رواية سحر ادريس الفصل الأول بقلم فاتن أسامة
كل إللي أعرفه
إنها سابت البلد ومشيت
بعد ما أبوها وأمها إتطلقو..
مامتها إتجوزت بعد شهور العِدة علطول
وأبوها قرر ياخدها ويعيش في القاهرة
بيمسك عكازه وبيبدأ يتحرك في المكتبة
ـ أنت عارف يا أمير يابني، إللي ميحاربش عشان إللي يحبه، بيحصله إيه!
بَتعدل وأنا بسأل بـإهتمام
_ إيه ياعم إدريس؟
بيمسك كتابه المفضل وبعدين بيكمل
ـ بيموت ويعيش وحيد
بياخد نَفَسه وهو بيضحك ضحكة بسيطة
ـ أنا عيشت ٥٦ سنة
إتجوزت، وخلفت، ولسه بحب سعاد
أول ست حبيتها في حياتي
كانت تهبل
إللي يشوفها عقله يطير من كتر الجمال
ولسانك يفضل يردد 'مستحيل'
مستحيل الجمال دا كله
إنسان ياخده لوحده!!
بيقلع نضارته
ـ ساعتها.. كنت جبان
معرفتش أخليها تحبني
ولا خليت قلبي ينطق كلمة 'بحبك'
إتجوزت الشجاع
إللي قالها في وسط أهل الحارة كلها
'بحبك يا سعاد'
وبـحذر قولت
_ مش عارف أقولها إزاي
بس أنت ليه صبرت لحد ما إتاخدت قدام عينك وأنت واقف ساكت مبتعملش أي حاجة
ـ وكأنك بتوصف نفسك يا إبن نيڤين
رديت بـزهق
_ يادي نيڤين وسنين نيڤين
ـ متحاولش
_ معرفش هترضي عنها إمتي، دي ماتت خلاص
ـ كانت شجاعة بزيادة يا أمير
قومت وأنا بتكلم بـحيرة
_ يعني أضيع حُبي زي مانت ضيعته، ولا أحارب عشانه زي ما ماما عملت
وبضحكة جانبية
ـ نيڤين حاربت ديانة كاملة عشان خاطر أبوك
_ كان راجل قمر متنكرش
بيضحك
ـ طول عمرك هايف ومش رزين
_ أنا لو رزين، كنت قدرت أعيش وسطيكو؟
بيرجع ضهره لورا وعيونه فيها حنين للي فات
ـ وحشتني بنت الصرمة
بنضحك وبعدين بيمسح دموعه
_ برغم إننا مقاطعينها، بس لـ أول مرة أعترفلك إني لسه بشتاقلها وبحبها أوي يا أمير
بيطبطب علي كتفي بعد ما قعدت علي رُكبتي قصاده
ـ خليك زيها، حارب عشان حُبك، ولو فيها رُوحك
رُوحك ملهاش قيمة من غير حُبك يا أمير
بمسك إيديه
_ ما خلاص بقا يا خالو، كلنا إيد واحدة، في بلد واحدة
مش نيڤين إللي هتوقعنا في بعض يعني
بيخبطني علي دماغي وهو بيضحك
ـ ماشي يا مسلم
_ هنعمل إيه يا مسيحي دلوقتي
بيقوم من تاني وهو بيدور في كُتبه
ـ عندي ليك الحل الجبار
_ أوعي يكون إللي في بالي
ـ لو تسمع كلامي مرة، كان زمانك متجوزها من زمان
بقعد علي التربيزة وأنا بتكلم بـعقل
_ أنت مسيحي متدين، وأنا مسلم متدين
ليه ندخل السحر بينا؟
بيبصلي من فوق لـتحت
ـ أولا دا مش سحر، دا إسمه علم كيميائي
_ يا جدع!!
ـ أنا قادر علي عمل خلطات طبيعية كيميائية، لجعل الحياة أكثر راحة ومليئة بالسعادة
بَنُط من علي التربيزة وبشده عشان يقعد علي الكرسي
_ يا خالو يا حبيبي بزورك كل فترة، ويمكن فترة وفترة كمان
وفي كل مرة بتحاول تديني خلطة من خلطاتك، وبرفض
فـ متحاولش وخلينا حبايب أحسن
بيزقني فـ بقعد في نص المكتبة وأنا حاضن رجليا
_ أهو هيلقي عليا تعويذة دلوقتي
ـ هما الناس العقيمة بس إللي مبيفهموش في علم تلاقي الأرواح والتركيبات إللي قادرة علي خلق الحُب
بقابل كلامه بـعدم إهتمام فـ بيعلي صوته
ـ من وأنت في ثانوي بتحكيلي عنها
وفي كل مرة بتمشي وبترجع تقولّي لسه ملقيتهاش
وهي في الأصل ولا تعرفك ولا عمرها عرفتك
بيسكت ثواني وبعدين بيقول
ـ تقدر تقولّي أنت ضامن هي بتحب إنسان تاني دلوقتي ولا لا؟
بهز كتافي بـمعني معرفش
وخيبة الأمل بتحتلني شوية بـشوية
وبصوت هادي عكس العاصفة إللي جوايا
_ تفتكر حُبي ليها، يطلع مجرد حدوتة في خيالي، والواقع يكون عكس كدا؟
بيقاطعني بـثقة
ـ بإيدك تغير الواقع دا...
ــــــــــــــــــــ
ـ النهار يطلع، تبدأ تتحرك
من هنا للقاهرة مسافة كبيرة يابني
بشدها لـحُضني
_ حفيدك كبر وبقا راجل
ـ متعودة علي حِسك حواليا من وأنت عيل صغير لسه في اللفة
كبرت ودخلت الهندسة وأنت في حضني هنا، في المنيا
_ دي القاهرة جنبنا هنا، مش بعيد
ـ طيب ما تاخدني معاك
بتردد لحظة وبعدين بقول
_ إيه؟ لا.. مينفعش يا ست شادية، أنا نازل تدريب ضروري، ومستعجل كمان، بحكم إني في رابعة دلوقتي، ولازم أبدأ أتحرك وأفهم الدنيا أكتر
بتقعد علي طرف السرير وعينيها عليا وأنا بجهز شنطتي
وبـحيرة بتقول
ـ أنت أخر مرة روحت لـ إدريس كان إمتي؟
ببلع ريقي بـصعوبة وبكمل ترتيب حاجتي في محاولة مني مقعش بـلساني
_ الشهر إللي فات تقريبًا
بتلمح قميصي إللي كنت لابسه إمبارح وأنا عنده
كنت حاطُه علي السرير عشان تغسله، وبـذكاء:
ـ بس دي ريحة مكتبة إدريس
شديته منها وبـزهول قولت
_ أنا عارف إن دماغك شغالة، بس مش لدرجة حاسة الشَم كمان
شدتني من لياقة قميصي بإيدها اليمين، وإيدها الشمال كانت بتعيد في تربيتي
_ كفاية ضرب بقا
ـ وأنا هسيبك يا إبن نيڤين؟؟
_ يادي أم نيڤين، كل ما حد يعوز يشتمني، يقول إسمها ليه
بفلت نفسي من بين إيديها وبركب فوق الدولاب
_ قسمًا بالله لو ما سيبتيني لـ أنُط من هنا وأنتحر
بتقعد علي السرير قصادي وبتاخد نفسها بالعافية
ـ خالك إدريس أخيرًا حقق مراده، قدر يفوز علي دماغك ومبادئك بعد العمر دا كله
يا خيبتي أنا ويا فرحة إدريس
يا خيبتي أنا ويا فرحة إدريس
بتضرب على صدرها بخفة، مستنكرة مجرد ذكر سيرته
وقالت:
أعوذ بالله من الشيطان الرجيم، أعوذ بالله من سيرتك يا إدريس
بنزل من علي الدولاب وبقعد علي الأرض قصادها
بمسك إيديها الإتنين وبثبتهم بعد محاولاتها في البُعد
مش عايزة تتكلم معايا !
_ إنتي لازم تسمعيني
ـ مش هسمع
بنسكت شوية، وبعدين ببدأ أتكلم بـهدوء
_ خالي مقدرش ولا كسب، ولا فاز عليا ولا علي مبادئي
إبن إبنك الباشمهندس بدر الله يرحمه، لسه عند مبادئه متغيرش
بضم إيديها أكتر وأنا ببص في عينيها بتركيز
_ حفيدك عمره ما هيعمل حاجة تأذي حد
ـ بجد يا أمير؟
بطبع بوسها علي إيدها وبقول
_ متقلقيش، أنا شيلتها من دماغي خلاص، وقررت أركز في دراستي وبس
ــــــــــــــــــــ
ـ صباح الخير
_ ألاقي فين بيت عبد المجيد السيد عبد المجيد
ـ حتي رُد الصباح يا أخي
قلعت نضارتي الشمسية ونزلت شنطتي علي الأرض
_ يا صباح الحلاوة والجمال والرشاقة، وأحلي سندوتشين طعمية لـ عمي...
ـ حسين
_ لـ عمي حسين يا عم
بفتح كيس الفطار إللي كنت جايبُه لـ نفسي
وببدأ أقسمه بالنص بينا
حسيته جعان بزيادة
فـقررت أقول إني شبعان
ـ أنت منين يابني
_ المنيا
ـ أجدع ناس
بياخد قطمة وبعدين بيقول
ـ أنا بقا عمك حسين، الشهير بـحسين رنجة، أقدم واحد في المنطقة هنا
أعرف كل حارة وكل شارع في وسط البلد
بَرُد بـتعجب مصحوب بـضحكة
_ يا بركة دُعاكي يا شادية
ـ شادية مين
_ متركزش
بنكمل أكل، وبطلب إتنين شاي وبنكمل قعدتنا علي الرصيف
_ إزاي مشهور بـحسين رنجة، وأنت مش شغال في الرنجة؟
بياخد بُق من كوباية الشاي وبعدين بيقول بـحزن بان علي نبرة صوته المهزوزة
ـ كنت أشهر تاجر رنجة، زمان قبل مانت تتولد حتي
بس الدنيا مبتثبتش علي حال
مرة رنجة، ومرة مناديل
قال الجملة الأخيرة بضحكة
تبان ضحكة عادية، بس كان وراها وجع كبير
حاولت أهون عليه، بس إكتشفت إنه مش عايز فلوس وهدفه مش كدا
كل حلمه يرجع لـ الحاجة إللي بيحبها
محل الرنجة إللي إتاخد منه ظلم
وولاد عمه قررو ياكلو حقه، ويدمرو حياته بدون أي سبب
ـ كنت بتسأل علي عبد المجيد
رديت بـلهفة
_ أيوا
ـ كريم وجيت في وقتك
_ مش فاهم!
ـ عبد المجيد بيجوز بنته النهاردة
عيوني بترمش كذا مرة، بحاول أستوعب الخبر
ـ مالك يابني
_ إللي أنا أعرفه إنه له بنت وحيدة
ـ معرفش والله يا إبني، بس النهاردة فرحها، والعزومة عامة، وهناكل كلنا لحمة ببلاش
كان فرحان وبيتكلم كتير، وأنا مفعل وضعية الصامت
‹إللي معاك دي كفيلة تشقلب الموازين›
‹إعمل إللي بقولك عليه وهتشوف العجب بنفسك›
ـ سرحت في إيه
_ خالي
ـ ماله!!
فُوقت من شرودي وبعدين بصيتله بـتركيز
_ مكان الفرح فين؟
ــــــــــــــــــــ
وصلت بوابة البيت
وبهدوء غريب عكس إللي جوايا كنت متسمر في مكاني
بيت كبير الزينة مالية مدخله، الأنوار متعلقة على السور، والورد متوزع في كل حتة، حتى البوابة نفسها متزينة بشكل يخطف العين.
حركة رايحة جاية
وأصوات وضحك وناس بتجهز لفرحة الليلة
كل حاجة كانت بتقول إن النهارده يوم فرحها
فرح سلمي، البنت إللي بحبها من وأنا مراهق في الثانوية
غريبة إني كنت بحلم بنفس اليوم دا
بس وأنا العريس، مش حد غيري!
عيوني كانت شايفة كل التفاصيل
بس عقلي مش قادر يستوعبها
إزاي بعد السنين دي كلها
ملحقش حتي أقولها 'بحبك'
ـ سرحان في إيه تاني
‹دي أول ما ترشها عليها هتحبك علطول›
‹عينيها هتطلع قلوب، وفجأة هتلاقي نفسها مبتفكرش غير في أمير›
‹هتصحي تلاقي قلبها مبيحبش غيرك›
‹دي من أول رمشة عين بعدها.. هتحبك›
ـ يابني..
_ محتاج أشوف العروسة دلوقتي
بقول الجملة وببدأ أتحرك لـجوا
وهو واقف في مكانه مصدوم من إللي سمعه
مبهتمش بيه..
وكل إللي في دماغي أوصَلَّها إزاي قبل فوات الأوان
خطوة ورا التانية بلاقي نفسي وسط بيت كبير
مليان ناس هنا وهناك
وبطرف عيني لمحت بنات داخلين طالعين من أوضة معينة
خمنت إنها هي..
وبقوتي المزيفة.. قررت أطلع
أخدت من واحد من إللي بيركبو الإضاءة، فرع نور
وطلعت فوق قدام أوضتها
ـ شكلك حلو أوي أوي يا سلمي
ـ دا يابخته بالجمال دا كله
ببلع ريقي
وبإيدي المهزوزة بطلع من جيبي العلبة الصغيرة
ـ إنتو هتفضلو زاحمين الدنيا عليها كدا؟
إطلعو برا يلا
ومن حُسن حظي البنات بتبدأ تطلع بالتدريج
ونفس الست.. بتقفل الباب عليها
ببص في الجهة الموازية لما حد بينادي عليا من بتوع الإضاءة
وبيناولني فرع نور تاني
بركبه بسرعة قبل ما حد يدخل عندها الأوضة
وبخطوات تقيلة.. بقرب من الباب
وعينيا كانت يمين وشمال
بمسك الأُكرة
وبفتح الباب بـشويش
كانت واقفة قدام الدولاب
بتعلق هدوم وكل شوية تمد إيدها تاخد حاجة وتحط غيرها مكانها
فستان الفرح كان متعلّق في ركن الأوضة
والطرحة مفرودة على طرف السرير
كل تفصيلة حواليها بتقولّي: خلاص الوقت إنتهي
قفلت الباب ورايا من غير ما يصدر صوت
وعلي بُعد خطوات منها كنت بجمع شجاعتي
فضلت ساكت شوية، مستنيها تلتفت
بس كانت مشغولة بترتيب حاجتها
لحد ما قربت وأنا بنطق إسمها
وإيدي بتفتح العلبة وبترمي الحُبيبات الناعمة إللي جواها عليها
_ سلمي..
قولتها بـإبتسامة حنين
لكنها بتختفي بالتدريج لما بتبصلي..
= سلمي؟ أنت مين يا جدع أنت، وإيه دخلك هنا؟
لساني بيتجمد ونَفَسي بيبدأ يضيق
وحالتي بتسوء أكتر لما سلمي بتدخل الأوضة وبتقول
ـ أنت مين وبتعمل إيه هنا؟
جملتها أخدت منها ثواني كتيرة من الخضة
وكأنها تعرفني بس مش قادرة تجمع أنا مين بالظبط
ببدأ أعتذر وبقول..
_ أنا أسف، إفتكرتها إنتي
ـ هي مين دي؟
ببص ورايا مبلاقيش حد
وعلي الأرض بلاقي ضفدعة مغمي عليها
_ ضفدعة!!
ـ ضفدعة إيه؟
_ دي إتحولت لـ ضفدعة يا سلمي...
