رواية الوصفة الأولي الفصل الأول بقلم هنا محمد
"هو أنا لازم أشتغل فعلًا؟!"
قالتها تيا وهي تنظر من نافذة السيارة إلى المطعم الفخم والضخم الذي يقف أمامها، ثم ألقت نظرة أخيرة على هاتفها لتتأكد من أنها وصلت إلى المكان الصحيح.
دفعت الحساب للسائق، ونزلت وهي تعدّل حقيبتها على كتفها، ثم وقفت لثوانٍ أمام المطعم.
كان المكان أفخم بكثير مما رأته في الصور على الإنترنت؛ واجهته الزجاجية الواسعة واللافتة الكبيرة أعلى المدخل كانتا كافيتين لتجعلاها تشعر بأنها تدخل مكانًا لا تنتمي إليه
أخذت نفسًا عميقًا وقالت لنفسها:
- عادي يا تيا، شوية شغل وهتتعودي... هو يعني هيحصل إيه؟
دخلت المطعم، وكانت أول ملاحظة لها هي الهدوء والنظام اللذان يملآن المكان، على عكس الحركة السريعة التي كانت تظهر من خلف الأبواب المؤدية إلى المطبخ.
اتجهت إلى مكتب الاستقبال، وابتسمت للموظفة التي رفعت عينيها بمجرد رؤيتها.
- صباح الخير.
- صباح النور، أقدر أساعدك؟
- أنا تيا، جاية أبدأ شغل النهارده.
ابتسمت الموظفة وأشارت إلى الممر الموجود على يمينها.
- أهلًا بيكي، اتفضلي من هنا، المدير مستنيكي
هزت تيا رأسها وتحركت في الاتجاه الذي أشارت إليه، وهي تحاول أن تبدو هادئة وواثقة.
بعد دقائق، وقفت أمام مكتب المدير، وقبل أن تطرق الباب، فُتح من الداخل وظهر أمامها رجل يرتدي زي الطهاة الأبيض
- إنتِ تيا، مش كده؟
- أيوه، حضرتك؟
- عارفة أنا مين ولا لأ؟
- الحقيقة لا.
ابتسم ابتسامة خفيفة ورد:
- واضح... أنا ياسين، رئيس الطهاة هنا
هزت تيا رأسها بلا اهتمام كبير، ثم سألته:
- طيب ومين اللي هيدربني؟
- أنا
- تمام، ممكن أعرف هتدرب في إيه بالظبط؟
- هتعرفي كل حاجة. مبدئيًا إنتِ هتتدربي في قسم التحضير والتجهيز
- وده إيه؟
نظر إليها ياسين للحظات قبل أن يجيب:
- ده واضح إنك متعرفيش حاجة عن المطبخ فعلًا... الموضوع ببساطة إنك هتتعلمي تجهيز المكونات، وتقشير وتقطيع الخضار، وتحضير كل حاجة قبل ما تدخل على محطات الطبخ
تحدثت تيا بتقطّع وهي تحاول الدفاع عن نفسها:
- على فكرة... أنا أعرف أعمل الكلام ده عادي، أنا مش جاهلة أوي كده!
- ما أنا عارف والدك عرفني كل حاجة وفهمني إنك مش بتعرفي تعملي كباية شاي حتى مفيش مشكلة هتتعلمي وتفهمي كل حاجة. يلا اغسلي إيدك وتعالي
- ما أنا غسلتها قبل ما أجي!
نظر إليها ياسين من أعلى إلى أسفل، ثم قال بنفاد صبر:
- إنتِ غريبة! اغسلي إيدك ويلا، معنديش وقت أشرحلك كل حاجة لوحدك
********
دفعت الموظفة باب المطبخ، وسبقت تيا بخطوتين وهي تقول:
- اتفضلي، ده المطبخ
دخلت تيا خلفها، وما إن فُتح الباب حتى توقفت للحظة تتأمل المكان.
كان المطبخ واسعًا للغاية، وكل شخص فيه يعرف مهمته جيدًا. أصوات الأواني تملأ المكان، بعض العاملين يقطعون الخضروات، وآخرون يجهزون الأطباق، بينما يتحرك الباقون بسرعة بين اماكن العمل المختلفة
لكن وسط كل تلك الحركة، كان هناك شخص واحد واضح أن الجميع يرجع إليه قبل اتخاذ أي قرار
كان ياسين واقفًا أمام طاولة التقديم، يرتدي زي الطهاة الأبيض وأكمامه مرفوعة حتى ساعديه ويمسك بطبق أمامه يفحصه بعناية.
اقترب منه عمر وهو يحمل طبقًا من المعكرونه
- ياسين، دوق كده.
رفع ياسين عينيه نحو الطبق، ثم أمسك بالشوكة وتذوق قطعة صغيرة. ظل صامتًا للحظة، قبل أن ينظر إلى عمر.
- الصوص حلو، بس إنت زودت الفلفل شوية.
نظر عمر إليه باستغراب.
- شوية إيه بس؟ ده أنا حاطط نفس الكمية اللي بنحطها كل مرة!
تذوق ياسين مرة أخرى، ثم وضع الشوكة جانبًا.
- وأنا بقولك زودت، يعني زودت. رجّعه وعدّل الكمية.
أخذ عمر الطبق وهو يتمتم:
- حاضر يا سيدي، هو إحنا بنطبخ ولا بنعمل عملية؟
ضحكت ماريا من مكانها وهي تجهز طلبًا آخر.
- اسكت يا عمر، بدل ما يخليك تعيد الطبق كله.
نظر إليها عمر من بعيد.
- إنتِ آخر واحدة تتكلمي، مش إنتِ اللي نسيتي الملح في طلب امبارح؟
ردت ماريا دون أن ترفع عينيها:
- كنت باختبر ذوق الزباين.
ضحك ياسين وهز رأسه.
- ربنا يستر من اختباراتكم دي... يلا، كل واحد في شغله، علشان ورانا يوم طويل.
عاد ياسين إلى الأطباق الموجودة أمامه، وبدأ يراجع شكل كل طبق قبل السماح بخروجه. كان يعدّل ترتيب قطع الطعام، ويمسح آثار الصوص من أطراف الأطباق، ويتأكد من أن كل شيء موضوع في مكانه الصحيح.
وفي تلك اللحظة، اقترب منه مؤمن حاملًا طبقًا صغيرًا يحتوي على خليط
- ياسين، ممكن تدوق ده؟
أخذ ياسين الملعقة وتذوق قليلًا، ثم نظر إلى مؤمن.
- الطعم ممتاز، بس القوام محتاج يبقى أخف شوية.
ابتسم مؤمن.
- رهف قالتلي كده برضه.
نظر إليه ياسين باستنكار مصطنع.
- أمال جاي تسألني ليه طالما رهف قالتلك؟
ضحك مؤمن وعاد إلى قسم الحلويات
كانت تيا تقف عند الباب تتابع كل ما يحدث، لا تعرف إلى من تنظر أو على ماذا تركز، وكل لحظة تسمع اسمًا جديدًا أو طلبًا مختلفًا.
أما الموظفة التي كانت معها، فاقتربت منها وقالت:
- ده ياسين، رئيس الطهاة هنا أي حاجة تخص المطبخ بترجعله ... اظن هو عرفك بنفسه وهو المسؤول عن كل الأقسام
ظلت تيا تنظر ناحيته، وفي تلك اللحظة كان ياسين يتحدث مع أحد الموظفين، قبل أن يلاحظ طبقًا وُضع أمامه دون مراجعته.
رفع عينيه وقال بنبرة حازمة:
- مين اللي خرج الطبق ده من غير ما يوريني؟
ساد الصمت للحظات، ثم أجاب أحد العاملين:
- أنا يا شيف
- طب تعالى بص عليه كده وقولي إيه اللي ناقصه
اقترب الموظف ونظر إلى الطبق، وبعد ثوانٍ اكتشف الخطأ بنفسه
أشار ياسين إلى الطبق وقال:
- مفيش طبق بيخرج من هنا غير لما تتأكدوا إنه كامل ... الزبون مش المفروض يستنى عشان إحنا مستعجلين.
هز الموظف رأسه وأخذ الطبق ليعدّله.
ابتلعت تيا ريقها، ثم نظرت إلى الموظفة التي تقف بجانبها
- هو دايمًا كده؟
ابتسمت الموظفة وهي تجيب:
- لأ، ده كده هادي أوي
وقبل أن تتمكن تيا من الرد، رفع ياسين عينيه ناحيتهما، وما إن وقعت عيناه عليها حتى أشار إليها بالاقتراب.
- اتفضلي يا آنسة تيا، مكسوفة ولا إيه؟
اقتربت تيا قليلًا وردت:
- لا، أنا بس مش فاهمة أعمل إيه
ابتسم ياسين وأشار إلى طاولة تجهيز قريبة
- شايفة المكان ده؟
- أيوه.
- أنا جهزتلك كل حاجة، ولكن علشان يكون في علمك، الموضوع ده مش هيتكرر كل يوم. المفروض بعد كده تعرفي مكان شغلك وتجهزيه بنفسك.
- أوكي، ماشي... أبدأ إيه؟
- قشري البطاطس.
نظرت تيا إلى البطاطس الموجودة أمامها، ثم رفعت عينيها إليه.
- بطاطس؟
- عندك اعتراض ولا إيه؟
- توقعت أعمل حاجة أرقى شوية.
ضحك ياسين بخفة وقال:
- معلش، الدنيا حظوظ بقى. أنا همشي أشوف الباقي على ما تخلصي. يلا.
كانت ماريا تتابع الحوار وهي تبتسم، فالتفت إليها ياسين فجأة وقال بصوت مرتفع:
- ركزي في شغلك يا ماريا، صوت ضحكتك واصل هنا!
عادت ماريا إلى عملها وهي تحاول كتم ضحكتها.
نظر ياسين إلى تيا مرة أخرى.
- خلاص كده، عايزة حاجة تاني يا تيا؟
- لا، شكرًا لحضرتك.
- العفو
*******
وبعد مرور ربع ساعة، كانت تيا قد انتهت من تقشير البطاطس، بل وقررت أن تستغل الوقت في تقطيع بعض الخضروات أيضًا
كانت تنظر إلى ما أنجزته برضا واضح، حتى دخل ياسين إلى القسم واقترب من الطاولة
- عظيم، خلصتي؟
ابتسمت تيا بغرور وهي تشير إلى الخضروات.
- وقطعت خضار كمان!
نظر ياسين إلى ما أمامها، ثم التقط إحدى القطع وفحصها للحظات.
- كمان؟ طيب، اتفضلي ارميه بقى.
اختفت ابتسامتها في لحظة.
- أرميه ليه؟!
- أولًا أنا قلت قشري بطاطس فقط، مطلبتش منك حاجة غير كده. ثانيًا، التقطيع مش مظبوط. وثالثًا، إنتِ قطعتي البطاطس وبعدها مسكتي الخضار من غير ما تغسلي إيدك وتغيّري الأدوات. أنا مش عايز عك في المطبخ، سامعة؟
خفضت تيا عينيها وردت بضيق:
- تمام.
تدخلت ماريا وهي ترفع رأسها من فوق الطاولة:
- بالراحة عليها يا ياسين، البنت لسه جديدة. في إيه؟
نظر إليها ياسين ورد:
- هو أنا طلبت منها تعمل حاجة غير البطاطس دي؟ أنا بقولها على قواعد الشغل!
- وأنا اللي طلبت منها تقطعلي شوية خضار يا ياسين. إيه اللي حصل يعني؟ اهدا شوية.
تنهد ياسين ونظر إلى تيا مرة أخرى.
- ماشي، دربيها إنتِ بقى، بس خلي بالك من قواعد النظافة والتجهيز.
ثم ابتعد عائدًا إلى باقي الأقسام.
تنفست ماريا بضيق، وبعدها التفتت إلى تيا التي كانت تنظر إلى الخضروات بحزن.
- أوف... متزعليش. بصي، هو طريقته كده في الشغل، بس مع الوقت هتعرفي تتعاملي معاه. هو بس عليه ضغط كبير ومسؤولية المطعم كله فوق دماغه.
رفعت تيا عينيها إليها، وكانت تحاول منع دموعها.
- وأنا مالي؟ يتعصب عليا ليه؟
تركت ماريا ما بيدها واقتربت منها باستغراب.
- في إيه بس؟ بتعيطي ليه؟
مسحت تيا عينيها بسرعة وقالت:
- أول مرة حد يعاملني كده.
نظرت إليها ماريا لثوانٍ، ثم ابتسمت وهي تحاول تخفيف الموقف.
- إنتِ بتعيطي من أول يوم؟ يا عيني عليكي! ده إنتِ لسه ما شفتيش حاجة.
نظرت إليها تيا بصدمة.
- يعني إيه؟!
ضحكت ماريا وردت:
- بهزر معاكي يا بنتي! متقلقيش، يومين وهتتعودي على جو المطبخ ده. بس نصيحة مني، متاخديش كل كلمة من ياسين على أعصابك... هو صعب في الشغل، بس مش وحش.
عادت تيا للنظر إلى الخضروات أمامها، ثم تنهدت وقالت:
- أنا شكلي استعجلت لما وافقت على الشغلانة دي.
ضحكت ماريا وهي تعود إلى طاولتها.
- لسه بدري على الندم يا تيا!
