رواية عروس البحر الفصل الحادي عشر 11 بقلم نون لاشين

الشهر الرابع في برلين.

الشتا بقى أقسى. الثلج نزل لأول مرة وغطى الشوارع كلها.

ملك كانت قاعدة على الكنبة لفة نفسها في بطانية وبتشرب شاي بالزنجبيل. بطنها بدأت تظهر بوضوح.. الفساتين الواسعة بقت تضيق عليها.

الغثيان خف شوية.. بس مكانه جه وجع الضهر والتعب المستمر.

زياد دخل الشقة وهو مغطي بالثلج.

زياد بصرخة: "يا نهار أبيض! برلين دي مش مدينة.. دي فريزر! أنا نزلت أجيب خبز رجعت متلج زي السمكة!"

ملك بضحكة: "زياد.. إنت لسه مش متعود على الشتا بعد أربع شهور؟"

زياد وهو بينفض الثلج من الجاكيت: "متعود إيه يا ملك؟! أنا ابن إسكندرية.. أقصى برد عندنا لما المروحة تشتغل بالغلط في الشتا."

آدم طلع من أوضة إلين ووشه مكشر.

زياد حس فوراً: "إيه؟ إلين عاملة إيه؟"

آدم بصوت واطي: "الكيماوي النهاردة كان تقيل عليها.. وحرارتها طلعت."

ملك قامت بسرعة: "الدكتور شولتز قال إيه؟"

آدم: "قال ده طبيعي في المرحلة دي.. الجسم بيحارب.. بس لازم نراقبها الليلة."

زياد حط إيده على كتف آدم: "أنا هسهر معاها الليلة.. إنت نام.. إنت مش بتنام كويس من أسبوع."

آدم: "لا يا زياد.. أنا.."

زياد : "آدم... أنا بقولك.. نام.. الخال الأسطوري هيسهر مع خالته."

بالليل.

زياد كان قاعد جنب سرير إلين بيقرا لها مجلة.

إلين بالطاقية القطنية.. ووشها شاحب .

إلين بصوت ضعيف: "زياد.. إنت لسه صاحي؟"

زياد بابتسامة: "طبعاً.. أنا بشتغل شيفت الليل.. الخال الأسطوري 24 ساعة."

إلين ضحكت : "إنت ولد طيب يا زياد.. آدم محظوظ بيك."

زياد: "أنا اللى محظوظ .. آدم ده أخويا.. وإنتي بقتي زي أمي."

إلين سكتت لحظة وبعدين قالت 

إلين: "زياد.. أنا خايفة."

زياد بقلق: "من إيه ؟ الدكتور قال إن استجابتك ممتازة."

إلين: "أنا مش خايفة من المرض.. أنا خايفة من اليوم اللي آدم هيكون فيه لوحده تاني.. لو أنا مشيت."

زياد بدموع : .. متقوليش كده.. إنتي هتعيشي."

إلين: "أنا واقعية يا زياد.. السرطان مش لعبة.. وأنا عايزة أطلب منك طلب."

زياد: "اومرك."

إلين: "لو حصل أي حاجة ليا.. خليك جنب آدم.. هو هيكون قوي قدام الناس.. بس بالليل هيكون مكسور.. متسيبهوش."

زياد عيط بصوت عالي.

زياد: "يا الين.. إنتي مش هتموتي..  وبوعدك.. هفضل جنب آدم لحد ما نموت كلنا."

إلين ابتسمت ومدت إيدها الضعيفة ومسكت إيد زياد.

إلين: "شكراً يا حبيبي."

في الأوضة التانية.

آدم كان نايم جنب ملك.. إيده على بطنها.

ملك صحيت فجأة على وجع في ضهرها.

حاولت تتحرك بهدوء عشان ما تصحّيش آدم.. بس الوجع كان قوي.

آدم فتح عينه فوراً.

آدم بقلق: "إيه؟ في إيه؟ ؟"

ملك بابتسامة ضعيفة: ".. وجع ضهر بس.. عادي."

آدم قام بسرعة: "عادي إيه؟! من إمتى وجع الضهر عادي؟"

ملك: "آدم.. أنا في الشهر الرابع.. وجع الضهر طبيعي.. الدكتور قال كده."

آدم قعد وراها وبدأ يدلك ضهرها برفق.

آدم : "قولي لو الوجع زاد.. أنا هجبلك دكتور."

ملك حست بدفا إيده على ضهرها والوجع بدأ يخف.

ملك: " بقيت أحسن بكتير.. شكراً يا حبيبي."

آدم باس كتفها: "متشكرينيش.. 

ملك دارت ناحيته وبصت ليه.

الشهر الرابع غيرها.. بطنها بقت واضحة.. وشها اتغير.. 

آدم بص ليها بإعجاب.

آدم : "إنتي بقيتى حلوة أوي يا ملك."

ملك بضحكة: "حلوة إيه؟! أنا بقت زي البطيخة.. بطني كبرت وعيوني ورمت ووشي بقى دايره"

آدم مسك وشها بإيديه: "إنتي أجمل من أول يوم شوفتك فيه.. الحمل مخليكي أحلى."

ملك : "بتقول كده عشان تراضيني."

آدم بسها بوسة طويلة: "بقول عشان دى الحقيقة."

إيده نزلت على بطنها .

آدم: "البيبي شكله نام 😂؟"

ملك بابتسامة: "آه..  بس قبل ما ينام كان بيتحرك كتير.. ركلني ركلة قوية."

آدم بفرحة: "بجد؟ أنا ما حسّتش!"

ملك: "لأنك كنت نايم.. إنت بتنام زي الفيل."

آدم بضحكة: "أنا تعبان اليومين دول يا ملك.. مش بنام كويس."

ملك حطت إيدها على وشه: "أنا عارفة يا حبيبي.. إنت بتتعب نفسك أوي.. عايزاك ترتاح."

آدم حط وشه على بطنها.

آدم : "يا حبيبي .. ماما بتقول إنك ركلتها.. ليه بتتعب ماما كده؟ اهدي شوية عشان ماما ترتاح."

ملك ضحكت وحطت إيدها على شعره.

آدم رفع وشه وبص ليها 

آدم : "ملك.. أنا بحبك."

ملك : "أنا كمان."

آدم بسها 

آدم لف البطانية حواليهم الاتنين.

آدم همس: "كده أدفى؟"

ملك بابتسامة: "اه."

آدم بدأ يقبلها .. على رقبتها.. على كتفها.. كل بوسة فيها حنان وتعب وشوق.

إيده مسكت إيدها وحطها على قلبه.

آدم : " ده بينبض بيكي.. حتى وأنا تعبان.. حتى وأنا خايف.. قلبي بينبض بيكي."

ملك: "بحبك يا آدم.. بحبك في كل لحظة.. حتى في أصعب اللحظات."

آدم ضمها بقوة.. 

صباح اليوم التاني.

آدم كان  بيكلم المحامي في القاهره 

المحامي: "يا أستاذ آدم.. جلسة المحاكمة اتحدد لها يوم 15 الشهر الجاي.. يعني بعد تلات أسابيع."

آدم: "تمام.. وإيه آخر التطورات؟"

المحامي: "سعاد اعترفت بكل حاجة.. اعترفت بالتزوير.. واعترفت بمحاولة تسميم ست الحسن.. واعترفت إنها كانت بتاخد فلوس من رشدي عشان تعمل كل ده."

آدم : "ورشدي؟"

المحامي: "رشدي اعترف 

وقال إنه خطط للموضوع كله 

المحامي: ".. وقال حاجة تانية مهمة.. قال إن سعاد  كانت بتكره أختها ليلى من وهي صغيرة.. ولما ليلى ماتت في الحريق.. سعاد حسّت بالفرح ونفذت الخطه

آدم : "يعني.. يعني الحريق ده.. كان طبيعي ...ولا؟"

المحامي سكت لحظة.

المحامي: "التحقيقات لسه شغالة على النقطة دي يا أستاذ آدم.. في احتمال إن الحريق ما كانش حادث."

آدم بصدمة: "يعني سعاد ممكن تكون هي اللي عملت الحريق؟"

المحامي: "مفيش دليل قاطع لحد دلوقتي.. بس رشدي لمح إن سعاد كانت موجودة في البيت ليلة الحريق.. والنيابة بتحقق في الموضوع."

آدم قفل الموبايل وهو مش قادر يتنفس.

ملك دخلت وشافته واقف متجمد.

ملك بقلق: "آدم.. في إيه؟"

آدم بص لها.. ومش عارف يقولها.

إزاي يقول لمراته الحامل إن خالتها ممكن تكون هي اللي قتلت أمها؟

آدم : "ملك.. اقعدي."

ملك قعدت بخوف: "بتخوفني.. في إيه؟"

آدم قعد قدامها ومسك إيدها.

آدم: "المحامي قال إن التحقيقات بتشير إن الحريق اللي ماتت فيه أمك.. ممكن ما كانش حادث."

ملك وشها أصفر.

ملك : "يعني إيه؟"

آدم: "يعني.. في احتمال إن سعاد السبب لانها كانت موجودة في البيت ليلة الحريق.. والنيابة بتحقق."

ملك سكتت.. عيونها وسعت.. وبعدين فجأة بدأت تعيط بصوت عالي.

ملك بانهيار: "يعني سعاد قتلت أمي؟! يعني الست دى هي اللي قتلت أمي الحقيقية؟! يعني أنا عشت عشرين سنة مفكره ان القاتلة هى امى؟!"

آدم ضمها بقوة.

آدم بدموع: "ملك.. لسه مفيش دليل قاطع.. التحقيقات لسه شغالة.."

ملك بصرخة : "أنا حاسة إني هجنن يا آدم.. حاسة إن كل حياتي كدبة.. حاسة إني مش عارفة مين أنا!"

آدم : "إنتي ملك.. إنتي مراتي.. إنتي أم ابني.. ومهما حصل.. إنتي مش لوحدك."

ملك فضلت تعيط في حضنه لفترة طويلة.

آدم ..  حضنها.

بعد ما هديت.

ملك كانت قاعدة بتبص على بطنها.

ملك : "آدم.. أنا خايفة على البيبي.. الغثيان رجع تاني واضح  من التوتر."

آدم بقلق: "عايزة نروح للدكتور؟"

ملك: "لأ.. هتحسن.. بس عايزة أسمع صوته.. عايزة أتأكد إنه كويس."

آدم مسك موبايله وحجز موعد عند الدكتور .

.........

في عيادة الدكتور.

الدكتور عمل سونار لملك.

الدكتور بابتسامة: "مبروك.. البيبي بصحة ممتازة.. وده أول مرة هتشوفوه بوضوح."

آدم وملك بصوا على الشاشة.

صورة صغيرة.. طفل صغير بيلف حوالين نفسه في بطن أمه.

آدم دموعه نزلت.

آدم بصوت بيرتعش: "ده.. ده ابني؟"

الدكتور بضحكة: "آه.. ده ابنك.. وشوف.. ده قلبه بينبض."

صوت نبضات قلب صغيرة ملأت الأوضة.

ملك عيطت.

آدم عيط.

آدم مسك إيد ملك وضغط عليها.

آدم : "ملك.. ده أحلى صوت سمعته في حياتي."

ملك بدموع: "وأنا كمان يا آدم."

الدكتور: "البيبي ولد.. مبروك.".

آدم بفرحه: "ولد؟!"

الدكتور بابتسامة: "آه.. ولد."

آدم عيط بصوت عالي في العيادة.

آدم: "ملك.. عندي ولد.. أنا هبقى أب لولد!"

ملك ضحكت من وسط دموعها.

آدم باس بطنها: "يا حبيبي .. بابا مستنيك.. هسميك سالم.. ."

ملك  "سالم.. حلو يا آدم."

في الشقة بالليل.

الكل كان قاعد 

آدم أعلن الخبر.

آدم بفرحة: "البيبي ولد.. وهنسميه سالم."

زياد نط من الكرسي.

زياد بصرخة: "ولد؟! أنا هبقى خال لولد! هعلمه كورة! هعلمه يلعب بلايستيشن! هعلمه يعمل ساندوتش فول!"

إلين بدموع فرحة: "سالم.. على اسم أبوك يا آدم؟"

آدم بابتسامة: "آه يا ماما.. عشان اسمه يعيش."

إلين عيطت: "أبوك كان هيكون فخور بيك يا حبيبي.. وفخور بحفيده."

ست الحسن كلمتهم فيديوكول .

ست الحسن بدموع: "سالم.. ما شاء الله.. ربنا يخليه ليكم يا حبايبي."

ملك بابتسامة: "إنتي عاملة إيه يا ستي؟"

ست الحسن: "الحمد لله يا حبيبتي.. الدكاترة قالوا إن ..أنا بتحسن كل يوم."

ملك: "وحشتيني يا ستي."

ست الحسن: "وإنتي كمان يا حبيبتي.. بس متقلقيش.. أنا هعيش عشان أشوف سالم."

بعد ما قفلوا المكالمة.

آدم قعد جنب ملك 

آدم : "ملك.. 

ملك: "إيه؟"

آدم: "المحاكمة بعد تلات أسابيع.. وأنا مش هقدر أسافر القاهرة.. بس المحامي قال إن شهادتك مهمة."

ملك بتوتر: "يعني لازم أروح؟"

آدم: "مش لازم.. ممكن تشهدي عن طريق الفيديو.. بس المحامي قال إن حضورك شخصياً هيكون أقوى."

ملك سكتت تفكر.

ملك : "أنا هروح."

آدم بقلق: "ملك.. إنتي حامل.. السفر هيكون متعب."

ملك : "آدم.. الست دي ممكن تكون قتلت أمي.. وأنا عايزة أقف قدامها في المحكمة وأبص في عينها.. عايزاها تشوفني وأنا قوية.. 

وانتقم لامي

آدم: "إنتي أقوى ست في الدنيا."

ملك بابتسامة: "لأن عندي راجل قوي جنبي."

آدم : "هسافر معاكي.. مش هسيبيكي تروحي لوحدك."

ملك: "وإلين؟"

آدم: "زياد هيفضل معاها.. وست الحسن هتيجي تقعد معاها ."

زياد سمع الكلام من المطبخ.

زياد بصرخة: "أنا هقعد مع إلين؟! يعني أنا الممرض بتاعها؟"

آدم بضحك: "أنت الخال الأسطوري.. الخال بيعمل كل حاجة."

زياد بجدية: "طب أنا موافق.. بس بشرط."

آدم: "إيه؟"

زياد: "لما البيبي يتولد.. أنا اللي هسمّيه."

آدم بصله: "لأ."

زياد: "طب نسميه زياد سالم؟"

آدم: "لأ."

زياد: "طب نسميه ساندوتش سالم؟"

آدم قام من الكرسي.

زياد بسرعة: "خلاص خلاص.. سالم بس.. أنا كنت بهزر.

بالليل.

آدم وملك كانو في السرير.

الثلج كان بينزل بره والشباك مغطي بالجليد.

ملك كانت نايمة على جنبها وآدم حاضنها ..

آدم همس: "ملك.. إنتي صاحية؟"

ملك بصوت نعسان: "آه.. لسه."

آدم: "أنا فخور بيكي.. فخور إنك هتوقفي في المحكمة.... فخور إنك مراتي.. فخور إنك أم ابني."

ملك : "وأنا فخورة بيك يا آدم.. .. فخور إنك بتعتني بماما.. فخورة إنك بتحبني بجد."

آدم مسك وشها بإيديه.

آدم  "ملك.. أنا عايز الليلة دي... عايز أنسى كل التعب وكل الخوف..

ملك: "أنا كمان عايزاك يا آدم.".

آدم همس: "هكون حريص.. أوعدك. 😍"

ملك ابتسمت: "أنا بثق فيك 😂."

.

الجو كان بارد 

بس دفا الحب الحقيقي.. اللي اتولد من الوجع.. وكبر بالصبر.. وعاش بالأمل.

.........

صباح اليوم التاني.

زياد دخل  وهو بيجري.

زياد بصرخة: "آدم! آدم! في خبر مهم

آدم بقلق: "إيه؟!"

زياد بفرحة: "ست الحسن هتوصل ! هتقعد مع إلين هنا في برلين من بكرة!"

آدم بدهشة: "بجد

زياد: "آه! قالت إنها عايزة تشوف إلين وتطمئن عليها قبل ما تسافروا أنتوا للمحاكمة."

ملك جريت من الأوضة: "ستي جاية هنا؟!"

زياد بابتسامة: "آه! وهتقعد معانا !"

ملك عيطت من الفرحة.

آدم حضنها.

آدم بابتسامة: "كل حاجة بتترتب يا ملك.. كل حاجة."

.........

الفصل الثاني عشر من هنا