رواية جثث الحموات الفصل الأول بقلم محمود الأمين
الحكاية بدأت بصدمة كبيرة.. كنا بنحقق في جري.مة ق.تل تمت بغرض السرقة، ولكن بعد مرور 48 ساعة بس، وصلت القسم واحدة اسمها مدام سوزان وطلبت تقابلني، وقالت إن هي عارفة مين اللي عمل كده في والدتها. وأول ما دخلت المكتب عندي، قالت إنها جاية تقدم بلاغ وبتتهم جوزها ممدوح سالم بق.تل والدتها.. وعشان تفهموا اللي حصل، هنرجع 48 ساعة لورا.
بلاغ بيوصل من واحدة اسمها مدام سوزان، كانت في شغلها، ولما رجعت البيت لقيت في كسر في الباب، وأول ما دخلت شافت والدتها نرمين واقعة على الأرض وسايحة في دمها. طلبت الإسعاف والشرطة، وبلغت والدها اللي هو الأستاذ حسين.
لما وصلنا المكان، كان واضح من كل حاجة حوالينا إن الموضوع مش جري.مة ق.تل متعمدة، وده كان باين من آثار الاقتحام اللي موجودة، والشقة اللي تعرضت للسرقة. وواضح إن مدام نرمين، والدة مدام سوزان، شافت الحرامي وحاولت تمنعه إنه يسرق الشقة، ولكن ضربها على دماغها بآلة حادة وتسبب في وفاتها.
طبعًا رجالة الطب الشرعي فحصت الجث.ة، وعرفنا من خلال الفحص المبدئي إنها ضربة واحدة على الرأس، ولكن الضربة كانت مؤثرة بشكل كبير لدرجة إنها عملت نزيف داخلي.. وطبعًا رجالة المعمل الجنائي رفعت البصمات، وأكدوا إن الموضوع سرقة، واستشهدوا على كده بالحاجات اللي اتسرقت من الشقة والكسر اللي كان في باب الشقة.
طيب إيه اللي اتغير وخلّى مدام سوزان تيجي بعد 48 ساعة من الجري.مة عشان تقول إن جوزها هو اللي عمل كده؟ خصوصًا إننا ما تقابلناش لحد دلوقتي...
...
#جثث_الحموات
الجزء الأول
مدام سوزان أكدت في أقوالها على الخلافات اللي كانت ما بين ممدوح وبين والدتها مدام نرمين، وإنهم على طول كانوا مختلفين مع بعض وبتحصل مشاكل، وبدأت تحكي مواقف كانت بتحصل، ولكن من وجهة نظري كانت مواقف عادية بتحصل ما بين واحد وحماته أو واحدة وحماتها، المشاكل المتعارف عليها في المجتمع المصري. لكن كل اللي حكتُه مدام سوزان مش دليل إدانة إن الأستاذ ممدوح هو اللي ارتكب الجري.مة.
ومع إصرارها، قررنا إننا نعمل استدعاء للأستاذ ممدوح سالم، وعرفنا من مدام سوزان إنه ممكن يكون موجود في بيت أهله، واللي كان في منطقة شعبية. وبعتنا الاستدعاء على هناك، ولكن الاستدعاء ما وصلش، مفيش حد ساكن في البيت ده.. وأهل المنطقة قالوا أغرب حاجة ممكن نتخيلها.
وهي إن الأستاذ ممدوح سالم متوفي من أربع شهور!
طبعًا الصدمة دي خلتنا نستدعي مدام سوزان عشان نسألها عن جوزها، واللي أكدت إنه عايش، وآخر مرة شافته كان قبل الجري.مة بيومين، وإن في خلاف حصل ما بينهم كالعاده بسبب والدتها، وهو لم حاجته وقال إنه هيسيب البيت.
طلبت منها تكتب كل بياناته في ورقة، ولو في صورة ليه تبقى تمام.
ولكن ساعتها مدام سوزان قالت إن الجوازة كانت صالونات، وهو كان بيرفض موضوع التصوير نهائي، وإن العيشة ما بينهم كانت عيشة روتينية لأقصى حد.
كنت حاسس إن الموضوع ده وراه لغز كبير، وبدأنا نعمل تحرياتنا عن الشخص اللي كتبت بياناته ده، اللي اسمه ممدوح سالم، واللي كان مكتوب في الورقة عنه إنه بيشتغل مهندس معماري.
وبعد تحريات كتير اتعملت عنه، اتفاجئنا إنها كلها بتصب إن الشخص اللي بتتكلم عليه مدام سوزان هو هو الشخص اللي المفروض ساكن في الحي الشعبي في العنوان اللي إحنا روحناه، والناس هناك أكدت إن الأستاذ ممدوح سالم مات.
وساعتها كان لازم نعرف القبر اللي كان مدفون فيه، والنيابة طلعت إذن باستخراج جث.ة الأستاذ ممدوح سالم وعرضها على مدام سوزان عشان ننهي الجدل في الموضوع ده.
ولما روحنا المقابر، عرفنا إن الأستاذ ممدوح سالم مقطوع من شجرة، وإن هو كان آخر فرد في العيلة.. التربي فتح القبر، وتم استخراج الجث.ة، واتنقلت للطب الشرعي، وتم استدعاء مدام سوزان حسين للمشرحة عشان تتعرف على الجث.ة اللي كانت بدأت تدخل في مراحل التعفن، ولكن ما زالت الملامح ظاهرة.
بس لما مدام سوزان اطلعت على الجث.ة، قالت إن ده مش جوزي!
طيب، دي حاجة كويسة، رغم إن التحريات بتقول إن الشخص اللي مدام سوزان ذكرت بياناته ده هو ممدوح سالم اللي توفى من أربع شهور، ولكن أنا افترضت إنه جايز التحريات يكون فيها غلطة، وإن أكيد في شخص تاني اسمه ممدوح سالم اللي هي تقصده، وهنجيبه ونحقق معاه.
بس الكلام ده كله بيطلع غلط، وده مع ظهور تقرير المعمل الجنائي والبصمات الخاص بالجري.مة اللي حصلت في شقة مدام سوزان واتقتلت فيها والدتها مدام نرمين.. عشان البصمات اللي موجودة في مسرح الجري.مة تطابقت مع بصمات جث.ة ممدوح سالم!
وإحنا كنا واقفين ومش فاهمين أي حاجة؟!.. إزاي؟!!
كنت حاسس إنها رحلة مع المجهول، عاوزين نوصل للي عمل كده، واللي كنا فاكرين في البداية إنها حادثة سرقة عادية، ولكن بلاغ مدام سوزان فتح قدامنا باب كله غموض، ومش عارفين هيودينا على فين؟
وطبعًا رجالة البحث الجنائي كانت لسه بتعمل تحريات عن المجني عليها، وعن العداوات اللي كانت معاها، وساعتها بتوصلنا معلومة من رجالة البحث الجنائي إن في شخص ممكن يكون هو اللي ارتكب الجري.مة، والشخص ده كان يعرف ممدوح سالم الحقيقي اللي لقينا جث.ته في القبر.
والشخص ده يبقى ابن مدام نرمين، اسمه عمر.. ومن خلال تحرياتنا بنعرف إن عمر كان بيتعالج في مصحة نفسية الفترة اللي فاتت، ولكن هو في الأصل بيشتغل مهندس معماري، نفس شغلانة ممدوح سالم اللي مات من أربع شهور.
طيب عمر ده كان بيتعالج ليه؟
عمر ده شاب عنده 30 سنة، وكان متجوز بنت اسمها صفاء وبيحبها جدًا، ولكن الكل اكتشف إن عمر مش متزن من ساعة ما اتجوزها، وكان بيعمل تصرفات غريبة وبقى شخص عدواني بطريقة ما تتوصفش، وساعتها عرفوا إنه بياخد أدوية مهدئة أثرت عنده على الجهاز العصبي.
وطبعًا كل أصابع الاتهام وقتها كانت بتروح لصفاء، اللي كانت شايفة إنها مظلومة، ولكن والدة عمر، مدام نرمين، بهدلتها وقتها، فخرجت صفاء في اليوم ده منهارة من العياط على أساس إنها رايحة عند بيت والدها، ولكن وهي بتعدي الشارع في عربية خبطتها وماتت، ودي كانت صدمة في حياة عمر، ده غير إنها كانت حامل كمان، يعني خسر مراته وابنه.
عشان بعدها الكل يكتشف إن اللي كان بيحط المهدئات دي لعمر هي والدته مدام نرمين، والغرض من ده إنها كانت عايزة تلبسها لصفاء، وإنها كانت مش بتحبها وعاوزاهم يتطلقوا.. كمان التحريات بتثبت إن طفولة عمر كانت مريرة، وإن والدته كانت بتعامله معاملة وحشة.
وعمر خرج من المصحة من حوالي شهر، وقاعد في شقة لوحده الفترة دي.
طبعًا كل المعلومات دي تبين مدى كراهية عمر لوالدته، واللي خلى النيابة تطلب ضبطه وإحضاره والتحقيق معاه، خصوصًا إنه كان يعرف ممدوح سالم الشخص اللي توفى من أربع شهور.
واتحركنا فعلًا على الشقة، ولما وصلنا هناك لقينا عمر فعلًا موجود، بس الصدمة إننا لقينا المسروقات فعلًا في الشقة عنده.. يعني شكنا كان في محله، ورغم إنكاره، إلا إن كل حاجة كانت ضده.
ولكن يفضل عندنا سؤال مهم: مين ممدوح سالم اللي متجوز مدام سوزان، واللي كانت متهمة بقت.ل والدتها؟!
....
السؤال ما كانش مهم على قد ما إحنا وصلنا للي ارتكب الجري.مة، واللي رافض يعترف لحد دلوقتي.. ولكن في الوقت ده بيوصلنا بلاغ جديد عن صراخ خارج من بيت وأصوات تكسير، وطبعًا اتحركنا على طول عشان نعرف إيه صحة البلاغ ده..
ولكن أول ما وصلنا هناك ودخلنا البيت ده، كانت في انتظارنا صدمة غير متوقعة.. والصدمة دي كانت...
