رواية مرافئ الحنين الفصل الأول بقلم مها ابراهيم
- هتفضلي كدا لِحد إمتي؟
- لِحد ما أبطل أحبه .
- و دَ إمتىٰ إن شاء لله،
إبراهيم هيخطب يا سارة فوقي .
نطقتها فريدة بضيق،
حركت نظري من علىٰ موج البحر،
وِثبت عيوني عليها بشرود .
- بس أنا مش عارفة ابطل إحبه،
دَ حُب طفولتي، أول حد حبيته،
قلبي دَ لما دق! دق ليه هو!.
قُلت أخر جملة وأنا بضرب قلبي بعنف،
دموعي نزلت غصب عني، إبراهيم جاري،
وحبيب أيامي .
إتعلقت بيه وأنا طفلة، وكبرت وأنا شايلة نفس المشاعر ناحيته .
بقالي سنتين تقريبًا بكلمه في الموبايل،
من غير ما أهلي يعرفوا، لإني عارفة إنهم لو إكتشفوا الموضوع هيمنعوني أتعامل معاه تاني .
بس...
بعد كل ده هو بيعتبرني صديقة وبس!.
بيحب زميلته في الشغل، دايماً يحكيلي عنها،
وقد ايه هي جميلة .
و النهاردة قرر انه ياخد خطوه ويتقدملها .
عيني كانت متعلقة بالموج،
لحد ما صوت الرعد قطع شرودي، وبصيت للسما اللي كانت ملبدة بالغيوم .
- الجو هيمطر، قومي خلينا نمشي .
مسحت دموعي بهدوء، وقُمت معاها،
وأنا مقررة إني أنهي أي حاجة تربطني بِإبرأهيم .
حوطت فريدة كتفي بلطف وهي بتقول:
- متزعليش يَاسُو ربنا هيعوضك خيراً منه .
هزيت راسي بهدوء، وهي كملت:
- الحُب جميل جداً، بس للِ يستغلة صح،
أسفة يعني لو هقول حاجة تزعلك بس إنتِ غلطِ لما كلمتيه من ورا أهلك، إبراهيم شايفك ملجأ ليه،
بيلجأ ليكِ في الوقت اللِ هو عايزة وبس .
- معاكِ حق .
قُلتها بشرود، وسكِتنا،
وسِكتت الطُرقات معانا .
مع صوت المَطر اللِ بدأ ينزل كُنا قربنا من العمارة اللِ ساكنين فيها .
- إطلعي إنتِ يا فريدة،
أنا هروح المحل أشوف عمو حسن .
أومات بهدوء وطلعت،
وأنا كملت طريقي لِمحل الورد بتاعنا،
من حُبي في الورد بابا فتحلي محل، ببقىٰ مبسوطة وأنا مُحاطة بالورد، بحس إن الحياة لسه جميلة .
- أهلا بست البنات،
دَ أنا قولت مش هتيجي النهاردة، كل دَ تأخير!.
قلها عمو حسن بإبتسامة جميلة وهو بيتقدم مني وبيرحب بيا.
إبتسمت بلطف وأنا برد عليه:
- أسفة جداً يعمو، كنت مع فريدة والوقت سرقنا .
- ولا يهمك يست البنات،
بس كنت عايز أستاذن عشان أبني جاي النهاردة .
شهقت بأسف وأنا بقول:
- اااه، أنا أسفة جداً والله،
كان المفروض تمشي من بدري .
- ولا يهمك، همشي أنا بقىٰ .
مشي عمو حسن، وأنا فضلت واقفة مكاني ثواني قبل ما اتقدم من مزهرية فيها وردة مميزة،
وردة توليب بالون الأزرق الفاتح،
لوني المُفضل، سقيتها بقدر كافِ من المايه .
كنت لسه بسقي باقي الورد،
لما سمعت صوت الباب بيتفتح يُعلن عن دخول أحدهم، فرفعت عيني ناحية المدخل .
سمعت صوتهُ بينادي باسمي،
صوت إبراهيم إللِ كنت زمان أول ما أسمعه عند باب المحل أسيب كل إللِ في إيدي وأجري أستقبله،
لكن المرة دي فضلت واقفة مكاني .
- سارة إزيك؟
رديت وأنا بحط إزازة المايه مكانها،
ولفيت ناحيته بهدوء، وأنا برسم بسمة مزيفة علىٰ شفايفي .
- أهلا بحضرتك يَـ أستاذ إبراهيم .
ظهر بعض الاستغراب علىٰ محياه وهو بيقول:
- أيه الأسلوب الرسمي ده يَـ سارة؟!
تجاهلت سؤالهُ، وأنا بلف ناحيه الورد وقُلت:
- عايز حاجة مُعينة ولا؟
إتقدم من المزهرية إللِ فيها الوردة بتاعتي،
وبص عليها بإبتسامة وهو بيقول:
- ولو إني عارف إنك مستحيل تفرطي في الوردة دي، كنت أخدتها لِ ليلي .
قطبت حاجبي بإستغراب.
- ليلي؟!
- أيوا رايح أتقدملها النهاردة،
إعملي حاجة علىٰ ذوقك بقىٰ .
- ربنا يتمملك علىٰ خير إن شاء لله.
وبدأت أجهز باقة الورد،
اللِ هيهديها لِصاحبة الحظ الجميل .
في وسط ما أنا بجهز الورد بشرود،
دخلت شوكة من الوردة في صباعي .
سحبت منديل أمسح قطرات الدم بهدوء،
وبتتردد في دماغي أغنية لِ نِهاد فتوح
وِ هي بتقول:
|الحُب و لاَ يوم فَرحنِي،
و الوَرد شُوكُه جَرحنِي |
- إنتِ كويسة؟
جملة خرجت من إبراهيم،
إبتسمت بمرارة وأنا بقدمله بوكية الورد،
ورديت بهدوء :
- جداً .
إبتسم وهو بيخرج محفظته عشان يحاسب،
لكني رفضت وأنا بقول:
- خلاص، اعتبره مني.. أتمنى يعجبها .
- بحب فيكِ ذوقك الرَاقي والله يا سارة .
إبتسمت له،
وهو اتجه ناحيه الباب عشان يخرج،
لكنُه وقف، ولف بص علىٰ المزهرية وهو بيقول:
- لسه عندي أمل تديني زهرة من زهورك المفضلة .
خرج إبراهيم،
وفضلت عيوني متعلقة بالباب وهو بيتأرجح رايح جاي، لحد ما استقر واتقفل، وساب وراه هدوء تقيل، كأن المكان رجع فاضي من تاني .
عيني راحت علىٰ الوردة،
و بتلقائية اترددت جملة إبراهيم في دماغي .
- لسه عندي أمل تديني زهرة من زهورك المفضلة .
- دَ في أحلامك،
عايز تاخدها عشان تديها لست الحسن والجمال!
تمتمت بضيق، وأنا برجع أسقي الورد .
كان الليل بدأ يهدى،
والمطر رجع ينزل من جديد.
سحبت المظلة المركونة في ركن المحل وخرجت، لقيت مجموعة من الأطفال بيلعبوا تحت المطر،
صوت ضحكاتهم مالي المكان،
وواحد منهم بيجري ورا التاني وسط المايه إللِ اتجمعت على الطريق .
إبتسمت من غير ما أحس،
افتكرت قد إيه كنت بحب المطر وأنا صغيرة،
بصيت للمظلة إللِ في إيدي،
وبعدها رجعت بصيت للأطفال،
فضحكت بخفة ونزلتها من فوق راسي .
وسبت المطر يلمس وشي،
ومشيت على مهلي،
وسط صوت ضحكاتهم .
ـــــــــــــــــــــــــــــــــ
كنت لسه بفتح باب الشقة بهدوء،
لما سمعت صوت خبط جاي من ناحية السطح .
وقفت مكاني وبصيت ناحية السلم باستغراب،
الوقت كان اتأخر،
ومحدش من سكان العمارة بيطلع السطح في الجو ده، خصوصًا في الشتا .
وبما إني ساكنة في الدور الأخير،
مكانش قدامي غير إني أطلع أشوف في إيه .
قفلت باب الشقة بهدوء،
واتسحبت ناحية السلم بخطوات حذرة .
مسكت أول حاجة وقعت إيدي عليها،
وفضلت مترددة للحظات قبل ما أبدأ أطلع،
وأنا بحاول أستجمع شجاعتي .
- أنتَ مين؟!
- نزل الكشاف ده يا غبي .
قُلتها بعصبية لما الكائن اللِ قدامي ثبت الكشاف علىٰ عيني .
- إنتِ اللِ مين وبتعملي ايه هنا؟
- واللهِ أنا اللِ المفروض أسألك،
أنت مين وبتعمل ايه فوق سطح عِمارتنا،
لتكون حرامي؟
بصلي بإستنكار، ورد:
- حرامي مين يا ست الحلوين، هسرق ايه؟!
بابور الغاز ده مثلاً؟
- دمك يلطش علىٰ فكرة،
أخلص وقول إنتَ مين؟
زفر بملل وهو بيقول:
- أنا تميم حسن يستي، والدي ساكن هنا،
وأنا كنت مسافر برا مصر وجيت النهاردة،
ها أي أوامر تانيه؟
- اه يعني إنتَ إبن عمو حسن .
إبتسم بإستفزاز، ورد :
- ايوا ما شاء لله عليكِ نبيها أوي .
تجاهلت إستفزازه ليا وأنا بسألهُ:
- وبتعمل ايه هنا في الوقت ده!
لف ناحيه طبق الدش، وهو بيقول بزهق:
- الإشارة بايظة بسبب المطر،
فكنت بحاول أصلحه .
بصيت ناحية طبق الدش،
وبعدها رجعت بصيت له،
طالع في الوقت ده عشان الإشارة!.
