رواية عروس البحر الفصل الثاني عشر 12 بقلم نون لاشين

في شقة برلين......الباب اتفتح ودخل زياد وهو شايل شنطتين كبار وبينهج، وراه ست الحسن داخلة على رجليها وبصحة أحسن بكتير.

ملك أول ما شافتها، جريت عليها ببطنها اللي بدأت تبان، ورمت نفسها في حضنها.

ملك بعياط: "يا ستي! وحشتيني أوي! كنت هموت وأشوفك!"

ست الحسن ضمتها بقوة ودموعها نازلة: "يا نور عيني.. يا حبيبتي..  بقيتي قمر.. وبطنك بانت يا ملك!"

آدم قرب وباس إيد ست الحسن وأخدها في حضنه.

آدم بحب: "نورتي برلين يا ست الكل.. 

ست الحسن ربتت على ضهره بحنان: "منورة بيكم يا ابن الأصول.. ربنا يجبر بخاطرك زي ما جبرت بخاطر بنتي."

زياد رمى الشنط على الأرض وقعد عليها وهو بيلهث.

زياد بتعب: "يا جماعة.. الشنطة دي فيها طوب؟! أنا ضهري اتقسم نصين في المطار! الضابط الألماني كان هيقبض عليا بسبب الريحة اللي طالعة منها!"

ست الحسن بابتسامة: "ريحة إيه يا واد؟ ده أنا جايبالكم فطير مشلتت بالسمنة البلدي، وبط، ومحشي، وجبنة قديمة.. قولت العيال في الغربة ومحرومين من الأكل ."

زياد عيونه وسعت ونط من على الشنطة كأنه اتكهرب.

زياد بصرخة: "بط؟! وفطير مشلتت؟! في برلين؟! يا حبيبتي يا حاجة ست الحسن! أنا كنت عايش على الكرتون المسلوق بقالي أربع شهور!"

نزل على الأرض وبدأ يفتح السوستة بلهفة.

آدم بضحك: "زياد! استنى لما الأكل يتسخن!"

زياد وهو بيطلع طرف فطيرة وبياكلها وهي باردة: "يتسخن إيه يا عم؟! ده سمنة بلدي! ده دفا في حد ذاته! الخال الأسطوري هياكل لحد ما يفرقع النهاردة!"

إلين خرجت من أوضتها على صوت الضحك، لابسة الطاقية القطنية ووشها مبتسم.

ست الحسن أول ما شافتها، سابت الكل وراحت ليها، وحضنتها حضن طويل 

ست الحسن: "ألف سلامة عليكي يا حبيبتي.. شدة وتزول بإذن الله.. وإحنا هنقعد مع بعض وأنا اللي هطبخلك بإيدي لحد ما صحتك ترد."

إلين بدموع: "شكراً يا حاجة.. تعبتي نفسك 

ست الحسن: "تعبك راحة يا أم الغالي.. إحنا بقينا عيلة واحدة."

ملك كانت واقفة بتبص عليهم وجنبها آدم حاضن كتفها.. المنظر كان يرد الروح.

بالليل، في أوضة آدم وملك.

الشنطة  كانت جاهزة للسفر للقاهرة الصبح بدري.

ملك كانت واقفة قدام المراية لبس قميص نوم ، وبصت على جسمها.. بطنها بارزة ، وجسمها زاد في الوزن 

حطت إيدها على بطنها .

آدم دخل الأوضة وقفل الباب، شافها واقفة سرحانة.

قرب منها ، ووقف وراها، وحاوط خصرها بإيديه الاتنين، ودفن وشه في رقبتها.

آدم : "الحلو سرحان في إيه؟"

ملك اتنهدت وحطت إيدها على إيده: "خايفة من بكرة يا آدم.. خايفة من مواجهة سعاد.. وفي نفس الوقت.. ببص على نفسي في المراية، حاسة إني اتغيرت.. بقيت تخينة ومش حلوة زي الأول."

آدم رفع راسه وبص ليها في المراية بذهول، وبعدين لفها ليه ومسك وشها بإيديه.

آدم بحب: "إنتي بتقولي إيه؟ مش حلوة إزاي؟ إنتي شايفة اللي أنا شايفه؟"

ملك بخجل: "آدم.. بطني كبرت وجسمي.."

آدم قاطعها ببوسة قوية على شفايفها.. بوسة خطفت أنفاسها .

فصل البوسة وبص في عينيها وأنفاسه السخنة على وشها.

آدم : "جسمك ده.. بكل تفصيلة جديدة فيه.. بيجنني أكتر من الأول. بطنك اللي شايلة ابني دي.. أحلى حاجة عيني شافتها في الدنيا."

نزل بإيده على خصرها ومشى   على تفاصيل جسمها لحد ما شالها بين إيديه.

ملك شهقت وحوطت رقبته: "آدم! أنا تقيلة عليك دلوقتي!"

آدم بضحكة جذابة: "تقيلة إيه.. إنتي ريشة.. وحتى لو تقلتي، أشيلك جوه عيني."

حطها على السرير و عيونه الزرقا كانت بتلمع برغبة وحب واضحين.

آدم همس قدام شفايفها: "أنا عايز أنسيكي خوف بكرة.. عايزك تفتكري حاجة واحدة بس الليلة.. وإنك مراتي، وحبيبتي، وإن مفيش ست في الدنيا تقدر تملى عيني وقلبي غيرك."

ملك قلبها دق بسرعة، وسحبته من ياقات قميصه ليها.

ملك بهمس: "طب نسيني يا آدم.."

آدم ما كدبش خبر.. غرق معاها في بحر من المشاعر القوية، لمساته كانت جريئة ، بيبوس كل إنش في وشها ورقبتها 

تاني يوم في القاهرة - داخل محكمة الجنايات.

الجو كان زحمة، وصوت الناس والمحامين مالي المكان.

ملك كانت ، لابسة فستان أسود واسع وحجاب أبيض، وإيدها متبتة في إيد آدم اللي كان ماشي جنبها، لابس بدلة سودة ونضارة شمس، 

المحامي استقبلهم قدام قاعة المحكمة

المحامي: "حمد لله على السلامة يا آدم بيه.. مدام ملك، جاهزة؟"

ملك بلعت ريقها وهزت راسها: "جاهزة."

آدم بص للمحامي: "إيه الجديد اللي قولتلي عليه في التليفون؟"

المحامي : "النيابة وصلت لشاهد جديد يا آدم بيه.. جار قديم كان ساكن في البيت اللي قصاد بيتهم وقت الحريق  الراجل ده كان مسافر الخليج طول السنين دي ولسه راجع، ولما عرف بالقضية جه يشهد من نفسه."

ملك بقلق: "يشهد بإيه؟"

المحامي: "هتسمعي جوه يا مدام ملك.. بس نصيحة، اجمدي.. اللي هيتقال مش سهل."

آدم ضغط على إيد ملك، وبصلها: "لو مش قادرة تدخلي، نرجع ."

ملك : "لأ يا آدم.. أنا جيت من آخر الدنيا عشان أعرف أمي ماتت إزاي.. لازم أدخل."

جوه قاعة المحكمة.

ملك دخلت وقعدت جنب آدم.

رفعت عينيها بصت على قفص الاتهام.

وهناك شافتها..

سعاد.. لابسة لبس الحبس الأبيض، شعرها منكوش، وشها أصفر ، وواقف جنبها "رشدي" راجل عجوز  و"كريم" المحامي الخاين، و"فتحي" جوزها.

سعاد أول ما لمحت ملك ، مسكت في حديد القفص، وعينيها جت على بطن ملك البارزة.

نظرة حقد وغل غريبة بانت في عين سعاد.

القاضي دخل، والكل وقف، وبدأت الجلسة.

بعد مرافعة النيابة اللي عرضت كل أدلة التزوير، ومحاولة تسميم ست الحسن ، جه الدور على قضية الحريق القديم اللي اتفتحت من جديد.

القاضي: "يتفضل الشاهد، الحاج محمود عبد السلام."

دخل راجل كبير في السن، ماشي على عكاز، ووقف قدام القاضي وحلف اليمين.

القاضي: "قول اللي شوفته يا حاج محمود يوم الحريق."

الحاج محمود بص على سعاد في القفص وقال بصوت واضح: "يا سيادة القاضي.. من عشرين سنة، يوم ما البيت ولع.. أنا كنت واقف في بلكونتي اللي في وش شقة المرحومة ليلى.. سمعت صوت صريخ ليلى وهي بتستنجد، وشوفت الدخان طالع وجيت أجري أنزل عشان أكسر الباب وألحقها.."

الراجل سكت لحظة

ملك إيدها كانت بترتعش في إيد آدم.

الحاج محمود كمل: " شوفت أختها سعاد.. كانت خارجة وفي إيدها البنت الصغيرة ملك اللي كان عمرها سنتين.. وليلى كانت بتصرخ من جوه وتقولها (افتحي الباب يا سعاد هتحرق).. وسعاد أخدت البنت وجريت!"

شهقة عالية طلعت من كل اللي في القاعة!

ملك حطت إيدها على بوقها عشان تكتم صرختها، ودموعها نزلت 

سعاد من جوه القفص صرخت بجنون: "كدااااااب! الراجل ده كداب وبيخرف! أنا كنت بنقذ البنت! أنا معملتش حاجة!"

القاضي خبط : "سكوت في القاعة! 

الحاج محمود كمل : "يا بيه أنا لما وصلت للباب حاولت أكسره معرفتش، لحد ما الجيران جم وكسرناه، كانت ليلى ماتت .. ولما سألت سعاد بعدها، عيطت وقالتلي إن الباب كان معلق  وأنا سافرت بعدها بيومين.. بس ضميري كان بيأنبني العمر كله، ولما عرفت إنها زورت وسممت أمها، اتأكدت إنها قفلت الباب بقصد!"

محامي آدم وقف وقال: "سيادة القاضي، وتقرير المعمل الجنائي القديم اللي استخرجناه، أثبت إن باب الشقه كان مقفول تكّتين.. وده مستحيل يحصل بالصدفة!"

ملك ما قدرتش تستحمل.. وقفت في مكانها فجأة، وبصت لسعاد بانهيار.

ملك بصريخ : "ليييييه؟! قتلتي أختك ليه ؟! قفلتي عليها الباب وهي بتولع ليه؟! عملتلك إيه أمي عشان تحرميني منها وتعيشيني يتيمة؟!"

القاضي ما منعهاش، سابها والكل كان متعاطف معاها.

سعاد لما لقت نفسها خلاص رايحة لحبل المشنقة، وشها اتحول لوحش، ومابقاش عندها حاجة تخسرها.

مسكت حديد القفص وصرخت بغل : "عشان كانت واخدة مني كل حاجة! أمك كانت واخدة كل حاجة! أبويا وأمي كانوا بيحبوها هي! وحتى أبوكي.. أبوكي اللي كنت بحبه وبموت فيه، سابني أنا واتجوزها هي!"

ملك اتجمدت مكانها.. والصدمة شلت لسانها.

سعاد كملت بجنون: "كنت بكرهها! ولما النار مسكت في المطبخ، لقيتها فرصتي أخلص منها وآخدك وأربيكي عشان أبوكي يرجعلي ويتجوزني عشانك! بس هو هرب وساب البلد ومات بره! فضلتي إنتي في وشي.. شبهها في كل حاجة! نفس عينيها ونفس ضحكتها! كنت كل ما أبصلك أفتكرها فأكرهك أكتر! ياريتني كنت سبتك جوه معاها وارتحت منكم انتوا الاتنين!"

الكلام نزل على ملك زي الصاعقة..

افتكرت كل عقدة في حياتها ليه كانت بتعاملها بقسوة، ليه ماحبتهاش، 

ملك حست إن الدنيا بتلف بيها.. القاعة بتضلم.. وصوت سعاد وهي بتصرخ بيتردد في ودانها 

فجأة، حسّت بمغص شديد، وجع  زي السكينة بيقطع في بطنها 

مسكت بطنها بإيديها الاتنين وصرخت بألم: "آاااااه! آدم.. بطني.. إبني يا آدم!"

ورجليها سابت، وكانت هتقع على الأرض لولا إن آدم مسكها بين دراعاته!

آدم وشّه جاب ألوان، وشالها بسرعة وهو بيصرخ بجنون: "ملك! ملك فتحي عينك! إسعااااف! حد يطلب إسعاف بسرعة!"

وفي نفس اللحظة اللي آدم كان بيجري بيها بره القاعة والدموع في عينيه من الرعب على مراته وابنه..

موبايله بدأ يرن..

كان رقم "زياد" من برلين.. بيرن بإلحاح شديد !

الفصل الثالث عشر من هنا