رواية مجهول النسب الفصل الثاني بقلم ياسر عوده
وبعد ما خلصت المحضر بتاعي خرجت من القسم وانا مش متخيل اني قدمت محضر في مراتي هيام، زي ما قولتلكم قبل كده انا متجوزها عن قصه حب، وهعرفكم انا اتجوزتها ازاي علشان تقدروا اللى حاسه جوايا دلوقتي.
انا اعرف هيام من ساعه لما كنا بندرس لسه في الثانويه العامه، ايوه زي ما سمعتم كده، اصل انا وهيام كنا ساكنين في منطقه وحده، والقدر كان مجمعنا باستمرار، انا وهي كنا بناخد في مجموعات وحده يعني بشوفها في المدرسه وكمان في الدروس الخصوصيه، وفضلت معجب بيها لمده سناتين، لغايه لما قررت اني لازم اتكلم معاها، وفي يوم انا اتصرفت زي أي مراهق وقتها وكتبتلها جواب وحطيته في كشكولها من غير ما هي تنتبه، بس اللى انتبهت وقتها وحده زميله لينا وخدت الجواب، وراحت سلمته للاستاذ في المدرسه، وقتها الاستاذ وفي حوش المدرسه وقف في طابور الصباح وفي المايكروفون وقال:
-دا جواب طالب مراهق منكم حطه في كتاب زميلته، وانا صممت اني اقراء عليكم الجواب علشان يبقى على عينك يا تاجر، وفضحته تبقى بجلاجل، انا مش هقول على اسم الطالبه اللى هو كاتبلها الجواب، وهقول على اول اسم من اسم الطالب علشان يبقى نصف مفضوح، ومن حسن حظه ان في اكتر من طالب في المدرسه اسمهم شبه اسمه.
وزي ما قال الاستاذ وقتها كانت فضيحتي انا وكل اللى شاسمهم شبه اسمي على كل لسان، وكنت مرعوب اروح المدرسه وقتها، بس زي ما الموضوع دا كان فضيحه ليا وقتها كان السبب ان هيام اتكلمت معايا وقالتلي:
-انت اللى كتبت الجواب ده؟
كان سؤال مباشر وصريح وجاوبتها وقولتلها:
-ايوه انا.
كتبته لمين؟
ليكي.
وقتها ابتمت وفرحت ومشيت، ومن بعدها بقينا نتكلم باستمرار وعرفتني انها معجبه بيا هي كمان من زمان، وفضلت علاقتنا بالشكل دا لغايه لما دخلنا الجامعه، وبعد ما اتخرجنا روحت لـ اهلها علشان اتقدم واتجوزها، بس ابوها رفضني في البدايه وقالي:
-انت لسه بتبتدي حياتك، ومافيش فرق سن بينك وبين بنتي، ودا مش صح والافضل ان يبقى في فرق سن على الاقل خمس سنين، دا غير انك لسه قدامك كام سنه لغايه لما تتحسن احوالك، علشان كده انا مش موافق ربنا يوفقك وتلاقي بنت الحلال.
خرجت من بيت هيام وانا مش طايق نفسي ولا طايق حياتي كلها، لدرجه اني فكرت انتحر، وقبل ما اعمل كده جالي اتصال من هيام وقالتلي:
-انا مش هتجوز غيرك يا كريم، اصبر عليا شويا انا هعرف اخلي بابا يوافق.
مكلمتها فرقت معايا وقتها، وخلتني اصبر فعلا، وبعد كام شهر لقيت ابوها بيتصل عليا وبيعرفني انه موافق على جوازي من بنته، وفهمت وقتها ان هيام ضغطت عليه وهددتهم انها ممكن تنتحر لو هي ماتجوزتنيش وانها مستحيل تتجوز غيري، ووقتها الاب فهم ان دا اختيارها وان الافضل انه يسمع كلامها ودا اللى حصل.
اتجوزت هيام وعشنا حياتنا مع بعض، وابتديت احسن من احوالي الماديه لغايه لما بقت ممتازه، وهيام هي كمان كانت بتشتغل وكل حاجه بقت في احسن الاحوال بس للاسف موضوع الانجاب هو اللى اتأخر، وراحت هيام للدكتور وقالها انها عندها مشاكل بسيطه في الانجاب هتتحل مع بعض العلاج، ووقتها هي ماطلبتش مني اروح اكشف لانها اقتنعت ان المشكله عندها وبقت تتابع مع الدكتور، بس انا بعد فتره روحت لدكتور هي ماتعرفهوش وبعد التحاليل قالي:
-للاسف انك تخلف دلوقتي حاجه شبه مستحيله، بس يمكن مع الوقت الحال يتحسن.
كانت صدمه ليا وقررت وقتها اني ماقولش لـ هيام، كنت خايف انها تسبني علشان الخلفه وعشنا حياتنا، بس ماكنتش اعرف ان هيام حب حياتي هتخوني مع حد تاني وتنسي كل اللى كان بنا.
ــــــــــــــــــــــــــــــــــــــــ
بعد ما خرجت من قسم الشرطه انا روحت قعد عند واحد صحبي، ماروحتش المستشفى تاني او حتي روحت البيت، وطبعا اجراءات الشرطه بتاخد وقت، وكانت هيام ماتعرفش اللى انا عملت وحاولت تتصل عليا اكتر من مره بس انا كنت عامل لـ تليفونها حظر، ولما خرجت من المستشفى وبعد كام يوم لما اتحسنت وماعرفتش توصلي راحت لـ قسم الشرطه، راحت وقابلت الضابط وقالتله:
-انا جايه اقدم بلاغ باختفاء جوزي، انا قلقانه عليه اوي وخايفه يكون حصله حاجه.
وقتها الشرطه خدت بيناتي منها، وبعد ما حطوا بيناتي على الشبكه بتاعتهم، وقتها ظهر المحضر اللى قدمته من كام يوم، ووقتها ضابط الشرطه قالها:
-جوز حضرتك يا مدام مقدم فيكي بلاغ.
طبعا هي اتصدمت وسألته وهي مصدومه:
-جوزي انا مقدم فيا بلاغ، ايه الكلام اللى انت بتقوله دا، اكيد في سوء تفاهم او تشابه اسماء.
-لا مافيش أي تشابه اسماء او حتى سوء تفاهم، البيانات اللى عندنا صحيحه واحنا كنا هنبعتلك علشان نبداء تحقيق معاكي.
-بلاغ ايه اللى مقدمه عني؟
-بيتهمك بالزنا وكمان بيقول ان الطفله اللى انتي خلفتيها مش بنته، ومقدم تقرير من المستشفى بيقول ن الطفله مش بنته.
اتعصبت وقتها هيام وعلت صوتها على ضابط الشرطه وقالت:
-انت بتقول ايه، انت اتجننت.
انفعل الضابط عليها وقالها:
-الزمي حدودك بدل ما ارميكي في الحبس، اعرفي انتي فين وبتتكلمي مع مين.
وقتها هيام قعدت وقالت:
-انت مش فاهم يا فندم انا مستحيل اصدق ان كريم يعمل اللى انت بتقوله دا، انا وكريم اتجوزنا بعد قصه حب كبيره، انا وقفت قدام اهلي وعملت اضراب عن الاكل وهددتهم اني هموت نفسي لو ماتجوزتهوش، وبعد كل دا يتهمني باني خونته مع شخص تاني، طيب اصدق الكلام دا ازاي، مهو لو فعلا كلامك دا صحيح يبقى انا ضيعت عمري كله وانا معاه، عشر سنين من حياتي ضيعتها عليه، ومش بس كده معني كلامك ان الراجل اللى حبيته واتجوزته ماعرفهوش يا فندم، ازاي بعد كل داع اوزني اتقبل كلامك بالساهل كده؟
لما ضابط الشرطه سمع كلمها هي صعبت عليه، يمكن صدقها مش عارف، المهم انه طلب منها تهدي وقالها:
-احنا مابنعتمدش تقارير المستشفيات الخاصه، احنا لازم بنعرض الحاله على الطب الشرعي، والمطلوب منك يا مدام تصبري لغايه لما نعرض الطفله على الطب الشرعي ونعمل تحليل الحمض النووي ليها.
وبعد فتره تقبلت هيام كلام الضابط، وفعلا ابتدوا في الاجراءات بعد اصدار امر من النيابه، وكلنا انتظرنا تقرير الطب الشرعي، وكنت موجود هناك وقتها، وشوفت هيام اللى وقفت قدامي وقالتلي:
-انت ازاي تفكر بالطريقه دي، ازاي تصدق اني انا اخونك يا كريم، انت فاهم بتتهم مين، انا هيام حبيبه عمرك.
كلمها كان وجعني اوي، وقولتلها:
-انا عقيم يا هيام مش بخلف، دي الحقيقه اللى خبتها عنك سنين، ازاي دلوقتي انتي جايه تقولي انك حامل مني، اتقبل الموضوع دا ازاي، قوليلي أي راجل مكاني ممكن يتقبل الوضع دا ازاي.
كلامي صدمها وخلاها مش قادره تتكلم خالص، وكنت فاكر انها سكتت لانها مذنبه فعلا، بس الحقيقه انها سكتت علشان كانت مصدومه من كلامي ومن الحقيقه اللى خبتها عنها سنين طويله.
بعد كده طلع نتيجه تقرير الطب الشرعي، وقتها كانت النتيجه ان الطفله فعلا مش بنتي، وقتها انا وقفت قدام هيام وقولتلها:
-كان نفسي اطلع غلط، قوليلي ازاي قدرتي تعملي فيا كده؟
فضلت تعيط وقتها وتحلف بكل الايمانات انها بريئه، وانها عمرها ما خنتني خالص، وقالتلي اكيد في حاجه غلط، ووطت على ايدي تبوسها وقالت:
-صدقني يا كريم انا بقول الحقيقه، انت كده بتقتلني بايدك.
سبتها ومشيت من غير ما اتكلم معاها بأي كلمه خالص، واستمرت القضيه شغاله، واتحولت من النيابه للمحكمه، وكنت موجود في قاعه المحكمه لما القاضي سأل هيام عن ابو الطفله، وقتها انكرت وقالت:
-ماخنتش جوزي يا فندم، عمري ما خنته ولا فكرت اخونه في يوم من الايام.
وكنت موجود لما القاضي اصدر حكمه وقال:
-حكمت المحكمه بأجماع الاراء على حبس المتهمه سنه مع تكليفها مصاريف المحاماه.
وقتها بس انا وقفت قدمها وطلقتها، وخرجت من المحكمه وانا حاسس اني خسران مش كسبان، خسرت سمعتي وحياتي ومراتي اللى كنت بحبها وحبتني او اللى كانت بتحبني، ومعرفتش هي خانتني مع مين وازاي.
شكرا لزيارتكم عالم روايات سكيرهوم
