جت معاها مشت.. ادخلي قولي لها صاحبتك مشت مستعجلة وتاخدي حاجتها اللي سابتها معاها!
حكمة: حاضر .
وقبل أن تغادر حكمة وتتحرك من أمامه استوقفها جلال مرة أخرى بنبرة تحذيرية حاسمة:
جلال: اللي يسألك.. قولي شفتها وهي ماشية متقوليش جلال بيه.. ولا تجيبي سيرتي واصل حتى لعمتي سمعتي !
حكمة: ماشي.. حاضر يا بيه.
دخلت حكمة للداخل لتنفذ ما أُمِرت به وتخبر زينب.
ـــــــــــــــــــــــــــــ**
بينما دخل جلال مرة أخري ليبدل ثيابه استعداداً لاستقبال الضيوف.
وقبل أن يخطو خطوه داخل الغرفة لامست قدمه شيئاً معدنياً صغيراً على الأرض؛ انحنى لينظر فوجد أُسورة صغيرة بسيطة مصنوعة من الخرز الملون.
تاملها لثوانٍ قليلة وتذكر حين لامست يده معصم موج أثناء محاولته إخراجها.. فأيقن بلا شك أنها تخصها!
ابتسم ابتسامة خفيفة زينت وجهه ثم التقطها بحرص ووضعها في جيبه قبل أن يدخل الغرفة.
ــــــــــــــــــــــــــ**
وفي تلك الأثناء وبعد وقت قصير وصلت السيارة التي تقل موج بالقرب من منزل فايز نزلت موج وخطت بخطوات متسارعة وقلقة نحو المنزل.
كانت خلود تقف على الباب لتهم بالخروج للبقاله ففاجأتها موج وهي تدلف مسرعة وبوجه باهت.
خلود (بذهول): جيتي إيه رجعك بدري كده؟!
لم ترد موج بل زاحتها من طريقها ودخلت بعصبية وجلست على التخت بقلب يخفق وتوتر ظاهر على محياها.
خلود (وهي تلحق بها للداخل): مالك عملتي إيه؟! احكيلي بالتفاصيل.
موج (بانفعال ونفاذ صبر): يا خلود.. مش وقتك خالص بعدي عني دلوك!
خلود (باستغراب وهي تحدق في يديها الفارغتين): وه مالك.. حد كلمك والا حصلت حاجة هناك؟!
موج: له.. محصلش.
نظرت خلود جيداً إلى هيئتها وتأملت يديها ثم قالت:
خلود: أمال فين شنطتك وحاجتك فين؟!
وضعت موج كفيها على وجهها بحسرة وقالت بصوت متهدج:
موج: آااه ياني.. ياريتني ما رحت الخالة زينب هتزعل مني وسبت تليفوني وحاجتي كلها هناك. منك لله يا جلال بيه!
خلود (بعيون واسعة من الصدمة): مين جلال؟ إنتي بتقولي إيه وأصلاً إيه اللي جابك بالسرعة دي؟
موج: مفيش.. اتخنقت من هناك والراجل ده ظهرلي في وشي فجأة ومقدرش أقعد دقيقة واحدة!
خلود: يعني إيه اتخنقتِ فهيميني!
موج (وهي تفقد أعضائها تماماً): يا خلود.. اطلعي بره دلوك وسيبيني لوحدي!
جذبتها من يدها بعنف وأخرجتها خارج الغرفة ثم أغلقت الباب في وجهها بقوة وتسطحت على التخت وهي ترمس وجهها في الوسادة وتتمم بغيظ:
موج: طردني من بيتهم ياكسفتك ياموج..أنا متأكدة إن الراجل ده مجنون.. غبية ياريتني ماتبعت خالتي زينب من أساسه!
ـــــــــــــــــــــــــــــــــــــ**
مرَّ الليل بطيئاً على الجميع..
آل جهدان غارقون في صخب أجوائهم وزفافهم الباذخ بينما كانت موج تجلس بالخارج أمام المنزل ينهكها التفكير لا تعلم ماذا حدث لزينب بعد مغادرتها المفاجئة وكيف تداركت الموقف.
أمست تبحث عن وسيلة للاطمئنان فأخذت هاتف خلود وقبل أن تطلب رقمها تفاجأت بحليم يخطو نحوها بعيون ساخرة.
حليم: مساء الخير.
موج (بريبة): مساء النور..
دون مقدمات ألقى إليها حقيبتها المفقودة لتلتقطها موج بذهول وعينين متسعتين!
حليم (وهو يهز رأسه بتهكم): والله أنا متمرمط في العيلة دي!
موج (بصدمة): وه جبتها من فين دي؟!
حليم: الخالة زينب كلمتني وقالت لي أعدي أخدها وأجيبها لكِ.
موج (بقلق مكتوم): هي.. قالت لك حاجة تاني عني؟!
حليم: له هتقول إيه يعني المهم.. الشنطة دي كانت بتعمل إيه عندها أصلاً اعترفي!
انتفضت موج من مكانها بذعر وضعت يدها على فمه بسرعة:
موج: ششش يخرب بيتك وطي حسك!
حليم (بابتسامة خبيثة): حلو قوي أول زلة عليكي يا موج.. سامع وعارف احكي بقى عشان أذلِك زين!
موج (بنفاذ صبر): حليم مش وقت رخامتك خالص إيه يعني.. كنت جاية من شغلي وحودت عندها ونسيت الشنطة هناك فيها إيه دي؟!
حليم (وهو يمط شفتيه بعدم تصديق): امممم.. بس كِده؟!
موج: اه بس بعدين انت مالك أصلاً بيا وبحاجتي؟!
حليم (بضحكة): صوح.. خيراً تعمل المهم عاملين إيه؟ وخالتي عاملة إيه؟
موج: حلوين يا خويا الحمد لله.. وفرح حلوة وزينة.
تبسم حليم فور سماع اسم فرح وقال بنبرة رجاء دافئة:
حليم: طيب ما تعملي خير .. جيت أهه ادخلي ناديلها أشوفها وتبقى الجية بفايدة!
موج (بحدة مصنعة وضحكة): له يا أستاذ.. معندناش قلة أدب إحنا عاوزها تعالَ أخطبها رسمي والجواز بعد ما تخلص علامها والدهب مية جرام كامليين!
حليم (بصدمة ساخرة): مية جرام؟ مش عاوزه شقة في التجمع بالمرة؟
موج (وهي تضحك من قلبها): له.. إحنا بنشتروا راجل!
في هذه اللحظة وصل فايز متأخراً من عمله بخطوات ثقيلة:
فايز: السلام عليكم.
ردو سوياً: وعليكم السلام ورحمة الله وبركاته.
فايز: واقف كِده ليه على الباب يا حليم ادخل يا ولدي.
حليم: تسلم يا خال.. أنا مروح كنت معدي قلت أطمن على خالتي.
فايز: ومُاله .. أمك فين يا موج؟
موج: جوة يا أبوي كانت بتصلي العشا.
تركهم فايز ودلف للداخل فالتفت حليم لموج بغمزة خفيفة:
حليم: مجبتش سيرة الشنطة قدام خالوا أهه.. بس هستخدمها كارت ضغط عليكي بعدين!
موج (بقلة صبر زائف): خالوا الله يرحم.. وانت من أهله يا حليم!
حليم (وهو يضحك ويعطيها ظهره): ماشي.. سلام!
تركه وغادر فيما دخلت موج فوراً لغرفتها أفرغت محتويات الحقيبة وتفحصت هاتفها وأغراضها بدقة لتتأكد أن شيئاً لم ينقص
ثم استلقت على تختها بتنهيدة طويلة وقد تنفست الصعداء قليلاً بعد يوم مشحون بالارتباك والمواجهات.
ــــــــــــــــــــــــــــــــــــــ**
في آخر الليل بعد انتهاء مراسم الزفاف وهدوء الأجواء في السرايا وإتمام كل شيء طوال اليوم بشكل ممتاز يليق بمكانة وهيبة آل جهدان
دلف الجميع إلى غرفهم ليستريحوا بعد هذا اليوم الطويل والمجهد.
أما جلال فلم يكن النوم يجد طريقه إليه؛ سحب حصانه وغادر السرايا بحجة تفقد حراسة الحدود والاطمئنان على أمور عمله.
وبعد أن أتم جولته السريعة وجد نفسه يقف وحيداً تحت سكون الليل عاجزاً عن محاربة أفكاره وشغفه الذي يسحبه بضراوة نحو "موج".
أخرج هاتفه ونظر للشاشة؛ كانت الساعة قد تجاوزت منتصف الليل بكثير تنهد بقلة حيلة؛ فالوقت متأخر جداً ولا يستطيع خلق أي عذر واهٍ لمهاتفتها في هذا الوقت.
فتح تطبيق الواتساب وبحث عن حسابها ليطالع صورتها الشخصية فوجدها تضع صورة مكتوباً عليها آية قرآنية فتمتم بنبرة ساخرة محبة:
جلال: شيخة بلسانين!
أغلق الهاتف ووضعه في جيبه ثم أخرج من جيبه الآخر أسورة يدها الصغيرة التي سقطت منها تأمل الخرز البسيط بين أنامله والابتسامة تتسع على شفتيه حتى قال بتلقائية وصوت خفيض:
جلال: متمردة.. وأحبها!
في تلك اللحظة جاء من خلفه "هاني" بخطوات هادئة وقال بنبرة مباغتة ومخادعة:
هاني: إييييه خير.. كلام حب كمان وحركات؟!
أخفى جلال الأسورة في قبضته فوراً بمهارة وهو يلتفت إليه بحدة متصنعة:
جلال: مش قلتلك مبحبش شغل السحالي والتسحب ده؟!
هاني (بضحكة): بس أنا متسحبتش يا بيه أنا جاي عادي وبمشي برجلي.. جناب البيه هو اللي سارح ومش منتبه للحواليه ونازل يقول أشعار في نص الليل!
جلال (مبتلعاً ارتباكه): ده محمد درويش شفتها على النت وبكررها.. فيها حاجة دي؟!
هاني(بضحك) : أول حاجة أسمه محمود درويش والأهم مش هوا اللي قال كده بس ميمنعش بقيت بتهتم بالشِعر.. قاعد هنا ليه ومروحتش تنام اليوم كله شغل وتعب وهدّ حيل.. إيه متعبتش؟!
جلال: والله على آخري بس زهقان من البيت وناسه!
هاني: ليه ده حتى جو الفرح يفتح النفس.. كنت خليك جوة يمكن نفسك تتفتح على الجواز ولا حاجة!
جلال (بتهكم وحسم): فين ده.. ده محدش سادد نفسي في الدنيا قد "وليد".. ولو هاتجوز زيه كِده بلاها خالص!
هاني (بضحك عالٍ): ليه بس ما الراجل كان فرحان وطاير في السماء!
جلال: فرحان إيه.. عيل مرخي ومش على بعضه واصل لولا أبوي قاله اتقل ولم روحك شوي كان فضحنا قدام الخلق والناس!
هاني (بغمزة خبيثة): الفرحة بتنسي يا جلال بيه.. بكرة تجرب وتقول هاني قال!
جلال (بدون تفكير وتنهيدة دافئة): إن شاء الله.
تسمر هاني مكانة وعقد حاجبيه بذهول:
هاني: وه.. إن شاء الله له.. كِده فيه "إنّ" صوح وموضوع كبير كمان!
جلال (بنفاذ صبر وعصبية لتغطية موقفه): يا بوي اسكت يا هاني ياتقوم من وشي!
ـــــــــــــــــــــــــــــــــــــــــ**
في صباح اليوم التالي
وصلت موج إلى صالون الخالة زينب بخطوات متحفظة يثقلها التردد والحرج.
وقفت في الخارج بضع دقائق تتنازعها الرغبة في الدخول أو الهرب مجدداً ثم حسمت أمرها ودلفت بهدوء.
رفعت زينب عينيها نحوها بنظرة مليئة بالضيق العاتب ثم أزاحت وجهها بعيداً وجاهلت وجودها.
موج (بصوت خفيض وخجل): مرحب يا خالة..
زينب (بنبرة حادة ووجه عابس): خالة في عينك وعين أمك جاية ليه دلوك؟!
موج (بندم ورجاء): حقك عليّ والله يا خالة.. غصب عني!
اقتربت زينب منها بخطوات بطيئة وضيقت عينيها وهي تتفحص وجهها بنظرة شك وتقصٍّ:
زينب: امممم.. وإيه الغصبانية دي إن شاء الله خير.. حصل إيه خلاكي سبتي كل حاجة وجريتي حتى مكلفتيش خاطرك تخبريني ولا تقوليلي أصلك وفصلك؟!
موج (بارتباك سريعة التفتيش عن كذبة منطقية): أصل.. أصل أنا، ااا.. شفت أبوي اه صوح أبوي كان برة.. أظاهر كان رايح شغل ولا حاجة هناك وأول ما لمحته خفت وجريت على البيت من سكات!
زينب (بعدم تصديق وبتهكم): والله وانتي فين وأبوكي فين.. أبوكي إيه هيدخله السرايا جوة عند الحريم إياك؟!
موج: له.. ما أنا ملقتش اللي اسمها حكمة دي طلعت أبص عليها برة لمحت أبوي معدي خفت وروحت قوام.
زينب (وهي تمط شفتيها براحة جافة): والله؟!
موج (بتأكيد وإصرار): أمال يعني كنت هعمل كِده ليه لو عاوزه أسيبك وأخلع كِده كنت حتى خدت شنطتي وتليفوني معاي!
زينب: ماشي يا بنت سعدية.. هعديهالك بكيفي بس عشان متأكدة إن مشيك بالطريقة دي وراه حاجة كبيرة ويمكن أبوكي صوح.
موج (بابتسامة ارتياح وفرح): هو مفيش غيره !
زينب: افتحي التلاجة الصغيرة دي طلعي لفة فيها حلويات من الفرح كليها.. مخليهالك عشان بعد ما أهزقك أديهالك تدوقي!
سارت موج نحو الثلاجة وهي تبتسم بامتنان:
موج: اتغديتي إياك يا خالة؟!
زينب: اه خدت غدايا وحلويات كمان.. مش فرح أمال إيه!
موج: بالهنا والشفا على قلبك.
فتحت اللفة وتناولت منها قطعة حلويات ثم قالت بفضول محاولِة استكشاف السرايا:
احكيلي بقى يا خالة.. الحريم دول مين فيهم حريم العمدة ومين متجوز مين هناك؟!
زينب: على أساس تعرفيهم يعني عشان تسألي؟!
موج: عادي.. مجرد استفسار مش أكتر.
زينب: العقربة الكبيرة اللي لابسة دهب في كل حتة ناقص صرصور ودنها دي "خضرة" مرت العمدة غنام..
والتانية الأصغر شوية اللي سألتك تكوني بنتي دي أخته الست "نجاة".. زي العسل وطيبة.
موج: اه.. باين عليها والباقيين اللي جت الأول المشخلعة دي تبقى بنته؟
زينب: له دي الست "وعد" مرت شاهين ولده. والتانية اللي عطتك البنت بردو مرته!
موج (بدهشة واستغراب): وه تنين حاسة إني سمعت عنه قبل كِده!
زينب: اه أكيد سمعتي.. سمعته مع النسوان أشهر حاجة في الجزيرة بس الناس بتكتم خوف منه ومن شره!
موج: اه.. يلا ناس أغنية وملناش صالح بيهم.
زينب: على رأيك..
اقتربت زينب منها ومدت لها بعض المال قائلة: امسكي دول.
موج: إيه ده؟!
زينب: فلوس.. شايفاها إيه يعني؟!
موج: يعني بتوع إيه دول يا خالة؟
زينب: حق طلعتك معاي.. الجماعة فرطوا يدهم عشية وأعطوني من خير ربنا.
موج (برفض قاطع): له مش هاخد.. أنا معملتش حاجة آخد عليها فلوس غير إني سبتك وجريت!
زينب: امسكي يا بت واسكتي!
موج: مش هاخد منهم حاجة.. انتي تعبتي وده شغلك بعيد عني خالص.
سارت زينب نحو حقيبة موج ووضعت بها المال رغماً عنها، وقالت بنبرة أمومة حازمة:
زينب: قلت نصيبك وساعِدتيني حتى لو بالقليل مش بديكي لا شحاتة ولا منّة.. يلا بقى عشان ننضفوا المكان ونشوفوا اللي ورانا.
أكملتا عملهما في الصالون بهدوء وفي تلك الأثناء.. وفي مكتب شاهين الخاص بأعماله كان يجلس خلف مكتبه يسرح بتفكير شيطاني كعادته يدبر نيراناً جديدة ليوقدها في طريق جلال.
حتى دخل عليه احد الحرس بخطوات مريبة لينقل إليه الخبر:
الحارس: عرفت يا بيه!
التفت شاهين اليه بنظرة حادة ثم سأله ببرود:
شاهين: اه.. اتكلم مين هي؟!
الحارس: طلعت هيا صوح بنت فايز النجار يا بيه!
تبسم شاهين بمكر الأثاعلب وارتسمت على وجهه علامات الخبث والانتصار ثم تساءل:
شاهين: وعرفت كانت بتعمل إيه فالسرايا وليه جلال بيه طلعها بالسرعة دي وشيعها ؟!
الحارس: اللي عرفته إنها جت مع الحُرمة بتاعة التزيين شغالة معاها.. إنما مشت ليه بالظبط مخابرش إنت عارف هي طلعت ويا منعم
ولو سألت منعم عن أي حاجة تخص جلال بيه يدفني مطرحي!
شاهين (بهدوء ومكر): مش مهم.. تقريباً كِده فهمت لحالي روح إنت دلوك لشغلك.
غادر الحارس فوراً من أمامه بينما تنهد شاهين يمسد ذقنه ويحدث نفسه بصوت خفيض وابتسامة خبيثة:
شاهين: له.. ده إنت واقع لشوشتك يا جلال أكيد جو التهريب والخوف ده يا إما خوف مني يا إما خايف أبوي يعرف إنها جت السرايا
للأسف ملحقتش أحقق منها زين وأعرف شكلها إيه وأنت بتهربها كِده.. بس وماله نشيعولها ونشوفوا بنفسنا هي حلوة وتستاهل خوفك ده كله وإلا له؟!
ولو على الجواز منها فده أسهل حاجة.. حتى لو أبوي رافض غصباً عنه هيرضى لما الموضوع يكمل!
