رواية جزيرة غراب الوادي الفصل الثاني عشر
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«بين خطوة نحو الفخ ويدٍ تُمسك بالزمام.. تقف هيا على حافة الخطر»
(قبضة الحماية)
﷽
استيقظ جلال وقت العصر على تعالي أصوات الزغاريد والتهليل المبالغ فيها والتي كانت تملأ أرجاء السرايا بمناسبة نزول العروس.
أغمض عينيه بقوة في مكانه متأففاً من هذه الضوضاء ثم همس بطفش ونفاذ صبر لنفسه:
جلال: على رأي الحريم.. عاوز أطفش ومحدش يعرفلي طريق جِرّة!
لم يستطع إكمال نومه وسط هذا الصخب فجلس على التخت قليلاً يلملم شتات أفكاره وشغفه الشديد. ثم نهض ليتهيأ فأصلح مظهره و جلبابه بمهل.
وما إن فتح باب الغرفة ليخرج حتى واجهته عمته نجاة مبتسمة.
نجاة: جلال نوم العوافي يا ولدي.
أجاب بنبرة هادئة وهو يحاول إخفاء إرهاقه:
جلال: الله يعافيكي.. عامله إيه يا عمتي؟
نجاة: بخير الحمد لله.. انت عامل إيه؟
جلال: زين الحمد لله.
تأملته نجاة بقلق أمومي ثم سألته:
نجاة: طالع؟
جلال: اه.. خير محتاجة حاجة؟
تنهدت نجاة بقلة حيلة وقالت بعتاب رقيق:
نجاة: اه عاوزه أتكلم وياك.. اليامين اللي فاتوا كلهم يا بره يا نايم مش بلحق أشوفك وأقعد وياك واصل!
تراجع جلال خطوة للخلف وفتح باب الغرفة مرة أخرى مدفوعاً بالاحترام نحوها ودلف للداخل بينما دخلت نجاة خلفه وألقت نظرة تفحصية على الأرجاء.
نجاة: صوح.. مقلتليش ليه بتقفل أوضتك بالدبة والمفتاح كِده؟!
أجابها جلال بجمود وهو يحاول تبرير حرصه الزائد على خصوصيته بعد ما فعله شاهين:
جلال: مفيش.. معاوزش حد يدخلها وخلاص.
نجاة: ومين بيدخل غير الخدم يعني؟!
جلال: يعني.. أي حد ليه!
استنكرت نجاة إهماله لترتيب الغرفة وقالت بحدة حنونة:
نجاة: ليه إيه منظر الأوضة تفش لازم تتنضف وتتهوى وتترتب وانت أكيد مش هتعمل حاجة من دي.. جنابك بتيجي تترمي تنام وتطلع تاني!
حاول جلال إنهاء النقاش سريعاً فقال:
جلال: إن شاء الله هخليهم ينضفوها.
لكن نجاة أصرت على موقفها وأردفت بحزم:
نجاة: له اديني مفتاحها ومتخافش أنا هخليهم ينضفوها وأقفلها وأنا واقفة على يدهم.
تنهد جلال وقال بنبرة استسلام:
جلال: ماشي.. المهم قلتي عاوزاني خير؟
قربت نجاة منه وربتت على ذراعه بتودد قائلة:
نجاة: هنعملوا إيه دلوك يا جلال؟
عقد جلال حاجبيه باستغراب وسألها:
جلال: في إيه؟
نظرت إليه نجاة بعينين مليئتين بالرجاء وأكملت:
نجاة: جلال يا ولدي.. انت مش واعي للدنيا حواليك! هتفضل طول اليوم يا بره يا نايم وكل ما أكلمك تقول ربنا يسهل.. أنا عاوزه أفرح بيك وأشوف عوضك!
ابتسم جلال ابتسامة هادئة لتسكين الموضوع والتملص منه:
جلال: حاضر يا عمتي.
أحست نجاة بمراوغته المعتادة فنهرته بعاطفة أموية:
نجاة: بتاخدني على قد عقلي يعني لو "نعيمة" الله يرحمها عايشة كانت هتسيبك كِده؟ كان زمان معاك عيلين دلوك!
صمت جلال احتراماً لذكرى والدته الراحلة ودون أن يجد ما يرد به فواصلت نجاة كلامها بحماس أكبر:
نجاة: انت كبرت وعمرك بيجري.. لازم تفرح وتفرح أخوك هو كمان دلوك يونس لو كلمته هيقول جلال الأول وانت متقدرش تنصحه تقوله اتجوز ما كنت نصحت نفسك!
حاول جلال تهدئة إصرارها المتزايد فقال:
جلال: ماشي.. أنا بس الأيام دي كان عندي شغل كتير وإن شاء الله هنسوفوا الموضوع ده قريب.
نجاة: الشغل مبيخلصش اسمع مني.. أنقيلك بت زينة وتشوفها عجبتك تتجوزها معجبتكش أنقيلك غيرها.. تنين وتلاتة لما يرتاح بالك!
قاطعها جلال بتسرع وقاطعية أذهلتها:
جلال: له.. قصدي اصبري دلوك وأنا هشيعك تخطبيلي.. بس اصبري عليّ شوي.
اتسعت عينا نجاة ببريق الأمل وتساءلت بفضول شديد:
نجاة: ليه طيب؟ هصبر والله ورحمة نعيمة ماهتكلم.. بس فرح قلبي عقلك مال لحد؟ فيه حد في رأسك؟!
نكس جلال رأسه ضاحكاً بخفة متجنباً النظر في عينيها ليخفي ارتباكه فنكشته نجاة بإصرار ومحبة:
نجاة: له انطق يا جلال!
رفع جلال عينيه ونظر إليها ملياً ولم يجد مفراً من حصار أسئلتها ومن أجل أن يريح قلبها الصادق ويهرب من تدقيقها المباشر أجاب بصوت خفيض:
جلال: يعني.. تقدري تقولي اه عشرين في المية كِده!
نجاة: له مفهمش أنا المية والعشرين دي.. اه ولا له؟!
قال جلال بنبرة محتارة:
جلال: يعني.. اه بس لسه مش متأكد واصل.
صفقت نجاة بكفيها بسعادة غامرة وقالت باقتناع:
نجاة: مش مهم أكيد هتتأكد.. امسك فيها بإيديك وأسنانك الجواز لو جه عن حب بيفرق كتير يا ولد أخوي.
حك جلال ذقنه بارتباك وابتسم قائلاً:
جلال: حب مرة واحدة بقولك مش متأكد.. ما علينا!
نجاة: ماشي.. بس متطنش لأني مش هسيبك المرة دي!
جلال: حاضر.
عدلت نجاة شالها وربتت على كتفه بحنان ثم اتجهت نحو الباب وهي تقول بتهكم ساخر:
نجاة: أسيبك تطلع لمصالحك وأطلع أنا بره لفقع المرارة بتاع مرت أبوك والمدلدل وعروسته!
خرج جلال خلف عمته وبعد أن أغلق باب غرفته بحرص ناولها نسخه من المفتاح ثم اتجه بخطواته الشامخة نحو الخارج ليغادر السرايا.
في تلك الأثناء، كانت خضرة تجلس برفقة وليد وعروسته الجديدة. وما إن مر جلال بقربهم حتى ألقى السلام بأسلوبه المقتضب.
استوقفه وليد بنبرة تحمل شائبة من التباهي:
وليد: إزيك يا خوي؟
التفت إليه جلال بنظرة باردة وقال بجفاء:
جلال: مرحب.. ألف مبروك.
وليد (مستعرضاً وهو ينظر لزوجته): الله يبارك فيك.. قومي سلمي على أخوي جلال بيه أكيد سمعتي عنه!
وقفت العروس بخجل وتألق وسارت نحو جلال وهي تبتسم برقة:
رحاب: إزيك؟
جلال: أهلاً.. ألف مبروك.
رحاب: الله يبارك فيك عقبالك.
جلال: تسلمي.
تدخلت خضرة بنبرة صفراء وهي ترمقه بنظرات متفحصة:
خضرة: عقبالك يا جلال!
جلال (بحسم وهو يعطيها ظهره): إن شاء الله.. عن إذنكم.
تركهم وتوجه للخارج دون أي إضافة بينما مال وليد على أذن والدته يهمس بتهكم وضحكة خفيفة:
وليد: شفتي؟ بيحاول يداري غيرته ومش قادر!
خضرة (بابتسامة مسمومة): زي أمه الله يرحمها.. كانت بتموت مني برضه!
تابعوا حديثهم المسموم سوياً.
ــــــــــــــــــ**
بينما في نفس الوقت كانت موج تخرج من مكان عملها عائدة إلى المنزل.
سارت في طريقها نحو أحد المحلات النسائية لتشتري بعض الأغراض البسيطة والرقيقة لأخواتها تأخرت بضع دقائق ثم خرجت مجدداً لتكمل طريقها.
أثناء دخولها في أحد الأزقة الضيقة لاختصار الطريق شعرت بوقع خطوات مريبة خلفها لفتة خاطفة جعلت قلبها يخفق؛ ظنت للحظة أنه ربما يكون جلال يتتبعها!
التفتت دفعة واحدة لكنها فوجئت بحارس غريب لم تره من قبل يرتدي جلباباً داكناً وينظر إليها بجمود.
موج (بحدة وحذر): خير انت مين وماشي وراي ليه؟!
الحارس: انتي موج؟
موج (بدهاء وقلق): له.. اسمي صباح.
الحارس (بتدقيق): متأكدة؟!
موج: مش فاهمة برضه موج ولا له.. عاوز إيه وليه جاي وراي في السكة كِده؟!
الحارس (بهدوء وصرامة): حيلك حيلك.. أنا مرسال من شاهين بيه إن شاء الله الصبح بعد ما تطلعي من داركم وقبل ما تروحي شغلك تاجي على العنوان ده ضروري.
تناول ورقة مطوية وناولها إياها لتلتقطها موج بذهول وعقدة بين حاجبينها.
موج: شاهين بيه غريب.. عاوزني في إيه ده كمان؟!
الحارس: مخابرش.. بكرة تعرفي بنفسك من البيه.
موج (بريبة): وإيه يضمنلي إنك مش بتشتغلني أروح على عمايا مكان معرفوش ليه؟ قول عاوزني في إيه بالظبط!
الحارس: كل اللي أعرفه إنه موضوع يخص شغلك أيام المشغل تقريباً.. وهترجعي تاني لمكانك القديم.
تنهدت موج بغرابة واسترجعت ذكريات المشغل:
موج: المشغل؟ إن شاء الله..
الحارس (بتحذير حازم): بس البيه محذر إنك متقوليش لحد واصل.. ولا حتى جلال بيه الموضوع بسيط دقيقتين وهتمشي أو ترجعي على شغلك عادي.
موج (بحرص وتمنع): جلال بيه؟ طيب اسمع.. أنا شغالة تمام ومستريحة ومش عاوزه أرجع المشغل تاني واصل قول للبيه كِده وكتر خيركم.
اقترب الحارس خطوة وقاطعها بنبرة تهديد خفية:
الحارس: مقدرش أقول للبيه إنك رفضتي تاجي.. ده شاهين بيه بعدين اسمعي الكلام أحسن بدل ما تسيبي شغلك التاني.. ولا حتى المكان ينقفل خالص!
موج (بصدمة وخوف ظهر في عينيها): مكان إيه وليه كل ده؟! وأصحاب المكان مالهم ومال الموضوع ده اصلاً؟
الحارس: عشان كِده بقولك ينفعش متاجيش.. ومره تانية زي ما خبرتك كلمتين وهتمشي على طول.
موج (بقهر مكتوم): إن شاء الله.. حاجة تاني؟!
الحارس: له.. كِده تمام.
تركها الحارس واقفة مكانها والتفت مغادراً بخطوات سريعة بينما وقفت موج في منتصف الزقاق تتأمل الورقة بين يديها باستغراب شديد.
تمتمت بغيظ وقلق على زينب:
موج: يقفلوا المكان يامري.. والخالة زينب ذنبها إيه في ده كله إيه الناس دي التي تفتري على خلق الله؟!
التفتت وأكملت طريقها بخطوات بطيئة لكن عقلها كان يعصف بالأفكار والدهشة؛ كيف أصبحت حياتها فجأة ساحة لتقاطع طُرق آل جهدان ولماذا يتمحور كل شيء بخصائصهم حولها هي بالذات؟!
ــــــــــــــــــــــــــــــــــــــــــ**
في المساء كان جلال في جولاته المعتادة برفقة هاني يتفقدان الأوضاع وبعد جولة طويلة عادا إلى مقرهما وجلسا سوياً تحت نسمات الليل العليلة.
قام هاني ليتحرك نحو الحرس ويطلب بعض الشاي بينما بقي جلال جالساً بمفرده وعقله يطنّ بحديث عمته نجاة عن الزواج.
أخذ يتساءل في سريرة نفسه: ماذا يفعل إن سبب تأخره في هذه الخطوة هو عدم ارتياده أو ارتياحه لما يدور داخل منزل عائلته؛ فهو بذاته يواجه مشاكل لا حصر لها معهم
فكيف يأتي بزوجه ويتركها طيلة اليوم وسط هذا الجو المسموم ماذا يمكن أن يفعلوا بها في غيابه؟!
لكن في المقابل هذا هو واقعه وهذه عائلته ولا مفر منها؛ فهل سيكمل حياته هكذا وحيداً بالطبع لا يمكن.. حتى أخوه "يونس" يحق له الزواج والعيش بسلام.
وبين كل تلك الأفكار المتلاطمة لم يخطر بباله سوى صورة شخص واحد فقط.. تلك الفتاة المتمردة هو لم يعر أي امرأة اهتماماً طوال حياته فلماذا هي بالذات تأخذ كل تفكيره واهتمامه هكذا؟!
وصل هاني يحمل أكواب الشاي الساخنة وجلس بجواره ثم ألقى عليه نظرة تفحصية وقال:
هاني: بتشرد كتير الأيام دي يا جلال بيه.. فيه حاجة مضايقاك قولي يمكن تخفف عن نفسك.
نظر له جلال بسخرية وجفاف:
جلال: فكرك فيه حاجة واحدة في العيشة دي متضايقش؟!
هاني: صوح.. لو على أي حاجة بتحصل وشغلك وشاهين بيه فمعاك حق بس ده الطبيعي بتاع كل يوم!
جلال: اه الطبيعي.. ده لو محصلش يبقى شاهين عقله خف ولا جرى له حاجة بقولك إيه يا هاني..
هاني: قول سامعك.
جلال: يعني تقدر تقول دلوك أغلب خطوات شاهين في الجزيرة بعرفها بس بره الجزيرة ومشاويره الغريبة مش بهتم بيها كتير.
هاني: يعني إيه؟ مش فاهم قصدك إيه بالظبط.
جلال: شاهين أخوي.. بس شيطان ومفيش خلاف على كِده شوفلي واحد من الحرس أي حد يكون اشتغل جديد معانا ومش معروف هنا في نواحينا.. يعني من حراسة الطاحونة ولا الأماكن البعيدة وخليه يراقبه خطوة بخطوة.
هاني (بدهشة): يراقب شاهين بيه ليه بس؟!
جلال: يعني يمكن أمسك عليه حاجة أدوس عليه بيها أو على الأقل يبقى تحت ضرسي عشان لو فكر يعمل حاجة كِده ولا كِده ألاقي نقطة ضعف أكسره بيها!
هاني: دي مش مشكلة وسهلة.. بس أنت خابر شاهين بيه مش هين واصل ولو مسك الواد اللي بيراقبه أو شك فيه لحظة.. ما علينا منك أنت الواد هيترمي في الشارع أو يروح فيها!
جلال: عشان كِده بقولك شوف حد مش معروف وتكون دماغه صاحية ويسلك .
هاني: ماشي.. هشوفلك حد وربنا يستر.
ــــــــــــــــــــــــــــــ**
في تلك الأثناء وفي منزل فايز النجار.
فرِحن أخوات موج بالأغراض كثيراً وأخذت كل منهما تختار ما يناسبها بحماس وسعادة.
ليلى (بابتسامة متسعة): مرسي يا موج بس بعزقتي قرشينك!
فرح: مرسي..والله عال يا بنت أبو مسمار!
ضحكت خلود وقالت معاتبة بمزاح:
خلود: أبو مسمار لو سمعك هيدقّه في رأسك!
فرح: له أبوي حبيبي.. أنا بس بفكّرها!
أخذت الفتاتان الأغراض وخرجتا تتضاحكان بينما التفتت خلود نحو موج وقالت:
خلود: بس فعلا بعزقتي والصرف باين.. خير؟ من مِيتى ده كله.
موج: لا كده عاجب ولا كده عاجب المهم عجبوكم ولا له؟
خلود: عسل تعيشي وتجيبي يا رب.. إيه رأيك؟
رفعت خلود يدها تستعرض أسيورة رقيقة كانت قد أحضرتها اللتي أحضرتها موج وقالت بغنج ومزاح:
خلود: هتاكل من يدي حتة!
موج: مبروكة عليكِ.
أمسكت خلود بيد موج فجأة وسألتها باستغراب وهي تتفحص معصمها:
خلود: صوح.. فين بتاعتك مش في يدك ليه؟
وضعت موج يدها الأخرى على معصمها باستغراب وذهول:
موج: صوح راحت فين؟!
خلود: يمكن خلعتيها وأنتي شغالّة ؟
موج (بحرقة وضيق): له مش بخلعها واصل.. يا خسارة ضاعت!
خلود: فداكي هاتي غيرها واشتري وحدة جديدة.
موج (بحزن ظاهر): له معوزاش غيرها.. دي هدية من دميانة وعاملتها بيدها!
خلود: طيب ابقي اسألي أمك الصبح يمكن تكون كنسَتها ولا لقتها في الدار هنا ولا هناك.
موج: يا ريت.. هبقى أسألها.
تركتها خلود لتغفو بينما
كانت موج في حالة قلق وتوتر غير طبيعي بسبب طلب شاهين لمقابلتها.
كانت تمسك هاتفها كل بضع دقائق وتفتح على رقم جلال لتخبره لكنها تتراجع في آخر لحظة عندما تتذكر تحذير الحارس الصارم بعدم إبلاغه.
ظلت طوال الوقت والهم يأكل قلبها إن كان شاهين يريد مجرد عودتها للمشغل فالأمر بسيط وكان بإمكان الحارس إبلاغها فلماذا يطلب شاهين بيه مقابلتها شخصياً وحركات الحارس وتتبعه لها في الزقاق لم تكن طبيعية بالمرة.
ظلت جالسة على فراشها تهز قدمها بتوتر شديد وتحدث نفسها:
موج: عاوزين مني إيه بس؟ لو شغل كانوا قالوا ارجعي وخلاص.. وكمان إيه اللي يخلي جلال بيه يجيب رقمي قبله ويستناني مخصوص.. وقبل كِده نبه عليّ إني لو حد بعتلي أي حاجة أخبره!.. ده غير لما عرف إني في السرايا هربني بسرعة وقبل ما حد يشوفني هناك.. كل ده ليه؟
ثم استرجعت كلام زينب الساخط عن شاهين وسمعته السيئة بين النساء فشهقت برعب:
موج: وكلام الخالة زينب عن شاهين ده غير سمعته اللي على كل لسان.. يا رب اعمل إيه بس أكلم جلال وأخاطر.. ولا أخوه يقفل باب رزق الخالة زينب ويخرب بيتها؟!
مرت ساعات طويلة من الليل وموج تنقل نظراتها بين جدران الغرفة عاجزة عن النوم تماماً. وفي النهاية حسمت أمرها وقالت بقناعة:
موج: هو رئيس الحرس والمسؤول عن الجزيرة دي كلها.. هقوله ولو أخوه عمل حاجة للخالة زينب يبقى واجب عليه يحميها وما يقطعش عيشها!
أمسكت الهاتف بأصابع المرتجفة فتحت قائمة الأرقام وجلبت رقم جلال.. ثم ضغطت على زر الاتصال بجسد يرتجف رعباً وانتظرت الرد!
ـــ**
كان هاني لا يزال يجلس مع جلال في ذلك الوقت الممتد من الليل؛ إذ كان لديهما بعض الأعمال والترتيبات الخاصة بالحراسة التي تتطلب السهر لوقت متأخر.
وفجأة شق صمت الجلسة صوت نغمة هاتف جلال. أخرج جلال الهاتف من جيب جلبابه ونظر إلى الشاشة بتمهل وما إن رأى اسمها يزين الشاشة حتى لمعت عيناه بابتسامة دافئة وارتياح خفي لم يظهر منه أي ردة فعل أخرى أمام هاني.
لكن وجود هاني الجالس بجواره جعله يفكر ملياً ويتراجع عن الرد كي لا يثير شكوكه؛ فأخفض صوت نغمة الهاتف بهدوء وأعاده إلى جيبه مرة أخرى.
وبعد دقائق معدودة من انقطاع الاتصال الأول اهتز الهاتف مجدداً معلناً عن رنين ثانٍ من نفس الرقم مد جلال يده بمهارة وأحاله فوراً إلى الوضع الصامت منتظراً الفرصة المناسبة للانفراد بنفسه والرد عليها دون مضايقة.
لاحظ هاني تكرار الاتصالات وانشغال جلال بالهاتف فسأله بفضول عفوي:
هاني: خير يا جلال.. مين اللي بيرن في الوقت ده؟!
جلال (بنبرة هادئة ومتزنة ليصرف انتباهه): مفيش.. ده يونس.
هاني (بدهشة): طيب وليه مش بترد عليه؟!
جلال: ماليش دماغ ليونس دلوك.. هيقعد يسألني أنت فين وليه تأخرت.
هاني: وافرض تسأل عادي بيقلق عليك مش أكتر.
جلال: هكلمه بعدين لما أفضى.. دلوك هايسكت وينام وخلاص.
أومأ هاني برأسه واقتنع بالإجابة ليكملا جلستهما وأعمالهما بينما كان هاتف جلال يستقبل المحاولات في صمت.
ــــــــــــــ**
في الناحية الأخرى وفي غرفتها المظلمة كانت موج تمسك بالهاتف بقلب يخفق بشدة وكانت قد اتصلت أربعة اتصالات متتالية دون جدوى أو رد يذكر من جلال!
تنهدت موج بنفاذ صبر وقلق شديد ثم ألقت الهاتف بجوارها على الفراش وقالت بغيظ:
موج: ففففف خبريني.. قال خبريني واهه مش سال اصلاً ولا بيرد!
صمتت قليلاً تتأمل شاشة الهاتف المظلمة ثم تمتمت بنبرة استسلام ورجاء:
موج: يمكن دي إشارة من ربنا إني مقولوش عشان الخالة زينب وشغلها وميجرالهاش حاجة بسبب الموضوع ده.. كِده أنا عملت اللي عليّ وزيادة والباقي ربنا يفك ضيقته ويحله من عنده إن شاء الله!
ظلت موج مستيقظة لبعض الوقت وعيناها معلقتان بالهاتف على أمل أن يعاود الاتصال بها لكنه لم يتصل؛ حتى غلبتها شدة التعب والنعاس فغفت غصباً عنها وهي تحتضن قلقها لموعد الصباح.
ــــــــــــــــــــــ**
اندمج جلال في العمل حتى نسي أمر الاتصال تماماً تحت وطأة الضغط والإرهاق المتراكم.. ومع بزوغ أول خيوط الفجر كان النعاس قد أثقل عينيه وغلبه التعب الشديد
فعاد إلى المنزل مع أول ضوء للصباح ليلقي بجسده المنهك ويستريح أخيراً من ليل طويل ومجهد.
ــــــــــــــــــــــ**
في صباح اليوم التالي وعلى مائدة الإفطار وقبل خروج غنام ليشارك العائلة فطورهم كان شاهين يجلس منتظراً.
في تلك الأثناء أتت إليه وعد بخطوات حادة وجلست بجواره وعيناها تشتعلان غضباً.
وعد: صباح الخير.
التفت إليها شاهين وألقى عليها نظرة باردة وقال:
شاهين: مباينش صباح النور.
عقدت وعد ذراعيها وهي ترمقه بنظرات حادة وقالت مستنكرة:
وعد: أنا عاوزه اعرف إيه بقى اللي طلعتلي فيه جديد ده؟!
شاهين (ببرود): وإيه الجديد؟
وعد: يعني إيه كل كام يوم تبيت لحالك تحت لا عندي ولا عند كريمة!
شاهين: ترويق دماغ.. عندك مانع؟
ارتفع صوت وعد بنبرة مشحونة بالنكد:
وعد: عندي ونص مش كفاية أغلب أيامك بتيجينا وش الفجر؟ له.. وكمان هتبيت لحالك!
شاهين (بابتسامة تهكمية): فتشي في نفسك.. يمكن طفشان مثلاً!
وعد: والله وإحنا لما نطفش منك ومن عمايلك نروحوا فين يعني؟!
اعتدل شاهين في جلسته ببطء ومد يده فأمسك ذراع وعد وقبض عليه بقوة جعلتها تتأوه خفية ثم قال بنبرة تحذيرية خفيضة:
شاهين: إوعاكي تنسي نفسك قدامي أعمل اللي يعجبني ويلِد علي وانتِ تكتمي زيك زي كريمة!
اتسعت عينا وعد بشك وقالت:
وعد: إيه.. بتفكر في حد جديد؟!
شاهين: اه ارتحتي وهتجوز وانتِ عارفاني وعارفة طبعي من قبل ما أتجوزك.. انتبهي لنفسك ولولدك يا وعد أنا مش بزعلك.. فمتخربيش على روحك!
ضحكت وعد بتهكم ومرارة:
وعد: مش بتزعلني اسم الله يا قلبي!
رخى شاهين قبضته عن ذراعها ومسح على وجهه بقلة صبر قائلاً:
شاهين: بنام لحالي عشان عندي شغل اليامين دول في تجارة وموسم.. ولما بطلعلك بتنكدي عليّ
ولما بطلع لكريمة بنكد عليها بريحكم مني.. ولما أخلص الشغل اللي فوق كتافي حاضر.. هعملك اللي عاوزاه.
وقبل أن تنطق وعد بحرف آخر تعالت أصوات الخطوات وتباشير خروج باقي أهل السرايا لتناول الفطور؛ فصمتت غصباً عنها وابتلعت غيظها بضيق شديد.
جلس غنام على رأس المائدة وسأل بحدة:
غنام: وليد فين؟
ردت خضرة بنبرة يملؤها الفخر والدلال:
خضرة: وه مالك بوليد؟ عريس متهني بعروسته يصحي وقت ما يحب هو وهيا!
تبسم غنام بسخرية ثم قال:
غنام: وجلال فين؟
خضرة (بنبرة مسمومة): سيادة البيه نايم ومرتاح!
تدخلت نجاة بقوة:
نجاة: جلال رجع الصبح طبيعي يرتاح.. عاوزه منه إيه؟!
غنام (بسخرية): ياجي يفطر ويطلع يشتغل ما هو حمار مبيحسش ومبيشقاش.. إنما دلوعة أمه اللي نايم زي خيبتها يدلع مع مرته!
خضرة (بصدمة مصطنعة): خيبتها يا مري أنت عاوز وليد يشتغل من تالت يوم جواز؟!
غنام: مقولتش يشتغل.. خليه نايم!
صمت الجميع وأكملوا فطورهم بصمت مطبق وبعد الانتهاء غادر شاهين بسرعة وتهرب قبل أن تكمل وعد حديثها وثرثرتها.
ـــــــــــــــــــــــــ**
مرّ الوقت حتى تهيأت موج في وقت مبكر قليلاً وعزمت أمرها وأخذت العنوان وتوجهت إليه وهي تردد في سرها دعوات خائفة بأن يمر هذا الأمر على خير وبسلام.
ـــ**
في الناحية الأخرى كان شاهين قد وصل منذ فترة وأنها بعض أعماله السريعة ثم جلس يمسك أرجيلته ينفث دخانها متأففاً وهو ينتظر حتى بدأ ينتابه الملل من الانتظار.
أخرج هاتفه واتصل بالحارس الذي كلفه بمراقبتها وإعطائها العنوان.
رد الحارس فوراً:
الحارس: أيوه يا شاهين بيه.
شاهين ( بضيق ونفاذ صبر): أيوه إيه.. إيه الأخبار؟ مش قلت إنها بتروح شغلها قبل الساعة عشرة والمفروض تبكّر وتاجي هنا الأول فينها؟!
الحارس: طلعت يا بيه دلوك من بيتهم.
شاهين: اه.. وجاية ناحية العنوان ولا رايحة على شغلها عادي؟
الحارس: له.. مش طريق الشغل جاية في سكة العنوان يا بيه.
شاهين: زين.. سلام.
أغلق شاهين الهاتف
صاح شاهين بنبرة حادة وصوت جهوري متسلط في الحارس الجالس خارج مكتبه فدلف إليه الرجل مسرعاً.
الحارس: نعم يا شاهين بيه أمرك؟
شاهين (بحزم وصرامة وهو ينفث دخان أرجيلته): اسمع.. فيه بت هتاجي دلوك تبعي عشان شغل.. تدخّلها عليّ على طول أول ما توصل وإياك حد منكم يضايقها ولا ينطق معاها كلمة!
الحارس: حاضر يا بيه.. أوامرك.
عدل شاهين جلسة جلبابه وأردف بنبرة تحذيرية حاسمة:
شاهين: ولما تدخل.. تفضل واقف بره كيف الصنم! إياك حد يفوت بعدها شغل ولا غير شغل لما هي تطلع الول.. اللي عاوز ياجي ياجي بعدين!
الحارس: مفهوم يا شاهين بيه.
انصرف الحارس ليقف بالخارج منتظراً بينما اتسعت ابتسامة شاهين الخبيثة والمتهكمة ثم قال لنفسه بنبرة تشفٍّ:
شاهين: له.. مش مسيطر يا جلال على الحتة بتاعتك! جاية من وراك أهه.. معقول شاهين جهدان اللي البنات بتتمنى يقلّب فيهم ويأشرلهم مستني بت النجار والفضول قاتله كِده؟
مش مهم.. حلوة ولا وحشة خلاص هاتجوزها نكاية في جلال مش قادر أتخيل شكله حتى وهي في حضني قدامه وساعتها هايغلط ويثور وكل ماغلط قدام أبوي أكتر ينزاح من طريقي أكتر !
ظل شاهين جالساً في انتظار وصول موج بثقة وغرور بينما كانت هي مع كل خطوة تقترب بها من المكان تزداد نبضات قلبها رعباً وتوتراً وكأنها تسير نحو الفخ بقدميها.
ــــــــــــــــــ**
بعد وقت وصلت موج إلى المكان؛ وكان عبارة عن ساحة كبيرة تضج بحركة العمال وأصوات الحرس
دلفت من بوابة حديدية ضخمة مفتوحة على مصراعيها وهي تتلفت حولها بوجل وضربات قلبها تتسارع بقوة وكأنها تُسمع لمن حولها.
اقتربت بجهد وتردد من أحد الحراس الواقفين وقالت بنبرة خائفة:
موج: مكتب شاهين بيه فين؟!
وفجأة أتى من خلفها ذلك الحارس ذاته الذي قابلها بالأمس وأعطاها الورقة بالعنوان وقال بنبرة جافة:
الحارس: مرحب.. تعالي من هنا!
فزعت موج من صوته المفاجئ خلفها ونظرت إليه بغرابة وهي على يقين تام وأكيد أنه كان يسير خلفها ويتبع خطواتها منذ أن خرجت من بيتها وحتى وصلت إلى هذا المكان.
التفت إليها الحارس بعد بضع خطوات وقال بقلة صبر:
الحارس: همّي.. البيه وراه مصالح ومش فاضي!
أومأت برأسها بصمت وسارت خلفه بخطوات مرتجفة حتى وصلت إلى أمام باب المكتب. دلف الحارس أولاً ليستأذن ثم خرج بعد لحظات وقال:
الحارس: ادخلي..
تقدمت موج خطوة نحو الداخل وقبل أن تكمل خطواتها الثانية لتلتقط أنفاسها ألمت بذراعها قبضة قوية وصارمة من الخلف لتوقفها بقوة في مكانها قبل دخولها إلى الغرفة!
