رواية عروس البحر الفصل الثالث عشر
آدم كان بيجري في المستشفى وهو شايل ملك بين إيديه، وشه أصفر وقلبه بيدق بوجع عليها
آدم بصريخ: "دكتوووور! حد يلحقني بسرعة! مراتي حامل!"
الممرضين جريوا عليه بتروللي، وحطوا ملك عليه ودخلوها أوضة الطوارئ بسرعة، وقفلوا الباب في وش آدم.
آدم وقف قدام الباب، إيديه بتترعش، وحط راسه على الحيطة وهو بياخد نفسه بالعافية.
صوت صرخة ملك في المحكمة وهي ماسكة بطنها كان لسه بيرن في ودانه.
آدم بصوت مكسور بيكلم نفسه:
"يارب.. احفظهملي يارب.. أنا ما صدقت لقيتهم.. متوجعش قلبي فيهم يارب."
في اللحظة دي، موبايله رن تاني.... "زياد".
آدم طلع الموبايل بإيد بتترعش، قلبه وقع في رجليه.. خاف تكون أمه حصلها حاجة هي كمان في برلين.
رد بصوت مخنوق: "ألو.. إيه يا زياد؟! انطق في إيه؟! أمي مالها؟!"
صوت سارينة إنذار عالية كان جاي من تليفون زياد، وزياد بيصرخ.
زياد بذعر: "آدم! الحقني يا آدم! أنا في مصيبة سودة!"
آدم حس إن روحه بتتسحب: "أمي حصلها إيه يا زياد؟! اتكلم!"
زياد وهو بينهج: "أمك وست الحسن.. دخلوا المطبخ يعملوا محشي كرنب، وسابوا التسبيكة على النار، والدخان ملى الشقة، وجهاز الإنذار بتاع العمارة كلها ضرب! المطافي الألمانية جت كسرت باب الشقة، وأنا واقف قدامهم دلوقتي لابس المريلة وماسك حلة المحشي ومش عارف أقولهم كلمة ألماني واحدة غير (شتراسه)!"
آدم غمض عينه وخرج نفس طويل كان محبوس في صدره.. ما بقاش عارف يضحك ولا يشتمه.
آدم بتعب: "يعني أمي وست الحسن كويسين؟"
زياد: "كويسين إيه يا عم؟! دول واقفين في البلكونة بيزعقوا للعسكري الألماني عشان داس بالجزمة على السجادة! أنا اللي هتحبس بتهمة إرهاب! كلمهم فهمهم بالله عليك!"
آدم بصوت مجهد: "زياد.. إدي التليفون للضابط."
زياد ادى التليفون للضابط، وآدم اتكلم معاه بالإنجليزي وفهمه الموقف واعتذرله، والضابط تفهم الموضوع ومشيوا.
زياد خد التليفون تاني: "الحمد لله! كنت هروح في داهية وأنا لسه ما شوفتش سالم! المهم قولي، عملتوا إيه في المحكمة؟ ملك كويسة؟"
آدم صوته اتخنق فجأة: "ملك في الطوارئ يا زياد.. جالها انهيار عصبي في المحكمة ومغص شديد.. وأنا واقف بره مستني الدكتور."
زياد ضحكته اختفت واتصدم: "إيه؟! طب والبيبي؟!"
آدم: "لسه مش عارف.. اقفل دلوقتي، وما تقولش حاجة لأمي ولا لست الحسن عشان ما يقلقوش."
قفل آدم الخط، وفي نفس اللحظة باب الطوارئ اتفتح وخرج الدكتور.
آدم جري على الدكتور ومسكه بلهفة: "طمني يا دكتور.. مراتي وابني كويسين؟"
الدكتور ابتسم وحط إيده على كتف آدم: "اهدى يا أستاذ ..
الحمد لله، المدام والجنين بخير."
آدم رجليه خانته، وسند على الحيطة وهو بيمسح وشه بإيده: "الحمد لله.. الحمد لله يارب."
الدكتور بجدية: "اللي حصلها ده تقلصات شديدة في الرحم نتيجة صدمة عصبية وانفعال حاد.. لحقناها بمثبتات ومهدئات، والحمد لله الجنين متمسك بالحياة ونبضه ممتاز.. بس المدام محتاجة راحة تامة في السرير لمدة أسبوع على الأقل، وممنوع أي توتر أو زعل لأن ده خطر جداً في الشهر الرابع."
آدم: "ممكن أدخلها؟"
الدكتور: "اتفضل، هي بدأت تفوق من المهدئ، بس ياريت بدون أي انفعال."
قبل ما آدم يدخل، لقى المحامي بتاعه جاي بيجري ووشه عليه علامات فرحة كبيرة.
المحامي: "آدم بيه! طمني، مدام ملك عاملة إيه؟"
آدم: "بخير الحمد لله.. إيه اللي حصل في الجلسة بعد ما خرجنا؟"
المحامي بابتسامة انتصار: "القاضي بعد ما شاف انهيار مدام ملك، وسمع اعتراف سعاد الصريح قدام المحكمة بإنها قفلت الباب على أختها، وشهادة الحاج محمود.. رفع الجلسة للمداولة، ولسه ناطق بالحكم حالاً!"
آدم بانتباه: "حكم بإيه؟"
المحامي: "تحويل أوراق سعاد إبراهيم لفضيلة المفتي للتصديق على حكم إعدامها! والمؤبد لرشدي، و15 سنة سجن مشدد لكريم المحامي، و5 سنين لفتحي!"
آدم غمض عينه وأخد نفس عميق.. أخيراً.. الكابوس انتهى للأبد.
آدم: "شكراً يا أستاذ حسن.. تعبتك معانا."
المحامي: "ده واجبي يا آدم بيه، الحق رجع لأصحابه.. وحمد لله على سلامة المدام."
جوه أوضة المستشفى.
ملك كانت نايمة على السرير، وشها شاحب، ودموعها بتنزل وهي حاطة إيدها على بطنها.
آدم دخل ، وقفل الباب وراه.
أول ما شافته، شفايفها اترعشت وقالت بصوت ضعيف: "آدم.. سالم.. ابني حصل له حاجه صح؟"
آدم جري عليها، وقعد على ركبه جنب السرير، ومسك إيدها باسها بلهفة: "بعد الشر عليه وعليكي.. سالم جوه كويس وبخير وزي الفل.. الدكتور قال إنه بطل زي أمه ومتمسك بيكي."
ملك شهقت بالبكاء وحمدت ربنا: "الحمد لله.. كنت هموت من الرعب يا آدم.. حسيت بوجع فظيع، افتكرت إني خسرته."
آدم طلع قعد جنبها على السرير ، وأخدها في حضنه ، وحط راسها على صدره.
ملك عيطت بحرقة وهي ماسكة في قميصه: "سمعت قالت إيه يا آدم؟ قفلت على أمي الباب وهي بتولع.. سابتها تموت عشان كانت بتغير منها.. وكانت بتكرهني عشان أنا شبهها.. أنا عشت عمري كله مع قاتلة أمي يا آدم!"
آدم ضمها بقوة، وباس راسها: "هششش.. خلاص يا حبيبتي، كله خلص.. القاضي حكم عليها بالإعدام.. حول ورقها للمفتي يا ملك.. ورشدي خد مؤبد، وكريم 15 سنة.. حق أمك وحقك وحق ست الحسن رجع خلاص."
ملك رفعت راسها وبصتله : "إعدام؟"
آدم مسح دموعها بصوابعه: "آه.. اعترفت بجريمتها بلسانها قدام القاضي.. ربنا خلاها تفضح نفسها بنفسها عشان قلبك يرتاح."
ملك دفنت وشها في صدره وعيطت، بس المرة دي كانت دموع راحة.. النار اللي كانت قايدة في قلبها انطفت أخيراً.
تاني يوم بالليل - في فيلا إسكندرية.
الدكتور منع ملك من ركوب الطيارة لمدة 3 أيام لحد ما حالتها تستقر تماماً، فآدم قرر ياخدها الفيلا بتاعتهم على البحر في إسكندرية يرتاحوا فيها اليومين دول قبل ما يرجعوا برلين.
في أوضة النوم
ملك كانت خارجة من الحمام لابسة روب أبيض قصير، وشعرها مبلول نازل على ضهرها، و عيونها كانت لسه حزينة وسرحانة.
وقفت قدام المراية، وبصت لملامحها.. عيونها البني الواسعة، رموشها الطويلة، شفايفها المرسومة.
كلام سعاد رجع يرن في ودانها: *(فضلتِ إنتي في وشي.. شبهها في كل حاجة.. كنت كل ما أبصلك أفتكرها فأكرهك أكتر!)*
دمعة نزلت على خدها من غير ما تحس.
فجأة، إيدين دافيين حاوطوا خصرها من ورا، وآدم سحبها لصدره العريان، وباس رقبتها
آدم بصوت هادي: "لسه بتفكري في كلامها؟"
ملك : "غصب عني يا آدم.. كل ما أبص في المراية، بفتكر إنها كانت بتعذبني وبتكرهني عشان الملامح دي."
آدم لفها ليه، ومسك وشها بإيديه الاتنين، وبص في عينيها بنظرة طويلة، نظرة عاشق ولهان.
آدم بهمس: "طب إيه رأيك إن الملامح دي هي اللي خلت آدم راشد، اللي عاش عمره كله قلبه حجر، يدوب فيكي من أول نظرة؟"
قرب شفايفه وباس عينيها اليمين، وبعدين الشمال.
آدم بصوت واطي ومغري: "العيون البني دي.. أول ما بصتلي في المكتب بتحدي، خطفت روحي."
نزل بشفايفه على خدها لحد ما وصل لشفايفها، وباسها بوسة رقيقة: "والضحكة دي.. هي اللي رجعتلي الحياة بعد ما كنت ميت."
إيده نزلت فكت حزام الروب بتاعها ، والروب وقع على الأرض، وبقت واقفة قدامه بقميص نوم رقيق جداً بلون البحر.
ملك وشها احمر، وحاولت تغطي نفسها بإيديها، بس آدم مسك إيديها ومنعها، وعيونه الزرقا كانت بتلمع بشغف وجرأة.
آدم بأنفاس سخنة: "إوعي تخبي جمالك عني.. إنتي آية من الجمال يا ملك.. وربنا عوضني أنا بيكي."
شالها بين دراعاته وحطها على السرير ، ونزل جنبها، وبدأ يوزع بوساته على رقبتها وكتفها ونزولاً لبطنها البارزة، اللي قعد يبوس فيها بحنان خلاها تبتسم من وسط دموعها.
ملك حطت إيدها في شعره وقربته ليها: "بحبك أوي يا آدم.. إنت العوض الحقيقي في حياتي."
آدم ، بص في عيونها برغبة صريحة: "وأنا بعشقك يا عروس البحر.. ودلوقتي هثبتلك قد إيه كل تفصيلة فيكي بتجنني."
وخطف شفايفها في بوسة طويلة، جريئة، مليانة شوق وحب.. ليلة قدر فيها آدم بطريقته الخاصة، بلمساته الحنينة وهمساته الجريئة، إنه يمسح من ذاكرتها كل كلمة قاسية سمعتها، ويخليها تحس إنها الملكة المتوجة على عرش قلبه
بعد تلات أيام - في مطار برلين.
آدم وملك وصلوا بالسلامة، وكان زياد مستنيهم في المطار، لابس كاب ونضارة شمس سودا
آدم أول ما شافه ضحك: "إنت لابس نضارة شمس في التلج ليه يا ابني؟"
زياد وهو بيتلفت حواليه بغموض: "هششش! وطي صوتك! أنا متخفي من البوليس الألماني بعد حادثة المحشي! حاسس إنهم مراقبيني وعرفوا إني الخال الأسطوري اللي كان هيولع في برلين!"
ملك ضحكت من قلبها وحضنت زياد: "وحشتني يا زياد، بالله عليك عملتوا إيه في المحشي؟"
زياد بفخر: "أكلناه طبعاً! ده بعد ما المطافي مشيت، قعدت أنا وست الحسن وإلين ضربنا الحلة كلها! الدكتور شولتز لو عرف إن إلين أكلت محشي بالتقلية هيجيله جلطة ألماني!"
آدم ابتسم، بس لاحظ إن زياد بعد ما خلص هزار، بصله نظرة غريبة.. نظرة فيها قلق حقيقي حاول يداريه بسرعة.
آدم استغرب، ولما ملك سبقتهم تركب العربية، آدم مسك دراع زياد ووقفه.
آدم بجدية: "زياد.. في إيه؟ نظرة عينك مش مريحاني.. أمي حصلها حاجة الكام يوم اللي فاتوا؟"
زياد بلع ريقه، واتلفت عشان يتأكد إن ملك مش سامعاهم.
زياد بصوت واطي ومتوتر: "آدم.. إلين كويسة قدامنا.. بس إمبارح بالليل، الدكتور شولتز اتصل بيا أنا عشان عارف إنك في مصر مع ملك ومش عايز يقلقك."
آدم قلبه دق بخوف: "قالك إيه؟! انطق!"
زياد بحزن: "المسح الذري الأخير اللي إلين عملته قبل ما تسافروا.. أظهر إن الكيماوي صغر الورم فعلاً.. بس للأسف، الكيماوي أثر على عضلة القلب عندها بشكل خطير.. والدكتور بيقول إننا قدام قرار صعب جداً.. يا إما نوقف الكيماوي والسرطان يرجع ينتشر، يا إما نعمل عملية استئصال فورية بكرة الصبح، ونسبة نجاحها بسبب ضعف قلبها.. ما تتعداش الـ 30%!"
آدم اتجمد في مكانه .. وحس إن الأرض بتهتز تحت رجليه!
أمه قدامها اختيارين.. والاتنين أصعب من بعض.. والعملية بكرة الصبح!
.........
