رواية المتبرجة الفصل الثاني بقلم محمود الأمين
عامل الدليفري ده أنا كنت أعرفه كويس، واستلمت قبل كده منه طلبات كذا مرة. كان اسمه خالد، بس وجوده في مكان الجريمة قبلها بربع ساعة مش هو ده كان اللغز في الموضوع.. واحد شغال في طلبات، لابس الزي بتاعهم ومعاه أوردر بيوصّله للمكان، يعني وجوده في المكان مش غريب في حد ذاته. اللي لفت نظري والغريب في توصيل خالد للأوردر ده هو الأوردر نفسه.
عشان وأنا قاعد مع وكيل النيابة، طلبت منه يعمل زوم على اسم المطعم واللوجو اللي موجودين على الكيس، وساعتها اتصدمت؛ عشان ده مطعم فرايد تشيكن معروف، ولكنه اتقفل من ست شهور بسبب إنهم اكتشفوا إن الموارد اللي عندهم فاسدة، ومن ساعتها المحل مقفول. وزيادة في التأكيد، اتأكدت من الموضوع بنفسي، المحل ده لسه مقفول.
فإزاي مدام سوزي، أو خليني أقول اسمها الحقيقي، إزاي مدام سارة راضي طلبت أوردر من مطعم مقفول من ست شهور؟ وإزاي خالد استلمه وراح يودّيه؟
وده خلّى النيابة تطلع إذن بالقبض على خالد ده، واتحركت ومعايا قوة من القسم على فرع طلبات الموجود في المحافظة، واللي أكيد خالد شغال فيه. وفي نفس الوقت، النيابة كانت عملت استدعاء لمدحت وصفاء عشان يتم التحقيق معاهم، عشان باختصار هما أكتر اتنين عندهم الدافع للانتقام من سارة.
ولما وصلنا هناك، عرفت من مدير الفرع إن خالد ساب الشغل من كام يوم، وما حدش يعرف عنه حاجة، وإنه لما بعت الناس على السكن بتاعه عشان كان خايف يكون تعب أو حصله حاجة، ما كانش موجود في السكن، ولمّ حاجته كلها ومشي.
ودي حاجة تخلينا نقول إن خالد ده فعلًا هو اللي ارتكب الجريمة. طيب، إيه الدافع اللي عند خالد؟ ولا هو كان مأجور عشان يخلّص على سارة أو سوزي؟
المهم إننا أخدنا العنوان من صاحب الفرع، واتحركنا على السكن اللي كان موجود فيه خالد، واللي كان فعلًا فاضي وما فيهوش أي حد. ولكن إحنا بدأنا نفتش المكان حتة حتة، لحد ما فتحت درج من الأدراج ولقيت فيه مفاجأة غير متوقعة.. صورة!
والصدمة إنها كانت صورة صفاء، مرات مدحت، واللي كانت رقاصة في الفرقة، وعندها عداوة مع سوزي وعاوزة تنتقم منها. والموضوع كان واضح، مش محتاج شرح.. واضح إن خالد ده كان على علاقة بصفاء، وإن هي اللي طلبت منه يعمل كده.
طبعًا فريق البحث الجنائي كان شغال تحريات على الموضوع ده، ووصلتنا فعلًا معلومة منه إن خالد في الفترة الأخيرة وصل طلبات كتير جدًا لمدام صفاء. واتأكدنا من حاجة زي دي من كاميرات المراقبة اللي كانت موجودة عند بيتها، وكمان من شهادة البواب، اللي لما شاف صورة خالد قال إن الراجل ده كان بيتردد على بيت مدام صفاء كتير، وكان بيوصل أوردرات.
ولكن المعلومة اللي أخدنا بالنا منها هي إن البواب، واللي كان اسمه سعد، قال إن الراجل ده كان بيتأخر عند مدام صفاء.. يعني شكنا كان في محله.
وخالد بنسبة كبيرة هو اللي ارتكب الجريمة بالاتفاق مع صفاء.
وفي عز ما إحنا شغالين في تحريات وتحقيقات، فات ميعاد الاستدعاء الخاص بصفاء ومدحت، وعشان كده الموضوع اتقلب من استدعاء لإذن بالقبض عليهم.
وكنت متوقع إن لما أروح عندهم البيت هلاقيهم هربوا. كان في مليون سيناريو في دماغي وقتها، ولكن لما وصلت هناك لقيت السيناريو المليون وواحد!
خبطنا كتير على الباب ومحدش فتح، فاضطرينا نقتحم الشقة، وساعتها اتصدمنا عشان لقينا مدام صفاء مقتولة وسايحة في دم.ها، ولقينا الأستاذ مدحت واقع على الركن في الصالة، وفي إيده سكينة، وكان مضروب على دماغه بآلة حادة.
والآلة الحادة دي كانت موجودة في الأرض هي كمان. جريمة، ولكن اللي أخدنا بالنا منه إن ما فيش كسر في أي باب أو شباك، وفي كدمات واضحة كانت على جسم المجني عليها، وواضح إنه حصلت مقاومة من المجني عليهم.
طبعًا رجالة المعمل الجنائي والطب الشرعي وصلوا، وبدأ فحص الجث. ة ومسرح الجريمة. ومن حسن حظنا إن الأستاذ مدحت كان لسه عايش، ولكن بصماته كانت موجودة على السكينة. واتنقل للمستشفى وكان في حالة حرجة.
وبعد ما الرجالة خلصوا فحص المكان، والطب الشرعي كان خلص الفحص المبدئي، واتنقلت الجث. ة للطب الشرعي، كنا خلاص هنتحرك من الشقة، ولكن هنا اتصدمت لما لقيت إن كيس الفرايد تشيكن اللي ظهر مع خالد في الجريمة الأولى موجود قدامي في مسرح الجريمة التانية!
واضح إن خالد ليه علاقة بالجريمة دي كمان.
وبمراجعة الكاميرات اللي كانت حوالين العمارة، اتضح فعلًا إن خالد وصل ومعاه نفس الأوردر، ودخل عند مدام صفاء. ولكن الكاميرات بعد خمس دقايق جابت الأستاذ مدحت وهو بيركن عربيته ونازل بيجري.
وطبعًا كنا محتاجين نفهم هو إيه اللي حصل؟!
عشان ساعتها سعد البواب فهمنا إنه هو اللي اتصل بالأستاذ مدحت لما خالد دخل الشقة عند مدام صفاء، وده هو السبب اللي خلّى مدحت ييجي وينزل ويدخل الشقة بالسرعة دي.
كملنا مراجعة الكاميرات، وبعد خمس دقايق خرج خالد من العمارة، وركب الموتوسيكل واتحرك.
رجعت على المكتب، وكنا قالبين الدنيا على اللي اسمه خالد ده من ناحية، ومن ناحية تانية كنا مستنيين الأستاذ مدحت اللي دخل في غيبوبة يفوق عشان نفهم منه إيه اللي حصل.
وساعتها بيدخل عليّا واحد اسمه الرائد عادل، وبيبلغني إنهم أثناء فحص تليفون المجني عليها صفاء لقوا محادثات ما بينها وما بين خالد، واللي واضح إنه كان بيكلمها من إيميل جديد مش عليه أي معلومات.
بس من خلال المحادثة لاحظت إن خالد هو اللي كان بيسأل على سوزي من بداية تعارفه بصفاء، وكان بيقول إنه معجب بيها، ولكن بعد كده المحادثة قلبت لعلاقة ما بين صفاء وخالد، وأكيد هي كانت بتخطط عشان تخلّص من سوزي وتخلّي خالد يخلّص عليها.
ولكن في الوقت ده بيظهر تقرير المعمل الجنائي والبصمات. طبعًا البصمات اللي على السكينة كانت بترجع لمدحت اللي في العناية المركزة دلوقتي، ودي حاجة مفهومة؛ لأن السكينة كانت في إيده لما دخلنا الشقة.
ولكن البصمات اللي على الآلة الحادة كانت بصمات صفاء!
والسيناريو وقتها اللي كان في دماغي إن مدحت وصل البيت ولقي صفاء مع خالد، وحصلت مشكلة كبيرة، وخالد قدر يهرب. وفعلاً الكاميرات كانت جايباه وهو نازل يجري.
واللي لفت انتباهي أكتر في التسجيلات إن سعد البواب اتحرك ناحية الشقة بعد ما خالد نزل، ولكن رجع قعد مكانه بعد دقيقة واحدة.
يعني معنى كده إن المشكلة كانت يا إما لسه شغالة، يا إما لقى الدنيا هادية، فقرر يرجع يقعد مكانه.
ودي نقطة كنا محتاجين نسأل فيها سعد البواب، وفعلاً تم استدعاؤه، ووصل حسب الاستدعاء، وأكد إن بعد ما خالد نزل من العمارة هو راح ناحية الباب، وساعتها لقى إن الدنيا هديت، فرجع قعد مكانه.
يعني وارد يكون خالد هو اللي خلّص عليهم هما الاتنين، ومسح بصماته من المكان، وخلّى بصمات صفاء هي اللي تبقى على الآلة الحادة.
وبعدها خرج.
كل الاحتمالات كانت واردة، إلا احتمال واحد بس.
وده كان لما وصلنا بلاغ عن شقة بتتحرق في منطقة معروفة بالهدوء. اتحركنا على المكان، ولما وصلنا هناك لقينا الموتوسيكل اللي كان بيركبه خالد مركون قدام العمارة دي.
وساعتها كانت المطافي طفت الحريقة، فطلعنا واقتحمنا الشقة، ولقينا جوه جث. ة متفحمة لشاب، وعرفنا من بواب العمارة، اللي كان اسمه سالم، إن اللي ساكن في الشقة دي واحد اسمه خالد.
والمعمل الجنائي أكد من خلال الفحص إن الجريمة تمت بفعل فاعل.
ساعتها أنا كنت هتجنن.. مين اللي ورا كل ده؟ إحنا كنا خلاص بنقول إن خالد هو اللي ارتكب الجرايم دي!
ولكن لفت نظري بطاقة موجودة في مسرح الجريمة. النار كانت لحقتها، ولكن لسه البيانات واضحة.
وأول ما بصيت في البطاقة كانت المفاجأة...
شكرا لزيارتكم عالم روايات سكيرهوم
