رواية مجهول النسب الفصل الأول بقلم ياسر عوده
كانت صدمه ليا لما جتلي هيام وقالتلي:
-انا حامل يا كريم.
-حامل ازاي يعني؟
-زي أي وحده متجوزه حملت، هكون حامل ازاي، في ايه يا كريم، انت الفرحه مش مخلياك مصدق ولا ايه.
-هيام المواضيع دي مافهاش هزار، يعني ايه حامل، اتأكدتي ازاي؟
-مالك يا كريم بتتكلم كده ليه، انا حامل واتأكدت من الحمل، الاول جبت اختبار الحمل المبدئي، ولما كانت النتيجه اجابيه مارضتش اقولك قبل ما اتأكد 100%، وعلشان كده روحت للدكتور وكشف عليا وقالي اني حامل.
-احنا متجوزين بقالنا 10 سنين، ومافيش حمل اشمعنا الحمل حصل دلوقتي؟
-ايه الكلام اللى انت بتقوله دا، حد يقول الكلام اللى انت بتقوله دا؟
-طيب جهزي نفسك هنروح للدكتور.
-ما انا روحت وقالي حامل.
-لا هنروح لدكتور تاني، يمكن الدكتور دا غلط.
-مع اني مش فاهمه احنا ليه هنروح لدكتور تاني، بس انا موافقه يمكن تصدق اني حامل.
وفعلا روحت معاها لدكتور، ولما كشف عليها وعمل سونار كمان لقيته بيقولي:
-مبروك المدام حامل.
ماكنتش قادر استوعب الصدمه، وعلشان كده قولتله:
-انت متأكد يا دكتور من اللى بتقوله، ممكن تكشف تاني؟
-طبعا متأكد من كلامي، المدام حامل.
خدت هيام وخرجنا من عند الدكتور وروحت لـ دكتور تاني، ولما لقتنا واقفين قدام باب العياده بتاعته الدكتور التاني قالتلي:
-في ايه يا كريم، احنا اتأكدنا اني حامل، جايين هنا نعمل ايه؟
-زياده تأكيد مش اكتر.
-طيب تمام اللى تشوفه، مع اني شايفه انك بتضيع فلوسك على الفاضي بس انت حر.
-معلش علشان ارتاح.
ودخلنا للدكتور التاني، وبعد الكشف قالي نفس الكلام:
-مبروك المدام حامل.
وقتها ماردتش وخت مراتي وروحت البيت، ورغم انها فضلت تتكلم عن الطفل ومستبل وتسألني:
-عاوز المولو ولد ولا بنت، بالنسبالي عاوزه بنت، بس كل اللى يجيبه ربنا كويس ورضا احنا كنا طايلين.
وفضلت تتكلم وانا ساكت، وبعدها قولتلها:
-انا هدخل انام.
وسبتها ودخلت انام، الحقيقه انا كان نفسي انام بس ماعرفتش، والسبب لاني كان عقلي مشغول باللي عرفته، ازاي هيام حامل وانا عقيم، ايوه عقيم دا الكلام اللى الهولي الدكتور قب كده من كام سنه لما اتأخر حمل هيام، ورفضت اني اقولها علشان ماتعرفش ان العيب مني ومرت السنين وكل مره لما كانت تجيب سيره الخلفه والاطفال كنت بقولها لما ربنا يريد ساعتها كل حاجه هتحصل، وقتها الحقيقه كنت بصبرها، بس ماكنتش عارف انها هتيجي في يوم بعد السنين دي كلها وهتقولي انها حامل، طيب ازاي او السؤال الصح من مين؟
تاني يوم انا روحت للدكتور اللى كنت بتابع معاه زمان، وقولتله:
-انا عاوز اكشف واعيد التحاليل يا دكتور، وعاوز اعرف لو المشكله اللى عندي ممكن تكون اتحلت في موضوع الخلفه ولا لا؟
-مافيش مشكله يا استاذ كريم، هكتبلك على اسامي تحاليل تعملها وبعدها هقولك كل اللى انت عاوزه.
وفعلا روحت وعملت كل التحاليل اللى قال عليها في افضل معامل تحاليل في مصر كلها، وبعد ما طلعت النتيجه وشافها قالي:
-بص يا استاذ كريم واضح ان حالتك اتحسن عن الاول.
وقتها حسيت بشيء من الراحه وسألته:
-يعني انا ممكن اخلف دلوقتي.
سكت للحظات قبل ما يتكلم تاني وقالي:
-ماقدرش اقولك اه وماقدرش اقولك لا.
-مش فاهم حاجه يا دكتور، يعني اقدر اخلف ولا مش هينفع.
-زي ما قولتلك حالتك اتحسنت عن الاول، بس في نفس الوقت لسه احتماليه حصول الخلفه ضعيفه جدا، اقل من 1% تقريبا.
-دي نسبه معدومه تقريبا، يعني مستحيل اخلف معاها.
-مش مستحيل هو صعب بس مش مستحيل، والفرق بنهم كبير اوي، وبعدين يا استاذ كريم حابب اعرفك ان الانجاب دا نوع من انواع الرزق اللى ربنا مقسمه على العباد، ووقت لما يجي رزقك مش هتتحسب بالنسب، لان ربنا بيسبب الاسباب، وفي حالات كتير انا اعرفها كان الحمل فيها مستحيل تقريبا، بس ربنا اراد ان يحصل حمل وانجاب ودا اللى حصل، واللى اقصده بكلامي ان الموضوع مابيتحسبش بالارقام او بالورقه والقلم، لان ربنا بيبقى ليه تدابير تانيه خالص.
كلام الدكتور لغبطني اكتر، مع انه كان بيديني امل ان ممكن مراتي تحمل فعلا، بس زي ما قال الاحتمال ضعيف اوي، وعلشان كده انا سألته:
-الواد يتأكد ازاي ان الجنين دا ابنه.
استغرب الدكتور وقتها من سؤالي، بس هو جاوبني على السؤال وقال:
-الموضوع بسيط جدا، لما الجنين يتولد وقتها ممكن يتعمله تحليل الحمض النووي، ووقتها ممكن تتأكد لو كان الطفل ابنك او مش ابنك.
-شكرا يا دكتور.
خرجت من عند الدكتور وانا واخد القرار، لازم اصبر واستحمل لغايه لما هيام تولد، وبعدها هتأكد، وصدقوني الموضوع ماكنش سهل خالص عليا، اصل انا وهيام اتجوزنا بعد قصه حب كبيره، مش من السهل عليا اني اشك فيها، ومش فاهم هي لو فعلا عملت كده يبقى عملته ازاي.
الايام والشهور كانت بتمر بصعوبه شديده اوي، بس كنت مستحمل وكنت بحاول اتعامل مع هيام بشكل طبيعي جدا، وفعلا مرت الشهور وجه يوم الولاده، ودخلتها تولد في مستشفى خاصه ومأثرتش معاها خالص، وبعد ما اتأكدت انها بقت كويسه وخلفت بنت وقتها طلبوا مني في المستشفى اكمل الاجراءات علشان اسجل المولوده، بس وقتها مسئول المستشفى اتصدم لما قولتله:
-انا كنت عاوز اعمل تحليل الحمض النووي ليا انا والمولوده.
كنت شايف الصدمه على وشه وكان مفكر اني خايف ان المولوده اتبدلت في الحضانه مثلا وقالي:
-يا فندم انا عاوزك تبقى متأكد وواثق اننا بنحافظ على المواليد وبنحط كل مولود في مكان مخصص معاه كل البيانات بتعته، ومستحيل أي مولود انه يتبدل مع مولود تاني.
-يا فندم انت فاهم الموضوع غلط، وانا مش هقدر اشرحلك حاجه، وعاوز اعمل تحليل الحمض النووي وهدفع أي تكاليف انتم هتطلبوها، ممكن تعملولي دا؟
-مافيش مشكله زي ما انت عاوز.
وفعلا خدوا مني عينه، وخدوا عينه من المولوده وكنت قاعد ومستني النتيجه بفارغ الصبر وانا مش عارف ايه اللى هيحصل معايا، معقول هكمل حياتي عادي ولا هسمع خبر هيقلب كل حياتي.
وبعد كام ساعه جالي مسئول المستشفى وطلب مني اقعد معاه في مكتبه، ولما قعدت معاه لقيته بيقولي:
-الحقيقه يا فند انا مش عارف اقول لـ حضرتك ايه؟
-اتكلم على طول انا سمعك، كل اللى عاوز اسمعه الحقيقه مش اكتر من كده.
-الحقيقه ان الحمض النووي ليك انت والمولوده غير متطابق نهائيا.
هو قال الكلام دا وسكت خالص، وانا زي ما يكون في حد خبطني على دماغي بشومه، رغم اني فكرت كتير في اللحظه دي وحاولت اهيء نفسي ليها، بس لما سمعتها فعلا كان الوضع مختلف تماما، وماتكلمتش مع مسئول المستشفى خالص، كل اللى قولتهخ وانا ماشي بعد ما خدت التقرير اللى اتعمل:
-شكرا.
وخرجت من باب مكتبه وبعدها من المستشفى كلها، وماكنتش عارف اروح فين ولا اعمل ايه، وفجأه لقيت نفسي قدام قسم الشرطه، وقتها بس عرفت انا عاوز ايه، ودخلت من باب القسم واول عسكري قابلته قولتله:
-فين مكتب حضره الضابط.
شاورلي على مكتب الضابط، ولما دخلت للضابط في المكتب وطلب مني اقعد قالي:
-ايه الخدمه اللى اقدر اقدمهالك؟
-انا جاي اعمل محضر في مراتي، محضر اتهما فيها بالزنا وكمان برفض نسب الطفله اللى هي خلفتها وبتقول انها مني.
-انت عندك دليل على كلامك ده؟
وقتها قدمتله التقرير اللى خدته من المستشفي، وحكتله كل اللى حصل من البدايه للنهايه، وقتها جطلب واحد من افراد الشرطه وقاله:
-اكتب محضر بكل اللى قاله الاستاذ، وبعدها امشي في الاجراءات القانونيه بتعتك.
-تمام يا فندم.
