رواية المتبرجة الفصل الأول بقلم محمود الأمين
جري.مة وبتتقيد ضد مجهول عشان بنكون مش عارفين مين اللي ارتكبها، والمجني عليهم كانوا تلاتة: أب وأم وابنهم الصغير. ولكن بعد 10 سنين كاملين تحصل جري.مة تانية عشان نكتشف إن المجني عليها هي الجاني في الجري.مة الأولى.
بلاغ بيوصل لرجال الشرطة من التجمع الخامس إن في بيت بيتحرق، وإن الست سوزي أبو الدهب موجودة في البيت. لما بنتحرك على هناك بنلاقي إن الحريقة ماسكة في كل حتة في البيت، والمطافي كانت بتحاول تتعامل على قد ما تقدر عشان نقدر ندخل ونشوف إيه اللي حصل.
وبعد حوالي نص ساعة الحريقة بتكون اتطفت، وساعتها بنقدر ندخل البيت وبنلاقي جثة الست سوزي على الأرض. كان في حروق في جسمها طبعًا، ولكن سبب الوفاة الرئيسي كان واضح.. طع.نات كتير في منطقة الصدر والبطن.
وعشان أنا كان ماليش في حاجة اسمها سوشيال ميديا، فاللي عرفته من الناس إن الست سوزي كانت بتقدم محتوى على التيك توك، وإنها بتشتغل رقاصة.. وإنها بترقص رقص شرقي.
بس أنا كنت حاسس إني شوفت الست دي قبل كده، فضلت أفكر شوفتها فين؟!.. واتصدمت عشان مخي فجأة عمل فلاش باك ورجعت 10 سنين لورا. وقتها كنت لسه ظابط صغير، وحصلت جري.مة ق.تل، وساعتها المعمل الجنائي أثبت إنها مدبرة.
بس الصدمة مش هنا.. الصدمة إننا دفنا الجثث وتم اعتماد إن التلاتة دول هما الأب والأم والابن.. الأم اللي هي دلوقتي جثة قدامي! طيب لما هي كانت عايشة.. أومال جثة مين اللي إحنا دفناها دي؟
....
المتبرجة
الجزء الأول
من 10 سنين كان عايش واحد اسمه الأستاذ جمعة، وكان متجوز واحدة اسمها سارة ومخلف منها ولد اسمه عماد.. والولد وقتها كان عمره 8 سنين. كان معروف على الأستاذ جمعة إنه شخص متدين وعارف ربنا، وكان بيشتغل مدرس لغة عربية. الحياة كانت غير مستقرة بالمرّة، وده بسبب سارة اللي كانت رافضة جمعة ومش عاوزاه من الأول، وعايشة معاه غصب عنها. سارة من نوعية الستات اللي شايفين إن الست مش بتغلط مهما عملت، واللي بيطلق عليهم في أيامنا دي النسويات. كان عندها أفكار غريبة، من وجهة نظرها إنها متفتحة، ولكن لا تتناسب مع مجتمعنا.
كانت عايزة تخرج ويكون ليها صحاب وتعيش عيشة مرفهة، عكس العيشة اللي هي عايشاها تمامًا، وطبعًا الكلام ده كان مرفوض بالنسبة لجمعة، وكانت العيشة ما بينهم مستحيلة، لحد ما في يوم الناس كلها بتصحى على حريقة كبيرة في بيت جمعة، والناس كلها بتتجمع عشان تطفيها، ولما بينجحوا إنهم يطفوها بيتفاجئوا إن الراجل والست والطفل ماتوا، وجثثهم اتفحمت تمامًا.
ساعتها أنا كنت شاهد على التحقيق في القضية، والمعمل الجنائي أثبت إن الموضوع فيه شبهة جنائية وتم بفعل فاعل.. ولكن بعد نقل الجثث للطب الشرعي الموضوع اتصعب، عشان للأسف ما عرفوش في وقتها يطلعوا عينات DNA سليمة من الجثث. والموضوع زمان كان غير دلوقتي، التقنيات الحديثة اللي موجودة دلوقتي كانت لسه ما ظهرتش بالشكل اللي إحنا فيه دلوقتي.. وساعتها الشرطة اعتمدت إن هما دول جمعة وسارة وعماد، وتم دفنهم بعد ما القضية اتقيدت ضد مجهول، عشان باختصار التحريات أثبتت إن الناس دي عايشة في حالها وما لهمش أي عداوات.
بس أنا متأكد إن اللي موجودة قدامي دلوقتي دي على الأرض مش سوزي أبو الدهب، دي سارة مرات جمعة. رغم مرور السنين إلا إن لسه عارف ملامحها، دي كانت أول قضية أكون موجود في فريق التحقيق فيها ومستحيل أنسى اللي حصل وقتها.. وأكيد كنا هنتأكد من الموضوع.
وبدأنا التحقيق في الجري.مة، وكانت دي بالنسبالي واحدة اسمها سوزي أبو الدهب، وإنها بتشتغل رقاصة وبتعمل محتوى على التيك توك زي ما الناس قالت، ولكن هنتأكد من شكوكي بعدين.
المهم إن رجال الطب الشرعي بدأت تفحص الجثة، ورجال المعمل الجنائي كان الوضع معاهم صعب، خصوصًا إن البيت اتفحم وكانوا بيحاولوا يلاقوا أي بصمات توصلنا لمين اللي ارتكب الجري.مة.
دكتور الطب الشرعي من خلال الفحص المبدئي أكد إن الجري.مة دي حصلت بغرض الانتقام، وده بسبب الطع.نات اللي كانت موجودة في الجسم واللي كانت عشوائية بشكل كبير. وموضوع الحريق اللي حصل فكرني بالجري.مة القديمة، وبعد شوية قدر رجال المعمل الجنائي إنهم يطلعوا بصمة، ولكن كانت مدممة، بس أهي محاولة ممكن نعرف منها مين اللي ارتكب الجري.مة دي.
الجثة بتتنقل للطب الشرعي لاستكمال عملية التشريح، وبعدها برجع على مكتبي عشان نبدأ التحريات والتحقيقات. دي كانت واحدة مشهورة وأكيد ليها أعداء كتير.
وساعتها فريق البحث الجنائي بيكون بدأ تحريات عن سوزي أبو الدهب، ولكن في نفس الوقت ده أنا بفتح ملف القضية القديمة عشان أوصل لوالد سارة، أو بمعنى أصح سوزي. جبت العنوان وطلبت من النيابة استدعاء للراجل ده، وشرحت للنيابة وجهة نظري، وفعلاً طلع استدعاء لواحد اسمه راضي عبد الصمد.
وأول ما وصل تم سحب منه عينة DNA، وطبعًا اتسحبت عينة من الجثة عشان نعمل التحليل.
ولكن في الوقت ده بتوصلني معلومة من الطب الشرعي ومعلومة من البحث الجنائي.. المعلومة اللي وصلت من الطب الشرعي كانت بتقول إنها اتعرضت للاعت.داء قبل الوفاة، وإن في آثار كدمات واضحة على الجسم.
أما معلومة البحث الجنائي فكانت عن إن سوزي دي معاها مشكلة كبيرة مع واحدة اسمها صفاء.
سوزي وصفاء الاتنين كانوا بيشتغلوا في نفس الفرقة، ولكن مش بيرقصوا في ملهى ليلي لا... شغل الفرقة دي كان في فنادق، وكانوا بيعملوا حاجة اسمها الشو الشرقي، وعشان كده كانوا بيسافروا دايمًا لمحافظات ساحلية زي الغردقة وشرم الشيخ، وكانوا بيكسبوا كتير، ولكن سوزي كانت محبوبة أكتر من صفاء، خصوصًا بسبب محتوى التيك توك اللي كانت بتقدمه، والموضوع ده كان عامل غيرة مش طبيعية عند صفاء.
ولكن مش ده هو سبب المشكلة، سبب المشكلة إن صفاء اكتشفت إن جوزها مدحت متجوز سوزي عرفي، في نفس الوقت اللي اكتشفت فيه إنها حامل، ولما خيرته ما بينها وما بين سوزي اختار سوزي وطلقها.. وفي اليوم ده صفاء تعبت وانهارت ودخلت المستشفى، وللأسف فقدت الجنين، ومش كده وبس، ده الدكتور قالها إنها مش هتقدر تخلف تاني بسبب مشكلة في الرحم.
عشان بعد 48 ساعة مدام سوزي تروح على قسم الشرطة وتعمل محضر في صفاء بسبب رسالة تهديد بالق.تل.. صفاء بعتها لسوزي قبل الجري.مة بحوالي 72 ساعة.
وبعد المحضر ده بيحصل طلاق ما بين سوزي ومدحت، اللي بتكون عايزة تعيش في حالها ومش عاوزة مشاكل، وبتكون عايزة تسيب الفرقة، وده طبعًا كارثة بالنسبة لمدحت اللي ماسك الفرقة، عشان سوزي بالنسباله هي الفرخة اللي بتبيض بيضة دهب، ولو سابت الفرقة هيخسر خسارة كبيرة.
وعلى الجانب الآخر النيابة كانت بتراجع تسجيلات الكاميرات اللي حوالين بيت مدام سوزي عشان نعرف مين الشخص اللي دخل عندها.
وأثناء ما بيتم فحص التسجيلات.. بيظهر تحليل العينة، واللي بيثبت وجهة نظري. العينة كانت إيجابية، يعني معنى كده إن الجثة اللي اتدفنت زمان على إنها سارة كانت مش جثتها.. والسؤال هنا: هي كانت جثة مين؟!!
وبكده اتأكدنا إن الجثة دي هي جثة سارة راضي عبد الصمد.
ولكن المعمل الجنائي بيفشل إنه يعرف البصمة المدممة دي تخص مين.. البصمة كانت مجهولة وغير مسجلة، وموضوع إنها مدممة ده كان مصعب الموضوع أكتر.
ومن خلال التحريات اللي وصلها البحث الجنائي كان قدامنا شخصين لازم نحقق معاهم: مدحت وصفاء.
وتسجيلات الكاميرات فعلاً بتوضح إن مدحت راح عند المجني عليها قبل الجري.مة بوقت قليل، رغم إنهم كانوا متطلقين وقتها، ولكن ده طبعًا مش دليل إدانة عشان في شغل ما بينهم.. بس هل الشغل كان بيسمح ليه إنه يروح عندها البيت؟!
ولكن النيابة وهي بتراجع تسجيلات الكاميرات لاحظت حاجة مهمة جدًا، عامل دليفري وصل أوردر قبل الجري.مة بربع ساعة.. والموتوسيكل اللي كان راكبه عامل الدليفري كان عليه علامة طلبات، يعني هو تابع لشركة طلبات، وأكيد هنعرف مين الشخص ده عشان نحقق معاه؟!
وساعتها أنا كنت مع وكيل النيابة بنراجع التسجيلات، والراجل ده وشه ظهر في الكاميرات، والصدمة إن الشخص اللي ظهر ده يبقى...
