رواية اساطير الورد الفصل الثاني عشر 12 بقلم نعمه حسن


 رواية اساطير الورد الفصل الثاني عشر 


     ♡♡♡♡♡♡♡♡♡♡♡♡♡♡♡♡♡♡♡♡

يجلس خلف مكتبه شارداً يحاول نفض تلك الفوضي العارمه التي إكتسحت رأسه فجاةً و بدون مقدمات فأخرج سيجارةٍ من علبة سجائره و أشعلها وبدأ بتدخينها وهو يقاوم بكل ما أوتي من قوة لكي يستطيع التركيز بالأوراق الموجوده بين يديه. 

إستمع إلي طرقات علي باب مكتبه فأذن للطارق بالدخول فـ دخل صديقه وائل وعلي وجهه أمارات اليأس. 

_خير؟! مبقيتش بتفائل بوشك. 

نطق بها حسام قبل أن يسحب نفساً طويلاً من تلك التي يمسك بها بإحكامٍ عابث بين إصبعيه ثم نفث دخانها ليصنع غيامةً أمامه فقال وائل: 

=حيلك يا عم هتعميناا. 

تحدث بنفاذ صبر وقال: خلص يا وائل بشرفك عشان مش ناقصك. 

جلس وائل علي المقعد المقابل له وقال ببرود متناهي: 

=إيه يا حوس مالك؟! أكيد في حاجه جديدة شاغله دماغك. 

تنهد حسام قائلاً: لا جديد ولا قديم.. المهم إنت قالب خلقتك ليه؟! 

نظر إليه وائل بقوة وقال بغيظ: أختك يا سيدي.. منكده عليا عيشتي و مسوده حياتي. 

زم الآخر شفتيه بملل وقال: بقولك إيه يا زفت إنت كمان أنا مش فاضي للعب العيال بتاعكوا ده.. أنا في دماغي مليون حاجه أهم من الهبل بتاعكوا. 

_والمفروض يعني لما أحب أشتكيها أشتكيها للغريب؟! مش إنت أخوها!! 

نفض حسام دخان سيجارته وقال بحزم: لا قريب ولا غريب.. متشتكيش لحد خالص.. إنت مش عيل صغير عشان تشتكي. 

صرخ وائل وقد فاض الكيل وقال: 

_يا عم أنا عيل صغير و برياله كمان و بقولك أهو.. أنا جبت أخري من أختك.. مبقيتش عارف أرضيها إزاي.. عايزة ڤيلا زي بتاعة حسام خلتني بعت القيراطين اللي كانوا حيلتي و إشتريت الڤيلا.. عايزة عربيه زي بتاعة حسام خلتني جيبت قرض و إشتريت العربيه..وكل ده مش عاجب.. أنا عايزة حساب بإسمي في البنك عشان أأمن مستقبل عيالنا اللي لسه مجوش وشكلهم مش جايين.. و عايزة شاليه زي بتاع حسام عشان نبقا نصيف فيه إحنا وعيالنا اللي لسه مجوش وشكلهم مش جايين.. وعايزة كوليه شبه اللي حسام هيجيبه في المستقبل لمراته اللي هي مش موجوده أصلاً.. وعايزة أروح أغير جو في بلد مش موجودة عالخريطه من الأساس بس نكون اول ناس روحناها.. أنا طفحت. 

نطق بالأخيرة صارخاً ثم قال: أختك مبتشبعش طلبات و دايماً محسساني إني مقصر في حقها.. بعمل فوق طاقتي و جهدي عشان أرضيها و مش عاجبها.. دي وصلتني لإني بقيت لو جه مناسبه ومفيش معايا فلوس بستلف من أخويا عشان لازم أجببلها هديه عشان متبقاش خناقه وحوار. 

سبّه حسام قائلاً: ما إنت اللي ***. 

جحظت عيناه وقال: بعد ده كله أنا اللي غلطان بردو؟! 

_طبعاً غلطان.. إنت فكرك يعني لما تقولي أنا بستلف عشان أجيب هديه لأختك هسقفلك؟!! إنت اللي عملت في نفسك كده من الأول و تستاهل كل اللي يجرالك.. إنت اللي عودتها إن كل طلباتها لازم تكون مجابه حتي لو مفيش معاك تستلف وتجيب.. وياريتها حاجه ضروريه بتستلف عشانها.. لأ ده عشان عُقد ولا خاتم الماظ بيترموا في الدرج جمب اللي قبلهم بس يبقي الإسم إنك جيبتلها هدية. 

مسح وائل وجهه بغضب و حيرة ثم قال: يعني أعمل إيه دلوقتي.. أنا مبقيتش عارف أتصرف معاها إزاي. 

ألقي حسام عُقب سيجارته في منفضة السجائر الموضوعه أمامه ثم قال وهو يشعل أخري: 

_مش أول مرة تقول كده يا وائل ولا أول مشكلة تحصل بسبب فراغة عينها و في كل مرة بقولك نفس الكلام.. مراتك عايزة وقفه.. لازم إنت تتغير و تعرفها إن دي مقدرتك و ده جهدك و علي قد سعيك.. هي متجوزاك و عارفه إن إحتمال إنها مش هتعيش في نفس المستوي اللي كانت عايشه فيه و مع ذلك قبلت و وافقت.. يبقا لازم تتحمل ظروفك أياً كانت.

و تابع: إنت كان لازم توقفها عند حدها من الأول.. لما تقوللك عايزة عربيه زي بتاعة حسام تقوللها أنا هجيب اللي تناسب ظروفي وهي مجبره و مرغمه توافق و تستحمل.. لكن إنت جريت خدت قرض و جبت العربيه عشان خاطرها.. لما تقوللك عايزة فيلا زي بتاعة حسام تقوللها أنا هجيب بيت علي قد فلوسي ولما ربنا يكرم نجيب حاجه أحسن.. لكن إنت روحت بيعت ورثك من أبوك و جيبت الڤيلا.. لما تقوللك عايزة كوليه ألماظ ولا خاتم ألماظ عشان أهادي واحدة صاحبتي تقوللها هجيب اللي في حدود إمكانياتي.. إنت اللي عودتها علي كده من البدايه و خليتها مفيش عندها إستعداد تشيل معاك مسئوليه. 

ثم أكمل بنزق وقال: انا مش فاهم إنت مش عايزني أتكلم معاها ليه و أشد عليها شويه بدل الدلع البايخ ده. 

جاء صوت وائل مكروباً وقال: لأ مش دلوقتي.. خليني أحاول معاها يمكن ربنا يهديها. 

_علي راحتك.. أهم حاجه تبدأ بنفسك. 

أومأ وائل مقتضباً ثم قال: إن شاءلله.. أنا ورايا شوية حاجات هخلصها و أروح لأني مصدع جامد ومش قادر. 

_ماشي يا وائل.. ربنا يهديلك الحال. 

إنصرف وائل مغادراً بينما أراح هو ظهره إلي المقعد من خلفه و وضع يديه خلف رأسه و أغمض عينيه بتعب. 

"انا شوفت يااما.. أمي اللي مشوفتهاش.. أبويا اللي ملحقتش أشبع منه.. إخواتي اللي عمرهم ما حنّوا عليا" 

فّرق بين جفنيه بغتةً وهو يتعجب لما قفزت تلك الكلمات إلي رأسه الآن فـ تنهد بإرهاق و أخذ سترته و إلتقط مفاتيح سيارته وهاتفه ثم خرج من المكتب فحدّث سكرتير مكتبه قائلاً: 

_أنا خارج ألف شويه و ممكن مرجعش النهارده.. لو في فاكسات إبعتهالي علي الإيميل وأنا هبقا أراجعها. 

إستقل سيارته و حلّ وثاق رباطة عنقه ثم ضغط زر مذياع السيارة عشوائياً ليصدح صوت فيروز قائلة: 

بكتب اسمك يا حبيبي ع الحور العتيق
تكتب اسمي يا حبيبي ع رمل الطريق
بكرة بتشتي الدني ع القصص لـ مْجَرَّحة
يبقى اسمك يا حبيبي واسمي بينمحا

قفزت صورتها وهي تتغني بتلك الكلمات إلي مخيلته بغتةً فـ زفر قائلاً: وبعدين بقااا. 

رفَع صوت الموسيقي عالياً وراح يدندن مع ألحان الأغنيه ويقول بصوتٍ وقور: 

بحكي عنك يا حبيبي لأهالي الحي
بتحكي عني يا حبيبي لنبعة المي
ولما بيدور السهر.. تحت قناديل المسا
بيحكوا عنك يا حبيبي وأنا بنتسي

إبتسم وهو يهز رأسه ساخراً من حاله علي ما أضحي به. 

ظل يجول بسيارته دون قبلةٍ محددة، لا يعلم إلي أين هو ذاهب ولا يريد الذهاب لمكانٍ محدد لكنه يتجول فقط حتي توقفت سيارته أمام متجر الورود خاصتها. 

نظر إلي المكان من حوله و قلب شفتيه بتعجب وقال: 

_لا والله اللي بيحصل ده مش طبيعي.. أنا إيه اللي جايبني هنا!! 

أدار محرّك السيارة ليعود أدراجه ولكنه تصلّب مكانه عندما رآها تخرج من باب المبني و تنظر بإتجاهه. 

يا للهول.. إنها تُقبل عليه!! 

لعن تحت أنفاسه حينما رآها تتقدم منه و تمتم حانقاً: 

_يا خبر أبيض.. دي شافتني.. أقولها إيه أنا دلوقتي.. كنت جاي أهبب إيه!! 

توقفت أمام السيارة و إنحنت بجذعها قليلاً لتخاطبه من وراء زجاج السيارة وهي تقول بإبتسامه لطيفه: 

=إتفضل حضرتك.

خرج من السيارة ليقف أمامها وهو يبتسم ببلاهه و يقول: 

_إزيك يا آنسه. 

نظرت إلي الأعلي قليلاً كي تواجه ناظريه وقالت: 

=كويسه الحمدلله. 

أومأ وقال: الحمدلله.. كنت جاي عشان..... 

قاطعته قائله: عشان تطمن علي مدام ماجدولين؟! 

_أيووووة بالظبط.. هي عامله إيه دلوقتي؟ 

=كويسه الحمدلله.. كنت نازله أجيب لها العلاج من الصيدليه و طالعه. 

_طيب هاتي الروشته أجيب أنا العلاج و إنتي إطلعي عشان لو إحتاجت حاجه تبقي معاها. 

=لا متشكره أنا هجيبه بسرعه من الصيدليه اللي جمبنا. 

_لا ميصحش.. أنا هجيبه و هطلع أطمن عليها بنفسي. 

هزت رأسها بموافقة وقالت: تمام ماشي.. الدور السابع الشقه اللي في الوش. 

_أيوة عارف.. إطلعي إنتي يلا. 

صعدت إلي الشقه فقالت ماجدولين: جبتي العلاج يا ورد؟! 

_أستاذ حسام لقيته واقف بعربيته قدام باب العماره كان جاي يطمن عليكي.. فـ لما عرف إني رايحه أجيبلك العلاج أصر هو اللي يجيبه و يطلع يشوفك. 

=راجل ذوق والله فيه الخير. 

ضحكت ورد وقالت: ذوق بس قدمه محنّي. 

ضحكت ماجدولين عالياً وقالت: والله إنتي ملكيش حل.

إستمعتا إلي صوت جرس الباب فقالت ورد:أهو جه.. أما اروح أفتح الباب. 

فتحت ورد الباب بإبتسامه هادئه وقالت وهي تفسح له الطريق وتشير له بالدخول: إتفضل. 

حمحم قبل أن يدخل فإستمع إلي صوت ماجدولين تقول: 

_إتفضل يا باشمهندس حسام. 

طرق باب الغرفه ثم دخل و صافحها و من ثَمّ جلس إلي الأريكه الموجوده بالغرفه وبدأ يتسائل عن حالها فقال: 

=أخبارك إيه دلوقتي يا مدام ماجدولين. 

_الحمدلله يا حبيبي إنت عامل إيه.

=الحمدلله زي الفل. 

_آنست و نورت والله. 

=البيت منور بأصحابه.

دخلت ورد إلي الغرفه ثم سألته: حضرتك تحب تشرب إيه؟ 

نظر إليها قائلاً بصوتٍ رخيم: لا مفيش داعي. 

تحدثت ماجدولين وقالت: لا إزاي.. لازم تشرب حاجه. 

أعاد النظر إلي ورد وقال: خلاص لو ممكن شاي بس. 

أومأت بموافقة وذهبت لإعداد الشاي فقالت ماجدولين بصوت هامس: 

_بنت حلال ورد.. ربنا يجبر بخاطرها هي اللي شيلاني من يوم ما جت المحل. 

نظر إليها بإهتمام وقال: واضح فعلاً إن معدنها أصيل.. زي ما بيقولوا الجواب بيبان من عنوانه. 

_دي حقيقه.. بس ياعيني شافت كتير.. شابه عندها 19سنه وشافت اللي محدش يستحمله. 

قال مذهولاً: يا خبر أبيض!! دي صغيرة جداً. 

تمتمت بحسرة: صغيره و يتيمه وملهاش حد.. والله يوم ما تعبت ما كان هاممني تعب ولا غيره.. كل اللي كنت شايله همه هي.. هتروح فين وهتعيش إزاي لوحدها.. نفسي أطمن عليها و أجوزها بس هي متربسه دماغها. 

قال بفضول تغلّب عليه: هي رافضه الجواز ليه؟! 

همست إليه قائلة: قلبها مكسور يا حبيبتي.. كانت مياله لواحد و خطب أختها. 

إرتفع حاجبيه بدهشه عارمه وقال: يا خبر.. دي صدمه كبيره أوي. 

هزت رأسها وأكملت: منها لله مرات أبوها هي اللي لفت و دارت عليه لحد ما أقنعته يخطب بنتها ويسيب ورد. 

قطب حاجبيه مستفهماً ثم قال: يعني هو في الأساس كان عايز يخطب ورد؟! 

_أيوة. 

=وبعد محاولات من مرات أبوها سابها وخطب أختها؟! 

_أيوة. 

رفع كتفيه بعدم إهتمام وقال: طب وهو ده حد يتبكي عليه؟! ده ربنا بيحبها إنه نجدها من إنسان عديم الشخصيه زي ده.. الإنسان اللي ميتمسكش بيها في أحلك الظروف و أصعبها يبقا ميستاهلش ضفرها. 

كانت ورد تقف تستمع إلي حديثهما الهامس وهي تحمل صينية الشاي من خلف جدار الغرفه ثم حمحمت بهدوء و بداخلها ناراً تكاد تأكل قلبها لمجرد ذكري جالت بخاطرها. 

دخلت الغرفه ووضعت ما بيدها وقالت بهدوء: إتفضل. 

إحتسي كوبه من الشاي ثم نهض قائلاً: 

_أستأذن أنا بقا لأن ورايا شوية شغل لسه.. حمدلله على سلامتك مرة تانيه يا مدام ماجدولين. 

صافحته قائلة: الله يسلمك يا حبيبي.. شرفتنا و نورتنا. 

ثم وجهت حديثها إلي ورد وقالت: وصّلي الباشمهندس يا ورد. 

أومأت ورد وقالت: حاضر.. وهنزل بعدها المحل عشان في تسليم أوردر خطوبه كمان نص ساعة. 

خرجت ورد برفقة حسام ليستقلا المصعد سويّاً فبادر بالحديث قائلاً: 

=إنتي اللي بتعملي بوكيهات الورد بنفسك؟! 

أومأت بنعم ثم قالت: في حاجات أنا اللي بعملها و حاجات تانيه تخصص مدام ماجدولين لأنها بتكون لزباين قدام للمحل فـ عايزين مدام ماجدولين اللي تجهزها بنفسها.. بس النهارده إستثنائي عشان هي تعبانه أنا اللي هعمل أوردر الخطوبه ده.. مع إني مش بحـ................ 

بترت كلمتها فوراً وهي تنظر حولها بعينٍ فزعه وقالت: 

_إيه ده؟! الأسانسير عِطل!! 

نظر إلي عيناها التي تتسع خوفاً و برزت غياماتها بهلع فقال: 

=إهدي.. أكيد عُطل بسيط وهيتصلح بسرعه. 

نظرت إليه بخوفٍ شديد وقالت:عُطل بسيط إيه!! أكيد هنتحبس هنا ومش هنعرف نخرج دلوقتي. 

=لأ متقلقيش.. أهم حاجه خدي نَفَسك بالراحـه. 

ثم ضرب جبينه بكفه وتمتم متذكراً: البخاخه..!! 

نظرت إليه عندما لاحظت تشتته وقالت: في إيه؟! 

=مفيش أي حاجة.. أقفي بس فاردة جسمك و إرفعي دماغك لفوق عشان تفضلي محافظه علي التوازن بتاعك.. ومتفكريش في أي حاجة.. هو وقت بسيط وهيتصلح. 

هزت رأسها ببطء وهي تنظر إلي أطراف يدها الباردة وقالت من بين أسنانها التي بدأت تصطك من فرط الخوف: 

_هو في أسوأ الظروف ممكن إيه اللي يحصلنا؟! ممكن الأسانسير يقع و نموت زي ما بييجي في الأفلام؟! 

=لالالا مفيش الكلام ده خالص إطمني.. وبعدين الأسانسير في حالة كويسه يعني أكيد بيتعمل له صيانه بصفه دوريه.. متشغليش دماغك ولا تفكري زي ما قولتلك. 

ثم تابع وهو يحاول ثنيها عن تفكيرها السلبي وقال: 

=إيه رأيك نستغل الوقت ده في إننا نتعرف علي بعض أكتر.. يضايقك لو أحكيلك عن نفسي شويه؟! 

هزت رأسها بنفي فقال ضاحكاً : طب إقعدي بقا ولا هنتكلم عالواقف. 

نظرت إليه بتعجب وقالت: أقعد بجد؟! 

_بجد والله إقعدي.. وعلي فكرة ده الصح لما الأسانسير يعطل إنك متفضليش واقفه و تقعدي عالأرض. 

جلست علي الأرض تضم ركبتيها إلي صدرها و تسند رأسها إلي حائط المصعد من خلفها ففعل هو المثل و بدأ بسرد حكايته: 

_أنا يستي حسام بدر الدين موافي.. عندي 33سنه.. عندي أخت واحده إسمها حنين أصغر مني بـ 7سنين.. والدتي متوفيه من 4سنين و والدي مات قبل منها بسنه.. مات بسرطان الرئه.. كان مُدخن شَرِه زيي كدا. 

قال الأخيرة ضاحكاً بسخريه ثم أكمل وقال: الله يرحمه كان حنين جداً ولكنه كان شديد جداً جداً.. مبيحبش الدلع الزيادة أو المبالغ فيه و يمكن انا خدت نفس طباعه.. علي عكس والدتي تماماً اللي كانت بتحب الهزار و الخروجات و الهدايا بمناسبه ومن غير مناسبه و ده كان السبب في إنهم إنفصلوا لأنهم مكانوش قادرين يتحملوا طباع بعض.. هو كان شايف إنها تافهه و سطحيه وهي كانت شايفه إنه محبكها بزيادة و بخيل فـ وصل الحال بيهم إنهم إنفصلوا. 

زفر بخفه وتابع: وطبعاً بعد الإنفصال هي كانت عايزه أعيش معاها أنا و حنين وهو مكانش حابب يفرقنا عن بعض بس أنا اللي إخترت إني أكون معاه.. سيبتها و عيشت معاه و هي خدت حنين و سافرت لندن لأخوها و أمها هناك.. علي قد ما كانت بتوحشني هي و حنين بس كان عندي قناعه تامه إني إخترت المكان الصح.. وجودي معاها كان هيخلق مني إنسان تافه و فاشل.. و ده للأسف اللي حصل لـ حنين.. خليتها شبهها في كل حاجه.. تفكيرها شبهها.. أحلامها شبهها.. عايزة كل حاجه تحت رجليها ومش مهم اللي حواليها شبهها. 

سَعِد كثيراً عندما شاركته الحديث و سألته: طب و حالياً بتتعامل مع أختك إزاي؟! 

_حنين إتجوزت من سنتين.. صاحبي من صغري و كنا زمايل أيام الدراسه.. إنسان مخلص و مجتهد و نبيل.. بس هي طبعاً ماشيه علي نفس نهج أمها الله يرحمها.. فـ مش متفائل خير بصراحه. 

=طب و إنت مش متجوز؟! 

_أنا؟! لا مش خاطب ولا متجوز و الظاهر كده مش هيحصل خالص. 

=ليه يعني؟! 

زمّ شفتيه بحيرة ثم قال: مش عارف.. بس حاسس إن التركيبه بتاعتي أنا و أبويا الله يرحمه دي صعب حد يعرف يتعايش معاها.. خصوصاً إن أغلبية البنات بقت طريقة تفكيرهم سطحيه و بيبصوا علي المظاهر بس.

أغمضت عينيها بتعب و بدأت شفتاها ترتجف وهي تقول: 

=أكيد مش....... مش قادرة أخد نَفَسي. 

ــــــــــــــــــــــــــــــــــــــــــــــــــــــــــــــــــــــــ

يقف مزداناً ببذته اللامعه وهو في أبهي طلاته يكاد يهشم زجاج ذلك المتجر من فرط الغيظ فقال: 

_أنا مش عارف إزاي محل ورد مشهور زي ده يبقا معندوش مصداقيه ولا إلتزام بالمواعيد كده! 

=ما تهدي بقا يا عصام خيلتني.. رايح جاي..ما انا بقالي ساعه بقولك تعالي نروح محل تاني و نعمل بوكيه غيره بسرعه ما المحلات كتير. 

زفر عصام بحدة و قال:يا أستاذ حماده مفيش وقت.. حتي لو روحت لأي محل تاني هيقوللي أقل حاجه ساعه. 

_ساعه في بوكيه ورد؟! ليه هو هيعملك بوكيه ورد ولا حلة محشي؟! 

=مش كده بس رحمه عايزة أنواع ورد معين وأنا كنت موصيهم هنا علي التفاصيل بالظبط. 

قال حمادة وهو يربت علي ظهره: طبب معلش يلا.. عوضك علي الله و تعالي نشوف أي محل تاني بدل ما الليله تبوظ. 

ـــــــــــــــــــــــــــــــــــــــــــــــــــــــــــــــ

بداخل المصعد يجثو حسام علي إحدي ركبتيه وهو يحاول تهدئة ورد التي أشرفت علي فقد الوعي فيقول: 

_يا آنسه ورد.. إهدي من فضلك عشان تحافظي علي الأكسجين اللي في جسمك. 

=مش عارفه أتنفس.. حاسه إني هيغمي عليا. 

أمسك بيديها بين كفيه وهو يحادثها ويقول: 

_هدّي نفسك و كل حاجه هتتحل.. يا آنسه ورد.. سمعاني؟! 

أومأت بجفنيها للأسفل في دلالةٍ منها علي أنها تسمعه فبدأ هو ينفخ في وجهها أنفاساً منتظمه لعلها تساعدها في البقاء واعيه وهو يقول: 

_آنسه ورد.. يا آنسه.. يا ورد. 

فرّقت بين جفتيها بوهنٍ لتنظر إليه بأعين دامعه مما أرغمه هو عن التوقف عن النفث بوجهها و ظلّ ينظر إليها و لأول مرةٍ يغوص بعيناها. 

ظل ينظر إليها بثبات ولا يحيد ببصره عنها و كذلك هي أمعنت النظر بعينيه ولأول مرة تكاد تقسم بأنه أجمل رجلٍ قد رأته عيناها.

تعليقات