رواية سواق التكتوك الفصل الأول بقلم أميرة عادل
أنا يونس، سواق توكتوك في منطقة شعبية، وبحكم شغلي قابلت ناس كتير..
الموظف، وربة المنزل، والطلاب.
بس عمري في حياتي ما شوفت زبونة في غرابة "ورد"!
اليوم ده كانت الساعة ١١:٤٥ بالظبط، وكنت بلف شوية بالتوكتوك في المنطقة قبل ما أرجع البيت.
وفجأة، ظهرت قدامي بنت لابسة عباية سودة، وفي إيدها شنطة سودا. استغربت وقوفها في الشارع في وقت زي ده، وخصوصًا إنها كانت لوحدها. شاورت ليا فوقفت.
قالت بصوت هادي:
"شارع السلام يا أسطى؟؟"
رديت عليها باستعجال:
"اركبي يا آنسة"..
أول ما ركبت، حسيت بتقل غريب في الكنبة اللي ورا، رغم إن البنت كانت رفيعة جدًا!!
حاولت أتجاهل الموضوع ومعلقش عليه عشان متتحرجش، بس طول الطريق كنت حاسس بحرارة شديدة جاية من ورا.
وكل ما أبص على البنت في المراية ألاقيها بتفرك في إيديها وبتبص يمين وشمال، كأنها متوترة أو خايفة من حاجة معينة، ده غير الشنطة السودا اللي شادة عليها بإيدها كأنها خايفة تتسرق منها!!
وفضلت سايق وأنا كل شوية أبص عليها في المراية، لحد ما لقيت راجل واقف على جنب الطريق وبيشاور ليا عشان أوصله.
هديت السرعة شوية، لكنه أول ما قربت منه نده عليّا:
"يا أسطى، رايح شارع المحطة؟"
رديت عليه وأنا مكمل طريقي:
"معلش يا أستاذ، مش فاضي، معايا زبونة".
الغريب إن الراجل ما ردش عليا، لكنه بص للكنبة اللي ورايا باستغراب، وفضل مركز نظره عليها كأنه مش فاهم حاجة أو شايف حاجة أنا مش شايفها!!
استغربت من نظراته، فبصيت له في المراية مرة تانية، لقيته لسه واقف مكانه.
بعد كام دقيقة، وصلت أخيرًا للمكان اللي طلبته، ووقفت بالتوكتوك قدام العمارة.
نزلت البنت بسرعة، وطلعتلي ١٠٠ جنيه ومدتهالي من غير ما تنطق بكلمة، وبعدها جريت ناحية مدخل العمارة وطلعت السلم بسرعة، كأنها بتهرب من حاجة وراها!!
فضلت متابعها بعيني لحد ما اختفت عن نظري، وبصراحة تصرفاتها زودت فضولي أكتر ناحيتها، وبعدها لفيت ورجعت للبيت.
وأنا في طريقي قابلني زبون تاني، وقلت آخده معايا في طريقي، بس أول ما ركب الراجل سألني باستغراب:
"إيه الد.م إللي على الكنبة ده يا كابتن؟؟"
د.م؟؟
نزلت من التوكتوك وأنا مستغرب وجود د.م في التوكتوك بتاعي.
وفعلًا كان موجود، فبررت للزبون وأنا بحاول أقنع نفسي بكلامي:
"كان في زبونة ركبت قبلك معاها شنطة سودا، الظاهر فيها لحمة وده د.مها".
هز الراجل راسه وكأنه مش مقتنع بكلامي، وقال:
"يبقى نضفها كويس عشان متخسرش زباينك".
وبعدها سابني ومشي..
مبقتش فاهم إيه إللي بيحصل معايا ده! يعني الراجل مش مصدق إن ده لحمة؟ هيكون د.م بني آدم مثلًا!!
في اللحظة دي اتعصبت جامد من البنت اللي كانت السبب في الحوار ده كله.
رجعت البيت بعد يوم طويل، وأمي استقبلتني بابتسامة:
"أحضرلك العشا يا يونس؟؟"
رديت عليها بتعب:
"لا يا أمي، أنا جعان نوم بس".
ودخلت أوضتي عشان أنام.
في البداية كنت حاسس بأرق، بس بعد دقايق بدأت أدخل في النوم من شدة التعب.
لكن فجأة لقيت نفسي واقف في مكان غريب أوي، وظهرت قدامي نفس البنت إللي ركبت معايا التوكتوك، والنار محاوطاها من كل مكان زي الدايرة.
كانت قاعدة في النص وبتعيط، حاولت أقرب منها عشان أساعدها بس النار كانت شديدة أوي والدخان كاتم على نفسي.
أول ما لمحتني قامت وهي بتقول بعياط:
"ساعدني يا يونس.. ساعدني.. ساعدني!"
قومت من النوم مفزوع بسبب الحلم المرعب إللي شوفته، وجوايا سؤال واحد: ليه البنت دي ظهرتلي في أحلامي وعوزاني أساعدها في إيه؟؟
تاني يوم نزلت شغلي كالعادة، وحاولت أنسى اللي حصل امبارح، وقلت أكيد مجرد كابوس بسبب التعب.
وفضلت شغال طول النهار عشان أقدر أجمع شوية فلوس أتجوز بيهم.
وعلى الساعة ١١:٤٥ بالظبط وأنا ماشي، ظهرت قدامي نفس البنت إللي شوفتها امبارح، وكانت بتشاور ليا وفي إيدها نفس الشنطة السودا!!
ورغم غرابة الموضوع، إلا إني وقفتلها.
قالت بنفس الصوت الهادي:
"شارع السلام يا أسطى؟؟"
من شدة الصدمة معرفتش أرد، واكتفيت بهز راسي، وهي ركبت.
ونفس إللي حصل المرة اللي فاتت، حسيت بتقل في الكنبة اللي ورا أول ما ركبت.
وبدون ما تاخد بالها، كنت ببصلها كل شوية في المراية، ووقتها لاحظت كدمات زرقا على وشها!!
وإيديها اللي كانت بتفرك في الشنطة بتوتر موقفتش لحظة.
بعد دقايق وصلت لنفس العمارة إللي وصلتها ليها امبارح.
وقفت التوكتوك، والبنت كانت لسه هتنزل، بس فجأة وقعت من طولها!!
جريت عليها بسرعة عشان أساعدها، وكانت بتحاول تقوم بمساعدتي، لكن فجأة بطرف عيني لمحت الشنطة السودا مرمية جنبها، والظاهر إنها اتقطعت بسبب الوقعة!!
بصيت ناحيتها، وأول ما شفت اللي ظاهر من جواها اتجمدت مكاني...
كان دراع بني آدم**
