رواية اخترت نفسي الفصل الحادي عشر 11 بقلم هايدي احمد


 رواية اخترت نفسي الفصل الحادي عشر 

شدها احمد من دراعها جامد وفتح الباب وكان طالع بره الشقه وامها ماسكه بناتها الى  بيعيطوا وماشيين وراها 
ام هاجر بصريخ /منك لله يا احمد واخد بنتى فين يا جاحد يا قليل الاصل منك لله 
مردش احمد عليها و كان لسه هيخرج بره الشقه بس وقف قدامه واحد اول مره يشوفه 
زين /رايح فين يا شبح 
احمد/ وانت مال ام..ك انت مين وايه الى جابك هنا
بصت هاجر للى بيكلمه وبرقت وقالت فى نفسها
(ده نفس الضابط الى وقفنى فى الكمين ايه الى جابه هنا )
شال زين عينه من على احمد وبصلها وعينه جت فى عنينها وشها وارم من اثر ضرب ودموعها مغرقه وشها وشعرها متبهدل شال زين عينه بسرعه ورجع بص لاحمد بكل غضب وهو حاسس بنار جواه وبكل قوته مسك احمد من لياقة قميصه وشده بره الشقه فرجعت هاجر ورا وحضنت والدتها بخوف وهى بتبص على زين الى نيم احمد على الارض وقعد يضرب فيه فى كل مكان فى جسمه واحمد ماسكه من لياقته بغل 
احمد/ انت مين يا ابن ال*** انت 
زين/ انا الى هطلع روحك فى ايدى 
زقه احمد على الارض بكل قوته وقام ومسح بوقه وهو عينه مليانه شرار وبص لهاجر 
احمد/ قولتلى بقى ..انت جاى عشان الهانم مش كده شوفتى ..اهو كلامى طلع صح بنتك الحلوه الى بتدافعى عنها طلعت*** وعارفه راجل عليا 
هاجر بصريخ / اخرس يا حيوان قطع لسانك 
احمد/ وماله هخرس...بس بعد ما افضحك يا شريفه 
زين / انت شكلك مش هتسكت الا لما تتربى فعلا 
احمد/ تعالالى بقى انت يا حبيب.. محموق عشانها اوى كده 
هجم عليه احمد بس زين ضربه فى بطنه وزقه على الأرض وكان لسه هيكمل بس وقفه دخول ابراهيم فى النص وهو بيحجز بينهم وساره الى كانت مصدومه من منظر هاجر الى بتعيط هى ومامتها ودخلت تجيبلها طرحه عشان تغطى شعرها الى متبهدل 
ابراهيم/ فيه ايه.. فيه ايه الى بيحصل اهدوااا 
احمد/ شوف ابن ال*** الى الهانم جايباه عشان يضربنى المحترمه الى متجوزه عارفه واحد على جوزها 
ابراهيم/ بس يا احمد اسكت ووطى صوتك ده 
احمد/ لا مش هوطى وهفضحها فى كل حته 
زين / لا انت لازم تتربى من اول و جديد بجد بقى 
طلع زين تليفونه بسرعه 
زين / الوو.. تعالاى عند عماره 6 الدور الثاني وهات وليد معاك انا سايبه على اول الشارع بسررررعه 
قعد احمد يهوش بايده ويزقه بغضب وابراهيم لسه ماسكه
احمد /جايبلى مين يلا هتخوفنى ده انا اجبلك الى يكسرك انت والى معاك وابقى قابلنى لو طلعت من هنا على رجلك 
ابراهيم/ بس بقى يا احمدددد كفااايه
احمد/ انت سايب ال*** وبتقولى انا ما تشوف مين ده الى الهانم جايباه لجوزها وتعرفه منين ومن امتى لا ورايحه تخلعنى انا طبعاااا طبعا يا هانم ما انا مش عاجبك ومش مالى عينك 
زين/ سكت الحيوان ده والا والله موته على ايدى النهارده 
اتعصب احمد وكان هيهجم عليه تانى بس ابراهيم كان ماسكه 
ابراهيم بسرعه/ امشى يا استاذ من هنا خلى اليوم ده يعدى على خير كفايه فضايح بقى 
احمد/ فضايح انت لسه شوفت فضايح 
قاطعهم صوت كذا حد طالع على السلم وكانوا عساكر 
فرجع احمد وقابلهم / كويس جالك الى يلمك يا***

اتفاجأ ابراهيم واحمد اكتر لما سمعوهم وشافوهم واقفين قدام زين 
-تمام يا فندمم
 وبصوا لزين الى كان باين على وشه انها مش هتعدى على خير 
بصلهم زين بغضب وبكل قوته قال /
النقيب زين احمد السيد مباحث امن القاهره 
اتصدموا كلهم وخصوصا احمد الى حس بجردل مياه ساقعه وقع فوقه من صدمته
بص زين للعساكر وامرهم بصرامه 
/خدوه على البوكس 
ابراهيم/ لحظه بس حضرتك ممكن نتفاهم هو مكنش ..
زين/ مكنش ايه يا استاذ انت مش شايف مراته عامله ازاى مش شايف انه اتعدى عليا مش شايف انه قل ادبه واتعدى بالالفاظ والسب ولا انت مكنتش معانا 
سكت ابراهيم وبلع ريقه وبص لاخوه بعتاب 
زين / خدوووه
نفذوا الى قاله وشدوا احمد غصب ونزلوا وهو مبطلش زعيق ومحاوله انه يفلت منهم 
احمد/ ابراااهيم تعالى ورايا القسم بسرعه
ابراهيم/ جاى جاى يا احمد الله يسامحك ...ساره خليكى هنا لما اشوف هعمل ايه متقلقيش 
استنى 
زين/ لملى بطايق الى موجودين وهات مراته وتعالى ورانا 
ابراهيم/ لحظه بس يا باشا هى
زين / اسمع الى قولت عليه يا استاذ من غير مجادله 
سابه زين ونزل  وراحت ساره جابت عبايه لهاجر عشان تنزلها مع ابراهيم وفضلت والدتها مع بناتها الى كانوا فى حاله لا يحسدوا عليها 

♥️♥️♥️♥️♥️♥️♥️♥️♥️♥️♥️♥️♥️♥️
هدى / بصى كده يا تقى شوفى خالك جه ولا لسه 
تقى/ لسه يا ماما 
هدى / طب راح فين بس والصوت ده كان عند مين هنا انا مش شايفه حاجه 
تقى/ هو طلع فى العماره الى هتاك دى 
هدى / مين الى فى العماره دى...
تقى/ مش دى عمارة طنط هاجر 
ايوه بس مين الى كان بيصوت هناك معقول تكون ام زينب ..ولا عند ام محمد مش عارفه 
تقى بسرعه / ماما بصى خالو اهو 
بصت هدى على زين الى كان نازل ورا واحد العساكر ماسكينه وحطوه فى البوكس 
هدى / يا لهوي مش ده احمد جوز هاجر ايه الى جابه هنا 
تقى / ده ابو نغم يا ماما 
هدى/ ايوه هو 
تقى/ احسن انا مش بحبه خلى خاله يحبسه هناك علطول 
هدى / بس بس يا تقى مش وقتك هاتى التليفون اما ارن على خالك بسرعه 
راحت تقى جابت التليفون ورنت هدى على اخوها 
هدى/ الو .. ايوه يا زين فيه ايه الى حصل وواخدين احمد ليه 
زين/انتى تعرفيه 
هدى/ ايوه ده جوز هاجر صحبتى الى كانت ساكنه هنا 
فيه ايه هى حصلها حاجه هى ولا عيلتها
زين/مفيش حاجه متقلقيش هم كويسين انا هخلص وابقى اجيلك يلا سلام 
هدى/ استنى ب...ربنا يستر 

♥️♥️♥️♥️♥️♥️♥️♥️♥️♥️♥️♥️♥️

فى القسم وصل البوكس ونزل من العربيه والعساكر مسكوا احمد ودخلوه وزين قالهم ياخدوه على جوه وطبعا احمد بيبصله بغضب ومش عارف يتكلم ولا حتى يقاوم دخل زين وراهم وكان احمد واقف معاهم فى الطرقه قدام مكتبه وبعد شويه جه ابراهيم ووراه هاجر الى كانت مش قادره تمشى وهى خايفه وبتبص حواليها كانها اول مره تخش قسم اتضايق زين من شكلها وقرب عليهم 
زين / اتصل على ابوك لو موجود خليه يجى والمدام هتيجى معايا المستشفى الى هنا عشان المحضر 
بصله ابراهيم بخوف لأنه طلب طلبين اصعب من بعض معنى ان هاجر تكشف يبقى احمد اكيد هيتحبس والاسوأ ان ابوه يعرف لا وكمان يجى يشوف بعينه
ابراهيم/ لحظه بعد اذنك حضرتك احنا عيله محترمه وملناش فى المحاضر وانا متاسف على تصرف اخويا انا عارف انه غلطان  بس هاجر اول مره تدخل قسم وملهاش ذنب باللى بيحصل وهم عندهم ولاد فانا بطلب من حضرتك نحاول نحلها ودى واديك شايف حالتها وان كان الموضوع هيتأزم وفيه حبس نمشيها هى 
بصله زين بصرامه/ وانا قولت فيه محضر ومش هيتم الا بالطرف التانى المتأذى وانا من ضمن الطرف ده فاسمع الى قولت عليه اتصل بوالدك وانا هاخد المدام للمستشفى 
سابه زين قبل ما يكمل كلامه وبص لهاجر 
/تعالى ورايا 
سابها زين ومشى وهى فضلت واقفه مرتبكه ومش عارفه تعمل ايه 
ابراهيم/ روحى معاه يا هاجر عشان متتعبيش اكتر لازم تكشفى.. هو كشف عادى عشان الكدمات ربع ساعه وهرجعك البيت متقلقيش هى اجراءات عاديه 
هزت هاجر راسها ومشيت ورا زين وده كله تحت نظرات احمد الى مليانه شرار بس مش قادر يتكلم 
طلع زين عند العربيه قدام القسم واستنى هاجر تطلع لان مشيتها بطيئة 
هاجر / احنا هنروح فين 
زين / فى مستشفى فى الشارع الى ورا هنروح عشان نشوف كدماتك ولو فيه اى مضاعفات او كسور 
هاجر/ ده لازم عشان المحضر 
بصلها زين بغضب / لا لازم عشان صحتك مثلا ولا انتى مش حاسبه نفسك معانا تعالى اركبى ..اركبى 
بصتله هاجر بكسوف وراحت تركب وهو استناها لما ركبت وقفل الباب وراح ركب جنبها وطلعوا على المستشفى
♥️♥️♥️♥️♥️♥️♥️♥️♥️♥️♥️♥️♥️

فى بيت هاجر 
كانت قاعده  امها وهى بتعيط بحسره وبنات هاجر حاضنينها وبيعيطوا معاها وساره بتطبطب على كتفها 
ام هاجر/ منه لله ربنا ينتقم منه اخس عليه مطمرش فيه العيش والملح ولا عشرة السنين ولا طمر فيه اى حاجه حسبى الله ونعم الوكيل 
ساره/ اهدى يا طنط ربنا هيجبلها حقها ومش هيسيبها ...انا والله قعدت ارن عليكم كتير اوى مكنتش اعرف والله ده انا اتفاجأت انا وابراهيم وجينا نجرى عشان عارفين إلى فيها 
هاجر / منه لله ..وبنتى مالها ياخدوها ليه معاهم هى معملتش حاجه منك لله يا احمد 
ساره/  متخافيش دى اجراءات اكيد هيفتح محضر باللى حصل والله نفسي يتحبس وميطلعش منها 
ام هاجر/ يارب يتحبس ونخلص منه بقى ...رنى على ابراهيم شوفيهم وصلوا ولا لا وشوفى هاجر كويسه ولا لا 
ساره / حاضر حاضر متقلقيش انتى بس 
♥️♥️♥️♥️♥️♥️♥️♥️♥️♥️♥️♥️♥️♥️

فى بيت العيله 
رجع ابو احمد البيت وكانت ميار لسه قاعده فى الصاله بتقلب فى التليفون وحماتها فى المطبخ 
ابو احمد/ السلام عليكم 
ميار/ وعليكم السلام يا بابا ..اجبلك شاى 
ابو احمد/ لا مش دلوقتى ...احمد وابراهيم مجوش 
ميار/ لا يا بابا ..هم راحوا فين اصلا 
ابو احمد بسخريه/ هه...راحوا يجيبوا الست هانم الى فضحتنا وجرستنا وسط الناس الى ملهاش ساتر ولا حد يلمها 
اخفت ميار ابسامتها /اهدى بس يا بابا صحتك ومتقلقش زمانهم جايين 
ابو احمد/ صحتى اه ...يا ام احمددد
ام احمد/ نعم..نعم يا حج 
ابو احمد / ابنك مرنش ولا اى حاجه 
ام احمد/ لا يا حج من ساعة ما مشيوا محدش رن 
ميار بخبث/ كنتى رنى على ساره يا ماما اكيد كانت هترد 
بصلها ابو احمد بتركيز /ساره ... وساره مالها بيهم مهى فى شقتها 
ميار/ لا يا ابابا ده انا شوفتها بتجرى ورا ابراهيم وشكلها راحت معاه 
ابو احمد / اتفضلى ..اتفضلى يا ستى خليكى انتى نايمه على ودانك وانا معاكى ..الى يجى يجى والا يمشى يمشى ومعدش لينا كلمه مسموعه فى البيت ده 
ام احمد/ تلاقيها قلقت بس ولا هو اخدها معاه 
ابو احمد/ اخدها معاه يعمل بيها ايه عيل صغير وخايف يمشى لوحده انا معدتش عارف امشى البيت ده ولا عارف  الى حصل فيه ايه.. كله بسببها هى هى السبب 
قاطع كلامه صوت التليفون 
ابو احمد/ هاتى التليفون ده هاتيه 
اخد التليفون من ميار ورد 
ابو احمد/ الو...امال انت فين انت واخوك يا سيد الرجاله...قسم ايه......
قفل التليفون ورماه فى الارض وقام وهى متعصب وبيضرب كف بكف 
ابو احمد/ انا عارف ان المصايب مش هتخلص انا عارف
ام احمد/ فيى ايه بس يا حج خير قيم ايه كفا الله الشر 
ابو احمد/ انا رايح اجيب ولادك من القسم انا على اخر الزمن رايح القسم عشان اطلع ولادك 
ام احمد/ يا مصبتييي ..استنى بس قولى فى ايه 
اتصدمت ميار وطلعت وراه واخدت تليفونها وقعدت ترن على احمد وابراهيم ورجعت رنت على ساره بس محدش رد 
ميار / يا مصبتييي يارب ما يكون الى فى بالى يا هاجر ده انا هندمك عمرك كله  
♥️♥️♥️♥️♥️♥️♥️♥️♥️♥️♥️♥️♥️♥️😌

وصل زين المستشفى ونزل من العربيه وراح عند هاجر وفتحلها الباب وهى كانت بتحاول تنزل وماسكه فى الباب وزين متابعها وعايز يمسك ايديها وينزلها بس مسك نفسه واستناها تنزل لوحدها 
نزلت هاجر وهو مشى وراحت وراه 
شاور وين لممرضه فجت 
-ايوه حضرتك 
زين /لو سمحتى كنت عايزك تعمليلها اسعافات اوليه 
بصت على الممرضه على هاجر 
-خير دى حادثه ولا ايه 
زين / لا مش حادثه 
-طب تعالى معايا 
بصتلها هاجر ورجعت بصت لزين 
زين / متقلقيش روحى معاها 
مشيت هاجر وشاور زين للممرضه فرحعتله تانى 
زين/عايز كشف كامل لاى كدمه او كسر ويتعمل بيه تقرير 
استغربت الممرضه طلبه وقبل ما تتكلم طلع زين الكارنيه بتاعه ووراهولها 
-تمام حضرتك 
اخدت الممرضه هاجر على الكشف وفضل زين مستنيها بره لعند ما طلعت الممرضه لزين 
-بص حضرتك مفيش حاجه خطر هى شوية كدمات متفرقه فى الجسم وكان فيه اشتباه فى كسر فى دراعها اليمين بس احنا هنكتفى بس بربطه وفيه ادويه وشوية مراهم هتجيبها وهتمشى عليها 
زين / ده اتكتب فى التقرير 
-ايوه حضرتك 
زين / تمام اوى هى خلصت ولا المفروض تقعد 
-لا لا تقدر تاخدها معاك دلوقتى 
زين / تمام سجلى الزياره دى مع التقرير عشان هيتاخد فى المحضر 
دخلت الممرضه وجابت هاجر الى كان باين عليها القلق 
هاجر/ هو احنا هنطول انا سبت ماما لوحدها مع البنات ومعرفش هى كويسه ولا لا 
بصلها زين باستغراب من كلامها 
زين / كويسه ازاى مش فاهم 
هاجر/اصلها وقعت لما ..
وقفت هاجر وبصتله بحذر وخوف 
زين فهم واستنتج الى كانت هتقوله وجز على سنانه بغضب وهو بيحاول يتمالك اعصابه 
زين / ممكن سؤال
هاجر/ اتفضل 
زين / انتى ايه
هاجر/ نعم 
زين / انتى ايييه انتى بنى آدم زينا بتفهمى وبتشوفى ولا حالات خاصه 
هاجر/ ايه الى حضرتك بتقوله ده حاسب على كلامك 
زين / بجد .. يعنى انا احاسب على كلامى مش كده اتفضلى قدامى ...يلااا
اتخضت هاجر من صوته الى على فجأة ومشيت من قدامه وهى خايفه 
وهو مشى وراها وهو بيتمالك اعصابه 
♥️♥️♥️♥️♥️♥️♥️♥️♥️♥️♥️♥️♥️♥️♥️

فى القسم 
وصل ابو احمد القسم ودخل شاف احمد متكلبش وابراهيم قاعد قصاده 
قامموا اول ما شافوا ابوهم جاى عليهم 
احمد / بابا...
ابو احمد/ بس اخرس...
سكت احمد وبص فى الارض و ابوه بصله ورجع بص لابراهيم 
ابو احمد/ يا فرحتى بيكم ...يا فرحتى بيك انت واخوك جاى اخدكم من القسم لا وكمان ست الى مدخلاكم 
ابراهيم/ يا بابا هى ملهاش دعوه 
ابو احمد/ بس اخرس ...امال مين الى ليه دعوه انتم هنا بسبب مين امى ..مش مكسوف من نفسك انت وهو وانتم زى الشحطه وواقفين كده ...وانت...انا مش بعتك ورا المتخلف ده عشان تجيبه وتجيب البت دى وتلحق المصيبه دى مهو لو كنا لحقته وجيبتهم البيت مكنش ده كله حصل اهو على الاقل لو كان عايز يربيها كان رباها فى بيته عاجبكم الفضايح دى عاجبكم ابوكم وانتم جايبنه القسم يطلعكم 
بص ابراهيم فى الارض بقلة حيله ابوه هيفضل ابوه مش هيتغير ولا تفكيره هيتغير 
ابو احمد/ فين الضابط الى قبض عليك يا حيلتها 
بص حواليه ووقف لما شاف زين داخل وهاجر وراه واول ما شافته خافت وخطواتها قلت 
بصله زين كويس ورجع بص لهاجر الى وشها اتغير وفهم مين ده وهى خايفه ليه 
اتعصب ابو احمد وقرب عليهم 
ابو احمد/ انتى جيتى يا ست هانم.. انتى جيتى ام المصايب والفضايح ..انا عمرى ما كنت اعرف ان اسمى وسمعتى هتتهد على ايدك انتى ... انتى عار عليا وعلى عيلتى 
قرب زين منه ووقف فى وشه بكل غضب فبصله ابو احمد باستغراب 
ابو احمد/ وانت مين انت كمان 
زين / انا الى همحى اسمك واسم عيلتك من الدنيا 
اتصدم ابو احمد و.....


تعليقات